Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libe d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

dimanche 30 avril 2017

Deus bieus-frères

Quanq unne fille qu'o des frères  épouse un onme, echt'onme edvient ech bieu-frère ed ches frères dech fanme.

Os avez comprins ò feut qu'ej ré-estplique à nouvieu ?

Jé m'dis qu'os avez comprins.

Don, ej continue.

Echt'onme qu'o épousé l'soeur ed ches frères, il o in premier coési l'fille. Janmoais ches frères.

Don, i sroait possibe qu'il ainme mie ches frères. Et minme, qu'il ainme mie leus pèrints.

Adon, quanq t'os un bieu-fiu qui pèrt, ureus, foaire del bicylclète avuc tin fiu, li-étou, ureus, tu t'dis eq t'os del canche.

Et t'es ureus.

Becs à tertous.

samedi 29 avril 2017

Peillon d'in heut et Peillon d'in bos

J'o intindu l'eute jour un journaleu causer ed Peillon, tiot village din ches Alpes-Maritimes, alintour ed Nice.

I disoait eq din ch'dépèrtemint-lò, ch'est à Peillon qu'i o ieu ech puss cros pourchintage ed voés pour Marine Ech-Pen ech vint-troés avri.

Dech keup, ech journaleu o voulu aller vir ches gins et causer avuc eux.

Ouais, mais à Peillon, i o, chi os pouvons dire conme cho, deus villages : Peillon d' in heut, et Peillon d'in bos !

Mie aisié pour ech journaleu ed nos foaire comprinde pourquoé eq ches gins ont voté conme ho, surtoute qu'i sanne n'mie i avir, à Peillon d'in bos, et surtoute Peillon d'in heut, d'étringers qui i rest'te.
Quanq j'écris étringers, ej cause mie, per eximpe, ed nintoés o nichoés.

Malaisié ed vive à Peillon ?!

Mi, ej dis eq din un village conme cho, i doét surtoute est malaisié ed courir, vu, chi j'o bin comprins qu'i o des montées.

Bec à tertous.

vendredi 28 avril 2017

Tiotés annonches

Première annonche : jonne coupe, un molet miu ed chincante ins chatchun, vind tchioèr boin état, casi nouvieu (troés ins). Moinss ed deus-chint euros.


Mette un conmintère chi os êtes prindeu. Ech tchioèr sro néttié quanq os viendrez l'prinde.


Deusienme annonche : jonne coupe, casi trinte ins ed mèriage insanne, avuc chonc bieus éfants mais qui sont mie à vinde, prind cailleus o del tère pour mette din un treu.


Mette un conmintère chi os êtes bailleu.

jeudi 27 avril 2017

Du mau à no'tchuir - echl'épisode deus

Din ch'premier épisode, ej vos o apprins kmint qu'étoait né min premier rataïon, alintour ed dis-uit-chint.

Des règues ont kminché à ête foaites. 


Pi, i o ieu des rincontes d’ordjanisées inter tiotés étchipes, et un jour, inter étchipes ed poaiyis différints ; L’inglétère, l’Frinche, l’Bergike, echl’Irlande, echl’Espane. Et ed puss in puss. Minme ches anméritchins, surtoute dech sud, ont démuché et apprins à juer ach fotbal.

Et nos ! Quoé qu’os foaisoème ? Os prindoème des keups ! Et vos-i qu’ej te butche dech pié à man droéte, pi dech chti à man gueuche, pi d’un eute jueu. I o minme des keups ò os nos butchoait d’unne tète. Il arrivoait étou des keups qu’os fuchoème prins din des mans. Adon lò, os étoème ureus. Mais echt onme qui nos avoait prins conme ho nos mettoait à tère et nos butchoait à chin tour avuc chin pié.

Os avoème du mau, granmint ed mau à not boin tchuir, et étoème malureus ed vir eq des gins vnoai’te pour vir tout ho.

A suive.

mercredi 26 avril 2017

Es deusienme mort

Dman, timpe au matin, ech plombié vient amon nos pour inlver l'douche qu'os avoème edpi sis o sèt ins. P't'ête uit o nu ?!

L'douche, ch'est min père qui m'avoait - granmint - aidié à l'installer.

Edpi, min père est mort.

Vu qu'i m'sanne eq ch'est ech darain keup qu'il étoait evnu à no moaison pour foufter, p't'ête minme ech darain keup qu'il est evnu, dman, quanq j'ouvrérai, ech plombié tuero min père. Un deusienme keup. Et pour toudi.



Ho m'foait braire. Granmint braire ! Puss qu'es première mort.

Adé min père ! Ej t'ainmero toudi.

Pour tuer ech leu

I o des gins, is s'di'te eq vu qu'is sont granmint à avir l'freusse dech leu, is vont s'mette insanne et l'tuer, ech leu.

Mais i o malureusemint étou des gins qui s'croé'te eq vu qu'i o granmint ed gins qui vont s'mette insanne pour tuer ech leu, eux ont mie dzoin ed s'i mette. A cacher ech leu.

Berlure ! Crosse berlure !

Chi, pour ech gruyère os disons eq puss i o ed treus, moinss i o ed gruyère, pour ech leu, os pouvons dire eq moinss i o ed gins, puss i o ed treus.

Soin ! Feut mie in conclure eq chi i o moinss ed gins, i o moinss ed gruyère, vu qu'i o puss ed treus.

Ervenons ach leu qu'os voulons tuer !

Achteure eq j'écris, i m'sanne qu'ech leu vit coèr. Et li, il o mie freusse ed ches cacheus. Et ches ainnieus peu'te continuer d'avoèr l'freusse.

mardi 25 avril 2017

Un boin film

Chu l'cangne ed télévision picarde Arte (dech verbe picard arter), i o granmint ed boins films.

Granmint, malureusemint, n'sont mie frinchoés, mais ed ches poaiyis dech nord ed l'Urope.

Judi, ch'étoait un film in troés pèrties, un molet fin long, donmage quanq i feut ouvrer ech lindman,  qui s'lonmoait "Man basse chu Pepys Voée".

Ch'est un film inglés, in troés pèrties, qui conte ches aüres ed ches gins d'unne rue qui rchu'te des cartes postales d'eux et dsu i o écrit "os voulons quoé qu'os avez".

I o minme un keup ò un matin, quanq is déjoutche'te, is voé'te eq ch'est écrit chu l'keuchie ed leu rue.

A vir, chi os pouvez, chu internénet.

Becs à tertous, et vive ech cangne picarde ed télévision.

lundi 24 avril 2017

Tiote annonche

Urginche : picard causant étou frinchoés et inglés, capabe d'apprinde à causer eute cose (russe, moldave, arawak, swahili, yoruba, rodi, ...) trache poaiyis (Bergike, Vatican, Lesotho, Belize, St-Christophe-et Niévèch, ...) pour aller vive chonc ins et p't'ête puss.

dimanche 23 avril 2017

Os n'avez mie cru

... ?

Et après ! Qui qu'o dit quoé ?

A vos de rmette à ches quat gins quoé qu'is ont dit.


Os pouvez mette vos réponses in conmintère.

Boin diminche à tertout.

samedi 22 avril 2017

Unne fanme

Mes gins,

Dman, pour ches gins  qui rest'te in Frinche o qui sont frinchoés, os dvons voter. Ranmintuvoez-vos eq voter est un dvoèr. Don, dman, votez !

Ed puss in puss, vos et mi intindons qu'i feut del pèrité pèrtoute ; Tout quoé eq ches onmes font o ont, i feut eq ches fanmes peuche'te l'foaire o l'avir étou.

Eximpes :
- avir unne interprinze,
- ête députée,
- ouvrer,
- ête cinsière,
- mner un car,
- ête minisse,
- porter unne maronne,
- ...

I o granmint d'eutes eximpes.

Et unne fanme présidint del Frinche ? Coèr janmoais vu. Unne premier minisse, ouais, moinss d'unne innée, mais unne présidinte, janmoais.

Dman, os coésirons inter nu onmes et deus fanmes. Don, os pourroème mette unne fanme présidinte.

Coèr feut-i, étou, qu'ale foaiche, aprè, unne boinne présidinte. Et cho, ch'est mie gaingné.

I n'o unne chu ches deus qui s'présinte mais qui vut mie ête élue. Adon, pourquoé qu'ale s'présinte ?

Et l'eute, ale vut tchitter echl'union uropéïène adon qu'ale est députée uropéïène ! Et qu'ale in profite bin.

Ej défini min tiot article in vos disant, d'unne, qu'ej vux bin foaire plaisi à m'fanme, mais chin foaire ed berlures, et ed deus, eq lindi, j'éro p't'ête invie d'aller vive din un eute poaiyis.

Votez bin,
Boin diminche à tertous.

vendredi 21 avril 2017

J'o butché un arbite

... ed fotbal.

Déchidémint, i s'in passe des coses din ch'fotbal. Mie bèles, ches coses, malureusemint !

L'eute smangne, deux rincontes ed fotbal ont du ête artées, ej vo s in o causé, et merkerdi, j'o lu din unne gasète qu'un jonne ed vint-troés ins avoait butché echl'arbite d'unne rinconte ò qu'i juoait ech jonne.

Il o été puni, et sn'étchipe étou : li n'o pu l'droét ed juer pindint trinte ins (Bin faoit pour li !), et sn'étchipe vo rdeschinde d'un nivieu. Fin donmage pour ale, mais ches jueux vont p't'ête comprinde qu'i o coses à n'mie foaire. P't'ête ?!

Ej croés eq béto, i feudro n'pu autoriser ed pratitcher l'fotbal. Din ch'monde.

jeudi 20 avril 2017

Du mau à no'tchuir - echl'épisode un


Os nos voéyez ed tans in tans, mes cousins et mi, et os savez p’t’ête mie d’ò qu’ale vient l’différinche inter eux et mi ! Adon, innui, ej voudroais vos esplichter ho.

In mile-uit-chint, et edpi des sièkes, ches jonnes s’amuse’te à butcher avuc leus keuchures din des tiots cailleux. Un jour, alintour ed mile-uit-chint-quarante et quèks, i o deus jonnes inglés qu’ont prins un morcieu ed tchuir ed vake, l’ont keupé pi l’ont tcheudu pour in foaire quèk cose d’orond. Is s’sont mis à l’butcher conme un cailleu, mais is s’foaisoai’te granmint moinss ed mau quanq is l’rchuvoai’te chu leu tète. Ch’est conme ho qu’est né min premier rataïon.

Durant casi un edmi-sièke, des régues dech nouvieu ju ont étè busées. Un eximpe : n’mie mette ches mans, à pèrt pour un jueu qui dvro avoèr unne casake différinte ed tous ches eutes jueus, qui pourro avoèr unne castchète chu ch’tète et qui dvro toudi ête ach minme indroét, din quoé qu’os lonmons ches cages. Eutes eximpes : combin ed jueux ju’te din chake étchipe, combin ed jueux peu’te ête rimplachés,.. .

A suive.

mercredi 19 avril 2017

Tchinze vius

Ches tchinze gins ches puss vius din ch'monde sont des fanmes.

Ch'est quoé eq j'o lu lindi din unne gasète.

L'puss vieille o chint-dis-sèt ins et est née in mile-nu-chint. Ech premier onme est sésienme et éroait chint-trèse ins.

Don, chi j'o bin cartchulé, ches tchinze fanmes sont inter chint-trèse et chint-dis-sèt.

Mi, ej su, d'unne, un onme, et ed deus, avuc l'mitan ed leus ages. Et j'o mie invie d'aller à chint-dis ins.

mardi 18 avril 2017

Ches boins freumages

... ed Frinche.

Ah, qu'os in avons del canche d'avir granmint ed boins freumages in Frinche ! Laïole, cantal, roquefort , bieufort, nucatel, époésse, caminbert, picodon, ridjotte ed Condrieu et ches eutes.

Adon, chi tu vux foaire plaisi à unne gin, acate-s-i un boin freumage.

Ch'est conme ho qu'em fille qu'est in Sibérie o erchu pèr courrier un reblochon.

Quanq ale l'o erchu, ho foaisoait tchinze jours qu'il étoait arrivé in Russie. Et vu qu'il avoait ed saprés flérinées, ches gins ed l'aginche ò qu'il étaoit ont téléphoné à m'fille pour qu'ale vienche l'prinde.

Et ch'est quoé qu'ale o foait.

M'fille est fin ureuse d'avir un freumage d'unne région qu'ale ainme granmint.

Boinne jornée à tertous,
Boin accion.

Ermerke : os avons puss ed canche in Frinche avuc ches freumages qu'avuc ches onmes o fanmes politiques.

lundi 17 avril 2017

Deus rincontes ed fotbal

Judi et ièr diminche, i o ieu deus rincontes ed fotbal avuc echl'étchipe ed Lyon.

Et deus keups, i o ieu des keups écangés, deus keups i o ieu granmint ed gins qui sont vnus chu l'pelouse.

Et toudi deus keups, ches arbites ont du arter l'rinconte. Un keup, quarante-chonc minutes, et l'eute keup, complétemint.

Quoé qu'i feut in conclure ?

P't'ête malaisié ed vouloèr conclure quèk cose aprè deus rincontes.

Jou eq cho puche ête à keuse ed ches deus eutes étchipes ? Bechiktass, in Turtchie, o Bastia, in Corse ?

P't'ête un molet ! P't'ête minme un cros molet !

Mi, j'in conclus qu'i feut arter d'aller vir juer echl'étchipe ed fotbal ed Lyon. Et minme, malureusemint, ches eutes étchipes.

Brin.

samedi 15 avril 2017

Os êtes in vagances

... feudro penser in rentrer. Dman, os vos attindons.

Vu eq ches clokes rvienne'te toudi à Pâke.

Conme toutes ches innées.

Boinnés fètes ed Pâke à tertous.

vendredi 14 avril 2017

Connoais-tu Aruba

Avuc un blog, os apprindons des coses. Minme mi, j'in apprinds avuc min blog !

Aruba, j'in avoais janmoais intindu causer. Mais l'eute jour, i o un arubaïen o bin unne arubaïène qu'o rbéïé un ed ches articles ed min blog.

J'o traché chu internénet pour vir quoé eq ch'étaoit, et ò eq ch'étaoit.

Réponse :
Ch'est unne fin tiote ile din ches Caraïbes qu'est indépindinte ed ches Poaiyis-Bos edpi mile-nu-chint-quater-vint-sis.

I o alintour ed chint-onze-mile gins qui i rest'te, et is cause'te néérlindoés, ch'est unne évidinche, et papiaminto (os pouvez vérifier). Et i n'o un qui cause o lit ech picard.

Quand i foait froéd, i foait vint-troés degrés.

Boins voéyages à tertous.

Daraine minute : ej vos précise qu'ech nom ed ches gins d'Aruba sroait ches arawaks. Falloait i penser. Malaisié à edviner.

jeudi 13 avril 2017

Un conte pour vos

I o quèks smangnes, j'o pèrticipé à un concours ordjanisé pèr echl'Agince pour ech picard ; Falloait écrire un conte.

Don, j'o écrit un conte pi l'o invoéyé achl'agince, in chonc eximplaires, conme dmindé.

Sinmdi, j'o apprins eq j'avoais perdu. Ch'est des coses possibes qu'arrive'te. Su un molet déchu, mais ch'est conme ho et ch'est toute.

Achteure, ej pourro vos foaire lire quoé eq j'avoais invoéyé : ho s'lonme "Du mau à no'tchuir". A n'mie confonde avuc "du mau à no'tcheur".

Don, din quèk jours, ej vos mettro ech conte, pèr tiots beus.

A suive.

Chi t'os ets ages innui , et eq t'es m'fanme, cros becs à ti.

mercredi 12 avril 2017

Caïèles o castroles

J'o lu din ches gasètes qu'ièr mardi, i avoait, ièr, ech jugemint d'un agripeu ed caïèles.

Ch'est un onme qu'avoait agripé ches caïèles d'unne banke in novimbe deus-mile-tchinze quanq il étoait fin in prousse.

Pauve onme !

Toudi ièr, j'o vu qu'i avoait malureusemint un jonne mèrre d'une tiote ville dech nord qu'avoait djò granmint ed castroles à chin tchu.

A vint-chonc ins !

In vrai, mi, j'ainme miu echt'onme in prousse qu'o agripé, vu qu'il étoait in prousse, ches caïèles d'unne banke qu'ech jonne mèrre qui agripe echl'argint à tous ches gins dech ville. Ch'est bin min pié eq j'i mettroais à chin tchu !

mardi 11 avril 2017

Foaisons l'anmour

... mais ò ?

A Toulouse, judi aprè-nonne, un onme alintour ed trinte ins et unne fille ed vint ins ont ieu invie ed prinde du sapré boin tans.

Mais is étoai'te seus conme des polonoés, et quanq is ont ieu invie ed prinde du sapré boin tans, is étoai'te in ville, et surtoute, is étoai'te dvant un gardin ò des tiots éfants peu'te juer.

Et judi aprè-nonne, i avoait des tiots qui juoai'te. Et leus pèrints qu'étoai'te lò pour les surveiller.

Adon ?

Adon, des cadoreus in bleu sont vnus arter ches deus jonnes cadoreus.

Don, i feut rtenir eq pour vive ureus,et boaisier, feut vive mucher.

Pour ches pèrints ed ches éfants qu'étaoi'te in route à juer, ej leu dis eq leus éfants ont p't'ête djò vu d'eutes coses.

lundi 10 avril 2017

Feudro agir

Coèr ièr, ches coureus ont ieu du mau inter Pèris, in vrai, Compiènes, et Roubaix.

A keuse ed ches méchantés voées o keuchies qu'i o inter ches deus villes et ò eq ches ordjaniseus les font passer.

Cho foait chint-vint ins que l'course existe,chint-tchinze eq ches gins roule'te chu ches voées, mais chake innée, ch'est l'minme cose : i o granmint ed coureus qu'ont des problinmes ed bicyclète o qui tchai'te chu ches voées.

A keuse ed ches voées ! L'treuée d'Arenberg, ech carrefour ed l'Abe o coèr ech secteur ed Briaste, pèr eximpe.

In unne innée, ej pense qu'i sroait possibe ed foaire ed bèlés keuchies pour éviter tout ches problinmes à ches coureus et leus intraineus.

Etpi, ches coureus sroai'te moinss bouzrés o crapés ed porète. Vlò quèk cose qui froait étou plaisi à leu fanme.

A rvir din unnne innée.

Cros bec à m'mère, et crosse pensée pour min père.

dimanche 9 avril 2017

Cose dite

... cose foaite.

J'o tcheuilli ièr, aidié pèr min fiu, tchinze litres ed lanchrons.


Voéyez bin l'différinche inter lò ò os avons passé et lò  ò os avons mie passés.


Deus eures à tcheullir, chonc eures ach solé, et edpi ièr au vèpe, tchuisson pour transformer tout ho in mié ed lanchrons, lonmé étou cramaillote.


 Boinne tcheuillète à vos,

Boin diminche.

Pour ches gins qui sroai'te in vagances, boinnés vagances à eux.

Pour ches gins qu'éroai'te leus ages innui, cros becs à eux.

Pour tertout : atincion ! Din uit jours, din ches gardins, i éro eute cose eq ches lanchrons.

samedi 8 avril 2017

Ches confitures ed lanchrons

Ch'est innui qu'i feut les foaire.

Kminchez pèr tcheuillir ches troés o quat chint lanchrons qu'i vos feudro alintour ed dis eures,

Vu qu'i vo i avoèr granmint ed solé, profitez-in pour les foaire sétchir.

Pi foaisez vos confitures. Pour ho, vir ches rcètes chu internénet.

vendredi 7 avril 2017

El foule

Jé rvoés l'ville in fète et in délire
Suffotcher dsou ech solé et din l'joée
Et j'intinds din l'musique ches cris, ches rires
Qui s'déclatche'te et rbondisse'te alintour ed mi
Et perdue pèrmi ches gins qui m'choule'te
Etombie, désimpèrée, ej reste lò
Quand d'un keup ej mé rtorne, il s'rtchule,
Et l'foule vient m'ruer din ches bros...


Importés pèr l'foule qui nos trine
Nos intrine
Epeutrer l'un conte l'eute
Os n'formons qu'un seu corps
Et ch'flot chin effort
Nos pousse, incangnés l'un et l'eute
Et nos laice nos deus
Epénis, inivrés et ureus.


Intrinés pèr l'foule qui ch'élinche
Et qui dinche
Une folle farandole
Nos deus mans rest'te soudées
Et des keups soulvés
Nos deus corps inlacés s'invole'te
Et rtcheu'te ches deus
Epénis, inivrés et ureus...

Et l'joée ébroussée pèr chin sourire
M'trinchperse et rjaillit au fond ed mi
Mais d'un keup ej pousse un cri pèrmi ches rires
Quanq l'foule vient l'déracher inter mes bros...

Importés pèr l'foule qui nos trine
Nos intrine
Nos éloégne l'un conte l'eute
Ej lutte et j'em débats
Mais ech son d'em voée
S'étoque din les rires eds eutes
Et ej crie ed douleur, ed fureur et ed rache
Et ej braie...


Intrinés pèr l'foule qui ch'élinche
Et qui dinche
Une folle farandole
Ej su importée loin
Et ej crispe mes poégnets, maudissant l'foule qui m'vole
Echt onme qu'ale m'avoait baillé
Et eq j'o janmoais rtruvoé...



Fin bèle canchon cantée pèr Didith Piaf, à pèrtir ed mile-nu-chincante-sèt.

mercredi 5 avril 2017

Echl'ernouvieu est arrivé

... edpi alintour ed tchinze jours.

Chi apré l'pleuve arrive ech solé, aprè echl'ernouvieu arrive'te ches lanchrons. In avri. Conme ches ages d'em fanme et d'unne ed mes filles.

Conme ej vos l'o écrit i o un in o deus, avuc ches lanchrons, os pouvons foaire del cramaillote.

Pour ho, i feut qu'i foaiche granmint ed solé un jour, et qu'i o granmint ed lanchrons. Alintour ed troés o quat-chints.

Boinne canche à vos pour foaire quoé qu'os lonmons étou ech mié ed lanchrons.

mardi 4 avril 2017

Pour min onke tchébécoés


Didier, ech darain keup qu'os nos sonmes vus, tu m'os dit qu'ej foaisoait des keups des berlures chu ches mots picards.

Ej t'écris innui, conme j'o écrit i o quèks tans à ch'tiot Manu, pour t'dire eq chi ch'est toudi vrai, feut eq tu me l'diches. Ho m'fro plaisi ed corriger et d'apprinde.

A tous ches eutes qui li'te min blog, minme chi os êtes mie tchébécoés, os pouvez foaire l'minme cose.

Boinne jornée à tertous,
Becs à min onke, m'tante, leus troés filles, leus bieus-fius et leus galibiés.

lundi 3 avril 2017

Un reuve

Ièr diminche, fin timpe au matin, alintour ed quat eures, j'o ouvert les ius. Ch'est des coses qu'arrive'te quanq ches ages s'atchumule'te.

Don, j'étoais rinveillé, et j'm'o ranmintuvoé dech reuve qu'ej vnoais ed foaire : j'avoais vu ches résultats dech premier tour ed ches elections présidintielles deus-mile-dis-sèt in Frinche.

I avoait unne crosse surprinse.

Coèr un keup, ches jornaleus et ches gasètes avoai'te foait unne sapré berlure.

Os in causerons din vint jours.

Ièr diminche, fin timpe au matin, alintour ed quat eures trinte, j'o frunmé ems ius. Ch'est des coses qu'arrive'te quanq os sonmes diminche.

dimanche 2 avril 2017

Din quatore jours

... os srons à Pâke.

In attindant, avant ed moérir, Jésus o granmint à ouvrer avuc tous ches gins qui n'croéyoai'te mie in li : i o tchinze jours, unne fanme ed Samarie, l'eute smangne, un avule, et innui, un onme qu'est mort adon, i sanne, qu'i falloait mie qu'i meurche achteure.

Jésus s'est octchupé ed tertous. Feut dire qu'i o tchinze jour, il avaoit soé ; l'eute smangne, il o invoéyé echl'avule s'laver ches ius ; Et innui, echt onme qu'est mort étoait un conmarade.

Mi, ej dis eq Jésus étoait mie un arland.

Boin diminche à tertous

samedi 1 avril 2017

J'o mingé des critchets

... etpi des vers ed soée.

Ch'étoait ièr. Unne fille dech nord, avuc qui j'ouvre, o étè in Thaïlande i o quèks jours et nos o ramné des tiots critchets et des vers ed soée grillés.

Adon, ièr, os avons bu un tiot keup et pèrtagé ches tiotes bètes.



Ureusemint qu'os avoème un keup ed rouve à bir avuc ho !

Pour ches gins qui vu'te in minger ej vos conseille in premier ches tiots critchets grillés.


Mi, ed tout ho, jé rtiens qu'ej pourro coèr vive din chincante ins. Chi Diu l'vut bin.