Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

vendredi 31 août 2018

Mèrie Eldjerre

Ale o un nom qui vo bin avuc chin caractère : feut mie l'imbêter.

Chin quoé, ale s'défind conme i feut.

Et ale o bin raison.

I o au moinss un cros nikdouille niacoés qui doét granmint rgretter, minme chi i connoaissoait mie ch'nom del jonne fille.

jeudi 30 août 2018

Ej su gauloés

... et fièr ed l'ête.

Mais ej su mie conme ches brikes de kminée, réfrèctères.

Boinne jornée à tertous.

mercredi 29 août 2018

Ches vagances ed mossieu Hulot

Qui n'connoait mie ch'film ed, et avuc, Jacques Tati, foait in mile-nu-chint-chincante-troés ?

Un onme, mossieu Hulot pèrt in vagances chu ches bords ed ches mers, et o eds aüres qui sont contés din ch'régalant film.

Et ches vagances, achteure, is sont - casi - définis.

A pèrt pour ch'ménère Hulot, qu'est p't'ête ech tiot nveu dech mossieu Hulot dech film, et qu'o kminché l'syiènes, ièr, ed vagances.

A moinss eq cho fuche eute cose eq des vagances, et un méchant film pour li ?!

Boinne jornée à tertous.

Chi t'es m'bèle-soeur et eq t'os ets ages innui, cros bec à ti.


mardi 28 août 2018

Punmes coings

... et surieus.

Sont des fruits qui pousse'te chu eds abes.

Et pour granmint ed gins, feut monter din ches abes pour tcheuillir ches fruits.


Eh bin nan !

Din min gardin, i o des keups dò qu'ej su minme obligé d'ém raboaicier pour les tcheuillir

Ch'o un grin avintage : tu pux tcheuillir ches punmes o ches coings in étant à l'ombe.


Et quanq i foait trinte degrés, t'appréchies.

Pour arriver à cho, ej croés eq ch'est quanq tu tailles ets abes eq tu foais eq ches fruits sront mie toute in heut chl'étè d'aprè.

Quanq à ches surieus, feut del patieinche pour tcheuillir ches tiots grains un per un. Mais ch'est fin boin.











Boin étè à tertous.

Et boinnés tcheuillètes.

lundi 27 août 2018

Chuke-et-chukrée

Ch'est ch'tiot nom d'unne jonne chinoése eq j'o rincontré in juillet.

In vrai, ch'est l'traduction ed chin tiot nom.

L'fille est fin régalante, rit toudi (mais mie ganne), o casi, est ureuse et vit avuc min nveu qui, li, s'lonme Diu-avuc-nos.

Quanq j'o vu l'fille et eq j'o su quoé eq vouloait dire chin tiot nom, j'i o dit :
- "T'os del canche, m'fille vient ed s'otchuper durant troés smangnes ed jonnes qu'ont du diabète."

Ale o rit.

Min nveu dit que ch'est ch'pieu qu'est chukrée.

P't'ête !

Bec à Chuke-et-chukrée, à min nveu, et à vos.

dimanche 26 août 2018

Trump m'inmèrde

J'o toudi écrit qu'ej mettro mie ches tiots noms ed gins din éms articles, mais li, l'est présidint ed ches Anmérikes.

Et j'o mie prévu d'i aller d'ichi deus o troés ins, à ches Anmérikes.

Adon, j'ose l'dire.

Ej vux bin dire eq ch'est l'démocratie, eq ch'est mie vu qu'il est viu et laid qu'i put mie ête présidint, qu'i feut mie qu'ej fuche crochier, mais ch'est un vrai fin cros nikdouille.

I risque ed foaire seutir ech monde, et cho ej vux mie.

Prions pour ches palestiniens, ches iraniens, ches mexitchins, l'paix din l'monde et pour nos tertous.
Prions pour eq cho cange aïte aïte.

samedi 25 août 2018

Min lèrd m'o seuvé

I o casi uit jours, j'o tcheu dech quatrienme étage. In vrai, quatrienme barrieu d'unne étchèle.

Ej vouloais continuer ed tcheuillir des fruits pour ches confitures.

Et don, pour ech premier keup d'ém vie, j'o tcheu.

Mie d'mau.

Judi, j'o rkminché.

Rkminché ed tcheuillir des fruits pour ches confitures, et malureusemint pour mi, rkminché ed tchaire dechl'étchèle.

Mais ch'keup-chi, du nuvienme. Alintour ed deus mètes de heut.

Et un molet ed mau à m'man, qui foait qu'in septimbe, j'sro coèr à m'moaison.

Mais chin un chintimète ed lèrd alintour d'ém panche, p't'ête eq cho éroait étè pire.

Fuchez prudint, quanq os grimpez. Surtoute chi t'es min frère et eq t'os ets ages innui.

jeudi 23 août 2018

Nettiez

Ièr, adon qu'ej mé pronmnoais avuc m'fanme, os avons souvint vu, écrit chu l'keuchie : "os êtes in vagances, mais pensez à ne rin laicier" o "quanq os pèrtez, inmnez vot brin".

Et ches gins qu'ont écrit cho ont bin raison, vu quoé qu'os truvons pèr tère. O din ch'sabe.

Aprè, ch'est ches jonnes - i in o des bins - qui ramasse'te.

Mais is peu'te mie tout prinde, et is ainmeroai'te foaire eute cose, ches galibiés.

mardi 21 août 2018

Et aprè


Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho : Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho : Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho : Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire cho :  Verdi, fin tèrd, m'fanme o vnu s'joutcher quanq, mi, j'i étoais edpi quèks dizaines ed minutes. Ale o cru qu'ej dormoais, j'o rin dit, pi ale o ouvert echl'anmoèle in assayant ed mie randonner, pi o rdéschindu. In ayant prins chin oriller. J'o comprins qu'ale alloait dormir eute pèrt, mais chin savoèr à coeuse ed quoé (j'o apprins ech lindman eq ch'étoait vu eq ches fernètes ed not cambe étoai'te ouvertes et qu'ém fanme avoait l'freusse d'avoir froéd !). Quèks minutes coèr aprè, ej dormaois toudi mie, adon ej mé su mis à écrire.

lundi 20 août 2018

Buse

Tu dvroais buser,
Buser à quoé eq t'assaies d'ém foaire,
Pense, pense, pense,
Laice aller étn esprit, permets-ti d'ête libe,
Rtornons, rtornons
Rtornons din ch'passé quanq
Ej té connoaissoais mie
Tu dvoais avir moins ed dis ins (rin qu'un éfant)
Ej su mie un psytchiate,
Et mie un séruzyin diplômé,
Mais j'o mie dzoin d'un grind QI
Pour vir quoé eq t'es in route à m'foaire.

Ch'rfrain
Oh liberté, liberté, liberté, liberté, liberté, liberté, liberté
T'os dzoin ed ...
Hey ! Penses-i
Ti !Buses-iI o rin eq tu puches dminder
Ej pourroais ét réponde mais j'le fro mie
Mais j'étoais chu ch'point ed té canger, ej n'i arrivero mie
Chi tu continues à foaire des coses qu'ej fro mie.

Ch'rfrain

Ches gins vont et vienne'te tous ches jours,
Is jue'te et compt'te ches points
In essayant ed foaire perde l'tète à ches eutes
Adon, foais atincion ed mie perde l'tyiène..

 Ch'rfrain

T'os dzoin ed mi
Et j'o dzoin ed ti, tu l'sais
L'un chin l'eute
Ti et mi n'pouvons rin foaire
Oooh ouais, penses-i min chéri
A quoé eq t'assaies d'ém foaire, buse
Tu dvroais, min chéri, aller i penser drès achteure
Ouais, drès achteure, causons dech pèrdon, causons dech pèrdon, causons dech pèrdon
Woo, achteure
Ouais, achteure
Ej doés canger t'manière ed penser, penses-i
Min chéri, min chéri, min chéri
Causons-in, ed pèrdonner
Woo,causons-in, papar
Ouais, woo hoo
Causons-in, papar, et penses-i drès achteure.



Avuc ét voés et ches canchons eq t'os cantées, tu moériros janmoais, Aretha. Merchi à ti. Et respect

dimanche 19 août 2018

Quanq un car s'arte

... dsu un pont, feut miu s'arter étou.

Mais une voéture o doubé et tc.
                                                                      h
                                                                         e

                                                                            u .


Prions pour tertous ches gins qu'étoai'te dsu, o dsou ch'pont italien.

samedi 18 août 2018

Unne jornaleu ed Dunkèke

Ej pense qu'ale est ed Dunkéke.

A coeuse eq l'eute jour, quanq ej l'o intindue causer, ale o causé d'un village dech sud : Merville, din ch'dépèrtemint dech Nord.

Don, l'fanme vit puss au nord.

Ch'est pour cho qu'ej pense qu'ale est ed Dunkèke.

Mais ale o l'droét.

O mie coési.

Vos, mes boins lecteus, allez vir ches joutes ed Merville ; ch'est innui et dman.

Etpi, i o l'ducasse.

Boinne jornée.

vendredi 17 août 2018

Ale o étè ureuse

... quèks sgondes.

I o quèks smangnes, à mn'interprinze, j'o téléphoné à unne fanme qui dvoait nous invoéyer unne lette.

I falloait eq j'i esplique quoé nos écrire.

Don, j'i dis :

- "Os mettez eq suite à l'visite dé msieur Obert in févrié, patati, patata...."

- "Obert", qu'ale m'dit adon, "cho s'écrit kmint ?".

- "A, u, b, e, r, t" eq j'i indique.

-  "Conme ech canteu* ?" qu'ale m'répond adon.

- "Bin ouais ! ch'est chin frère !" eq j'i dis.

- "Nan ! Ch'est mie possibe ?!" qu'ale dit adon, ureuse (cho s'intind din ch'combiné).

J'o cru qu'ale alloait ém dminder un autographe.

- "Bin nan !" eq j'i avoue .

Un molet ed déception, din s'voés, mais i falloait qu'ej fuche honnête.

Conme toudi.

Et j'o bin ri.

mercredi 15 août 2018

Un poaiyis inconte

Os allez avir du mau à m'croère, mais vu ches poaiyis inditchés chu min blog, i sanne qu'i o coèr, din l'monde, vu ed lò dò ches gins qui rbé'te min blog rest'te, un poaiyis mie connu.

Poaiyis inconte, mais étchipé d'internénet, vu eq deus gins ont pu lire, i o quèks jours, éms articles edpi lò-bos.

Lò-bos ! .Mais dò ?

L'nuit, ej buse. Minme in dormant !

Et j'o comprins quoé eq ch'étoait : un batieu. Un batieu au mitant ed ches mers, et mie un poaiyis.

Et vos, quoé qu'os in pensez ?

Boinne jornée, et boin voéyage à ches gins qui sont dsu ch'batieu.

Tu t'lonmes Mèrie, t'es chu ches mers o chu ches tères, boinne fète à ti.

mardi 14 août 2018

Chincante-nu

... et chincante-nu, cho foait chint-dis-uit.

Don, chincante-nu et chincante-nu et mile-nu-chint, ho foait deus-mile-dis-uit.

O bin, chincante-nu et mile-nu-chint-chincante-nu, ho foait étou deus-mile-dis-uit.

Pour continuer, ech quatore dech moés d'eu ed mile-nu-chint-chincante-nu et chincante-nu innées aprè, cho foait, coèr et toudi, ech quatore dech moés d'eu ed mile-nu-chint-dis-uit.

Innui !

Magine unne gin qu'o né ech quatore dech moés d'eu ed mile-nu-chint-nu !

Eh bin ! I fro unne crosse fête din unne innée !

Alintour dech quatore dech moés d'eu deus-mile-dis-nu.

Et ches soéçante innées ed vie del gin.

Bec à ches gins qui m'connoai'te et qu'ont né ech quatore dech moés d'eu.

Bec à ms'eutes bieu-frères.

Et cros bec à min onke qui est né étou un quatore dech moés d'eu, mais trèse innées avant min bieu-frère qu'estné in chincante-nu ; Mile-nu-chint-chinacnet-nu.

lundi 13 août 2018

Canger in viusichant

J'o un cros problinme : ej viusis.

Os m'direz :

- "Conme tertous, unne minute toutes ches soéçante sgondes, et un jour chake jour.

Ouais, mais mi, in viusichant, i sanne qu'ej cange ed tète !

Ej vos écris cho, vu qu'edpi quèks jours, des gins qui m'connaoisse'te, edpi inter vint et trinte ins, m'prinde'te pour un ed mes frères.

Cho m'o granmint surprins d'apprinde cho l'eute jour.

Mais qu'is fuche'te rassurés, ej su toudi ED.

Et je l'resteroais !

Per eximpe, min frère un jour qui broéyoait du noèrt, il o téléphoné à unne ed ses filles. Mi, chi ho m'arrivoait, jonmaois ej déringeroais ems éfants o m'fanme.

Eute eximpe : min frère o casi pu ed cavieus dsu s'tète. O granmint moinss eq mi !

Adon, ej comprins mie eq des gins qui m'connoaisse'te peuche'te nos confonde.

samedi 11 août 2018

Din ch'mawais sins

Ech darain diminche ed juillet deus onmes s'sont seuver del prison ed Colmèr.

Et ont étè insuite arté deus jours aprè à Reubaix.

Busez un molet !

Os voulez tchitter Colmèr, qu'est in vrai, unne fin bèle ville ; os allez adon à Reubaix, o bin à Peillon, Ladjole o coèr Itxassou ?

Mi, minme chi j'ainme bin ch'nord et ch'Nord, j'iraois surtoute mie à Reubaix : j'o apprins qui i o unne école ed doéniers et doénières.

O bin à Tourtchoin, qu'ale est chl'école-lò ?!

Casi l'minme cose !

Et ches doéniers, is trache'te toudi.

Don, chi os êtes obligé ed tchitter Colmèr, suivez ches voées pour Rouffach o Niederentzen, per eximpe.

Et évitez d'aller in direction ed Wintzenheim o Ammerschwihr.

Minme chi ch'est bieu.

Boin voéyage.



vendredi 10 août 2018

Dvant unne école

Ièr, à Nèle, tiot village del Sonme, adon qu'ej mé promnoais, ej passe edvant unne école et j'voés, chu l'uis del cour, unne pantchèrte.

J'avinche et j'lis :

"Chi os voéyez mie d'gin à l'cour, appelez ech zéro sis machin machin."

Jé rbée bin, mie ed gin din l'cour.

Don, zéro sis machin machin.

Eq j'o ieu invie ed foaire.

J'l'o mie foait, mais p't'ête eq j'éroais ieu une gin in vagances à Tchin-plage o él-bourq-éd-eut !

Chi ech zéro sis machin machin s'est rconnoait in lisant min blog, l'éroait p't'ête intérêt à canger un molet l'pantchèrte dechl'école.

Chi i vut passer ed boinnés vagances.

Coèr un keup, boin été à tertous.

jeudi 9 août 2018

Del mayeunnoèse

... chu ches mèrches dech métro ed Marseille.

Tu té dmindes à quoé cho sert !

A rin.

Ch'est seuremint un accidint.

Un pot qu'o du tchaire d'un so d'unne gin qui vnoait ed l'acater.

Mie del foaire, l'mayeunnoèse. Tu pronmènes mie del mayeunnoèse eq t'os foait.

Surtoute quanq i foait keud, casi conme in infer.

Don, ech pot o du tchaire.

Pi unne gin. Qu'avoait mie vu l'seuce pèr tère, et qui, li étou, o tcheu.

Pauve gin ! L'o tcheu chu ch'pot qu'étoait berzillé, et s'est keupé l'man.

Mais, bin élvée, s'o estchusé d'avir mis du sanke pertoute.

mercredi 8 août 2018

Os avons rtruvoé t'voéture

Fuche ureus, cht'onme, os vnons d'étruvoer t'voéture eq t'avoais perdu i o onze ins. Din ches intailles ed Bofe, din l'Sonme, qu'ale étoait, t'voéture

Ch'est quoé qu'éroai'te p't'ête dit ches cadoreus à unne gin, lindi, chi malureusemeint pour l'gin, i avoait mie ieu un cadave din l'voéture.

Achteure, ches cadoreus n'ont rin dit, vu qui n'sai'te mie à qui est l'carète, et qu'is ont mie érchonnu ch'mort.

Jou qu'i o un lien avuc l'eute cadave rtruvoé mardi à Mérs ?

A suive.

Chi t'es min onke qu'est resté à Bofe eds innées et qu'o béto ches ages, cros bec à ti.

mardi 7 août 2018

Un chamoés in vagances

Ches chamoés, à pert chi j'écris unne berlure, et chi ch'est cho, feut mé l'dire, vi'te in montaingne.

In heut ed ches montaingnes, muchés.

Muchés ed tertous, et surtoute ed ches pèrisiens.

Adon, verdi, quanq un jonne qui couroait - i o des nikdouilles qui coure'te quanq i foait keud - à Bzançon, ville qu'est à moinss ed sèt-chint mètes de heut, o aperchu un chamoés pi erchu un keup ed corne din ch'tchuisse, l'o été surprins.

L'o p't'ête cru, ech galibié, un molet ed tans, qu'i reuvoait.

P't'ête, étou, eq ch'étoait un chamoés qu'avoait prins des vagances.

Et p't'ête étou, vu ches tans, qu'echl'animal avoait prins un keup ed solé dsu s'tète.

Pauve chamoés, loin ed ches vraies montaingnes, et surtoute, pauve jonne, avuc un treu din ch'tchuisse !

Minme chi l'o ieu l'canche ed vir un chamoés.

Qu'étoait p't'ête in vagances.

O bin perdu ?!

lundi 6 août 2018

Dis-uit-chint-quater-vint-dis

Ech sis dech l'innée-lò, ches anméritchins utilise'te pour un premier keup l'caïèle electrike.

Déchidémint, ech sis dech moés d'eu, ches anméritchins font ed crossés berlures.

J'o minme du mau à croère qu'ech présidint anméritchin d'achteure s'fuche déclèré candidat in join deus-mile-tchinze.

P't'ête qu'il i o pensé pour un premier keup ech sis dech moés d'eu deus-mile-quatore.

Crosse pensée, innui, pour tertous ches japonoés.

dimanche 5 août 2018

Em photo dech moés d'eu

Cho pourroait ête unne moéssonneuse, conme per eximpe, lò-dsou.


Eh bin nan !

L'photo eq j'ainme granmint et eq j'o mis, pour ech moés d'eu chu min calindrier, ch'est lò-aprè.


J'o prins cho in join deus-mile-dis-sèt à Baïkalschloïé, un village qu'os érez du mau à truvoer chu unne carte. Minme ed Russie.

Ech village, il est régalant, et fin calme. Quanq t'évites, à dis eures, ches deus o troés chucheus qui djeule'te à l'cour.

Ch'est un village conme i dvoait i in avoèr i o miu ed chint ins in Frinche, avuc des gins qui tchultive'te leu gardin, qu'ont des keups unne vake'te, et qui sé dminde'te pourquoé eq t'os vnu din leu village dò qu'i o rin.

Merchi, min Diu, ded m'avir permis ed connoaite cho.

Pour ches gins d'ém famille, ech calindrier deus-mile-dis-nu est in route à ête foait. Manque coèr quèks photos.

samedi 4 août 2018

Em soeur

Ti l'soeur eq j'o jonmaois ieu,
Sais-tu chi tu avoais vétchu
Quoé qu'os éroème foait insanne?
Troés ins aprè mi tu sro née
Adon nos no sroème pu tchittés
Conme eds amis qui s'rsanne'te.

Mais tu n'es mie lò
A qui l'feute ?
Mie à min père,
Mie à m'mère
T'éros pu canter cho !

vendredi 3 août 2018

Rmette à aprè

... quoé qu'éroait p't'ête étè foait ech lindman.

Ah ! L'pauve station ed Montpènesse !

Deus keups in rade ; deus keups au mitan ed l'étè, casi à ches minmes dates, quanq ches gins vu'te pèrtir in vagances.

Mais edpi sinmdi o diminche, is nos apprinde'te à procrastiner.

Ej vos explique.

Sinmdi o diminche, ches dirigints del station nos di'te eq mardi, tout sro répéré.

Mais edpi lindi, os avons unne annonche qui nos eq deus trains chu troés rouleront dman, pi ch'lindman, eq troés trains chu quat rouleront judi, pi coèr un eute jour, toute dvroait ête normal p't'ête verdi (innui).

O casi !

Boin corage à ches gins qui vont pèrtir, chi is peu'te.

jeudi 2 août 2018

Avuc unne bérouète

Un onme o, pour rétchupérer ed l'argint, merché sèt-chint kilomètes din ches Alpes, inter Thonon-ches-bains et Nice.

Avuc unne bérouète.

Deus coses à dire, o bin in vrai, à écrire :

In premier, pour aller ed Thonon-ches-bains à Nice, i o moinss ed sis-chint-chincante kilomètes. Et coèr, in foaisant un fin cros décatour.

Don, pour in foaire sèt-chint kilomètes, à piés, cht'onme o p't'ête foait unne crosse berlure ed voée.

In sgond, echt onme o voéyagé avuc unne bérouète.

Et chin so et es affoaires.

Et étou, unne deusienme reue ed bérouète.

Os avez seuremint comprins  dò qu'ej vouloais in vnir ?!

Pourquoé inmner unne bérouète et unne deusienme reue ed bérouète quanq il éroait pu mercher uniquemint avuc chin so dsu l'dos ?

Etpi ! In montaingne, unne bérouète, ch'est moinss aisée à promner qu'un so dsu chin dos.

Bin ! Mi, ej vo pèrtir in montaingne din quèk jours.

Mais chin bérouète.

Boin étè à tertous

mercredi 1 août 2018

Laiciez-mi tchinze minutes

Lindi, au vèpe, in rintrant pèr ch'train, et pour un keup qu'is ouvroai'te et qui avoait mie granmint ed gins din ch'train, vu qu'os sonmes au mitan ed l'étè et ches vagances, unne fanme-contrôleu mé dminde min titchet.

Adon, pour rire, mais chin l'moutrer, eq j'o invie ed foaire unne cacouille pi d'rire, j'i réponds :

- "Jou qu'os pourroète érvenir din tchinze minutes, vu qu'ej su in route à lire et eq j'o mie défini min live ?"

- "Chi ch'étoait possibe, ej vos froais plaisi, mais j'o d'eutes gins à contrôler." qu'ale m'annonche, avuc un tiot sourire.

J'o cratché, et i o moutré austôt min titchet.