Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 23 février 2020

samedi 22 février 2020

N'poin causer picard

... avuc ches accints dech sud del Frinche.

????

J'esplique.

Ièr au matin, in buvant un ju avuc m'fanme, ale m'dit :

- "Min onme, j'ainmeroais eq tu foaiches quèk cose din ch'gardin avuc des bastaingues."

- "Des bastaingues ! Acoute-mi, m'fanme ; os disons bastains et mie bastaingues. Os sonmes mie à Mèrseille, El Warde o coèr Limbesch. Os disons ches "gues" quanq i in o din ch'mot, conme pèr eximpe, din wassingue."

Ale croéyoait...

Bin nan !

Feut qu'ale apprinche, vu qu'ale o né eiute pèrt qu'in Picardie. Et i li feut du tans.

Et mi, del patieinche.


jeudi 20 février 2020

T'ainmes unne fille

Min fiu, edpi quèks moés, t'ainmes - granmint - unne fille.
 
Edpi quèks smangnes, t'mère et mi l'savons, et tu sais qu'os l'savons, vu qu'os in avons causé un molet.

Un tiot molet, et j'diroais minme puss, un fin tiot molet.

T'ainmes unne fille, mais tu vux mie qu'os in causons, tu vux mie nos moutrer unne photo d'ale, et tu vux mie qu'os l'rincontrons !

Quoé-jou qu'i o  ?

Jou eq tu sais eq tu l'ainmeros poin pour ch'restant det vie ?

Jou qu'ale vut mie nos vir ?

O bin, j'o l'freusse, jou eq t'os honte ed tes pèrints ?

Fuche ureus, mais dis-nos porquoé eq tu vux mie tout cho.

Merchi.

Bec à ti,et au plaisi de t'vir.

Tout seu, o à deux.


mercredi 19 février 2020

Qui qu'o ainmé deus fanmes

... n'put pu foaire ed politike.

A moinss qu'il o ainmé ches deus fanmes unne aprè l'eute, et i o granmint ed tans, quanq i avoait mie d'ordinature et internénèt.

Mais avuc chl'affoaire ed verdi et Grivieu-ech-grivoés, j'espère qu'os avez comprins qu'i feut ête fin discret.

O coésir.

Unne et unne seule fanme din t'vie, et tu pux oser t'présinter àds élections,

Deus fanmes, et adon, feut foaire tcheue basse ; poin ed candidature àds élections pour ti.

Et cho, eq tu restes à Pèris o bin eute pèrte in Frinche. Minme din ch'sud.

Boinne canche à tertous ches candidats.

Et tiot bec à leus fanmes.


lundi 17 février 2020

Ech coronoviruch din mon ordinature

Ech coronoviruch chinoés, o vnant ed Chine, os in avez seuremint intindu causer pèr ches jornaleus del radio, del télévision et ed ches gasètes.

Cho foait miu d'un moés eq terttout n'in cause.

Et bin, mi, edpi unne smangne, i o unne o puss ed gins qui vu'te m'mette un coronoviruch din min ordinature.

Minme chi ch'est des chinoés o eds afritchins o coèr des ousbekichtins qui assaye'te, is écrive'te in inglés.

Mais j'o apprins chl'inglés quanq j'étoais jonne, et o comprins.

Leu message, toudi ch'minme, in conmintère :

- "Woo ! Ch'est mie coéyabe ! Jou eq tu sais quoé eq tin nom muché vut dire ?Appuie lò pour l'savoèr."

J'o poin appuyé, et min ordinature n'o poin hapé ch'coronoviruch ed ches ordinatures.

Qu'ej pinse.

Fuchez prudints !

Boinne jornée.

dimanche 16 février 2020

Unne boinne messe

Unne boinne messe dure unne eure.

Et pour vérifier qunne messe vo durer unne eure, et mie unne eure chonc o unne eure dis, i o ches dviseries dech tchuré chu chl'évangile dech jour.

Casi au mitan del messe.

Quanq ech tchuré définit de dviser, tu doés intindes ches clokes dechl'église.

J'esplique.

Mettons qu'el messe kminche à dis-eures et dmi, quanq ech tchuré définit, ches clokes sonne'te onze eures.

Chi ches clokes sonne'te et qu'ech tchuré cause toudi, l'est in rtèrd.

Chin quoé, ch'est boin : tu sros à nonne à t'moaison.

Aprè, pour qu'unne messe fuche boinne, o surtoute bèle, i o étou ches cants, et ches canteus, qui sont fin importants.

Mais ch'est mie ed cho qu'ej vouloais causer innui.

Boin diminche.


vendredi 14 février 2020

Ete ch'daraine

I o quèks jours, m'fanme m'annonche qu'ale o invie de s'présinter chu unne liste pour ches élections municipales dech moés ed mars.

- "Feut ête dis-nu, et ches gins ont dzoin ed mi pour ête ech dis-neuvienme", qu'ale m'dit.

- "Fin bin !" eq j'i réponds.

- " Ej sro dis-nuvienme".

- "Ouais !  Tu m'l'os dit".

Ouais, mais quèks jours aprè, ale m'dit qu'ale sroait quatrienme adjointe, pour s'otchuper ed ches loésirs.

I o du cangemint !

Aprè unne rinconte mardi avuc ches dis-uit eutes gins dech liste, ale m'o dit, merkerdi au vèpe,  qu'ale sroait achteure, chi ale est élue, première adjointe.

Seur qu'aprè ches élections,  ale sro merre.

Boin vote à  tertous, et boinne fête à tertous ches cadoreus.


jeudi 13 février 2020

Kmint qu'il o coési

L'eute jour, au vèpe et din un train qui m'ranmnaoit à m'moaison, i avoait pu granmint ed gins après ches deus premières stations.

J'ainme bin ch'momint-lò ; ej pux adon allonger mes gambes pour ch'reste dech voéyage.

In principe.

Mais l'eute jour, don, vlò unne gin qui monte din ch'train avuc un cros so à s'main, qui rbée pèrtoute, avinche, et viens s'assir. In face ed mi.

Adon qui i o granmint ed places pèrtoute.

Pourquoé ?

Quoé qu'i i o passé din ch'tête ?

Aprè tchinze minutes, le vlò qui pèrte s'assir eute pèrte.

P't'ête qu'il avoait comprins eq j'ainmoais poin n'mie pouvoèr m'détinde ches gambes.

P't'ête étou qu'i o cru eq j'étoais unne gin qu'ainme poin ête imbêter. Et qu'o des muskes qu'i sait utiliser.

P't'ête !


mardi 11 février 2020

Ech droét ed vote

Béto, eds élections.

Lisez :

Pour qu'un écologisse fuche élu présidint, i feudroait eq ches abes is vot'te.

Achteure, busez.

lundi 10 février 2020

A tertous

... qui n'rbéïez poin ches tans.

O qu'êtes in ville.

L'eute jour, ej vos o causé del lunme qu'étoait casi oronde, timpe au matin, à l'ouest.

Eh bin sinmdi, ale étoait toute intière.

Os l'avez mie vu ! A l'est.

Ureusemint pour vos, ej su lò.


A l'avnir, pensez à lver vos ius.


Boinne jornée.


dimanche 9 février 2020

Diu o bin foait ches coses

J'ose dire et écrire eq Diu, quanq il o foait l'monde, l'onme, l'fanme et tertous ches bétails, il o foait cho bin.

Et minme fin boin.

Pèr eximpe, ches bétails ont souvint quat pattes, pour ête seur d'en mie tchair. Conme ches caïèles o ches tabes in bos.

Et pour matcher, ches bétails ont unne bouke.

Pi un treu du tchu pour dérondir et évatchuer ches aliments.

Conme l'onme et l'fanme.

Diu o foait ches oésieux avuc eds ailes pour qu'is peuche'te voler. Chin aile, tu n'voles poin.

Ch'est pour cho étou qu'ej dis eq chi Diu o foait ches intestins ed l'Onme d'unne londjeur alintour ed dis mètes, uit pour ech fin intestin, et casi deus pour ech cros intestin, os pouvons mie laicier ches séruzyins vos in keuper trinte chintimètes in disant eq ch'est mie un problinme.

P't'ête eq ch'est mie un problinme pour eux ed les inlver, p't'ête qu'os êtes ureus ed perde un tiot tchilo, mais n'obliez mie eq Diu vos o foait avuc ches trinte chintimètes-lò.

Chi un séruzyin vos ls'inlève, os érez p't'ête des problinmes. Aprè qu'i vos les o inlvé.

N'vos laiciez mie foaire, ayez fiat in Diu.

Boin diminche à tertous.


samedi 8 février 2020

Ches tomates sont in dinger

P't'ête que conme mi, os avez apprins i o quèks jours, qu'i o achteure un nouvieu mau qui mnace ches tomates.

Ches scientifiques n'peu'te rin foaire, à pèrt tracher.

Don achteure, poin ed drogue pour djérir o protéger ches tomates.

Mais disez-mi ! Os sonmes in ivèr ! Et quanq-jou qu'is pousse'te ches tomates ?

Matchez ches produits ed saison.

Boinne jornée.


vendredi 7 février 2020

Ale est fin bèle

... et crosse : el lunme.

Au matin, quanq j'o pèrti ouvrer, alintour ed sis eures, dvant mi, à  l'ouest, i avoait chl' lunme.

Casi toute oronde ! I n'i mantchoait qu'un fin tiot morcieu, in heut à  main droéte.

Casi seur qu'edman,  ale sro toute oronde.

Mais feudro s'déjoutcher fin timpe au matin pour l'vir, et dman, os sonmes sinmdi.

Bec à tertous.


jeudi 6 février 2020

Feudro béto voter

Edpi avant-ièr au vèpe, j'o achteure, des keups, unne tiote fernète qui s'ouve in bos ed min ordinature, quanq ej sus in route à utiliser internénèt, et qui m'cartchule ech nombe ed jours, eures, minutes ed sgondes qu'i o coèr avant ches élections din ches villes.

A quoé-jou eq cho put servir ?

I o des gins, ches russes ?, ches anméritchins ?, qui vu'te qu'os alloème, au moinss mi, voter.

Cho kmincher quanq i restoait moinss ed quarante jours.

In rbéïant bin ches nombes, i sanne eq cho fuche pour cartchuler quanq i éro ches résultats. Bizarre !

Et vos ! Jou qu'os avez quèk cose conme chu vot ordinature ?

Ecrivez-mi.

Boinne jornée à tertous.


mercredi 5 février 2020

Pour ches galibiés

... qu'ont inter dis-uit et trinte ins d'âges.

Os avez invie ed pinser qu'ej su viu et nikdouille,

Os croéyez qu'os pouvez foaire quoé qu'os voulez quanq os voulez,

Os croéyez qu'os savez toute,

Os avez invie ed causer ed brin et d'piche, ed ches-vots o ed ches-eutes !

Os pouvez, mais poin à m'moaison.


mardi 4 février 2020

J'ainme bin ches chinoés

Os avez intindu ches jornaleus edpi ech début edl'innée  ?!

Ches chinoés ont invinté un nouvieu mau, et tertout o l'freusse de l'haper, ch'mau-lò. Et o l'freusse ed croéser un chinoés.

Minme in Frinche, ches gins ont l'freusse ed croéser un chinoés qu'est né in Franche et qu'o janmoais allé in Chine.

Dech keup-lò, ches chinoés, ed Frinche, di'te eq ches frinchoés, ed Frinche, qui sont mie chinoés sont racisses.

Mi, j'le su mie, racisse.

Unne pruve ?!

N'in vlò unne ;

Quanq j'écris à des gins, des keups ej mets un tiot dessin ed tête. Eh bin, ch'dessin, ej mets des chinoés.

Ches chinoés, toudi is ri'te, et des keups, is vos font un bieu tchuin ed ziu.


                                            
Adon eq ches uropéïens, i n'o qui sont trisses.

Qu'i sanne !












Eds uropéïens sont trisses ! Mi, nan .



Et ej truvoe cho bin puss régalant pour ches eutes.

Boinne canche à ches chinoés ed Frinche, et surtoute, étou, à ches chinoés ed Chine.


lundi 3 février 2020

Pour m'soégner

Verdi au matin, adon qu'ech train arrivoait in station, min nez o saingné.

Brin !

Seuremint eq ch'est vu eq j'ouve granmint et qu'ej su poin in forme.

Adon, à nonne, pour éviter eq cho rkminche, j'o allé acater du chucolat.

Du chucolat bin noèrt, et fin boin.

Feut s'qu'i feut.

Boinne jornée.


dimanche 2 février 2020

Ches saprés inglés

Os l'savez vu, inter verdi et sinmdi, ches inglés ont tchitté l'Urope.

Innui, don, deus jours aprè seulemint,  is rvien'te in Urope.

In Frinche.

Avuc chl'invie ed nos mette unne détchulotté.

Saprémint tchulottés, qu'is sont !

In puss, vont p't'ête réussir à nos l'mette, ech détchulotté !

A vir.

Boin diminche.


samedi 1 février 2020

Buvons un keup

..., buvous in deus,

À l'santé ed ches uropéiens,

À l'santé ed nos familles,

Et brin à tous ches inglés

Qui ont tchitté l'Urope.


vendredi 31 janvier 2020

Merchi min frère

... d'avir prins unne jornée ed vagances innui pour t'otchuper ed not mère.

T'in otchuper ?! Mie vraimint, vu qu'ale sro à l'ôpital, avuc ches séruzyins qui vont i keuper trinte chintimètes ed boéyeus.

Mais ti, tu sros étou à l'ôpital, ch'minme qu'ech chti ed not mère, et t'attindros, p't'ête in lisant un live et à acouter del musike, qu'ale s'rinville.

Merchi.

Seur eq ches eutes éfants, tiots-éfants ed not mère pinseront à ale.

Mi, pèr eximpe, ej mingero unne andouillète.

Bec à ti, et à not mère quanq ale s'rinvillero.


jeudi 30 janvier 2020

Un chévènemint

Ch'est un évènemint, mais lonmé conme cho à Belfort, tiote ville et fin tiot dépèrtemint ed l'est del Frinche.

Ches belfortains, leus fanmes, leus filles et eus fius, is di'te chévènemint et mie évènemint à  coeuse, et in mémoère, ed leu ancien merre, msieur Chévènemint, chti qui préfèroait tchiter ch'gouvernement pour n'mie frunmer ch'bouke.

A Belfort, i o unne étchipe ed fotbal qu'o battu mardi au vèpe echl'étchipe ed Montpellier.

Et cho, ch'est un esploét, don, un chévènemint.

Achteure, is attinde'te chl'étchipe ed Pèris.

Chi is gaingne'te, cho sro un miracle.

Mais chi is ju'te unne rinconte avuc Epnal, leu voésin, qu'o foait, li, un esploét in battant Lile, cho sro vraimint poin un chévènemint pour eux.

Ej croés minme pouvoèr dire qu'is sroai'te déchus.


mardi 28 janvier 2020

Os sonmes coèr in ivèr

I o quèks jours, unne fanme avuc qui j'ouve o étè minger in obliant quèk cose din chin burieu.

Achteure, ale est din chin lit pour uit jours. 

Don, chi os voulez mie avoèr à rester à vo'moaison, pensez à vos éreilles.

Boinne jornée, et boin ivèr.


 , 



dimanche 26 janvier 2020

Not cailleu est un roéyeume

Ch'est ch'tite d'un tiot film qui passe innui, diminche, à l'télé. Bretonne.

Télé bretonne, vu qu'i s'agit del vie ed deus jonnes, alintour ed trèse ins d'âges, chu ch'Ile ed Sein qui foait moinss ed deus kilomètes carré.

A vir, achteure, chu internénet, l'troésienme .


samedi 25 janvier 2020

Unne boinne érchète

Innui, ej vos vos pértager unne érchète ed famille.

L'érchète, qu'os attindez : l'tèrte rindjaine. In vrai, ch'est une tèrte à l'crème, mais un onke, bieu-fiu d'em taïonne, lonmé cho l'tèrte rindjaine, vu qu'os in avoème chake keup qu'os alloème vir mes taïons, ches pèrints d'em mère.

Pour kmincher, feut foaire l'pâte berzillée ! I vos feut del frainne, mettons troés-chint grammes, du bure (mitan del frainne in grammes), de l'ieu et un molet ed sé. Os touillez l'frainne avuc ch'bure, et quanq os sintez qu'i feut del'ieu, os in mettez un tiot molet. Pi, os rtouillez.

Os pourrez foaire deus tèrtes ed vint-uit chintimètes.

Aprè, os étalez, in mettez unne din un plat pour ch'four, et os foaisez tchuire un molet, mettons trinte minutes, in ayant pitché avant l'tèrte avuc unne fortchète.

Achteure, i feut foaire del crinme. Un lite ed lait, du chuke, chint-chincante grammes, del frainne, chint grammes, du chuke vanillé, deus us et quat gannes d'us.

Ches quat blancs eds us, os les mettrez aprè à tchuire din unne païèle, avuc un molet ed sé. Ch'est fin boin à matcher.

Ch'est l'crinme patissière.

Os faoisez boulir ech lait din unne castrole in minme tans qu'os touillez l'frainne, ch'bure, ches us et ch'chuke vanillé din unne eute castrole.

Quanq os êtes prêt et qu'ech laito bouli, os l'veresez din l'eute castrole, os  touillez chu ch'fu.

Quanq cho kminche à foaire des tiotes bulles, os artez ch'fu et os artez ed touillez.

Os l'laiciez refroédir quèks minutes, pi os in mettez granmint din l'tèrte.

Aprè, os rmettez din ch'four, alintour ed vint à trinte minutes. Vo'tèrte est boinne à matcher quanq i o un molet ed noèrt dsu.

D'avinche, boinne tchuisine, et boin accion à tertous.

Avant eq Mardi cros arrive.

Et boin sinmdi à tertous.


vendredi 24 janvier 2020

T'es fin bèle

Vlò unne phrase eq ches fanmes ainme'te intinde.

Et casi seur qu'un cadoreus o dit cho un jour à unne fanme.

Casi !

Mais poin seur. Qu'i péroait.

Adon, pour vous aidier, quanq-jou qu'i feut dire à unne fanme qu'ale est fin bèle ?

Un, quanq os l'ainmez. Os n'pouvez mie ainmer unne fanme seulemint vu qu'os l'truvoez bèle -  in vrai, os pouvez mais cho n'duro poin -, mais chi os ainmez unne fanme, adon, os l'truvoez bèle.

Mi, m'fanme mzure un mète quarante-uit, pése chint-deus tchilos et o unne gambe un molet puss courte eq l'eute. Sis chintimètes.

Et j'l'ainme.

Deuze, feut dire à unne fanme qu'ale est fin bèle quand i o dzoin qu'ale l'intinde.

Eximpe : t'fanme rinte au vèpe à l'moaison avuc ches cavieus keupés et rouves.  Ti, t'ainmes vraimint poin, mais ale sanne fin ureuse. Adon, feut i dire "t'es fin bèle !  Cho t'vos bin".

Et attinde quèks smangnes.

Boinne jornée.


jeudi 23 janvier 2020

Un sapré watieu inglés

Os causons granmint ed l'inglétère et ed ches inglés edpi quèks innées, et surtoute achteure in janvié, avuc un prince et s'fanme qui vu'te tchitter leu ouvrage ed prince et tchitter l'inglétère, et avuc l'inglétère qui vo, achteure ch'est seur, tchitter l'Urope.

Mais in déchimbe, pour ches gins qui connoai'te, i o un watieu inglés qu'os mingeons à Noë.

Un fin boin watieu que foaisoait m'taïonne, que foait toudi m'mère, à qui foait un cros bec, et que foait edpi troés ins, et j'su fièr d'ale, m'fanme.

Pour ch'watieu, i feut des raisins ed Tchorinthe, du cras ed bu o du bure, des noés ed muchcade, du chuke, un torchon, del canèle, du rhum, du tans, eds us, des croéssants.

Et p't'ête d'eutes coses.

Ech watieu, i o des gins qui ainme'te, d'eutes qu'ont du mau à in minger.

I o étou, malureusemint, au moinss unne gin qui n'in minge poin et qui dit eq ch'est dédjeulasse.

Mi, ej vux bin toute, o casi : qu'unne gin n'minge poin ech watieu inglés, ch'est un droét. Mais qu'unne gin diche eq ch'est dédjeulasse, ch'est poin acceptabe ; pèr respect pour chti qui l'o tchuisiné.

A moinss d'ête un cros nasu.


mardi 21 janvier 2020

Ach tchul ed ches vakes

Pour ête ach tchul ed ches vakes,  os in doutez, feut ête drière ches bétails.

Conme ech viu dsu l'photo d'in dsou.


I méne ches vakes et un toèr din un pré, tranchillemint, conme l'froait Titisse.

Quèks sgondes aprè eq j'euche prins l'photo-lò, i vo les foaire torner à man gueuche et monter pèr un tiot kmin din un bos, aidié pèr chin tchyin.

Ech toèr vo n'in profiter pour assayer ed sé seuver, mais ch'tchyin vo l'in impêtcher.

Mi, j'ainme vir cho ; un onme qui prind chin tans pour foaire ches coses qu'il o à  foaire, chin rouspéter.

J'ainmeroais in croéser, o n'in suive, puss souvint.

Trantchille, conme Mimile.

Boinne jornée.


lundi 20 janvier 2020

Feut eq tu mèrches deus eures

... ch'père, qu'ale m'dit, sinmdi à nonne, m'fille qu'apprind à ête séruzyin.

Adon sinmdi aprè-nonne, ej pèrte mèrcher.

Ej mèrche, mèrche, prinds des photos, mèrche, prinds es photos, mèrche, mèrche, et rinte à m'moaison.

Cho foaisoait unne eure et quarante-sèt minutes qu'ej mèrchoais.

Brin !

Avuc ches jours, o surtoute leu durée, qui rintchérisse'te, mie aisié ed savoèr l'eure qu'il est.

J'o rpèrti.

Trinte minutes ed puss, et casi pu ed photos, vu que jé kminchoais à vir ches étoéles et unne planète din ches tans.

Quanq j'o rvenu, m'fille m'dit eq ch'est alintour ed deus eures qu'i feut qu'ej mèrche.

Mais unne eure quarante-sèt ! Jou eq ch'est alintour ed deus eures, o jou eq ch'est moinss qu'alintour ed deus eures ?

Pour définir chl'article, put eq mantcher, j'o mèrché miu ed deus eures.

Et ch'étoait bin.

Boinne jornée.

Em bèle-mère et min bieu-frère, fiu d'em bèle-mère, qu'avoai'te vos âges innui, cros bec à vos.


dimanche 19 janvier 2020

Un batinme russe

Ches russes orthodoskes, ech dis-nu janvié ed chake innée, is peu'te rnouveler leu batinme.

In s'plotchant din eds ieus qui sont, chake innée, bénites pèr un pope.

A l'cour, i put i avir des timpératures négatives, vint-chonc o quarante degrés in dsou ed zéro, et ches ieus glées, is font un treu, déschinde'te din ches ieus, et plonque'te troés keups leu tête din l'ieu.

Pi rsort'te.

Adon, innui, minme chi in Urope ed l'ouest, os sonmes surtoute catholikes, os pouvons pinser et prier pour nos frères et soeurs orthodoskes.

Boin diminche.


samedi 18 janvier 2020

Ete dbeut din ch'train

Quanq i o granmint ed gins din ch'train, pèr eximpe, ch'verdi au vèpe, i o toudi des gins qui sont dbeut ach dépèrt dech train.

Arrivée à l'première station des gins déchinde'te, et quèks uns mont'te din ch'train.

Mais quanq din un wagon à compèrtimints ed uit, i o adon quèks places ed libe et eq des gins dbeut les laice'te vide, ej comprinds mie.

Mais ej l'o vu.

Ièr au vèpe, à l'première station, pi coèr un molet minme à l'deusinme.

Ch'est cho qu'ed voéyager, os voéyons des coses surprindantes.

A moinss eq rester dbeut vint minutes chin bouger fuche boin pour l'santé.

Boin sinmdi.


vendredi 17 janvier 2020

Unne terrorisse

Ech premier keup d'em vie qu'ej voés un, ch'étoait unne, terrorisse ! Ch'étoait ièr au matin, din ch'train.

Ej vos conte.

Ièr au matin, don, j'étoais din ch'train quanq à unne station monte unne jonne bélote fanme.

Voélée, et avuc un cros so à ch'main.

Des fanmes conme cho, os in voéyons ed tans in tans, vos et mi.

Mais lò, durant trinte minutes ed voéyage, l'fille l'o foait qu'apprinde del chimie.

Ch'est conme cho eq j'o comprins eq ch'étoait unne terrorisse.

Seuremint in route à préparer quèk cose ed mawais !

Feut mie juger ches gins chu leu djife.  Mi, j'o vu chin cahier avuc ches formules pour fabritcher des bombes.

Qu'ej croés.

Pèr prudinche pour ches eutes voéyageus, j'o rin foait à l'fanme durant ch'voéyage, et rin dit à ches eutes.

Malureusemint pour tertout, à l'arrivée,  ale o pèrti avant eq j'o pu l'neutraliser.

Brin !

Mais fuchez seur qu'ej veille.

Boinne jornée.



jeudi 16 janvier 2020

Esplitcher ches rtèrds

Ièr, din ch'train, déchidémint, os étoème in rtèrd à l'arrivée.

Un molet puss, dis minutes, qu'ach dépèrt, dis minutes étou.

Ech contrôleu nos annonche, avant qu'os déchindoème dech train :

- "Mes gins, j'espère qu'os avez foait un boin voéyage et vos prie ed nos estchuser pour ch'rtèrd dû à du rtèrd durant ch'trajet".

Bin voèyons !

Tertout o ri.

Maginons !

Un séruzyin : "os avez du mau vu qu'os avez du mau".

Un arbite ; "os avez poin gaingné, vu qu'os avez perdu".

Unne fanme à chin onme, o un onme à s'fanme : "ej té tchitte, vu qu'ej m'in vos".

...

I o mie pu aisié pour esplitcher ches coses.

Et cho foait rire.

Boinne jornée.


mercredi 15 janvier 2020

Ches nouvieus

Ièr au vèpe,  ej monte din ch'train pour rintrer à m'moaison, et quanq j'o vu ches gins qu'i avoait ndan, ej m'o dmindé chi j'avoais poin foait unne berlure : j'érconnoaissoais mie une gin.

I o fallu que jé dminde.

Ch'étoait ch'boin train, mais i sanne qu'i o granmint ed nouvieus.

Minme cose au matin, mais i o mie ed berlure possibe.

Boinne jornée à tertous.


mardi 14 janvier 2020

Pauve tiot fiu

Os avez lu et intindu, edpi quèks jours, ech prinche inglés qui vut vive conme vos et mi !

Li pi s'fanme vu'te ouvrer pour vive, et n'pu rchuvoèr d'argint del reine o dech fiu-à-grindes-éreilles dech reine, père dech prinche.

Fin bin !

Tertout, surtoute ches jornaleus, et surtoute ches jornaleus inglés, in cause.

Acoutez bin !

Ech jonne prinche o rchu, quanq s'mère est morte, trinte-quat milons d'uros o ed lives inglèses, et chin père i baille, o bailloait, chake innée miu ed troés milons.

Mi ej dis eq chi avuc tout cho, ech prinche, et s'fanme et leus éfants, l'ont dman et aprè des problinmes pour vive, i o adon un sapré problinme.

Et pour des milars ed gins din ch'monde.


lundi 13 janvier 2020

Troés smangnes aprè

... avir vu min séruzyin, avir foait dis uit dis et m'ête soégné edpi troés smangnes, j'o rtorné vir min séruzyin l'eute sinmdi.

Dis-uit onze !

Ed miu in miu, chi os pouvons dire cho, pour ch'qui est ed moinss in moinss bin pour m'santé.

- "Artez ed bir du vin ! Artez ed minger du freumage ! Foaisez du sport ! " qu'i m'o granmint conseillé, ech jonne séruzyin, "allez vir un tchèrdiologue et prindez unne nouvèle drogue !"


Combin ed tans conme cho, à n'poin bir ed vin, n'poin minger ed boin freumage et à prinde unne crosse drogue ?

L'reste d'ém vie.

Brin ed brin !


samedi 11 janvier 2020

Ech célèbe Nanard

Edpi quèks smangnes, chake keup eq j'acoute un jornaleu o rbée l'télévision, cho cause ed ches âges ed Nanard.

?

Feudroait les canger o minme, surtoute, les rassatcher.

Innui, au matin, ch'gouvernemint l'o accepté ed les rassatcher.

Pauve Nanard ! Li qu'est jornaleu, un fin boin, et écrivain frinchoés et qu'éro quater-vint-chonc ins ach moés ed moai qui vient !

L'est unne gin bin gintille, régalante, et fin tchultivée ; Adon ! Pourquoé i rassatcher ches âges, à Nanard ?

Aprè, ej comprinds mie kmint qu'il éroait étè possible d'i blotcher ches âges à soéçante-quat ins adon qu'il in o vint ed puss.

Et vos ! Os avez comprins ?

Esplitchez mi.

A moinss eq cho fuche d'én pu i souhaiter ches âges !?

Chi t'es un nveu qu'o ches âges innui, bec à ti.


vendredi 10 janvier 2020

Cacouille ed début d'innée

... et d'achteure.

L'Société Nationale ed ches Kmins ed Fer vos souhaite unne boinne innée deus-mile-quatore et vos présinte ches estchuses pour ch'rtèrd.


jeudi 9 janvier 2020

Eds uites froai'te du mau

Un jour, un bieu-frère, ej pux mie vos dire qu'il o ieu ches âges ièr, o hapé granmint ed mau à s'panche in matchant unne uite.

In matchant unne uite !

Qu'i nos o dit.

L'avoait étou bu quèks chintilites ed Cognac, mais li est seur eq cho vient ed l'uite. Qu'il o ieu du mau.

Mettons !

Matcher eds uites, in principe, ch'est fin boin.

Ch'est pour cho qu'innui j'écris, pèr solidarité avuc ches tcheuilleus d'uites dech Morbihin qui n'ont pu ch'droét, durant quèks jours, d'in vinde.

Corage, ches bretons !

.

mercredi 8 janvier 2020

Dis-uit dis

Cho n'est mie ches résultats d'unne rinconte ed rugby inter deus étchipes conme Toulo et Toulo, pèr eximpe. Pour ches gins qu'ainme'te ech rugby mais qui n'sai'te mie, i o ieu trèse trèse ech darain keup, in dėchimbe, à Toulo.

Cho pourroait ête deus notes ieues à eds épruves à l'école, unne fin boinne note, chi ch'est cartchulé chu vint, et unne note au mitan ed ches eutes notes.

Mais nan ! Innui, ch'est poin cho.

Ch'est eute cose ; puss is sont heuts, puss t'es in dinger.

Qu'is di'te ches séruzyins.

I feudroait miu avir douse sèt.

Qu'ej croés.

Dis-uit dis, feut s'soégner.

Ech séruzyin eq j'o vu, unne jonne fanme, bin foaite mais mie gintille, vnoait d'avir chin diplônme i o quèks smangnes.

- "Os avez cho, i feut prinde cho (conme drogue) pour vos soégner. Cho foait vint-chonc uros".

Mais kmint eq cho s'foait eq j'o cho conme notes, ale o mie traché à savoèr.

Nulle qu'ale est ! Eq j'ose écrire. Minme in étant bèle.

Achteure, ej mé soégne. Et j'vo assayer ed comprinde dò eq cho vient.

Pour éviter ed prinde ches drogues toute m'vie.

Boinne jornée à tertous.

Chi t'es min bieu-frère et eq t'os ets âges innui,  bec à ti.


mardi 7 janvier 2020

Ch'étoait des gins conme vos et mi

Jean, Fane, Flipe, Nanard, Georges, Zaza, Franck, Muss, Michou, Fréd, Ahmed, vos qu'étoai'te écriveus, chytchiatre, cadoreu, correcteu et qu'êtes mort i ochonc ins, os vos oblions mie.

Et os foaisons, o dvons foaire toute pour eq ches gins n'vos oblie'te mie.

Z'êtes morts pour rin, à coeuse ed deus cros nikdouilles qu'avoai'te del haine din leu sanke.

Malureusemint pour vos, vos familles, vos conmorades, et malureusemint pour nos.


lundi 6 janvier 2020

Ej m'o foait fin tiot

... dvant unne tige.

Os connoaissez seuremint l'fin boinne canchon frinchoése "Ej m'o foait fin tiot dvant unne poupée", à n'poin confonde avuc unne eute canchon, boinne étou, qui s'lonme "L'poupée qui foait nan".

Mi étou, ej pux m'foare fin tiot, quanq i feut.

Minme dvant unne tige.

Ch'étoait ièr, i foaisoait bieu, ej m'o promné deus eures aprè-nonne.

Avuc, conme à chake keup, min appareil photo din unne poke o din m'man.

J'alloais définir l'promnade quanq j'o vu unne tige, casi toute seule, din un can.

Adon, ej m'o baissié, minme joutché chu l'keuchie, pour l'prinde in photo.

Rbéïez !


J'érgrète mi ed m'ête foait fin tiot, minme chi j'o ieu du mau, aprè, à m'déjoutcher.

Boinne jornée, boin ivèr à tertous.

Vive ches roés !


samedi 4 janvier 2020

Un cailleu ed puss in moinss

..., et vlan !

Ches tères ont tranné. Et détruit ch'village dech Teil, in Ardèche.

J'esplique.

Ech darain onze novimbe, os l'avez seuremint intindu, i o ieu un trimblemint ed tère in Frinche, din l'sud-est.

Minme chi i in avoait jonmoais ieu edpi granmint d'innées, i péroait eq ch'est possibe eq cho arrive lò-bos.

 Don, ch'est arrivé.

Et ches scieintifiques, qui n'avoai'te rin vu vnir, ont traché pour comprinde.

Et pour truvoer un coupabe. P't'ête !?

Z'ont mie truvoé ed coupabe, mais eds esplications.

Edpi eds innées, alintour dech village dech Teil, i o unne interprinze qui rassaque des cailleus, des cros cailleus, pour n'in foaire des tiots.

Ches scieintifiques pense'te qu'un jour, ech darain onze novimbe, echl'interprinze o rassaqué un cailleu ed trop, chti qu'o rintchéri ech risque eq ches tères tranne'te.

Et z'ont tranné.

Os pouvons lonmer cho chl'effet paviole : unne seutrèle pête din ches mers à ches Malouines, alintour edl'Argintine, et t'os unne timpête à Camaret, in Bretanne.

Don, in rassatchant ech fanmeus cailleu, ed trop, ches tères ont tranné et un village o étè berzillé.

Et malureusemint pour ches gins, tu pux achteure rmette ch'cailleu à s'place, l'tère restro conme ale est achteure.

Mais eute pèrte ?


vendredi 3 janvier 2020

Adé Marie

Din ches églises o eute pèrt, i o des canteus qui cant'te, des keups, ches Avé Maria ed Djounot o d'eutes compositeus.

Innui, mi, j'écris Adé Marie, in dvisant d'unne soeur, l'première, ed min père.

Respect.

J'o apprins ech trinte déchimbe qu'es vie alloait s'definir din quèks tans, vu qu'ale vient d'avir ed cros problinmes din chin cervieu.

Achteure, ale est poin morte, mais n'est pu in état ed lire min blog.

J'écris in pinsant surtoute à ches éfants, mes cousins et cousines, et à ches frères et soeurs, bieus-frères et bèlés-soeurs coèr in vie.

M'tante Marie vo rjoinde din quèks tans chin onme, Dédé, et un ed ches fius, pèrti, li, fin jonne, malureusemint.

Marie et Dédé étoai'te ortillons din un tiot village del Sonme inter Voéyéne et Epville dò qu'is ont toudi vétchu edpi leu mériage.

Dédé est mort din un ôpital à Hin, Marie n'in fro béto autant.

Adé, Tante Marie ! J'espère eq tu n'soufriros poin. O poin granmint, et poin granmint ed tans.

Bec à ti.


jeudi 2 janvier 2020

Ej connoais un poaiyis

... dò qu'i foait mie boin i vive.

Surtoute inter ech vint-quat déchimbe et l'nouvèle innée. O minme, inter ech vint-quat déchimbe et quèks jours aprè l'nouvèle innée : chi tu hapes un mau o chi tu t'afoles, pèr eximpe, un génou in tchaisant chu un cailleu, i o poin ed séruzyin, infirmière, dintisse et eute pour t'soégner.

Casi tchinze jours dò eq t'es obligé d'ête in forme.

Unne tiote gastrointérite ? Nan !

Put eq mantcher, minme chi tu voéyoais unne gin pour t'soégner, i o pu ed formacrie. Et cho, ch'est pour granmint ed tans. Echl'apotitchère, formacyin,, i savoait point cartchuler.

Aprè puss ed vint-chonc innées d'études in toute !

Os pouvez m'dire qu'os avons mie toudi dzoin d'un séruzyin o eute gin qui soégne pour vive.

Vrai !

Mais din ch'village, mile-chonc-chint gins qui i rest'te, i o pu ed banke, ed tchuré et béto, i éro un nouvieu merre, mais viu.

Adon, évitez d'i vnir.

Kminchez bin l'innée.


mercredi 1 janvier 2020

Méchante innée

Ej vos souhaite unne boine innée deus-mile-vint ; fuchez ureus, vos et vos familles.


Mais j'o conme sintimint qu'ej vos avir, cht'innée, quèks méchantes nouvèles.

Ej viusis, tertout viusit, et i o des gins qu'ej connoais et eq j'ainme qui kminche'te à avir ed saprés âges.

Mais étou ed saprés problinmes ed santè. Malureusemint.

Ej connaois minme des jonnes, au moinss deus, qu'ont ed cros problinmes ed santé.

Cho m'foait du mau qu'ed penser qu'is vont p't'ête pèrtir pour toudi.

Combin qu'is sront ?

Os frons ches cartchuls in déchimbe, mais achteure, ej diroais chonc.