Rkmincher à zéro

Os l'disons, disons et rdisons coèr : achteure, i feut rester à no'moaison.

Chatchun din s'moaison durant miu ed quatore jours, et os n'devroème pu causer dech cros et fin tiot virus.

Diminche, os étoème, in principe, à douse jours.

Béto djéri, béto trantchille. I o mie dzoin dé rmette tchinze jours ed puss conme cho o étè foait dò qu'i feut à nouvieu n'poin sortir ed nos'moaison.


Bin, diminche, j'o comprins qu'i feut. J'esplique.

Maginez !

Din m'moaison, os sonmes troés à i vive edpi ech dis-sèt dech moés ed marche.

Et pèrmi nos, i n'in o qu'ainme seuver des vies.

Diminche, deus keups l'o étè appelé pour seuver des vies. Et i o un keup dò eq ch'étoait pour unne gin qu'o p't'ête, casi seur, ech fanmeus mau.

Quanq min fiu l'o rintré à no'moaison, seur qu'il o fin atincion à ches pérints.

Mais n'impêque ! Os avons rkminchér à cartchuler ches quatore jours edpi diminche. Ch'est long.

Fuchez tertous prudent, et corage et merchi à tertous ches gins qui seuve'te o aide'te à seuver des vies.

Prinde des nouvèles ed ches vius

Restez à vo'moaison !

Tertout l'dit, tertout n'l'foait poin, mais i feudroait.

In restant à no'moaison, des keups os sonmes deus, troés, quat o chonc, slon l'famille qu'os avons et ches âges ed ches éfants del famille, des keups, os sonmes tout seu.

Et din ches gins tout seu, i o surtout ches vius.

Qu'i feut miu éviter d'aller vir. Mais qui s'innui'te.

Adon, os pouvons, l'est minme bin del foaire, leu téléphoner.

Quanq min - jonne (moinss ed chicante ins d'âges) - bieu-frère m'o téléphoné verdi au vèpe, ch'étaoit jusse pour prinde ed mes nouvèles.

Cho m'o foait granmint plaisi d'i causer, mais jou qu'à chincante-uit ins, ej su djò viu ?

Nan ! Mais ej su p't'ête considéré conme l'étant, chi s'o truvoe.

Min - jonne (moinss ed chicante ins d'âges) - bieu-frère put mé rtéléphoner quanq i vut : j'ainme bin dviser avuc li.

Coucou ed loin à tertous. Poin ed bec, mais ch'tcheur i est.

Tiote annonche

Onme poaiyé à rin foaire vut bin foaire, in attindint ech moés ed moai et rtorner ouvrer, ches dvoèrs ed ches galibiés ed moinss ed tchinze ins.


Foaire l'dminde, in picard ed préférinche, o in frinchoés, chu ch'blog, din un conmintère.

Soin ! Moinss ed chonc dmindes acceptées.

Chti qui croét in mi

... n'moériro jonmoais.

Qu'ech Christ nos dit, innui, din chl'évingile.

Ch'est du hasèrd qu'i o chl'évingile-lò innui.

Mais ch'est ch'momint d'i croère

Boin diminche à vo'moaison.

Fabritcher chin pain

Bojour à tertous,

Os êtes à vo'moaison, coèr au moinss justch'à ech tchinze dech moés d'avri, os évitez ed sortir, mais os ainmez avir du boin pain.

Adon, pour vos eq j'ainme, vlò unne boinne rchète ed pain eq foait m'fanme :

I feut un tchilo ed frinne, troés quèrts d'un lite d'ieu, unne tchuillère à café ed chuke et unne del levure ed boulindger.

Os touillez granmint, pi os mettez aprè deus crossés tchuillères d'ole et unne ed sé, un bol (o un quèrt ed lite) d'avangne o eute céréales.

Et os touillez coèr un cros keup (os avez l'tans ; os êtes à vo'moaison pour tchinze jours).

Chi i o dzoin, os pouvez rmette un tiot molet ed frinne.

Achteure, os attindez miu ed deus eures in mettant ech pain qu'os êtes in route à fabritcher din un indroét bin keud, à miu ed vint-chonc dégrés, et ed couvrir avuc un morcieu ed tissus fré pèr dsus.

M'fanme vos conseille del mette avant din un mole à watieu dò qu'os érez mis ed l'ole chu ches bords et ch'fond, et dò qu'os mettrez ch'morcieu ed tissus fré pèr dsus.

....

Après avir bin attindu miu ed ches deus eures, mettez à tchuire alintour ed chincante à soéçante minutes - o unne eure - din un four qu'est djò à chint-soéçante degrés.

M'fanme met din ch'four à chin-soéçante-dis degrés, quarante-chonc minutes.

Vlò achteure vot pain tchuit.

Pour ches gins qu'ont un molet ed gingin, os pouvez i offrir un bieu so pour miu l'conserver.

Etpi, n'obliez mie : avuc du bure ch'est miu.

Chi os ainmez ech pain tert, i vos feut in foaire chake jour. Chin quoé, ech pain-lò qu'os pouvez foaire, minme aprè quèks jours, l'est sé mais fin boin.

Boin accion !

Arter ch'monde

Arter ch'monde, arter ed sortir, ch'est cho qu'i feut foaire pour arter ch'mau qu'i o achteure pèrtoute et qui tue granmint ed gins, à pèrt in Sibérie dò qu'i o granmint ed gins qui meur'te ed pneumonie, troés-mile pèr chint ed puss in troés moés qu'in unne innée !, mais mie dech fanmeus virus. Qu'i péroait !

N'poin sortir durant quatore jours, mettons vint, et toute iro aprè fin bin.

Tertous in minme tans qui feut rester à no'moaison durant ches tans-lò ed quatore à vint jours. In Chine, in Afrike, à ches Anmérickes, à Anmyin, Adville, Kraschnoyèrschk, Si-Kintin ; pèrtoute !.

Mais i o un fin cros problinme : ech monde vit. I o eds abes, ches bétails, ches gins qui sont lò et qui vive'te.

Et pour vive, feut ... matcher.

Et bouger, à pèrt ches abes, pour truvoer o acater à matcher.

Don, os pouvons mie vraimint arter ch'monde chin impétcher ches gins, et un molet ches bétails, d'ête à l'cour.

Mais os pouvons éviter, quanq minme, ed sortir granmint.

Et os pouvons prier pour qu'ho fuche vite défini.

A dman, p't'ête !

Aidier ches agritchulteus

Edpi quèks jours, ches agritculteus frinchoés dminde'te à tertous qui peu'te dé vnir els aidier à leu ouvrage.

I o, o vo i avir des lédjumes à tcheuillir o à ramasser, et ches agritchulteus ont dzoin d'aide.

Conme chake innée !

Mais ches innées d'avant, granmint d'agritchulteus dmindoai'te à des polonoés, roumains o eutes gins ed l'Est ed l'Urope dé vnir.  Et les poaiyoai'te granmint moinss eq ches frinchoés o picards..

Adon !

Disez-mi chi, din un in, ches poéyisins front rvenir ches uropéïens ed l'Est pour chonc uros pèr eure o ches frinchoés et picards vnus cht'innée ?

Disez-mi.

Etpi, ches lédjumes o fruits tcheullis sront p't'ête mis à l'poubèle, vu eq ches restaurants, ches écoles sont frunmés, vu étou eq ches gins n'peu'te mis s'promner conme is vu'te pour acater.

Adon ! Jou qu'i o dzoin d'aidier ches agritculteus pour tout cho ?

Ches poéyisins rchuvroai'te, i péroait, edl'argint pour détruire leus lédjumes o fruits.

Aidier, ej vux bin, mais i o des keups,... .

Corage à tertous.

Du boin tans pour ches avaricieus

Ah ! Qu'is sont ureus, achteure, ches avaricieus !

Os sonmes infrunmés à no'moaison. Os êtes infrunmés din vo'moaison.

Vlò eq vot téléphone sonne.

- "Allo ED (ej'm'o prins in eximpe) ! Kmint qu'ho vo ? Ch'est mi, ch'Zèf (lò, j'o poin prins unne gins qu'ej connoaiche in eximpe)! Tu t'ramintuvs ed mi ? Os étoème vnus à vo'moaison  i o deus ins, et avuc m'fanme, os éroème ainmé vos inviter à matcher din uit jours, avuc tertous vos éfants. Jou eq ch'est possibe ?

Nan ! Qué donmage ! Jou qu'à Pake cho iro ?

Nan ! Brin ! Aprè, à pèrtir dech moés ed moai, os rchuvons pu, vu qu'i foait fin keud et qu'ém fanme o du mau.

Acoute-mi ! Ej t'appèle aprè l'ivèr, vu qu'à Noë, os érons tertous nos éfants et qu'à pèrtir d'octobe, os préparons l'fête-lò.

A moinss qu'os pouvonche vnir vos vir in septimbe.

Adé ED ! Et à béto ! Cho nos froait granmint plaisi."

Cho nos froait granmint plaisi !

Min tchu !

Os attindons él mort

Bojour à tertout.


Os attindons ! Os sonmes à no'moaison, conme dmindé, et os attindons. I n'o qui ouve'te edpi leu moaison, mi, pèr eximpe, et d'eutes qui n'peu'te mie.

Ej croés eq tertout attind l'mort.

In vrai, tertout attind ed savoèr chi des gins qu'os connoaissons sont morts edpi ièr. Os attindons qu'él mort vienche, et qu'ale rpèrche in nos laissant lò, in vie.

Mais des gins qu'os ainmons o avuc qui os ouvrons et qui ont ch'fanmeus mau d'achteure, os in connoaissons.

Adon, conme ièr, prions pour qu'él mort passe fin rade et qu'os pouvonche se rvir din quèks smangnes. In vie.

Avuc ch'moinss ed mort possibe. Mais i vo i in avir.

Malureusemint !

Nono o l'freusse

Nono, née in mile-nu-chint-trinte-sèt, conme min père, soeur d'em mère et  in vie, poin conme min père, o l'freusse.

Casi chake jour, edpi eds innées, ale téléphone à m'mère. O ch'contraire.

Et ièr diminche, quanq ale dvisoait avuc m'm'mère, ale braiyoait. Granmint.

Nono o l'freusse dech grind mau d'achteure qu'est pèrtoute et qui, chi ale l'o, l'tuero, ch'est seur.

Adon, innui, minme chi os sonmes lindi, prions pour Nono, pour ches vius qui sont casuèles, pour ches séruzyins et ches soégnants, pour ches eutes gins qu'ont ch'mau, pour ches gins qui font mie atincion à eux et à ches eutes.

Prions, in vrai, pour tertout, et pour eq cho s'arte fin rade.

Mais cho, ch'est mie gaingné.

Corage, prière, et prudinche.

Din un ôpital

... achteure.

Slon ech nombe ed gins qu'ont ch'fanmeus virus et qui vont àchl'ôpital, ches gins sont puss o moinss bin soégné.

Vrai.

Chi i o granmint (trop) ed gins, ches vius, pèr eximpe ed puss ed soéçante-dis ins, sont mie soégnés.

Et meur'te.

Adon, prions pour ches séruzyins, pour ches malades, et pour ches gins qui vont bin.

Et boin diminche.

Restez à vo'moaison

... qu'is di'te et rdi'te, ches gins dech gouvernemint, et tertous ches séruzyins.

Restez à no'moaison !

I o des gins qui puss o moinss ed canche, quanq ch'est conme cho et qu'echl'ernouvieu est lò et qu 'i foait bieu.

Vos qui lisez min blog, dò qu'os êtes achteure ?

Corage.

Un molet moinss ed trains

... qu'o dit ch'gouvernemint, pour dminuer qu'ech fanmeus méchant virus voéyage.

Adon, edpi mardi, i o moinss ed trains.

Mais edpi judi, i o moinss ed trains, cho cange mie, mais ches trains n'tchit'te pu leu région.

Magine !

Tu vux aller d'Anmyin à Pèris, et ch'train, achteure, s'arte à Creil. Lò, i t'feut attinde un eute train, o des keups, un car, qu'iro à Pèris.

Lò, ch'est poin un boin eximpe, vu qu'i o toudi des trains inter Anmyin et Pèris.

Mais eutes eximpes, inter Lyon et Dijon, feut canger ed train à Macon. Inter Reims et Dijon, feut, achteure, canger ed moéyin ed voéyager à Chaumont ; i o pu ed train pour Dijon !

Pour définir chl'article de heute tchalité, ch'est mie un molet ed trains in moinss qu'i o, mais granmint in moinss.

Un vrai brin. Ureusemint qu'i o pu ed contrôle ndan.

In principe.

Eute cose pour foaire dintier ches gins qui voudroai'te aller promner chu ches bords ed ches mers, vu ch'bieu solé, i o ches merres - qui vienche'te d'ête élus - qu'interdise'te d'i aller.

Fuchez corageus : os in avons pour coèr miu d'un moés à ête confiné.

Adon, lisez et apprindez ch'picard.

Corage à tertous.

Prévnir à l'avinche

... ch'est bin. Mais granmint à l'avinche, des keups, os s'dmindons kmint eq ches gins font !

Ej vos conte.

Mardi, l'étoait inditché à douse eures trinte-deus, et chu internénet, eq din unne station, ech train ed dis-uit eures dis-sèt éroait chonc minutes de rtèrd.

Feut qu'ej vos préciche : ch'train ed dis-uit eures et ches bérouètes, quanq i passe din l'station-lò, il o pèrti edpi unne eure ed chin dépèrt.

Et lò, casi quat eures avant, des gins savoai'te qu'ech train éroait chonc minutes de rtèrd.

Qu'i o ieu un fin cros accidint quèk pèrt o qu'ech train fuche in rade, et qu'i fuche inditché qu'il éroait granmint de rtèrd, ch'est possibe, minme chi os ainmons mie.

Mais annoncher chonc minutes de rtèrd troés eures avant ch'édpèrt dech trains, ej su granmint surprins.

Et vos ! Quoé qu'os in disez ?

Restez à vo'moaison, et boinne lecture.

Ech monde vo moérir

Ch'est p't'ête mie vraimint vrai, mais cho i rsanne ; tertout doét rester à s'moaison durant au moinss tchinze jours.

Qu'o dit not Présidint del Républike.

Min fiu, li, m'o dit :

- "Quanq ej contero cho à mes tiots-éfants, is n'in viendront mie ! Ah bin nan ! Vu qu'os allons tertous moérir achteure !"

M'o foait rire.

Et vos ! Jou eq cho vo foaire rire ? Jou qu'os avez l'freusse ?

Disez-mi, et ayez fiat. L'vie rprindro.

Allez-i alintour ed dis eures

..., nettiez bin vos mains in intrant, et laiciez un mète avuc vot voésin dé dvant vos. Don, os érez étou un mète ed distinche avuc vot voésin ed drière, vu eq li, i doét laicier un mète avuc vos qu'êtes dvant li.

Qu'is disoai'te ches minisses avant ches élections ed diminche, à ches jornaleus.

J'o foait cho : j'o allé voter à dis eures vint.

Crosses berlures !

I avoait granmint ed gins, et moinss ed chincante chintimètes inter eux.

Pour un keup, i sanne eq ches gins ont acouté ches jornaleus.

Coèr un keup, ej conclus qu'il éroait mie fallu.

Ches surprindants inglés

Ech premier minisse inglés o déchidé, innui, ed laicier ech coronavirus s'répinde din chin poaiyis, chin rin foaire.

I dit eq quanq tertous ches inglés l'éront ieu, i éro pu ed problinme.

Seur qu'il o raison.

Mais i o unne cose qu'i dit mie, ch'est eq ches gins qui sront coèr in vie éront perdu granmint ed gins ed leu famille.

I restro eq ches gins in boinne santé, et granmint d'eutes sront morts.

Sapré inglés ! Sapré minise !

Ch'est trisse à vir.

Os sonmes tertous pékeu

... eq dit Diu.

Pékeu, slon Diu, ch'est n'poin foaire ed bin à vo'famille, vo'voésin et ches gins eq vous croésez.

Pour granmint d'eutes, ête pékeu, ch'est pêtcher du pichon, din l'ieu. O, l'vouloèr.

Edpi ièr sinmdi, ches pékeus sont ed sortie.

J'in o vu.

Is attinde'te, chu ches bords ed l'ieu, d'haper un pichon.

Mais ièr, j'o vu pékeu, qui sannoait mie nikdouille, et minme ête ernaré : il avoait mis ches deus mains dvant s'bouke et, i m'sanne, imitoait ech bruit ed ches truites. Pour eq ches truites is vienche'te.

I disoait cho : "                             ,                                          ".

Vu qu'ej passoais, j'o mie vu unne truite sortir. A moinss eq cho fuche ech bruit ed ches carpes, qu'i foaisoait. O vouloait foaire !

L'boinne cose avuc un pékeu conme li, ch'est qu'il imbête mie ches eutes pékeus.

Et mie granmint ches pichons !

Boin diminche à tertous, minme chi os êtes pékeus.

Pichons, tiots et grinds, fuchez prudints !

Acater un ordinature

Edpi judi, os l'savons tertous, ches galibiés ed Frinche, et ed granmint poaiyis d'Urope, n'iront pu din leus écoles durant quèks smangnes.

Mais ches jonnes, ed deus à vint-chonc ins d'âges et puss, slon, n'sront mie in vagances. Nan ! Is dvront apprinde leus lçons et foaire leus dvoèrs chu internénèt.

Qué boinne idée !

Internénèt, casi tertout l'o achteure à s'moaison. Suffit pour cho d'avir un téléphone portabe.

Mais pour foaire des dvoèrs, un téléphone portabe, ch'est fin tiot.

Adon verdi , i o des pèrints qu'ont allé acater un - vrai - ordinature.

T'os edl'argint, o poin, falloait in acater un, pour ets éfants.

Tu vos p't'ête n'avir dzoin tchinze jours seulemint, mais i falloait in acater un.

Coèr un keup, pour ets éfants. Tu l'foais.

L'crise ed ches jours, ale est mie pour tertous.

Et pour quèks uns, ale vo ête puss méchante eq pour d'eutes.

Brin !

Corage à tertous, ches galibiés - casi - in vagances, ches vius, et ches eutes qui li'te min blog et qui s'intchiét'te.

L'foère à gambons

... ed Bayeunne vo ête rportée.

A coeuse, os s'in doutez, dech fanmeus virus qu'os truvons pèrtoute, achteure, din ch'monde qu'ale vo ête rportée.

Et p't'ête qu'à Bayeunne, i in o un ed virus.

L'foère dvoait ête alintour ed Pâke, ale sro p't'ête à ches moés ed join o octobe. Attindons.

Pour mi, ech puss important, ch'est ed toudi pouvoèr acater et matcher du boin gambon. Ed Bayeunne.

Pourvu eq ches gins continue'te d'in fabritcher, des gambons. In espérant étou qu'is peuche'te coèr avir ed boins coéchons in Frinche.

Ch'est quanq minme donmage qu'i euche mie ed foère à gambons.

Pour ches gins qui li'te min blog et qui n'sai'te mie, à Bayeunne, i o des boins gambons, ej viens d'in causer, du rugby, j'in o causé des keups, et unne boinne canchon, eq ches baskes ed Bayeunne cant'te avuc granmint ed tcheur.

Bec à tertous, et à l'bèle et jonne conmarade ed min nveu.

Et matchez du gambon. Ed Bayeunne.

Ale ouvroait fin bin

... et étoait bélote.

Fin bélote.

Et jonne.

Amn'interprinze, os l'avoème imbeuchée i o un molet pu d'un in, in févrié. I o deus moés, os avoème accepté ed l'imbeucher coèr troés ins ed puss.

Tertout étoait ureus ; l'jonne fille, et nos.

Mais vlò, quanq unne fille o vint-uit ins d'âge, ale put avir un cadoreus.

Et l'jonne fille qu'ej cause in o un.

Li-étou, il ouve.

Il ouvroait. Esn'interprinze, i o tchinze jours, i o dmindé ed pèrtir ouvrer eute pèrt : à Bèrcelone.

Os dvinez aprè ?

I pèrte, et l'fille vo l'suive.

Et don, tchitter chin ouvrage.

Fin donmage, pour un keup qu'os avoème unne gin qui ouve bin !

Adé tiote ! Fuche ureuse avuc tin onme, in Espaingne.

Ches glinnes dech boin cinsier

Din ch'Limousin, un cinsier élève des glinnes pour leus us. Il o granmint ed glinnes, et pour vive, i les cange quanq is ont alintour ed deus ins, vu qu'il o dzoin eq ches glinnes foaiche'te granmint ed us et qu'aprè deus ins, is n'in font moinss.

Mais is in font quanq minme.

Canger ed glinnes, o d'bétails, pour granmint ed cinsiers, cho vut dire, els inmner achl'abattoèr.

Mais lò, ch'poéysin, li, il o déchidé eq ches glinnes pourroai'te foaire plaisi à tertous ches gins qu'in ont quèks unnes à leu moaison, din leu gardin.

Adon, i vind ches glinnes, alintour ed deus-mile qu'il in o.

Et ches glinnes pèrt'te vive coèr quèks innées, trantchilles conme Titisse, à l'campaingne. L'vraie campaingne.

Bravo à ch'cinsier, et merchi à li.

Un sinmdi aprè-nonne

Ech sinmdi sèt dech moés ed marche, lò dò qu'ej reste, i avoait du solé.

A m'moaison, j'avoais du bos à keuper et à ringer, mais alintour ed tchinze eures trinte, j'o ieu invie d'aller mèrcher.

Et j'o allé mèrcher.

J'o prévnu m'fanme qui, ureusemint pour mi, n'avoait poin invie de vnir mais vouloait bin vnir m'tracher in voéture troés o quat eures aprè.

Chi ale avoait ieu invie de vnir, os éroème foait insanne unne eute promnade, chin avir dzoin qu'unne gin vienche nos tracher quèk pèrt.

Don, lò, ej pèrte tout seu.

Ed lò à lò, trèse kilomètes quanq os allons tout droét.

Mais mi, j'avoais mie invie d'aller tout droét et ed croéser granmint ed voétures. Adon, j'o prins quèkes tiotés voées. Sèse kilomètes et quèks, in troés eures quarante.

Et granmint ed bèlés photos, vu qu'ej pèrte jonmoais chin un appareil photo din m'poke.

Os les verrez mie chu ches photos d'in dsous, mais j'o intindu granmint d'oésieus canter, et quèks guernouilles, lonmées étou rangnes.

Fin bèle promnade.

Achteure, pour vos eq j'ainme, quèks photos.

Ech bos eq j'éroais du keuper ech sinmdi, l'o attindu ech diminche. Aprè-nonne.

Boinne jornée.

Fanmes

Aprè l'Jornée ed ches droéts ed ches Fanmes i o quèks jours, causons innui d'un nouvieu film lonmé Fanmes.

I vient d'ête foait pèr mossieu Tutuche Bèrtrand, onme qui s'dit écologisse.

Ch'est surtoute ed li qu'ej vux causer.

Ecologisse, et cinéasse !

Ch'est possibe, mais li, ej dis eq ch'in est mie un.

Pour foaire un film, pèr eximpe, Fanmes, i vo din granmint ed poaiyis, chincante din ch'darain, in avion o in nénicoptère.

Ah ! Ches images sont fin bèles, notez qu'avuc un avion o un nénicoptère, granmint ed gins peu'te foaire ed bèlés photos, mais ech respect del planète, il est poin lò.

A tertous ches jornaleus, jé dminde d'arter ed causer ed Tutuche Bèrtrand conme d'un grind photographe, et surtoute, artez d'in causer conme d'un boin écologisse.

Boinne jornée à tertous mes lecteus.

Warder un scret

Innui, ech uit dech moés ed marche, ch'est l'Jornée ed ches droéts ed ches Fanmes, lonmée, in Russie, Jornée ed ches ménagères, allez savoèr dò qu'is ont allé tracher cho !, ej vos causer ed ches fanmes.

Ch'est unne berlure qu'ed croère qu'unne fanme n'put mie warder un scret.

Un fanme put l'foaire, mais feut qu'ale s'i mette avuc troés o quat eutes fanmes.

Boinne jornée à tertoutes, et à m'cousine qu'o ches âges innui.

Granmint ed trains

Maginez eq pour aller d'ichi à lò, os avez un train possibe pèr eure.

Maginez qu'à l'station d'aprè qu'os montez, ches gins, eux, euche'te un train pèr dmi-eure pour aller dò qu'os allez.

Achteure, maginez qu'ech train, qu'os voulez prinde, euche un jour quarante minutes d'értèrd ; il arrive din l'deusienme station casi dis minutes aprè qu'un train vienche ed pèrtir. Avuc tertous ches gins qui sroai'te monter din ch'train in rtèrd.

Don, quanq vo'train arrive, i o pu unne gin, o p't'ête unne o deus, qu'attinche pour prinde ech train-lò.

Et vo'train continue achteure, toudi drière l'eute, et reste casi vide.

Adon ?!

Maginez achteure ch'train qu'o pèrti unne eure, in principe, aprè vo'train, mais qu'i passe, in réalité, vint minutes, aprè deus trains.

Ches gins qu'avoai'te un molet d'avinche ont pèrti.

P't'ête eq pour foaire eds économies, l'éroait étè possibe ed supprimer un ed ches troés trains !

Os in pinsez quoé ?

Disez-mi, o contez-mi vos aüres.

Béto eds élections

- "Unne mitan ed ches gins li'te ches gasètes o acout'te ches jornaleus.

Et ch'est seuremint l'eute mitan qui vo voter !"

Qu'o dit un jour Claude Chabrol.

Et vos ?

Honmage à un viu

... qui vient ed moérir et qu'ej connoaissoais mie.

Ch'est un onme, alintour ed quater-vint-dis-uit ins d'âge, eh ouais !, qu'étoait din unne moaison d'artraité.

Echt'onme n'avoais rin dmindé, vu qu'i kminchoait à perde s'tète, mais étoait tout seu din unne cambe pour deus gins.

I o quèks jours, un onme et s'fanme, vius, ont arrivé à l'résidinche pour i vive justch'à leus darains jours.

Adon, ches gins qui s'otchupe'te ed tertous ches vius ont cangé ech viu-ed-quater-vint-dis-uit ins ed cambe pour i mette ches deus nouvieus.

Sanne normal.

Mais ech viu-ed-quater-vint-dis-uit ins, un keup, mie unne gin n'sait kmint qu'il o foait, s'o déjoutché et s'o perdu ; i rconnoaissoait mie s'cambe.

Il o mèrché, torné, mèrché et o tcheu din ches escalers.

Mort.

Fin trisse, minme chi os pouvons dire que... . Ch'est fin trisse qu'ed définir s'vie conme cho.

Chin fiu, avuc qui j'o ouvré, est trisse.

Honmage à tin père, et corage à ti, t'fanme et tes deus filles.

Un poèille au tchu

Feut p't'ête miu un poèille au tchu qu'un poèille din l'main.

Eq d'autchun diroait.

Mais i feut miu un poèille au tchu qu'un poèille din l'tchu.

Un poèille din l'tchu, i péroait eq cho existe, et eq cho foait du mau.

Un poèille au tchu, à pèrtir d'un âge, casi tertout in o.

Mais un poèille din l'tchu, i o mie granmint ed gin qu'in o, mais i in o.

I put minme arriver qu'un père et chin fiu in o. Chatchun un, bin seur.

L'solution pour n'mie avoèr ed mau, aller àchl'ôpital et se foaire défitcher ech fanmeus poèille.

Mais aprè, n'poin l'warder din s'main.

Boinne jornée.

Durant ch'Carême

Ech Carême,  pour ches gins qui n'sai'te mie, est unne période ed quarante jours avant Pâke dò eq ches chrétiens doé'te, o dvroai'te, foaire abstininche.

Abstininche !?

J'esplique.

Foaire abstininche, ch'est n'poin, o granmint moinss, matcher et boaiser.

Ech deusienme n'se voét mi, in principe, adon qu'ech premier, moins aisié à tnir, est bin visibe pèr ches eutes gins.

Judi au vèpe, adon eq j'étoais in route à acater eq quoé survive, ej croése un tchuré* qui vnoait pour l'minme cose.

Quanq j'o allé poaiyer, ech tchuré étoait dvant mi. L'avoait un pain, quèks punmes ed tère, et une boinne et crosse boutèle ed vichky.

!

Boin Carême, tchuré, os avons qu'unne vieille chu tère, et boin Carême  à  tertous. Suivez ches boins eximpes.



* tchuré : chrétien qui o merrié avuc Diu et qui ches messes din ches églises.  Don, fin boin chrétien.

N'disez mie à Diu

... quoé q'il o à foaire.

Jou qu'ej vos in o djò causé ?

N'disez mie à Diu quoé qu'il o à foaire est ch'tite d'un live chu Bébèr Einchtein.

J'ainme granmint ech live, écrit pèr Françoés Ed Closets in deus-mile-quat.

Echl'écriveu esplique qu'Einchtein busoait slon quoé eq Diu éroait foait.

Quanq i li sannoait eq ch'étoait fin complitché, Bébèr artoait et s'disoait eq Diu avoait foait des coses simpes et aisiées ; lò, ch'est fin complitché, don ch'est poin cho. Feut rkmincher !

Ch'est conme cho eq Bébèr o avinché quanq i trachoait.

Live à lire, o rlire, chi os l'avez mie foait.