Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libe d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

jeudi 30 juin 2016

Unne nouvèle impriminte

Lò ò q'j'ouvre, os avons edpi un moés ed nouvèlés imprimintes.

Pour imprimer.

I o eds innées, tu prindoais unne feuille, tu l'mettoais chu chl'impriminte, appuyoais chu un bouton et t'avoais ett copie.

Aprè sont apparues eds imprimintes erliées à ches ordinatures pèr internénet. Edpi tin ordinature, t'invoées tin documint chu chl'impriminte et tu pux minme aller tracher quanq t'os invie.

Nos nouvèlés imprimintes sont conme ho. Mais in puss, ech tableau ed bord rsanne, li-étou, à un ordinature.

Mi, ej pinse qu'i feut avoèr apprins chonc o sis ins aprè ech baccalauréat pour pouvoèr utiliser ches machines lò. Et os avons mie unne gin pour nos esplitcher kmint chin servir. Qué brin !

O-jou qu'os allons et quoé qu'os allons édvenir ?

Vivemint ches vagances !

mercredi 29 juin 2016

Ches nouvèles régions

Ch'est foait : toutes ches régions ed Frinche ont un nom. Et quanq i o ieu du cangemint in déchimbe, ales ont un nouvieu nom.

Neurmindie, tertout comprinds ò eq cho s'truvoe. In Neurmindie.

Heuts-ed-Frinche, malureusemint tertout in o intindu causé, vu eq ch'o été l'première région à canger ed nom. Et qué nom !

I o deus nouvèlés régions qu'ont mie cangé : Bourgogne-Frinche-Comté, et Auvergne-Rhône-alpes. Mais ho foait des noms à rallonge. Ho deviendro seuremint, conme PACA, BFC et ARA.

Aprè, i o ech'Nouvèle Aquitaine. Quanq t'es ed Bressuire o Bellac, tu t'sins bin nouvieu aquitain.

Pour définir ech tiot article, i feut causer ed l'Occitanie, et dech capitale régionale qu'est Toulouse.
I péroait eq ches gins ed Sète o Langogne n'sont mie des occitans. Chi tu rbées chu internénet, ch'est in vrai p't'ête, aprè l'Neurmindie, ech nom qui vo l'miu à unne nouvèle région.

Feut achteure coésir kmint qu'os allons lonmer ches gins qui vive'te din ches nouvèlés régions. Boin corage. Os allons surtoute rire.

mardi 28 juin 2016

Mes keuchures

... ont des lacets.

I o quèks moés, j'os ech lacet del keuchure ed droéte qui s'berzille. Vu kmint eq ch'étoait, j'in o wardé un beu pour l'laicier attaché à m'keuchure. In mettant ech lacet din un treu ed moinss.

Tout alloait fin bin.

L'eute jour, coèr un keup, ech lacet del minme keuchure qui s'berzille. Toudi rin ach lacet del keuchure ed gauche ?!

Ej croés qu'ej vos m'plainde à ch'vindeu ed lacets, vu qu'i dvoait i avoèr un défeut.

Quoé qu'os in pinsez ?

 Pour ho, feut eq j'ertruvoe min titchet ed tchaisse.

lundi 27 juin 2016

Pauve malureuse

... qu'est ech reine d'inglétère.

Et ouais ! Edpi judi, l'reine vo perde alintour ed chonc-chint-mile euros pèr in.

Kmint eq ch'est possibe ?

Ches inglés ont décidé ed tchitter l'Urope. In vrai, is tchit'te o vont tchitter l'Communauté uropéïène. Et don abindonner ches aides uropéïènes.

Et l'reine d'inglétère, minme chi ale est reine, ale o unne cinse. Unne sapré crosse cinse, avuc des cans, des berbis, p't'ête des vakes. Chin causer del pouldinde qu'est l'fanme ed chin fiu.

Avuc unne cinse, din l'Communauté uropéïène, t'os l'droét à eds aides.

Pour l'reine, ho foait alintour ed chonc-chint-mile euros pèr ins. Ed quoé vive, qu'i m'sanne.

Ej mé dminde chi ches inglés, ch'est mie pour ho qu'is ont voulu tchitter l'Urope : pour imbêter leu reine.

In vrai, l'reine, vu ches ages, ho vo mie l'imbêter granmint. Ech puss malureus lò-ndan, ch'est chin fiu : i sro p't'ête janmoais roé, et il éro mie echl'argint ed l'Urope. In puss, avuc ches éreilles, i put mie foaire ed réclame.

Ech général Ed Gaulle, lò ò il est, doét ête, li, ureus.

Adé !

J'ajoute qu'i feudroait qu'echl'étchipe ed fotbal perde.

dimanche 26 juin 2016

Fu ed St-Jean

L'fète del St-Jean est foaite pour fèter ech début ed l'étè, et ches moédeus qui vont ête foaites quanq i fro bieu et eq ches blés sront boins à keuper.

Edpi granmint ed sièkes, ches gins font, à l'St-Jean, un grind fu. Is sont granmint, rbé'te ech fu, et cant'te.

Os avons foait ho verdi, au vèpe.


I foaisoait granmint bieu.


Aprè, pour éteinde, mie ed problinme : os avons ieu un sapré hernu.

Granmint ed souvnirs pour tertous. Des bin, et des moinss bin.

samedi 25 juin 2016

Un kilomète sis-chint

Ch'est l'distinche qu'ont parcouru ches gins qu'ont manifesté judi à Pèris. Ch'étoait unne abouke, contrairemint à ches eutes keups : tu pèrs ed lò, et t'i rviens.

Et contrairemint à ches eutes keups, i o mie ieu ed coses berzillées pèr des berzilleus.

Et ureusemint !

I avoait deus-mile cadoreus pour surveiller.

Foait un cartchule : i avoait miu d'un cadoreus pèr mète à parcourir. Is pouvaoi'te ête au tcheude à tcheude. Chi tu n'os mie un qu'est un molet cros.

Ej pinse eq ches gins qui manisfestoai'te n'pouvoai'te mie intrer o sortir chi ches cadoreus enn le vouloai'te mie.

Et ch'est pour ho qu'il n'i o rin ieu ed berziller.

Fin bin.

Mais din d'eutes indroéts, i avoait mie ed cadoreus. Is pu'te mie ête pèrtoute d'un keup. Fin donmage.

vendredi 24 juin 2016

O-jou eq j'ouvre

J'os intindu merkerdi eq ches ouvrages pour ech futur chinte d'atcheuil humanitaire à Paris avoai'te kminché. Mais echl'indroét est wardé scret. Un indroét pour chonc-chint à mile gins, wardé scret ?

Magine !

Tu doés aller ouvrer, t'es ureus, mais tu sais mie ò eq ch'est. Fin malaisié pour t'i rinde. O tu sais mais tu pux rin dire à t'fanme et tes éfants et tes conmarades.

O chin quoé, tu voés eds ingins in route à ouvrer, mais tu sais mie quoé eq ch'est et os te l'dirons mie.

Enfin, pour eq ches gins n'seuche'te mie, os foaisons granmint d'ouvrages din Paris, mais i n'o qu'un qui sro ech vrai. Ches eutes, ch'est pour tromper ches gins.

O j'os mie tout comprins ! Possibe.

jeudi 23 juin 2016

Tu n'manisfestros mie

..., qu'o dit ech gouvernemint.

Mie, j'ainme mie qu'ho m'interdiche ed manifester.

Adon, ej vos manifester pour dire eq j'ainme mie qu'os nos interdisonche ed manifester.

Ho pourraoit aller fin lon.

Magine qu'ech gouvernemint, coèr un keup, interdiche chte manifestation lò.

Vu min caractère, ej vos manifester pour dire eq j'ainme mie qu'os nos interdisonche ed manifester pour dire qu'os n'ainmons mie qu'os nos interdisonche ed manifester.

Eq dit un jonne qu'est seuremint in vagances edpi quèks tans et qu'ouvre mie.

L'o p't'ête bin foait d'insister, vu qu'ech gouvernemint, qu'est boin pour nos surprinde, à canger d'avis.

Et dire qu'i o eds inglés dman qui vourroai'te bin dvenir frinchoés !

mercredi 22 juin 2016

Quoé qui tue

Ech feminisme n'o janmoais tué.
Ech matchisme tue tous ches jours.

Feminisse, ch'est p't'ête bin, mais tu meurs quanq minme.

Qu'ej fuche honnete : feut qu'ej vos diche étou qu'echt'onme qui ch'sintoait un molet coupabe dech reminbremint agritchole, et qui pour mi, n'étoait mie un feminisse est mort étou. Mais li-minme disoait qu'il étoait coupabe. Adon !

Adé !

mardi 21 juin 2016

Ej su érvenu

L'eute smangne, j'os étè vir unne rinconte ed fotbal à Marseille. Bèle ville.

I sanne eq j'os foait quèke cose qu'il éroait mie fallu foaire.

Dech keup, ches cadoreus m'ont rinmé à m'moaison. A Moscou. Ch'est eus, in vrai, ch'est ches frinchoés, qu'ont poéyé min billet.

A Moscou, j'os vu m'fanme et mes éfants, leu os foait des becs, os prins unne douche et vu quèks conmarades avuc qui j'os bu quèks boins keups.

Pi, ej su rpèrti. Pour Toulouse. J'avoais djò min billet pour l'rinconte d'ièr inter min poaiyis et ches galloés, et ches cadoreus n'm'avoai'te mie prins min passeport.

Quanq j'os été à Toulouse et assis pour vir ech rinconte ed fotbal, j'os foait quèkes photos. Ches cadoreus n'ont mie ainmé ho. Dech keup, innui, is m'rinméne'te à Moscou. Ch'est coèr ches frinchoés qui poéye'te. Ureusemint pour mi ! J'avoais pu d'argint

Quanq tu pinses ! Ej su vnu deus keups in Frinche pour ech keup d'un seul voéyage. Merchi à vos. Vnez-nos vir in deus-mile-dis-uit, os srons régalant avuc vos. Intraînnez-vos granmint ach lancier ed caïèles.

Qui dit un russe.

lundi 20 juin 2016

Nétieu d'éreilles

- "Ièr, vu eq ch'étoait l'fète ed ches pères, ED o bu. Et granmint, qu'i sanne ! Vu quoé qu'il écrit innui."

Qu'os vos disez.

Ouais, j'os bu. Mais mie à ête seu conme un polonés.

Chi j'os lonmé echl article nétieu d'éreilles, ch'est mie unne berlure et eq j'os confondu avuc nétier ets éreilles.

Un nétieu d'éreilles est unne gin qui nétie ches éreilles d'eute gins. Et qu'arrive à vive in foaisant ho. Fin bin, vu qu'aprè, i propose à chin fiu ed foaire esn ouvrage lò.

Chi t'os janmoais vu ed nétieu d'éreilles à Moreu, Advile, Anmyin, Flichcourt o Fléchèle, pèr eximpe, ch'est qu'echl'ouvrage n'existe mie in Frinche. Qu'i m'sanne ! Mais in Inde.

Unne cacouille ed mi : magine unne réclame !  "Pour dis éreilles nétiées (vos, chonc keups, o vos, vot fanme et vos troés éfants), ej vos nétie vot nez et os l'poéyerez mie." Fin boinne idée, nan ?!

Ej su granmint ureus ed vos avoèr apprins quèke cose innui, et p't'ête d'avoèr baillé eds idées à des gins à joke.

Bec à tertous.

dimanche 19 juin 2016

Il ainme ech fotbal

..., min tchuré.

Judi au vèpe, i vient minger amon mi. Mais os rbéïons mie ech fotbal.

Adon, alintour ed vint-deus eures tchinze, not régalant tchuré, qu'est mie uropéien, vu qu'il est burkinabé, vut quanq minme ch'in rtorner à s'moaison, l'tchure, pour vir l'fin dech rinconte qu'i o à ch'momint lò .

Et i chin rtorne.

Zéro à zéro ! Ho valoait mie ch'keup ed rintrer.

samedi 18 juin 2016

Tu vux o tu vux mie

... eq ches inglés i fuche'te toudi din l'Communauté Uropéienne ?

In vrai, os nos posons mie l'question lò. Mais ches inglés s'dminde'te chi i vont continuer d'i ête o mie, din l'Communauté Uropéienne.

Minme din un roéyeume, os appelons ho l'démocratie.

Mais din un roéyeume, i sanne eq tu pux tuer ches gins qu'i pinse'te mie conme ti.

Pauve fanme !

vendredi 17 juin 2016

L'berdale

I o mie ed justice !

Din des poaiyis conme ech not, ches gins, in principe, ont ed quoé bin minger.

Mais vlò !  I o des gins qui ont des problinmes in mingeant mie conme i  feut, o in mingeant granmint. Et is ont adon unne berdale. Unne berdalle, t'os comprins, ch'est unne crosse panche

T'os qu'à rbéïer !


Ech gin lò, il o ech kmise qui vo cratcher. Et mi, j'os mie l'freusse del prinde in photo. Feut dire qu'i dormoait.

Mais malureusemint din ches poaiyis o ches gins ont rin à minger o vraimint mie grind cose, ches éfants ont étou ed crosses berdales. Et lò, ej mettro mie ed photos.

jeudi 16 juin 2016

Ouvrer moinss

... jou eq ch'est vive miu ?

Qu'is ont dmindé ièr à ches jonnes !

Ho foait buser, ch'est seur.

Mi, ej diro eq ch'est possibe d'ête ureus quanq os ouvropns moinss. Rbée ches vius qu'ont arté, vu leu ages. Des keups, sont bin ureus. Minme chi feut rconnoaite qu'i n'o qui sont mie ureus. Mais is vive'te.

Mi, ej pus juger, vu eq j'ouvre.

Mais dminder ho à ches jonnes qui sont à l'école, qu'ont, des keups, janmoais ouvrer ed leu vie, qu'ont mie granmint d'argint, qu'ont mie dis-uit ins et qu'ont mie leu permis ed conduire, feut l'vouloèr et feut mie avoèr buser.

Mais jou eq nos savons toudi quoè qu'os voulons ?

mercredi 15 juin 2016

Sis sis

- "Jou qu'i vo nos causer ed rugby ?" qu'os vos disez p't'ête.

Nan ! Des rincontes ed rugby, achteure in Frinche, i n'o mie granmint ; P't'ête coèr troès, et ches daraines, i o mie ieu sis à sis à l'fin d'unne rinconte.

Emn invie, innui, ch'est ed vos causer ed min appareil photo sis pèr sis qu'ej viens d'acater. Un appareil conme enn avoai'te ches grinds photographes.

Edpi, ej foais des photos carrées. Rbée !



























Qu'ej fuche honnète, ch'est unne tiote mintirie : un appareil photo qui foait des photos sis pèr sis, et in argintique, ho veut granmint. Et j'ainme bin foaire des photos, mais j'os mie invie ed mette granmint d'argint din chl'appareil.

Don, pour foaire des photos carrées, ej prinds min fin tiot appareil, et j'i dminde ed foaire des photos "un pèr un". Carrées.
Soin ! un pèr un, ch'est ch'format ed ches photos. Echl'appareil foait ches photos unne pèr unne étou. Unne photo d'un pèr un, pi unne deusienme photo d'un pèr un, pi unne troésienme d'un pèr un et coèr et coèr

Des keups, j'i dminde étou, conme i o chint ins, ed les foaire in noèrt et blanc.

Et ej truvoe ho bieu.


Et ti ? T'in foais des photos ? I o granmint ed coses à prinde.

Ej définiro echl'article in pinsant à tous ches jonnes qui vont philosopher innui. Boinne canche à eux.

mardi 14 juin 2016

Chu ches génous

Un jour, alintour ed mes sèse o dis-sèt ins, j'étoais un diminche avuc mes pèrints, eds onkes et tantes amon mes taïons, ches pèrints ed min père.

I avoait dech keup, mes frères, unne cousine ed mes ages et ches frères, mes cousins.

A un monmint del jornée, j'étoais assis chu unne caïèle, avuc m'cousine chu mes génous.

Quanq m'taïonne o vu ho, ale i o dmindé ed deschinde.

J'étoais chu l'tchu.

Edpi, m'cousine n'o janmoais rmonté chu mes génous.

Et os avons mie berzillé l'caïèle.

lundi 13 juin 2016

Ech boin nombe

In scieinches, un résultat ed mesure chin incertitude, ch'est conme unne valise chin poégnets : os pouvons nos assir edsu.

A buser pèr ches jonnes qui vont passer ech baccalauréat.

samedi 11 juin 2016

Nouvèle histoère ed train

Quanq ho vut mie, ho vut mie !

J'esplique.

L'eute smangne, avuc ches grèves ed train, min train ed uit eures sis étoait supprimé tous ches jours.

Ièr, boinne nouvèle, ech train vo vnir.

Et il arrive.

Ej monte ed ndan.

Os partons.

A l'station d'aprè, i tchait in panne. Uit eures trinte uit.

Brin !

Mi ej dis :
- "Ches gins qui s'otchupe'te ed ches trains, quanq os croéyons les connaite, os s'berlurons coèr."

vendredi 10 juin 2016

Ch'est mie unne vie

Mardi et merkerdi, j'étoais à Paris, capitale del Frinche.

Ej vux mie vos causer ed ches flérinées qu'os avoème un molet avuc ches ordures in ville, mais ed ches gins qui prinde'te ech train o ch'métro tous ches jours.

Ches pauves ! Avuc ches grèves, ch'est pour eux un vrai brin eq d'aller ouvrer. Surtoute alintour dech Stade ed Frinche, à St Denis.

J'os vu : ech train arrive, i o mie ed place ndan. Mie unne gin deschind. Deus-chint gins, o miu, vu'te monter. Tchinze o vint i arriveront ech keup chi.










Mais innui, et pour un moés, i vo i avoèr ech fotbal.

Des gins vont vnir ed toute l'Urope. Qué image vont-i avoèr dech poayis ?


Is vont vnir, et rpèrtir. Ah ! Chi ches espanols pouvoè'te rinmner avuc eux un tiot, lonmé Nénez et qu'o des guernons !

Mais ch'est p't'ête seulemint din un moés !

Corage à tous ches gins qui ouvre'te et qui prinde'te ech train o ch'métro.

jeudi 9 juin 2016

Nos taïons ches gauloès

... avoai'te l'freusse eq ches tans leu tchai'te chu leu tète.

Tertout o lu ches contes d'Astérix et ed chin conmarade Obélix. Don, tertout o lu eq nos taïons avoai'te l'freusse qu'ej dis.

Is avoai'te seuremint l'freusse ed ches hernus et dech bruit qu'ho put foaire, mais étou l'freusse eq ches neuèe et, o, taüs tchai'te.





Et nos, os rigolons quanq os lisons ho.



Fin crosse berlure qu'os foaisons ! Un tiot nuèe put peser deus-mile tonnes, et un taü, uit-chint-mile tonnes. Et puss.


Feut don mie rire ed nos taïons ches gauloès, les respecter, et continuer ed lire ches contes d'Astérix et Obélix pour apprinde tout quoé qu'i feut pour bin vive.
















Saprés scieintifiques!

mercredi 8 juin 2016

Un boin cinsié

I o quèks jours, j'os écrit un article chu ches cinsiers qu'ont des vakes à vianne. Os avez comprins eq j'étoais un cros molet in prousse aprè eux.

Innui, feut quanq minme qu'ej vos diche; in vrai, qu'ej vos écriche, eq j'os rincontré verdi un onme qu'o des vakes à vianne, et des glinnes, et qu'est lon d'ête un nikdouille et un mawais.

I feut don qu'ej m'estchuse et rconnoaiche eq j'os étè un molet mie honnête. Mais is sont quanq minme mie granmint à avoèr des vakes à vianne et à ête conme echt'onme eq j'os rinconté.

mardi 7 juin 2016

Tertout n'sait mie rire

Verdi au vèpe, ej tchitte emn interprinse pour rintrer amon mi et ej vos don prinde un train.

Quanq j'arrive ach train, ej voés ech contrôleu chu ch'quai, avuc ch'valise pour ouvrer. Pi i monte din ch'train.

J'arrive ach train et monte étou. Echt'onme est in route à foaire esn'annonce din un micro :

- "Mes gins, not train pour Etapes-chu-ches-mers vo pèrtir. I s'artero à Flichecourt, Advile, Noyelles, Ring-dech-Flier et Etapes-chu-ches-mers. Merchi ed mie laicier vos valises chin nom et chin surveillieinche."

Mi j'attinds qu'il o défini ed causer pi i dis :

- "Chu ch'quai, i o unne valise abindonnée."

I m'o rbéïé, rbéïé l'valise et n'os mie ri. Ch'étoait à li. Quanq il étoait monté din ch'train pour causer din ch'micro, il avoait mie prins s'valise. Et mi ej l'avoais vu. J'avoais invie ed foaire des cacouilles.

Os voéyez, mes lecteus, eq tertout n'sait mie rire. Malureusemint.

Ech train est pèrti sis minutes aprè. Conme prévu.

lundi 6 juin 2016

Conme unne vake tchulèrde

... qu'ale est.

Pour ches gins qui sai'te mie quoé qu'est unne vake tchulèrde, ej vos esplique in troés vues lò in dsou.

Vake tchulèrde vue ed drière
Vake tchulèrde vue de dsu


Vake tchulèrde vue ed côté
Ches vakes tchulèrdes ont granmint ed vianne, et tu pux in vir surtoute avant ches ètes ed Pâke ; I o minme des foères pour ches vakes, o bus, lò.

Conme unne vake tchulèrde, qu'ale est slon mi, l'jueuse ed tiote balle ganne qui nos vient ed ches Anmérikes. Et s'soeur étoait conme ale.

Mi, ale m'feut l'freusse. Pour t'dire, tu la mets din min lit qu'ej dors din ch'cado.


I o quèkes innées, pour avir des vakes tchulèrdes, des cinsiers leu bailloai'te eds hormones. Achteure, in Urope, ch'est interdit. Din ches Anmérikes, je n'sais mie. Et pour ches jueus, surtoute ed ches Anmérikes, ej doute.

L'seule différinche inter unne vake tchulèrde et l'jueuse ed tiote balle ganne, ch'est eq ches vakes baille'te granmint ed vianne qu'os mingeons. L'jueuse, os l'mingerons janmoais, et quanq ale vo viusir, i m'sanne qu'ho sro mie bieu à vir.

J'i pinse : qui qu'o vu s'soeur edpi quèks tans ?

Soin ! toutes ches jueuses ed tiote balle ganne sont mie poin régalant à vir. Et chin ête mawais, ej su ureus d'avoèr vu gaingné unne jonne espagnole sinmdi.

dimanche 5 juin 2016

Canchon ed saison

Ches fin tiots pichons din l'ieu,
Nage'te, nage'te, nage'te, nage'te, nage'te, 
Ches fin tiots pichons din l'ieu,
Nage'te aussi bin eq ches cros.
Ches tiots et ches cros, nage'te conme i feut,
Ches cros et ches tiots, nage'te bin aussi.

Os rkminchons :

Ches fin tiots pichons din l'ieu,
Nage'te, nage'te, nage'te, nage'te, nage'te, 
Ches fin tiots pichons din l'ieu,
Nage'te aussi bin eq ches cros.
Ches tiots et ches cros, nage'te conme i feut,
Ches cros et ches tiots, nage'te bin aussi.

Achteure, tiots et cros pichons sont fin ureus : is ont granmint d'indroéts pour s'promner. I n'o p't'ête qu'in ont profité pour visiter ech Louve o eutes musées.

Feudro mie qu'is oblie'te ed rintrer, o rdchinche, avuc ches ruissieus et ches fluves din leus lits. Chin quoé, i vont avoèr granmint keuds et du mau à vive.

samedi 4 juin 2016

Maux, mots et ju ed mots

Chake mau o un rmède à li.

Ho kminche bin. T'os comprins ech ju ed mots ?

Un jour chin intraineu i o dit  :
- "Vole conme un paviole,
Pique conme unne mouke à mié,
Et vos-i, chambutche !"

Ech chambutcheu, un jour, o esplitché avuc unne man à un autre chambutcheu qu'achteure, l'eute alloait dormir. Et vint sgondes aprè, il l'avoait chambutché et l'eute étoait longé. I "dormoait".

Adé, ti qui lonmoait in vrai Berzillé Clay et qu'o rfusé ed foaire ech djerre dech Vietnam. Mi ej mé ranmintuvoe bin ed ti conme chambutcheu.

Pour ches gins qui connoai'te mie bin ech picard, un paviole est un tiot insecte avuc ed bélotés ailes.

Un can ed soèle

Avant-ièr, j'os vu un poéyisin qui m'o dit qu'il avoait un bieu can ed soèle. Et i m'o inditché ò qu'étoait chin can .

Du soèle, os in voéyons ed moinss in moinss adon eq ches interprinses qui fabrique'te ches boinnés caïèles in ont dzoin. Don, ej su aller vir.

Et ch'est vrai qu'il o un bieu can !



In vrai, vu qu'os avons mie granmint ed solé achteure, ej mets un molet ed couleurs din ches articles et quèkes cacouilles pour vos foaire plaisi.

Bec à tertous.

Pour ches gins qui connoai'te mie bin ech picard, adon vut dire alorss.

vendredi 3 juin 2016

Jou eq vos pouvez m'aidier

Mes boins lecteus ed Picardie et d'eute pèrt, j'os dzoin ed vos.

J'os des fleurs, in vrai, ch'est m'fanme qui s'in otchupe, qu'os savons mie quoé eq ch'est. Rbéyez quoé qu'ho baille chu l'photo d'aprè quanq os avons un molet ed solé !


Chi os connaissez, écrivez-mi.

D'avinche, merchi à vos.

jeudi 2 juin 2016

Ches vius ont froéd

Tertout in o intindu causer : os étoème ach moés ed moai, edpi ièr, os sonmes ach moés ed juin, et i pleut granmint. Boins tans pour ches guernouilles.

Et aprè ?

Minme des voées construites pour pouvoèr rouler fin rade edsu sont dsou ches ieus. Ej pinse eq ches gins qu'ont busé chu ches plans étoai'te des boins. Des boins nikdouilles !

I pleut, i pleut, et i n'o qu'ont froéd.

Surtoute ches vius, qu'i sanne ! A Marseille, i n'o qu'éroai'te alunmés des fus din leu moaison ed retraite. Seuremint pour s'keufer. Mais uit fus alunmés ech minme jour, ho foait granmnt ! Surtoute eq ch'est mie à Marseille qu'i foait ech puss froéd.

Aprè, ch'est seur qu'alunmer un fu à l'cour à Orléans achteure, chest mie possibe. Orléans, tu pux mie rouler in voéture, et chi t'es un agripeu, t'os dzoin ed savoèr nager. Chin quoé, t'es prins pèr ches cadoreus.

mercredi 1 juin 2016

Gannes

Ganne, ch'est mie ch'nom d'unne fille, mais ch'est conme rouve et  noèrt, pèr eximpe : unne couleur.

N'mie confonde avuc jonnes qui sont eux, eds éfants o des galibiés ; Mie vius !

I put i avoèr des jonnes gannes. Pèr eximpe, in Chine.

Mi, j'os truvoé des gannes qui pu'te ête noèrts, blancs, jonnes, chinoés o vius. Rbée l'photo !


Ej vux innui rinde honmage à ches gins lò qu'ont granmint ed corage. Timpe au matin, vu qu'il est sis eures, is ouvre'te djò, et i pleut. Ch'étoait mardi, ch'étoait lindi, ho sro dman. Is sont lò, vu qu'os leu dmindons et qu'is dzoin d'argint. Is tcheuille'te o ramasse'te des lédjumes.

Ej su seur qu'is gaingne'te, n'mie confonde avuc ganne, et malureusemint, mie granmint d'argint, mais is ont granmint ed corage.

Tertout n'foait mie ho, et tertout enn le froait mie. Vu qu'i o in Frinche granmint d'arlands. Qu'ej pinse.

Chi t'os ieu ets ages ièr, et eq pèr eximpe, tu lonmes Jeanne, cros becs à ti. Eq tu fuches jonne o ganne.