Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libe d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

mardi 31 décembre 2013

Uit sgondes

Deus étchipes ed basket-bal doé'te rjuer ches uit darainnes sgondes d'un match ; I avoait eu du catch àl'fin dech premier vrai match.

Uit sgondes !

Imagine !

Deus jueus :
- " T'inlève mie tin survetmint ? "
- " Nin, éj sus rimplachant. "
- " Bin ! Pourquoè t'os évnu ?"

Deus supporteus :
- " Tu vos vir ech match ? "
- " Ej vos essayer. "
- " Fuche mie in rtard !"

Un jueu :
- " Chef ! Feut-i ch'écœuffer avint ?"

Ureusmint eq ches deus villes ed ches clubs sont mie granmint éloégnées l'unne ed l'eute !

lundi 30 décembre 2013

Un boin eximpe

Qui qui donne l'eximpe ?

Un grind champion ed courses ed voétures o eu un accidint chu ches nèges. Achteure, il est mie mort, mais tout comme.

Ches gins brai'te ; Mais ech gars avoait mie respecté ches régues ed sétchurité, à part un casque chu ch'tète.
Boin eximpe pour ches fans et ches eutes.

vendredi 27 décembre 2013

Un boin tiot live

Il est foait ed dessins, simples, comme ch'ti in dsou

Chin nom, "La guerre".  Ch'est des tiots contes chu ches guerres ; Toutes ches guerres.
Pèr eximpe, Jules César, mais étou ech fotbal, eh ouais ! , o ches fanmes, étou.

Chin auteu, "Bastien Vivès".
A ches éditions "Shampooing".

jeudi 26 décembre 2013

A t'santé, Etienne

"Etienne, Etienne, Etienne", ch'est titre d'unne canchon d'i o sèse ins.

"Saint Etienne", ch'est ech nom d'unne ville in Frinche o i o ech plu grind club ed fotbal ed Frinche.

Mais Etienne, ch'est surtoute ech tiot nom d'un gars qu'éj connoais et qu'o un tcheur imminse. Mie artificiel.

I vut toudi ét foaire plaisi et rire.

T'os des gins qui sont vius o tout seu ; I les prind din s'voéture et s'améne ches leu frère, leu seur o à Lourdes, Lacanau o Forcalquier, pèr eximpe.
Ed tans in tans, il invite deus-chint gins ; Ch'est estraordinaire et granmint régalant pour tertous.

Tu l'os p't'êe djo vu : in novimbe et déchimbe, i passe ches sinmdi et diminche à foaire ches patchets pour ches cadeaux ed fin d'innée, ed manière à rétchupérer edl'argint pour unne association qui s'otchupe eds galibiés.

Innui,ch'est ech fête ; Alorss, à t'santé, Etienne. Viens m'vir quanq tu vux.

mercredi 25 décembre 2013

Un ange

Tu marches, tu marches. Pindin troés jours. Avuc tin cousin.

Tu grimpes, i foait keud. Tu deschinds, i foait keud. Tu grimpes coèr, i foait toudi keud.

Tu dors sous unne tente, i foait mie keud. Pi, tu deschinds, tu rgrimpes...



Au beu ed troés jours, à deus-mile-chint métes d'altitude, tu voés un lac.

I foait keud, tu t'baingnes.



Et lo, à soéçante mètes ed ti, t'os unne fille qui sort ed l'ieu, avuc unne pieu blanke comme un linchu, del tète à ches pieds . Ale n'o qu'es pieu chu ale. Ch'est unne alleminde.

T'os coèr du kmin à foaire ; Tu t'in vos. Tu croèses eds espagnoles. Foais mie ed dmi-tour, t'os un eute cousin qui t'attind. Ch'est cho, l'avinture.

mardi 24 décembre 2013

Noë et ch'fin d'innée deus-mile-trèse

Ach momint edl'innée, granmint ed monde vut foaire el fête, avuc ech famille pi ches conmarades.

Minme in mile-nu-chint-quatore, des seudars alleminds, frinchais et britaniques ont arté de s'tirer dsu pour ech nuit dech vint-quate déchimbe. I avoai'te minme canter et bu insanne.

Mi étou, éj voudroais vir cho, in Syrie, à Bangui, à Gaza, ach Caire, à Kiev et pèr tout din ch'monde

Paix à tertous.
Joéyeux Noë.

lundi 23 décembre 2013

Ech vint-troés déchimbe

Ech date lo, éj pux mie l'oblier.

Mie à keuse ed Noë deus jours après o ed ches nèges chu ches voèes i o troés ins, mais pour ches ages ed min père. L'o bieu avoèr brisié es pipe, j'oblierai janmoais.

Bec éspécial à m'mère et mes frères.

dimanche 22 décembre 2013

Laicez vnir à mi ches tiots éfants

I o un onme qui cause d'unne estrade à un mile d'eutes onmes, fanmes et éfants.

Din seul keup, i o un tiot, ed sis o sèt ins inviron, qui grimpe chu echl'estrade et vo vers echt'onme qui continue ed causer. Ches gardes du corps bouge'te mie et di'te rin. I sanne qu'ech galibié o mie ed coutieu chu li et ch'est mie in Améritche eq cho s'passoait.

Ech tiot, i jue, rbée echt onme, s'assit chu ech cado, ch'est miu confortable et bieu qu'unne caïelle, et randonne mie. I sanne qu'i fuche autiste. Ej m'dminde quanq minme quoè qui foaisoai'te ches parents.

Echt'onme qui causoait n'o rin dit ; Pouvoait mie, ch'est ech pape François. Chin patron, i o deus-mile ins, o dit : "laicez vnir à mi ches tiots éfants." I l'o obéi.


samedi 21 décembre 2013

Noères o blankes

Attincion : j'o mie écrit "noèr et blanc" o "black and white".

J'o bin écrit "noères" o "blankes".
Comme ches fanmes noères o blankes ed pieu qui cant'te du blues, du jazz, du gospel o comme cho ; Avuc unne bèle voéx, chin avoèr à djeuler din un micro pour ête intindu.

Mahalia Jackson, el seur à Mickaël, éj croés, Aretha Franklin, Adèle, Nina Simone, Suzanne Boyle, Dee Dee Bridgewater, feut és acouter canter.

"Pardon mie croéyabe", "En me laice mie ête mie comprins", "Ej reuvoais un reuve", "Duche nuit, chainte nuit", "  o "Amour à vinde", pèr eximpes, sont des canchons eq ches fanmes lo cant'te bin.

Ch'est bieu d'acouter cho à Noë. Qué canche, Noë, ch'est din quéques jours. Boin Noë à tertous !

vendredi 20 décembre 2013

"Cause à min tchu,...

...ém tète a du mau."

Tu connoais echl'espression ?! J'o vérifié.

Em tète : 
Ej sus mie l'inspecteu Colombo, mais m'fanme m'dit souvint : "- t'os oblié cho ?", "- tu rappéles mie ed cho ? "- ch'étoait mie lo."
Ej croès mie avoèr Alzheimer, mais feut vir.

Min tchu :
A min âge, feut surveiller ech colon. Qui s'dit !
"- Ches tests sont positifs" qui dit ech sérusyin ; "- Os avez du saing din ch'brin."
Brin !
A l'ôpital, i di'te qu'i o rin à ches boéieus. Ouf !

"- Os avoète minger du boudin avant ches tests ?"
"- Jé m’souviens mie."

Chi tu causes à min tchu, i t'dit mie granmint ed keuses, mais i put t'réponde. I put. Feut mie tracher à l'comprinde.

jeudi 19 décembre 2013

Ech frinchais, ch'est complexe.

Tu voès unne bélotte nana et, in frinchais, tu vos i dire :"- vous êtes belle."

In principe, avuc "vous" et ch'verbe "ête", t'accorde "belle". Tu dvroais mette un "s". Mais, tu n'os qu'unne bèle fille dvant ti. Tu vourroais miu ed bèles filles avuc ti, comme un minichtre italien, mais lo, din echl'eximpe, i o n'o qu'unne.

Mie, éj dis :"- t'os ed bieus ius, tu sais". O, "t'es bèle comme un car nouvieu."
J'o mie ed doutes chu chl'ortographe. Comme quoè, ech picard est unne langue aisiée.

Coèr que "unne tète", ch'est, in principe, chu tes épeules, et ches tètes, ch'est el poétrinne ed ches fanmes. Feut mie confonde.

mercredi 18 décembre 2013

Quoè qui feut foaire ?

Un jour qu'éj me promnoais chu ches bords dech Lot, j'o vu unne pincarte o ch'étoait écrit "Interdiction de rin lancher din ch'te rivière".

Quanq tu voès o, tu rbées din l'ieu ; Rin ! Rin eq de l'ieu et des cailleus ! Ches gins n'obéi'te mie, ed nos jours.

 J'o foait comme eux : j'o rin lanché. Et j'o mie vu ech garde-pèke o ches cadoreus.

mardi 17 décembre 2013

Deus bèles canchons

Quanq j'étoais un tiot galibié d'inviron chonc o sis ins, mes parents avoai'te un quarante-chonc tour in picard eq j'avoais granmint tchèr.

I o queques innées, jé m’souvnoais un molet dechl'air et chés paroles, mais mie dech nom d'unne ed chés deus canchons.  Chu l'air ed "In revenant de la Revue" et avuc, din ch'texte, "....din l’rue d’chés Troés Cailloux...." et "....Hotoie.....", ch'est tout ech qu'i m'restoait din m'tète.

Etpi, i o eu intarnéte ; Dech premier keup j'o trouvé, chu "http://lanchron.fr/Nattiez.htm" : "In rvenant d’chez Barnum", canté pèr André Nattiez. Tu voés ches paroles et tu pux acouter.

J'o rvu et intindu étou "Vlo Grand-mére à poussiére", del deuxienme face dech plake ed quanq j'étoais tiot.

Foais ti plaisi ; Acoute à tin tour.

lundi 16 décembre 2013

Oh ! Ches bieus toèrs !

Unne foès, in vagances, éj passe din unne ville o i avoait unne foère à vakes. Avuc ém fanme et ches éfants, os i allons pour vir. In vrai, i avoait eq des toèrs à vinde ; Eq des toèrs pour foaire ches vieus à ches vakes.

Et i avoait étou ech concours dech plu bieu toèr ; Miu il est din ch'classement, miu i veut. In principe.

Quanq os sonmes arrivés, ech concours étoait fini, mais mie ches vintes. I o eu ed ches prix ! Sèt, uit, nu, dis voèr douse miles uros pour un toèr. Qu'i s'dit.

Ech jour lo, i éroait eu troés toèrs qui sroai'te vindus inviron soéçante mile uros chatchun. Mie croéyabe !

I o un gars qui sannoait connaître ches foères lo et qui disoait :
-"Chi ech père Jean acate un toèr soéçante-deus mile uros à Tiot Louis ; Tiot Louis, li in acate un pour chincante-nu mile ach'gars Gérard ; Qui in o acaté un soéçante-un mile ach ...père Jean."

Unne boucle ! Chi o t'dit mie, tu voès rin et tu croès eq ches bieus toèrs peu'te valoér inviron soéçante mile uros. Et ches eutes, qui vourroai'te unne eute foès un bieu toèr, sro baisés. Comme ech lapine à msieur l'tchuré, qu'est un marle.

dimanche 15 décembre 2013

Ches dorlos

J'o un boin conmarade qui ch'est crévé ches zius pour n'mie vir ech misère dech monde. I vut s'foaire keuper ches éreilles pour, étou, n'mie l'intinde.

Achl'ôpital, is ont dit ed vnir chin dorlo chu li. Rin à chin co, rin à ches doéts, rin à ches éreilles o eutes. Mie ed piercing ach boutinne dech panche.

Mi j'i'o dit, lo coèr, achteure, ches éreilles, qu'i o quanq minme des dorlos qu'i feut mie rtirer ; Ed famille.

samedi 14 décembre 2013

Express

I m'sanne, vu émn espérieinche dech jour, eq din ches trains, ches wagons ed première classe roule'te miu vite eq ches wagons ed deuxienme classe.

Quoè eq t'in pinses ?

vendredi 13 décembre 2013

Ed rtour

Ej sus ureus ; un conmarade ukrainien o rbéïé min blog innui.

Bec à li, et à ches eutes.

Binvnue din ch'club

Din ech ville du Mans, ches onmes politiques éroai'te eds idées pour eq ches jonnes s'inscri'te chu ches listes électorales avant ech trinte et un déchimbe.

I i éroait un bus qui roule din l'ville, avuc tout ch'qui feut ndin pour foaire ches inscriptions.

Ech bus s'arrêteroait cho et lo et des gins, ndin, dmanderoai'te à ches jonnes, din l'rue, chi sont inscrits.

Mi, j'i croés malaisiémint.

O m'diroait qu'ech chauffeu dech bus, ch'est ch'père Noël, alorss lo...

jeudi 12 décembre 2013

Dmi-tour

Quoè ches qu'est obligé ed rvnir quanq i part ? Quoè ches qui put mie n'mie rvnir ?

Tertous, ed Wenzhou à Tanana in passant pèr San Carlos de Bariloche, Ciudad Juarez o, ch'est évidin, Coolgardie, in Auchtralie, sait eq ch'est ech boomerang. Rin d'eute.

Minme ech premier chinoès qu'o rbéïer in blog innuit sait cho.

I o p't'ête à Neuilly où o l'sait mie ?!

mercredi 11 décembre 2013

Unne boinne chinsure ?

Ej t'os causé, i o miu d'un moés, ed ches ukrainiens qui n'vnoai'te pu vir min blog.

Sont janmoais  rvnus !

Ch'est mie à keuse dech fotbal. Nin, ch'est pire eq cho !

Achteure,  j'o granmint ed'russes. Et unne connection, ièr au vèpe, d'Arabie Saoudite. Bienvnue à li.

mardi 10 décembre 2013

Ouvrer in Frinche

Achteure, in Frinche, chi t'os mie d'ouvrage o q'tu vux al'sécuritché, foais militaire ; Edpi deus ins, not présidint prind tout ch'qui vient.

"Ech Mali, j'i vos ;
Ech Syrie, j'sro bin allé, minme tout seu, chin ches améritchains ;
Ech Cintre-Afrique, j'i vos coèr.
Echl'Afghanistan, is'i ont été.
Chi t'os eds idées o eds invies, écris-mi."

Chi tu vux unne astuce, foais-ti prindre chu ech batieu "Charles-de-Gaulle". Tu voéyages granmint, chin risque et tu minges bin.

lundi 9 décembre 2013

Loi ed Lanza Del Vasto

Lanza Del Vasto, ech fondateur del Communauté ed l'Arche, o dit :
              -"Chi os lanchons un cailleu in l'air, i nos rtombero chu l'tète. 
                 Est fatal qu'i nos rtombe chu l'tète. 
                 Mais, est mie fatal qu'os lanchonche un cailleu in l'air."


In deus-mile-trèse, unne future prix Nobel del joé ed vive o dit :
              -"Quanq tu prinds ech qui ch'donne, tu loupes rin."

Mi, éj trouve cho bin. Ej croés qu'i n'o pour eds innées à buser lo dsu ; Ch'est o, el philosophie.

dimanche 8 décembre 2013

Edjalité, min père !

Au vèpe, al'moaison, ech téléphone sonne :
-"Allo, ichi ch'est ch'Père Eric !" qu'i m'dit, ech tchuré.
-"Bonsoér, eq j'i réponds, ichi ch'est ch'père D....."

Vlan ! Os étoème chu ch'minme pié d'edjalité pour causer insuite. Ch'étoait bin et miu.

samedi 7 décembre 2013

Quarante-sis-mile-sis-chint-soéçante-quat

Cho, écrit in chiffres, ch'est un bieu numéro. T'os unne bèle symétrie, quat, sis, sis, sis, quat, et ch'est granmint aisié à rténir. Des foès, t'os des symétries comme o avuc tin compteu ed voéture. Mais ch'est mie d'o qu'éj vux causer.

Ch'numéro lo, ch'est chti ed Nelson Mandela quanq il étoait in prison. Pindin vint-sèt ins avuc ! Ej pux i écrire "ch'étoait", cho reste. Lo, i éroait eu ches numéros quat-vint-troès-mile-nu-chint-deus o soéçante-dis-mile-chonc-chint-trèse, i éroait janmoais oblier.

Echt'onme est défuncté ; Feut mie oblier quoè qu'i o foait pour chin poaiyis, pour tertous.

Adé, Madiba.

vendredi 6 décembre 2013

Et Bêêê !

J'o li ièr, din un journal, qu'unne madgète étoait présinte ach procès ed chin violeu. Ch'est mie in Frinche, mais feut qua-minme el lire pour el croère !

Un :           i sont mie légion, j'espère, ches gins qui foai'te o à unne madgète.
Deus :       qui qu'o dénonché ech violeu ? Es fanme, un eute onme, ech
                     madget o infin, ech madgète li-minme ?
Troés :      quoè qu'o dit ech madgète ach tribunal ?

Mi, avuc ches loès chu ch'mariège in Frinche, éj su ed moinss in moinss étonné. Ej frunme em bouke.

Mais lo, éj mé dminde chi o vo mie trop vite avuc ches loès d'achteure chu el prostitution. Visiblemint, i o des gins qu'ont des minques

jeudi 5 décembre 2013

Voée dingéreuse

Chu unne voée in ville qu'os disons dingéreuse, t'os un panneau qui t'dit que l'vitesse, ch'est, pèr exemple, chincante kilomètes pèr eures o miu.

Un jour, t'os un technocrate qui foait mette un radar. Ech nouvèle vitesse à applitcher, ch'est moinss ed soéçante-dis kilomètes pèr eures.

Quoè q'cho vut dire ? T'os vu comme ch'est bizard ! Mie ed modifications technitches chu l'route, mais vint kilomètes ed plu pèr eure chi tu vux.
Feut qu'éj diche qu'après ech radar, el vitesse, cho reste chincante kilomètes pèr eures o miu !!!

I o des gins qui no prinde'te pour des nikdouilles, et i feudroait voter pour eux ?!

mercredi 4 décembre 2013

Din qué chins ?

Quanq t'es din ch'train qui roule, tu pux rbéïer ches poaiyis pèr ches fernètes.

Quanq i foait jour, cho pux donner o


 Tu voés din qué chins avanche ech train.

Par nuit ou, in iver, timpe au matin ou au vèpe, in passant dvant  ech minme moaison, tu pux vir o

 Ed ... droète à gauche, lo dsu, et ed gauche à droète lo dsous.


Tu voés toudi din qué chins avanche ech train.

Mais tu pux étou vir o


 Tu voés rin ; Lo, o chi tu frunme tes zius, chi ech train i freine mie o augminte mie s'vitesse, tu pux oblier ech chins dech train. Foais ech l'espérieinche ti-minme, mais mie in voéture.

Unne taïonne ed min père dit un jour : "Ou ches qu'os allons comme cho ?" C'étoait mie din ch'train, mais din l'voéture ed min taïon qu'alloait din un rindieu. Mie d'afolure.

mardi 3 décembre 2013

Ches flérinées



T'os des gins, din ch'train timpe au matin, admettons os invirons ed sèt eures, i sin'te l'huile ed fritures.

Is ont du in minger à l'pitchète dech jour, o s'in mette chu leu casake o leu kmise comme un parfum.

Cha pue ; Comme ches cros fumeus, mine quanq i funme'te mie. Méchands sintimints, appelés flérinées.

Mi, éj préfère granmint ches sintimints dech fyin ed vakes. Mais ch'est éspécial, vu eq ch'est avuc du brin ed vake et du feur ; J'in prins mie comme arfum et tertous n'ainme mie.

lundi 2 décembre 2013

M'dame d'Aulnoy

Connoais-tu M'dame d'Aulnoy ? Nin ?

Tu connoais "ech cot botté", "Pieu ed beudet" o "ech tiot chaperon rouve", ches contes ed Charles Perrault.

Bin, M'dame d'Aulnoy, à ch'minme siècle eq Charles, o étou écrit des contes.

Feut vir ches contes ! "Gracieuse et Percinet", "echl'osieu bleu" o, "el guernouille binfoaisante".
Et ches noms ed ches gins ! Truitonne, Gracieuse, Grongnon, Toute-Belle, Laideronnette...
Din ch'conte, t'os toudi un granmint laid, des millars ed diamants et dor, et unne morale qu'i feut lire troès foès pour el comprindre.

M'damed'Aulnoy, qu'avoait tinté ed tuer chin onme, est morte edpi longtimps. Mais achteure, t'os coèr des scieintifiques qui ouve'te chu ches contes lo.

Mie, éj les lis seulmint. Pi ches eutes avuc. Ch'est din un livre qui s'appéle "Chi ches fées m'étoai'te contées...". Mile-sèt-chint-trinte-quat pages ed papier-bible.

Boinne lecture.

dimanche 1 décembre 2013

Adelaïde

Ej vouloais foaire un article chu ches marotchains
Qui s'connec'te pour el' première foès,
Quanq éj cause cannabis,
Mais min tcheur pinse à ti.

Tu savoais mie nadger,
Et minme chi t'ovoais seu,
Quanq l'ieu est froéde comme achteure,
Tu meurs.

Berck éroait pu ête
Din ch'sud del Frince,
O in Australie,
A coté d'...Adélaïde,
I éroait foait keud,
I éroait eu du monde chu ch'plage,
Et p't'ête eq tu t'seroait mie noéyée.
Mais, Berck est din ch'nord,
Et os sonmes in déchimbe...

Ej te connoais mie,
Min tcheur est granmint triste.
Vos vir min père et
Fus achteure ureuse lo o t'es.
Adé, Adélaïde.

samedi 30 novembre 2013

Vinde du cannabis

In Frince, t'os mie l'droét ed vinde du cannabis.

T'os un gars qu'o mie ed canche, qu'i ch'est foait prinde à n'in vinde ; L'est achteure in prison.

T'os mie l'droét, mais chi t'es prins à n'in vinde, tu doès poaiyer ches impôts chu tes vintes. Ech gars in prison, i doét achteure quat-vint mile uros au fisc.

Ech fisc, il o rtiré ches frais dech gars : unne consommation ed quat grammes pèr jour à tchinze uros ech gramme, et étou deus miles uros pour acater ech cannadis. Granmint gintil !

T'os mie l'droét, mais cho rapporte.

vendredi 29 novembre 2013

N'avoait mie coési o !

Un jonne, trinte ins, mnoait es voéture chu unne voèe normale. Arrive in face, et chu ch'gauche, unne eute voéture. ; Ch'est souvint o.

Mais lo, l'eute voéture s'met, tout d'un keup, au mitan del voèe. Ech jonne, quanq i voét o, i torne chin volant pour mie rintrer ed'din ; Il est mort.

L'eute n'o rin. I téléphonnait.

Brin, brin et brin.

Adé ech fiu ainmé.
Enorme pinsée pour ches parints et ches frères.

jeudi 28 novembre 2013

K sexe

L'eute smangne, i o eu ches commémorations ed l'assassinat ed John Fitzgerald Kennedy, ech vint-deus novimbe mile-nu-chint-soéçante-troés. Cho foait chincante ins.

A l'radio, i o un journaleu qu'o causé del vie sexuelle ed J.F.K. ; I disoait eq pèr rapport à J.F.K., D.S.K. rsannoait à un moène bouddhiste.

Pour mi, J.F.K.et D.S.K.sont des K.K.L., des Keuds Keuds Lapins. Mie confonde avuc ech K.K.K. qui n'o rin à vir. I m'sanne.

mercredi 27 novembre 2013

Tous au Larzac

Qué hasèrd !
Ech mardi, éj mets un article chu ch'Larzac, et au vèpe, t'os ch'film, "Tous au Larzac", foait in deus mile onze, qui passe à l'télé, chu Arte.
Pour mi, ch'est un très bieu documintaire à vir ; Avuc granmint d'archives et témoègnages.

A rvir chu "Arte+7"

mardi 26 novembre 2013

Ech Larzac

T'os p't'ête vu ech Pôle Sud, chés améritches, Vladivostok, ech Zambie, Freetown, Punta Arenas o Antananarivo, mais connoais-tu ech Larzac, in Frince ?



Ech Larzac, ch'est unne bèle région au sud-est ed l'Aveyron. Al'o gardé chin naturel et s'bieutè.












T'i voés des ho ed berbis Lacaune . Ej t'o djo causé dech freumage ed Roquefort qu'est foait avuc ech lèt.


Dins ches énnées soéçante-dis, chés politiques ont voulu i mette un grind camp militaire au mitan ed chés cans. Chés chint-troès paysins dlo, p't'ete avuc un tiot et jonne moustachu, et d'eutes, ed toute el Frince et étou d'eutes pays, ch'is sont opposés avuc grind corage.
"Os garderons ech Larzac", ch'est un slogan qui ch'dit, in occhitin, "Gardarem Lo Larzac".


Is ont minme construit unne moaison in pierre pour ches berbis, chin in avoèr el droèt. Tu l'voés toudi quind t'i vos.
Rbée el qualité ed chés voutes !



Chi t'i vos un jour, éteins tin portable et t'musitche ; Ouve tes ius, tais-té, acoute et respecte ech grind silinche et cheux qui l'ont défindu.


Je rmerchie ech photographe amateu qui m'o prêté chés bèles images.

lundi 25 novembre 2013

Del confiture ed gratte-tchu

Quanq qu'il o injlé pindin des jours, tu pux foaire des confitures ed gratte-tchu.

Pour o, tu tcheuilles ches fruits aisiémint, vu qu'i ont kmincé à porrir. Chi ch'est mie aisiè, ch'est mie el momint ed tcheuillir. Au beu ed tes doéts, t’éros ech futur sintimint de t'confiture. Des foès, tu t'pitches un molet o tu t'foais des greus, mais ch'est mie importint et feut mie brère.

Quanq t'es à t'moaison, tu rtires, avuc un tiot coutieu, ech tiot beu dech gratte-tchu. Pi, tu mets ches fruits din de l'ieu pindin uit jours.

Apré ches uit jours - tu restes mie tout ch'tan lo dvant el castrole à attinde - tu canges l'ieu, pi tu fais bolir. Tu  wardes ech jus et tu peuches, chin mette tous ches tiots pépins avuc.

Al fin, t’ajoutes ech minme poéds ed chuke qu'ed jus et tu foais tchuire lintemin; Quanq cho perle, t’arrêtes, tu mets in pot(s) et t'os fini.

Ech plu importint pour réussir, ch'est eq ches haïures fuche'te mie taillées. Pour mie, ch'est granmint malaisiè ; Rbée !

Troès chint vint grammes ed confiture


dimanche 24 novembre 2013

Deus moès eq j’attindoais

Cho foait deus moès eq j'attindoais et espéroais o : un canadien vient ed rbéïer min blog. Ch'est ech premier keup.
Magine eq ch'est unne tante, un onke, unne cousine o eute d'em famille, ch'o m'keuffe granmint ech tcheur.

Cros bec.

Ches tontons flingueurs

Georges Lautner est mort verdi. Chin film, ches tontons flingueurs, o chincante ins in deus mile trèse. Ches dialogues, mie pitchés pèr ches vers, sont ed Michel Audiard.

Hommage avuc un extrait :

....
i boé'te

Raoul Volfoni : Feut rconnoaîte, ch'est du brutal !

Paul Volfoni : Os avez raison, est tchurieux hein ?

M'sieur Fernand : J'o connu unne polonaise qu'in prenait au tiot diner. Feut quind minme admette eq ch'est plutôt unne boèsson d'onme. (I tousse) 

Is rser'te 

Raoul Volfoni : T'os sais mie ech qu'i m'rapinse ? Ech't'espèce ed drôlerie qu'o buvoait din unne tiote taule de bin ho har, mie tellemint  loin ed Saigon. Ches volets rouves et ch'taulière, unne blonde komac.
Kmint qu'ale s'appeloait, cré nom dé diu ?

M'sieur Fernand : Lulu el nintaise.

Raoul Volfoni : T'os connu ?

Paul Volfoni : J'i trouve un goût ed punme.

Maître Folace : Y’in o.

Raoul Volfoni : Et bin ch'est d'vint amon ale eq Lucien ech kvau ch'est foait desseudé.

M'sieur Fernand : Et pèr qui ? Hein ?

Raoul Volfoni: Ben v'lo eq j'o pu m'tète.

M'sieur Fernand  : Pèr Teddy ed Montréal, un fondu qu'ouvroait qu'o l'dynamite.

Raoul Volfoni : Toute unne époque !
...

samedi 23 novembre 2013

Deus rcettes in unne

L'eute sinmdi, j'o foait deus rcettes in un keup.

I t'feut :
- unne tète ed vieu,
- sis minchons ed canèrd,
- un pié d vieu - cho put ête ech minme vieu eq pour el tète, mais ch'est mie oblitché -,
- sis o sèt ongnons,
- sèt o uit carotes,
- un poérion,
- miu d'un lite ed vin blanc, du boin tan q'à foaire,
- miu d'un lite d'ieu,
- du sé, du poéve et du pouillu.

Keuper ech tète ed vieu in morcieu d'inviron uit chu uit ;
Mette din un couet comme chu ch'photo,
un lite ed vin et un lite d'ieu.

Ajouter, din l'orde, ches morcieus ed tète ed vieu, ches minchons ed canèrd, ech pié d'vieu pèr dsu, ches carotes in rondelles, ches ongnons keuper in deus et ch'poérion keupé in tiots beus alintour.
Mette ech sé, ech poéve, chin crainde chu ech quintité, et ch'pouillu.
Finir ed couvrir avuc vin et ieu, pi, frunmer ech couet.

Mette quat voère chonc eures din un four à deus chints degrés.

Apré, inlever ches minchons,  sépèrer el'viainde ed ches os et keuper fin ; Miu ch'est tiot, miu ch'est insuite.
L'mette din une o deus tiotes terrines, avuc un molet ed carote, ongnon et poérion.
Appuyer, pi couvrir avuc ech jus ed tchuisson. Frunmer

et rmette unne boinne eure din ch'four, ach minme timpérature. Lo, t'os foait unne o deus terrine ed canèrd. Quanq ch'est froéd,cho coule mie ; Rbée ches photos dsous

Pour ech reste, tu rmets din ch'four edjalmint unne boinne eure, mais chin couvrir. Tu foais tchuire des punmes-ed-tère din del'ieu, pi tu les mets din ch'couet qu'est din ch'four. Lo, t'os tchuisiner unne tète ed vieu.

Boin accion !



vendredi 22 novembre 2013

Ches nikdouilles ed cros tchuterreux

Ech vint et un novimbe, ches cros tchuterreux ed ches invirons ed Paris ont blotché ches voèes, keuse qu'i vont avoèr un molet moinss ed primes.

Magine ches riches, avuc unne berdale comme unne baritche ed vin, qui manifesteroai'te, keuse qu'ech caviar o augminté ed chincante cintimes !

Ej croès qu'i o des jours, des gins qu'o rin à foaire et qu'éroai'te miu foait ed fabritcher des bonnhonmes ed nèges avuc leu fiu o tiots fius.

jeudi 21 novembre 2013

Ech tans in Urope

L'Urope est vaste.

Din ches pays du sud, Grèce, Echpagne et Portugal, i foait bin keud et souvint ; L'S.M.I.C est o inviron ed chonc chint uros.

In Frinche, climat timpérée et S.M.I.C alintour ed mile quat chint uros.

Miu au nord, Luxembourg, pèr exemple, et p't'ête bin Hollande (ech pays, mie eute keuse), t'os du moéÿin tans et des ferlées ; L'S.M.I.C est o inviron ed dis uit chint uros.

Ech miu, ch'est in Chuisse, o tu pux trouver un S.M.I.C. a troés mile troés chint uros o etchivalent. Mais ech climat est rude.

Edvinette, avuc rin à gaingner : kmint qu'ech tans in Bulgarie chi chin S.M.I.C. est à chint chincante uros ?

mercredi 20 novembre 2013

Mes conmarades ukrainiens

Mais quoè qui s'passe edpi uit jours ? I o pu ed visite chu min site ed ches ukrainens !

I ont cru eq j'étoais ech selectionneu ed ches jueux ed fotballe et i ont comprins, din ches articles, l'technique à Dédé ?! Pi quanq i ont gaingné verdi, partis ? P't'ête !

P't'ête qui sont allés in Allemagne ? J'o miu ed lecteu là-bos.

Mi j'les ainmoais bin. I rvien'te quind qu'i vu'te.

mardi 19 novembre 2013

Ches ius d'unne fanme

Au matin, din ch'train, j'o vu unne jonne, d'origine maghrébine, vnir s'assir in face ed mi ; J'i voéyoais eq ches ius.

Tu't'dis qu'os in voéyons ed miu in miu des comme o din ches villes !
Din ch'ginre lo, mie vraimint, mais cho vo vnir din ches smangnes qui vien'te.

Pour s'habiller, ale avoait mis :
- unne maronne et dsous, unne tchulote éj suppose,
- au beu ed ches gambes, des bottes in tchuir et p't'ête dsous, des keuchettes,
- un cros mantieu qu'étoait frunmé, p't'ête unne kmise et un espincer, et des gants à ches mans,
- un bonnet ed laine chu s'tète et ches éreilles,
- un fouleur ed l'minme laine qu'ech bonnet, alintour ed chin co et chu chin nez.

Ch'est l'iver, o miu, cho i rsanne ; Avuc tout cho chu ale, n'avoait mie froéd.

lundi 18 novembre 2013

Ech nouvèle révolution chinoèse

Ech parti communichte chinoès,qu'existe coèr, li, o décidié qu'i sro achteure possibe d'avoèr deus galibiés pèr famille. Edpi des innées is avoai'te droèt qu'à un éfant, fiu o fille. Ch'est pour seuver ech peuple chinoès qu'il o cangé ches régles.

I o étou décidié ed frunmer ches camps ed ouverriers. Ch'est-i un signe ed crise ? Ej croès mie, et ch'est bin pour ches ouverriers lo.

dimanche 17 novembre 2013

Mi, din em'moaison vuide

Ch'est unne canchon, mais ch'est mie d'ale qu'éj vux causer.

Avint leu tchinze ins, t'os tout tes galibiés à t'moaison au vèpe et el'nuit.
Pi, à mzure, i dor'te ach lycée. Mais, tu les voés à pèrtir dech verdi.

Un jour, i rint'te mie, keuse ches études.

Achteure, j'o plu qu'un éfant tous ches sinmdi et diminche. In smangne, éj n'o qu'un étou, un eute, keuse qu'il ouvre mie loin ed ches nos. Cho durero mie.

Des gins di'te des foès "tout seu, comme deus vius cons". Os voérons, mais éj croès mie.

samedi 16 novembre 2013

Unne crosse berlure

Din un opital ed Normindie, un onme o été inchinéré pèr berlure ; i dvoait ête interrer.

Pinse à ch'galibié, pindin el cérémonie :
- " Dis, l'mère, ch'est Mamie qu'est din ech cercueil ?"

- "Nin ! Ch'est l'taïon ed tin conmarade ed classe."

El tète à l'invers

Tu 't souviens del devinette avuc un gars qu'avoait el tète à l'invers, mais ches piés chu terre ?



Ech photo l'avoait été prins din unne bèle ville dont j'avais causé : Marseille.

I o eu inviron chincante pèr chint ed miu ed participints. Mais étou, chincante pèr chint ed moins ed boinnes réponches.
Merchi tertous d'avoèr jué.

vendredi 15 novembre 2013

Tu pux el ruer ?!

Ech rasoèr ? Usé, tu pux el ruer !
Ech four micro-ondes ? In rake, tu pux el ruer !
Ech téléphone portable ? In rake, tu pux el ruer !
Ech l'imprimante det moaison ? In rake, tu pux el ruer !
Echl'appareil photos ? In rake, tu pux el ruer !

Echl'ouverrier ? Fréieux o viu, tu pux el ruer ?
Ech conjoint ? Viu o fréieux, tu pux el ruer ?

jeudi 14 novembre 2013

Donne tin sing

I o des foès, o s'deminde pourquoè i feut donner chin sing.




Lo, o sait !
I n'in feut granmint.






P't'éte qu'i feut miu donner unne eute foès o din un eute indroét.
Mais feut donner chin sing.

mercredi 13 novembre 2013

O ch'contraire !

Intindu ech douse novimbe ach radio :

"O sait mie chi l'inchindie est du achl'esplosion d'unne boutelle d'acétylène o chi ch'est l'boutelle d'acétylène qu'est ech keuse dech l'inchindie".

mardi 12 novembre 2013

Ches comptes dech gars Ugène

Avuc troès o quat conmarades ed lycée, i o trinte ins, os avoète trouvé ed quoè gaingner queq' frincs in ramassant des glinnes, des codins o des pouldindes din ches cinses, pour ches poéyisans.
Aprés, os cassoète unne grainne et ch'gars nos poéyoait.

Un jour, os étoème amon Ugène. Deus eures ed boulot, trinte frincs pèr eure.
In mingeant, ech gars nos dit comme os,  eq des cours ed maths, i nos in donne quanq os voulons.

Pi, i nos file soéçane-dis frincs pèr gars. Comme os sonmes polis, os i disons qu'i o unne tiote berlure. "Cho, ch'est mes comptes à mi ; Ch'est m'part", qu'i nos répond.

Il'étoait fortiche in caus'rie, mais mie in maths.

lundi 11 novembre 2013

Chi t'es né...

Chi t'es né ech onze novimbe, un premier, boins ages à ti. Etpi, bravo à tin père et t'mère qui t'ont conchu avint ech Carème. Respect.

T'os des gins, i fricot'te ech quatore juillet ; Pindin ech Marseillaise ?

D'eutes, à Noë ! "Tu vux un tiot Jésus ?"

Feut un molet ed sérieux.

Cros becs à m'bèles-soeurs

dimanche 10 novembre 2013

Ech correcteu d'orthographe

L'eute jour, j'o mis ches articles dech site chu un traitmint ed textes. D'un cheul keup, ech correcteu d'orthographe m'o mis un mot comme quoè i l'artoait d'ouvrer pasqu’il avoait granmint à foaire.

Ch'est mi qu'écrit comme éj vux. Achteure, li, i dormiro.

samedi 9 novembre 2013

Ech nouvieu

Edpi hier, i o un nouvieu qu'o rbéier min site ; Est ed Roumanie. J'i souhaite l'bienvenue.

Ch'est p't'ête un conmarade am fille, edpi chin voéyage là-bos.

O qu'éj m'couque...

Un jour, j'o eu un chef qu'étoait mie un nikdouille, vu qu'il étoait chef.
I sanne !
Etoait chin capieu qu'i i éroait serré s'tète et qu'i l'éroait impêtché ed réfléchir.

Quanq un ouvreu alloait ouvrer à miu ed chint-chincante kilomètes ed ches li à keuse dech l'ouvrage, et qu'i dormoait din un hotel, ech chef i dmandoait o ches qu'i s'étoait coutché, et d'o ches qu'i l'étoait érpèrti el lindmin.

Mi, j'i o répondu : -"lo o je m'couque, éj me rinveille."

Et ti ?

vendredi 8 novembre 2013

Noèrt, ch'est noèrt

T'os vu, edpi uit jours, i foait noèr timpe au vèpe. Ches jours, is ratinchtte.
Mi, j'ainme ech noèr, et ch'gris.
Comme ches photos qu'éj foais,
In noèr et gris
comme ech canchon in dsous, "Noèr ch'est noèr".

Noèrt ch'est noèrt, ed Johnny

Noèrt ch'est noèrt
I o mie d'espoér
Ouais gris ch'est gris
Et ch'est fini, oh, oh, oh, oh
Cho m' rind fou j'o cru à tin anmour
Et j'perds tout
Ej sus dans le noèrt
Et j'o du mau à croère
Au gris ed l'innui
Et éj te crie, oh, oh, oh, oh
Ej frai tout pour seuver not anmour
Tout jusqu'o beu

Chi un mot peut tout canger éj le trouvarai
I feut mie in douter, i feut essayer
Noèrt ch'est noèrt
il est jamoais trop tard
Pour mi du gris j'n'in veux plu din m'vie, oh, oh
Cha m'rind fou ed perde tin anmour
Ej te l'avoue

Achteure pour el seuver à tout éj sus prêt
Achl'instant del vérité pourquoé in douter ?
Noèrt ch'est noèrt
I m'reste l'espoér
Ouais gris ch'est gris éj vux mie d'innuis, oh, oh
Cha veut ech keup ed de seuver not anmour
Rin eq pour nos
Ed seuver not anmour
Rin eq pour nos

Noèrt ch'est noèrt
I m'reste ed l'espoér
Noèrt ch'est noèrt
I m'reste ed l'espoér
Noèrt ch'est noèrt
I m'reste ed l'espoér
Noèrt ch'est noèrt

T'os ainmé ? Tu pux canger ed sins :

Gris ch'est gris
I o mie edl'esprit
Ouais noèr ch'est noèr
Et ch'est el foére, oh, oh, oh, oh
Cho m' rind fou j'o cru à tin anmour
Et j'perds tout
Ej sus dans le gris
Et éj t'o mie écrit
....

Tu pux, mais t'es mie obligé.


jeudi 7 novembre 2013

J'o prins min pié !

L'eute jour, in vagances, j'o été voèr unne esposition.

Avint d'intrer, i avoait unne file d'attinte. Dvint mi, un père, es fanme et leu fiu.
Au beu d'un momint, ech père cause avuc d'eutes gins ed chin fiu qu'étoait allé à l'opital pour chin crane.

D'ech keu, mi, éj tape chu chl'épeule dech tiot et j'i dis : "- mi, étou, éj sus allé à l'opital. Rbée mes piés !"

I n'o mie ri. Mi, granmint.

mercredi 6 novembre 2013

Ches organes

I o troès eures, din l'rue, unne fille ed dis-nu ins dit à un jonne :
-"Ej m'in bats les couilles."

Mi, quanq j’intinds causer comm'cho, cho foait frinchonner les ovaires.

Echl'avenir dech cirque

I o des gins qu'ont ed ches idées ! In Catalogne, i vu'te interdire ches animaux au cirque ; Côté ouverrier.

Fini ches pinjons o ches lapins qui sortiroai'te ed drière un linchu o d'un capieu. Défini ches acrobates chu ech dos d'un kvau o d'un zébe qui torne. Et ches nénéphants, ches lions o ches tigres qui  foaisoai'te peur à ches éfants ? Quoè qu'i dvaroai'te ?

Din ech minme ginre, tu pux interdire :
- d'es foaire bisir ach bord del mer in étè o d'es baingner,
- ed boère unne bistouille o du brinvin din ches cafés,
- ed caliner t'fanme inter vint-deus eures et sèt eures,
- ches corridas,
- ed cacher avuc un fusike,
...

I n'o des berlures à mie foaire. Mais i o étou des nikdouilles pour les foaire.

mardi 5 novembre 2013

Unne nouvèle edvinette

Din qué ville es passe echl'action ?











Deus indices :











Réponche ech sèse novimbe.
Boinne canche !

lundi 4 novembre 2013

Ech début d'unne boinne mèrche

In Frinche, t'os granmint ed kmins qui méne'te à St Jacques ed Compostelle. I n'o un qui part du Puy-in-Velay.

Cho kminche pèr une bénédiction timpe au matin, à sèt eures, din ech cathédrale. I o lo eds améritchains, autritchiens, echpagnols, alleminds et frinchais, des jonnes et des viux.
Aprés, o t'baille unne tout tiote médaille in forme d'écaille...ed St Jacques, o tamponne tin crédinciale, o t'dit "boinne mèrche", et tu pèrtes.

Pour cho, t’avanches au mitan del cathédrale, tu dévales des mèrches, tu tornes et t'arrives seulemint al porte ed sortie dech cathédrale. Unne grinde porte d'o tu voès el ville et un molet ech kmin ed St Jacques ed Compostelle, ech GR soéçante-chonc.



Boin voéyage.

dimanche 3 novembre 2013

El caïele ed....Vaylat

Tu t’souviens dech devinette d'i o un moès ; Unne photo ed caïele din unne église.




Ech photo l'o été prins à Vaylat, tiot tiot village inter Bach et Lalbenque, din ch'Lot.
El boinne réponse, ch'étoait "ech Lot".
I n'o deus qu'ont trouvé ; I n'o des millars qu'ont mie traché.

samedi 2 novembre 2013

Ech message chin siniure

Ech matin, em fanme rbée chin téléphone portable. Din cheul keup, ale o un message, chin siniure, qu'i dit :"voulez-vous supprimer le contact "mon chéri" ?".

"Mon chéri" am fanme, in principe, ch'est mi. Al frousse eq j'o eu ! I ovoait-i un tueux muché qui m' surveilloait et prêt à m'escoffier ?

Al o répondu "nin". Mais achteure, éj freumerai qu'un euil et dormirai chu une seule éreille.

Unne boinne fabritche

T'os eds abattoérs et eutes interprinses qui  freume'te, mais t'os unne fabritche qui foait chin bure, ch'est unne qui fabritche des bonnets rouves ; I n'in vinde'te des miles et des miles achteure. I foait mie froéd ; Ch'est l'mode.

Et cho, ch'est grace à un onme, ech merre d'une tiote ville o mitan del Bretagne.
A min avis, ech gars lo, i vo ete élu présidint. Del Bretagne libe. Voère miu.

vendredi 1 novembre 2013

Unne mère est défunctée

Ch'étoait merkerdi. C'te mère, éj l'o conné mie granmint. Ch'est es'fille qu'est unne amie.
Mi, j'o dmindé à min père ed l'atcheuiller lo o il est djo, et d'i foaire unne visite ed ches lieux.

Mais, vu el londjeur dech week end à keuse dech premier novimbe, i o mie d'interremint avant lindi.

El mère put attinde ; Mi, feut qu'éj prévienche min père qu'i vo s'foaire du mourron.

Unne pinsée pour ches fiux, filles, tiots fiux et tiotes filles, et tertous ches saints.

jeudi 31 octobre 2013

Ech treu ed mémoére

Ej vos avoér tchinze ins, sus boèn élève jusqu'lo et i feut pinser achl'avnir. Avuc em'mère, os sommes aller vir unne consillère d'orientation.

"- Quéq'tu vux foaire ?" qu'ale m'dit.
"- Maçon" eq j'i réponds.
"- Quoé d'eutes ?" qu'ale m'dit coèr.
"- Camionneu  international " mi j'i dit. Ej vouloais vir ches pays in ouvrant.

J'o un treu ed mémoére ; Ej sais mie kmint cho ch'est fini.

Troès moès apré, j'étoais dins un lycée.
Mie pour apprinde el maçonnerie o el mécanique, mais chés maths, del physique et étou edl'histoère, edl'allemind, et du frinchais.
Comme chi mi j'avoais dzoin d'apprinde ech frinchais.

mercredi 30 octobre 2013

Ech parti politique dispèru?

L'eute jour, éj croése un vastépluque, ch'est un gars qu'i n'o mie toute es tète, qu'i s'cause à li minme. L'étoait in train ed causer dech parti communichte.
J'o réfléchi un molet et j'm'sus dit qu'o n'intindoait plu causer edpi queq'moès, voèr ed ins.
L'est o ech drapeau ? Qu'o qu'i foai'te chés militints ?
Georges, Robert, révnez ! Is ont dzoin ed vos, chés purichtes.

mardi 29 octobre 2013

Qué famille !

Lolo et s'fanme ont quat fiux :
- Edmont, belge, troèze ins,
- Nicolaïev Popovitch Nichtérovitch, russe, dis ins,
- Matthiew, inglais, sèt ins
- Seb, monégaste, sis ins.

Edmont, chaq foès qui voét quéq'un, i dit :
"- min grind frère o dis ins."
Seb ajoute :
"- mi, min tiot frère, sèt ins."
Chés deus eutes di'te :
"- cho,ch'est bin vrai."

T'os comprind ?

lundi 28 octobre 2013

Kmint eq ch'est el bonnur ?

Avec miu d'un quèrt ed siéque passé avec em fanme, éj pux dire kmint eq tu sais qu'unne fanme est ureuse.

I o d'abord ches mots et ches gestes tindes qu'ale ét dit o foait souvint ; "Min tiot co", "min cros codin", "min corageux". Chin oblier ech cros bec quint ale té rtrouve.
Mi, j'o tchèr étou quind ale tchuisine unne vianne bolie, unne crême o eute pour ém foaire plaisi.

Unne fanme qui t'ainme, des foès, ale met ed bieux abits pour ti ; un cotron o unne boaiyette régalant, et per dsous, unne tchulote bélote, eq tu pux i avoèr acater.

Chi t'fanme kminche à mie foaire o dire cho, chi ale voét eq tes défeuts, lo, i o du malur à vnir. Acate z'i un bouquet ; O ale l'garde, o tu l'prinds dins ete dgife : Tu séro.

Mi, achteure, j'o rin érchu ; J'o raboaissié ém dgife.

dimanche 27 octobre 2013

T'es mie frinchaise

In Frinche, i o queq' moès, unne fanme rom prind un bus et ch'assit.

T'os unne eute fanme, un molet plu vieille, qui monte. Pu unne place. Kminches à indjeuler ech fanme rom et à i dire eq ch'est mie unne frinchaise. Ch'étoait vrai ; Tu pux mie dire ech contraire.
L'eute vivoait in Frinche edpi chincante ins et causoait ech franchais comme unne vake echpagnole.

Dins cht'histoère, i avoait unne uropéyinne

samedi 26 octobre 2013

Ech leu

Ech leu o mingé el mère-grind, ech tiot chaperon rouge, el galette et ch'pot ed beurre.

Achteure, i minge ches berbis o madgètes eq chés paysins is ont grind mau à heucher. Chés écologischtes is disent qu'i feut mie tuer ech leu.

J'ainmeroais qu'ech leu i morche queq' gambes d'écologischtes o minge leus tchyins.

vendredi 25 octobre 2013

Min playmobile

Ej connoais une jonne et tiote fanme qui cause tout l'timps.

A s'visine et amie :
"...et blablabla, et blablabla,...
...ej sus p't'ête inceinte d'un moès, o i l'est mort. I o unne canche chu deus...
..et blablabla, et blablabla,..."

Ale étoait inceinte. Mais os vos in motchez. Mi étou, mais ale causoait comme chi is étoai'te tous deus.

Ale ne sait mie, mais éj l'appéle playmobile, comme ches jux, à keuse dech keupe et dech couleur ed ches cavieux.

"...et blablabla, et blablabla,..."

jeudi 24 octobre 2013

Ches tags

Un tag, ch'est quéq'cose d'écrit avec un keup ed peinture.

A ches débuts, i o trinte ins inviron, ch'étoét in noér et chu un mur. Tu comprindoais mie ech sins et ch'ti qui foaisoait cho, et qu'étoét attrapé, étoét puni. Des foès, i dvoait nettier ech mur.

Achteure, i o des couleurs, des tags étou chu ches trains et i o des gins qui sont poéyés pour in foaire. Ch'est vrai qu'i n'o des bieux. Tu pux vir, perfoès, eds expositions din l'rue.

I n'o étou eq tu te dmindes commint qu'i ont foait pour aller peinturlurer ach t'indroè chin es foaire ed mau.

Mais tu comprinds toudi mie ech sins.

mercredi 23 octobre 2013

Ech bicycleu

Ej vux causer d'un gars qu'éj voés rédjuliéremint chu eche bicyclette.

Quind éj vos ouvrer, éj le voés aux inviron ed sis eures tous chés matins, tans non tans, ech qui vut dire, qu'i plu, qu'i nège o qu'i vinte. I l'o chin espincèr ganne qui mile chu chin dos.

L'eute jour, éj l'o vu rintrer ; Je n'sais mie exactémint o il habite et o il ouvre, mais cho foait miu ed sis kilomètes. Et chin vélo, ch'est mie pour foaire ech Tour ed Frince.

N'in vlo un ed corageux.

mardi 22 octobre 2013

Et ti, et ti et ti

Ed miu in miu.

Tu connoais el canchon ed Jacques Dutronc, "Et mi, et mi et mi".
Mi, inn'hui, éj pux écrire, in causant ed vos, ches visiteux dech blog :

"Un vénézuélien edpi uit jours,
Et ti, et ti , et ti,
Quind chés eq tu varos vir ?
Un macédonien étou edpi uit jours,
Et ti, et ti , et ti,
Quind chés eq tu varos vir ?
Dis indonésiens echte nuit,
Et ti, et ti , et ti,
Quind chés eq tu varos vir ?
Irlindais, russes, alleminds,
Coréens dech sud,
Serbes, royaumunieux
Ed timps in timps
Et ti, et ti , et ti,
Quind chés eq tu varos vir ?
Ukrainiens, améritchains
Et frinchais rédjuliéremint
Et ti, et ti , et ti,
Quind chés eq tu varos vir ?"

Dech blogger ureus


Fabritcher un sélète pour minichtre.

Chi un ministre vint et vir, feut i fabritcher un sélète.

Pour o :
- Prinde un sieu,
- Mette del terre ndin,
- Plinter un minche ed binette, balai, pelle o pioche in bo ; Tu coésis in fonction dech minichtre. Cho put ete un viu minche cassé.

T'os fini.Tu vis eq ch'est simple à foaire.

Vu kmint qu'is ouve'te, i s'ainmeront s'assir edsu.

Ch'est écologichte. Quind ech minichtre est parti, tu démontes.

lundi 21 octobre 2013

El keuchure

Deus afritchains sont assis chu unne remorque ed car.

Tu n'os un qui o unne keuchure qui tcheu chu l'voée. Ech car roule toudi. Ech gars jéte alorss ech deuxienme keuchure.

Chin ami ed voéyage dminde pouquoé i l'o foait cho.
L'eute répond : "- Chti qui trouve unne keuchure, put rin in foaire. Mais chi i o ches deus, i put.

dimanche 20 octobre 2013

Cadeu ed mèriage

Unne fessée, chonc chint euros. Dech keup, dis, cho foait chonc miles. Feut bin t'nir chés comptes.
T'acates un chertificat ed mèriage à chincante euros, i t'reste ed quoé foaire un bieu rpos avec chés invités. Bieu cadeu.

Des fessées, éj n'o érchu et éj pu vos dire eq cho n'impèche mie eq j'ainme granmint min père et m'mère.

Echl'avenir ?
J'o unne fille ed vint ins qui m'réclame mile euros per couche qu'éj i o cangée. "-Voèyeurisme !" qu'ale dit. O miu, unne per smainne pindint deus ins que j'o cangé. Certainmint plu qu'o. Foait chés comptes ; Ej pux rvinde em moaison.

Fini chés couches. Achteure, chés éfants s'tribouilleront. Brin.


samedi 19 octobre 2013

Ches boéïeux del tète

T'os ed plu in plu ed gins qui et'conseille'te ed causer ed tes problinmes à un sérusyin. Chés problinmes ! Qué problinmes ? Pour tout dire, i pinse'te eq t'os un mau dins t'tête et qu'i feut et'foaire soégner.

In vrai, t'es mie comme eux et cho, cho les épine.

Ch'est triste et grave. Ches gins lo, i rbé'te mie chi eux ont queq'cose.
Tu n'os qui sont des lapeux,  tu n'os p't'ete qui sont cotchus chin el savoér, tu os étou des jotcheus o des chin chuchon à quarante-sèt ins et i't donne'te leu consils. Feudro miu qui s'foaiche'te foaire un chint ed clones et vive avec eux, dins un parc.

Mi, éj les déringerai mie.

vendredi 18 octobre 2013

Ech léginde dech Roquefort

Un bertcher, voulant conter fleurette à unne bèle bertchère, posa chin pain et chin fromache frais ed berbis din el grotte qui li servoait ed rado, et s'in allo. Chin tchyin gardoait ech ho ed berbis.

I mèrche, i mèrche mais n' rattrape mie l'fille.

Un moès plu tèrd, i rvient et i l'o un creux . I rtrouve chin pain et chin fromache, pu frais, qu'i l'avoait laissié eq chin tchyin avoait mie minger edpu. Ech fromache a granmint cangé. Mais i l'ovoait faim. Et i mingeo. Ch'étoait boin. I n'in rfi ; Ch'étoait toudi boin.

Ech fromache ed Roquefort étoait né.

Tin miu.

jeudi 17 octobre 2013

Ech cros camion dins ch'tiot tunnel

Fernand Reynaud disoait "-Allo tonton, pourquoi tu tousses ?".
"-Allo tonton, j'o un problèm ed maths" qui disoait min nveu.

Esn embrouille, ch'étoait echl heuteur possibe d'un camion -cho ch'écrit "car" mais j'avoais el frousse eq tu confonds avec eute keuse et eq tu comprinds rin - ed deus mètes soéçante ed large dins un tunnel ed quate mètes chincante d' heut qu'o unne voute et qui fait quates mètes ed large.

Avec Pythagore, j'o trouvé quate mètes et un chintimète pour ches bords dech car. Vérife chi cho t'plaît.

J'o espliché, à min nveu, qu'au milieu dech car, i pouvoait mete quate mètes chincante, in rimplichant ech car ed patates à chin taïon.
L'o mie écrit chu ch' feuille.

mercredi 16 octobre 2013

Ech voéyage ed classe

Inn'hui, echl'école avoait prévu un voéyage pour ches jonnes d'inviron tchinze ins. Tu m'croés o tu croés mie, mais i o unne tiote qu'o eu droét à unne place direc et gratiss pour ech Kosovo o l'attindoai'te es famille.

Ech fille, al o sin père, es'mère, ses frères et seurs, pu d'école - n'o p't'ete mie poaiyer ech cantine - et pourtin, ch'est mie des boènes nouvèles pour al.

mardi 15 octobre 2013

Ech recette del tarte ringaine

Pour foaire une boène tarte ringaine,

- Tu foais une pâte berzillée. Tu l'mets à tchuire dins ch'four aprés  l'avoèr pitchée avec unne fortchète pour mie qu'ale s'abîme.

- Aprés, tu foais et verses dsu unne crème pâtissière. Tu rmets dins ch'four et tu rtires quind cho kminche à noérchir.

- Laisse rfroédir .Ch'est fini.

Chés blanc d'eu, tu pux les foais tchuire dins unne poèle avec sé et poèvre et les minger.

T'os eds invités, tu leu sert unne tarte.
Ech premièr diminche, is trouve'te cho boin.
Ech deuxième diminche, is trouve'te cho boin.
Ech troésienme diminche, is trouve'te cho boin.
.
.
.
.
Ech tchinziènme diminche, is trouve'te eq ch'est unne boène tarte ...ringaine.
Tu pux servir avec, à ches éfants, un verre ed limonade.

lundi 14 octobre 2013

Ech nasu, ech méchand o ch'minteux ?

Cho pourroait ête ech titre d'un boèn western, mais ch'est mie o.

I i o yeu eds élections ; I i éro eds élections.

Mi, éj croés qu'i feut voter. Mais t'es mie obligé. Os sonmes mie in Belgique.

Pour voter, tu pux lire ches progammes ed ches candidats, acouter ches candidats pi coésir ech moinss méchand.
Mais tu pux étou voter contre un candidat.

Dins tous ches cas, après, feut assumer ; Surtoute dins ech deuxienme.

dimanche 13 octobre 2013

Révolution dins echl église

Dins chl'avion qui l'ramnoait ed ches Journées Mondiales del Jonnesse au Brésil, ech Pape François o déclèré à ches journaleux :
"-Echl Église doét mie seulemint atteinde ches divorcés rmèrier , mais aller les trouvoér. (…) "

Révolutionnaire !

Chu 'ch bouke

Quatorze et tchinze ins ; Is s'ainme'te et s'foai'te un bec chu 'ch bouke. Dins ch'rue.

In France o au Maroc, ch'est mie ech même résultat ; Libe d'un côté, infrunmer in prison ed l'eute.

Qué brin.

samedi 12 octobre 2013

Ej minge avec em éreilles.

Tu t'rappéles echl article "Avec quo tu minges ?".


Ej t'esplique ech truc : Mi, j'o eds éreilles. Comme ti, suremint.


Quind éj minge, éj les rtire mie. Donc, éj ming avec. Ti étou.


Ech vake, ech beudet, ech kvau del tiote fille o bros cassé, ech madgète, ech tchyin, i minge'te avec leu tcheue.

T'os comprins ?

vendredi 11 octobre 2013

Ches Corons ed Bollaert

Pierre Bachelet étoait un artiste qu'o foait queques canchons eq j'ainme.

I o d'abord "le Voilier noir", qui cause d'Eric Tabarly, ech grind marin ed mer.
I o aussi "Marionnettiste", cho'm rappéle Ches Cabotans d'Anmyin, et "Emmanuelle" qu'est unne musique ed film. Eq j'o mie vu, ech film ; Emmanelle, ej m’souvaroais.

Infin, io les corons. Honnêtemint, j'ainme mie trop ech morcieu lo, mais quind tu l’intinds cantée per ech public dech Racing Club ed lens, à Bollaert, cha foait froéd dins ch'dos.
Un molet comme ech public dech Football Club ed Liverpool qui cante "You'll never walk alone".

El caleur dech nord. I feut qu’os continuèche ed canter comme o.


Ches canchons sont chu internenette.

jeudi 10 octobre 2013

Pauve tiote !

Unne tiote fille foait du kvau ech merkerdi.
L'eute jour, i i est arrivé un drôle éd tour.

Ale monte chu 'ch bétail qu'i s'met tout seu à galoper. Malur !
Ech kvau,  i court, i court et, comme i ainme o, seute unne barrière. Etpi s'arrête tout net jusse aprés.
Ech tiote, qui n'o p't'ête janmoais prind echl l'avion, vole per dsu. Et pose es man in rtombant au sol.
Bros cassé. Ech kvau n'o rin.

Dins ch'train, i o ed boènes histoéres.

mercredi 9 octobre 2013

Ech destin d'un ouverrier

"J'ouvroais dins unne fabrike et ej m'su dit eq chi ej restoais lo, j'alloais moérir.

Comme j’écrivoais des textes, j'o voulu les vinde. Ch'o mie mèrcher !
Alorss, j'o apprins el musique pour in écrire pour mes textes. Cho s'est mie vindu.
Alorss, ej' me su mis à canter.
Et vlo !"

                ed  Jacques Brel,
Mort ech nu octobe mile nu chint soéçante-dis-uit

Aux Marquises, bourgeois, bigotes, flamandes, viux amants, ech Caporal Casse-Pompon, Madeleine, Fanette, Grand Jacques, Rosa, Jef, Marieke, Jojo, Mathilde, Isabelle, Zangra, Titine et Jacky, rposoai'te in paix.

mardi 8 octobre 2013

Ches cousins

Un tiot-fiu dech taïon dech taïon d'unne taïonne à mi eu un jour, i o miu ed chint ins, t'os comprin, el idée ed foaire unne association ed ches fiux, filles, tiots-fiux, tiotes-filles ed chin taïon et del fanme à chin taïon ; Etpi, ed tous cheux qui naîtroai'te ed ches gins lo.

Ech gars avoait  djo trinte-deus frères, soeurs, cousins et cousines in dis-nu chint. Achteure, i o miu ed quate mile "cousins" din ech monde.
"Cousin", ch'est comme o qu'o s'appéle, in-n'huit, qu'o n'est deus ins o chint-sèt et qu'o fuche cousin par nos pères, nos mères o par ech taïon d'un père et ch'taoïnne d'un taïon d'unne mère.

Echl association est bin gérée et active. T'os un tas ed bénévoles qui rétchupére ches adresses, ches naissinches, ches mèriages, cheux qu'ont défuncté et  ches eutes événemints.  Chi t'os besoin d'unne info, tu leu écris et t'os rade unne réponche.

Tu vos in vagances, tu pux saluer un cousin o unne cousine. Mais t'es mie obligé. T'os un fiu qui pèrte o perpète pour apprinde quéq'cose, t'es rasseuré ed vir qu'i o un cousin mie loin.
Ches mi, t'os unne bistouille, et chi t'os el timps, os pouvons casser unne grainne. Tu vux dormir, os s'arringe.


I ont même invinté un logo eq tu pux coller ach l'arrière de t'voéture o det mobilette pour ête érconnu par ches eutes cousins. Ch'est sympa ; T'intinds un klaxon, ch'est un cousin qu'i t'salue.

I o granmint ed fraternité intér cousins. I feut eq cho continue.

lundi 7 octobre 2013

El deudeuch

I o soéçante-chonc ins in-n'huit étoait présintée el deus kvaus, voéture appelée souvint deudeuch.



Chte voéture à grind succés pouvoait rouler à soéçante kilomètes per eure. Vlo qui froait plaisi al présidente ed ces mneux dont ej causoais sinmdi.

Mi ej me souviens ed deus barres :

- unne, tu l' voés chu el photo, driére ches sièges avant. Avec mes frères, os étoème tiots, os  tnoème édbout tout ech voéyage. Mie ed ceintures.
Qué plaisi ! Din ches montées, os disoème qu'os poussonche ech voéture pour mie détchuler.


- l'eute étoait au mitan dech siège ed drière qu'étoait foait pour deus. Mais, os étoème troès achl époque. T'avoais du mau at tin tchu. Che pour cho, étou, qu'os tnoème édbout tout ech voéyage.




Aprè, i avoait étou ches portes avint qu'is ouvroai'te à l'invers d'achteure, ech bruit ed moteur eq tu rconnaissoais ches ziux fermés, ches phares oronds, ech toét, ches pare-chocs.



Ch'étoait unne bèle voèture, simple ed mecanique ; Cho méritoait une bafouille.









dimanche 6 octobre 2013

Edvinette

Din qué départemint ed France o été prins el photo lo ?



Indice : ch'est ech dsu d'unne caïèle d'église.

Chi tu connoais ech nom dech village, tu pux el donner.


Pour juer, mets et réponche din "commentaire", in anonyme.

Réponche et nom dech gaingnant o gaingnante ech troès novimbe.

samedi 5 octobre 2013

A combin feut-i rouler ?

El présidinte d'unne association ed mneus vient d'annoncher eq chi o rouloait moins vite in voéture, i y éroait moins ed morts (inviron quate chints per in).

Mi, ej dis eq rouler à moins ed soéçante-dis kilomètes per heure, cha pollue plus.

El boène limitation pour foaire plaisi à chte présidinte et ches écolos, cho sroait ... zéro.

Ermerchiemints

Ej vux rmercier ces très nombreux anméritchains, ches assez nombreux ukrainiens et irlindais, ches russes, serbes, alleminds et ech sud-coréin qu'ont érbéyé min site. J'espére qu'i ont tout comprin.

Cros bec à eux.

Ches tiotes annonces dech moés

Ø Onme, trinte et un ins, marié ed pi chonc ins, un éfant ed uit ins, vut chinger ed fanme.

Ø Jonne, vint-troés ins, vind voéture heut d'gamme, keuse qu'i n'o deus.

Ø Vint côtes ed beu frèches, chonc euros ech kilo. Poéyez in liquide.

Ø Pour n' mie avoèr un poste complitché din ville à problèm, onme, vint-nu ins, trache onme o fanme pour PACS.

Ø Onme politique acate, o écange contre missiles, votes pour avoér Prix Nobel del Paix.

Ø Ecologichte cherche eds idées pour dislotcher parti écologichte.

vendredi 4 octobre 2013

Ech Col ed ches Bataillères

Ech Col ed ches Bataillières, in Savoie, deus mille sèt chint quater-vint-sèt métes d'altitude, t'y vos à piés, edpi ech Refuge ed ches Marches, in chonc heures. Ch'est trantchille à foaire.

T'os quate miles métes ed mèrche à pieds et chonc chint soèçante-dis ed dénivelé.


Quin tu kminches, tu vos vers ech sud pindin deus kilométes, ech long'un ruicieu.



Pi, tu tornes chu t'gauche. Tu voéros un bieu et grin lac. Apré, tu dvines ech chemin. Cha grimpe.





Chu ech photo ed gauche, ech col  est au milieu in heut.







Ach col, tu voés ech Mont Thabor o ches lacs d'o tu vnoais, ch'est bieu.

Tu pux étou y foaire unne pause pour minger. Pi, tu rintres ach refuge.


Avin éq tu y voéches, feut qu'ej t’avouche unne tiote cose : I feut étou unne jornée à piés pour atteinde ech Refuge ed ches Marches avin de kmincher el ballade.

Ches roses ed ...




J'o des roses din min gardin ; Rbée cho comme ch'est bieu ! Et, ej pux mie et mette ches sintimints eq t'os din ch' nez .





Un vrai bonnur.





Plaisi pou ches ziux.










I est granmint timps qu’os invintonche el photo in couleur !