Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 31 août 2014

Ej t'ainme mais j'té tchitte

In vrai, ej vouloais mette ech mot intchuller à l'place de tchitter, mais comme i o ed jonnes iux qui li'te min blog, j'o mis ech verbe tchitter.

Etpi, edpi un in et avuc ech présidint d'achteure, intchuller est accepté. Feut dire qu'il o des conmarades qu'ainme'te ho.

Mais ch'est mie d'ho qu'ej vux causer.

Ej vux causer ed ches gins qu'ainme'te, o qui di'te ainmer, ech présidint et chin premier ministresse et qu'i leu met'te des beus ed bo din les gambes.

Mi, j'o toudi rbéïer ches résultats ed ches elections quèk moés apré : chincante-deus pèr chint ed ches votants, in deus-mille-douse, pour ech nouvieu présidint, et achteure, deus ins apré, dis-sèt pèr chint ed ches gins qu'i l'ainme'te coèr ! Feut dire eq chincante-deus pèr chint ed ches votants, ho foaisoait eq trinte-nu pèr chint ed ches gins.

Vive La Rochelle, minme chi est mie régalant qu'is ont battu Toulouse ach rugby.

samedi 30 août 2014

Ech mèriage

Au moés d'eu, j'o été à un mèriage.

Bieu mèriage !

J'o rigolé pindin ech messe, avuc unne lecture chu ches moaisons construites, o mie, chu un rocher ; Un keup ed vint et l'moaison reste dbout o tcheut.

Apré, ech tchuré esplique quoé qu'o vut dire.

Mie, ej pinse qu'il éroait conté ech conte dech leu et ches troés tiots coéchons, ches gins éroai'te miu comprins. Pi p't'ête miu acouté.

Pour vot information, ech lindéman o été malaisié pour un eute lecteu dech messe.






vendredi 29 août 2014

Il est mie mort

Min fiu vient ed pèrtir pèr ech train pi pèr l'avion pour l'Chine.

Achteure, est coèr din ch'train et in Frinche.

N'est mie mort, mais d'un keup, j'o ieu invie ed braire. Et j'o brai. Comme chi, in pèrtant, o m'avoait inlevé un beu ed mie.

Vraimint mie régalant.

Et j'in o unne qui pèrte lindi in Russie !

Bec à tertous et à min fiu, chi l'arrive à m'lire.

Coèr un appèrtémint

Il étoait bieu et bin.

Mais il étoait ach quatriènme étage,et chin ascenseur.

Et quanq tu l'tchittes pour aller vive din un eute poayis, feut tout deschinde, chu tin dos o din tes bros ; Ureusmint, i o eq des lives et des vetmints.


Pour t'fille, tu l'foais.

mercredi 27 août 2014

Echl'appèrtémint

Il est bieu et bin.

Mais il est ach deuxienme étage, chin ascenseur.

Et quanq t'arrives lo pour i vive, feut tout monter in heut, chu tin dos : ches cados pour s'assir, ch'erfroédioèr nu pour ches léjunmes et ch'bure.

Pour t'fille et chin gars, tu l'foais. Feut miu ed deus eures et moinss ed troés.

I sront bin lo. Mais feudroait quanq minme mie canger tous ches jours.

lundi 25 août 2014

N'o toudi un

I o toudi un jour, quanq t'os min âge, o tu rtournes ouvrer apré ches vagances d'été.

Pour mi, ch'est innuit.

Mie aisié, minme chi i o coèr granmint ed gins mie lo.

- "Vos-i douchemint", qu'ej m'dit ; Dman, rin. Pi din deus jours étou.

Corage à tertous qu'ouvre'te, et bec à ti chi t'os tes âges innuit.

dimanche 24 août 2014

Ech boin cartchul

Echte smangne, j'ouvrérai lindi, merkredi et verdi.

J'o invie ed dire qu'ej ouvrérai un jour chu deus.

Ho foait troés jours chu chonc o troés chu sét. Mie vraimint un chu deus.

Pour apprinde à cartchuler, fin malaisié.

vendredi 22 août 2014

D'où qu'ho vient

Un père ed famille foait un jour ech tour d'un abe din chin gardin et voét des saprés keups chu ch'tronc.

Il appéle chin fiu qu'o un molet miu ed nu ins et i dminde quoé qu'il in pinche.

Ech tiot répond, calmémint :
-"Ho, ch'est ech man ed l'omne."

Nu ins ! Sapré fiu.

Et ch'pié ed l'omne, i connoaît ?

mardi 19 août 2014

Canapes

L'eute jour, din un article, ej t'o causé ed ches étchipes et fotbal ed Canapes.

Jé m’souviens d'un jour où j'avoais été vir ches jonnes juer.

I n'avoait un, drière, qui s'étoait foait indjeuler pèr un gars qui, comme mi, rbéyoait ech match. Ech tiot jonne s'arrête ed juer, prind ech bale et dit à cht'onme :

-" Quoé eq t'os ? T'es mie ureux ? Tu vux prinde em place ?"

L'eute o été  granmint surprins et ch'o tai. Ej sais mie chi l'o révnu vir ches jonnes lo d'eutes keups.

lundi 18 août 2014

Qué date

L'eute jour, i foaisoait bieu tans.

Din ch'train, in face ed mi, unne jonne fanme, p't'ête vint ins, s'assit avuc ech tiote fille, dis-uit moés, djo, qu'avoait granmint invie ed bouger. Mais ch'est mie dech tiote qu'ej vux et causer.

Ech fanme avoait unne boaiyète à bertèles.

Chu ch'dsu d'un ed ches tètes et chin tcheur, i avoait quèk cose ed tatouer : XXI-VIII-M   X.

Ej foais mie atincion, pi, d'un keup, je m'dis eq ch'est unne date. XXI , cho foait vint-et-un ; VIII, uit, cho correspond à ch'moés d'eu ; M, ch'est mile.

Mais, à cose d'unne bertèle, tu sais mie quoé qu'i o inter M et X.

Et lo, chi tu vux mie aller tout droét in prison, tu touches mie ech bertèle. Ed minme, tu dmindes mie à ch'jonne fanme.

T'os qu'ech droét ed maginer.

Ech X et ches âges del tiote, ch'est mie possibe. Dech keup, ch'est ches âges à ch'jonne fanme, o dech père dech tiote. Mile-nu-chint-quater-vint-dis-nu, cho s'écriroait  MCMXCIX. Cho frait vint-chonc ins béto !

Mais ej sais rin. Ej séroais janmoais.

Chi tu lis echl'article eq ch'est ed ti qu'ej cause, o chi t'os étou tes ages din troés jours, ej te fais un bec spécial.

samedi 16 août 2014

A connoaite pèr tcheur

Chi tu vux foaire del politique, tu doés connoaite pèr tcheur ech phrase lo :
- "Ej vos rbée droét din ches iux et j'vos dis eq j'o rin foait ed mau."

Etpi, tu doés mie rire quanq tu l'dis.

Chi t'os dech corage, tu pux ajouter :
- "Ej su vot onme pour edman."

Et nos, feut croère !

jeudi 14 août 2014

Ches jonnes sai'te

Vint ins, et i sai'te

Foaire boulir de l'ieu pour tchuisiner, conduire, ringer ; I sai'te.

Des keups, bin miu eq leu parents. Qu'i pèroait !

Quanq is sont tiots, tu leu  nettoées ech tchu, et à vint ins, i sroai'te miu eq ti. Tout !

Ches parents pu'te avoèr granmint ed mau, à leu tcheur, ed les vir comme ho. Et cho, ches jonnes l'sai'te mie.  O vu'te mie l'savoèr.

Un jour, ches parents pèrt'te. Et lo, ches jonnes rgret'te. Mais ches parents rvaront mie janmoais.

Achteure, os ainmons quanq minme nos jonnes, et pour  toudi.


mercredi 13 août 2014

Premier sectimbe

-"Mais quoé qu'ej vos foaire dman, o l'prochaine smangne ?" Eq des keups tu t'dis.

Mi, j'o un premier sectimbe djo bin rimpli.

Un éfant pèrt in Chine, sis moés ; Un eute vo in Russie pour dis moés. Et un troésienme nos tchitte pour aller vive avuc chin Jules. Qui s'appelle mie Jules in vrai. Tertout ech premier sectimbe.

Ho vo foaire granmint vuide d'un keup. Mais ches troés sont ureux. Quoé dire ? Rin. Qu'ej sus fier d'eux.

lundi 11 août 2014

Edman, timpe au matin

Edman, timpe au matin, achl'eure où blantchit ech campaingne,  
Ej pèrtirai. Voés-tu, ej sais eq tu m'attinds.
J'iro pèr ech ville, j'iro pèr ech train,
Té rjoinde ach montagne.

Ej mèrcherai ches iux fixés chu ches montaingnes,
In rbéyant tout, chin intinde ed bruit,
Avuc ti, ech dos courbé pèr ech poéds dech sac,
Ureux, comme tous ches ins.

dimanche 10 août 2014

Ainnieu ed Diu

L'eute jour, un diminche, ej vos à unne messe.

Apré ech Not'père, ches canteus, et mi, j'ainme canté, cantons echl'ainnieu ed Diu. Fin bieu, avuc unne bèle musique qu'os intindons mie souvint. Bèle, et bin cantée, à m'foaire braire.

Ej rinte amon mie ; J'o oblié ech musique. Brin !

Deus jours apré, à l'hôtel, au mitan del nuit, ej me rinville. D'un keup, ech musique me rvient à l'esprit. Alorss, j'o canté echl'ainnieu ed Diu.

Au matin, j'avoais coèr un keup tout oblié. Edpi et achteure, toudi.

vendredi 8 août 2014

Troés cousins

- "Quoé qu'os foaisez, ches jonnes ?"

- "Os allons mèrcher uit jours in montaingne."

- "Os êtes troés frères ?"

- "Nin ! Troés cousins."

- "Kmint eq cho ch'foait ?"

- "Nos pères sont frères."

- "Ej comprinds qu'os vos rsannèche."

- "Nos méres sont soeurs."

- "Etou ?"

- "Etou !"

- " Rin d'eute ?"

- "Os sonmes tous troés ech premier éfant ed nos parents."

- "Etpi coèr ?"

- "Nos premiers éfants, ch'est deus filles."

-  "Et bin ! Os êtes des boins."

- "Ouais, mais tu nos ercrands. Adé !"

mercredi 6 août 2014

Atincion quand tu cantes

J'o intindu, l'eute jour, timpe au matin, eq ches étoéles cante'te. Janmoais intindu unne étoéle. Ch'est normal, feut eds appareils.

I o eq ches scientifiques qui pu'te acouter ches étoéles. I n'o minme un qu'éroait foait une plate ed musique.  

Quanq is acout'te, i pu'te dire ech poéds, ches âges et minme ech structure interne et l'composition chimique ed ches étoéles.

Toutes ches étoéles cant'te, i péroait. Mais tous ches canteus sont mie eds étoéles. Et vlan ! Din leus dints.

Mi, j'l'o djo dit, j'ainme granmint canter.

Achteure, jé m'dminde chi i o mie du dinger ; Eq ches scientifiques connoai'te tout ed mi ?!

mardi 5 août 2014

Chide

Ech keup d'chide. Mie confonde avuc ech Cid ed Corneille. Lo coèr, mie confonde avuc unne cornaille, noèrte.

Ech chide ! Ech vrai boin chide ed cinse, comme l'foaisai'te troés ed mes onkes. Pèr eximpe, onke Zèfe. Avuc des punmes...à chide.

Ech chide eq tu sers quanq t'invites des gins eq t'ainme.

Ech chide eq chi t'in boés un tiot molet à chonc ins, t'es seu.

Ech chide lo est granmint boin.

Etpi, i o ech calva, eq tu fabriques avuc ech vrai chide. Un jour, amon min conmarade Bébert, j'in o vu quarante lites din un bidon ed lait. Ech calva, qui vnoait d'ête foait, étoait keud.

Un boin calva, quanq t'in boés, tu pux i truvoèr un goût ed punmes. I in o.

lundi 4 août 2014

Ariane

Ej t'ainme.

T'es jonne ; Ej t'o vu naite in dis-nu-chint-soéçante-dis-nu, ech linnemain dech vint-troés déchimbe. Ho foaisoait sis ins qu'os causoème ed ti. T'os fini pèr arriver.

Edpi, t'os bin grandi et tu t'es améliorée.

Tu t'invoés in l'air granmint souvint. Edpi toudi. Avuc eds uropéyins et eds anméritchins. Des keups, avuc des japonais.

Tu perds toudi et tète, et quanq tu rtcheus chu tère, tu rkminches comme chi de rin n'étaoit. Perde et tète, ch'est normal ; Toutes ches fusées foai'te ho.

P't'ête qu'un jour, tu m'fros foaire un tour.

D'ichi lo, continue ed bin ouvrer.

dimanche 3 août 2014

Quat eures

O sèse eures.

Os-tu djo bin rbéïer ech nombe quat chu unne horloge d'église ?

Souvint, tu voés IIII et mie IV

Ches gins qu'ont foait ho n'vouloai'te mie qu'os confondonche ech quat et ch'sis ; IV et VI. Vu eq ches chiffes sont écrits à l'invers.

Etpi, ch'est esthétique, avuc un étchilibe gauche - droéte. I pèroait.

Tout cho pour vot tchulture.

Bec à tertous.

vendredi 1 août 2014

Ches clokes sonne'te

Din tous ches villages ed Frinche, ches clokes sonne'te.

Ch'est pour nos rappeler qu'i o chint ins innuit, ch'étaoit ech mobilisation, jusse avant ech première grande djerre.

Silinche! In mémoére ed ches gins qui sont pèrtis et qu'ont, des keups, mie érvénu.