Vive conme un russe

Ièr, timpe au matin, i foaisoait granmint froéd.

Et j'o invoéyé un tiot message qui disoait :

- "Ej pense ach jonne - qu'est sibérien et qui vit in Sibérie, ej l'o seuremint djò écrit - qui dvroait dvenir min bieu-fiu."

Et m'fille qui vo s'merrier avuc li, i o transmis ech message.

L'eute, fin bin édutché - répond à m'fille, et don à mi :

- "Abille -ti lò dò qu'i foait keud, et foait atincion à ti."

Merchi .

Mais pour tout comprinde, i feut qu'ej vos esplique : pour ches russes, ch'est adité eq d'avir du grind froéd. Per eximpe, moinss trinte-chonc degrés in dsou ed zéro. Adon, eux, is peu'te s'abiller à l'cour quanq i foait moinss dis degrés. Mais is sai'te eq pour nos, ches frinchoés, ch'est mie adité.


Ch'est pour cho eq min futur bieu-fiu m'conseille ed m'abiller lò dò qu'i foait keud.

Qu'i m'sanne qu'i feut comprinde

Ièr au vèpe, emn eute fille m'écrit :

- "Pense étou à tin bieu-fiu qui vo ouvrer à bicyclète."

Conme chi j'i pensoais janmoais ?!

Bec à mes bieu-fius qui sont corageus. Et eq j'ainme.

Quanq os sonmes boin à rin

... o bin méchant,  os pouvons aller vir din ches anmérikes, et os érons unne canche d'ête boin o bin considéré.


Et ches unne boinne cose pour ches frinchoés qu'ed vit pèrtir ches méchants din un eute poaiyis.

Mais i feut vraimint ête un o unne crosse nikdouille in Frinche pour réussir à ches anmérikes.

Surtoute in politike !

L'étchipe ed Frinche rimporte ech tournoé

... ed ches sis nations.

In rugby.

Os sonmes in deus mile-vint-quat, et pour ech troésienme keup edpi deus-mile-vint, echl'étchipe ed Frinche ed rugby o gaingné ech nouvieu tournoé ed rugby qu'ale o créé in deus-mile-dis nu.

Ches sis nations, ch'est ches sis nations qu'avoai'te créé l'Communauté ed l'Urope et dech Carbon in mile-nu-chint-chincante-et-un pi l'Communauté Economike Uropéyiène in mile-nu-chint-chincante-sèt : echl'Allemane, l'Bergike, ech Luchinbourg, ches Poaiyis-Bos, l'Italie et don, l'Frinche.

In deus-mile-dis-uit, echl'étchipe ed rugby ed Frinche avoait vaintchu l'Italie, et ch'est conme cho qu'ale ieu echl'idée ed créer un nouvieu tournoé.

Ch'étoait p't'ête étou unne manière ed gaingner ach rugby.

Heute

A tertous mes lecteus qui n'peu'te mie aller à Pèris vir l'vake aubrac qui s'lonme Heute, et ches eutes vakes, glinnes, coechons, pèrisiens et berbis qui sont ach Salon ed l'agriculture pour uit jours, vlò à quoé qu'ersanne unne vake aubrac, et quoé qu'ale sert : foaire des vieus - qu'ale ainme conme unne mère dvroait ainmer ches fius o ches filles - pour foaire del fin boinne vianne.

 

Il est possibe qu'el vake Heute fuche ech tiot vieu del photo. 

Mais mie granmint probabe.

Boin sinmdi à tertous.

Coésir unne boinne école.

Ches jonnes qu'ont alintour ed dis-uit ins et qui vont passer ech baccaleuréat cht'innée doé'te coésir unne école pour à pertir ed septimbe.

Unne grinde école !

Mi, j'éroais invie ed leu dire qu'unne boinne grinde école, un keup, ale invite ech présidint ed Ches Républitchains, et un eute keup, ech présidint del Frinche Insoumise.

A moinss qu'ho fuche unne crosse berlure. Qu'ed les inviter. Et don, qu'ed coésir cht'école.

Chi cho rsanne à quoé qu'os lisez ches jours din ches gasètes, ch'est bin possibe.

Un scieintifique esplique

l'différinche inter un rat et un campagnole.

A des poéyisans.

Qui, eux, croé'te et vu'te croère eq ch'est l'minme cose.

- "Chi os m'disez eq ches campagnoles sont des rats et qu'os voulez mie m'croère quanq ej vos dis eq ch'est mie l'minme cose, adon, ches bètes rouves drière vos qui sont in pati, qu'ont quat pattes, deus cornes, qui vos baille'te du lait, ej lonme cho des madgètes."

- "Mais ch'est des vakes!"

- "Chi os m'croéyoais mie quanq ej vos dis qu'un campagnole n'est mie un rat, ej lonme cho des madgètes."

El cidjale et l'frunmion

L'cidjale, qu'est un tiot nikdouille d'insecte qu'est cros conme cho, ale avoait rin à minger.

Adon, quoé qu'ale foait ? Ale buse din s'ford interieure. Ale vo vir es voésine qui reste deus troés bicokes un tiot molet pu loin.

Mais, ale passe per drière l'première bicoke vu qu'ale doét edl'argint, etpi aprè, ale foait un treu, ale sort dech labyrinthe, ale foait atincion ach naphtaline, et ale arrive amon l'frunmion, butche achl'uis (toc, toc, toc) :

- "Chin vos kminder !"

- "Qui qu'est lò ?"

- "Ch'est mi !"

- "Qui ti ?"

- "Ch'est mi !"

- "Mais qui ti ?"

- "Ch'est mi !"

- "Ah, ch'est ti, rinte !.. Quoé eq tu vux ?"

- "Eh, juste dire bojour, conme cho .. Ch'est saprémint régalant amon ti !Fin bieu , hein ! To's un bieu tiot gardin avuc Blanke-ches-nèges et ches sèt nains, ches campignons et étou ches tiotés beutèles din ches allées, ech pus avuc ches pneus, tout cho. Fin bieu.

T'os unne bèle salle ed bains avuc ches glinnes din l'baignoère, tout cho. Fin bieu, hein..."

- "Quoé eq tu vux ?"

- "Ah, ch'est toute, vlò, j'disoais bojour. Boin allez achteure, feut...
Oh, pindint qu'ej su chu ch'pas dechl'uis, i m'vient unne idée d'un keup d'un keup : jou eq tu pourroais m'prêter edl'argint, chin t'kminder ?

- "Tu vux edl'argint ?

- "Vlò !"

- "Vos-t-in t'es unne crapé. Vos-t'in t'es unne crapé, ch'est toute ! In premier, ej vo t'dire unne cose : quoé eq tu foaisoais ech darain étè, eq mi j'ouve toudi ? Quoé eq tu foaisoais, tu vos m'esplitcher ?

- "Ehhhh... Ahhh..."

- "Tu foaisoais rin du toute ! Ch'est toute. Tu vux acater unne voéture. Tu vos acater unne Dauphine. T'étaois mie contint del Dauphine tu la laices ach coin del voée, tu racates unne Simca mile Peugeot.. Turbot ! Avuc ed décalotchomanies pertoute : Donald, Bick John, Captaine Haddock, Tintin, Milou, Marsupilami, Blek ech Roc, Goldorachme.

Tu avoais ech tcheue ed David Crotchette ach rétroviseu. Ches intibrouillars, klaxon l'musike comtimporaine. Tu avoais étou chu l'sélète arrière, sélète avant une pieu ed tigresse. Ech voalnt avuc l'fourrure. Tu avoais étou chu ch'pare-berzille unne auto-collant pour-conte ech solé "A.-S. fotbal club Villejuif". Et achteure tu dmindes edl'argint, adonmi ej té dis ; vos-t-in t'es unne arlande, ch'est toute ! Allez, vos-t-in ! Mie possibe, hein !

Quoé qu'ale foait l'pauve tiote cidjale ? Ale erre din l'nature... ale foule chl'erbe menue.  Ale o rin à matcher. Ale kerve.

Mais l'frunmion,ale, reste à l'intérieur. Mie nikdouille l'frunmion, ale reste à l’intérieur, ale ouve. Tertous ches jours, ale ouve ! Tertous ches jours, ale ouve !!! Tertous ches.... ! Ale ouve dis jours per smangnes. L'vérité chi j'mins !

Ale passe des keups ed ramon toute pertoute. Ale gaingne edl'argint. Ale un acate un aspirator.

Ouve ed trop, matche ed trop. Tout quoé qu'ale truvoe ale matche : ale matche un couscous tchanidjou, un couscou Ronron, couscous ..., ech diminche, pour canger, conme cho...

Matche ed trop, ouve ed trop, et quoé qu'ale o ? Problinme ed santé : infarctus dech tcheur !

Kerve étou.
A rtenir : tu matches, tu matches mie, tu kerves quanq minme.


Ed Pierre Pechin, mort in janvié.

Adé !

Min fiu est boin

Quanq j'écris cho, ej vux mie dire eq ch'est mie un nikdouille, minme chi ch'est vrai eq ch'est mie un nikdouille et qu'il o du gingin.

Nan !

Ej vux dire qu'i vu bailler du bonnur à ches gins.

Diminche, adon eq j'étoais in voéture tout seu avuc li, i m'dit :

- "Min père, j'o edl'argint qu'ej sais mie quoé in foaire ; chi t'os dzoin, ej t'in prête."

- "Min fiu, merchi ! Mais etn argint, t'in éros dzoin din quèks smangnes, moés o innées. Don, warde le ! Et mère et mi, os allons nos tribouler. Quoé qu'os avons invie d'acater, os l'acaterons din un o deus moés."

Ej su ureus d'avir un fiu conme cho, qu'i foait atincion à ches eutes.

Mais ej le savoais. Edpi granmint ed tans. P't'ête edpi qu'il est né. O casi.

Il o boin tcheur.

Quanq j'écris, cho, ej vux mie dire eq chin tcheur est boin à minger.

Cho m'foait rire

..., mais je dvroais mie.

I o quèks smangnes, unne gin est morte.

Del grippe.

Chake innée, i n'o quèks uns, un mile et puss, qui meur'te del grippe. Mie ed canche pour eux.

Mais ech keup-chi, ale est morte din un ôpital. Ale avoait unne canche ed djérir, in étant din un ôpital, mais ale est mort.

Coèr un eute keup, mie ed canche pour ale !

Et pour définir echl'article, feut qu'ej vos diche qu'ale est morte del grippe, din un ôpital, à Lourdes.

Autchun miracle !

Ch'étoait vraimint mie chin jour ed canche.

Pauve gin ! Pauve famille !

A tertous, fuchez prudint.

I s'moque

Ièr au matin, j'invoée un tiot message à des gins :

- "Du blanc per chi, per lò."

Un ed mes fius qu'avoait erchu ech message m'répond :

- "Tu causes ed tes cavieus ?!"

Ed ches nèges, os in doutez, qu'ej causoais.

Mes cavieus, is ont, achteure, toudi du blanc ; j'éroais pu invoéyer ech message in étè. Adon eq pour ches nèges, i o des saisons.

Boin ivèr à tertous.

Ches watieus ed Dunkèque

 I sanne, vu quoé qu'ej lis din ches gasètes, et vu eq j'o janmoais étè à ch'Carnaval ed Dunkèque, eq ches gins s'erluse'te à créer ed boins watieus avuc des tiots noms régalants.

Per eximpe, "l'Crotte ed malo", "ech Treu ed balle à Chantal", "l'Couillonade" o coèr "ech Zizi d'em Tante".

Echt'innée, ech watieu s'lonme "ech Zôt'che".

I péroait qu'ech zôt'che, ch'est un bec que s'font ches carnavaleus pour s'saluer ; is s'font un bec chu l'bouke pour mie abimer ch'matchillage qu'is ont chu leu fidjure.

Adon, "ech Zôtche", ech watieu, rsanne à deus lipes, rouves.

Un jour, j'iro à Dunkèque in févrié.

Boin carnaval à tertous.

Et à l'fille avuc qui j'ouve, et chin cadoreus.

Du lait pour ches papars

Os n'pouvez mie n'mie in avir intindu causer edpi quèks smangnes dech sapré fin cros problinme qu'o ieu unne interprinze ed Mayenne qui fabrique du lait pour ches papars.

Granmint ed tiots - alintour ed deus-chints - ont ieu du mau obin ont un problinme avuc ches salmonèles.

Deus-chint, din ch'monde, qu'i sanne.

Mi, ej su mie in route à vouloèr définde echl'interprinze del tiote ville ed Craon qu'ej connoais, vu qu'i o des courses ed kvaus, et des cinsiers qu'ont ed bèlés vakes rouves et blankes.

Seur qu'ej vux mie l'définde.

Mais quanq minme !

Deus-chint galibiés atteints - ch'est toudi deus-chint ed trop - mais des millons ed boètes ed lait vindues et consommées.

Adon ?!

I falloait, i feut arter echl'interprinze et l'néttier à-foait.

Mais os érons janmoais zéro ristche.

Zéro ristche à bir du lait ? Zéro ristche à minger del vianne ? Zéro ristche étou à mner unne voéture, minme in roulant à trinte kilomètes per eures ? Zéro ristche à aller vir un séruzyin ?...

A moinss ed revnir , pour ech lait, à ches boinnés norriches d'intin. Ches vraies norriches qu'avoai'te deus superbes tètes, avuc du boin lait, et qui norrichoai'te miu d'un papar avuc.

Achteure, unne norriche, minme avuc ed crossés tètes, ale norrit pu ches éfants avuc. Ale n'foait qu'ed les warder. Et ed leu bailler du lait. Qu'ale acate.

Qué donmage !

Mi, ej pense à l'tiote Margot et chin cot.

L'première lète d'un tiot nom

Ches deus papars qu'ej connoais qui sont nés echt'innée ont leu tiot nom qui kminche per un "t" : Tom, pour ch'premier, pi Théa pour ech sgond.

Ej mé dminde chi tertous ches éfants qui vont naite in deus-mile-dis-uit doé'te avir un tiot nom qui kminche per un "t" ?

Per eximpe, :Tédò, Titemoto, Tatave, o coèr Tatianaïovichtkaïra !

I n'o un à qui eq j'in o causé qui m'o répondu "Técon".

Vlò un tiot nom qu'ej connoaissoais mie.

Emn espérieinche ed thermodynamike

L'eute jour, amon mi, j'o foait unne espérieinche avuc un thermomète qui baille deus timpératures : ndan, et à l'cour.

Pour echl'espérieinche, j'o arté ed keuffer m'maoison, pi ouvert ches uis et ches ferniètes et noté chu unne feuille ches deus timpératures ; quatore, ndan, et zéro à l'cour.

Quèks minutes.

Pi, j'o tout frunmé, ches ferniètes et ches uis, et rmis ech keuffage.

Adon, j'o rbéïé, quat eures aprè, l'timpérature à l'cour : zéro.

J'in o conclu qu'em moaison étoait bin isolée, vu eq min keuffage n'keuffe mie à l'cour.

Os in pensez quoé ?

Ches mémoères ed plancton

Edpi quèks jours, ches jornaleus cause'te un molet ed ches bandes déssinées.

Vu qu'i o ieu ech festival d'Indjoulème.

Mi, j'o apprins verdi qu'il alloait i in avir unne nouvèle din quèks moés, ed bande déssinée, avuc conme tite "Ches mémoères d'un plancton".

Ej sais mie vraimint ed quoé eq cho vo dviser, mais ech tite éroait été truvoé per unne jonne fille qui connait echl'auteur, et qui éroait intindu dire un jour qu'echl'auteu étoait lonmé "plancton" per chin frère quanq il étoait fin jonne.

Adon, l'tiote o proposé ech tite-lò achl'auteur.

Vivemint qu'ej puche acater ech live !

Chi un lecteu put m'espiltcher quoé eq ch'est qu'unne mémoère ed plancton, ho m'froait plaisi.

Il o del canche

..., not Présidint.

J'vos esplique.

Ièr et innui, not Présidint est in Corse.

Voéyage dit per ches jornaleus conme fin malaisié pour li.

Mais ièr, il o tchait granmint ed ches nèges à Pèris.

Première canche pour ech Présidint : chin avion étoait perti.

Deusienme canche : in Corse, i n'tchaisoait mie ed ches nèges.

Troésienme et daraine canche, ech keup-chi : vu qu'i o ieu granmint eds imbouteillages à Péris - sèt-chint et quèks kilomètes ed voétures et eutes blotchés, ièr, alintour ed dis-nu eures quarante-chonc - ches jornaleus n'ont causé qu'ed cho : ches nèges à Pèris.

Et not Présidint rintro innui amon li, quanq ches nèges éront fondu.

Qué canche !

Merchi ches fanminisses

Ed puss in puss, os intindons ches fanminisses causer.

Os pouvez dire eq ch'est normal, vu qu'unne fanme, cho cause.

Toudi !

Et granmint !

Ches féminisses cause'te surtoute pour définde ches fanmes.

Eximpe ; feut qu'i autant ed fanmes députés eq d'onmes !

Minme chi ches fanmes vu'te mie l'ête o sont des nikdouilles, i feut qu'i o. Qu'ej dis.

Et l'image ed ches fanmes din l'société. Qu'is définde'te, ches fanminisses.

Mais ches fanminisses ont mis des filles à joke ; ches bèlés filles qu'étoai'te chu l'grille, avant ches courses ed voétures qu'os lonmons formule un.

Pauvés filles ! Is sont bin bélottes, mais à joke.

Et p't'ête malureuses ?!

Et i in éro d'eutes, Granmint d'eutes !

- l'bèle fanme qui présinte ches tans à l'télé ?! A joke.
- ches bèlés fanmes qui danse'te avant ches rincontes ed fotbal anméritchins ?! A joke.
- l'bèle fanme qui atcheuille ches gins din unne interprinze ?! A joke

- ches bèlés fanmes qui ju'te din ches films ?! A joke.

- ...... ?!A joke.

Et ch'cros problinme, qu'ej pense, ch'est qu'unne bèle fanme, des keups, ale o des problinmes pour buser.

Don, quoé qu'is vont dvenir, tertoutes ches bèlés fanmes à joke ?

L'eute jour, j'o intindu et acouté, pour un premier keup, unne canchon ed Pierre Perret qui s'lonme Malicka. Fin bèle canchon.

Boinne jornée.

J'o gaingné un millon

... chint-quater-vint-dis mile euros (cho foait un millon d'argint anméritchin). Ach loterie nationale.

Qu'o dit un anméritchin qu'étoait pauve. Avant ed gaingner.

Qui pouvoait adon aller amon un séruzyin.

- "Ch'est bin d'ête vnu. Mais os allez moérir din troés smangnes. Ej pux rin foaire pour vos." Qui dit ech séruzyin.

Et cht'onme est mort.

Don : il étoait p't'ête puss ureus quanq il étoait pauve.

Foaisons eds économies

L'eute diminche, à l'messe, j'o lu l'deusienme lecture.

"...... . Filles, restez vierges. ....."

J'ai rin comprin, mais j'o lu.

J'ai rin comprin, mais ej mé su dit qu'ech tchuré alloait esplitcher aprè.

Eh bin, nan !

Adon, aprè l'messe, j'o allé vir ech tchuiré, et j'i o dit :

- "Disez mi, ech tchuré ! Chi ches lectures sont mie espliquées, mie dzoin ed les lire ! Os gaingnerons du tans."

- "Os avez un molet raison" qu'i m'répond, "mais pour foaire court j'o coési ed mie in causer. Chin quoé, i m'falloait deus eures."

Don, j'o toudi mie comprin pourquoé qu'un apôte avoait écrit cho.

Achainde ech tans

Mi, j'o un reuve : courir ach Pôle Nord, ech vrai Pôle Nord, alintour d'un beu ed bo planté din ches glaces, et achainde ech tans.

Min bieu-frère m'dit eq ch'est mie possibe.

Mi ej reuve toudi.

Mais i m'feudroait étou courir din ch'boin sins. Chin quoé, ej vo perde du tans, granmint ed tans.