Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

samedi 30 juin 2018

Esplitcher unne rinconte

... ed fotbal !

Os rbéïez p't'ête ches rincontes ed fotbal à l'télévision, mais jou qu'os avez djò acouter unne rinconte chu vot poste ed radio ?

A l'radio, quanq os acoutez ches jornaleus dech Brésil, Argintine o Potudjal, per eximpe, et eq leu étchipe met un but, os les intindez djeuler.

Os intindez cho :

- "But, but , buuuuuuuuuuuuuuuuuuuuuuuuuuuuuut ! Buuuuuuuuuuuuuuut ed Tertinpiono ! Buuuuuuuuuuuuuuuuuut ! ....".

In Frinche, ches jornaleus font :

- "Buuuut ! But ed Tertinpion ! L'étchipe d'Anmyin mène ...".

Mais un jour au vèpe, j'o intindu un jornaleu corse. Pour ed vrai, il étoait conme cho :

- "Achteure, i o toudi autchun but ed mis. Ah ! Si ! Bastia vient à l'instant ed mette un but, et cho foait un à zéro."

Ch'étoait un vrai corse et unne rinconte ed fotbal, mais os éroème dit un intèremint.

vendredi 29 juin 2018

Ches nouvèles avuc berlure

Os in avez seuremint intindu causer, il existe, surtoute chu internénet, des nouvèles qui sont mie vraies.

Os appelons cho des nouvèles-à-berlure.

Eh bin, l'eute jour, j'o erchu unne lette d'unne fanme, qu'ej lonmeroais Guemlu pour n'mie dire eq ch'est unne bèle-soeur.

A lire quoé qu'ale m'écrit, jé m'dis qu'ale o étè victime d'unne nouvèle-à-berlure.

Mais el lette ed Guemlu m'o foait plaisi.

Minme chi jé n'sais mie qu'i qu'o foait cho à l'fanme.

Bec à Guemlu et s'famille.

mercredi 27 juin 2018

I tchait des cots

In vrai, i pourroait tchaire des cots.

Ch'est quoé qu'i o ieu d'écrit din unne gasète à Tolose.

I foait bieu, i foait keup, adon os ouvrez vos fernètes, per eximpe d'appèrtémints. Et quanq os les rfrunmez, os pouvez foaire tchair un cot.

Qu'étoait assis chu l'fernète.

I péroait qu'in deus jours, i o ieu miu ed vint cots qui s'sont afolés unne gambe.

Vu eq ches cots, quanq is tchai'te, is tchai'te toudi chu leus gambes.

Mais quanq os tchaisez ed quèks mètes, os pouvez vous berziller un os.

Ej su ureus ed vir qu'el gasète ed Tolose s'otchupe'te ed ches cots.

Et ed ches gins qui pourroai'te ête in dsou.

mardi 26 juin 2018

Erchuvoér unne carte postale

Os l'savez p't'ête, mais j'ainme bin invoéyer, ed tans in tans, des cartes postales à des gins eq j'ainme.

Pour leu foaire plaisi.

L'eute smangne, j'o bin ri.

Ej vos esplique.

I o quèks moés, ches moés ed marche et ed moai, j'o écrit à un nveu, fiu d'unne soeur à m'fanme, et unne nièce, conmarade d'un nveu d'un frère à m'fanme, conmarade qu'o des cros problinmes ed santé.

Eh bin, l'eute smangne, ches deus m'ont écrit. Pour mé rmerchier, et m'bailler des nouvèles.

Qu'is seuche'te qu'is m'ont foait étou granmint plaisi.

Et, cho m'o foait rire d'érchuvoèr ches deus in minme tans.

Bec à tertous, et à mes nveus et nièces eq j'ainme.

lundi 25 juin 2018

Is vu'te frunmer

... min collège.

J'o lu cho verdi chu internénet : din l'Sonme, echl'inspection d'académie vut frunmer ches collèges ed Feutchére et Donmart.

Donmart !

Ech collège tout nouvieu qu'o étè construit in mile-nu-chint-soéçante-trèse, quanq j'étoais in sisienme.

Ch'est mie possibe ed laicier foaire cho !

Ej mé ranmintuvoe, per eximpe, ech directeu, et surtoute, ech fille qu'o toudi étè din m'classe,
ches pèrties ed fotbal din l'cour, ches premières anmours qu'os avouons o mie.

Quat innée d'études à Donmart, troés din ch'collège tout neu, et granmint ed ranmintus.

Chi, vos étou, os êtes allés din c'collège, disez-lé mi, et impêtchez qu'i frunme.

Boinne jornée à tertous.

dimanche 24 juin 2018

Un noèrt arrive

... in Frinche.

Echt'onme arrive in avion, in ayant poaiyé chin billet, et avuc un passeport.

Don, tu t'dis eq tout vo bin.

O bin eq cho granmint miu eq ches migrants qui vien'te per ches mers et chin papiers.

Eh bin nan !

- "Jou qu'os avez edl'argint pour vive in Frinche ?" qu'i li dminde ech douénié.

- "Bin ouais !" qu'il i répond echt'onme, "j'o troés chint euros."

- "Os pouvez mie passer, i vos in feut mille." qu'i dit adon ech mawais fonctionnaire.

- "Acoutez !" qu'i dit ech noèr, "j'étoais tchuré in Frinche durant troés innées, ej su pèrti i o un in din min poaiyis, et achteure, ej viens troés smangnes vir éms amis. Don, j'o mie ed problinme d'argint."

Ech mawais o appelé chin chef, et ch'tchuré o ieu l'droét ed passer.

Vu eq ch'est li qu'i m'o conté tout cho.

jeudi 21 juin 2018

Sherbius

... (et mi).

Ch'est ch'tite d'un live ed Toéne Bello eq j'o acaté i o quèks smangnes, et qu'ej su in route à lire.

Chi j'vos in cause innui, ch'est eq j'ainme bin, minme chi, achteure, j'o mie défini del lire.

Sherbius, ch'est ch'nom d'un onme qu'est étou d'eutes onmes !!!

Mi, din ch'tite, ch'est poin mi qui vos écris ech blog, mais ch'est ech pchitchate qui soégne, o vut soégner, Sherbius.

Don, innui, ej vos conseille ed lire ech live-lò, ed aprè, d'ém dire quoé qu'os in avez pensé.

Boinne jornée à tertous.

mercredi 20 juin 2018

In join in Russie

I pèroait qu'in join, granmint ed gins vont Russie.

Adon, j'avoais invie ed foaire conme eux.

I o un in !

Et ch'est vrai eq ch'est bieu.

Rbéïez !













Minme chi os ainmez mie ech fotbal?

Mais pour i aller, feut chi prinde granmint ed tans à l'avinche.

Boinne jornée.

Un jour, ej vos contero un ivèr in Russie.

mardi 19 juin 2018

Quanq os sonmes riches

Unne gin riche, quanq ale vo amon un pauve, o un moinss riche, ale s'moque.

Nan ! In vrai, ale s'moque mie, mais des keups, ale ne s'rind mie compte ed quoé qu'ale dit !

Minme chi ale vut ête régalante avuc ech pauve.

Per eximpe, un riche et un pauve fouft'te insanne et dvise'te ; Ch'riche dit à l'eute :

- "Tu dvroais acater cho, et cho, et cho pour bin foufter."

Pi :

- "L'eute moés, avuc m'fanme et ems éfants, os sonmes allés unne smangne in vagances à ches nèges, in Russie. Ch'étoait fin bin !

Tu pourroais foaire cho un keup avuc t'fanme ?!"

Et l'eute, i répond mie. Vu eq tertous ches moés, i cartchule, chintinme per chintinme, quoé qu'il o coèr conme argint pour acater à minger.

Aprè, din l'vie, i o des gins qui n'sont mie pauves, mais qui dépinse'te granmint trop. Cho rviend à dire qu'is sont conme des pauves.

lundi 18 juin 2018

Min tiot scret

Os vos dmindez p't'ête kmint qu'ej foais pour écrire in picard, quanq i o miu ed chonc innées, j'ainmoais ech picard mais ne l'causoais mie.

Ch'est mes pèrints qui m'ont baillé l'invie : in m'offrant un fin tiot live qui s'intitule "ech picard ed poke".

Ches diminsions : un chintimète de heut chu dis ed lèrgue et tchinze ed long.

I tient din unne poke.

Don pour écrire, j'utilise ech tiot live, et bin seur, ech dictionnaire ed ches diseus. Site qu'os avez à man droéte ed min blog.

Allez vir, et continuez d'apprinde ech picard. Et d'ainmer.

dimanche 17 juin 2018

Dvisons dech fotbal

Ches jornaleus sont, conme ches innées, is passe'te, et is cange'te.

I o quèks innées, quanq un jornaleu causoait d'unne rinconte ed fotbal, i disoait, per eximpe :

- "Ches deus étchipes s'sont djò rincontrés trèse keups, et l'étchipe ed ches Berzouilloins* o gaingné sèt keups, adon eq l'étchipe ed ches Merzaillannoés* n'o gaingné eq deus keups. Don, ches Berzouilloins sont ches favoris."

Ièr, ech jornaleu disoait :

- "I o unne étchipe qui veut, dech verbe valoér, un millar, et l'eute, quarante-sis millons."

Prions, innui, pour qu'ech fotbal érdevienche un ju.

Merchi.

Boin diminche, et si os un père, boinne fète à vos.

* J'espère eq ches Berzouilloins* et ches Merzaillannoés* n'm'in voudront mie d'avir causé d'eux in eximpe.

samedi 16 juin 2018

Pour truvoer un ouvrage

..., il est souvint dminder d'avir ech baccalauréat.

Et din quèk jours, ches épruves dech baccalauréat kminche'te.

Mais à soéçante-et-onze ins, jou qu'ed réussir, infin, d'avir ech baccalauréat vo servir à obtenir un ouvrage ?

A buser.

Os avez quat eures.

Boinne canche à tertous.

vendredi 15 juin 2018

Is sront toudi conme cho

Ches pauves, tu pux toudi els aidier, is sront toudi pauves.

Ch'est un vrai problinme.

mercredi 13 juin 2018

Un abe o tcheu

Cho s'passe in Loère-Atlintike, à Bouèye, tiot village inter Nintes et ches mers.

Din ch'village-lò, quanq t'arrives ed Nintes, tu voés un cros abe, un pin parasol. Tu pux étou l'vir quanq tu rpèrtes ed Bouèye à Nintes, mais cho sert à rin.

Ch'est bin commode quanq t'arrives : tu voés cht'abe, tu sais eq t'arrives à Bouèye. In vnant ed Nintes.

Infin ! Tu voéyoais cht'abe, et tu savoais eq t'arrivoais à Bouèye.

Vu qu'il o plu granmint edpi quèks smangnes, cht'abe o tcheu. Et s'est berzillé.

Qué malur !

Qué malur pour ches gins qui n'séront pu qu'is sont arrivés à Bouèye, quanq is vienne'te ed Nintes !

Mais étou, qué malur pour m'fanme et s'famille à qui appèrtnoait cht'abe, abe qu'os voéyoète chu ches boinnés boutelles ed muscadet dech vititchulteu d'achteure.

Os l'voérez p't'ête toudi chu ches boutelles, mais pu din ches cans.

Donmage !

I o pu qu'à bir un tiot keup à s'mémoère. Tiot keup ed muscadet.

Ch'est mie souvint qu'ej mets eds articles aprè-nonne, mais lò, i avoait urginche. Ch'est conme cho qu'os rconnoaissons un boin jornaleu.

Jade

Os in connoaissez, vos, des filles qui s'lonme'te Jade ?

Mi, j'o ieu l'canche d'ouvrer, i o troés ins, avuc unne jonne qui trachoait à gaingner un molet d'argint in étè, pour pouvoèr, aprè, paoiyer sn'école.

Eh bin ! Ièr, j'o pensé à ale, vu qu'ale est pertie, edpi deus ins, in Corée-dech-Sud.

Adon ! Ièr, ale o du vive unne saprée jornée.

Chi ale lit min blog, tiot bec à Jade.

mardi 12 juin 2018

Gasole et essinche

In Frinche, il o étè déchidé i o quèks moés ed mette ech gasole à ch'minme prix eq l'essinche.

Progressivemint !

Echl'objectif, eq ches gins n'acat'te pu ed voéture qui roule'te avuc ech gasole.

Possibe eq cho fuche unne boinne solution pour réduire l'pollution.

Mais i o un problinme ! Un fin cros problinme !

Echl'essinche, ale veut ed puss in puss. Adon, ech gasole, qu'étoait à moinss d'un euro i o quèks moés, est achteure à un euro et quarante chintinmes, ed des keups, coèr puss.

Béto, os prindrons pu ches voétures à gasole . Os prindrons pu ed voéture.


A moins d'ête rintchéri ed quarante per chint pour nos gaingnages ?!

Reuvons.

samedi 9 juin 2018

Unne fanme s'o chucidé

Ch'est quèk cose ed fin trisse eq d'apprinde qu'unne gin vuche moérir et qu'aprè ale o réussi à moérir.

Aprè cho, ches gins cause'te.

Eximpe :

- "Ale s'o chucidé vu qu'ale avoait ed cros problinmes d'argint !"

Ch'est seur eq ches problinmes d'argint, cho s'voét ; chu ch'compte bancaire.

Mais magine qu'ale s'o chucidé pèr anmour !

Pèr manque d'anmour !

Kmint eq tu vérifiroais cho ?

In rbéïant chin tcheur ?!

Chin tcheur, quanq eq t'apprinds qu'el fanme est morte, s'est arté ed batte.

Put qu'mantcher, achteure, ale est morte.

vendredi 8 juin 2018

En trachez mie à comprinde

Un jour qu'ej m'artoais din unne station, j'o rmartché ech nom ed ches voées : Unne, unne deuze, deus, deus deuze, a, et quat.

Tout vo bin ?!Mie ed tchai troés, et un tchai "a", au mitan ed ches eutes !

Chi un jour os i passez, o chi savez pourquoé, disez-lé mi.

Merchi.

jeudi 7 juin 2018

Ech Présidint et ch'fotbal

In Frinche, edpi mile-nu-chint-quater-vint-dis uit, l'fameuse innée eq l'étchipe ed Frinche o gaingné l'Keupe dech Monde ed Fotbal, ech présidint frinchoés vo rinde unne tiote visite à ches jueus avant eq cho kminche.

Ches jueus, is ainme'te o is ainme'te mie ech Présidint qu'i o adon, mais is accept'te et s'voé'te quèks eures.

Et not Présididnt picard o foait conme ches eutes, mardi.

Il o del canche.

Ech Présidint anméritchin, li, i foait cho étou, mais chake innée.

Et st'innée, che jueus ed fotbal anméritchin, is sont mie vnus l'vir.

Cho vut tout dire.

mercredi 6 juin 2018

Grandés Ereilles

Grandés Ereilles est mie, conme Toèr Assis, un indien fin connu. L'est mie indien, et n'mérite mie d'ête connu.

Grandés Ereilles, ch'est mi qu'est baillé ech nom lò à un jonne qu'avoait, tu t'doutes, eds grandés éreilles. Conme Dumbo, ech'nénéphant dech dessin animé ed quanq j'étoais fin jonne.

Et Grandés Ereilles, ej pux dire qu'ej l'ainmoais mie ; un tiot galibié à qui j'éroais bin mis mes mans chu ch'dgife.

J'os étè granmint eds innées chin nouvèles ed Grandes Ereilles. Et i sanne qu'ej os del canche, vu qu'il o mie vnu dminder l'man d'unne ed mes filles, et qu'achteure, i vo aller à l'frèche. Pour quèks tans.

Qué malur pour ches pèrints d'avoèr un fiu conme ho !

mardi 5 juin 2018

Ches tolosains sont ureus

Lò, ej vos cause ed ches jueus ed rugby ed Tolose.

Is ont, ch'est seur, perdu, i o alintour ed tchinze jours, à leu moaison in juant edvant Castes.

Mais sinmdi, Castes o dvenu champion ed Frinche ed rugby.

Adon, ches tolosains sont ureus et fiat d'avir perdu dvant ch'champion.

Et is n'ont perdu eq d'un point.

Adon eq Montpelier, li, il o perdu ed puss ed tchinze points sinmdi edvant ches minmes jueus.

Et quoé dire ed Lyon qu'o prins unne détchuloté, à s'moaison, edvant Montpelier ?

Adon, ches tolosains, is ont bin raison d'ête ureus. I leu o mantché deus points.


lundi 4 juin 2018

Cacouille à ches marseilloés

Chi un jour os allez conme ej l'o foait  i o quèks jours à Marseille, os pourrez rire un boin keup.

Pour cho, os montez vir ch'Not'Dame del Garde, et ed lò, os verrez toute Marseille.

Adon, os disez à vot fiu, vot fille, vot fanme et vot ami, quanq i o un marseilloés mie loin ed vos :

- "tu voés él crosse cose blanke, lò-bos, cho doét ête ech nouvieu zénit ed Marseille."


Ch'est vrai, quoé ! Ej savoais mie qu'i avoait un stade ed fotbal à Marseille.

samedi 2 juin 2018

Gégé o défunkté

J'o apprins mardi eq Gégé Piantoni, fin boin fotbaleu ed ches innées mile-nu-chint-chincante à mile-nu-chint-soéçante et des bérouètes, étoait mort sinmdi i o uit jours

Quanq, mi, j'étoais ach mériage d'unne ed mes filles.

Gégé, j'ainmoais bin.

Conme ches eutes ed ches minmés innées : Kopa, Fontaine, Vincent, Mèrche,...

Quanq j'intinds causer d'eux, ej mé ranmintuvoe min taïon qu'i m'in causoait quanq j'étoais tiot, alintour ed dis ins.

Et j'ainmoais acouter min taïon nos conter ches rincontes d'avant qu'ej naiche o ed quanq j'étoais fin jonne.

Vlò pourquoé qu'ej vos cause ed cho innui.

Deux-mile-dis-uit est déchidémint unne méchante innée pour ches boins fotbaleus frinchoés, vu l'mort étou d'Hinri Michel in avri.

vendredi 1 juin 2018

Quoé dire dech vaintcheu

... dech Tour d'Italie à bicyclète ?

Etcheurant !

Et i vo, o vut, ervenir in Frinche ?!