Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

lundi 30 avril 2018

I o granmint ed vint

Au matin, ej mé déjoutche, et quoé qu'ej voés et intinds, ech vint.

Granmint ed vint, et des keups, del pleuve.

Ej mé ranmintuvoés qu'i o trinte ins, ech trinte dech moés d'avri étoait un sinmdi, i pleuvoait.

L'étoait adon mie possibe ed laicier unne jonne fanme, moaite d'école, rintrer à s'moaison à bicyclète.

Et j'avoais tchuisiné un watieu ed pain.

I o trinte ins !

dimanche 29 avril 2018

Mingez ed l'ainnieu

Mes gins, ej vos l'dis, o lé rdis, et foaisez-mi fiat, i feut minger del vianne.

Per eximpe, del vianne d'ainnieu.

Bolie, tchuite au four o chu un fu ed bos, l'vianne d'ainnieu est boinne. Avuc du gras conme i feut pour i bailler boin goût.

L'eute jour, j'o ri, vu qu'i péroait qu'ech cros nikdouille ed présidint anméritchin o servi del vianne d'ainnieu pascal à not boin présidint picard.

Ch'étoait alintour dech vint-troés o vint-quat dech moés d'avri.

Et Pâke étoait ech premier dech moés d'avri pour ches chrétiens, et ech uit pour ches orthodoxes.

Don, echl'anméritchin, il o servi ches restes ed chin minger ed Pâke à not présidint !

A moinss qu'echl'ainnieu n'fuche mie pascal ?!

Boin diminche à tertous.

samedi 28 avril 2018

J'o seuvé unne vieille

L'eute mardi, j'ouvroais. Et j'avoais un rindez-vos.

Vu qu'i foaisoait bieu et keud, j'étoais pèrti in avinche.

Et arrivé in avinche.

Adon, j'in profite pour visiter ches alintours, pi em'mette à l'ombe d'unne église.

J'éroais bin ainmé visiter echl'église, mais ale étoait frunmée.

Malureusemint !

Ej foais ech tour ed l'église, et quanq j'érviens à m'voéture, i o unne vieille qui m'apèle :

- "Disez-mi, echt'onme, os pouvez vnir m'rétampir ?"

L'fanme, alintour ed quater-vint ins, vouloait s'appreucher d'unne fernète et n'avoait mie vu qu'i avoait unne fin tiote mèrche dvant.

Et ale avoait tcheu.

Lò dò qu'ale étoait, un mitan muchée, l'fanme sroait p't'ête bin rester chin tchu din ches erbes quèks tans.

Et s'tète au solé.

Don, j'o seuvé unne vieille, et unne vie.

jeudi 26 avril 2018

L'jornée dech cotron

Ech verdi vint dech moés d'avri au vèpe, chu l'cangne ed télé del Picardie, Arte, ej vos in o djò causé, i avoait un film avuc Zabèle Adjani, un boin film lonmé "L'jornée delch cotron".

Ej connoaissoais mie, mais ch'est un fin boin film.

Qu'esplique bin, i m'sanne l'vie din ches binlieus.

A vir, chi os l'avez jonmoais vu, o à rvir.

Malaisié d'ête moaite.

Fin boinne actrice qu'est Zabèle Adjani.

mercredi 25 avril 2018

Prins cho din tes dints

... cros niacoés.

Quanq j'écris cros, ej foais unne tiote berlure : t'es mie cros, t'es énorme.

T'os dit, in octobe deus-mile-dis-sèt, quanq i o ieu echl'accidint durant l'rinconte ed fotbal inter Anmyin et Lile, eq l'étchipe et l'ville d'Anmyin étoai'te des méchants et qui méritoai'te mie ed juer in première division.

Edpi sinmdi, j'o unne méchante nouvèle pour ti : echl'étchipe ed fotbal d'Anmyin vo coèr juer in première division in septimbe.

Fin cros niacoés !

Quanq ej té voés à l'télévision, j'o invie ed canger ed programme.

T'es toudi mawais avuc ches gins.

Ej su seur eq t'os jonmoais jué ach fotbal et t'in causes conme chi.

Tu rsannes ach tchuisinié qu'avoait unne grinde dgife et eq tertous, à pèrt mi, ainmoai'te, adon qu'il avoait jonmoais réussi à tnir unne auberge.

Mawais et méchant jornaleu.


mardi 24 avril 2018

Kmint s'motcher ed ches syndicalisses

Os allez p't'ête mie ainmer.

Edpi quèks smangnes, i o des gins qui manifest'te, et cho foait, conme à chake keup, perde ed l'argint à ches interprinzes concernées.

Verdi, i o un mneu d'interprinze qu'o ieu unne idée : foaire un vote din quèk jours pour savoèr quoé eq vu'te ches ouvreus d'ésn interprinze.

Brin !

Ches syndicalisses n'avoai'te mie prévu ech keup.

Is ont prins un sapré keup ed pié à leu tchu. Quanq j'écris "s'motcher", din ch'tite, ch'est pour rester poli.

Et is n'ont eq sèt jours pour buser.

Ech keup-chi, ch'est ech brin, mais pour eux.

I vole heut, emn article !

lundi 23 avril 2018

Qu'il i voéche

... qu'i gaingne, et qu'i n'rvienche pu.

Lò, ej vos cause dech premier minisse socialisse et frinchoés qu'os avoème i o coèr quèks moés.

J'o intindu, verdi au vèpe, qu'i voudroait edvenir merre ed Bèrcelone, in Espane.

Os avez bin lu : merre d'unne ville d'Espane.

I péroait eq ch'est possibe.

Tant miu pour nos, et donmage pour ches catalans qu'i vu'te edvenir indépindints.

Not ancien premier minisse, il ainme ech cangemint : il o laicié pousser ch'bèrbe, i tchite s'fanme pour sitôt in rprinde unne eute - qu'est unne conmarade à not Présidint picard -, et i vut aller vive in Catalone.

Jou qu'i pourroait inmner avuc li d'eutes socialisses o eds insoumis ?

In attindint, boin corage à Carles et ches catalins.

Ches vrais catalins.

dimanche 22 avril 2018

Jornée ed ches lanchrons

Désolé, tante Marie, ed mie laicier emn article chu ti toute l'jornée, mais j'o unne urginche : ches casi ch'darain jour pour tcheuillir ches lanchrons.

Tcheuillir ches lanchrons, pour foaire del cramaillote, lonmé étou mié ed lanchrons.

I feut qu'i foaiche bieu et keud, et eq ches lanchons fuche'te in bouton,

 et mie in fleurs.


Quanq tu les tcheuilles, tu pux néttier in dsou ; rtirer ech vert. Voés l'différinche chu l'photo d'aprè :


Chi os voéyez des moukes à mié dsu ches fleurs, disez-vos eq chi ch'est boin pour eux, ch'est boin pour vos.

Os avez coèr chonc eures : deus pour tcheuillir, et troés pour oaire sétchir au solé.

Profitez d'avir vos éfants avuc vos.

Ej té salue Marie

... mère ed dis éfants
Mes cousins et cousines.

Achteure, et edpi ièr,
Tin onme est à ches tans.

T'os seuremint brai,
Mais t'es forte,
Et mie toute seule.

Continue d'ête ureuse chu tère,
Pour ches quèks innées eq t'os coèr à vive.

Bec à ti eq j'ainme.

samedi 21 avril 2018

Ech syndicalisse voudroait foaire du cinéma

Judi au vèpe, je rbée ech jornal télévisé avuc min fiu, et quoé qu'os voéyons, ech tiot syndicalisse à guernon.

Min fiu m'dit :

- "Ech père, achteure, irsanne acht'onme qui juoait din ch'film "Ches Tchorisses", ech moaite ed musike, o "Ech Père Noé est unne ordure".

- "T'os dit vrai, min fiu. Ech syndicalisse o keupé ches cavieus, et i i rsanne achteure granmint achl'acteu. Mais il est mie régalant, et i sait mie foaire ed cacouilles."

Ech cinéma pour foaire rire, il in fro janmoais.

vendredi 20 avril 2018

Défrunmez nos gambes

Ch'est quoé eq ches élèves ed Brignoles, din ch'Var, ont écrit dvant leu école pour manifester.

Ches jonnes vu'te pouvoèr mette des cotrons o des maronnes courtes pour moutrer leus gambes, et is vu'te étou pouvoèr mette des kmises chin manke.

 Mais ech réglemint ed leu école l'interdit.

Adon, is manifest'te.

Feut dire qu'edpi quèks jours, i foait granmint bieu et keud.

Et eq ch'est régalant d'ête à l'cour avuc ches tans-lò.

Seuremint miu eq d'ête din ches écoles. O ches trains.

jeudi 19 avril 2018

Berlure à Nîmes

Mardi, à Nîmes, un onme o étè rtruvoé mort din tiot kmin.

L'o étè assasiné.

- "Berlure !" qu'ej dis.

Ej su seur qu'echt'onme qu'étoait visé, ch'étoait mi. Rapport achl'aüre eq j'o ieu i o dis jours et qu'ej vos o conté ech quatore dech moés d'avri.

Ch'est pour ho eq j'ainme miu warder min anonymat.

Bec à vos, et désolé pour echt'onme qu'est mort.

mercredi 18 avril 2018

Echl'ortillon et ches jus picards

Dédé avoait troès anmours din s'vie :

- s'fanme, qu'est em'tante, ches dis éfants, qui sont don mes cousins et cousines, leus cadoreus, fanmes o onmes, et ches tiots-éfants. Qui sont granmint,

- chin ouvrage, ortillon din ches alintours ed Hin, bin aidié per s'fanme et ches éfants,

- ches jus picards. I o eds innées, il o rlinché ches vius jus ed not bèle région din chin village, conme per eximpe, ech ju d'assiète. Deus étchipes lance'te eds assiètes in bos, o plate in bos, alintour ed tchinze chintimètes ed diamète, chu unne tabe. Et feut mie tchair del tabe.

Dédé o défunkté.

Ièr.

D'autchuns n'vont mie ainmer quoé qu'ej vo écrire, mais ch'est unne boinne cose, vu ches ages ed Dédé, et kmint qu'i vivoait edpi quèks innées : avule, et chin chervèle.

Pour ches gins qui l'ont bin connu, ranmintuvons-nos ech Dédé quanq il avoait mie ed mau.

Bec à m'tante, mes cousins et cousines, leus fanmes, leus onmes et leus galibiés.

mardi 17 avril 2018

Juer à qui gaingne-perd

Ièr, j'o jué, et j'o ieu l'freusse ed perde.

Ech ju, eq j'o invinté, chin l'vouloèr :

"Prinde un train qui pèrt edmi-eure avant un eute, mais qu'o tchinze minutes de rtèrd ach dépèrt, et train qui passe pèr unne eute voée. Vouloèr arriver avant ech deusienme train."

Un momint, j'o cru eq j'alloais avoèr perdu unne eure.

Je vnoais d'avoèr invinté un nouvieu ju, "Qui Gaingne-perd".


Quanq j'arrive al station dò qu'ej devoais aller, ech deusienme train o arrivé. Li-étou, il avoait alintour d'un quèrt d'eure de rtèrd.

Achteure, cartchulez !

Trinte minutes d'avinche, puss un quèrt d'eures de rtèrd, puss un détour d'un quèrt d'eure - j'o oblié de vos l'préciser - cho foait eq ches trains arrive'te casi in minme tans al station.

J'o ieu keud.

Et ch'ju "Qui perd-gaingne", os connoaissez ?

lundi 16 avril 2018

Em tiote nièce voéyage

J'o unne tiote nièce, fille d'un boin cousin, qu'est bretonne et qu'est, edpi quèks moés, in Italie.

Et edpi quèks moés, j'o granmint ed pages ed min blog qui sont rbéïées in Italie.

Adon, j'in déduis qu'em nièce ainme min blog, picard !, et qu'ale in foait del réclame.

In Italie.

Merchi ach jonne fille.

Feut dire étou qu'i o miu ed deus innées, j'avoais foait un bieu article chu ch'Beu-dech-tère. Rtornez vir echl'article dech vint-nu déchimbe deus-mile-tchinze.

Quanq à s'soeur qu'est in Allemane, chi ale vut continuer d'erchuvoèr des cartes postales, feudroait étou qu'ale foaiche del réclame. I o mie qu'ech ju del belotte din l'vie.

Minme chi juer à l'belotte in Allemane est fin bin.

Tout conme i juer ach rugby.

Bec à mes nièces, leus frères et leus pèrints.

samedi 14 avril 2018

Djerre et mèriage

"Unne djerre, os i intrez quanq os voulez. Os in sortez quanq os pouvez."

Qu'éroait dit Matchiavel.

Prions !

Prions pour ches jonnes qui vu'te s'mèrier edpi octobe, et qui ne l'sont toudi mie, vu que l'fille est frinchoése, mitan ed sanke picard, mitan ed sanke au muscadet, et eq chin conmarade, qui dvroait edvenir chin onme, est russe. Del mitan del Russie.

Mèriage in févrié ?

Mèriage in marche o avri ?

Achteure, mèriage un jour ?

Bec à m'fille et à chti qui drvoait edvenir min bieu-fiu russe et eq j'ainme.

Prions.

Aler ches ius frunmés

I foait bieu, t'os seuremint invie de t'promner.

Mi, quanq ch'est conme cho, j'os invie.

Minme din ches bos, quanq ech leu n'i est mie.

I o quèks jours, j'o étè à Nîmes pour apprinde des coses. A mn'age, i péroait eq ch'est coèr possibe.

Don, j'étoais à Nîmes.

J'arrive un molet in avinche. Un cros molet in avinche, et i foaisoait bieu.

Adon, ej vos promner. J'étoais din un indroét dò qu'i avoait granmint d'interprinzes. Rin ed fin bieu, mais i foaisoait bieu.

D'un keup, ej su surprins, mais ej voés unne fin bèle et crosse moaison. J'approche un tiot molet, tout in restant chu l'keuchie, rbée deus sgondes et rpèrte.

Unne eute crosse et bèle moaison ! Deusienme surprinse ! Coèr un keup, jé rbée. Deus sgondes.

L'troésienme surprinse est granmint moins régalante : unne voéture appreuche et s'arte à côté ed mi. Chin mneu est un cros onme.

- "Disez-mi, echt'onme ! Quoé qu'os foaisez ? Os vos avons vu rbéïer ches moaisons."

- "Autchun problinme" eq j'i réponds "j'o quarante-chonc minutes à attinde, i foait bieu, adon ej mé promène. Et conme j'o janmoais vnu, je rbée."

- "Os prindez des photos ?" qu'il ajoute.

- "Nan" eq j'i dis. Pour un keup, j'avoais mie min appareil avuc mi.

Echt onme in voéture o rintré à s'moaison.

Et mi, j'o rtorné lò dò qu'ej devoais aller.

A deus-chint-chincante mètes.

I péroait eq vouloèr vir ches permis ed construire ed ches bèlés et crossés moaison est fin malaisié.

Et minme mie possibe.

vendredi 13 avril 2018

Ech pauve merre

... ed Die.

Die ! Os savez dò eq cho s'truvoe  ?

Din ch'sud del Drôme.

A Die, i m'sanne qu'i o pu ed moaison pour l'naissinche ed ches papars. Mais i o coèr un abattoèr, et del clairète.

Pourquoé pauve merre ?

Es merrie l'o étè invahie per des zadisses, o des conmarades ed ches zadisses ed Not-Dame-ed-ches-Landes, village à miu ed uit-chint kilomètes.

Ches zadisses, o leus conmarades, is sai'te berziller et mette ech brin, mais i sanne qu'is euche'te mie d'argint.

O mie assez pour aller à Not-Dame-ed-ches-Landes.

A moinss, étou, qu'i euche'te l'freusse. Bin possibe !

Chi t'os ets ages innui et eq t'es m'fanme, cros bec à ti.

jeudi 12 avril 2018

Echt onme au képi

L'eute jour au vèpe, din unne station dò eq j'attindoais un train pour un keup qu'i in avoait un -, ej foais des photos.

Conme souvint.


Vlò qu'un onme avuc un képi chu ch'tète vient m'vir et m'dit eq ch'est interdit qu'ed foaire des photos din l'station, qu'i feut dminder avant.

Et mi, j'avoais rin dmindé. J'o janmoais dmindé pour foaire unnne photo.

- "I o un réglemint din l'station dò eq ch'est écrit", qu'i m'dit.

Adon, os allons tous deus lire ech fameus réglemint.

- "Lò !" qu'i m'dit.

Mi, ej lis eq ch'est toléré ed foaire des photos, à pèrt chi os êtes un onme d'éto. Chi os in êtes un, ouais, i feut foaire unne dminde.

Mais cht'onme au képi continuoais d'em dire qu'i feut foaire unne dminde.

Ej su pèrti prinde min train.

Et rfoaire unne tiote photo.



mercredi 11 avril 2018

Ch'est toute o rin

Lu : mie unne gin n'lâchero rin.

Conme souvint, ej mé dminde quoé qu'is vu'te dire.

Pour mi, ch'est : "tertout lâchero", vu qu'i o "mie" pi "rin".

Mais ej su seur qu'is vouloai'te dire : "mie unne gin lâchero".

mardi 10 avril 2018

Conme in deus-mile-douse

Os sonmes, innui, ech dis dech moés d'avri.

Et os sonmes un mardi, conme in deus-mile-douse.

Os sonmes don ech mardi dis dech moés d'avri.

Mais in deus-mile-douse, Pâke étoait ech uit dech moés d'avri. Et cht'innée, ch'étoait ech premier dech minme moés.

Mi, j'obliro janmoais ech dis dech moés d'avri deus-mile-douse.

Mais seuremint eq j'obliero chti ed deus-mile-dis-uit.

Un père n'meurt qu'un keup.

lundi 9 avril 2018

Unne bèle fille

Unne bèle fille est passée sur l'keuchie.

Un avule s'est rtorné.

Conme quoé qu'ale étoait bèle, l'fille.

dimanche 8 avril 2018

Unne messe à quarante-sis euros

In principe, quanq ej vos à l'messe, cho m'veut inter chincante chintinmes et deus euros.

A l'tchète.

Des keups, unne pièce ed puss.

Mais i o troés smangnes, cho m'o valu quarante-sis euros.

J'avoais mis un euro à l'tchète, et ches cadoreus m'in ont dmindé quarante-chonc : i sanne eq j'étoais in rtèrd à l'messe et qu'ej rouloais fin rade.

Ureusemint eq ch'est mie tous ches diminches conme cho.

Boinne messe et boin diminche à tertous.

samedi 7 avril 2018

Adé ! Jacques

Os l'avez apprins conme mi, ièr, Jacques Higelin o défunkté.

Boin cancheu, qu'avaoit soéçante-dis-sèt ins d'âge. Miu eq ches viskys écossoés !

Quanq j'o apprins cho, ej mé su dit eq min bieu-frère, Toène ed Nice, alloait écrire quèk cose chu chin blog.

Innnui je rbée, et j'o raison : il o foait unne grinde page avuc pour tite "Adé Jacques" écrit in frinchoés.

Et, conme ej m'in doutoais, il o mis des liens vers des canchons.

Mi, j'o étè granmint surprins d'apprinde qu'ech cancheu étoait mort.

Boinne jornée, quanq minme, à tertous.

vendredi 6 avril 2018

Un onme s'o chucidé

I s'o tiré unne balle din s'tète, et il est mort.

Ch'est trisse.

Mais ch'est coèr puss trisse d'avoèr foait ho dvant s'fanme.

Pauve fanme !

Ale in cause casi janmoais.

Mais l'eute jour, quanq un jonne galibié o prins un fusike  - in plastike - et jué à s'tirer unne balle din s'tète et eq ch'étoait chin dinger, l'fanme o hurlé.

Normal.

Aprè, ale o causé del mort ed sin onme.

jeudi 5 avril 2018

Tiote annonche

"Onme synditché, avuc bèlés guernons, ayant tchitté ech pèrti communisse i o sèse ins et n'ayant pu ouvré edpi troés ins, trache eds idées pour définde ches ouvreus.

Et pour mette un molet ch'brin pèrtoute.

Trache étou ed l'argint pour foaire vive ches conmarades qui impêque ches ouvreus d'aller ouvrer."

Mi, ej vos i invoéyer unne facture.

mercredi 4 avril 2018

I o mie ch'fu ach lac

Qu'is di'te ches suisses.

Et ches frinchoés, et ches gins qui sont mie nikdouilles.

Mais in Inde, is ont - malureusemint - réussi à mette ch'fu à un lac.

A ches alintours ed Bangalore, inter Magali et Malur. Malur, ch'est mie mi qui l'invinte.

Ech lac put asir, à keuse del pollution.

Chimique, l'pollution.

Ch'est trisse ed vive conme cho.

Ej pense à ms'éfants qui m'indjeule'te quanq ej démarre l'voéture granmint ed tans avant ed pèrtir :
- "Pense à l'planète eq tu vos nos laicier !"

Pensons-i.

mardi 3 avril 2018

Sordeus et muet

A pèrtir d'innui, et pour troés moés, vu ch'brin qu'em met'te ches mneus ed trains pour qu'ej voéche ouvrer, ej croés qu'ej vo ête sordeus et muet quanq un contrôleu dmindro min ticket.

Et in puss, ej comprinds mie ch'frinchoés !

Quanq os savons qu'i o alintour ed chint-chincante-mile gins qui ouve'te pour ches trains - is sont mie tertous mneu ed train - , et qu'i in o alintour ed dis-uit pour chint qu'is sont synditchés, cho vut dire eq moinss ed vint-sèt-mile gins met'te ch'brin pindint troés moés din toute l'Frinche.

Brin !

A vos qui, conme mi, prindez ch'train, fuchez sordeus et muet.

lundi 2 avril 2018

Os allons ed bistintchuin

Quanq j'écris cho, ej vux mie dire lò qu'os mèrchons mie droét, mais qu'i o des keups, os sonmes mie logiques.

Lisez !

L'eute smangne, ch'étoait ech merkerdi, os rindons honmage à unne vieille fanme qu'o étè assasinée, vu qu'ale étoait juive.

Ej précise eq ch'est mie obligé qu'ho fuche un assasin pèr des racisses. Mais vu qu'el fanme étoait juive, ches assasineus s'sont dit qu'ale avoait granmint d'argint. Qu'is ont voulu i agriper.

Don, merkerdi, honmage à unne fanme juive assasinée.

Et à pèrtir ed judi, os avons fèté l'cruchifichion ed Jésus, roé ed ches juifs.

Os m'avez comprins ?!

Din côté, os sonmes trisses qu'un juif, l'vieille fanme, fuche tué, et ed l'eute, os sonmes ureus.

dimanche 1 avril 2018

Falloait bin acouter

Innui, ch'est Pâke.

Adon, l'eute diminche, ej vos in avoais causé, ch'étoait l'messe ed ches rameaux.

Et à l'messe ed ches rameaux, i o quat o chonc gins qui li'te insanne l'Passion dech Christ.Chi os savez mie, rbéïez chu internénet.

Et l'eute diminche, i péroait eq din un tiot village ed Bourgone, unne fanme, qui lit fin bin, o foait unne berlure.

Feut dire qu'ale o lu alintour ed douse à sèse minutes.

Adon, unne seule berlure, ch'est rin.

- "Qué berlure qu'ale o foait ?" qu'os avez invie d'em dminder.

Ale o confondu un keup Pilate avuc pirate.

Ches connaisseus diront p't'ête qu'il in étoait un ?! Mie seur.

Boinne fète ed Pâke à tertous.

Soin : ch'est mie un pichon d'avri qu'ej vos conte.