Un train keupe unne famille

L'eute jour, adon eq j'attindoais min train pour tchitter min ouvrage, ej voés unne jonne fanme et ches troés fin jonnes rbéïer un train, et kmincher à monter ndan.

L'fanme in premier, laissant chu ch'tchai ches troés galibiés, et montant din ch'train unne poussète et unne valise.

Ej vos vir l'fanme qu'étoait din ch'train, et j'i dminde dò qu'ale vo avuc ches éfants.

Ale m'dit Advile.

J'i répond eq ch'est din ch'train d'in face.

Ale deschind, ureuse, et ches papars étou.

Troès minutes aprè, ch'train din chtchel ale avaoit monté pi deschindu pèrtoait.

A vide, et pour neune pèrt !

In vrai, ch'train n'o mie keupé l'famille, mais o bin mantché del sépèrer in deus.

Chi j'avoais

Os in foaisons des coses, avuc des chi.

Chi min taïonne avoait ieu des guernons, os l'éroème appelé Ch'taïon.

Avuc des chi, os mettroème Pèris in boutèle.

Eute eximpe, l'eute mardi, à mn'interprinze, unne fanme dit :

- "Avuc min premier mèri, chi os avoème mie divorché, cho nos froait, innui, quarante innées ed mèriage."

Bin ouais !

Mais cho foait miu ed dis ins qu'os êtes pu insanne.

Adon, i o rin d'estraordinaire.

De l'ieu à l'frèche

Ièr au vèpe, in rintrant à m'moaison, jé kminche pèr mette de l'ieu à l'frèche, pour boère dman (don, innui), un tiot ganne.

Lonmé à Marseille un chincante-et-un.

Jé vnoais ed mette l'ieu din ch'erfroédioèr quand deus voésins ont sonné à m'moaison.

- "Ej pux mie vos offrir ed tiot ganne, vu qu'ej viens tout jusse ed mette l'ieu à l'frèche" qu'ej leu dis.

- "Mi, j'o del ieu din chl'erfroédioèr", qu'ém répond un ed ches deus voésins.

- "Adon, j'inmène ech ganne" qu'ej leu dis.

Unne eure et vint-deus minutes aprè, os avons prins troès gannes, chatchun. Pi os sonmes rintrés à no'moaison.

Ureus, qu'os étoème.

Ech verdi d'avant, j'in avoais prins quat, ed ganne, et avoais ieu du mau à m'tète ech lindman. Feut dire eq l'ieu qu'os avoème prins n'dvoait mie ête bu.

Ej croés eq ch'est l'ieu qui m'avoait foait du mau.

Don, prudinche ! Quanq os buvez del'ieu.

Deus coses pour définir echl'article :

- os savez quoé eq ch'est un chint-deus à Marseille ? *

- j'o, innui, del ieu bin à l'frèche din min erfroédioèr. Mais pu ed ganne.

Restez à l'ombe !


* Deus verres ed chincante-et-un.

Ech cangemint d'eure

Os l'savez, in Frinche, os cangeons d'eure deus keups pèr an : in marche, et in octobe.

Mais innui, ej vux - coèr - vos causer del Russie.

Din ch'poaiyis-lò, achteure et edpi des dizainnes d'innées, l'eure din ches stations est chellòl ed Moscou.

Eq tu fuches à Moscou o per eximpe Irkoutskch, ch'est l'eure ed Moscou qu'i o din ches stations.

Mais in vrai, inter Moscou et Irkoutskch, i o sis eures ed différinche d'eure.

Onze eures à Severobaïkal

Cho pose des problinmes.

Magine !

T'es à Irkoutskch, l'est quinze eures, et tu dvoais prinde un train à quatore eures vint. Tu connoais mie l'pèrtitchularité russe et tu t'dis eq t'os raté tin train.

Uit eures quarante-sèt à Irkoutskch

Bin nan ! Tin train pèrtiro din miu ed quat eures. In Russioe, vu dò qu'est Moscou, ches tourisses sont souvint in avinche din ches stations.

Et des keups, granmint.

Tout cho vo infin canger ; à pèrtir dech premier dech moés d'eu, ches eures din ches stations russes sront ches eures del ville et del région.

 Minme chin fotbal, o surtoute chin fotbal, allez vir l'Russie.

Et prinde ech train.

Bon voéyage.

S'déplacher durant ches vagances

Os êtes in vagances, ej sroai béto in vagances.

Et os pèrtez o êtes djò pèrtis.

Pour aller fin rade, os prindez, p't'ête, ches voées dò qu'i feut poaiyer.

Mais conme tertous ches eutes ! Et os roulez adon conme chu unne route normale. Dò qu'i feudroait mie poaiyer.

Seuchez qu'ej su conme vos.

Per eximpe, verdi, m'fanme et mie avoème un déplachemint à foaire.

Chu internénet, chonc-chint-quater-vint-sèse kilomètes à foaire in sis eures pour chint-sèt euros, o bin chonc-chint-quarante-quat kilomètes ed tiotés et bèlés voées, et ed voées dò qu'i feut poaiyer, et casi uit eures. 

Os avons coési ch'premier, mais mis casi nu eures.

Lindi, ej su rintré. Tout seu, et per ech deusienme trajet. Uit eures tchinze.

Mais ém pu crosse surprinze, cho étè chu l'essinche. Ech premier jour, i nos restoait rin. Ach rtour, j'avaois coèr ed quoé foaire miu ed troès-chint kilomètes.

Et j'avoais vu ed fin bèlés coses.

Boinne route à tertous, et bel étè.

Ech boin foée

Foée ed bu,
Foée ed vieu,
Chi j'pux coésir,
Ej prinds ech foée ed bu.

Boin accion à tertous, surtoute chi os êtes in vagances.

Et pensez à boère, vu qu'i foait granmint keud.

Ch'est mie un ju

Un sinmdi au vèpe, j'étoais in voéture avuc mes deus fiux.

Ches deus ont mné l'voéture.

Ech premier, qui, edpi moinss ed deus moés o l'droét de mner unne voéture, s'o arté aprè deus kilomètes, quanq j'i o dit quèk cose.

Adon, ch'est ech deusienme qu'o prins ch'volant.

Aprè troés-chint mètes, li o prins unne priorité à man droéte, din un tiot village, adon, qu'os voéyoème mi quoé qu'il arrivoait à man gueuche.

J'o ieu unne freusse !

Ej l'o indjeulé un molet.

Il o mie ainmé du toute.

Et il accepte mie eq j'i in rcause.

Achteure, din min tcheur, i o unne crosse afolure.

Eq j'o du mau à accepter.

Echl'onze

Ech verdi trèse jullet, à l'loterie, i falloait juer ech douse, ech trèse, ech vint-et-un, ech quarante-quat et quarante-nu.

Mi, j'avoais jué echl'onze.

Adon,j'n'o gaingné eq chincante euros.

Chin quoé, ch'étoais mile !

Un fotbaleu interlligint

Os avons du mau à l'croère, mais cho existe.

Ches jueux ed l'étchipe ed Frinche ed fotbal l'mout'te.

L'pruve !

I o un jornaleu, un nikdouille, conme souvint, qu'o écrit eq l'étchipe qu'o gaingné i o uit jours étoait avuc eds afritchins.

Et il o mis, din sn'article, ech nom ed chatchun ed ches jueux, avuc, pour chatchun, chin poaiyis - supposé - ed naissinche.

Adon, un jueu frinchoés a corrigé chl'article et écrit "I avoait des berlures ; ch'est corrigé."

Vlò un doube champion, frinchoés.

N'obliez mie ed rapplitcher

Qu'o écrit, i o quèks jours, unne maristresse à ches galibiés,  avant qu'is tchit'te echl'école pour pèrtir in vagances.

P't'ête bin qu'effectivemint, is éroai'te mie penser à i rtorner, à chl'école, chi ale leu avoait mie dit cho, l'fanme.

Achteure, is i sont, in vagances, ches tiots.

Et ch'maristresse étou.

Et p't'ête vos ?!

Boinnés vagances à tertous.

Et n'obliez mie ed continuer à lire ems articles.

J'o rincontré un russe

Edpi echl'aréoport, avant ed rintrer in Frinche.

Des rincontes, din un indroét dò qu'i put i avoèr quater-vint-unne-mile gins, t'in foais.

Etpi, tu rbées unne rinconte. Rinconte ed fotbal.

Ièr, avuc min bieu-fiu russe - j'o étou un bieu-fiu frinchoés eq j'ainme bin - os causoème in rbéïant don l'rinconte inter ches étchipes ed fotbal del Frinche et del Croétchie.

Et, un monmint, in causant ed Krasnoïarschk, dech Iénichéiïe et d'Ingara, i o un onme qui nos intind et qui kminche à nos causer. In Russe, vu qu'il est russe.

 

Et echt onme, alintour ed soéçante ins, est célébe, vu qu'il écrit des lives.

Mickaël Tèrkovchki, qu'i s'lonme.

Fin régalant, qu'il est.

Aprè l'rinconte, min bieu-fiu et mi avons étè à l'voéture decht'onme qui m'o baillé un ed ches lives qu'o pour tite "Ch'tans injlé"

Ech live est in russe, mais chu internénet, avuc un traducteu "russe / picard", j'arrive à comprinde.

Mickaël s'est mis à nos causer, vu eq chin live est chu unne tiote ville à ch'nord ed Krasnoïarschk, et ch'long dech Iénichéiïe.

Achteure, ej vo l'lire.

Tout in pensant à l'rinconte ed fotbal et l'victoère ed ches frinchoés.

A béto !

Boinne jornée à tertous.

Edpi chl'aréoport

... ed Moscou.

Ej profite qu'i o internénet achl'aréoport pour vos bailler des nouvèles.

Ej su bin arrivé.

Din chl'avion, des gins régalants, qui causoai'te surtoute in russe, vu qu'is rintroai'te à leu moaison.

A Moscou, i pleut. Qué cangemint pèr rapport à l'Frinche !











Achteure, ej pèrte à mn'hôtel, qui s'lonme Chékovchévo.

Ej pense à vos.

A béto !

Jé rviens lindi au vèpe

A vos ches lecteus eq j'ainme.

Durant quèks jours, j'éro p't'ête du mau à vos écrire, vu qu'ej pèrs in Russie, à Moscou.

Os l'savez, j'o l'canche d'avir un bieu-fiu russe edpi sèt smangnes.

Et ièr, fin timpe au matin, alintour ed troés eures, i m'o invoéyé un message. Mitan d'inglés, mitan ed frinchoés, et deus o troés mots in russe.

J'o tout comprins : ej pèrs à Moscou.

Quat eures pour aller, quat eures pour érvenir, et deus jours lò-bos.

Ej su ureus, minme chi pour définir, put qu'mantcher, ch'est ches allemands qui gaingne'te.

A suive.

L'vie d'un kvau

J'éroais du vos écrire cho avant : ièr au vèpe, i avoait un boin film à l'télévision, Japleu, un boin kvau né alintour ed Bordieux et qu'o gaingné granmint ed courses.

Ch'film est avuc Guillaume Canet, acteu eq ches jonnés filles ainme'te bin.

Pour un keup qu'i avoait quèk cose ed bin à rbéïer !

J'essayeroai, ech prochain keup, ed vos prévnir avant.

Put qu'mantcher, pour définr, ch'est toudi ches allemands qui gaingne'te.

A suive.

Pèrtir in avinche

Inter ech moés d'avri et ch'moés ed join, ches mneus ed train ont mis ch'brin in n'foaisant mie rouler tous ches trains.

Ches eutes moés ed l'innée, ches trains sont souvint in rtèrd ; d'unne à deus minutes, à, des keups, quèks dizainnes.

Eh bin ièr, min train étoait in avinche !

Miu ed deus minutes d'avinche, qu'il avoait.

Adon, quanq un jonne galibié o arrivé pour monter ndan avuc unne valise mais eq ches uis étoai'te - djò- frunmées, ej m'o lvé d'ém place pour aller i ouvrir.

L'o étè surprins, ech jonne, o hésité à monter,vu qu'ech train avinchoait douchemint, mais o monté.

Aprè, ej croés qu'il avoait du mau à chin gasio, vu qu'il m'o mie dit merchi.

Mais mi, j'étoais ureus ed l'avoèr aidié.

Rions achteure

... ed ches contes berges !

Os avez seuremint, au moinss un keup edpi qu'os êtes nés, ri o foait rire avuc un conte berge.

O un conte o unne cacouille  chu ches berges !

Eximpe :

"In Bergike, un cyclisse tchait din l'ieu, et i o tchinze morts."

Conté pèr un ed mes cousins in mile-nu-chint-soéçante-dis-nu. Mes frères et mi avons rin comprins, mais bin ri.

Eute eximpe :

"In Bergike, os foaisons mie de ski nautike, vu qu'os avons mie ed lac in pente ."

Pour ches gins qui n'sai'te mie, cho vient ed Michel Colucci.

Innui, os pouvons rire ed ches berges, mais l'est bin possibe qu'édman, au vèpe, cho fusse eux qui ri'te ed nos.

Put qu'mantcher, pour définir, ch'est toudi ches allemands qui gaingne'te.

A suive.

Pour pèrtir in vagances

Os sonmes in étè, vu qu'os sonmes in juillet, et granmint pèrmi vos pèrt'te o vont pèrtir in vagances.

Pour passer ed boinnés vagances, t'inménes granmint ed coses : unne tente, des maronnes, des tchulotes, des kmises, des keuchures, ches vacheus, pour minger et boère, quèks castroles, louches et fortchètes, p't'ête t'bèle-mère, un appareil à photos, des jus pour ches galibiés, des linchus pour dormir.

Tu pux étou acater avant ed pèrtir ches boinnés punmes-ed-tère dech nord, un maroèle et un gambon, per eximpe.

Chi, in vagances, tu restes à rin foaire d'eute qu'ed dormir, té rposer et bisir, tu prindros quèks lives, del bière, p't'ête du chide ed Neurmindie, et p't'ête étou unne télévision.

Pour ches galibiés, tu leur inméneros unne o deus bicyclètes pour leu foaire plaisi.

Mais tout cho, cho pèse.

Eh bin ! Inter diminche et lundi, unne voéture o étè artée per ches cadoreus avuc quat tonnes ed puss qu'ale étoait d'autorisé à avir.

Magine ! Conme un nénéphant chu ch'toét det voéture !

Is ont p't'ête du deschinde et laicier l'bèle-mère chu ches bords ed keuchie.

L'cave à Nini

Nini, ch'est une fin boinne conmarade à mi qu'ainme bin minger et boère ed boinnés coses.

Adon, ale o unne boinne cave, bin rimplie, avuc des boutèles ed rouve o blanc.

J'ainme bin aller amon Nini.

Des keups, os nos assiyons din ch'cave, ch unne tiote caïèle, et os dvisons.

Ed toute, qu'os dvisons.

Per eximpe, os causons ed nos vagances à vnir, ed nos galibiés, dech minisse del tchulture, o coèr, d'unne voésine qu'o un cros nez.

Os rfoaisons ech monde conme os ainmeroème qu'i fuche.

Nini, ch'est une vraie boinne conmarade.

Mais p't'ête qu'innui, os pensoète eq j'alloais vous mette un billet chu ch'fotbal ! Os vos êtes berlurés.

Mais à mitan, qu'ale est, vot berlure.

Boinne jornée, et boinne rinconte ed fotbal.

J'ainme bin nos voésins berges, conme Nini.

Chonc-mile-sis-chint-trinte-et-un

Pour écrire in picard quanq os vivons in Frinche, i feut connoaite ches mots in picard, et in frinchoés.

Adon, edpi quèks smangnes, j'o ouvré à m'fabritcher un boin dictionnaire, vu eq quanq j'intinds causer frinchoés, feut qu'ej traduiche in picard, pour vos écrire ches histoères chu min blog.

Et ièr, j'o défini l'première pèrtie : avuc chonc-mile-sis-chint-trinte-et-un mots.

I o des noms, des verbes, et minme eds espressions.

Mais j'o coèr à foaire ; alintour ed mile o deus-mile eutes mots.

Coèr quèks smangnes o moés avant ed définir.

Boinne jornée à tertous.

Chi t'es min frère et qu'os avez ets ages innui, cros becs à ti.

Unne boinne vieille canchon

Os avez seuremint djò intindu l'canchon ed Jacques Brel qui o pour tite "L'valse à mile tans".

Eh bin, feut eq j'érmerchie un bieu-frère qui o démuché casi l'minme canchon, canté per Jean Poéret in mile-nu-chint-soéçante-et-un.

Chin tite : Unne vake à mile frincs".

Os voulez rire, adon, rbéïez ho chu Tin tube.

Et os pourrez, in puss, bin apprinde ches noms ed ches morcieux ed vianne.

Conme in Espane

Ch'étoait sinmdi, in Russie, pour ches deus rincontes ed fotbal qu'i avoait ech jour-lò : Frinche, Argintine, et Urudjué, Portudjal.

Quat étchipes ed fotbal, ed quat poaiyis.

Mais quanq tu rbées din ches quat étchipes, ches jueus d'edvant, is ju'te din ches troés puss grindes étchipes d'Espane ; Bèrcelone, Madrid.

Madrid ech Réal, et Madrid chl'Athlétic.

Don, sinmdi, os avons ieu Bèrcelone, Madrid chl'Athlétic, pi Bèrcelone, Madrid ech Réal.

Madrid echl'Athlétic o gaingné, et Madrid ech Réal o perdu.

Mais autchun jueu né in Espane din ches rincontes.

Vu ches quat poaiyis !

Put qu'mantcher, pour définir, ch'est toudi ches allemands qui gaingne'te !

A suive.

Trèse mètes

Seuremint qu'os l'avez, conme mi, intindu o vu edpi quèks jours : echt'onme qu'o mi ieu d'accidint, vu qu'i alloait à quater-vint kilomètes per eure et mie à quater-vint-dis, et qu'il o, adon, gaingné trèse mètes pour s'arter.

Ej l'o djò écri i o quèks smangnes, in allant à zéro, i t'arrive rin.

Mais t'avinches mie.

Des gins n'vont mie ainmer quoé qu'ej vo écrire aprè :

- "Magine qu'echt'onme est perti edpi sèse minutes ! A quater-vint kilomètes per eure, il o parcouru vint-et-un kilomètes et troès-chint-trinte-troés mètes.

Chi il avoait roulé à quater-vint-dis kilomètes per eure, i sroait passé lò i o miu d'unne minute, casi deus, et achteure, il est à troés kilomètes ed lò.

Don, il éroait coèr mie ieu cht'accidint."

Ches deus trains

Verdi, unne fanme o raté ed mie grind cose chin train régional.

Adon, ale o prins, vint minutes aprè ech dépèrt dech premier, un train-qui-vo-fin-rade.

Pour foaire quarante kilomètes.

Ale o arrivé tchinze minutes aprè qu'ech premier train fuche arrivé.

Don ?!

Magine qu'unne voéture roule à quater-vint et unne eute à quater-vint-dis !

I o mie unne crosse différinche, mais i in o unne quanq minme.