Ech zoo ed Bieuvo

Biuevo, din l'Sonme, os connoaissez ?

Inter L'Cando, Bieutchène et Dourlin.

Eh bin, judi, din unne gasète, j'o apprins qu'i avoait un zoo à Bieuvo.

Et din ch'zoo, echl'ourse, qu'avoait jué din chin film Echl'ours, étoait morte  i o quèks jours. Aprè i avoèr vétchu vint-nu innées.

Juré ! Ech jornaleu avoait bin écrit "...ech zoo ed Bieuvo (Sonme)..."

Chi os avez invie d'aller vir ech zoo, rinseignez-vos avant.

Des keups qu'i l'éroait cangé ed dépèrtemint !

Boinne visite.

Edvinète ed sylvain et sylvaine

I o deus smangnes, ej vos o posé unn edvinète : dò qu'is rest'te ches sylvains et sylvaines, et ches heutefeuilloés o heutefeuilloéses ?

Pour mes lecteus qu'ont traché et qu'ont truvoé, o mie, vlò ches réponses : ches sylvains et sylvaines rest'te à Fèr-l'Abbie, qu'i péroait, et ches eutes, heutefeuilloés et heutefeuilloéses, à Heillin.

Et des noms conme cho qui surprinde'te et qui peu'te sannoai'te régalants, i n'o granmint. In Picardie et in Frinche.

Boinne jornée à tertous.

J'o perdu miu d'un millon

... eds euros in pariant eq ches étchipes ed fotbal ed Lile et d'Aussère n'alloai'te mie gaingner quanq is sont rincontrés in septimbe deus-mile-dis.

Qu'i dit un parieu, in prousse.

Et Lile o gaingné - os avons oblié qu'is peu'te l'foaire - à l'daraine minute.

Et chl'arbite n'éroait mie du accordé ech but, vu qu'ech jueu qu'o martché étoait inter ech darain définseu et ch'wardien quanq i o un eute jueu qui o invoéyé ech ballon.

Adon ech parieu dminde achl'étchipe ed Lile d'i verser ech millon qu'il o perdu.

In vrai, qu'il o mie gaingné.

Dò qu'os allons ?

I m'sanne eq pour gaingner miu d'un millon in pariant chu ches rincontes ed fotbal, i feut juer miu ed mile euros.

Et p't'ête miu ed dis-mile !

Et i feut els avir.

I foait ed lombe

Il o tué autchunne gin, qu'i m'sanne, mais vu qu'i foait ed lombe à eds onmes politikes, qu'i m'sanne coèr, et feut l'arter.

Et edpi ech vint-sèt o vint-uit octobe, is l'ont infin arté.

Ièr ! In Allemane.

Et i risque vint innées ed prison !

Pour mi, ch'est scandaleus.

Ièr, minme ches jornaleus n'savoai'te pu kmin prononcher chin tiot nom : Carlos, Carlèsse, Carlèche,...

Ch'est tout simplemint Carles.

Aisié, nan ?!

Ech diminche ed ches rameaux

Ch'est innui.

Et, ach diminche ed ches rameaux, ches gins vont à l'messe avuc des tiotés brankes, appelèes rameaux, ed buis. Un tchuré o, l'eute jour, précisé eq ch'étoait mie obligé qu'ho fuche du buis.

Ej mé dminde, in lisant echl'évingile, chi os devroème mie amner étou des beudets à l'église, vu eq chin beudet, ech Christ sro mie intrée à Jésuzalem.

Quoé qu'os in pensez ?

Boin diminche, et d'avinche boinné fète ed Pâke.

Unne régalante taïonne

In principe, os ainmons nos taïons.

Et in principe, eux étou nos ainme'te. Quanq is sont in vie.

L'eute jour, unne taïonne o allé vir chi tiot-fiu in prison. Et pour i foaire plaisi, ale i o inmner del boinne erbe, pour qu'i puche l'funmer.

Fin régalante, qu'ech taïonne-lò !

Achteure, ale est avuc chin tiot-fiu. In prison.

Vnez à m'moaison

... chi os avez invie ed rire, et chi os êtes régalants.

Chin quoé, feut miu rester à vo moaison !!

Pour vive ureus, rions et fuchons régalant.

Ches nèges ed Marseille

Ièr, il o tcheu des nèges à Marseille.

Ch'est un évenemint, vu eq ch'est rare.

Adon qu'in Russie, à Krasnoyarsch, au mitan del Sibérie, ches nèges, is in voé'te edpi ech moés d'octobe.

Magine un sibérien qu'éroait étè à Marseille ièr ! il éroait étè ureus.

Bec à vos et ches sibériens.

Ech sexe in plastike

I péroait qu'il existe à Pèris, unne nouvèle moaison close.

Avuc des filles ... in silicone, vu eq ches moaisons closes d'avant, avuc ed vraies fanmes o jonnés filles, ont étè interdites in mile-nu-chint-quarante-uit.

Ech silicone, ch'est conmme ech plastike.

Et des filles in silicone, ch'est conme des poupées.

Adon, edpi eq ches vraies moaisons ont frunmé, des gins ont busé.

Et truvoé.

Is ont truvoé ech silicone !

Mi, avuc unne vraie fanme amon mi, ej n'o bin assez. Dech keup, j'i o janmoais allé, din ches moaisons-lò.

Mais ej pense eq ch'est mie in mettant des fanmes in plastike qu'os allons baicier ech nombe ed gins à joke.

Etpi, pour chl'économie ed not poaiyis ...

Causons mie granmint

... mais causons bin.

L'eute jour, din unne gasète, j'o lu in première page :

- "Des voétures asises* et abimées."

Et ?

Jou qu'une voéture asise put n'mie ête abimée ?



* asises : vir "asir" chu ch'blog "ech picard esplitché" et publié ech quat septimbe deus-mile-sèse.

Mie ed watieu

... in Corse, innui.

Pourquoé ?

Vu qu'il est interdit ed transporter eds us.

A keuse del Saint Zèf, qu'i sanne ête unne crosse fète din ch'île.

Et chin u, mie ed watieu.

Ches corses, is éront quà minger du freumage.

Boinne fète à ches Zèf.

Zèf ed Corse, et d'eute pèrt.

Dò qu'is rest'te

J'o apprins l'eute jour qu'il existoait des vindopériens et des muchipontains.

Mais quoé eq ch'est eq cho ?

Ch'est des gins qui rest'te din deus villes ed Lorraine.

Mais ches tchelles ?

Ches vindopériens, is rest'te à Vindoeuve-ches-Nincy, alintour ed Nincy et s'place Stanislas.

Os l'avoète p't'ête edviné.

Et ches mussipontains ?

Un molet puss malaisié, chi os trachez mie chu internénet.

Ches gins-lò, is vive'te à Pont'Mousson.

Et din not bèle région qu'est l'Picardie ! Ches sylvains et et sylvaines, dò qu'is rest'te ? Et ches heutefeuilloés o heutefeuilloéses ?

Busez !

Réponse din quèks jours.

Artez de nos rintchérir

Quanq tu lis cho, tu t'dis eq ch'est unne berlure.

Ben nan !

Seur eq ch'est mie ches mneus ed ches trains qui di'te cho, o ch'tiot onme à guernons.

In premier, feut savoèr eq ch'est din l'provinche ed Tchébec.

In deusienme, ch'est des séruzyins qui l'di'te. Is rconnoaisse'te qu'is n'ont assez.

J'ainme bin ! Is di'te qu'i feudroait miu mette puss d'argint din ches ôpitaus, o bin in bailler puss à ches infirmièrs et infirmières qui, eux, in ont dzoin.

Ch'est un bieu geste, o unne bèle cose qu'ed penser à ches eutes.

Arainne

Jou qu'os connoaissez ech tiot village del Sonme ?

Inter Longpra, Gamache, Adville, Anmyin, et Poés-ed-Picardie, ch'est un tiot village avuc alintour ed deus-mile-chonc-chint gins qui i rest'te, avuc unne place dech commandint Seymour, o coèr, avuc unne vieille station.

Diminche au vèpe, j'o intindu un jornaleu causer dech village d'Arainne. L'étoait frinchoés, ech jornaleu, vu qui disoait Arainne in frinchoés.

Vu j'étoais in route à m'indormir, j'o mie toute comprins.

I m'sanne qu'ech jornaleu étoait à Lile, et eq ch'est lò dò qu'i avoait des gins d'Arainne. O qu'is avoai'te causé d'Arainne.

O bin eq j'o vraimint rin comprins.

Mais ej su seur qu'is ont causé d'Arainne.

Qu'i m'sanne.

Is tchit'te ech pèrti

I o quèks jours, i m'sanne eq ch'étoait merkerdi, j'o intindu un
jornaleu dire ach poste ed radio :
- "Che socialisses sont granmint à avir tchitté discrètemint ech pèrti
edpi un in."

Busons un molet.

Granmint, et discrétemint ! Jou eq ch'est possibe ?

Magine unne salle dò eq t'os vint-mille gins.

I n'o unne qui pèrt. Tu l'voés mie. Et os pouvons adon dire qu'ale o
pèrti discrétemint

Mais quanq i n'o mile qui ont pèrtis, cho kminche à s'vir. Et lò, pu
possibe ed dire eq ch'est discrètemint.

Qu'i m'sanne.

Boinne jornée.

Ech prix Nobel del paix

... deus-mile-dis-uit sro pour ech présidint anméritchin et ch'dictateu del Corée-dech-Nord.

- "Ej reuve !" qu'os vos disez.

Nan ! Ej cauchemerdise.

Un papar o défunkté

Quanq un papar meurt, ch'est un fin cros malur pour ches pèrints.

Mais quanq in puss, achl'opital, i o rin pour l'mette un keup qu'il o défunkté, cho dvient insupportabe.

Et ch'est quoé qu'o arrivé à unne famille ed Marseille. Il o minme fallu qu'is inméne'te leu papar, défunkté, à l'morgue, din leu bros.

Et à l'morgue, is ont du attinde !

Prions.

Fanmes ed loé

Soin ! N'mie confonde avuc ches fanmes d'Eloé, unne gin qu'ej connoais fin bin.

N'mie confonde, étou, avuc ech série ed télé dò qu'i o l'bèle Ingrid Chauvin.

Fanmes ed loé, ichi quanq j'écris, ch'est ches fanmes qui sont lò dò qu'is sont vu ches loés qui sont votées.

Pour aidier l'édjalité inter ches onmes et ches fanmes. Qu'is sont votés, ches loés.

Mi, vraimint, ej vux bin qu'i o ed l'édjalité inter ches onmes et ches fanmes, in Frinche et din ch'monde.

Mais ej vux mie qu'os mettons des loés pèrtoute ; un onme et unne fanme sont ches minmes quanq is ont ches minmes compétinches.

Et quanq is vu'te foaire l'minme cose.

Per eximpe, unne fanme présidinte del Frinche, ej vux bin. Et i in éro unne un jour.

Cho sro unne fanme bin, mie unne fanme qui sro lò vu qu'un tchintchénat chu deus sro mné per unne fanme et une chu deus per un onme.

Artons ed foaire des loés pour toute.

Deus kmises in unne

Unne kmise, ale o des boutons.

In étè, vu qu'i foait keud, in principe, tu mets mie d'espincèr. Et don, os voéyons t'kmise et ches boutons.

Mais in ivèr, t'os quèk cose dsu t'kmise. ches boutons n'se voé'te mie.

Adon, chi t'os mie t'kmise din ch'mawais sins, cho s'voét mie. Et dech keud, t'os deus kmises pour ech prix d'unne.

Avuc cho, m'fanme o mantché ed moérir.

Ed rire.

Un nouvel éto

Edpi, quèks innées achteure, os avons des gins qui vive'te avuc un nouvel éto : zadisse.

Un zadisse, ch'est unne gin qu'est alloait quèks moés à Sivins, din ch'Tèrn, in deus-mile quatore, pi, quèks innées à Not-Dame-ed-ches Lindes. Et achteure, il est arrivé à Bure, in Lorraine.

Pour combin ed tans ? Os savons mie. I sanne qu'ech gouvernemint n'vut mie eq ches gins s'installe'te conme is l'avoai'te foait in Loère-Atlantike.

Adon, des keups, ches zadisses, is vont ouvrer à Roébon - os pouvons dire qu'is vont in vagances -, o coèr, vir ech cros cinsier à Bugny o Drucot qu'o ches mile vakes.

Et quoé qu'is font, ches zadisses ?

Un zadisse, cho dit eq cho ainme ches tiotés erbes, ches tiotés bètes, cho vient granmint ed keups del ville, et cho met ech brin pertoute.

Un présidint socialisse

... , cho sroait bin.

L'sinmdi, au matin, j'acoute un molet l'radio.

Et l'sinmdi au matin, chu unne radio, i o un onme politike.

Ech darain sinmdi, ch'étoait un socialisse.

Boin sanke qu'i causoait bin ! Et vos-i qu'i disoait qu'ech présidint d'achteure i n'foait eq des berlures ! Et vos-i qu'il avoait eds idées, ech jonne socialisse !

Adon, ej mé su dit eq cho sroait bin d'avir un présidint socialisse. Seuremint eq quanq i sro in place, l'Frinche cangero.

Cho foait granmint ed tans qu'os in avons ieu un, ed présidint socialisse !

Pourquoé eq j'o mie voté socialisse i o un in ?

Ches ésons vole'te

Verdi au vèpe, in rintrant ed min ouvrage, j'o vu eds ésons voler.

J'étoais ureus d'in vir, mais is voloai'te dech nord vers ech sud !

Adon, minme chi ches timpératures rmont'te, ej mé su dit qu'echl'ivèr étoait mie défini.

Boinne jornée.

I m'o intindu

Ech quat dech moés ed févrié, ej vos o conté d'un tchuré qui n'avoait rin dit d'unne lecture, l'deusienme dech diminche, eq j'avoais foait.

Et j'i avoais foait remertcher.

Eh bin ! I m'o intindu. Et comprins et respecté.

Ech vint-chonc dech moés ed févrié, ech tchuré n'o foait lire qu'une lecture.

Mais ch'étoait l'deusienme. Minme chi i o mie ieu ed première lecture.

Et qu'ech jour-lò, il o dvisé quanq minme del lecture qu'avoait mie étè lue.

L'bète et l'bèle

Os connoaissez tertous ech conte qui s'intitule l'Bèle et l'Bète.

Seuremint miu eq mi.

Mais judi, j'o étè ach Salon ed l'agritchulture, et j'o vu deus bèles d'un keup : l'vake aubrac qui s'lonme Heute et qu'ej vos in o causé i o sis o sèt jours, et el puss bèle fille ed Frinche deus-mile-dis-uit, qui, conme pour deus-mile-dis-sèt, est ed ches Heuts-ed-Frinche.

J'étoais in route à causer avuc ech cinsier qu'o l'vake quanq os avons apprins qu'el fille alloait arriver pour vir Heute, s'vake.

Adon, i m'o tchitté pour aller atcheuillir l'jonne.

J'i o crié :
- "Foaisez-li un tiot bec".

I m'o intindu, vu qu'i l'o foait.

J'o adon vu un onme ureus.

Et mi étou, j'étoais ureus.

Minme chi j'étoais mie tout seu à ête lò et à foaire des photos.

Etpi, l'vake, ale est toudi unne bète, minme aprè avoèr ieu un tiot bec del bèle.

Unne méchante canchon

Ech canteu-causeu, qui cause puss din ches canchons qu'i n'cante, et qui s'lonme Grin-Corps-Qu'o-du-Mau, vient ed sortir unne nouvèle plate avuc pour tite "Plan B".

Ech canteu-causeu, os ainmons o os ainmons mie : chatchun est libe, in Frinche d'acouter quoé qu'i vut.

Mais din ch'plate, il o mis un morcieu qui o pour tite "Patrick".

Lò, j'accepte mie du toute. I m'sanne qu'i diche puss ed bin d'un onme politike qu'est unne vraie crapule, qu'ed mau.

Et i m'sanne qu'il ainme vraimint ech Patrick.

J'accepte mie qu'os disons du bin d'un méchant onme politike.