Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

vendredi 31 juillet 2015

Télé picarde

J'avoais janmoais maginé, mais i o  unne boinne chainne ed télé qu'est picarde, eq granmint ed monde connoait chin l'savoèr : Arte.

Arte ... ed pinser eq ches picards pu'te mie gerer unne télé,
Arte ... ed rbéïer des niaiseries chu ches eutes chainnes ed télé,
Arte ... ed vouloèr vir des films din unne langue eq tu connoais.

Arte, chainne picarde, ett'passe des films in frinchoais, in inglés, in allemand, in japonais o eute.

Pèr eximpe, judi au vèpe, i avoait "ches sèt samouraïs", film japonais ed mile-nu-chint-chincante-quat et d'Akira Kurosawa. Samourais est un mot japonais qu'ej traduirai pèr définseu fort.

Ech conte : 
Din un tiot village, des poéyisins sont malureus vu eq des agripeus leu agripe'te tout, et des keups, leu font du mau. Alors, un jour, is appelle'te des définseus forts. Et sèt accept'te, minme chi i o rin à gaingner, simplemint pour aidier ches poéysins.
Ches définseus vont leu apprinde à s'définde et les aidier à s'definde conte ches agripeus.

Tu rtruvoes ech minme conte, in Anméritche, in mile-nu-chint-soéçante, avuc pèr eximpe, Eli Wallach et Yul Brunner. Li, il éroait pu juer din ches deus films, vu s'dgife.

Un eute fin boin flim japonais à vir est Kagemusha, ed mile-nu-chint-quater-vint. Coèr un conte ed définseu fort.

Os sonmes in étè, p't'ête in vagances. Alorss, chi un jour i pleut, rbée un ed ches troés films.

O rbée Arte, in pinsant à ches picards.

jeudi 30 juillet 2015

Causons ed Paris

... lò ò mes pèrints ess sont ainmé granmint, comme font tous ches onmes et fanmes qui s'ainme'te granmint, ech premier keup.

In vrai, ch'étoait mie mes pèrints.

Et ch'est mie à Paris in Frinche.

Ch'étoait ches pèrints ed Travis et Walt, et ch'est Paris à ch'Texas.

Paris, Texas , un fin boin film qu'est rpassé à l'télé ièr au vèpe, avuc des fins boins et bieus jueus ed film. Film ed Wim Wenders, ed mile-nu-chint-quater-vint-quat et qu'o ieu ech prix dech festival ed Cannes l'minme innée.

A vir pour ches gins qui connoai'te mie.

Mi, j'os ieu du mau à comprinde, vu eq ch'étoait mie in picard et i m'sanne minme eq ch'étoait mie in frinchoais, mais j'os comprins rin qu'à vir ches images et acouter ech musique, fin boinne étou.

mercredi 29 juillet 2015

Pour comprinde Karl Marx

Deus gins boi'te un keup insanne. I n'o un qui vut esplitcher ech Capital ed Karl Marx à l'eute.

- "Magine !" qu'i dit, "eq t'ouvres din unne interprinze.  Quanq t'arrives au matin, t'os quèk cose qui veut un euro. Et au vèpe, quanq tu rpèrts, t'os bin ouvré, et ho veut sèt euros."

- "Pour mi ?!", dit l'eute.

- "Ouais ! Mais, à qui appèrtient echl'interprinze ? Ho, ha veut un euro.

Etpi, feut poaiyer ches gins qui surveille'te ches ouvreus. Ej rassatche coèr un euro.

Apré, echl'interpreneu, i vut investir din d'eutes interprinzes o din des moaisons ; deus euros ed moinss.

Il ainme étou boère dech champagne et aller vir des filles. Deus euros."

- "Et bin ! i o pu qu'un euro !" dit ech pauve gins.

- "Soin !", dit l'eute, "echl'interpreneu  les met à l'banque".

- "Alors, i o rin pour mi ?!"

- "Chi ! A poaiyer ech keup à boère." dit ech conteu. Et i chin vo.

Comme quoé ech philosophie put ête aisiée à esplitcher.

Pour min fiu.

Becs.

mardi 28 juillet 2015

Un eute présidint

I o quèks smangnes, not présidint d'achteure o dit  eq chi ech nombe ed gins à joke n'diminue mie avant deus-mile-dis-sét, i sro mie candidat pour ête coèr un keup présidint.

I sro mie candidat.

Adé !

lundi 27 juillet 2015

Invie ed bisir

I foaisoait bieu l'eute smangne, à Reims. Alorss, unne jonne fille ed vint-et-un ins, mes nièces in ont vint et vint-deus !, o ieu invie ed se mette in maillot ed ban deus pièces et d'bisir din un parc.

Mais chonc jonnés filles qui passoai'te à cht'indroét lò ont truvoé ho mie correct. Alorss, is i ont dit pi i ont chambutché dsu.

Chonc jonnés filles !?

Kmint est-i possibe in deus-mile-tchinze ed pinser comme ho, et surtoute, d'ête méchante comme ho ?

Pour manifester, mi ej pinse eq merkerdi, fuche unne smangne apré ches keups, os dvroème sortir mer-nud.

dimanche 26 juillet 2015

Conte scret del crucifixion

...dech Christ comme che l'conte'te ches gitans assimblés alintour d'un fu, quanq is rimpaille'te des caïèles  et déplunme'te des glinnes.

Comme os sonmes diminche, minme chi h'est mie Pâke, causons dech Christ.

Conte :

Ach jour ò ches romains ch'apprêtoai'te à crucifier ech Christ, troés gitans passoai'te pèr lò.

Ech premier, indigné pèr ech spectake, s'esclame :
- "Chu t'vie, romain ! tu t'apprêtes à cleuer ech paume dech man d'un onme ! Ech paume d'un onme est chin bin est puss précieus. Pèr ho, il aflète ech cadoreuse, porte ech keupe à ches lipes, et soutient ech fiu et ch'père. Os-tu mie ed tcheur ?"

Mais ech romain n'avoait rin foaire ed ches réclamations dech tzigane. Il étoait otchupé à sortir troés bieus cleus ed chin so. Chin rbéïer echl'étringer qui i causoait, il i répond in maugréant :
- "Vos vir eute pèrt !"

Alorss, ech deusienme gitan , esn âme soulvée pèr echl'odieus supplice, rprind :
- "Chu t'mère, romain ! tu t'apprêtes à cleuer ches deus paumes dech man d'un onme ! Et kmint qu'i pourro alorss laver chin déshonneur in poégnardant ech parjure ? Os-tu don mie d'esprit ?"

Mais ech scond romain avoait mie puss ed tcheur et d'esprit qu'ech premier. Tout otchupé à sortir chin martieu dech chinture, il le soupesoait din ech crosse man, et chin prinde ed peine à rbéïer chti qui i causoait, dit :
- "Vos vir eute pèrt, o os appellons ches cadoreus."

Alorrs, ech troésienme gitan, chin esprit révulsé pèr ech spectake, intervient à chin tour. I causoait à ch'troésienme ed ches carpintiers qui ouvroait à ch'pié dech croéx posée pèr tère.
- "Chu tes morts, romain, tu t'apprêtes à cleuer ches piés d'un onme ! Et kmint qu'i pourro apré mèrcher, frinchir ches frontières et dépasser ches bornes ? Vux-tu don in foaire un sédentaire aotché à ches tères ? O est t'sagesse ?"

Ech troésienme romain n'avoait mie ed tcheur, d'esprit et d'sagesse, mais il avoait du grade. Atchaparé qu'il étoait pèr l'tâche ed maintnir ech Christ chu chin bo ed supplice, i berdloait din ch'bèrbe :
- "Vos vir eute pèrt o os appelons ches cadoreus. Mais avant, os asirons vos roulottes."

Alorss ches troés frères s' ruoai'te chatchun chu un cleu et is sont mis à courir, à ch nez et ch'bèrbe ed tous ches gins.
Et p't'ête qu'is cour'te coèr achteure qu'ej té cause dech conte lò.

Morale dech conte :
I put i avoèr del moralité à agriper.

Conte et morale prins din ch'live "ech soudure", d'Alain Guyard.

I n'impèque qu'ech Christ o bin été crucifié. Ches romains avoai'te don d'eutes cleus din leu so !

Boin diminche à tertous.

samedi 25 juillet 2015

Ches bieus cols

Connaois -tu bin ett géographie ?

Jou ches noms ed Col du Galibier, Col de l'Iseran, Col dech Mont Cenis, Col du Glandon o Col dech Croéx ed fer t'di'te quèk cose ?

Mi, ej connoais.

In vrai, ej connoaissais ches noms, mais pour ches deus darains cols, ej savoais mie ò qu'is étoai'te.

Achteure, in rbéyant ech Tour ed Frinche ed bicyclète et chu unne carte ed géographie, j'os vu. Ech premier est inter La Cambe, in Savoie, et Grenoble.
Ech deusienme est inter Saint Jean ed Maurienne et Grenoble étou, à quèks chintainnes ed mètes dech premier.

I o unne cose ed bin din ch'Tour ed Frinche ed ches bicyclètes, ch'est ches bèlés images et pour apprinde ech géographie.

Ej pinse étou à min bieu-frère qu'ainme ho, mais qui court à piés.

Mi, j'os bin ri quanq j'os apprins eq des gins attindoai'te ech Tour ach Col dech Galibier et étaoi'te surprins d'ête tou seu ; Ech Tour o cangé ed parcours.

vendredi 24 juillet 2015

Un boin poéyisin

Un conmarade à mi o un eute conmarade qu'est poéyisin.

Et ch'poéyisinlò, qu'o une fanme et deus o troés éfants, o unne tiote cinse, avuc unne vintainne ed vakes.

Il ouvre.

Mais, i rconnoait qu'il rchuche, tous ches ins, alintour ed tchinze-mile uros ed primes ed l'Urope. Alorrs, avuc ho, i pèrt in vacances din ch'monde, tous ches ins. Li, ch'fanme et leus galibiés sont ureus.

Alorss, quanq j'intinds ches eutes, avuc soéçante, quater-vint o miu ed vakes, s'plainde, ho m'baille des saprés maus ed panche.

jeudi 23 juillet 2015

Moérir à chincante-chonc ins

... malureusemiont, cho arrive. I o des maus eq ches séruzyins sai'te coèr mie djérir.

Malureusemint !

Mais moérir à chincante-chonc ins quanq t'ouvres et eq d'un keup, des poéyisins t'impêque'te ed foaire quoé eq t'os à foaire, ho devroait mie arriver.

Mais ch'est arrivé, ièr, din un tiot village del Loère.

Ho n'impêque mie ches poéyisins ed continuer à mette ech brin, comme chi rin enn s'étaoit passé.

Brin.

mercredi 22 juillet 2015

Grumeautique

Ch'est mie un mot picard, mais ech nom d'un blog eq min bieu-frère m'o faoit connoaîte et eq j'ainme granmint. Ej vux foaire innui del réclame pour ech blog lò, et pour t'foaire vir ed bèlés coses.

Ch'est unne fanme qui tient ch'blog.

Quanq t'arrives chu ch'blog qu'o pour vrai nom "tiot précis ed grumeautique", tu dmindes ò t'es. I o unne tiote fille qui foait unne crosse grimache, etpi i o écrit :
"Os intrez in république bananière et autoproclamée ed Grumeauland".

Alorss, tu rbées ech'reste dech blog. Et tu voés des dessins, qui sont, slon mi, fin bieus. Qu'ej mé dminde minme kmint qu'ale foait des dessins comme ho chu un ordinatur, l'fanme.

Chu chin blog, ale conte l'histoère ed ches galibiés et ed chin cot Bouboule. Tu ris granmint.  Vraimint régalant à vir.


Tu connaois mie grumeatique et tu vus démucher, alorss tape grumeautique chu internenet et tu voéros.

Boinne lecture.

mardi 21 juillet 2015

Souvnirs d'un voéyage in Grèce

- "Ches grecs kminde'te ; ches albanais ouvre'te."

Qui dit min conmarade.

- "Chi tu m'poaiyes avuc ed l'argint et mie avuc un chèque o unne carte bleuse, tu m'poaiyeros mie ches taxes", qu'i di'te ches grecs, à ches touristes.

Qui s'ranmintuvoe unne conmarade.

Os sonmes bin pèrtis !

lundi 20 juillet 2015

D'in heut ed ches Gorges dech Tarn

... mile sièkes vos contimple'te.

Qu'os pourroème dire.

Miu eq Napoléon et ches pyramides d'Egypte

Mi, sinmdi, dech heut ed ches Gorges dech Tarn, j'os picié. J'étoais tout seu.

Mais i péroait qu'in bos passoai'te ches coureus dech Tour ed Frinche edbicyclète et qu'un gins tout ed ganne vétu o prins m'pice din ch'djife.

Qué canche ! L'pice est un produit naturel. Magine eq j'os rinversé des drogues qu'ech séruzyin m'éroait baillées à prinde ! Put ête dingéreus pour li, et i foaire granmint ed mau, li qui foait du sport, qui boét de l'ieu et minge eq des boinnés coses dech nature.

Etpi, l'pice est ganne. Comme ech kmise.

Des gins pinse'te eq j'ainme mie ech coureu lò.

Buse.

Pour ête mawais, dech heut ed ches Gorges, j'i éroais lincié un cros cailleu. I in avoait granmint, et l'étoait aisié d'in pousser un. Ej l'os mie foais. Don, ej su mie mawais.

Foais quanq minme soin à ti chi tu viens amon mi avuc unne kmise ganne et unne bicyclète.

dimanche 19 juillet 2015

Chu ch'Tour ed Frinche

Foaire unne pèrtie dech Tour ed Frinche ed bicyclète in voéture avuc ches coureus put ête régalant.

Mais faoire ho ièr, inter Rodez et Mende, pour annoncer kmint foaire plaisi à ches poéyisins, ej comprinds mie.

A moinss qu'il o prins ches coureus pour des bus !?

Din ches bèlés Gorges dech Tarn, eq j'ainme granmint, i aller et causer tourisme éroait étè bin miu.

Mais avuc ech présidint qu'os avons, rin m'surprind achteure.

Et ej pinse bin eq ches gins vont acater del vianne puss tchère alorss qu'is gaingne'te moinss d'argint.

samedi 18 juillet 2015

Causer ed train ch'est bin

... mais les vir, ch'est miu.

Alorss, edpi ches tans eq j'in cause din mes articles, ej vos t'mette innui quèks photos. T'os p't'ête janmaois vu un train comme mi jé l'voée.














Un bieu-frére, minme bin régalant, m'dit toudi eq j'os eds saprés manières ed foaire ches photos.

Pour foaire unne bèle photo, i feut rziuter, ch'raboaicier, attinde, des keups, rkmincher, et surtoute, avoèr un appareil photo quanq i feut. Din t'poke.

A ti ed juer.

vendredi 17 juillet 2015

Tiot père

T'es né d'un père et d'unne mère
Qui pinsoai'te eq tu pourroais
T'débrouiller tou seu.

A chonc ins,
Tu dvoais t'laver tes cavieus,
Tou seu.

Achl'école,
T'apprindoais tes lçons,
Coèr un keup tout seu.

Alorss, à trése ins,
T'os prins tou seu,
Ett'vie inter tes mans.

T'os arté d'aller achl'école,
Foais des cacaouilles
Qu'étaoi'te des crossés berlures

T'os alorss prins
Des keups ed piés à tin tchul,
Pèr ches cadoreus.

Pi, t'os vétchu
Avuc mie grind cose ed boin,
Et tu vis coèr.

Ureusemint !
Etn espérieinche del vie
Sert innui à d'eutes. 

Os ainmeroème
Eq tous ches gins fuche'te
Ureus ed vive.

Os ainmeroème
Eq tu fuches ureus ed vive,
Tiot père.

jeudi 16 juillet 2015

Deus cacouilles à unne boulindgère

Nu eures dech matin.

- "Bojour mdame ech boulindgère, ej voudroais un pan."

- "Bin tchuit o mie granmint tchuit ?"

- "Un pan dech jour, chi possibe." (première cacouille ; enn mie rire quanq tu dis ho.)

- "Ej vinds mie ed pan d'ièr !"

-  "H'est bin. Mi, ej n'os coèr un d'ièr. L'erprindroètes-vos ?" (deusienme cacouille.)

I o des gins, drière ti, qui ri'te.

Ti, tu poaiyes tin pan, et tu pèrtes.

Pi tu ris étou.

lundi 13 juillet 2015

Un tatouège din ch'dos

Unne nouvèle jonne fille ouvre avuc mie edpi deus smangnes, et pour deus moés.

L'eute jour, i n'o un qui i dit :
- "T'os un bieu tatouège din tin dos."

- "Merchi !", qu'ale i répond.

Et mi, j'i dminde :
- "Tu t'l'os foais ti-minme ?"

Ale buse un molet pi m'dit :
- "Euh ! Nan ! Ch'est mie possibe."

Apré, j'i os dmindé étou chi ale connaissoait l'canchon ed Renaud avuc un gins qui vouloait un tatouège, din chin dos, d'un aigue à ches ailes déploéyées et qu'i avoait mie ed place pour foaire ho, alorss, il o ieu un moinieu ed tatouer.

L'jonne connaissoait mie. P't'ête minme qu'ale connait mie Renaud ?!

dimanche 12 juillet 2015

Unne jonne fille ureuse

Pour un keup, minme in ayant troés filles, ej vux vos causer d'unne eute. Unne fille avuc qui j'os ouvré quèks moés, i o sis ins. I m'sanne qu'ej t'in os djo causé i o quèks moés.

L'eute jour, ale o évnu à chl'interprinze nos dire un tiot bojour et bir un keup. Feut ch'qui feut.

Ale o arté d'ouvrer i o deus moés, n'rchut mie d'argint, vu eq ch'est ale qu'o tchitté esn interprinze, et attinds un papar pour janvié.

Tu t’intchiétes ? Feut mie ! Ale est fin ureuse. Qu'ho foait plaisi à vir !

- "J'os été granmint ed tans à ches écoles pour achteure pouvoèr coésir ed foaire quoé eq j'os invie. Ed l'argint, j'in os un molet."

Vraimint ureuse.

samedi 11 juillet 2015

Min nveu m'o djéri

Avant ièr, j'étoais toudi un gins intchiét. Edpi ièr, j'os mie ech problinme ; min nveu m'o djéri.

Un eximpe.

Quanq ej voéyageoais in voéture et qu'ej m'artoais, ej frunmoais ches portes ed voéture à clés et ej prindoais emn argint chu mie.

Mais ièr, j'os voéyagé avuc min nveu, et quanq ej m'o arté, j'os mie frunmé ches portes à clés.

J'os minme laicié un message pour ches gins :
"L'voéture est mie frunmée. Enn berzillez mie ches fernètes. Echl'argint est din ch'coffe."

J'os mie écrit chu mot eq din ch'coffe, i avoait troés cros tchyins. Ho s'voéyoait.

Merchi, min nveu !

jeudi 9 juillet 2015

Premier voéyage in train

Edpi ches tans ò tu lis mes contes chu ch'blog, tu sais bin qu'i o granmint ed tans qu'ej prinds ch'train. Min premier voéyage, ej m'in ranmintuvoe mie.

Mais avant-ièr, j'os rincontré din ch'train unne jonne fille, alintour ed dis-uit o vint ins, qui prenoait ech train pour chin premier keup.

Qué vie !

Ech train tcheut in panne.


- "Jou unne panne d'échince ?" qu'ale dminde, l'jonne.

- "Nan !" eq j'i réponds

- "H'est unne creuvaison", qu'ajoute min voésin.

- "Nan ?!" qu'ale dit.

Ale buse un molet pi dit :
- "i o mie ed pneus, à ches trains."

Os avons tertous ri. Minme ech jonne fille.

mercredi 8 juillet 2015

Un jour viendro

... ò j'arrivro à avoèr ech boin compteu ed voèture.

L'eute jour, j'os ieu chint-quater-vint-sis-mile-sis-chint-quater-vint-un kilomètes, bieu nombe, bin symétrique. Et j'l'os bin vu.

Alorss ?!

Alorss, il étoait , timpe au matin, sis eures onze minutes. Et ej pouvoais mie m'arter chonc minutes ; j'avoais min train à prinde.

Donmage !

Ech prochain keup, p't'ête.

Coèr raté !  Chint-quater-vint-sét-mile-sét-chint-soéçante-dis-nu kilomètes, pi, chint-quater-vint-sét-mile-sét-chint-quater-vint-deus kilomètes.

Ej warde espoèr.

mardi 7 juillet 2015

Ech diagonale dech nikdouille

Ch'est fin boin film ed mile-nu-chint-quater-vint-quat, avuc Michel Piccoli, chu deus jueus d'échec. Din ch'flim, ches deus sont russes, mais i n'o un qui vut aller à l'Ouest.


Ho rsanne à ches pèrties inter Garry kasparov et Anatoli Karpov, tous deus russes, qu'ont foait chint-quarante-quat pèrties d'échec inter eux. Garry n'o gaingné vint-et-unne et Anatoli, dis-nu. Pour ches chint-quat eutes pèrties, i o mie ieu ed gaingnant. A ch'ju d'échec, h'est possibe.

Ches daraines rincontes ont étè un championnat dech monde inter octobe mile-nu-chint-quater-vint-quat et févrié mile-nu-chint-quater-vint-chonc. Mené chonc à zéro, Kaspartov étoait rmonté, pi, mnoait. L'pèrtie inter ches deus jueus o étè artée !!!!!

Révnons à ch'film ! Chi tu l'connoais mie et eq t'os granmint keud achteure et invie ed mie sortir dèhiors, rbée-le.

Soin à ti quanq i foait keud !

lundi 6 juillet 2015

Ale est lò

..il est pèrti.

Un eute diminche, il est érvénu,

Etpi, un troésienme diminche, eux ouvre'te.

Ech quatrienme, is ouvre'te mie mais ech tiot est in vagances.

Din un moés, l'eute est à achteure à quat-chint-chincante-quat kilomètes.

Din sis smangnes, is pouvoai'te tous ête à l'moaison, mais mie nos. Os avons ech droét d'ête, des keups, inviter, avuc o chin nos éfants.

Etpi, os avons truvoé unne date. Din un tiot molet moinss ed deus moés. Mais ch'est granmint miu eq rin. Rin edpi un in, rin avant combin ed tans pour unne eute rinconte avuc tertous ?!

Profitons bin ed ches momints insanne. Qu'is fuche'te boins.

Chi t'es din ches iles et eq t'os tes ages innui, cros bec à ti, et à tin cadoreus.

dimanche 5 juillet 2015

Manière ed vive

J'os mie ech tans.

- "Os avonc tous ech minme tans, mais os l'utilisons mie del minme manière", ed min fin boin conmarade Ernest, mort i o quèks innées, et qui m'o apprins ho i o trinte ins.

- "Ches uropéyins ont des montres à leu bros, mais ch'est ches afritchins qu'ont ech tans", eq m'o dit un tchuré, afritchin. Ect tans ed vive.

Chi t'os tes ages innui, cros bec à ti.

samedi 4 juillet 2015

Keuffer unne moaison

Achteure, tu keuffes rin ; t'moaison est quanq minme keude. P't'ête granmint keude ?

Mais un ivèr, ch'est obligé, tu keuffes o vux keuffer  t'moaison, o tin appèrtemint.

Et des keups, tu keuffes granmùint mais i foait sése o dis-sét degrés seulemint. Et t'os froéd.

Alorss, i feut isoler t'moaison, o tin appèrtemint. Tu foais ho achteure, in étè, in vagances.

Et in ivèr, tu keuffes, et ch'keup chi, t'es ureus : t'os keud, dis-nu o vint degrés, et tu foais eds économies.

Mais tu truvoes eq tu sros miu avuc vint-un o minme vint-deus degrés. Alorss, t'augmintes ech keuffage pour avoèr ches boinnés timpératures.

Mais tu perds ches économies eq tu pourroais foaire.

vendredi 3 juillet 2015

Grimper puss heut

Tu pux :
- Grimper chu unne caïele,
- Grimper un escaïer,
- Grimper din un abe.

Et aprè ? Grimper din deus abes n't'inmne mie puss heut qu'ed grimper din un abe.

Mais tu pux foaire ed l'escalade.

Et lo, tu pux t'éclater. Et bonnur, o in tchèsant, minme chi ech deusienme est à éviter.


H'est mie toudi aisié d'arriver in heut . Ho ch'apprinds, chu eds innées.





Mais un jour, tu i arrives. Et t'es granmint ureus.

Fuche ureus, ech deschinte est granmint puss aisiée et puss régalante.


Boinne canche, et boin plaisi.

Soin ! toudi ête deus pour foaire ho, avuc un qui connoait granmint ches gestes ed prudinche.

jeudi 2 juillet 2015

Saprés résultats ed concours

Magine eq tu vienches ed passer des concours.

Ches résultats annonche'te eq t'es dis-uitienme chu sis-chint-sése. H'est bin !

Achteure, magine quoé qu'ho froait chu unne classe ed trinte-troés ! Tu sroais zéro virdjule neuvienme chu ches trinte-troés, don, avant ech premier.

!!!!

Ho t'foait buser d'apprinde ho ? Alorss buse.

Mie ed berlure, ch'est unne règue ed troés, et ch'est min frère qui m'l'o dit. Merchi à li.

J'ainme ches cartchuls.

mercredi 1 juillet 2015

Keuchètes moinss tchères

Ièr, chu internenète, j'os érchu unne réclame pour acater des keuchètes moinss tchères.

Qué boinne cose !

Timpe au matin, i avoait trinte-deus degrés à l'cour. Alorss ! Ches keuchètes, is pu'te coèr réduire leus prix pour eq j'os invie d'in acater. Vu qu'is pu'te mie diminuer ches degrés pour m'bailler l'invie d'in mette.