Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

mardi 30 avril 2019

Mimile couroait

Min bieu-frère Toéne tient un blog din éltchel i cause ed gins conme li qu'ainme'te courir (granmint !), o bin ed lives qu'il o lu et qu'il o ainmé lire.

Eh bin ! Innui, mi, ej vo causer d'un live chu unne gin qui couroait.

Ech live, qu'est fin aisié à lire et qu'est tiot, s'lonme "Courir".

Et i cause d'un onme, Mimile, qui, quanq il étoait fin jonne, n'ainmoait courir mais dvoait courir.

Et un jour, il o kminché à ainmer.

Tellemint ainmer qu'i s'o mis à courir souvint.

Din ch'live, echl'auteur, Jean Ech'noz, dit qu'echt'onme n'étoait mie bieu à vir quanq i couroait. Mais i gagnoait.

Ed des keups, chu granmint ed kilomètes, il avoait granmint d'avinche chu ch'deusienme.

Adon, j'arte lò min article. Allez acater o imprunter ch'live, à ches Editions ed minuit.

Boinne lecture, et boinne jornée.


lundi 29 avril 2019

Pèris est magike

Pèris est magike, ch'est l'phrase eq di'te ches gins qui ainme'te echl'étchipe ed fotbal ed Pèris.

Et is ont raison, qu'ej dis.

Echl'étchipe ed Pèris, i o deus ins, ale o "acaté" des jueus pour miu ed quat-chint-millon d'uros.

Eh bin ! Minme avuc unne étchipe conme cho, is n'ont mie toute gaingné.

Surtoute cht'innée.

Cho vut dire qu'is perdu quèks rincontes importantes.

Toutes in keupe : Keupe d'Urope, Keupe del Ligue, et sinmdi, keupe ed Frinche.

Et à chake keup, ches étchipes qui ont battu ech "crosse" étchipe ed Pèris étoai'te bretonnes.

O Grind-bretonnes.

Merchi Pèris, ed nos foaire rire et ed nos foaire comprinde eq l'argint n'foait mie toute.

Boinne jornée à tertous.


dimanche 28 avril 2019

Os sonmes chrétiens

In vrai, i o des gins conme mi qui sont chrétiens.

Mie tertous, os l'savons.

Mais din un live eq j'o lu i o quèks tans, echl'auteu définissoait chin live in écrivant :

"Jou qu'os sonmes chrétiens vu qu'i o ieu Jésus Christ, o jou qu'os sonmes chrétiens vu qu'ech trèsienme apôte, Paul, o voéyagé granmint, in mèrchant o in batieu, pour annoncher qu'ech Christ avoait existé ?

Innui diminche, busez.

Boin diminche.


samedi 27 avril 2019

Ej su ureus pour l'fanme

J'o vu ièr qu'unne fanme qui foait un bieu blog chu ches galibiės s'ėtoait mise à rdessiner.

Cho foaisoait miu ed sis mois qu'ale avoait artė, vu qu'ale avoait un saprė mau.

Ej l'o comprins. Qu'ale o arté quèks moės.

Quanq ch'est conme cho !

Don ièr,  j'o vu qu'ale ressentait.  Et don, qu'ale alloait miu.

Ej su ureus.

Pour l'fanme.

Chin blog, os l'truvoerez in écrivant grumeautique chu internėnèt.


vendredi 26 avril 2019

D'un célèbe berge

... qu'ainme dessiner un cot, mie un jonne onme jornaleu avuc un tchyin.

" Din ch'passé, i avoait puss ed futur qu'achteure."

O bin coèr

"Ech passé et ch'futur m'baille'te l'freusse. Ureusemint qu'i o achteure !"

Merchi Flipe, ed nos foaire rire.

Et ed nos in apprinde ed bin boinnes.

jeudi 25 avril 2019

Cht'onme qui valoait un chintinme

Os connoaissez p't'ête, pour l'avir vu à l'télévision, Cht'onme qui valoait un millar ( o sis millons, ach Tchébec !).

Chin quoé, ej vos conte un tiot molet.

Ch'est un onme conme vos et mi qu'o ieu un accidint et qu'étoait casi mort ; Il o étè saprémint rafistolé per un séruzyin. Dech keup-lò, aprè, i n'est pu conme vos et mi, vu qu'il o adon ed saprés pouvoèrs.

Eh bin ! Mi, ej connoais un onme qui veut un chintinme.

Ch'est un onme, quanq i foait o dit quèk cose, ch'est mie bin.

Ches gins ri'te ed li, o l'indjeule'te.

Adon, cht'onme, i n'vut pu rin foaire.

Minme quanq i pense foaire plaisi o ête régalant, cho n'vo poin.

Vu sn'état, i vo p't'ête béto mourrir. Ches eutes gins diront p't'ête qui ont perdu unne tiote pièce ganne ?!


mercredi 24 avril 2019

Dò ringer em trotinète

T'os unne trotinète, et i feut eq tu l'ringes quèks pert, quanq t'in os pu dzoin.

Et quanq l'trotinète est à ti.

Mais achteure, ej vos l'o écrit i o deus moés, os pouvez imprunter ches trotinètes électrikes.

Et les laicier dò qu'os voulez.

Ranmintuvoez-vos ches problinmes avuc ches avules !

Innui, ej vux vos causer d'un eute problinme qu'est mie un tiot problinme :

J'o lu din unne gasète qu'à Lyon, lò dò qu'i o un fluve conme étou à Nintes, Bordieux o, bin seur, Anmyin (Vlan ! Pour ches périsiens), des gins ringe'te ches bèlés trotinètes, qui n'sont mie à eux, din ch'fluve.

Sapré idée ed cros nikdouilles.

Et j'croés qu'à Lyon, i in o granmint.

Vlan ! (un deusienme keup).

Mie, mes piés, is m'inméne'te lò dò qu'ej vux, et j'les perds janmoais.

Boinne jornée.

dimanche 21 avril 2019

Unne couronne d'épinnes

Ech jour ed Pâke, ej voudroais causer del couronne dech Christ.

Pour ête précis o écrire correctemint, ej voudroais causer del couronne d'épinnes qu'ech Christ o ieu dsu s'tète avant d'ête mis dsu unne croéx.

j'o apprins lindi o mardi qu'el couronne étoait din l'cathédrale qu'o asi à Pèris.

Mais kmint jou eq ch'est possibe ?

I o alintour ed quat-mile kilomètes inter Pèris et Jérusalème.

Et i o mile-nu-chint-quater-vint-sis ins - ej rapèle eq Jésus o né in zéro et est mort in trinte-troés aprè li, - ej mé dminde kmint qu'el couronne d'épinnes dech Christ o foait pour arriver à Pèris.

A piés, à kvau o in batieu ?

P't'ête eq ch'est un deschindant ed Noé, chti qu'o construit echl'èrche, qu'i l'o inmné.

Est possibe, vu qu'i o ieu un Edlanoé à l'merrie ed Pèris.

O bin, ch'est mie l'vraie couronne !

Eds épinnes, i n'o granmint pertoute.

Put eq mantcher ! Boinne Pâke à tertous.


samedi 20 avril 2019

Unne grande freusse

Din un indroėt dò qu'i o des gins, un onme dvise :

- "Acoutez-mi ! Din un millar d'innėes, pu rin n'vivro chu not planète.  I ėro pu d'vie."

 Din l'foule, un viu qu'o intindu dminde :

- "Os pouvez répéter ?"

- "Din un millar d'innėes,  pu rin n'vivro chu not planète."

- "Oh !" qu'i dit ch'viu, "j'o ieu l'freusse ! J'o cru qu'os avoète dit un millon."


vendredi 19 avril 2019

Minme chi

Minme chi j'ainmoais mie ch't'onme,

Minme chi ej connoaissoais mie l'mère decht'onme,

J'o unne pensée innui pour ches deus qu'ont étè assasinés ièr pèr leu fiu o tiot fiu, un jonne qu'avoait djò tué s'mère, fanme decht'onme, i o troés ins.

Ej vos in avoais causé i o quèks moés, dech mawais à grindés éreilles.

Ej comprinds mie qu'i fuche libe.


jeudi 18 avril 2019

Ech kmin ed croéx

Pâke approche.

Ches chrétiens  - j'avoais écrit chrétins ! mais ch'est mie cho et j'o corrigé - vont rvive leu kmin ed croéx.

Qui sont din ches églises, o alintour ed ches églises.

Pour ech Christ, avant ed moérir pi de raverdir, i o ieu eds noértés eures.

Pour vir ed bieux kmins ed croés, os pouvez aller in Alsace à ch'Mont-Sainte-Odile, o bin à Luérca.

In Espane.


D'avinche, boinne Pâke à tertous.

mercredi 17 avril 2019

Troés tchurés in montaingne

Il o foait bieu, et béto, i rfro bieu.

Boinne idée adon pour aller s'promner in montaingne, quanq i éro pu ches nèges.

Troés tchurés i ont allé, in montaigne.

Din un bieu tiot live ed Jean Sarène.

Ches troés tchurés n'connoaissoai'te mie l'montaingne.

Is n'sai'te mie ches dingers qu'i o, pèrt'te s'promner in montaingne, ont eds aüres et foai'te unne sapré rinconte.

Avuc Diu ?

Lisez ech live.

A béto.

Tiote pensée pour l'cathédrale ed Pèris.

lundi 15 avril 2019

Ete précis

Din un train, l'eute jour au matin, un onme cause avuc unne gin per téléphone :

- "J'arrive din quèks minutes à l'station ; tu m'prinds per dvant o per drière ?

Vu qu'echt onme savoait mie eq j'acoutaois, o eq j'intindoais, j'o mie dmindé ed précisions.

Boinne jornée.

dimanche 14 avril 2019

Tiote réunion ed famille

J'ainme vir ches gins d'em famille : em mère, mes frères et leu fanme, mes nveus et nièces, mais étou, ems onkes et tantes, mes cousins....

Innui, jour ed canche : os avons unne réunion ed famille pour nos ranmintuvoer d'em taïonne, mère ed min père, morte i o dis ins.

Malureusemint, ems onkes et tantes viusi'te, font moinss ed voéture, o meur'te.

Et mes cousins o cousines, i n'o qui rest'te loin, qui sont mie in vagnaces et qui n'vienne'te mie vu qu'is ont eq deus jours.

Adon, os srons seulemint chint-nu.

Donmage, mais ch'est l'vie, et seur, os allons bin nos erluser.

Cros becs à tertous, et boin diminche.

Unne pensée étou pour min père qu'o étè intéré i o quèks innées. 


samedi 13 avril 2019

Un accidint aprè unne berlure

Judi, un jonne et unne vake à chin père étoai'te din unne rmorque qu'o tcheute soèçante-dis mètes puss bos, din un ravin.

Ch'étoait din ches alintours ed Sin-Mertin-in-Vésubie, din ches Alpes Maritimes.

Sapré accidint !Mais ureusemint, i o mie ed mort.

Min problinme avuc cho, ch'est qu'ech jonne et l'vake vnoai'te ed juer din unne réclame pour ches tommes ed Savoée, un boin freumage qui feut connoaite.

Et ches tommes ed Savoée, is sont fabritchés in Savoée.

Adon ! Pourquoé aller foaire unne réclame din ch'sud ?

Chi os êtes m'fanme et qu'os lisez cho innui adon qu'os avez vos ages, cros bec à vos. O à ti.


jeudi 11 avril 2019

Troés-chint

L'eute smangne, i avoait in Neurmindie unne manifestation ed troés-chint gins.

Seuremint qu'is étoai'te malureus.

Moinss ed deus-chint kilomètes au sud, i avoait troés-chint tchyins à vinde.

Seuremint qu'is étoai'te malureus étou.

Adon ?!

Adon, tu prinds un tchyin et tu l'bailles à unne gin, pi un eute tchyin et unne eute gin,.... et t'éros résolu ches problinmes in foaisant sis-chint ureus.

Ureusemint qu'ej buse.


mercredi 10 avril 2019

Ech mawais cacheus

Din l'Sonme, des cacheus, i in o granmint.

Et casi tertous respect'te ches règues pour cacher.

Mais in Afrike, coeuse achl'ivoère, i o granmint ed cacheus braconniers.

Malaisié ed les haper et d'les mette in prison.

Jou eq ch'est pour cho eq l'eute jour eds animaux sont mis in prousse ?

Qu'ej vos conte :

Un cacheus braconnier voulant tuer un nonocéros o étè tué per un nénéphan.

Et d'unne !

Pi, l'o étè matché per un lion.

Et ed deus !

M'est avis qu'i n'èrkminchero mie ed sitôt.

Et p't'ête eq d'eutes braconniers vont buser avant d'ertorner à l'cache ?!


Min père n'étoait mie un cacheu, et coèr moinss un bracconier, mais l'est mort un dis dech moés d'avri. Bec à m'mère.

 

mardi 9 avril 2019

Un mawais bertcher

In Gironde, un bertcher o été condanné à bailler l'mitan ed chin ho.

L'avoait sis-mile berbis, et i s'in otchupoait mie conme i feut.

Mais maginez !

Sis-mile berbis !

Minme chi i l'in warde l'mitan, don troés-mile, ch'est coèr granmint pour un onme tout seu.

Quanq i les compte, i s'indort.

Bertchers, cinsiers, ej vos ainme bin, mais fuchez raisonnabes.

Boinne jornée, et boin corage.

Chi t'es m'fille o min frère et eq t'os ets ages innui, cros be à ti.


lundi 8 avril 2019

Is avoai'te fiate din l'fanme

Os allez rire.

In Bretane, région dò qu'os savons, os l'savez, alver ches coéchons, ches gins d'unne association ont rétchupéré un coéchon qu'avoait eds afolures et l'ont confié à unne fanme pour qu'ale s'in otchupe.

L'fanme s'in o bin otchupé.

Os savez étou qu'in Bretane, i o granmint d'abattoèrs ed coéchons.

Et l'fanme avoait p't'ête djò ouvré din un abattoèr.

O p't'ête mie.

Mais ale savoait quanq minme tuer un coéchon.

Vu qu'ale n'o foait du paté.

Pour s'otchuper dech coéchon, os pouvons dire qu'ale s'in o bin otchupé, vu qu'ech coéchon n's'o mie seuvé et qu'il avoait seuremint prins des tchilos avant d'ête tué.

Ej comprinds mie eq l'association n'o mie apprécié.

Chi is n'vouloai'te mie qu'echl'animal fuche tué, falloait l'dire à l'fanme.

O vnir tracher ch'coechon avant.


dimanche 7 avril 2019

Ech viu mossieu

... qui vit tout seu.

Maginez un onme ed miu ed quater-vint ins d'ages, qui vit tout seu, et qu'arrive pu à mèrcher.

O bin, mie granmint.

Du keup, minme pour aller acater ed quoé minger et vive à deus-chint mètes dech s'moaison, i prind s'voéture.

Maginez étou qu'ech viu, i s'o fâché avuc unne pertie ed ches éfants, et tiots éfants ; un molet à coeuse ed li, un molet à coeuse d'es fanme qu'il o tchitté, un molet à coeuse ed ches éfants et tiots éfants. I voét mie grind monde.

Minme à ches fètes.

Mais, à Noë et ch'premier janvié, i vut quanq minme foaire plaisi à des gins.

Cht'innée, il o offert trinte-sèt bèlés boètes ed chucolat à des fanmes qu'ouve'te din ches grindes surfaces d'es ville.

L'o foait trinte-sèt ureuses.

Ches fanmes.

Et un ureus.

Li.

Mi, ej su ureus ed connoaite ch'viu .

Et ed tans in tans, i foaire plaisi.

Foaisez eds ureus alintour ed vos.

Fin aisié.

Minme chin offir quèk cose.

Boin diminche à tertous.

vendredi 5 avril 2019

Min fiu ainme juer

Ej devroais écrire eq min fiu ainme coèr juer, vu qu'i vo avir vint-sèt ins, mais j'o mie écrit coèr pour mette du suspinse.

Sinmdi, min fiu étoait vnu nos vir, et aprè nonne, il o ieu invie ed fabritcher un arc.

Un fin grind arc.

Adon mi, ej su ureus ed vir qu'il est coèr jonne din s'tète.

Continue, min fiu eq j'ainme !

Conme ches eutes éfants eq j'o.

Boinne jornée à tertous ches jonnes ed moinss ed soéçante ins.

jeudi 4 avril 2019

Quanq i foait bieu

Quanq ej pèrte au matin prinde min train pour aller ouvrer, j'o ech solé din min dos.

Mais quanq ej rinte au vèpe, j'o coèr ech solé din min dos.

Déchidémint !

Déchidémint, os allez penser qu'ej su un nikdouille ! J'o qu'à foaire  dmi-tour, ej j'éroai ech solé dvant mi.

Qu'os vos disez.

Feut eq j'i buse.


mardi 2 avril 2019

Surveillez ches lanchrons

Os sonmes in avri, adon, conme chake innée, i feut surveiller ches lanchrons.

Din quèks jours, seuremint sinmdi o diminche chi i foait fin bieu, i feudro les tcheuillir pour in foaire del cramaillotte.

Pour foaire cho, rbéïez ches rchètes chu internénète.

Unne seule cose qu'i feudro : qu'i foaiche granmint ed solé.

D'avinche, boinne confiture.

lundi 1 avril 2019

Unne Ganne Espincèr voét rouve

Un jour ed manisfestation, in déchimbe - ej croés -, unne Ganne Espincère rinconte un Ganne Espincèr.

- "Ej te confie min drapieu" eq dit cht'onme, à l'fanme.

L'eute i répond :

- "J'ainmeroais bin eq tu m'confies tin tcheur."

Cho vo fin rade.

In févrié, is ont mèrié.

Mais sinmdi, j'o apprins qu'echt'onme étoait in prison : il avoait butché s'nouvèle fanme.

Ale o vu rouve et o porté plainte amon ches cadoreus.

Ches tans bleus sont edvenus noèrts.

Mi, j'o toudi em castchète bleuse dsu m'tète.

Et tout vo bin, avuc min blanc-bonnet.

Boinne jornée à tertous.

Ej précise qu'ech conte-lò n'est malureusemint mie un pichon d'avri.