Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

jeudi 27 février 2014

Un boin tiot nom

Manu. Un tiot nom granmint imploéyé. Toudi.

Acoute ! J'o troés cousins, unne cousine, un nveu qui s' appéle'te comme cho.

Ech canteu Renaud, un boin, in cause din unne canchon. "Et Manu, déconne mie..."

Ches comiques "Ches inconnus" étou cause'te de li. "Et Manu, tu deschinds ?"

Chi tu rbées echl'histoér, ech tiot Jésus étou s'appeloait Emmanuel. Achteure, os disons Manu.

Bec à tertous.


mardi 25 février 2014

Unne tchathédrale, un câtieu

Ken Folliet o écrit un live, ches piliers del terre, qui conte el vie ed ches gins qu'ont construit ches tchatédrales. In douse o trèse-chint après Jésus Christ. Bieu live ; Feut l'lire.

Mais achteure, t'os unne gin qui foait construire un câtieu, comme in...douse-chint. A Guédelon in Puisaye.
Edpu mie-nu-chint-quater-vint-dis-sèt ; Djà dis-sèt ins. Mie d'ingins d'achteure. Seulmint ches vielles méthodes et ds'ouverriers qui sont mie des cacouilles ; Bin ech contraire !     .

Feut vir cho miu d'un keup avuc tes galibiés.

Ej t'esplitche :
- unne corde à trèse noeuds, à quoè cho sert ? Vo vir à Guédelon et tu comprindros Pythagore.
- fabritcher un coutieu o unne tchuillére avuc un beu ed fer ? Vo vir à Guédelon et tu voéros ech'marichau ouvrer.

Bèles lçons.

dimanche 23 février 2014

Jésus, crucifié

- " Quanq Jésus est chu l'croéx et qu'l'eute i agrippe és'tunique, i dit rin.", qu'o esplitché min tchuré.

Oh ! Bin ti, min tchuré, éj croés eq mi étou, avuc quat cleus din mes mans et din mes piés, j’éroais laicié foaire.

Ech rtour ed ches ukrainiens

Un boin indicateur dech climat in Ukraine : innuit, tchinze ukrainiens rbé'te min blog. Cho fait miu ed troés eq j'in avoais mie ieu. Ej sus ureux.

Nantes - Kiev

Ej vux mie et causer d'un match ed fotbal inter ech F.C.N.A et ech Dynamo ed Kiev, o inter Henri Michel et Oleg Blockine, i n'o p't'te janmoais ieu.

Ej té propose mie un voéyage in avion, causons mie d'aéroport à Nantes, o in car, i feudroait granmint d'eures.

Nin ! Ej vux juste et dire qu'achteure, ches deus villes s'rsanne'te ; Cho s’o rapuré, mais ch'est tout débristrake. Feut rconstruire.

Paix à tertous, boin diminche.

samedi 22 février 2014

Pour mes soéçante-quat ins

Ièr, j'o vu min père, quater-vint- trèse ins, pour ech preier keup d'ém vie. J'i o dit eq ch'était grâce ach'dirigeant ed min poaiyis. Min père o été sépèré d'em mére i o soéçante quat ins, avant qu'éj naiche.

Achteure, je l'tchitte. Pour el vie, étou. Li o mi, o ches deus, moérirons avant unne possibe deuxienme rinconte.

Ch'est cho, vive au nord dech Corée.

Adé.

jeudi 20 février 2014

Judi

Tous ches judi, i o un onme et s'fanme qui prinde'te ech'train. Uniquemint ches judi, et toudi al minme eure et ch'minme train.

Os pouvons dire, vu ches ins et ches cavieus, qu'i n'ouve'te mie.

Quoè qu'i foai'te et où qu'i vont ? Os n'in savons rin.

Os n'pouvons eq supposer. Et ch'est bin comme o.


mercredi 19 février 2014

Em philosophie del vie...

... qui reste à vive.

Vu ches taïons, éj mé dis eq j'o coèr vint-troès ins à vive.

Miu ed douse à ouvrer. Foait ches cartchuls !

Alorss, feut profiter granmint ed tous ches momints del vie ; Surtoute ches boins. Ches eutes, feut foaire in sorte qui fuche'te boins. Minme chi ch'est mie toudi vrai.

mardi 18 février 2014

Tiote Berthe

I i avoait, i o miu ed quarante ins, unne inchtitutrice qu'aimoait ech qu'ale foaisoait ; Et ale respectoait ches éfants. Echl'inverse étoait vrai étou.

Tiote Berthe vouloait qu'i réussiche'te.

- "Jean Marie, t'os douse ins ! Feut eq t’apprinds ches tables ed cartchul chi tu vux aller ach collège l'in prochain !" Et Jean Marie o été ach collège.

- "Jean Paul, arrête ed foaire rire tes conmorades ed classe in foaisant bouger tes éreilles chin tes mans !" Et Jean Paul a arté, seulemint un molet. Ureusmint pour nos.

Ej té rmercie granmint, Tiote Berthe. Adé !

dimanche 16 février 2014

Vlo ches réponses achl'édvinette dech deus févrié


Ech photo o été prins à St Brévin, ech vint-chonc déchimbe deus-mile-trèse, à douse ures.

Quèk tu foaisoais, ti, acht'ure lo ?

samedi 15 février 2014

Naîte in Principauté dech Liechtenstein

Ech Principauté dech Liechtenstein est un tout tiot poaysis ed chint-soéçante kilomètes carré, inter echl'Allemagne et chl'Autriche. Feut el savoèr pour comprinde l'suite dech l'article.

Tiot poaysis ; Dech keup, mie granmint ed papar à naîte ! Coèr dech keup, i vont frunmer ech maternité. I in avoait qu'unne.

Tu dvines ches problinmes :
- Où acoutcher ?
- I i éro mie eds éfants liechtensteinnais !

In réalité, ches galibiés qu'éront un père et unne mère liechtensteinnais pourront ête liechtensteinnais. Pourront, mais ch'est mie oblitger !

vendredi 14 février 2014

Ches amoureux qui baisot'te chu ches bancs publics

Qué bèle canchon ed Georges Brassens.

"...
In s'disant des "J't'ainme" pathétiques
...
Et coésichant ech tiot nom dech premier papar
...
Ont des tiotes dgeules bin sympathiques."

Ah ! Eq ch'est bieu !
Ches gins cange'te, mais ches doux mots rest'te.


jeudi 13 février 2014

Ete addict

Ete addict, ch'est én mie pouvoèr s'passer ed quèk cose.

I o granmint d'eximpes. Addict achl'alcool, ach'tabac, ach'sexe o tous ches eutes eq tu vux. Ches jux d'argint, étou. Et ches addicts à ches téléphones portables o à ches ordinateurs o chl'internet !

Mi, i paroaît qu'éj sus addict àch télévision. Ch'est mie vrai ! Ech miu, ch'est del preuver. Pér eximpe, in mettant un keu ed piés ndin. Vo mie el foaire, keuse qu'i in o qui l'rbé'te.

J'o unne boinne conmarade, j't'o djo causé d'ale, qui ouvre pour dgérir ches addicts. I o granmint à foaire, keuse qu'i o granmint ed cas;

Ech miu, ch'est ed mie kmincher. Surtoute à boère o feumer.


mercredi 12 février 2014

Pour bin vive

Mi, achteure, quanq éj vux du boin chocolat, j'acate du chocolat belge.

Pour ches vagances à ches nèges, tu pux coésir ches Alpes frinchaises o autrichiennes. Pour és solé, ech Côte d'Azur o echl'Espagne.

 Pour bin minger, du fromage frinchais.

Unne voéture janmoais in rade, frinchaise o allminde.

Unne binque ed fiate, o unne monte ed fiate étou, ch'est mie ech qui minque in Frinche.

J'o mie ed mau. Alorss, foais comme mi, acate ches produits dech communauté uropéenne.

mardi 11 février 2014

Ch'est qui qu'est ech keupabe ?

Feut toudi un keupabe.

Un accidint ed voétures, ch'est qui ech keupabe ?

Un mort avuc dis balles din s'tète, ch'est mie normal ; Un keupabe ?

Tu rintes achl'opitau pour unne appindicite et t'in rsort avuc unne gambe ed moinss, o ches piés dvant, i o unne berlure. Et un keupabe !

Mais quanq i pleut granmint et qu'un rocher tchait chu unne voée, feut-i absolumint tracher un keupabe ?

lundi 10 février 2014

Toulouse

A Toulouse, i o toudi ieu unne boinne étchipe ed rugby. Is ont gaingné granmint ed tites o keupes, in Frinche et in Urope.



Achteure, i o un problinme : Ech'étchipe ed Frinche ed rugby jue in minme tan eq ches étchipes ed ches villes. Dech keup, chi t'os unne boinne étchipe, t'os des boins jueus qui ju'te... in étchipe ed Frinche. Et tu pux perde, avuc l'étchipe dèt'ville, contre un moinss fort eq ti.

Toulouse perd ; Bayonne gaingne. Allez, ech Stade Toulousain. Mais étou, allez, allez, echl'Aviron Bayonnais.


Et ches eutes.

dimanche 9 février 2014

Ches rtards ed trains

In Frinche, chi tu prinds ech'train pour aller ouvrer, t'os constaté qu'is avoai'te souvint du rtard.

Pour mi, chu unne innée, cho foait inter vint-uit et trinte-sis ures.

Avuc cho, tu manques un eute train eq tu devoais prinde o unne rinconte.

Ièr, à Annot, ch'étoait ech'contraire : i o ieu un rindez-vous qu'étoait mie prévue. Ech train avoait uit minutes ed rtard ach dépèrt.

Ej pinse granmint à tous ches gins.

Ah ! Chi ches trains n'avoai'te mie eds rtards !

samedi 8 février 2014

Ches moukes à mié

Os in avons granmint dzoin pour vive. Mie à keuse dech mié qu'i foai'te, mais pour ech pollinisation ed ches plintes.

Achteure, i o ech problinme ed ches pestichides et dech varroa, un tiot parasite, qui foai'te granmint ed mau à ches moukes à mié.

Ches scieintifiques ouve'te chu ches deus coses lo. Et i  trache'te chu tout.

L'eute jour, à un colloque, j'o intindu un gars dire qu' "i avoait miu à foaire eq d'inculer ches moukes".
Ech scieintifique, calmémint, i o répondu qu'i n'étoait mie spécialichte in moukes - à brin. Et vlan ! Din ches dints.

Ches moukes à mié ont unne tout tiote chervelle, mais sont vraimint mie nikdouilles. Et ont unne organisation et un scré esprit d'étchipe. Qui qui ch'i frotte, ch'i pique.

Achteure, din tin gardin, arrache ches méchantes herbes, pour én mie mette ed poéson. Ch'est bin et miu pour tertous.

vendredi 7 février 2014

Bio

Minger bio, ch'est miu pour ét'sinté ! Qui pèroait, o qui s'dit !

Ches scieintifiques di'te quanq minme qui o du saumon funmé moinss boin eq ches eutes saumons.

Mi, éj dis étou : et ches cans bio, qui pèroait, chu ches bords ed ches autoroutes ?

Minme chi ch'est mie bio, t'intchiéte mie pér mi, éj minge bin ; Et d' tout. .

jeudi 6 février 2014

Unne madgète, in pieu ed vake

I sanneroait qu'i existe coèr in Frinche, unne directrice d'école qu'applique ches méthodes ed dis-nu-chint ; Pèr eximpe, ale punit ches jonnes din l'cour, dvant tous ches eutes : "os voéyez li, ch'est un nikdouille qui fro janmoais rin ed bin din s'vie".

Des gins, ed miu ed trinte ins et qui l'o eu, pinseroai'te coèr à cho. J'o du mau à croère o.

Ches gins vourroai'te rin dire o foaire pour eq leu galibiés o mie d'imbrouille. I paraît minme eq ch'est plu aisié ed mette ches éfants din d'eute école.

Unne mère, qui savoait mie o, avoait organisé unne innée, avuc d'eutes, unne tchermesse pour gaingner edl'argint pour echl'école. Ch'o bin été, mais el pieu d'vake o mie voulu ed ches bénéfiches.

Ech directrice éroait eu unne médaille. Ch'est p't'ête ches galibiés qu'o dmindé ! Pour ête bin vus et trinquilles ?

Infin ! D'après s'qu'éj o lu, din chin village, des gins l'appélroai'te el madgète ; Eroait-i des cornes comme ech diale, o comme eute cose?

mercredi 5 février 2014

Prinds tes précœutions

- "Em'fille, mi, et'mére, feut qu'éj te cause. Tu pèrtes deus moés in Belgique pour miu apprinde ech belge, et t'os tchinze ins.  Din ches cas où, éj t'ai mis, din t'valise, unne boéte ed chincante préservatifs."

Lo, t'os dit at'fille :
- "prinds tes précœutions"
o
- "vas i, laisse ti, o foait ti, tchulbuter."

Tchinze ins !

mardi 4 février 2014

Persinnet

Unne fanme attind un papar o, o un tiot éfant din ch'panche, chi tu comprinds miu.

Ale o des invies ; Mie ed fraises, mais ed persi. Seulmint, din ch'conte, i in o mie, o amon unne chorchèle. Mais cht'onme à l'fanme o mie 'frousse et in truve.

L'fanme minge ech persi et ch'papar qui nait est unne bèle fille qui s'lonme... Persinnet.

A ches contes !

lundi 3 février 2014

Tcheu chu ch'tchul

Diminche au matin, j'o aconduit un galibié ed dis ins ach'messe.

D'un keup, i m'dit :
- "Mi, j'o un conmarade qu'o dmindé quèk cose à Diu, et i l'o mie yeu. Dech keup, i vut mie rtorner ach cathéchite."

- "Quoè q'ch'est eq ch'étoait ?" qu'éj i réponds ; En pinsant qu'i s'agit p't'ête d'argint.

- "I vouloait eq chin père et s'mére s'rmet'te insanne."

Cho kminche bin d'ête compagnon d'Emmaüs !

dimanche 2 février 2014

Premiére edvinette ed deus-mile-quatore

Edvine où et quanq o été foaite ech photo indsous



Chi tu jues et q'tu vux gaingner, feut donner un nom, unne date et unne ure.

Réponse ech sèse févrié.

Boinne canche à ti.

Pinse à mi

"Min diu, pourquoè m'os tu abindonner ?"

Des keups, tu t'poses ech question.

samedi 1 février 2014

Ches compagnons d'Emmaüs

Quèk ch'est qu'ête compagnon d'Emmaüs ?

Ches compagnons d'Emmaüs sont des gins, qui sont, o qu'étoai'te, pauves et din l'misère, atcheuillés din une communauté Emmaüs. Ech premiére communauté o été mise in place pér echl'abbé Pierre in mile-nu-chint-quarante-nu.

L'eute jour, une fanme vint m'vir et m'dit : "vourros-tu ête compagnon d'Emmaüs ?"

A mi qui ouvre, qu'o unne fanme et des éfants, qu'o unne moaison keufée in ivèr, a'm'dminde cho. Cho surprinds !

Alorss, a'm'dit qu'ête compagnon d'Emmaüs, ch'est étou aidier un galibié qui vo ach'cathéchiste et i esplitcher kmint eq ti tu vis comme un chrétien.

Vlo toute !

In ch'premier févrié deus-mile-quatore, soéçante ins après echl'appel dechl'abbé Pierre, à n'mie confonde avuc ch'ti dech Général De Gaulle, éj pouvoais mie rfuser. J'o dit "ouais" pour i foaire plaisi, et pour ech tiot.