Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 30 décembre 2018

Edpi ches tans

... qu'ej vos in o djò causé, ed ches rincontes ed rugby inter Toulo (se) et Toulo (n), falloait bin eq cho arrive un jour : eq j'i fuche pour rbéïer.

Au vèpe, à Toulo (se) !

Pourvu eq Toulo (?) gaingne !

A moinns eq min cros catare o ches nèges m'impêque'te qu'i aller.

Boin diminche à tertous.

vendredi 28 décembre 2018

Offrir un bétail à Noë

Ch'est p't'ête echl'idée qu'os avez ieu cht'innée à Noë : offrir un cot, un tchyin o, ch'est possibe, un beudet à un éfant.

O coèr, un pichon rouve, o unne glinne et un co !

Et ch'galibié est fin ureus.

Tant miu !

Mais, ech galibié vo béto rtorner à l'école, et in févrié, i voudro pèrtir in vagances, avuc o chin vos.

Et ch'bétail ?

Quoé qu'i vo adon in foaire ?

L'inmner ?

A chl'école, seuremint poin. O p't'ête un jour, pour in causer avuc chin moaite et ches conmarades ed classe.

In vagances ?

Chi ch'est amon chin taïon, p't'ête !

Mais chi ch'est à ches nèges, din un appèrtémint, mie possibe.

Surtoute chi il o ieu un beudet !

Etpi, jou qu'os avez pensé à ches eutes gins quanq os avez acaté ch'bétail ?

Magine deus familles qui vienche'te deus jours amon leus pèrints, chatchunne avuc un tchyin !

Magine quanq il arrive d'eutes gins pour ête avuc eux !

Cho put mette un cros brin din l'moaison : pour vive trantchille, et aprè, inter ches gins.

Adon, vraimint, quanq os voulez offrir un tchyin,un cot o eute à unne gin, busez granmint.

Et bin.

Boinne jornée.

jeudi 27 décembre 2018

D'ivèr o bin d'étè

Os l'savez p't'ête, chin quoé, os allez l'apprinde achteure, i o des freumages, dits, d'étè o d'ivèr.

Per eximpe, ch'Bieufort.

Slon quoé eq matche'te ches vakes, à l'cour in étè o din unne étabe l'ivèr, ch'Bieufort n'o mie ch'minme goût.

In général, feut miu acater et minger ech Bieufort d'étè, minme chi chti d'ivèr est fin boin étou.

Eh bin ! Rin à vir avuc ches freumages, mais j'o démuché ièr qu'i avoait deus Sin-Jean : unne in étè, ech vint-troés join, et l'eute innui, ech vint-sèt déchimbe.

Mie croéyabe, mais vrai !

Don, boinne fête à ches Jean qu'ont leu fête innui, et boinne jornée à tertous.

dimanche 23 décembre 2018

Ch'étoait un vint-troés déchimbe

Un éfant est né.

Alintour ed li, mie ed roés-mages, vake o beudet, mais des frères et unne soeur, ed des punmes-ed-tère.

Ch'étoait mie i o deus-mile-dis-uit ins, mais quater-vint-uns.

Edpi, il est mort, un molet aprè Pâke i o miu ed sis ins, adon eq l'eute, né ech vint-chonc i o deus-mile-dis-uit innées, sroait toudi vivant, minme chi li étou étoait in premier mort à Pâke.

L'un alloait dvenir min père, l'eute sroait not Père à tertous.

Bec à tertous, et boin diminche.


samedi 22 décembre 2018

Ch'est du chinoés

El joée est in toute. I suffit ed savoèr l'estraire.

Qu'il o dit, un chinoés né chonc-chint-chincante-et-unne innées avant ech Christ, est mort edpi.

Feut del déméfiance : ech chinoés, fin célèbe, il avoait un nom ed romain.

Boinnés vagances à tertous.


vendredi 21 décembre 2018

Edpi qu'is ont né

J'ainme mie ête mawais conme ej vo l'ête aprè, mais ch'est malureusemint vrai.

Din l'vie, i o toudi des gins qui djeule'te.

Pour un ouais o pour un rin, des gins djeule'te.

Achteure, os voéyons minme des jonnes os indjeuler.

Mais mardi, din ch'train eq j'o prins au matin pour aller ouvrer, l'étoait miu ed uit eures pour un keup, ej m'o su foait indjeulé per un papar.

Mie croéyabe, mais vrai !

I avoait unne jonne fanme, qui vnoait d'un poaiyis ed l'est, qu'étoait din ch'train avuc ches quat galibiés. Ech pu grind avoait alintour ed chonc o sis ins.

Et ches tiots juoai'te, conme chi 's'étoai'te tout seu din ch'train.

Leu mère laicoait foaire et n'disoait rin.

D'un keup, un ed ches quat foait tchair ech pu grind.

Qu'o cru eq ch'étoait mi qui l'avoait poussé.

Et qui m'o indjeulé.

Un molet aprè, adon qu'ech train alloait s'arter in station et eq j'alloait deschinde, ech darain, moinss d'un in, assis din ch'poussète, me rbée et m'indjeule étou.

J'o rin comprins, à pèrt qu'i m'indjeuloait.

A croère qu'is apprinde'te in sortant del panche ed leu mère.


jeudi 20 décembre 2018

L'ėtoait bin trop jonne

Ièr au matin, adon eq j'alloais, conme chake jour, prinde min train pour aller ouvrer, vlò eq chu un pont, i avoait un car d'arté.

Ej passe à man gueuche, et jé m'rinds compte que ch'mneu est deschindu ; i tient une jonne fille qui brait granmint.

Mi étou, ej m'arte et cht'onme m'dit :

- "Ale vouloait seuter dech pont."

L'étoait alintour ed sis-eures et quèrt, et l'ieu, dis à tchinze mètes in dsou dech pont, est froéde.

Adon, j'appelle ches cadoreux qui rest'te à un kilomète.

Z'ont mis tchinze minutes à vnir !

Durant un quèrt d'eure, cho sanne fin long quanq ch'est conme cho, cht'onme o toudi tnu l'tiote, alintour ed seize o dis-sèt ins d'ages, qui braiyoait et qu'o minme déloufé.

- "Os êtes bin régalant" qu'ale disoait l'pauve fille à chin seuveu, "mais laiciez-mi moérir !"

L'eute n'o rin laché.

Et ches cadoreus sont arrivés.

Infin !

Mi, j'o loupé min train pour troés minutes, et ch'deusienme étoait supprimé.

Mais i m'sanne eq j'o étè utile.

Jornée à oblier, malaisié, mais mie l'tiote et cht'onme.


mardi 18 décembre 2018

Is ont-i confondus

Quanq ches agricultcheus sont in prousse aprè ech gouvernemint et ch'présidint, is mettent du fyin et du brin chu ches voées et ches keuchies, o dvint ches moaisons ed ches onmes politikes ed leu région.

L'eute nuit, in Picardie, is ont du foaire unne berlure chin l'vouloèr : is ont ch'fyin dvint l'permaninche dechl'insoumis Frincoés Ruffin.

P't'ête qu'echt'onme reste mie loin d'amon not présidin, à Anmyin, o qu'in vrai, ch'est à boin conmarade à ch'Présidint.

Mais, à pert ches agricultcheus, mie unne gin ne l'savoait.

Avant eq j'in cause.

Boinne jornée.

lundi 17 décembre 2018

Ndan ed ti

Jou eq tu t'connoais bin ? In ndan ed ti ?

Os pouvons nos l'dminder.

Quanq ej su rintré ed mes vagances chu ches Kmins ed St-Jacques-ed-Compostelle, in octobe, conme chatchun l'foait aprè ches vagances, j'in o causé à mn'interprinze.

Et lò, unne fanme m'dit, quanq os étoème ale et mi à bir un tiot ju :

- "Tu traches tin ndan ?

- "Euh ! Mie vraimint !" eq j'i réponds.

- "Tu mèrches tou seu et in silinche ?" qu'ale continue à mé dminder.

- "Nan !".

- "Adon, tu foais mie ech Kmin ed St-Jacques-ed-Compostelle ! Tu foais del mèrche."

- "Euh ! ..." eq j'hésite coèr à i réponde.

- "Mi, ej l'o foait, ech Kmin ed St-Jacques-ed-Compostelle, i o quèks innées. In voéture.

Ch'étoait fin malaisié, vu qu'i falloait truvoer ches écailles pour avincher.

Ti, tu t'proménes."

Mes bros ont tcheus, et j'o mie ieu invie ed continuer dé dviser avuc l'fanme-lò.

Ches kmins ed St-Jacques-ed-Compostelle in voéture !!!!!!


dimanche 16 décembre 2018

Eglise o théïâte

L'eute jour, à l'télé, j'o vu un tchuré ed l'Abbaye dech Mont-Ste-Odile causé ed ches gins qui vienche'te à l'église.

- "Ach théïâte, ches gins s'mette dvan si possibe ; à l'église, is s'mette din ch'fond."

Busez.

Boin diminche.

vendredi 14 décembre 2018

Din ches gasètes

... puss qu'ej trache, moinss qu'ej truvoe ed coses régalantes à vos conter.

Dech keup-lò, ej vo p't'ête arter ed vos écrire quèks lignes chake jour.

Mais ej vos écriro ed tans in tans. P't'ête chake jour, chi ej pense qu'i o des coses à dire.

Din qué monde qu'os sonmes ?!


Chi conme mi, t'os unne mère qui s'lonme Didile, foais-i un cros bec innui.

jeudi 13 décembre 2018

I in o coèr

... ed ches obus del première djère mondiale.

Din ches tères

Malureusemeint !

L'eute jour, i n'o un qu'o esplosé à Maricourt, din unne cinse dech Bos Mdame, adon qu'eds ouvreus ouvroai'te.

Deux ouvreus ont étè inmnés achl'ôpital d'Anmyin, mais rin ed grave.

Ureusemint.

mardi 11 décembre 2018

Ches dis et douse déchimbe

J'o un cros problinme avuc ech onze déchimbe, jour ed ches ages d'em première fille.

Ièr, à dis-uit eures deus à Fienvileu, z'étoème djò ech onze déchimbe à Krasnoyarschk.

Jou qu'ej pouvoais adon souhaiter ches ages à m'fille ?

Et innui, à vint-troés eures chincante-nu à Parnou, jou qu'ej pourrai coèr souhaiter ches ages à m'fille, adon qu'is sront djò ech douse dech moés ed déchimbe à Krasnoyarschk ?

M'fille o l'réponse :

- "Ems ages vont durer trinte eures."

Ale est ureuse.

Cros bec à m'fille.

Minme probinme : pour ech tchinze déchimbe etches ages ed min bieu-fiu qu'est avuc m'fille.

lundi 10 décembre 2018

Unne moaison à l'campaingne

Qui n'o jonmoais reuver d'acater o d'avir unne moaison à l'campaingne ?

Mi, j'i su.

Et ureus de l'ête.

Mais i o unne famille, ej mé dminde chi l'o du plaisi ?!

Rbéïez !


Qui, del moaison o ed ches interprinzes, étoai'te lò in premier ?

Boinne jornée.


dimanche 9 décembre 2018

Ches tchus-cuinchés

I o unne smangne, ej vos o causé d'unne série qui o chu l'picarde cangne, Arte, l'judi au vèpe.

Et j'in o causé, étou, à ches chrétiens ed min village, pour qu'is rbéche'te et n'in foaiche'te, chi is vu'te, del réclame.

Mais is ont dit nan.

Ch'est vrai eq ch'est unne série qui cause'te ed réligion, mais dò qu'ech tchuré est un pasteur mèrié, dò qu'os voéyons du tchu, des gins qui boaise'te, o ches tètes ed fanmes.

Ch'est p't'ête pour cho qu'is m'ont répondu nan, ches responsabes chrétiens.

Mais chi ches tchus-bénis vu'te qu'i o du monde, des jonnes din nos églises, feut savoèr évoluer.

Din l'série, tout n'est mie boin à prinde o à vir, mais i avoait des boinnés coses.

Donmage d'én mie in avoèr foait puss ed réclame.


samedi 8 décembre 2018

Réponse pour l'édvinète

... dech vint-uit novimbe.

Ches vakes, qui sont eds Aubrac, ont été prins in photo in Espane.

Ej merchoais din l'provinche ed Cantabria eq j'alloais tchitter quèks kilomètes aprè, alintour d'Unqueria, quanq ej les o vues.

In vrai, in Cantabria, et din ches Asturies, i o granmint ed vakes Aubrac.

Tant miu, vu qu'is sont fin bieus.

Et vu eq j'ainme granmint l'région d'Aubrac, in Frinche.

Boinne jornée à tertous.

vendredi 7 décembre 2018

Ches leus

I éroait achteure, qu'i péroait, miu ed chonc-chint leus in Frinche.

Avuc ch'nombe-lò, ches leus, qu'i péroait, peu'te s'rproduire.

J'lé savoais mie, mais à moinss ed chonc-chint, tu pux mie t'érproduire !

Don, ches leus vont coèr s'multiplier.

Et conme cantoait Serge Reggiani, in frinchoés, ches leus ont intré din Pèris.

Manière ed causer.

Mais il avoait raison.


jeudi 6 décembre 2018

Un fin bieu chinglier

Lindi au vèpe, in rintrant ed min ouvrage, j'o vu un fin bieu chinglier.

Fin cros, alintour ed chint tchilos.

Ej l'o bin rbéïé.

Feut dire eq ch'étoait aisié !

L'étoait allongé, et mort, chu ches bords del keuchie.

Et à côté, i avoait unne voéture. In rade.

Ches ch'boucher ed Saint Nicolas qu'éroait étè ureus ed mette toute l'vianne din chin saloèr.

J'in profite pour souhaiter unne boinne Saint-Nicolas à tertous ches gins qui s'lonme'te Nicolas.

mercredi 5 décembre 2018

Tu pux alunmer

Ièr, echl'ôpital d'Anmyin o ieu un problinme d'éctricité.

Un sapré problinme, vu eq durant miu d'unne eure, i avoait pu d'éctricité.

Magine !

Un séruzyin qu'étoait in route à opérer unne gin quanq i o ieu ch'problinme.


Quèks minutes aprè :

- "Quoé eq t'os foait ?" i dminde un collègue.

- "J'os voulu keuper l'man qu'étoait afolée" qu'i répond echt onme.

- "Ouais ! Bin t'os keupé l'gambe !"

Mi, ej dis eq pour ches gins qui sont opérés, i o mie ed problinme, vu qu'is dorme'te quanq ches séruzyins s'otchupe'te d'eux.

Mais quanq minme !

Chi t'es unne fille qui vit avuc min fiu, eq t'ouves des keups din un ôpital, et eq t'os ets ages innui, cros à ti. Et à min fiu.


mardi 4 décembre 2018

Adé min père

Ej vos o, granmint ed keups, causé dech Christ, ed ches évingiles, et ed ches tchurés.

Adé min père !

Min père, él seul vrai eq j'o ieu, o défuncté i o miu ed sis ins.

Edjò !

Innui, ej causero d'un eute père qui vient d'ertorner vir chin Père : not ancien tchuré.

L'o rindu chin darain souffe verdi, à quater-vint-deus ins.

Etoème coér in novimbe.

Innui, à nu eures, i sro interé.

Pour m'fanme et éms éfants, ch'étoait un onme régalant, ouvert d'esprit, et seuchant acouter.

Quanq il o prins s'artraite, à soéçante-quatore ins, os l'avons granmint rgretté.

Nu innées aprè, l'est mort.

Trantchillemint, din chin lit dò qu'il étoait edpi quèks innées.

Adé, brave tchuré ! Fuche ureus lò dò eq tu vos.

Chi t'es min fin boin cousin, eq t'os l'canche, ti, d'ête in vie, et eq t'os ets ages innui, fin cros becs à ti.


lundi 3 décembre 2018

Unne surprinze ed puss

Névers, din l'Niève, os connoaissez ?

Ach poaiyis des vakes, i o achteure des gins qui ju'te ach rugby.

Et edpi diminche quanq is ont gaingné in juant dvant Carcassone, echl'étchipe ed Névers est première del deusienme division ed rugby ed Frinche.

Ech campionnat n'est mie défini, mais maginez din un in Névers juer avuc Clermont o bin Toulouse !

Mi, ej dis eq, ch'est étou unne conséquinche dech rékeuffemint dech climat : pu cho vo, pu ches étchipes dech nord ju'te ach rugby, et puss is gaingneront.

Jou qu'is vont in causer à Katoviche ?

A vir.

Chi t'os ets ages innui , eq t'es m'nièce et eq t'es ach Québec, cros bec à ti.

 

dimanche 2 décembre 2018

Au nom dech père

Ch'est ch'tite d'unne série in plusieurs épisodes qu'o kminché judi chu Arte, l'fanmeuse cangne picarde qu'ej vos in o djò causé.

Ches épidodes cause'te d'unne famille chrétienne et de s'vie.

Et ch'premier épisode o bin kminché.

Ej vos conseille de rbéïer.

Boin diminche à vos.


samedi 1 décembre 2018

Ches éfants-roés

Tertous ches jornaleus in cause'te edpi quèks jours, ches politikes vu'te interdir eq ches pèrints butch'te leus galibiés.

Unne tiote fessée ?

Nan ! Pu l'droét.

Merkerdi, j'o lu un article qui dvisoait chu ches éfants suédoés. O norvégiens. Ej sais pu, mais is étoai'te dech grind nord.

Il étoait écrit eq din ch'poaiyis dò ches pèrints n'peu'te pu butcher leus éfants edpi granmint ed tans, ches éfants sont dvenus roés.

Ches galibiés déchide'te achteure quoé qu'is vont minger, quanq is vont aller s'joutcher, et minme dò qu'is vront in vagances.

Quanq ej lis cho, j'o invie ed dire à nos politikes ed foaire atincion à quoé qu'is vont prinde conme déchision.

Et chi un tiot dech grind nord vient à m'moaison, feut i dire qu'ej su indépindint.

Boinne jornée, et boinne fète àntertous qui s'lonme'te Eloi.

vendredi 30 novembre 2018

I o mie ed tiotés économies

Avant ièr au vèpe, i avoait à Pèris unne rinconte ed fotbal inter Pèris et Liverpol. Pour mémoère, Pèris o gaingné.

Mais, in minme tans, i avoait Paul Mac Cartney qui cantoait à Pèris.

Pour ches gins qui n'sai'te mie, ech Paul est un ancien canteu ed ches beatlès, fameus groupe ed canteus din ches innées soéçante, soéçante-dis, originaire ed Liverpol.

M'est avis qu'ech Paul o vnu avuc ches fotbaleus ; casi minme eure de spectake eq ches jueus, et minme ville.

L'o foait quèks économies.

I n'o p't'ête dzoin.

mercredi 28 novembre 2018

Nouvèle edvinète

Din qué poaiyis qu'o étè foaite l'photo d'aprè ?


I o rin à gaingner, mais juez et busez.

Pour vos dépèrtager, disez-mi din qué région eq ch'est.

Amusez-vos bin.

mardi 27 novembre 2018

Ech train chiflero troés keups

Ièr au vèpe, durant que jé rbéïoais ech viu film qu'étoait à l'télévision et qu'est fin bieu, minme in noèr et blanc, jé rchuvoais unne fin méchante nouvèle del Société ed ches Kmins ed Fèr :

"Vot abonnemint pour ch'train in déchimbe veut deus-chint-vint-quat euros."

- "Et quoé eq cho foait ?" qu'os vos disez, chi os savez mie qu'in novimbe et avant, cho valoait chint-soéçante-sis euros.

Os savez bin cartchuler !

Cho rintchérit, in un moés et pour ches eutes à vnir, ed chincante uit euros.

Eh ouais ! os avez bin lu ; trinte-quat pèr chint et quèks porètes ed puss.

D'un keup d'un seul.

Ej pux vos dire qu'i in o un qui vo avir ches éreilles qui chifleront.

Et ej su mie tout seu

Minme chi m'fanme est pèrtie quèks jours vir s'mère.

"Chi ti étou tu m'abindonnes...."




lundi 26 novembre 2018

Is ont ainmé ch'Nord

Is ?

Ches croétes !

Sont vnus quèks jours din ch'Nord, à Lile, pour juer à ch'tennis et essayer ed batte ches jueus frinchoés.

Chi os m'avoète dmindé ed pèrier chu ches frinchoés, j'éroais mie voulu.

Leu capitaine avoait des jueus qu'étoai'te connus, mais qu'avoai'te rin jué, et coèr moins gaingné, edpi des moés.

Adon, seur eq ches croétes étoai'te trantchilles, et casi seur ed gaingner.

Et is l'ont foait.

Aisiémint !

Pour mi, ch'est mie unne victoère ed ches croétes, mais unne saprée détchuloté annonchée et prins pèr ches frinchoés.


dimanche 25 novembre 2018

Pourquoé croère in Diu

... quanq ej su l'fille ed pérints et taïons divorchés ?

Pourquoé croère in Diu quanq ej su l'fille ed pérints et taïons chuchonneus ?

Pourquoé croère in Diu quanq ej su l'fille ed pérints et taïons qui n'croyoai'te mie in Diu ?

Pourquoé croère in Diu quanq ej su mérié à un onme qu'o mie ieu unne éducation ed chrétien ?

Jou eq ch'est vu qu'un ed mes taïons o étè asassiné ? Ej croés mie.

Ej croés, pour conclure, qu'os pouvons mie l'esplitcher.

Mais ch'est bieu, et feut croère eq cho possibe, vu qu'ej connoais unne jonne fanme conme cho.

Boin diminche.

Boinne Sainte Catherine à tertoutes ches jonnés filles.


samedi 24 novembre 2018

Min téléphone portabe s'ranmintuvoe

I o quèks smangnes, un matin, j'invoée un message à m'mère in écrivant cho :

"Bojour ém tiote mère adorée,

... patati, patata,..... blabla, blabla,...

Cros becs à ti."

Ièr, ej mé déchide à i in rinvoéyer un ; jé kminche à écrire "bojour ém", et lò, min téléphone m'propose "tiote", pi "mère", pi "adorée".

I s'ranmintuvoait quoé eq j'avoais écrit un jour.

P't'ête qu'un jour, i répondro à m'place.

Conme l'o foait, i o chincante ins echl'inter, os savez conme ech vint-deus à Asnières :

- "Mdame, vot fille o répond mie, vu qu'ale o appelé ech séruzyin ste nuit et qu'ale o allé à chl'ôpital pour foaire naîte ech papar qu'ale avoit din s'panche."

Ch'étoait i o miu ed chincante ins.

Boinne jornée à tertous.

vendredi 23 novembre 2018

Vo tchier

Cho, os pouvons écrire eq ch'est mie régalant ed s'intinde dire cho.

Vo tchier !

Mais mi, innui, ej vux ête régalant.

Per eximpe, in vos foaisant gaingner edl'argint.

Quanq os irez tchier.

Pour vos espliquer, i o un ôpital périsien qui propose ed l'argint à ches gins qui vont tchier pour eux.

Echl'ôpital o des scieintifiques qui analyse'te, aprè, vot brin.

Et ch'est pour ho qui baille edl'argint.

Ech brin pour mi, ch'est d'ête trop viu pour eux.

Pour un keup, ej vo ête vuldjaire :

- "Cho m'foait tchier".

jeudi 22 novembre 2018

Il avoait nu ins

Un éfant ed nu ins est mort ech dis-sèt septimbe, à Mulhouse, vu qu'i n'vouloait mie foaire ches dvoèrs d'école à s'moaison.

Quanq is ont vu cho, chin frère, s'soeur et unne bèle-soeur l'ont butché.

Et tué !

Nu ins !

Feut savoèr eq ches dvoèrs à l'moaison, ches galibiés n'sont mie obligés d'ête foaits.

Mi, cho m'met vraimint in prousse d'apprinde qu'un fin jonne put ête tué per s'famille pour cho.

Crosse pensée pour ch'tiot, minme ch'il est mort, et pour tertous qui n'ainme'te mie foaire leu dvoèrs.

mercredi 21 novembre 2018

Ches boéïeus ed Frinche

N'in vlò d'unne affoaire !

I péroait eq ches seucisses ed Mortieu, din ch'Deubs, n'sont mie foaites avuc des boéïeus ed Frinche, mais ed Chine.

Et il est interdit ed mette, din ches seucisses ed Mortieu, eute cose eq des produits ed Frinche.

Qu'i péroait.

Mi, ej dis qu'i feut miu un boéïeu que mie ed boéïeu. Chin quoé, l'vianne s'seuve.

Etpi ! Din granmint ed keups, ches gins, is matche'te l'vianne ; Mie ches boéïeus.

Adon ?

Artons ed mette ech brin pour un boéïeu quanq l'seucisse est fin boinne.

mardi 20 novembre 2018

Un bieu cadieu

Unne fanme, qu'est unne ed mes bélès-soeurs, o ches ages innui.

Et conme cadieu, ches éfants i offe'te unne moaison.

In vrai, l'moaison, m'bèle-soeur l'o acaté avuc chin onme.

Et innui, is inménage'te ndan.

Adon, leus éfants n'offe'te mie l'moaison à leu mère, mais ch'plaisi ed prinde din leu appèrtemint et d'inmner din l'moaison, qu'est à quèks chintaines ed mètes, toutes ches boétes ed vétemints, vaisselles et eutes.

Ch'est un bieu cadieu qui font.

M'bèle-soeur, ale vo ête l'première à rintrer din l'moaison, et toute l'jornée, ale vo foaire du sport.

Vraimint un bieu cadieu.

Cros bec à m'bèle-soeur.

Et boin corage.

lundi 19 novembre 2018

Unne crosse truie

Magine unne fanme ed soéçante ins, un molet crosse et qui vit seule.

Un jour, durant quèks jours, t'es in vagances avuc t'famille et l'fanme.

Et unne nuit, tu dors avuc t'fanme din l'minme cambe eq l'eute.

Et fanme pèrte s'laver, et ch'est adon qu'el fanme s'met in tiote tchulote, conme chi i avoait mie ed problinme.

Quanq t'fanme sort, l'eute, l'crosse vieille vo s'laver.

Pi, ale rsort, mèr-nud in dsou d'unne serviète.

Echt'onme vo infin s'laver et i dis eq din un quèrt d'eure, il espère qu'ale éro vêtu.

Mais un quèrt d'eure aprè, rin n'o cangé ; l'ést toudi mer-nud dsou unne serviète.

Et aprè seulemeint, ale s'o vétu.

Quoé qu'os disez d'un conte conme cho ?





dimanche 18 novembre 2018

Feut mie confonde

Ech diminche onze novimbe deus-mile-dis-uit, i o unne smangne, cho foaisoait chin ins qu'el première djère mondiale étoait définie.

Os l'avez vu conme mi, et os in avez seuremint intindu causé.

Din min village, i o des gins qu'ont ieu eute cose à foaire : vinde du boudin.

Busez, conme m'fanme l'o foait :

Djère et boudin ! Boudin et sanke ! Don, djère et sanke !

M'fanme o raison : ches gins éroai'te pu coésir unne eute date pour vinde leus boudins.

Quoé qu'os in disez ?

samedi 17 novembre 2018

Fuchons écologisse

I feut seuver not planète.

Un ed ches cros problinmes, din ches innées à vnir, sro d'avir del'ieu qu'os pourrons boère.

L'eute jour au vèpe, in mingeant avuc m'fanme, ej mé su dit :

- "Quanq os buvons, m'fanme et mi, du vin, os in buvons moinss d'unne boutèle ed soéçante-tchinze chintilites à deus.

Et rin d'eute.

Mais quanq os n'buvons que del'ieu, os in buvons miu d'un lite ed dmi.

Don, os, m'fanme et mi, pouvons seuver, in pèrtie, l'planète, in buvant du vin. In foaisant atincion d'én mie in boère puss qu'unne boutèle à chake keup qu'os mingeons."

Jou qu'os voulez, conme mi, foaire quèk cose pour l'planète ?

A béto !

vendredi 16 novembre 2018

L'foère à érings ed Dièpe

... est in dinger.

A coeuse ed ches Gannes Espincers qui vont manifester ech sinmdi-lò.

Cht'innée, cho sro l'quarante-nuvienme foère. Mais chi ches gins n'peu'te mie vnir, nos voésins neurminds vont ête trisses.

Et j'les comprinds.

L'foère, ale foait vnir du monde, et rintrer ed l'argint din ches caisses del ville.

Et l'ville ed Dièpe, ale est communisse.

I n'o coèr, des communisses.Et des villes gérées per des communisses.

Et à mn'avis, din ches Gannes Espincers, i o étou des communisses.

O bin ches cousins à eux.

Cho met p't'ête ech brin din l'tète dech merre ed Dièpe.

Cho n'impêque mie qu'él foère à érings ed Dièpe est in dinger.

A suive. Lindi.


jeudi 15 novembre 2018

Ch'est pour ed vrai

Qui n'o jonmoais intindu causer dech film, à ches télévisions, qui sl'onme "Alerte à Malibu" ?

Os dvez ête mie granmint à l'ête.

Put qu'mantcher, achteure, os l'avez seuremint vu o intindu. I o l'fu edpi quèks jours, avuc malureusemeint des gins qui meur'te.

I o alerte à Malibu.

Pour ed vrai.

mercredi 14 novembre 2018

I o ed toute à Pèris

Un indien à Pèris, os avez djò vu o intindu causé ! Ch'est un film ed déchimbe mile-nu-chint-quater-vint-quatore, avuc un tiot qui s'lonme Mimi-chitchu et qu'arrive à Pèris in ayant tchitté esn Amazonie.

Sapré cangemint pour li !

Cho, ch'est don un film ; ch'est mie pour ed vrai.

Mais pour ed vrai, i o ieu :

- un tigue din Pèris.

Ch'étoait i o alintour d'un in ; l'bète s'étoait seuvée d'un chirke.

I n'o qu'ont ieu l'pu bèle freusse ed leu vie avuc cho.

Et je l'disoais, ch'étoait i o un in, in novimbe.

- un tiot lion à Pèris.

Ch'étoait lindi au vèpe. L'bète, qui sl'onmeroait Poutine (!!), o étè rtruvoé din unne voéture.

Maiq quoé eq ches gins ont din leu tète ?

Un tiot lion dviendro grind ! Et seuremint mawais !

Un lion à Pèris, pour vot gouverne, ch'est étou ch'nom d'un live.

- unne madgète à Pèris.

Ech keup-chi, ch'étoait ièr. Des gins ont vu l'madgète prinde ech métro. Un onme éroait voulu, qu'i péroait, l'inmner ach gardin ed ches Tuileries.

Mais n'o mie réussi. Qu'i sanne.

Mi, quanq ej voés toute quoé qu'i s'passe à Pèris, ej mé dminde pourquoé eq ches pèrisiens tchit'te leu ville pour pèrtir in vagances.

Surtoute eq din un molet puss ed troés moés, os leu amnons vieus, vakes, coéchons et eutes bètes.

Boinne jornée.


mardi 13 novembre 2018

El lçon dech viu

... leu ed ches mers.

Os avez suivi l'Voée du Rhum, avuc des cros et fin bieus batieus ?!

Un jonne, trinte-chonc ins, est pèrti fin rade, o mné durant sèt jours, mais l'course o duré miu ed sèt jours.

Et chti qu'o gaingné o soéçante-deus ins, foait l'course sèt keup, et n'l'o gaingné qu'un keup : lindi.

Bèle lçon ed corage, chin s'motcher dech jonne qu'est quanq minme un boin.


lundi 12 novembre 2018

T'os matché d'l'ail

Verdi, à mn'interprinze, unne collègue arrive au matin, et in m'disant bojour, ajoute :

- "T'os matché d'l'ail au matin ?"

- "Nan !" eq j'i réponds.

Mais magine un molet quoé eq j'o adon pensé !

- "Jou qu'ej pue del bouke ?"

J'o vraimint mie ainmé.

I o minme fallu qu'ej esplique et dminde discrétemint à unne eute jonne fanme qu'est fin régalante chi i avoait un problinme avuc m'bouke.

Ale m'o eq nan, mais j'pux vos dire que toute l"jornée, j'i o pensé.

Ej mé dminde chi innui, din quèks eures, ej vos mie minger d'l'ail.

Manière d'ête seur.

Boinne jornée à tertous.


dimanche 11 novembre 2018

Un sapré séruzyin

Quanq t'es douze jours à un indroét, obligé eq tu voés eds églises, et obligé qu'i o au moinss un sinmdi et un diminche.

Don, chu ches kmins ed Saint-Jacques, j'o vu eds églises, granmint, et granmint ed frunmées, malureusemint, et j'o passé un sinmdi.

Ech sinmdi au vèpe, din ch'gîte dò qu'os étoème, ech responsabe vient m'vir à dis-sèt eures chincante-nu pour m'dire qu'i o, chi ej vux, unne messe à dis-uit eures din chl'église d'à côté.

Ni unne, ni deus, fin rade, j'i vo.

Cho foait, feut l'savoèr pour comprinde, sèt jours qu'os avons kminché à mèrcher.

Ech tchuré n'est mie lò et arrive dis minutes aprè, trantchille conme Batisse.

L'messe est toute in espanol, et j'i comprinds mie grin cose.

Mais j'i su.

Ech lindman, quanq j'erkminche à pèrtir, j'o pu ed mau à min génou et à mes piés.

Adon qu'avant l'messe, j'in avoais quèks uns.

- "Quoé ch'est qu'i cho passé ?" qu'os vos dmindez p't'ête.

T'os qu'à croère !

Fin crosse pensée, innui, pour toutes ches gins mortes à l'première djère mondiale.

samedi 10 novembre 2018

Démuché ièr

Pour ech premier keup, j'o lu cho :

- "L'vie, ch'est conme unne bicyclète. I feut avincher pour n'mie perde echl'étchilibe."

Ch'est bieu, qu'ej truvoe.

I péroait eq ch'est Bébert Einstein qu'éroait dit cho.

vendredi 9 novembre 2018

Pour gaingner

... feut s'mucher.

Infin, ch'est quoé qu'is font ches mneus ed batieu qui sont pèrtis pour l'Guédlope edpi diminche. Quèks uns s'sont mucher din des ports pour laicier passer ches hernus qu'i o din ches mers achteure.

Z'ont p't'ête raison, vu que ches eutes, is ont, des keups, berzillé leu batieu.

Maginez ! Chti qui vo gaingner n'p'tête mie djò pèrti ed Saint Malo.

jeudi 8 novembre 2018

Ech nouvieu fotbal

Mardi au vèpe, os l'avez vu, i avoait unne rinconte ed fotbal inter echl'étchipe ed Napes, in Italie, et chto-lol ed Pèris.

Mi, j'o rbéîé qui juoait din chatchunne ed ches étchipes.

A Napes, i avoait un italien seulemint, et à Pèris, un frinchoés.

Unne tiote canche pour nos, i avoait un deusienme italien qui juoait, mais pour Pèris.

I o quarante ins, t'avoais seulemint un o deus jueus d'un eute poaiyis din ches étchipes.

Boinne jornée à tertous.

mercredi 7 novembre 2018

Pusieurs

Ièr, l'fanme d'un nveu o ieu un deusienme papar.

Ej su ureus.

Is avoai'te ieu unne fille i o troés ins chi ej dis mis unne berlure, et ièr, z'ont ieu un fiu.

Deus éfants, os pouvons eq cho foait pusieurs.

Bin eux, ch'est conme qu'is ont lonmé leu fiu : Pusieurs.

Tu voés mis cho tous les jours, mais ch'est eux qu'ont coési.

Pusieurs, conme tiot nom, ch'est bin conmode.

Magine !

T'os un fiu, tout seu, et t'i bailles ech tiot nom. Avec un seul fiu, tu pux quanq minme dire eq t'in os Pusieurs, minme chi t'os qu'unne bouke à norrir.

Min nveu, m'nièce et vos galibiés, fuchez ureus. Mais seuchez qu'i l'est possibe d'avir un troésienme tiot, minme chi os êtes djò pusieurs.


lundi 5 novembre 2018

Ete bin étchipé

... pour mèrcher.

Quanq tu pèrtes mèrcher alintour ed dis jours achl'apréseu, per eximpe in novimbe, i t'feut :

- deus poaires ed keuchures. Unne pour mèrcher, et l'eute pour aprè.


- unne maronne et unne casake foaites pour ches jours quanq i pluvroait.


Aprè, tout iro bin.

Chi os foaisez cho, pensez étou à prinde ed vieillés gasètes pour mette l'nuit din vos keuchures.

Boin voéyage.

Chi t'es m'nièce, eq t'os ets ages et eq tu restes in Allemane, fin cros bec à ti.


dimanche 4 novembre 2018

Ches kmins ed Saint-Jacques-ed-Compostelle

Mes gins,

Ej rinte ed douse jours ed mèrche chu ches kmins ed Saint-Jacques-ed-Compostelle, in Espane, inter Comillas et Ribadéo, din ch'nord.

Durant ches douse jours, j'o pensé à vos, vos o mis quèks articles, mais rin chu ch'voéyage.

Cho vo vnir. Ed tans in tans, din ches smangnes qui vien'te.




Boinne jornée à tertous.


jeudi 1 novembre 2018

Pour bin dormir

L'miu, ch'est ed rester à s'moaison.

O bin, mèrcher granmint. Alintour ed trinte kilomètes per jour.

Coésichez.

mardi 30 octobre 2018

Dò qu'is vont ches mots

Jou eq cho vos est jonmoais arrivé ? D'écrire chu un ordinature et de n'mie avoèr ches mots qui s'inscrive'te !

Per eximpe, echl'ordinature té dminde un identifient, t'écris, et rin. T'avoais mie clitché din l'case.

Mais tin identifient ? Dò qu'il o étè ?

Cho m'arrive souvint, et j'les o jonmaois rtruvoé.

Chi os savez dò qu'is sont disez-lé mi.

Merchi.

dimanche 28 octobre 2018

Insanne c'est toute

Jou qu'os connaissez ?

Ch'est un film, mais surtoute in premier, un boin live écrit in deus-mile-quat pèr Anna Gavalda.

Os démucherez l'vie ed quat gins qui rest'te din l'minme immeube, à Pèris.

Et qui s'croése'te ed tans in tans.

Ch'est mie l'vie d'un coupe ed gins mériés edpi trinte ins.

Ch'live est fin bieu à lire.

Jou qu'os avez canger d'eure vos orloges ?

Boin diminche.

vendredi 26 octobre 2018

Mes deus reuves

Innui, quanq j'écris reuve, ej vux dire invie.

Edpi granmint d'innées, j'o un reuve : keuper, o foaire seuter, quat mètes ach sonmet dech Mont-Blanc, manière ed foaire eq tous ches lives ed géographie fuche'te avuc unne crosse berlure.

Magine !

Quat-mile-uit-chint-sèt mètes,  quat-mile-uit-chint-sèt mètes,  quat-mile-uit-chint-sèt mètes, et achteure, quat-mile-uit-chint-troès mètes !

Cho m'o rire eq d'i penser.

Etpi, l'eute jour, in rbéïant ech jornaleu picard à trèse eures, j'in o ieu un deusienme, ed reuve.

Mette un bouchon à l'source del Sonme, à Fonsonme, et attinde quèks jours o smangnes.

Un jour, pour ches pékeus ed Voéyéne, pi Fuillère, pi L'keuchie o coèr Longpré, pu d'ieu din l'Sonme ; pourroai'te aller ramasser ches pichons in mèrchant !

Et ches ortillons ? Pu d'ieu étou à leus ortillonages et is pourroai'te i aller in tracteu !

Quanq ej dis boucher l'Sonme à Fonsonme, cho pourroait ête l'Loère à ch'Mont-Gerbier-ed-ches-Joncs.

Magine Nintes et Saint-Nazaire tchinze jours aprè!

Ej reuve.

Mais chi os voulez m'aidier, os pouvez.

mercredi 24 octobre 2018

Infin del pleuve

Edpi qu'os l'attindoème, ale est arrivée.

In vrai j'o étè l'truvoée : In Espane, poayis dò qu'i o mie toudi ech solé. L'pruve ! J'o ieu ièr del pleuve, et j'in éro p't'ête coér aprè-dman o diminche.

Quoé vos dire ?

Vive l'Frinche !

lundi 22 octobre 2018

Feut eq cho s'foaiche

Verdi, au matin, din ch'train qui m'inmnoait à mn'ouvrage, unne vieille fanme arrive à côté ed mi qu'étoais assis, péte un keup et à chin tour, s'assit. A côté ed mi.

Mie unne estchuse, rin.

Quoé i dire ?

Rin ! Vu qu'i sanne qu'ale fuche sordeuse.


jeudi 18 octobre 2018

Unne mawaise anmoèle

In alsace, conme pèrtoute, i o des voées réservées à ches bicyclètes. Et rin qu'à ches bicylètes, avuc, bin seur, unne gin dsu.

Mais à Strabourg, p't'ête pour éviter eq tu t'indormes chu t'bicyclète, is ont ieu l'idée ed mette, au mitan del keuchie, unne anmoèle electrique.

Tu roules, tu t'indors, tu chambuques din chl'anmoèle.

Ej té dminde un molet quoé qu'is ont din l'tète !

A bicyclète, ouvrez les ius. Au moinss un !

mercredi 17 octobre 2018

Minisse ed père in fiu

Edpi ièr, infin, os connaissons ches minisses dech nouvieu gouvernemint.

I o quèks dépèrts, et i o quèks nouvieus.

Per eximpe, à l'agritchulture, ch'est, achteure, Didier Guilleume.

Din ches innées mile-nu-chint-quat-vint, os avoème ieu chin père, Françoés Guilleume, un ancien syndicalisse qu'avoait torné ch'casake.

Déchidémint, l'politike, ch'est unne affoaire ed famille.

A moinss qu'ej foaiche unne berlure quèk pèrt.

Disez-lé mi, et n'mé rbéïez-mi ed berlong, conme diroait chti qu'est, achteure et edpi ièr, chl'ancien minisse ed l'agritchulture.



mardi 16 octobre 2018

Unne réclame qui surprind

Os l'savez, i o miu d'un moés, ej m'o berzillé l'man. A man droéte.

Et ièr, in rbéïant ém messagerie électronike, quoé qu'ej voés, unne réclame pour soégner ches artitchulations.

"Os artitchulations vos font granmint ed mau ?" qu'is disoai'te.

Kmint qu'is ont foait pour savoèr ?

A moinss qu'is seuche'te qu'ej vo béto pèrtir mèrcher granmint !

Unne cose est seur : os sonmes - bin ?! - surveillés.

Boinne jornée à tertous.

lundi 15 octobre 2018

Kmint tuer un bétail

In premier, pour tuer un bétail, feut in haper un.

Ches anti-spéchisses diroai'te qu'os pouvons haper un onme, vu qu'i o edjalité inter ches bètes et ches onmes.

Mettons !

Don, os hapez un onme.

Os foaisez vnir unne tchinzainne ed conmarades à vos.

Is vos aide'te à tuer cht'onme, et rpèrt'te chatchun, ech jour minme, avuc un morcieu ed vianne.

Chi cho rsanne à quèk cose qu'os avez vu o intindu i o mie granmint ed tans, ch'est possibe. 

Et j'l'o p't'ête foait un molet sprès.

Boinne jornée.

dimanche 14 octobre 2018

Ete présintabe

- "L'eute nuit, din min lit, j'o ieu granmint ed mau à tout min corps, vu eq j'étoais inchifernè et eq j'avoais adon prins granmint ed drogues pour m'soégner. Chin foaire atincion à ches mélinges interdits."

Qu'ale m'dit, l'vieille fanme.

- "J'étoais imbêtée", qu'ale rajoute, "vu qu'ej me disoais eq chi ej mouroais seule din m'moaison, j'étoais mie présintabe. Ej mé dmindoais chi falloait qu'ej cange ed kmise ed nuit, et toute, et toute."

Ben ouais ! I o des gins, pour aller vir Diu, is vu'te ête présintabes.

L'vieille fanme, ale o tellemint busé, qu'ale est mie morte.

Boin diminche.

samedi 13 octobre 2018

Unne berlure politike

Verdi :

"Mes gins, os l'savez, i o unne gin ed not pèrti qui vo p't'ête dvenir minisse. Cho n'me plâit poin. Feudro don qu'os i mettonche des bâtons din ches gambes. Feut étou, pour n'mie l'aidier, qu'os causonche ed l'eute conmarade qui ... .

 Ej compte chu vos."

Coèr verdi, un jornaleu :

- "Echt'onme qu'o invoéyé ch'message  o foait unne berlure : Il o écri à chti ed qui qu'i cause !"

Ben ouais ! Quanq os sonmes un nikdouile, os l'sonmes pour l'vie.








jeudi 11 octobre 2018

Vu et intindu din un film

Unne fanme dit :

- "Ej jure ed dire l'vérité, toute l'vérité, rin qu'él vérité."

Et ale ajoute :

- "Minme chi ej mins conme ej respire."


mardi 9 octobre 2018

Vive ed not éto

Ièr eds agritchulteus ed l'est del Frinche ont manifesté et djeulé pour eq ches aides qui rchu'te tous ches ins leu fuche'te bailler rondébilis.

Cose étringe, chu un tracteu, is avoai'te écrit : "laiciez nos vive ed not éto".

Busons !

Unne gin qui vit ed chin éto n'rchut mie eds aides.

lundi 8 octobre 2018

Laiciez-les foaire

L'eute smangne, ach Sonmet-ed-l'Elevage qu'o lieu chake innée à Cournon, in octobe et in Auverne, os ls'attindoème, et is sont vnus : ches anti-spéchisses.

I o un in, is étoai'te alintour d'unne vintaine ou d'unne trintaine, et avoai'te ieu affoaire à unne étchipe ed rugby auverniate ed soéçante jueus et puss.

Magine kmint eq cho s'avoait défini ! In Auverne, ches gins sai'te juer ach rugby et foaire ches mélées;

Cht'innée, ches anti-spéchisses, is ont osoé aller au mitan dechl'indroét dò eq ches bètes étoai'te présintées pour ches concours.

Et i o minme un keup, deus fanmes ont voulu défrunmer un toèr.

Un cinsier qu'étoait lò et qui rbéïoait o adon dit à chin voésin qui rbéïoait étou :
- "Laice-les foaire".

Et il o pensé : os alons rire.

Mais ches cadoreus qu'étoai'te lò, eux étou, n'ont mie voulu et ont arté ches deus fanmes.

Donmage !

Unne pensée, in écrivant cho, pour l'famille del fanme ed Cannes tuée sinmdi pèr un toèr à Aigues-Mortes.

dimanche 7 octobre 2018

Ech deusienme mèriage

Granmint ed gins s'mèrie'te deus keups : un keup à l'merrie, pi un eute à chl'église.

Souvint, ch'est minme jour : l'matin à l'merrie, et aprè-nonne à chl'église.

Des keups, t'os ech verdi à l'merrie, et ch'sinmdi à chl'église.

Mais lò, feut qu'ej vos conte un sapré deusienme mèriage.

Ch'étoait l'eute smangne, alintour ed Nèle.

Un onme et unne fanme, achteure, feut préciser, ont mérié à chl'église. Is s'avoai'te mérié à l'merrie i o alintour ed trinte ins.

Eh ouais !

I o quèks dizaines d'innées, is ont mérié, pi aprè, ont ieu troés éfants.

Et i o quèks tans, leu darain jonne, qu'o alintour ed nu ins, o dmindé ech batinme.

Pour ches gins qui li'te min blog et qui n'sai'te mie, l'est possibe d'ête batisé à pèrtir ed quèks innées ed vie, quanq os avez mie étè batisé quanq os étoème un papar.

Don, lò, ech tiot galibié vut ête batisé.

Et ch'o foait buser ches pèrints : "et nos ! chi os nos mérieroème à chl'église ?"

Et is l'ont foait. Alintour ed trinte ins aprè l'merrie.

Ch'est bieu.

Merchi à leu fiu.

samedi 6 octobre 2018

Allez à Mouins-Sèrtous

Déchidémint !

Ièr, ej vos cause ed Grasse, et innui, ej foais del réclame pour unne eute ville ed ches Alpes-méritimes, Mouins-Sèrtous :dman diminche, i éro une fête du live.

Ej conseille à ches gins qui sront din ches alintours, d'i aller.

Mi, ej pux mie, mais chin quoé j'éroais bin alleé dminder unne dédicache ach jonne auteu ed chincante ins, Toène Vissuzène, pour ches deus lives ed li eq j'o acatés, "Ches silinches assourdissants" et "Inter fuite et espoèr".


Boinne visite.

vendredi 5 octobre 2018

L'étoait moinss deus

..., avant qu'is euche'te réussi quoé qu'is vouloai'te foaire : butcher un conmarade. Qui n'in n'est, visiblemint, mie un.

J'esplique.

A l'prison ed Grasse, l'eute jour, des prisonniers, moinss ed dis-uit ins, ont kminché à berziller, avuc unne tabe, ches murs del prison dò qu'is étoai'te.

Mie pour s'seuver del prison, mais pour aller butcher un eute priosnnier.

Ureusemint pour chti-lò, mie croéyabe mais vrai, un eute prionnier o prévnu pèr téléphone ches cadoreus.

Qu'is ont arrivé avant, don, eq ches berzilleus euche'te pu foaire quoé qu'is avoai'te invie ed foaire ; is avoai'te détruit quat murs, et i in avoait coèr deus.

Conme diroait ech Zèf, chi os in avoète mie intindu causer, ej vos mets au parfum.

Boinne jornée.

jeudi 4 octobre 2018

Ech cri est toudi ech début d'un can

Ch'est ch'tite d'un tiot film qu'o étè diffusé ech premier octobe din unne région au mitan del Frinche.

Ch'est chu des jonnes, nu, qu'ont ed cros problinmes ed société, qui sont mie in prison, mais qui sont quanq minme din un centre d'éducation frunmé.

Rin ed bin bieu, pour eux.

Din ch'centre, ches jonnes ont fabritché des barboères, et is sont toudi filmé avuc cho chu leu brongne.

I o un keup, din ch'film-documintère, i o un galibié qui dit :
- "Nos, os avons mie ieu l'canche d'ête protégé pèr nos pèrints. Chin quoé, os sroème mie lò."

Mi, ej truvoe eq ch'est un boin film, avuc un bieu tite.

Boinne canche à ches nu galibiés, et à tertous ches eutes qui sont conme eux;

Boinne canche étou à leus pèrints.

mercredi 3 octobre 2018

I n'o rin din ch'maronne

I o miu ed deus ins, un onme, un molet viu, socialisse, s'est mis à croère qu'un eute socialisse, o, in vrai, qu'avoait ouvré pour ches socialisses conme minisse, pourroait bin dvenir présidint del Frinche.

Ch'alloait surprinde, mais i pouvoait.

Et il o dvenu, présidint, ech jonne in qui l'eute croéyoait.

Pour ête régalant, ech nouvieu présidint o lonmé ech socialisse conme minisse.

Mais, edpi quèks moés, not présidint o des ruses, vu qu'i rmue granmint et eq cho n'plaît mie à tertout.

Et - cho n'éroait in à vir avuc quoé qu'ej viens d'écire à dsu - mais chin conmarade dech début voudroait l'tchitter pour rtorner à l'merrie ed Lyon, lò dò qu'il étoait avant.

Ch'est bieu d'aidier un jonne conmarade.

Mais quanq os avons rin l'maronne, ch'est un cros problinme.

mardi 2 octobre 2018

Mèrcher

Edman, cho fro deus moés eq j'o arté d'ouvrer : troés smangnes ed vagances, pi sis smangnes à soégner m'man berzillée.

Adon, avant ed pèrtir - o rpèrtir - in vagances din troés smangnes chu ches Kmins ed Saint-Jacques-ed-Compostèle, ej mèrche ; unne man din ch'plâte n'impêque mie ed mèrcher.

Manière ed pouvoèr foaire, béto, trinte kilomètes chin avoèr ed mau à mes piés.

O, surtoute, moinss.

Etpi, achteure, i foait bieu, ch'est l'aprèseu, et i o ed bèlés coses à vir.




A béto !

lundi 1 octobre 2018

Rchette del tèrte tatin neurminde

Vu qu'os sonmes achl'apréseu et eq ch'est l'saison ed ches punmes, ej vo, innui, vos bailler el rchette del tèrte tatin neurminde.

I vos feut :
- del pâte à tèrte,
- des boinnés punmes,
- du bure,
- du chuke,
- un tiot molet ed Calvados.

Os plunmez ches punmes pi os les keupez.

Os les mettez insuite à tchuire din unne païèle, avuc ch'bure, pi os ajoutez ech Calvados qu'os foaisez adon asir.

Après, os mettez cho dsou l'pâte à tèrte, j'o bin écrit dsou, et os mettez din ch'four .

Et aprè, os attindez.

Ch'est pour cho qu'el rchette s'lonme tèrte tatin, vu eq t'attinds avant del minger.

Boinne tchuisine.

Chi os avez coèr granmint ed punmes, os pouvez in foaire du chide.


dimanche 30 septembre 2018

T'man

Din chl'évingile dech jour, il est écrit eq chi t'man est pour ti unne occasion ed tchaire, feut l'keuper.

Minme cose pour tin pié.

Chi ch'est tin ziu, inléve-le.

Cho doét vos foaire buser eq d'intinde cho dech tchuré o bin del lire.

Mi, ej vos dis : chi etn étchèle est étou unne occasion ed tchaire, fuche prudint.

Boin diminche à tertous.

samedi 29 septembre 2018

Nouvèle réclame

Vos qui rbéïez min blog, os avez seuremint érmèrtché ches réclames à man droéte dech blog pour d'eutes blogs picards conme Chti jornal in picard, ed min conmarade Zèf, o des sites picards conme Ches diseux, o coèr, Ch'lanchron.

Eh bin ! Edpi, ièr, j'o ajouté un nouvieu site : wikipeudia in picard.

Ch'est min fiu qui m'l'o inditché, vu qu'un conmarade à li dech nord i avoait dit quat jours avant.

Merchi à eux, et boinne visite dech site à vos.

vendredi 28 septembre 2018

Ch'début del gloère

Unne cose qu'ej vos o djò dvisé, j'ainme invoéyer des cartes postales.

Ches cartes postales, granmint ed keups, ch'est mi étou qui les fabrique.

I o deus smangnes, j'invoée unne carte - qu'os pouvez vir in dsou - à un boin cousin, et ièr, jé rchus un tiot message dech pèrt mé dmindant d'in invoéyer unne à unne canteuse fin célèbe, qui, malureusemint pour mi, n'est mie Mylène Fèrmer.

Cho m'foait granmint plaisi, os in doutez, d'ête connu et apprécié pèr des gins célèbes.

Adon, ej vos l'dis à tertous : chi os connoaissez un fotbaleu, un onme o unne fanme politike, un eute canteu o canteuse, per eximpe, Mylène Fèrmer, o un onme d'éto célèbe, baillez mi esn adresse eq j'i écriche. J'o toudi quèks cartes à m'moaison.


Boinne jornée.

jeudi 27 septembre 2018

Merchi à l'Urope

Magine qu'i éroait mie echl'Union Uropéïène !

Chi tu vux foaire del poilitike, feut eq tu fuches boin et eq tu foaiches ed boinnés coses pour ches gins.

Din tin village o din tin poaiyis.

Chi t'es un méchant, tu foais rin.

Et t'es adon obligé ed truvoer un eute ouvrage pour vive.

Mais avuc chl'Urope politike qui existe, aprè avir étè merre, député, minisse et minme premier minisse din un poaiyis, tu pux, chi i t'sanne eq t'es pu ainmé din ch'paoiyis, pèrtir foaire del politike eute pèrt.

Per eximpe, t'os l'droét ed tchitter l'Frinche et d'aller in Espane.

Pour ches picards et ches frinchoés, ch'est unne boinne cose qu'ed vir pèrtir un méchant qu'avoait ed longués dints.

Mais ch'est donmage, pour li, d'aller s'opposer politikemint à Carles Puigdemont et ches conmarades, et donmage pour ches catalins.

Coèr un keup, ho pourroait bin ête perdu.

A suive.


mercredi 26 septembre 2018

Trinte jours ed plâte

..., pour unne man berzillée, mais seulemeint tchinze jours ò eq t'os mie l'droét d'aller ouvrer.

Tu comprinds quèk cose ?!

Aprè ches tchinze peremiers jours, feut eq tu voéches vir un séruzyin.

Lò, i rfoait un papier disant eq durant ches tchinzes nouvieux jours à vnir, tu pux toudi mie aller ouvrer.

Pour cho, i t'o mie inlver tin plâte. I foait rin.

Mais i té dminde vint-chonc uros.

Quanq minme !

Ej diroait minme, surtoute.

Ej vux bin eq ches séruzyins n'art'te mie poin granmint ed jours des gins qui ont du mau, manière ed vir kmint qu'is djérisse'te avant ed dire chi is peu'te rtorner ouvrer o nan.

Mais avuc un plâte !


mardi 25 septembre 2018

Vive chin un coutieu

... din unne poke d'ém maronne, pour mi, ch'est conme ête mer-nud.

Adon, des keups, ej mé proméne, et d'un keup, i m'sanne qu'ej su mer-nud.

Cho vut dire qu'ej viens ed perde min coutieu ; il o tcheu d'ém poke chin qu'ej m'in rinconte.

Ch'est pour cho qu'achteure, j'acate un coutieu qui veut mie granmint, et laisse min ladjole à m'moaison.

Seuchez eq j'ainme mie m'promner mer-nud.

Surtoute quanq l'étè est défini.

Boinne jornée à tertous.

Tiot message à ches merseilloés et ches merseilloéses : chi os truvoez un opinel alintour ed Callelongue, din ch'sabe, il est à mi.

lundi 24 septembre 2018

Echl'anti-spéchisme

Ete anti-spéchike, cho vut dire eq tu considères qu'une vake, un ours, un kvau, unne glinne, per eximpe, sont conme ches humains.

Tu tues un bu, ch'est un meurte.

Tu matches unne glinne o du coéchon, t'es un cannibalisse.

I éroait édjalité inter tertous ?!

J'i croés mie.

Ch'est mie unne andgille qu'o démuché qu'él sonme ed ches carrés ed ches deus côtés d'un triangue étoait égal ach carré ed l'eute côté.

Jou eq ch'est unne madgète qu'o invinté ech premier ordinature ?

Ch'est mie un lieuve qu'o écrit ches fabes del Fontaine.

Ch'est mie unne vake qu'o invinté ech lait pasteurisé.

Etpi, quanq un leu hape unne berbis o un ainnieu pi l'matche, feudroait l'inmner in prison pi l'juger ? Cho n'in froait edl'ouvrage pour ches juges !

Fuchons sérieus et essoayons d'ene mie nos comporter conme unne bète.


dimanche 23 septembre 2018

Trinsginre

Gin qui cange ed sexe et d'vie.

J'in connoais au moinss unne. Qui vut édvenir un.

Pour mi, cho surpind, granmint, mais ej respecte.

Mais jé m'pose unne tchestion :

- "Un onme, qu'étoait avant d'ête un onme, unne fille : jou qu'il est lesbien, o nan, chi il ainme unne fille ?"

Achteure, toute est permis !

Prions pour que tertout vive conme il o invie ed vive, in respectant ches eutes gins.

Et artons ed butcher ches gins qui n'vive'te mie conme nos, et artons ed ratcher dsu.

Minme chi cho nos est malaisié des keups.

Boin diminche.

samedi 22 septembre 2018

Mingez del vianne

... et du pichon, et buvez du lait.

Innui, din ch'nord del Frinche, des niacoés et nikdouilles vont manifester pour dire qu'i feut mie minger, boère, et minme porter quèk cose qui vient ed ches animaux.

Is peu'te dire cho, mais mi, ej dis nan.

Vianne, pichon, lait sont boins pour not santé.

Chi os mingeons mie del vianne conme un anméritchin. Et vlan din leus dints !

D'unne, moérir à soéçante-dis-nu ins in ayant matcher del vianne, o à quater-vint-chonc ins in ayant minger qu'eds'erbes, feut coésir !

Et rin n'preuve eq cho sro mie ch'contraire.

Mi, j'o coési. Minme chi ej doés moérir à soéçante-deus ins.

Ed deus, cartchulez combin qu'os avez ed vie !

Unne, et unne seule.

Adon, vivez ureus et mingez bin.

Quanq à ches keuchures, chin tchuir, os pourroème mie vive in Sibérie.


vendredi 21 septembre 2018

Ech bu in boète

Os avez seuremint djò vu ches boétes ed vianne-lò din unne boutike.


Et seuremint qu'os in avez jonmoais acaté, vu qu'el vianne est mie boinne.

Qu'os vos disez.

Et qu'os avez p't'ête l'freusse d'haper du mau à vo panche !

Crosse berlure ! I o autchun risque. L'vianne ed bu, du bu qu'avoait mie ed mau, ale est boulie avant d'ête mise din ches boètes. O aprè ! Ej sais pu, mais ale est boulie.

Et ches boètes ed vianne, tu pux els inmner dò eq tu vux, minme quanq i foait keud, granmint keud.

T'os rin chu ti pour ls'ouvrir ! Ch'est mie un problinme : i o toudi unne tiote clé ed coller.


Aprè, ch'est fin aisié.

Adon, aie toudi unne boète ed bu au sé à t'moaison. O din t'poke.

Cho put t'seuver.

Mi, ej mé régale avuc unne tiote vinaigrète.

jeudi 20 septembre 2018

Ainmer unne gin

Os pouvons ainmer granmint ed coses, conme, per eximpe, minger, courir, photographier, juer ach fotbal, mais innui, ej vux uniquemint dviser chu ainmer unne gin.

Quoé eq cho vut dire, d'ainmer unne gin ?

In premier, et surtoute, cho vut dire d'avir plaisi à l'vir, à l'rincontrer, à ête avuc.

Chi i o mie ch'plaisi lò, adon, feut mie dire eq tu l'ainmes.

Et t'os mie dzoin d'aller l'vir o qu'ale vienche t'vir.

In lisant cho, os allez p't'ête vos dire que chti-lò o chti-chi, in vrai, os les ainmez mie.

Et p't'ête, étou, eq cho vos fro du mau.

Mais ch'est conme cho.

In sgond, chi os anmez unne gin et qu'os avez unne crosse invie ed vive toudi avuc ale, adon os êtes anmoureus. I feut étou eq l'eute vos ainme del minme manière, chin quoé, cho n'iro poin.

A vos ed vir.

mercredi 19 septembre 2018

Un nouvieu verbe picard

Os l'avez constaté, j'utilise granmint ches verbes ête, foaire et avoèr pour espliquer des coses.

Pour ch'verbe foaire, des keups os pouvons l'rimplacher.

Eximpe : pour dire foaire unne rinconte, tu pux dire rincontrer. Minme chi o foait bzarre ed dire ej rinconte, chin rin mette aprè. Feut adon préciser qui eq t'os rincontré.

Mais i o des keups, i o mie ed verbe, achteure, pour éviter ech verbe foaire.

Et ch'est pour cho qu'ej propose un nouvieu verbe picard, qui pourroait minme ête utile à ches frinchoés : stagier, qui vourroait dire foaire un stage.

Avuc cho tu pux rimplacher ej foais un stage achl'ôpital d'Anmyin pèr jé stagie achl'ôpital d'Anmyin.

Tertous comprindro.

In frinchoés, ech verbe stagier éroait p't'ête exister i o quat-chint ins, d'aprè ech séruzyin Louis ed Jeucourt, pour dire qu'un chanoéne alloait bin à ches messes.

Mais achteure, is exist'te pu. Louis ed Jeucourt, et ch'verbe.

Don, Michel Serres et ches conmarades peu'te l'érmette, avuc ech nouvieu sins.

Et Nanard Pivot put els incourager à l'foaire.

Chi os avez d'eutes idées conme cho, écrivez-mi.

mardi 18 septembre 2018

Pour tchitter chl'école

I o granmint ed manières pour tchitter unne école : per eximpe, tu dis eq t'os du mau à t'panche, tu foais chti qu'es fin pâle,et eq t'os invie ed rintrer à t'moaison.

A Saint-Kintin, i o tiot galibié, inter uit ed dis insd'âge, qu'o truvoé unne eute ruse verdi :mette ech fu à chin cartabe.

Din l'classe.

Tertous ches élèves ont du tchitter l'classe.

Seur qu'ech tiot o, achteure, granmint ed conmarades, et baillé eds idées à granmint d'eutes éfants.


lundi 17 septembre 2018

Lette à Michel Platini

Michel, feut eq tu rvienches juer ach fotbal à Nancy.

Ej sais bin eq t'os soéçante-troés ins, mais vu qu'os avons mie gaingné un point in sèt rincontes ed fotbal, cht'innée, os avons dzoin ed ti.

Tu pux rvenir avuc chl'Olivier Reuyer, et surtoute, avuc Jean-Michel Moutier qui artero seuremint puss ed balles que chti d'achteure.

Dépêque-ti ! I o urginche.

Etpi, put qu'mantcher, à ches fédérations ed fotbal, d'Urope o dech monde, is vu'te mie ed ti.

D'avinche, merchi.

samedi 15 septembre 2018

Ches oisieus

Os connaissez ch'film d'Hitchcock qu'o étè foait in mile-nu-chint-soéçante-troés.

I m'sanne qu'il étoait l'eure, achteure,d'érfoaire unne nouvèle version.

Et ch'est cho eq j'o foait i o tchinze jours, vu tertous ches oisieus alintour d'ém moaison, din un abe.



Rbéïez in dsou ch'film !



Disez-mi chi cho vos o plu, et mis l'freusse.

A béto !

jeudi 13 septembre 2018

I o pu ed terrorisses

... in Frinche.

Qu'i sanne.

I o quèks jours o smangnes, unne gin pèr ichi, unne gin pèr lò ont attatché avuc un coutieu deus, troés, sèt eutes gins, o bin, avuc unne voéture, berzillé un aréoport et mis l'freusse à granmint ed monde.

Mais, ch'est mie des terrorisses.

Qu'i péroait !

Et qu'i nos est dit.

Jou eq ches onmes politikes vu'te n'pu causer ed terrorisses ?

Jou eq ches jornaleus ont erchu des consines ?

Mi, j'o du mau à croère qu'i n'i o pu ed gins qui vu'te mette un cros brin in Frinche et foaire des morts, pèr chi, pèr lò, pour un diu. Qui leu dminde mie cho.

Aprè, ch'est vrai que l'différinche inter un vrai terrorisse et un pauve nikdouille qu'o invie ed foaire du mau pour chin plaisi est p't'ête mince.

Prions, minme un judi, pour tertous ches gins qui souffe'te à coeuse ed ches mawais.

mercredi 12 septembre 2018

Astérichke et Obélichke in Russie

Magine !

Astérichke, Obélichke et tertous leus conmarades dech tiot village gauloés qui sroai'te in Russie.

A Iakouchke.

Ej propose cho, vu eq j'o vu, i o quèks jours, un bieu rportage chu Iakouchke, in Sibérie.

L'Russie est sitant grinde, qu'in vrai, i o deus Russie : l'Russie à deus-miles kilomètes alintour ed Moscou, et l'Russie ed Sibérie, à l'est.

Iakouchke est au mitan del Sibérie, puss à l'est et au nord eq Krachnoyarchke.

Don, nos amis gauloés sont, o sroai'te, à Iakouchke.

Et ch'est l'ivèr.

Quarante degrés in dsou ed zéro !

Os avez seuremint djò lu un live d'Astérichke et Obélichke ; din leu village, i o Ordralphabétichke qui vind du pichon, et unne gin, Chétotomatichke, qui i dit toudi eq chin pichon, l'est mie frais.

Bin  lò, à Iakouchke in ivèr, i éro du pichon, et seur qu'i sro frais. Et p't'ête minme granmint frais.

O gelé !

Ej reuve ed lire ches nouvèlés aüres d'Astérichke, chi unne gin vut bin els écrire et les dessiner.

Merchi d'avinche.

mardi 11 septembre 2018

Unne boinne matchète

Pour construire o rconstruire un pont qui tient, feut kmincher pèr réaliser unne matchète.

Et l'matchète, feut étou qu'ale tienche.

Malureusemint pour ches italiens qui sont ed fin boins rbéïeus ed min blog et qu'ont un pont qui s'o berzillé, l'matchète qu'o été présintée o tcheu.

Donmage !

Feut rkmincher.

Corage.


lundi 10 septembre 2018

Ches timpératures d'étè

Ch'est seur qu'os sonmes coèr in étè !

Mais os sonmes étou à l'mitan dech moés ed septimbe. O casi.

Adon, avir des timpératures alintour ed vint-chonc degrés din ch'nord del Frinche, cho surprind. Ej mé ranmintuvoe mie avir djò ieu cho.

Mais cho foait granmint plaisi.

A pèrt à ches poéysins qui, toute manière, sont jonmoais contint. Vlan pour leus dints !

Don, mi, ej su ureus d'avir un boin solé.

Donmage qu'ej fuche mie in vagances !

Feut savoèr eq quanq os êtes à joke o qu'os avez un bros berzillé, os êtes mie in vagances.

Profitez tertous dech boin solé !

Boinne jornée.

dimanche 9 septembre 2018

Ech batèrd ed Pavèrd

Edpi ech moés ed juillet, os connoaissez infin Benjamin Pavèrd, ech boin jueu ed l'étchipe ed Frinche ed fotbal qu'est né din ch'Nord à Maubeuge.

Ech Benjamin, contrairemint à mi qui, soé-disant, butchoait conme un bibache - eq disoait un onke eq j'ainme granmint - butche conme un batèrd.

Mais malureusemint, ech Benjamin jue étou ach fotbal din l'étchipe d'unne ville d'Allemane.

Et mardi, quanq l'étchipe ed Frinche rincontroait l'étchipe d'Allemane, i o un allemind qu'o considéré not boin jueu conme un batèrd.

Et o réçué ches keuchures dsu chin co. Ch'est un vrai keup ed malsaveur.

Corage Benjamin, t'es un boin. Soégne-ti bin !

Et continue ed butcher conme un batèrd.


Ech malur eds uns

... foait ech bonnur eds eutes.

J'i croés mie et j'esplique.

- Djerre in Syrie, Palestine, Afdjanichtin, Lybie,
- Naissinche d'un papar chu un fin tiot batieu dò qu'i o granmint trop ed gins, au mitan ed ches mers,
- L'moaison ed mes voésins et amis qu'asit,
- ...

Et mi ! Jou qu'ej su ureus ? O bin puss ureus ?

Nan !

Mais i m'sanne qu'ech bonnur eds uns foait ech malur eds eutes.

A buser.

Boin diminche à tertous.

samedi 8 septembre 2018

Put qu'mantcher

Qu'i pluvine o qu'i foaiche solé, ches gins cause'te dech tans d'achteure et n'in sront toudi mie ureus.

vendredi 7 septembre 2018

Ouvrer muché

Et i feut miu.

Unne gin, qu'ej vos diroai mie kmint qu'ale s'lonme, vu qu'i sroait adon in dinger, et vu qu'ej lé sait mie, ouve pour ch'présidint ed ches Anmérikes.

Mais edpi quèks smangnes o moés, il o comprins qu'echt'onme est un cros nikdouile capabe ed foaire ed fin crossés berlures, dingéreuses pour tertout. Ej vos in o causé i o quèks jours.

L'gin éroait p't'ête pu tchitter chin ouvrage, mais l'o préféré continuer et, chi possibe, éviter ches crossés berlure.

I m'sanne minme qu'i o d'eutes gins pour l'aidier.

Ureusemint !

Ech présidint est in prousse. Surtoute eq cho pourroait ête d'fille o s'fanme qui font cho.

Pourvu qu'i n'seuche janmoais !

Et qu'il arte béto ed présider.

jeudi 6 septembre 2018

Mantcher ed canche

Mardi, un onme ed soéçante-douse ins est mort in tchaisant d'unne étchèle.

Pauve gin !

L'différinche inter li et mi : nos âges.

Et l'canche eq j'o ieu i o tchinze jours.

mercredi 5 septembre 2018

Courir troés-chint-trinte kilomètes

...in quat jours.

Vlò quoé eq vo courir unne gin lonmée Tisse, din ches montaingnes italiènes.

A pèrtir ed diminche.

Et pour gaingner edl'argint pour aidier à dgérir des gins qu'ont granmint ed mau.

Vlò étou quoé qu'est écrit chu un site internénet.

Mi, j'o un fiu qui s'lonme Tisse, mais ej su seur eq ch'est mie li qui vo foaire cho, minme chi i pourroait, vu qu'il est jonne.

Min fiu, diminche, i vient minger à no moaison. Cho foait plaisi del vir.

Et min fiu n'est mie nikdouille pour courir fin rade - manière ed causer - in montaingne.

Boinne jornée.


mardi 4 septembre 2018

Ureus conme un pichon

... din l'ieu.

Tertout connoait echl'espression.

Et un nageu est ureus étou din l'ieu.

Mais un minisse qu'étoait nageu et qui doét achteure ouvrer, chin ête din l'ieu ! Jou qu'i sro ureus ?

Os verrons.

lundi 3 septembre 2018

Unne bèle réclame

Judi, au matin, avant qu'ej mé déjoutche, alintour ed nu eures, j'o intindu unne bèle réclame : chu ech ju ed bridge.

Ju ed bridge, égal ju ed cartes ; ch'est mie un ju ed dints.

Et ch'ju ed bridge, min père, ches frères et soeurs, is i juoai'te et ainmoai'te cho.

Adon, cho m'o foait plaisi d'intinde l'réclame lò.

Et granmint surprins.

Etpi, pour ête honnête, ej préfère cho à unne réclame chu l'nouvèle méthode pour poaiyer béto, p'tête,  nos impôts.

Boinne jornée à tertous.

dimanche 2 septembre 2018

Cajèrc

Quanq j'apprinds qu'i o ech fu alintour ed Cajèrc, min tcheur o du mau : ch'est unne fin bèle région, dò qu'ém fanme, nos éfants, l'famille d'ém fanme et mi avons mèrché.

Etpi, Cajèrc est bin connu pour ches deus ménères, Papy Mougeot et mossieu Moulinot, ch'vindeu ed vers-ed tère pour l'pêke.

Chi dzoin, ej vux bin aller picier chu fu pour l'éteinde et seuver l'région.

Boin diminche.

samedi 1 septembre 2018

Rinconte trutchée

Judi, durant unne rinconte ed tennis à ches Anmérikes, un arbite o étè vir un ed ches deus jueus, australien, qui sannoait mie in forme.

Ech jueu perdoait dvant un frinchoés et foaisoait ed crosses bernures avant qu'echl'arbite voéche l'vir et i causer.

Aprè, ech jueu o gaingné.

Et ch'frinchoés o perdu, malureusemint, mais os avons l'habitude.

Mi, ej mé dminde chi tout cho n'étoait mie unne rinconte trutchée, vu ches pèris sportifs qui exist'te.

Et vos ?

vendredi 31 août 2018

Mèrie Eldjerre

Ale o un nom qui vo bin avuc chin caractère : feut mie l'imbêter.

Chin quoé, ale s'défind conme i feut.

Et ale o bin raison.

I o au moinss un cros nikdouille niacoés qui doét granmint rgretter, minme chi i connoaissoait mie ch'nom del jonne fille.

jeudi 30 août 2018

Ej su gauloés

... et fièr ed l'ête.

Mais ej su mie conme ches brikes de kminée, réfrèctères.

Boinne jornée à tertous.

mercredi 29 août 2018

Ches vagances ed mossieu Hulot

Qui n'connoait mie ch'film ed, et avuc, Jacques Tati, foait in mile-nu-chint-chincante-troés ?

Un onme, mossieu Hulot pèrt in vagances chu ches bords ed ches mers, et o eds aüres qui sont contés din ch'régalant film.

Et ches vagances, achteure, is sont - casi - définis.

A pèrt pour ch'ménère Hulot, qu'est p't'ête ech tiot nveu dech mossieu Hulot dech film, et qu'o kminché l'syiènes, ièr, ed vagances.

A moinss eq cho fuche eute cose eq des vagances, et un méchant film pour li ?!

Boinne jornée à tertous.

Chi t'es m'bèle-soeur et eq t'os ets ages innui, cros bec à ti.


mardi 28 août 2018

Punmes coings

... et surieus.

Sont des fruits qui pousse'te chu eds abes.

Et pour granmint ed gins, feut monter din ches abes pour tcheuillir ches fruits.


Eh bin nan !

Din min gardin, i o des keups dò qu'ej su minme obligé d'ém raboaicier pour les tcheuillir

Ch'o un grin avintage : tu pux tcheuillir ches punmes o ches coings in étant à l'ombe.


Et quanq i foait trinte degrés, t'appréchies.

Pour arriver à cho, ej croés eq ch'est quanq tu tailles ets abes eq tu foais eq ches fruits sront mie toute in heut chl'étè d'aprè.

Quanq à ches surieus, feut del patieinche pour tcheuillir ches tiots grains un per un. Mais ch'est fin boin.











Boin étè à tertous.

Et boinnés tcheuillètes.

lundi 27 août 2018

Chuke-et-chukrée

Ch'est ch'tiot nom d'unne jonne chinoése eq j'o rincontré in juillet.

In vrai, ch'est l'traduction ed chin tiot nom.

L'fille est fin régalante, rit toudi (mais mie ganne), o casi, est ureuse et vit avuc min nveu qui, li, s'lonme Diu-avuc-nos.

Quanq j'o vu l'fille et eq j'o su quoé eq vouloait dire chin tiot nom, j'i o dit :
- "T'os del canche, m'fille vient ed s'otchuper durant troés smangnes ed jonnes qu'ont du diabète."

Ale o rit.

Min nveu dit que ch'est ch'pieu qu'est chukrée.

P't'ête !

Bec à Chuke-et-chukrée, à min nveu, et à vos.

dimanche 26 août 2018

Trump m'inmèrde

J'o toudi écrit qu'ej mettro mie ches tiots noms ed gins din éms articles, mais li, l'est présidint ed ches Anmérikes.

Et j'o mie prévu d'i aller d'ichi deus o troés ins, à ches Anmérikes.

Adon, j'ose l'dire.

Ej vux bin dire eq ch'est l'démocratie, eq ch'est mie vu qu'il est viu et laid qu'i put mie ête présidint, qu'i feut mie qu'ej fuche crochier, mais ch'est un vrai fin cros nikdouille.

I risque ed foaire seutir ech monde, et cho ej vux mie.

Prions pour ches palestiniens, ches iraniens, ches mexitchins, l'paix din l'monde et pour nos tertous.
Prions pour eq cho cange aïte aïte.

samedi 25 août 2018

Min lèrd m'o seuvé

I o casi uit jours, j'o tcheu dech quatrienme étage. In vrai, quatrienme barrieu d'unne étchèle.

Ej vouloais continuer ed tcheuillir des fruits pour ches confitures.

Et don, pour ech premier keup d'ém vie, j'o tcheu.

Mie d'mau.

Judi, j'o rkminché.

Rkminché ed tcheuillir des fruits pour ches confitures, et malureusemint pour mi, rkminché ed tchaire dechl'étchèle.

Mais ch'keup-chi, du nuvienme. Alintour ed deus mètes de heut.

Et un molet ed mau à m'man, qui foait qu'in septimbe, j'sro coèr à m'moaison.

Mais chin un chintimète ed lèrd alintour d'ém panche, p't'ête eq cho éroait étè pire.

Fuchez prudint, quanq os grimpez. Surtoute chi t'es min frère et eq t'os ets ages innui.

jeudi 23 août 2018

Nettiez

Ièr, adon qu'ej mé pronmnoais avuc m'fanme, os avons souvint vu, écrit chu l'keuchie : "os êtes in vagances, mais pensez à ne rin laicier" o "quanq os pèrtez, inmnez vot brin".

Et ches gins qu'ont écrit cho ont bin raison, vu quoé qu'os truvons pèr tère. O din ch'sabe.

Aprè, ch'est ches jonnes - i in o des bins - qui ramasse'te.

Mais is peu'te mie tout prinde, et is ainmeroai'te foaire eute cose, ches galibiés.

mardi 21 août 2018

Et aprè


Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho : Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho : Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho : Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho :  Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire.