Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

lundi 30 septembre 2019

Ej voés du noèrt

- "Bojour monsieu él spécialisse, ej viens vos vir, vu qu'edpi quèks jours, ej voés toute in noèrt  : ech tchuré, ch'est normal, mais ches vakes, ches voétures, ches moaisons, ches cots, et minme ch'lait eq j'acate à min voésin, ej les voés noèrts."

- "Assiyez-vos ! Qu'ej vos ostchulte."

Quèks minutes aprè, ech séruzyin dit à cht'onme :

- "Ej voés rin ed mie normal ; vos ius sont boins et os sannez in boinne santé. Os pouvez rintrer à vo'moaison. Dò-jou qu'os restez ?"

- "Ach Caule-Sinte-Beuve, in Heute-Nuermindie."

- "Disez-mi ! Quanq os ratchez, ch'est kmint ?"

Echt onme raque un keup din chin mouchoèr : noèrt.

- "Achteure, ej comprinds" qu'i dit ech spécialisse, "i o rin ed grave. Ech préfet l'o dit."

- "Jou qu'os êtes seur ? Ech préfet o étou dit qu'ech neuée étoait chin dinger, mais il o dmindé à tertout ed prinde des précautions."

Dire toute et chin contraire !

Corage à tertous, et surtoute, à ches cinsiers qu'ont un sapré brin pour bailler à matcher à leu bétail.


dimanche 29 septembre 2019

Ches jornaleus critique'te

... echl'étchipe ed fotbal ed Chambly, vu eq cho foait troés rincontes ed suite qu'ale perd.

Ch'étoait sinmdi au matin.

Aisié à foaire.

Ches jornaleus oblie'te simplemint qu'echl'étchipe, ale vient, pour ech premier keup d'és vie, ed monter in deusienme division nationale.

Adon, is froai'te miu ed les incorager.

Qu'is sont méchants, conme toudi, ches jornaleus.

Is éroai'te miu à foaire in nos disant dò qu'i o allé, ech neuée ed funmée dechl'interprinze neurminde qu'o asi inter merkerdi et judi, et quoé qu'i o ndan.

Aisié ed crititcher, malaisié d'ête un boin jornaleu.

Boinne jornée, et boinne canche à chl'étchipe ed Chambly.

Et chtol-lò ed Rodèsse.


samedi 28 septembre 2019

Juju in juillet

Ch'est ch'nom d'un film eq j'o rbéïé ièr au vèpe chu l'cangne picarde ed télé Arte.

Ech tite, ch'est "Juju in juillet".

J'o granmint ainmé toute. Un bieu conte d'anmour et un bieu voéyage in Urope ed deus jonnes qu'ont eds aüres in route.

Adon, ej vouloais eq vos pouvèche in profiter avant ech troés dech moés d'octobe.

Ch'est pour cho qu'ej vo mets ch'tiot article.

Os pouvez aller vir chu internénèt.

Boin film !

Et boinne jornée.


vendredi 27 septembre 2019

Votez pour mi

... et crac crac crac, matchez des punmes

Qu'i disoait.

O mingez del tête ed vieu.

Qu'i disoait mie, mais qu'il ainmoait.


jeudi 26 septembre 2019

Ale dvoait vnir

... , et ale o vnu.

Em bèle-mère.

L'o arrivé judi, i o unne smangne, amon unne ed mes filles et chin onme, et verdi au vèpe, à m'moaison, avuc ches deus jonnes.

Cho foaisoait granmint ed tans qu'ale avoait mie vnu nos vir, m'fanme et mi.

Cho foaisoait étou granmint ed tans qu'il avoait mie plu.

Diminche, il o plu.

Achteure, ale o rintré às'moaison.

Et i pleut coèr.


mercredi 25 septembre 2019

Avuc du freumage inglés

... tu pux tchuisiner, in Frinche, din not bèle région dech nord, du welch.

Pour cho, i t'feut du cheddèr, inglés, del bière, dech nord, du boin pain et eds us, frinchoės.

Mais avuc ech cheddèr, inglés,  tu pux mie tchuisiner ed raclète savoéyèrde.

In vrai, conme pour granmint ed coses, tu pux, mais t'os mie l'droét.

Surtoute chi tu tchuisines avuc un capieu noèrt dsu t'tête et eq tu vinds cho granmint cher.

Surtoute, étou, chi, avuc tin capieu noèrt, tu vux eds étoèles à tin restaurint.

Feut mie prinde ches gins pour des nikdouilles quanq os avons un grind capieu noèrt chu l'tête et qu'os in sonmes un, ed nikdouille.

Qu'ej vos diche : du Bieufort pour ech welch, cho put ête fanmeus.

mardi 24 septembre 2019

Moérir ureus

Moérir ! Chatchun meurt un jour, à pèrtir dech monmint dò qu'il o né.

Moérir !

Kmint, et dò ?

Din un ôpital d'em région, ches séruzyins ont dit à deus gins :

- "Os pouvons pu rin foaire pour vos. Rintrez (comprinde : os allons vos rinmner) moérir à vo'moaison".

Adon !?

Unne fanme ed quarante-et-un o rintré din ch'cinse dò qu'ale o chin onme et ch'daraine fille, tchinze ins.

Et ale attind. Pour moérir.

Cho foait onze jours.

Un onme ed quater-vint-sis ins, qui vient, li, d'avir deus accidints vastchuloères, o rintré din s'moaison.

Nan ! L'o rintré in moaison d'artraite, vu qu'i i étoait djò avant ches accidints, et qu'achteure, l'est conme un lédjunme.

Un lédjunme qui matche, mais un lédjunme quanq minme.

Li, cho foait uit jours qu'il attind sn'eure.

In vrai, din sn'état, il attind p't'ête rin. Os pouvons mie savoèr chi il attind. Ch'est ches troés éfants, d'éms âges, qu'attinde'te.

A chatchun ed ches deus mourants, chl'ôpital leu o baillé des drogues pour qu'is n'souffe'te mie.

Fin malaisié à vive eq d'attinde ed moérir !

Moérir !

N'ayons mie l'freusse ed moérir ! Mais ch'est mie possibe de n'poin ête trisse ed vir des gins, qu'os ainmons, moérir.

A pèrt, conme pour ches deus, quanq is souffe'te.

Prions pour leu famille.


lundi 23 septembre 2019

Il o foait gaingner echl'étchipe ed Frinche

... sinmdi.

Ej cause ed rugby.

I o l'Keupe du monde ed rugby, edpi verdi, et chl'étchipe ed Frinche o jué sinmdi.

Et l'o gaingné.

L'o ieu del canche.

J'esplique.

Durant quarante chonc minutes, l'o mné.

Un jueu ed Tolose, mettons qui s'lonme Mimile - ch'est poin vrai et cho n'o rin à vir avuc min nveu ed Tolose, mais ch'o à vir avuc un ancien jueu ed Tolose ed l'étchipe ed Frinche - o mèrtché dis points pour ches frinchoés.

Et aprè, chl'étchipe ed Frinche l'o étè achaindée pi dépassée pèr ches eutes, ches argintins.

Vint à vint-et-un.

Mais un jueu ed Clermond-Ferrind met adon trois points.

Et ches frinchoés ont gaingné l'rinconte.

Adon !?

Qui qu'o foait gaingné l'Frinche ?

Min bieu-frère ed Tolose dit eq ch'est ech jueu ed Tolose ; l'o mis dis points.

Mi, ej dis eq chin ch'jueu ed Clermont, l'étchipe l'éro perdu. Don, ch'est li qu'o foait gaingné chl'étchipe.

Os allons mie nos fâcher pour ho.

Mais disez-mi, o disez-nos quoé qu'os in pensez.

A béto !


samedi 21 septembre 2019

Min conmarade d'un jour

Ch'étoait cht'étè, à Gueuvilé.

Ech diminche ò que m'fanme, ms'éfants et mi i étoème, timpe au matin, alintour ed nu eures, ej mé déjoutche et o invie d'aller acater quèks croéssants pour m'fanmme, ems éfants. Et un nveu qu'est avuc nos.

Pour leu foaire plaisi.

Ej prinds un molet d'argint et pèrte din ch'village truvoer unne boulindgerie.

Rin. Ej voés rin.

Ej croése un jonne onme, alintour ed trinte ins, qui s'lonme Thieu-thieu.

J'i dminde :

- "Estchusez-mi, ej trache unne boulindgerie".

- "Vnez avuc mi, j'i vo étou ; ch'est din l'rue drière vos, à man droéte."

- "Minche !" eq j'i dis, "j'in viens".

Ej foais dmi-tour et aconduis Thieu-thieu.

Arrivés à ch'tchuin del rue, ch'jonne m'dit :

- "Brin ! l'est frunmée ! Pourroème aller ach bar : is in vinde'te, qu'i m'sanne, des croéssants".

Os rfoaisons dmi-tour et pèrtons insanne ach bar. Alintour ed troés chint mètes à mèrcher.

Et à causer.

Thieu-thieu o poin granmint dormi, o foait ièr au vèpe, avuc eds amis à li, un bérbetchu, chin vianne, mais avuc des lédjunmes.

L'vianne, l'ainme granmint, vu eq chin père ouvroait à ches abattoérs ed Lile. Mais ièr au vèpe, l'o mis des lédjunmes.

Ej pense qu'il o bin arrosé ches lédjunmes, et surtoute mie granmint dormi.

Thieu-thieu, l'o unne fille ed deus ins.

Os arrivons ach bar ed Gueuvilé. L'fanme qui s'in otchupe dit à Thieu-thieu :

- "Bojour Thieu-thieu ! Kmint eq tu vos ?"

- "Bin ! T'os poin ed croéssants ?"

- "Nan ! Seulemint des brioches et des choutchètes".

- "Mets-nos deus jus, chin té kminder."

- "Dò eq tu l'sors chti-lò ?" qu'ale ajoute, in causant ed mi.

- "I trachoait l'boulindgerie. L'est frunmée !?"

- "Sont in vagances.".

Thieu-thieu o acaté des choutchètes, mi, deus brioches. I m'o poaiyé un ju, j'i o poaiyé un ju.

Pi, quèks minutes aprè, j'l'o salué et su pèrti rtruvoer m'famille.

Ureus.

Ureus d'avir rincontré un onme fin régalant, avuc un boin tcheur. Minme chi n'o étè qu'unne dmi-eure.

Merchi Thieu-thieu, pour ch'fin boin monmint passé insanne. Fuche ureus ! J't'obiero mie.


jeudi 19 septembre 2019

Quanq unne rinconte n'est mie définie

.. i o ed l'espoér.

Chatchun devroait s'dire cho.

Chake étchipe devroait s'dire cho.

Chake jueu d'unne étchipe devroait s'dire cho.

A Anmyin, din chl'étchipe ed fotbal, ches jueus l'sai'te.

Mais à Lyon, quanq is sont mnés un à zéro, is jue'te pour rmonter, et quanq is mne'te achteure deus à un dvant unne étchipe qu'o granmint moinss d'argint qu'eux, is pense'te qu'is ont gaingné.

Mais nan ! Crosse berlure !

Tant qu'echl'arbite n'o poin chiflé qu'el rinconte est définie, ch'est poin défini.

Et dech keup, ch'est p't'ête poin gaingné.

L'pruve l'eute sinmdi.

Bravo achl'étchipe d'Anmyin, et boinne canche - ale in éro dzoin - pour ches eutes rincontes à vnir.


mercredi 18 septembre 2019

Unne fille m'o tchitté

Atincion ! Quanq j'écris qu'ale m'o tchitté, cho vut mie dire eq ch'étoait unne anmoureuse. Ch'étoait jusse unne jonne fille régalante, dech Pas-ed-Calais, qu'ouvroait avuc mie edpi alintour quat ins.

Ej ramintuvs vos in avoèr causer, quanq ale avoait arrivée din mn'interprinze.  
Mais j'o poin rtruvoé chl'article ; janvié o févrié deus-mils-sèse, o p't'ête deus-mile-tchinze ?!

L'fille, durant qu'ale ouvré avuc mi et ches eutes, ale mettoait unne boinne ambienche din not interprinze.

Mais, edpi un in, ale s'innuyoait. adon, ale o dmindé à canger d'ouvrage, in cangeant d'interprinze.

Et cho étoait accepté.

Tant miu pour ale, mais donmage pour nos.

Mi, je rbée quoé qu'i o ed positif : ale est ureuse.

Boinne canche, tiote !

Et merchi à ti pour ches conseils ed vagances eq tu m'os baillés ech darain étè.

Merchi à ti étou pour ches troés o quat innées passées insanne.

A té rvir !


mardi 17 septembre 2019

Réponse dech merre

... d'un tiot village del Sonme à m'lette eq j'i o écris i o quèks smangnes. Ej vos avoais mis ch'lette in article ech vint-nu dech moés d'eu.

Vlò lò dsou s'réponse :

"Monsieu,

Désolé, j'o mis du tans à vos réponde, mais j'attindoais ech procés èd Maurice, ech co dech l'île d'Oléron. Ej sais mie chi os avez suivi st'affoaire, mais toudi est-i qu'ech co, il o ch'droét ed cocoricoter conme i vut, qu'il o dit, ech juge.

Ches anciens poéysins, qu'ont èrnié leu passé, is doé'te poaiyer unne amende pour avir porter plainte.

Ches glinnes, ches canérds, is sont autodidactes, conme is di'te (ches juges), is peu'te piailler quanq is n'ont invie.

Ch'est des bétails qu'ont du gingin. Pèr eximpe, j'o du mau à foaire un uit avuc m'bouke. Eh bin unne glinne, ale put foaire un u (bin dire un nu pour qu'ho foaiche rire) avuc chin tchu.

Ej sais poin chi os restes àl'ville o àl'campaingne, mais os seurez que l'ruralité, ch'est conme cho. Ches clokes, ches bouses ed vake, ches canérds qui piaille'te,, ches beudets qui brai'te. I nos manque jusse ches clokes ed ches ..... (j'o point réussi à lire ch'mot) o d'ches vakes in liberté din ches cans.

Adon, chi un jour os rvnez camper din no'tchuin, n'obliez mie vos boules tchiès etpi un caske chu vo'tête. Etpi ches glinnes is ont comprins eq chi os randonnez l'nuit pour els impêtcher ed dormir, is vos rinvilleront fin timpe au matin.

Pour m'pèrt, j'o mis ch'pouillé loin ed no cambe...

P't'ête à un ed ches jours, qui n'foaiche poin un froéd ed canérd pour n'poin avir l'chair ed glinne...

A vos rvir !

 Monsieu ech merre"

Fin régalant . Merchi, monsieu l'merre. Ej su fin ureus d'avir unne réponse.

Achteure, ej buse à quoé qu'ej vo i rinvoéyer conme lette.

A suive.


lundi 16 septembre 2019

Sis ins

Sis ins innui qu'ej vos écris.

Sis ins qu'un jour, ej m'o déjoutché avuc chl'invie d'écrire in picard, pour foaire vive l'bèle langue qu'est ch'picard.

Djò sis ins, avuc casi un article pèr jour. J'in su aux alintours ed deus-mile écrits. N'in manque un tiot molet pour attinde ches deus-mile ; cho viendro din quèks smangnes.

Ej su toudi ureus pour vos mette quèks lignes, toudi ureus ed vir qu'i o des gins, din ch'monde intier, qui ainme'te et qui li'te.

Ej vo continuer.

Et vos étou, continuez dé rbéïer.

Pour ches tchurieus, rtorner vir l'première page ed min blog : os érez unne crosse surprinse.

A béto.


samedi 14 septembre 2019

Ches conmunisses d'un jour

... o ed deus o troés jours.

Qui-jou qu'is sont ?

Is sont ed toutes ages, ed toute l'Frinche, et is vien'te un, deus o troés jours pèr in à l'Courneuve, pour l'fête ed l'Unmanité, début septimbe, chake innée.

Conme achteure.

I in o quèks uns qui i vien'te pour acouter ches conmunisses, mais in i in o étou granmint qui sont lò uniquemint pour acouter tertous ches canteus.

Ches gins qui vien'te pour acouter l'musike, is sont des keups, capitalisses.

Cho m'foait bin rire.

Is ne l'di'te mie qui sont capitalisses.

Boinne jornée à tertous.


Canter in inglés

Io quèks smangnes, j'o intindu un jornaleu dminder à des canteus :

- "Jou eq ches canteus frinchoés sont obligés ed foaire des canchons in inglés conme os vnez del foaire ?"

Et ches deus canteus d'i réponde :

- "Ech tite ed not canchon, ch'est du latin".

- "Os disez vrai".

Sapré jornaleu !

Conme ches eutes ! I n'o toudi un pour nos foaire rire.

Boinne jornée.


vendredi 13 septembre 2019

Soégnez vo'prostéte

Pour ches onmes :

I péroait eq pour n'mie avir du mau à no'prostéte in viusisant, nos, ches onmes, i feut, o feudroait, toudi s'assir pour picier.

Ej croés eq ch'est vrai, vu eq ches fanmes n'ont poin ed problinmes. Ed prostéte.

Cho viendro p't'ête, qu'is in ont des problinmes, ches fanmes, vu qu'achteure, is vu'te picier dbeut.

A suive.


jeudi 12 septembre 2019

Savoèr cartchuler et dviser

I o des gins qu'ainme'te granmint ches mathématikes, et d'eutes qui ainme'te miu dviser.

I o des gins qui rchu'te unne médalle vu qu'is sont fin boin pour cartchuler, et d'eutes, per eximpe ches jornaleus, pour qui causer est leu ouvrage.

Etpi, i o ches onmes politikes.

Edpi quèks smangnes, i o unne gin, connu pour ches compétinches in mathématike, qui veudroait achteure ête un jour ch'merre ed Pèris.

L'o l'droét. Ed reuver.

Mais quanq ej l'acoute causer, j'o des boutons.

Cartchuler et dviser, ches deus coses différintes.

Mi, ej dis que quanq os savons mie, os foaisons mie.

Et i o poin qu'in politike.

J'o apprins ièr au vèpe qu'i avoait un mathématichien qui foaisoait del musike avuc ches élèves. Del musike nouvèle, lonmée rap.

Ches jonnes, is ainme'te.

Mi, j'o ieu un professeu ed mathématikes qui nos causoait mécanike.

J'o quanq minme rtenu ches mathématikes et poin l'mécanike.

Boinne jornée à tertous.


mardi 10 septembre 2019

Lire din ch'pichon

Panoramisk, ech fanmeus druide ed ches gauloés Astérisk et Obélisk, l'foaisoait : édviner chl'avenir in lisant din ches intrailles ed pichon.

Et vu qu'os sonmes ches déchindints ed ches gauloés, os pouvons étou lire din ches pichons.

Per eximpe, din ch'dépèrtemint del Loère, i o des gins qui juge'te l'tchalité ed l'ieu in rbéïant ches pichons.

Fin aisié, qu'ej pense.

Maginez !

- un pichon ureus din l'ieu et eq ches pékeus n'peu'te mie haper, ch'est boin, l'ieu est boinne.

- un pichon qui nage mie rade, i o, p't'ête, un tiot problinme din l'ieu ; feut foaire eds analyses ed l'ieu.

- un pichon qui est chu ch'dos, i o un vrai problinme. Ches pékeus-liseus-din-ch'pichon vos déconseille'te ed nager din chl'ieu. Et chi possibe, feut mie in boère.

Ej truve cho bieu d'avir din ch'monde, pèr eximpe in Frinche, des spécialisses del vie ed ches bétails, des gins qui sai'te observer.

Et tout cho vient ed Panoramisk, not rataïon !

Feut eq jé rlise ches aüres d'Astérisk et Obélisk pour miu comprinde not monde.

Et étou pour rire un grin keup.

Boinne lecture étou à vos.


lundi 9 septembre 2019

Cho kminche pèr un A

Albanie, Indorre et Erménie, pour ches gins qui cause'te frinchoés, cho s'dit Albanie, Andorre et Arménie.

Ch'est p't'ête pour cho eq sinmdi au vèpe, pour l'rinconte ed fotbal inter l'Frinche et chl'Albanie, echt'onme qui met ches musikes ed ches deus poaiyis avant ech début del rinconte o confondu l'musike ed l'Albanie avuc chtol-lò d'Indorre. Etchipe qui vient juer mardi.

Ch'est p't'ête pour cho étou qu'echt'onme qui s'o estchusé aprè, un eute que chti qu'o mis ches musikes, o confondu Indorre et chl'Erménie.

O bin....

Ches deus onmes étoai'te, bin avant l'rinconte, insanne à unne foére à vins.

Ch'vin, ch'est boin, mais feut ête raisonnabe.

A ches deus : dman, os pourrez mette l'musike edl'Albanie et présinter vos estchuses à ches jueus d'Andorre.

Boinne jornée.


dimanche 8 septembre 2019

Is rprinde'te leu fusike

Ches cacheus.

Inviron unne mitan ed ches cacheus put, innui, rsortir et utiliser chin fusike.

Cho foait granmint causer ches jornaleus, conme chake innée, et nouvèle cose, qu'i m'sanne, ches écologisses et onmes politikes.

Ches cacheus ! I n'o des boins et des mawais.

Kmint foaire l'différinche inter eux ?

Fin aisié.

Un boin cacheu, quanq i voét quèk cose bouger, mettons unne coaille, i met chin fusike à sn'épeule etpi, i tire.

Adon qu'un mawais cacheu, quanq i voét quèk cose bouger, mettons étou unne coaille, i met chin fusike à sn'épeule etpi, i tire. Mais, ch'est poin l'minme cose qu'avuc ech boin cacheu.

J'érmerchie granmint ches troés comikes qui m'ont apprins cho, et ej conseille à ches gins qu'ainme'te, conme mi, mèrcher in campaigne, din ches bos o in montaingne, ed mette ....

...un ganne espincer, et ed randonner.

Boinne jornée, et soin à vos.


samedi 7 septembre 2019

Un responsabe agritchole ed brin

Intindu timpe au matin din ch'poste ed radio.

Ech présidint d'unne cambe d'agritchulture causoait à un jornaleu ed ches décisions prinses pèr ech préfet ed chin dépèrtemint ed keuper eds oliviés.

- "Avant d'abolir ches deus abes qu'ont ech nouvieu mau, un insecte vnu d'Italie, feut vérifier qu'is ont bin ech mau-lò.

Aprè, l'est possibe d'impêtcher qu'ech bétail pèrte eute pèrt in mettant des filets alintour ed ches deus abes".

Fin cros nikdouille, responsabe ed brin, édjoïsse au possibe !

Ech mau est djò fin connu. In Italie.

Etpi, ch'est mie un problinme, mais un vrai fléau.

Feut don agir fin rade.

Mi, ej pense, qu'i feudroait keuper miu eq ches deus abes. Keuper ches oliviés din ches alintour d'un kilomète.

Et espérer.

Mais lò, chi ch'préfet acoute ech l'agritchulteu - qu'o p't'ête ches deus abes - os érons béto eds insectes à Nyons et pèrtoute dò qu'i o ches bieus abes.

Malureusemint pour ches eutes cinsiers, des responsabes conme cho, i n'o granmint.

Cho rime avuc brin.

Adon, brin.


jeudi 5 septembre 2019

Un boin photographe est mort

Ech photographe allemand lonmé Pierre Lingebergue est mort mardi.

I foaisoait granmint ed bèlés photos. In noèrt et blanc.

Conme j'ainme in foaire.

Ch'est un ed mes frères qui m'o foait démucher ech boin photographe. Jé lé rmerchie granmint.

Donmage eq li, min frère, n'ainme poin ches photos in noèrt et blanc.

Mais Pierre, fuche trantchille, ej continuero à t'foaire honneur.

Adé, chl'artisse.


mercredi 4 septembre 2019

Naîte avuc deus dints

Naîte est unne bèle cose ; ech père et l'mère dech papar sont ureus ed vir l'vraie tète dech tiot.

Pour l'mère, in puss, ch'est ch'monmint ed vider s'panche.

In principe, un fin jonne papar naît avuc unne bouke, mais poin ed dints, ndan.

Eh bin ! Din ch'Pas-ed-Calais, à Béthune, i o unne fille qu'o né avuc deus dints, à ale, din s'bouke.

Mie croéyabe !

Coèr moinss croéyabe, ale o né ech vint-et-un dech moés d'eu ; un bieu jour qui vo seuremint i bailler del canche.

Cros conseil pour s'mère : norris t'fille avuc un biberon, et mie avuc ets tètes.

Et fuchez ureus.

Tiot bec à t'fille. Ej mé ramintuvroai toudi ches âges.

Vu qu'ej cause ed ches âges, chi os croésez m'mère innui, foaisez-li un cros bec.


mardi 3 septembre 2019

Ches galibiés jue'te

Os sonmes in septimbe, mais toudi in étè.

Et i foait bieu.

Adon, ches tiots, quanq is ont poin école, quanq is étoai'te in vagances i o coèr quèks jours, o bin aprè l'école, is jue'te à l'cour.

Et sont naïus, vu leus âges, et fin ureus.

Et ed les vir conme cho, cho foait plaisi.














Merchi à vos, ches jonnes, ches tiots ed continuer à vive conme des tiots, conme j'o vétchu i o chincante ins.

Merchi.


lundi 2 septembre 2019

Un boin cadieu

L'eute jour, unne bèle-soeur m'o ramintuvoé quèk cose eq j'avoais dit i o alintour ed vint-chonc ins.

Os étoème insanne à un bieu mériage quanq ale m'o rapplé cho.

I o vint-chonc ins, min frère et ale ont ieu unne - première - fille et m'ont coési conme parrain del tiote.

Qui, achteure, o vint-chonc ins mais est toudi tiote. Pour ches âges.

Don, ej su parrain. et i o unne morraine.

Normal, os foaisons chatchun un o des cadieus à not filleule. Pèr eximpe, pour ch'batinme.

L'morraine dit à m'bèle-soeur :

- "Vlò un cros cadieu pour t'fille. Cho vient ed Pèris."

Et i pèroait eq mi, j'éroais dit :

- "Vlò un tiot cadieu pour t'fille. Cho vient dech tcheur."

M'bèle-soeur avoait granmint ainmé, vu qu'ale s'in ramintuve coèr.

Cho m'foait granmint plaisi.

Minme chi mi, j'avoais oblié.

Boinne jornée.