Unne bèle innée bissète

Unne innée  bissète,  j'l'o djò écrit i o quat ins, o troés-chint-soéçante-sis jours.

Don, un jour ed puss qu'unne innée normale.

Un jour ed puss, et ch'minme gaingnage eq ches eutes innées.

Mais cht'innée, os avons del canche, vu qu'ech jour ed puss, ech vint-nu dech moés ed févrié, ch'est innui, un sinmdi.

Et l'sinmdi, i o granmint ed gins, mi pèr eximpe, qui n'ouve'te.

Ch'est pour cho qu'ej pux écrire eq ch'est unne bèle innée.

Jou qu'os pensez conme mi ?

P't'ête poin, chi ech sinmdi est un jour dò eq vot fanme o vot onme acate des coses.

Boin vint-nu févrié à  tertous.

M'famille reste din ch'Loèr-et-Cher

... cantoait ech canteu Michel Delpech, mort i o deus ins.

Jou qu'es famille reste à Treeuuu, un village qui vut ête ech pu bieu village ed Frinche cht'innée ?

Treeuuu, ch'est un village dò qu'i o des moaisons dsou l'tère.

Ch'est p't'ête ed lò eq vient ch'nom dech village.

Aprè, dire eq ch'est ch'pu bieu village, ej pux mie : d'unne, ch'est mie in Picardie, et ed deus, ej connoais poin.

Et vos ! Os connoaissez ?

Disez-mi.

Boinne promnade din ch'Loèr-et-Cher.

Mette unne tchulote prope

... chake jour.

Pourquoé ?

Qui di'te, eds onmes.

Et j'in su un. D'onme.

Et à ches fanmes, ej dis qu'i o deus coses possibes :

 - Un jour, os vos lavez pi os mettez unne tchulote prope qu'o cangez chake jour. Dech keup-lò, os avez pu dzoin ed vos laver, vu qu'os mettez toudi unne tchulote prope.

J'avoais ech père d'un conmarade du Limousin qui foaisoait cho edpi qu'el djère d'Algérie avoait artée. S'fanme et ches éfants ont pèrti.

 O bin,

- un jour, os mettez unne tchulote nuve et prope, et aprè, chake jour, os vos lavez, don, vos vêtemints, surtoute vo'tchulote qu'est protégée pèr no'maronne est toudi prope.

In principe, vo'tchulote reste prope.

A moinss d'un tiot accidint.


Ed tans in tans, vu eq ches tchulotes s'acat'te pèr deus o troés, et pour ech plaisi ed ches ius ed vot'fanme, os pouvez canger.

Mi, j'o quat tchulotes : unne blanke, unne rouve, unne verte et unne ganne.

Quat tchulotes, quat smangnes. O casi un moés.

Fin pratique.

Boine jornée.

L'tère est plote

Ch'est quoé eq disoait un anméritchin i o coèr quèks jours.

Il avoait raison.

Infin ! Ej croés.

Echt'onme, scieintifike, chi os voulons, o voulu l'pruvoer li-minme.

Pour cho, l'o fabritché unne sorte ed rotchète qui fonctionnoait ... à l'ieu. Et avuc, i vouloait monter à miu ed mile-chonc-chint mètes de heut et moutrer, p't'ête in prindant quèks photos, qu'el tère étoait plote.

L'o casi réussi : s'rochète n'o poin etè conme i falloait - à coeuse del ieu ? - cht'onme est tcheu d'in heut et, achteure, est mort.

Chin prinde o invoéyer ed photos.

Mais l'tère est plote. Vu kmint qu'echl'anméritchin o défini, plot conmme unne landimole.

Et vos ! Jou qu'os pouvez pruvoer kmint est l'tère ?

In attindant, in févrié, ches landimoles, ch'est fin boin avuc du chuke, del castonnade o du chucolat.

Boin accion.

Rintchérir chin gaingnage

Magine unne gin qui gaingne inter mile-troés-chint et deus-mile uros pèr moés in ouvrant au moinss chin-soéçante-nu eures. Pèr moés, et mie pèr smangne, feut mie éxagérer.

Don, maginons cho ; os sonmes inter sèt et onze uros pèr eure ouvrée, différint ed ches eures vétchues.

Un jour, echl'onme d'éto dech gin prins in eximpe i propose ed rintchérir chin gaingnage ed chincante chintinmes.

Echl'ouvrié est fin ureus : cho i foait alintour ed chonc pèr chint ed puss pèr moés, smangne, jour o eure (ch'est vos qui voéyez).

I avoait granmint d'innées qu'il avoait ieu "un cadieu" conme cho.

Maginez echl'ouvrié chi chin onme d'éto i avoait annonché un uro ed puss ! Uit à onze pèr chint ! Seuremint qu'i s'diroait qu'i o dinger quèk pèrt.

Et aprè ?

Aprè, ej voudroais vos causer d'unne gin et ed conmarades à li qu'on ieu leu gaingnage rintchéri d'alintour vint pèr chint.

Ej magine ech tcheur dechl'ouvrié s'arter, malureusemint pour li et pour s'fanme, ed butcher, mais ches gins del ligne d'avant, eux, is di'te eq ch'est normal eq d'avir ed tans in tans vint pèr chint ed puss.

Pèr innée, moés, smangne, jour, eure o minute.

Mettons eq cho puss arriver, minme chi ej l'o jonmoais vétchu. Quanq os gaingnons moins ed deus-mile uros pèr moés. Mais quanq os in gaingnons djò miu ed uit-mile pèr moés, lò, ch'est mie possibe d'intinde dire cho.

Surtoute qu'in puss, leu interprinze o des problinmes d'argint.

Ontabe ! A dématcher.

Echl'épite

... dech l'apôte, ch'est mie l'fanme dech chti-chi.

N'poin causer picard

... avuc ches accints dech sud del Frinche.

????

J'esplique.

Ièr au matin, in buvant un ju avuc m'fanme, ale m'dit :

- "Min onme, j'ainmeroais eq tu foaiches quèk cose din ch'gardin avuc des bastaingues."

- "Des bastaingues ! Acoute-mi, m'fanme ; os disons bastains et mie bastaingues. Os sonmes mie à Mèrseille, El Warde o coèr Limbesch. Os disons ches "gues" quanq i in o din ch'mot, conme pèr eximpe, din wassingue."

Ale croéyoait...

Bin nan !

Feut qu'ale apprinche, vu qu'ale o né eiute pèrt qu'in Picardie. Et i li feut du tans.

Et mi, del patieinche.

T'ainmes unne fille

Min fiu, edpi quèks moés, t'ainmes - granmint - unne fille.
 
Edpi quèks smangnes, t'mère et mi l'savons, et tu sais qu'os l'savons, vu qu'os in avons causé un molet.

Un tiot molet, et j'diroais minme puss, un fin tiot molet.

T'ainmes unne fille, mais tu vux mie qu'os in causons, tu vux mie nos moutrer unne photo d'ale, et tu vux mie qu'os l'rincontrons !

Quoé-jou qu'i o  ?

Jou eq tu sais eq tu l'ainmeros poin pour ch'restant det vie ?

Jou qu'ale vut mie nos vir ?

O bin, j'o l'freusse, jou eq t'os honte ed tes pèrints ?

Fuche ureus, mais dis-nos porquoé eq tu vux mie tout cho.

Merchi.

Bec à ti,et au plaisi de t'vir.

Tout seu, o à deux.

Qui qu'o ainmé deus fanmes

... n'put pu foaire ed politike.

A moinss qu'il o ainmé ches deus fanmes unne aprè l'eute, et i o granmint ed tans, quanq i avoait mie d'ordinature et internénèt.

Mais avuc chl'affoaire ed verdi et Grivieu-ech-grivoés, j'espère qu'os avez comprins qu'i feut ête fin discret.

O coésir.

Unne et unne seule fanme din t'vie, et tu pux oser t'présinter àds élections,

Deus fanmes, et adon, feut foaire tcheue basse ; poin ed candidature àds élections pour ti.

Et cho, eq tu restes à Pèris o bin eute pèrte in Frinche. Minme din ch'sud.

Boinne canche à tertous ches candidats.

Et tiot bec à leus fanmes.

Ech coronoviruch din mon ordinature

Ech coronoviruch chinoés, o vnant ed Chine, os in avez seuremint intindu causer pèr ches jornaleus del radio, del télévision et ed ches gasètes.

Cho foait miu d'un moés eq terttout n'in cause.

Et bin, mi, edpi unne smangne, i o unne o puss ed gins qui vu'te m'mette un coronoviruch din min ordinature.

Minme chi ch'est des chinoés o eds afritchins o coèr des ousbekichtins qui assaye'te, is écrive'te in inglés.

Mais j'o apprins chl'inglés quanq j'étoais jonne, et o comprins.

Leu message, toudi ch'minme, in conmintère :

- "Woo ! Ch'est mie coéyabe ! Jou eq tu sais quoé eq tin nom muché vut dire ?Appuie lò pour l'savoèr."

J'o poin appuyé, et min ordinature n'o poin hapé ch'coronoviruch ed ches ordinatures.

Qu'ej pinse.

Fuchez prudints !

Boinne jornée.

Unne boinne messe

Unne boinne messe dure unne eure.

Et pour vérifier qunne messe vo durer unne eure, et mie unne eure chonc o unne eure dis, i o ches dviseries dech tchuré chu chl'évangile dech jour.

Casi au mitan del messe.

Quanq ech tchuré définit de dviser, tu doés intindes ches clokes dechl'église.

J'esplique.

Mettons qu'el messe kminche à dis-eures et dmi, quanq ech tchuré définit, ches clokes sonne'te onze eures.

Chi ches clokes sonne'te et qu'ech tchuré cause toudi, l'est in rtèrd.

Chin quoé, ch'est boin : tu sros à nonne à t'moaison.

Aprè, pour qu'unne messe fuche boinne, o surtoute bèle, i o étou ches cants, et ches canteus, qui sont fin importants.

Mais ch'est mie ed cho qu'ej vouloais causer innui.

Boin diminche.

Ete ch'daraine

I o quèks jours, m'fanme m'annonche qu'ale o invie de s'présinter chu unne liste pour ches élections municipales dech moés ed mars.

- "Feut ête dis-nu, et ches gins ont dzoin ed mi pour ête ech dis-neuvienme", qu'ale m'dit.

- "Fin bin !" eq j'i réponds.

- " Ej sro dis-nuvienme".

- "Ouais !  Tu m'l'os dit".

Ouais, mais quèks jours aprè, ale m'dit qu'ale sroait quatrienme adjointe, pour s'otchuper ed ches loésirs.

I o du cangemint !

Aprè unne rinconte mardi avuc ches dis-uit eutes gins dech liste, ale m'o dit, merkerdi au vèpe,  qu'ale sroait achteure, chi ale est élue, première adjointe.

Seur qu'aprè ches élections,  ale sro merre.

Boin vote à  tertous, et boinne fête à tertous ches cadoreus.

Kmint qu'il o coési

L'eute jour, au vèpe et din un train qui m'ranmnaoit à m'moaison, i avoait pu granmint ed gins après ches deus premières stations.

J'ainme bin ch'momint-lò ; ej pux adon allonger mes gambes pour ch'reste dech voéyage.

In principe.

Mais l'eute jour, don, vlò unne gin qui monte din ch'train avuc un cros so à s'main, qui rbée pèrtoute, avinche, et viens s'assir. In face ed mi.

Adon qui i o granmint ed places pèrtoute.

Pourquoé ?

Quoé qu'i i o passé din ch'tête ?

Aprè tchinze minutes, le vlò qui pèrte s'assir eute pèrte.

P't'ête qu'il avoait comprins eq j'ainmoais poin n'mie pouvoèr m'détinde ches gambes.

P't'ête étou qu'i o cru eq j'étoais unne gin qu'ainme poin ête imbêter. Et qu'o des muskes qu'i sait utiliser.

P't'ête !

Ech droét ed vote

Béto, eds élections.

Lisez :

Pour qu'un écologisse fuche élu présidint, i feudroait eq ches abes is vot'te.

Achteure, busez.

A tertous

... qui n'rbéïez poin ches tans.

O qu'êtes in ville.

L'eute jour, ej vos o causé del lunme qu'étoait casi oronde, timpe au matin, à l'ouest.

Eh bin sinmdi, ale étoait toute intière.

Os l'avez mie vu ! A l'est.

Ureusemint pour vos, ej su lò.

A l'avnir, pensez à lver vos ius.

Boinne jornée.

Diu o bin foait ches coses

J'ose dire et écrire eq Diu, quanq il o foait l'monde, l'onme, l'fanme et tertous ches bétails, il o foait cho bin.

Et minme fin boin.

Pèr eximpe, ches bétails ont souvint quat pattes, pour ête seur d'en mie tchair. Conme ches caïèles o ches tabes in bos.

Et pour matcher, ches bétails ont unne bouke.

Pi un treu du tchu pour dérondir et évatchuer ches aliments.

Conme l'onme et l'fanme.

Diu o foait ches oésieux avuc eds ailes pour qu'is peuche'te voler. Chin aile, tu n'voles poin.

Ch'est pour cho étou qu'ej dis eq chi Diu o foait ches intestins ed l'Onme d'unne londjeur alintour ed dis mètes, uit pour ech fin intestin, et casi deus pour ech cros intestin, os pouvons mie laicier ches séruzyins vos in keuper trinte chintimètes in disant eq ch'est mie un problinme.

P't'ête eq ch'est mie un problinme pour eux ed les inlver, p't'ête qu'os êtes ureus ed perde un tiot tchilo, mais n'obliez mie eq Diu vos o foait avuc ches trinte chintimètes-lò.

Chi un séruzyin vos ls'inlève, os érez p't'ête des problinmes. Aprè qu'i vos les o inlvé.

N'vos laiciez mie foaire, ayez fiat in Diu.

Boin diminche à tertous.

Ches tomates sont in dinger

P't'ête que conme mi, os avez apprins i o quèks jours, qu'i o achteure un nouvieu mau qui mnace ches tomates.

Ches scientifiques n'peu'te rin foaire, à pèrt tracher.

Don achteure, poin ed drogue pour djérir o protéger ches tomates.

Mais disez-mi ! Os sonmes in ivèr ! Et quanq-jou qu'is pousse'te ches tomates ?

Matchez ches produits ed saison.

Boinne jornée.

Ale est fin bèle

... et crosse : el lunme.

Au matin, quanq j'o pèrti ouvrer, alintour ed sis eures, dvant mi, à  l'ouest, i avoait chl' lunme.

Casi toute oronde ! I n'i mantchoait qu'un fin tiot morcieu, in heut à  main droéte.

Casi seur qu'edman,  ale sro toute oronde.

Mais feudro s'déjoutcher fin timpe au matin pour l'vir, et dman, os sonmes sinmdi.

Bec à tertous.

Feudro béto voter

Edpi avant-ièr au vèpe, j'o achteure, des keups, unne tiote fernète qui s'ouve in bos ed min ordinature, quanq ej sus in route à utiliser internénèt, et qui m'cartchule ech nombe ed jours, eures, minutes ed sgondes qu'i o coèr avant ches élections din ches villes.

A quoé-jou eq cho put servir ?

I o des gins, ches russes ?, ches anméritchins ?, qui vu'te qu'os alloème, au moinss mi, voter.

Cho kmincher quanq i restoait moinss ed quarante jours.

In rbéïant bin ches nombes, i sanne eq cho fuche pour cartchuler quanq i éro ches résultats. Bizarre !

Et vos ! Jou qu'os avez quèk cose conme chu vot ordinature ?

Ecrivez-mi.

Boinne jornée à tertous.

Pour ches galibiés

... qu'ont inter dis-uit et trinte ins d'âges.

Os avez invie ed pinser qu'ej su viu et nikdouille,

Os croéyez qu'os pouvez foaire quoé qu'os voulez quanq os voulez,

Os croéyez qu'os savez toute,

Os avez invie ed causer ed brin et d'piche, ed ches-vots o ed ches-eutes !

Os pouvez, mais poin à m'moaison.

J'ainme bin ches chinoés

Os avez intindu ches jornaleus edpi ech début edl'innée  ?!

Ches chinoés ont invinté un nouvieu mau, et tertout o l'freusse de l'haper, ch'mau-lò. Et o l'freusse ed croéser un chinoés.

Minme in Frinche, ches gins ont l'freusse ed croéser un chinoés qu'est né in Franche et qu'o janmoais allé in Chine.

Dech keup-lò, ches chinoés, ed Frinche, di'te eq ches frinchoés, ed Frinche, qui sont mie chinoés sont racisses.

Mi, j'le su mie, racisse.

Unne pruve ?!

N'in vlò unne ;

Quanq j'écris à des gins, des keups ej mets un tiot dessin ed tête. Eh bin, ch'dessin, ej mets des chinoés.

Ches chinoés, toudi is ri'te, et des keups, is vos font un bieu tchuin ed ziu.

                                            
Adon eq ches uropéïens, i n'o qui sont trisses.

Qu'i sanne !

Eds uropéïens sont trisses ! Mi, nan .



Et ej truvoe cho bin puss régalant pour ches eutes.

Boinne canche à ches chinoés ed Frinche, et surtoute, étou, à ches chinoés ed Chine.

Pour m'soégner

Verdi au matin, adon qu'ech train arrivoait in station, min nez o saingné.

Brin !

Seuremint eq ch'est vu eq j'ouve granmint et qu'ej su poin in forme.

Adon, à nonne, pour éviter eq cho rkminche, j'o allé acater du chucolat.

Du chucolat bin noèrt, et fin boin.

Feut s'qu'i feut.

Boinne jornée.

Ches saprés inglés

Os l'savez vu, inter verdi et sinmdi, ches inglés ont tchitté l'Urope.

Innui, don, deus jours aprè seulemint,  is rvien'te in Urope.

In Frinche.

Avuc chl'invie ed nos mette unne détchulotté.

Saprémint tchulottés, qu'is sont !

In puss, vont p't'ête réussir à nos l'mette, ech détchulotté !

A vir.

Boin diminche.

Buvons un keup

..., buvous in deus,

À l'santé ed ches uropéiens,

À l'santé ed nos familles,

Et brin à tous ches inglés

Qui ont tchitté l'Urope.