Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

jeudi 31 janvier 2019

L'est roéyal

Jé n'causero mie, innui d'unne fanme qu'o mantché d'édvenir présidinte del Frinche.

Ni ed ches grinds oisieus.

Ej vux dviser ed ches indroéts dò eq tu vos in famille o avuc eds amis pour minger.

Ches restaurints, quanq is font del fin boinne et fin bèle tchuisine, des keups, is peu'te s'vir baillir eds étoéles pèr ch'djide Michelin.

Granmint sont ureus ed les avir, d'eutes, vu ches contraintes, les rfuse'te.

Mais innui, ej vo vos conter ches décarsures qu'ont arrivé din l'Mèrne ; deus restaurints ont, din leu nom, ech mot roéyal.

Et i in o un qu'o unne étoéle, et l'eute, autchune. A trinte kilomètes l'un ed l'eute.

Eh bin cht'innée, ch'djide o confondu ches deus restaurints.

Adon, i o un chinoés qu'o erchu granmint d'appels téléphoniques, adon qu'os i mingeons pour alintour ed tchinze euros. Seulemint !

Mi, ej truvoe eq ch'est unne cacouille roéyale..

Mais din ch'deusienme restaurint, is ont mie appréchié.

Feut savoèr rire, minme quanq tu vinds à minger pour miu ed soéçante euros per gin.


mercredi 30 janvier 2019

Ches Bleusés Castchètes

Ch'est ch'nom d'un nouvieu mouvemint pour manifester qu'ej viens ed lancier.

Ches Bleusés Castchètes, ch'est des gins avuc unne bleuse castchète chu leu tète et qui sont opposés à tous ches mouvemints qui met'te unne couleur, conme ganne, rouve o vert, din l'nom ed leu mouvemint.

Os les avez seuremint vu :
- Ches Verts, edpi quèks innées.
- Ches bonnets Rouves, in deus-mile-trèse,
- Ches Gannes Espincers,
- Ches Foulèrds Rouves,

Ches verts, is met'te mie ed vetemint din ch'nom ed leu mouvemint ; is sont tellemint écologisses qu'is promène'te, p't'ête, mer-nuds. Os rmerquerez qu'os in voéyons mie granmint.

A propos dech nom ed min mouvemint et chin but, os allez m'dire eq j'o mis du bleu din ch'nom.

Ouais ! Mais ch'est pour foaire bieu.

Surtoute chu ches tètes.

mardi 29 janvier 2019

Invie ed déloufer

Pèrmi toutes ches nouvèles ed ches darainés smangnes, i in o ieu unne chu ches riches.

Et, pèr opposition, chu ches pauves.

Ches vint-sis puss cros millardères, z'ont autant d'argint qu'él mitan ed tertous ches onmes et fanmes dech monde, l'mitan ches puss pauves.

Busons !

Tertout, din ch'monde, os sonmes sèt millars.

Don, l'mitan, cho foait troés millars et un dmi.

Et din ches gasètes, is écri'te eq ches riches sont ed puss in puss riches, et ches pauves, l'mitan dech monde, ed puss in puss pauves.

Vint-sis, troés millars et un dmi !

Mautcheurant !

dimanche 27 janvier 2019

Qui s'rsanne

.... s'assanne.

Qui dit, ch'dicton. O ch'proverbe. Feut qu'ej fuche honnête, ej sais mie bin l'différinche inter ches deus.

Bin !

Diminche aprè nonne, chu internénet, j'o vu unne photo dech présidint dech Vénézuéla. J'o truvoé qu'i rsannoaoit granmint à un "présidint", manière ed causer quanq os érez comprins ed qui qu'ej cause, qu'i o ieu durant alintour ed quarante innées in Irak.

Jé m'su dit qu'is s'rsannoai'te pour eute cose eq leu djife.

Corage à ches vénézuéliens. Cho vo béto canger.

Et mie din quarante innées.


Os voulez vos assir

Innui, cho sro coèr unne aüre din ch'train.

Normal, vu qu'ej passe miu ed troés eures per jours ndan.

Verdi, au matin, quanq ej monte din ch'train (pour aller ouvrer), ej truvoe unne place pour m'assir.

Conme chake matin.

Et conme chake matin, dmi-eure aprè, ches gins qui mont'te sont dbeut.

Verdi au matin, don, des gins sont dbeut.

Mais permi eux, i o unne jonne fanme avuc un papar qu'avoait alintour ed tchinze jours d'âge.

J'appèle l'fanme et li dminde chi ale vut s'assir.

- "Ouais !" qu'ale m'répond, avuc un sourire et un molet surprinze.

I reste alintour ed vint-chonc minutes avant d'arriver lò dò qu'ej deschinds.

Mais, keup ed théïâte, à l'station d'après, l'fanme s'déjoutche et s'in vo. avuc chin papar.

- "Bin !" qu'ej mé dis, "j'i o foait plaisi dis minutes".

Mais eute crosse surprinze, quanq ej deschinds thinze minutes aprè, l'fanme deschind étou dech train.

Adon ! Quoé qu'ale o foait edpi l'station d'avant ?

P't'ête qu'ale o étè baillé, din ches toélètes, un tète à chin tiot papar. O i néttier chin tchu.

Mi, j'avoais quanq minme foait plaisi, qu'i m'sanne à unne gin.

Et j'étoais quanq minme ureus ed l'avoèr foait.

Boinne jornée.

J'o unne pensée, innui, pour ches pèrints dech tiot galibié ed deus ins qu'est tcheu din un treu profond et qu'o étè rtruvoé ièr, douse jours aprè, mort.

vendredi 25 janvier 2019

Unne réclame ed malapate

Edpi quèks jours, ed tans in tans, ej voés à l'télévision unne réclame chu un freumage, qu'est vraimint mie quoé qu'os foaisons ed miu in Frinche, chl'émmintal.

Pour foaire ch'tiote réclame, ches publicisses utilise'te un - feux - cinsier qu'est fiat ed nos moutrer ches vakes.

Ah ! Ches vakes !

Des vakes noèrtes et blankes, ches vakes quoé qu'i o ed moins bèles, sèkes, l'pieu chu leus os et ches puss industriaesl, manière ed causer.

Is éroai'te au moinss pu coésir ed bèlés vakes ed Frinche-Comté o ed Neurmindie.

Coèr un keup, donmage d'avoèr des gins qui n'connoai'te mie leu ouvrage,o qu'is ne l'font mie conme i feut.

jeudi 24 janvier 2019

I rviend djò

Sapré boin diu !

Ej mé ranmintuvoe d'avir écrit un article chu ech Carnaval ed Dunkèque et ches watieus i o quèks moés, et vlò, eq din ches gasètes, os rcausons dech prochain qu'arrive.

J'o chl'impression eq ch'étoait ièr !

Bin nan ! Ch'étoait i o casi un in ; min article étoait ech trèse févrié.

Ech Carnaval ed Dunkèque, qui kminche à pertir dech deus févrié, jour del Candleur, ch'est bieu.

Ches gins font unne bèle fète durant des jours, danse'te, ri'te et espére'te aotcher ches érings qui sont lancié edpi echl'étage del merrie.

Feudro, un jour, qu'ej prinche des vagances pour aller in profiter.

Boinne jornée.

mercredi 23 janvier 2019

Ches nèges à Pèris

Ièr, timpe au matin, avant ed pèrtir prinde un train pour aller ouvrer, conme chake jour, jé rbée l'télévision, et un jornaleu cause ed ches nèges qu'i o achteure (ièr au matin) à Pèris et ches alintours.

Mais à l'télé, quanq tu rbées bin ches images, t'aperchus un keup unne plancarte qu'os voéyons chu ches bords ed keuchie pour inditcher ches directions.

Et chu l'plancarte, i o ech nom d'unne ville od' un village qui s'défini pèr Velay.

Velay !

T'in connoais granmint, ti, des villes o villages alintour ed Pèris qui s'définiche'te pèr Velay ?

Autchunne, slon mi.

O bin, à quat-chint-quarante kilomètes au moinss.

I o, ch'est seur, Ech-Puy-in-Velay, mais étou Minfautchon-in-Velay o coèr, Sin-Didier-in-Velay.

Ch'est pu alintour ed Pèris.

Il existero don toudi ed saprés jornaleus qui vu'te nos prinde pour des nikdouilles.

Et pour nos foaire rire, vu leus berlures.

Prudinche chu ches keuchies.


mardi 22 janvier 2019

Sis-chints

Ch'est ch'chiffe à l'mode :

Is étoai'te sis-chint merrres à Bourgtroule et Souillac, l'eute smangne, pour acouter not présidint leu réponde durant miu ed sis eures.

Is étoai'te sis-chint à Péris pour...

Quanq os lisez cho , os vos disez qu'à Péris, not présidint n'o mie rinconté un merre, et eq ches Gannes Espincèrs étoai'te toudi puss ed deus-mille ches sinmdi.

Ch'est seur ! Mais laiciez-mi définir m'phrase.

Is étoai'te sis-chint à Péris, invités pour rbéïer ch'défilé pour ches dsous ed fanmes, diminche au vèpe.

A coésir, ej sais dò qu'ej sro vnu.

Surtoute eq ch'est granmint puss aisié pour i vnir in train.

Boinne jornée à tertout.


lundi 21 janvier 2019

Juer Ches Lapides

In premier, pouvoèr juer din Ches Lapides, ej pense qu'os pouvons dire, o écrire, eq ch'est un esploét.

Et un honneur.

Mi, in mile-nu-chint-quater-vint-dis-uit, j'o jué ech tchuré.

- "Ches candeilliés, ch'est mi qu'i o baillés..." qu'ej mé ranmintuvoe coèr.

Aprè, je rbéïoais Valjean, ches Thénèrdié, Gavroche, Fantine, Javert, et j'aidoais à bouger ches décors.

Din un tiot théïate, ni-o poin mèche.

Ej vos cause ed Ches Lapide ed Victor Hugo innui, vu eq j'o lu qu'in Iran, des gins avoai'te réussi à l'juer étou adon eq ch'est fin malaisié : i falloait, per eximpe, eq ches fanmes met'te quèk cose dsu leu tète. Is ont obéi et pu juer Ches Lapides.

I o quèks jours.

Mi, ej dis eq ch'est bin donmage qu'ed savoèr qu'i o coèr eds indroéts din ch'monde dò eq ches gins n'peu'te mie juer quoé qu'is vu'te.

Mais ureus qu'ed vir qu'i in o qu'is i arrive'te quanq minme.

dimanche 20 janvier 2019

Jésus o trinsformé de l'ieu

... in vin.

Il o étou baillé du pichon à minger à granmint ed gins. Os pouvons in conclure eq Jésus ainmoait minger, et norir ches gins.

Ch'étoait i o miu ed deus-mille ins.

Et achteure, des gins, cinsiers ed pichons, baille'te du pichon à minger à leus pichons.

Cho put poser des problinmes conme, i o alintour ed vint ins, bailler del vake à minger à des vakes in o posé.

Ranmintuvoez-vos ches vakes-nikdouilles !

Edpi quèks moés, des cinsiers ed pichons, dech nord del Frinche, baille'te à leus pichons des moukes.

Ch'est miu, mais i feut adon granmint ed moukes pour toutes ches pichons, et chake jour.

Il existe don étou, achteure, des cinsiers ed moukes.

Qué monde !

Boin diminche à tertous.

Chi t'es m'tante o m'bèle-mère et eq t'os ets ages innui, cros bec spécial à ti.

samedi 19 janvier 2019

Ches moaisons qui s'abime'te

A Oée-Bord-del-Mer, village dech Pas-ed-Calais chu ch'bord ed ches mèrs, conme chin nom l'indique, i o, edpi quèks tans, granmint ed moaisons qui s'finde'te.

Magine bin eq ch'est un cros problinme !

I péroait qu'ho sroait à coeuse d'unne interprinze qui prind du sabe, sabe lonmé sabe pissard.

Ches gins qui rest'te à Oée-Bord-del-Mer pense'te eq cho vient dech l'interprinze.

Mais des scieintifiques di'te eq ch'est mie possibe, vu qu'echl'interprinze, ale est à miu ed troés kilomètes ed ches moaisons qu'ont findu.

Mi, ej pense granmint à ches gins dech village, mais étou à ches gins ed Gravline à qui ej souhaite mie ed rincontrer ch'problinme-lò.

Magine quoé qu'ed viendro ech nord del Frinche !

Quanq à min cousin ed Oée-Bord-del-Mer, qu'i seuche qui put vnir à m'moaison avuc s'fanme et ches filles ch'il o dzoin.

jeudi 17 janvier 2019

N'foaisez mie d'éfants


Ej l'o lu o intindu quèks keups edpi quèks moés, des gins, célèbes, chin quoé os in causeroème mie din ches radios o gasètes, n'vu'te mie avoèr ed papars.

Is font cho pour eq leus éfants n'pollue'te mie l'planète, et don, pour él seuver, not planète

Qué corage ! (jé m'moque)

In vrai, ej pense eq ch'est trisse ed buser conmer cho. Chi vraimint ches gins-lò sai'te quoé qu'est boin pour ch'monde, peu'te foaire des papars pi leu apprinde à vive conme i feut. Un jour, ches galibiés dvnus grinds sront assez pour seuver l'tère.

Mais achteure, chi is continue'te conme cho, p't'ête qu'un jour, i éro pu ed gins pour foaire ed bieus papars capabes et ureus ed vive chu not planète.

Ch'est bin donmage !

Etpi, vive toute unne vie chin éfants pi chin tiots éfants, ch'est un vrai malur.

Qu'ej pense.

Boinne jornée, profitez del vie et cros becs à mes chonc éfants.

mercredi 16 janvier 2019

Min bieu-frère ch'photographe

Quanq j'écris min bieu-frère photographe, l'est conme mi : il ainme foaire des photos, surtoute quanq il est in vagances o in famille.

Ch'est unne première différinche avuc mi ; ej foais des photos pertoute et toudi. O casi toudi.

L'deusienme différinche, ch'est eq min bieu-frère, i foait granmint ed photos d'unne minme cose, et aprè, il les élit granmint.

Pour élire, feut inlver ches photos eq t'ainmes mie. O moinss.

Mais ches photos eq t'ainmes mie, o moinss, peu'te ête des photos eq d'eutes ainme'te o admire'te.

J'ainme bin dviser photgraphie avuc ech frère d'ém fanme.

Minme chi os sonmes différints.

I o quèks jours, j'o vu unne photo ed vagances : un onme, ej pux mie vos dire qui, avoait prins s'fanme et ches éfants quanq is étoai'te insanne.

Conme diroait min jonne fiu, conter ches vagances est un molet conme ch'paradis, mais rbéïer ches photos ed vagances ed ches eutes, cho dvient l'infer.

Cht'onme qui m'moutrer ches ranmintus, il  éroait pu foaire conme min bieu-frère, élire ches puss bèles.

Per eximpe, i o unne photo, ej mé su dminé chi s'fanme étoait ureuse d'ête in vagances..

O ale avoait du mau quèk pèrt. Donmage, quanq t'es in vagances !

Boinne jornée à tertous, et foaisez ed bèlés photos. O élisez granmint.

Et bec espécial à min bieu-frère. Et s'fanme.


mardi 15 janvier 2019

Os ainmez poin

Chake innée, edpi sis ins, ej foais et offe alintours d'unne tchinzainne ed calindriés eq j'o foaits avuc trèse photos in noèrt in blanc prinses chl'innée d'avant. Per mi.

J'o invie ed foaire plaisi.

Et ej sais eq cho foait plaisi.

Casi à tertous, casi chake innée.

Din ches gins qui rchuvoe'te min tioti cadieu utile, i n' o qui rbé'te dès ch'début ches trèse photos, et i n'o qu'attinde'te qu'ech moés arrive pour torner l'page.

Ch't'innée, ch'est vraimint ch'premier eq cho m'arrive, des gins m'ont dit qu'unne photo étoait mie bèle : chtol-lò ed févrié.

Rbéïez l'photo :


Ch'est unne tète ed baingneu qu'étoait posée dsu un meube din unne boutike.

Ej l'o prinse ach moés d'eu deus-mile-dis-sèt, quanq jé m'promnoais avuc m'fanme, un bieu-frère et s'fanme qu'est étou unne bèle-soeur.

Mi, ch'est seur, j'ainme bin. Chin quoé, ej l'éroais poin mise din ch'calendrié.

Quanq à ches gins qu'ont mie ainmé, et qu'is m'l'ont dit, ej pinsero à eux pour deus-mile-vint.

Boinne jornée.


lundi 14 janvier 2019

Boinne santé

In ch'début d'innée, tertout souhaite à l'eute unne boinne innée et unne boinne santé.

Et des keups, un molet puss : bonnur, argint, ouvrage, per eximpe.

In ch'début d'innée, ches onmes politikes l'font étou : not présidint, mais étou, per eximpe, ches merres ed ches tiots villages.

Don, i o quèks jours, ch'étoait verdi, ech merre ed Mont-Not-Dame, din chl'Aisne, soéçante ins, o réuni tertous ches gins ed chin village qui vouloai'te bin vnir pour leu présinter ches voeux

- "Mes gins, innui, ej vux vos souhaiter, pour chl'innée qui vient ed kmincher,.... .

Echt'innée, din not village, os frons ...

Estchusez-mi, j'o un tiot malaise."

Il o tcheu, et il est mort.

Boinne innée à tertous, et surtoute, boinne santé.

Pour cht'onme, ch'pauve, l'innée o djò défini.

Prions pour s'famille.


dimanche 13 janvier 2019

Din unne église

Casi tertous avez un jour rintré din unne église.

Mais mettons qu'i n'o qui rbé'te min blog et qui n'ont janmoais allé ndan !

Adon, vlò pour eux unne photo.


Din unne église, i o d'eutes coses à vir.

Et i o des coses à acouter.

Boin diminche à tertous.


samedi 12 janvier 2019

Compter ches oisieus

Ches neurminds, ed Neurmindie in Frinche, ont ed saprès idées.

Ches vint-sis et vint-sèt janvié qui vienne'te, is vu'te compter ches oisieus qu'i o in Neurmindie.

Magine !

- Un oisieu, deus oisieus, troés oisieus, ...... dis-nu oisieus, vint oisieus vint-et-un ois

Pan !

Un cacheu qui cachoait o passé per lò.

Ches oisieus ont pertis.

O bin :

- Un oisieu, deus oisieus, troés oisieus, ...... dis-nu oisieus, vint oisieus vint-et-un oisieus.

Pi lò, un vint-deusienme oisieu, un vint-troésienme oisieu, et un vint-quatrienme oisieu.

Pi lò, un vint-chonquienme oisieu, un vint-sisienme oisieu.

Mais, jou eq ch'est mie ches minmes qu'i o tchinze minutes qu'os avons comptés ?

Etpi, magine coèr !

- Un oisieu, deus oisieus, troés oisieus, ...... dis-nu oisieus, vint oisieus vint-et-un oisieus, ... chint-sèt oisieus, ..... deus-chint-quat-vint-douze oisieus, ...... rrrrrr, rrrrrrr.

Compter ches oisieus, ch'est conme compter ches berbis o ches ainnieus.

Mais ches neurminds l'sai'te mie, vu qu'is ont mie - granmint - ed berbis o d'ainnieus.

Boin corage à ches neurminds qui voudront aller compter.




jeudi 10 janvier 2019

Un proverbe afritchain

"Lò dò qu'os s'ainmons, i n'foait jonmoais nuit."

Mais adon ! Ch'est quanq os dormons ?

mercredi 9 janvier 2019

Un jonne jueu ed fotbal utile

Ches jueus ed fotbal, in général, is sont utiles uniquemint pour ches eutes jueus ed fotbal, pour juer insanne.

Et pour foaire plaisi à ches gins qui rbé'te ches rincontes ed fotbal.

Mais edpi quèks moés, i o un jonne jueu qui, chin l'vouloèr, o dvenu utile pour ches marister, et pour ches galibiés qui vont à chl'école : ch'est Kilian Mbappé.

I o un moaîte d'école qu'o ieu l'idée d'apprinde l'règue ed frinchoés "m, b, p" in profitant dech jueu qu'est achteure célébe et qu'o, din chin nom, un m, un b pi un p.

Don, in frinchoés, i feut mette un m dvant un eute m, o dvant un b o un p. Pour s'in ranmintuvoer, pensez à Mbappé.

Atincion ! In picard, ch'est mie l'minme règue. Per eximpe, os écrivons inmner et mie immner.

Boinne jornée à tertous.


lundi 7 janvier 2019

Rprindez vos crapures

Din ches Côtes d'Armor, ech merre d'un tiot village o foait unne boinne (?) surprinse à des gins qui rest'te din ch'commune.

Il avoait truvoé des crapures din l'campaigne, et in fortnichant ndan, vu qu'il étoait énervé, il o étou truvoé unne adresse.

Adon, il o toute ravelutché et rinmné achl'adresse qu'il avoait.

Ech merre doét ainmer rire, vu qu'il o laicié ch mot-lò aprè à ches gins :

"In chte période ed fètes, ej suppose eq ches cartons, ech papier-cadieu et ches restes d'rpas ont tcheu dech trinieu dech Père Noë quanq i rpèrtoait ed vot moaison. Pour répèrer ch'berlure, j'o pensé utile ed vos rinmner ch'bin à vo'moaison. Chin frais ed port."

Et il o ajouté, à toute hasèrd, ches eures d'ouverture del déchetrie.


dimanche 6 janvier 2019

Moérir pour chin prince

Os in avez seuremint intindu causer edpi octobe,, un jornaleu arabe o étè tué in Turtchie per des gins vnus d'Arabie Séoudite ; ech jornaleu o intré din ch'consulat arabe à Istinbul ech deus dech moés d'octiobe, et n'o janmoais rsorti.

In vrai, l'o rsorti, mais décoper in cros morcieus, din des valises. Qu'i sanne.

Din ch'monde, casi tertout o djeulé eq ch'étoait ontabe.

Et granmint z'ont dit qu'ech vrai coupabe, ch'étoait ch'prince à millars d'Arabie Séoudite ; ch'est li qu'éroait baillé chl'orde ed tuer ch'jornaleu.

Edpi quèks jours, i o un jugemint ed ches onze gins qu'éroai'te perticipé achl'assasin dech jornaleu qu'o kminché.

In Arabie Séoudite !

Et i péroait qu'i o chonc gins, chu ches onze, qui sont coupabes, et qui vont ête tuées.

Mi, ej dis eq ch'est des braves qui vont moérir pour foaire plaisi à leu prince.

Prions pour eux, minme chi ch'est eds asasineus, vu qu'ech vrai coupabe, ch'est mie eux.

Slon mi.

Boin diminche.

jeudi 3 janvier 2019

Honmage à Françoése

... Rose-Auvet, qui s'o otchupé dech théïâte ed Ches Cabotans d'Anmyin durant quarante-sèt innées, et qu'est morte i o quèks jours, à soéçante-dis-nu ins.

Ej viens ed l'apprinde.

Merchi à ti, Françoése, pour toute quoé eq t'os foait pour ch'Lafleur, Sandrine, Tiot Blaise et ches eutes.

Merchi à ti qu'o kminché conme montreuse ed cabatons, et qui, minme avuc un sapré mau edpi deus ins, continuoait d'aidier Ches Cabotans.

Adé !

Vo foaire rire, lò dò eq t'os pèrti, min père et min bieu-père, et granmint d'eutes.


mardi 1 janvier 2019

Trantchilles et ureus

Ch'est quoé qu'ej vos souhaite pour chl'innée deus-mile-dis-nu qui kminche innui.

In janvié, vu qu'i put foaire froéd, reste din t'moaison. Chi tu vux et eq tu sais in juer, jue del musike.


O bin, vo din unne église, pèr eximpe à Arainne, bin au calme.


In févrié, foait coèr froéd, adon décore tes meubes.


Arrive marche ; tu t'proménes, et t'éros p't'ête l'canche ed vir unne gin qui jue du corbillon. Baille-s-i unne tiote pièce !


 Avri ! Pâke est lò ; ech christ meurt chu unne croéx, pi rvit.


Ach moés ed moai, tu pux t'promner, mais soin à ti, des keups, i o del frèche.


In join, ches bieus jours sont lò, et ch'est l'monmint del fète del musike. Profite !


Pour ches moés ed juillet et d'eu, ches poéyisins s'octhupe'te ed leu blé et aprè font l'fète et ri'te.











In septimbe, ches galibiés rtorne'te à ches écoles, et chi foait un molet ed solé, des gins peu'te coèr juer del musike à l'cour.
 

Octobe est fin trantchille avant qu'arrive'te p't'ête ches chorches, dsu leu ramon.


Etpi, os sonmes casi, djò, arrivé à l'fin edl'innée. Novimbe ! Minme chi i o p't'ête unne rimée, tu pux sortir avuc un conmarade et pèrtir mercher ; ches tiots kmins sont bieus.
 

Et nos vlò in déchimbe. chi i o del brunme o du brouillar, mets unne boinne casake bin keude, et rtorne t'promner.


Avant ed bin minger et boère pour Noë et passer in deus-mile-vint.

D'ichi  lò, ej vos récrirai quèks articles ; j'in o des coses à vos monter.