Et Diu o créé l'Fanme

Os l'savez edpi qu'os avez allé àch catéchisse, Diu o tout créé : l'tère, ches tans, ech solé, él lunme, ech jour , él nuit, ches bétails et ed quoé leu bailler à minger, pi l'Onme et aprè, l'Fanme (grind merchi à li pour cho étou, chin quoé, ej sroais mie lò pour dviser).

Diu vouloait eq toute fuche bieu - il o ieu raison - et aprè, vu kmint qu'il o ouvré, Diu o créé - merchi pour nos coèr un keup - , ch'repos.

Diu o créé l'Fanme ! 

Un jour, in mile-nu-chint-chincante-sis, unne gin in o foait un film, avuc, ch'est seur, unne bèle fanme et Jean-Louis Trintignant. P't'ête qu'os avez djò vu ch'film.

In deus-mile-troés, muché à Dintchèrke, Diu o rvenu, in prindant ch'nom ed Gilles pour mie ête rconnu, et o créé, coèr un keup, unne bèle fanme. Conme pour l'première i o des sièkes, il i o baillé ech tiot nom d'Eve.

Eve est unne fin bèle jonne fanme ; tertous ches frinchoés du monne l'ont vu et l'ont dit début déchimbe. 

Merchi, min Diu, pour tout s'que tu foais ed bieu pour nos, et boinne innée, Eve. Et ches eutes qui li'te ems articles.

Echl'invie d'écrire

Edman, os pèrtirons nos deus,
Ti et mi, tous seuls au mitan ed nul pèrt,
Lò dò qu'echl'horizon s'confond avuc ches tans,
Os laicierons foaire ech hazèrd.

Os vivrons unne aüre chin nuage,
Chin crainte o méfieinche
Mie importe ech tans et nos ages,
Juste ech bonnur et ed l'insouchieince.

Ech voée sro bordée d'abes et d'fleurs,
os explorerons quoé qu'i o ed puss bieu
Chatchune ed leus mile couleurs
Et not vie n'éro pu ed darain

Avuc ti, ej traversero ches océans
Autchunne tère t'sro inconnue
Chl'univers dviendro atrivant
Un monde conme tu l'os jonmoais vu

Ech lunme et ches étoéles veilleront chu nos
Rin éne nos artro
et os pourrons dvénir nikdouile,
L'anmour nos djidero.

Edman j'ouvriro ems ius
Tu sros mie lò
Min reuve et min bonnur éront involé,
Mais jonmoais ej té diro adé
Edman, prépère-ti
A ches premières lunmières j'iro t'tcheure.

D'unne gin eq j'ainme

Che Rnèrd et ch'Leu

Un jour, che Rnèrd et ch'Leu voéyageoai'te insanne. Chu ch'kmin, is truve'te un pot ed mié.

- "Fin boin, Leu", dit ch'Rnèrd. "chi tu vux m'croère, interrons ichi ch'pot ed mié, et os pèrtagerons in rvenant."

- "Rnèrd, ej vux bin."

Che Rnèrd et ch'Leu ont interré don ch'pot ed mié et ont rpèrti. 

Chonc chint pos aprè, che Rnèrd s'arte d'un keup.

- "Jésus, min Diu ! J'o oblié qu'os m'attindons pour un batinme. In puss, ch'est mi ch'parrain. Leu, mèrche dvant. Jé rviens fin rade té rjoinde."

Durant qu'ech Leu continue d'avincher, che Rnèrd court intamer ch'pot ed mié. Chonc minutes aprè, i rjoint ch'Leu.

- "Rnèrd, vlò un baptinme béto foait."

- "Ch'est vrai, Leu."

- "Dis-mi, Rnèrd, qué nom jou eq t'os baillé à tin filleu ?"

- "Leu, j'i o baillé chti d'Intamé."

Chint pos aprè, che Rnèrd s'arte net.

- "Jésus, min Diu ! J'o oblié qu'os m'attindons pour un eute batinme. In puss, ch'est mi ch'parrain. Leu, mèrche dvant. Jé rviens fin rade té rjoinde."

Durant qu'ech Leu continue d'avincher, che Rnèrd court matcher l'mitan dech'pot ed mié. Chonc minutes aprè, i rjoint ch'Leu.

- "Rnèrd, vlò un eute baptinme béto foait."

- "Ch'est vrai, Leu."

- "Dis-mi, Rnèrd, qué nom jou eq t'os baillé à tin filleu ?"

- "Leu, j'i o baillé chti d'A-mitan."

Chonc chint pos aprè, che Rnèrd s'arte coèr d'un keup.

- "Jésus, min Diu ! J'o oblié qu'os m'attindons pour un batinme. In puss, ch'est mi ch'parrain. Leu, mèrche dvant. Jé rviens fin rade té rjoinde."

Durant qu'ech Leu continue d'avincher, che Rnèrd court achver ch'pot ed mié. Chonc minutes aprè, i rjoint ch'Leu.

- "Rnèrd, vlò un eute baptinme béto foait."

- "Ch'est vrai, Leu."

- "Dis-mi, Rnèrd, qué nom jou eq t'os baillé à tin filleu ?"

- "Leu, j'i o baillé chti d'Achvé.  

Adé, Leu ! J'o à foaire eute pèrte. Quanq tu t'in rtorneros, n'oblie mie, au moinss, ed déterrer ch'pot ed mié et d'ém warder m'pèrte."

I sanne qu'ho fuche un viu conte ed ches poéyisans gascons rtcheuilli pèr Jean-Frinçoés Bladé. J'o bin ainmé.

Kmint qu'is font

L'eute matin, à sis eures trinte,  j'étoais à l'station à attinde qu'ech train arrive. 

In attendant, ej m'otchupe in rbeïant. 

Et lò, ej voés annoncher qu'un train qui arrivero din une eure vint éro chonc minutes d'értèrd. Ech train lò, i kminchero à rouler din unne eure. Mais djò, ches gins qui s'otchupe'te ed ches trains i sai'te qu'il éro chonc minutes d'értèrd.

Mie croéyabe,  mais vrai. 

Boinne jornée à tertous.  

Echl'évêke ed Noéyon

Innui, in ch'premier déchimbe deus-mile-vint-troés, ej voudroais vos causer d'un évêke ed Noéyon lonmé Eloé, dvenu aprè s'mort Sint Eloé.

A Noéyon, fin bèle tiote ville edl'Oése, i o unne cathédrale, grinde. Rbéiez ! 

Pour ches gins qui l'sai'te mie, quanq i o unne cathédrale, i o, o bin i o ieu, un évêke qui i reste, o qui i restoait, din l'ville-lò .

Don, à Noéyon, i o ieu un évêke. In vrai, durant des sièkes, i o ieu granmint d'évêkes, chatchun chin tour, chatchun aprè chti d'avant et avant chti d'aprè.

Pèrmi eux, i n'o un qu'est puss connu : chl'évêke lonmé Eloé, connu din unne fanmeuse canchon avuc ch'roé Dagobert..

Mais i o mie qu'él canchon qui foait qu'il est connu.

I péroait qu'echl'évêke, grin forgeron et orfeuve, étoait étou poéyisan. Il ouvroait des keups din ches cans. Os pouvons nos dminder quanq ch'est qu'i prioait.

Un jour qu'il étoait in route à rabourer avuc unne carue satché pèr deus bus, un orse vient, prind un ed ches deus bus et pèrte le matcher.

Echl'évêke, achteure, o pu qu'un bu pour satcher s'carue, pèrte adon tracher chl'orse, l'truve et i ordonne dé vnir rimplacher ch'bétail dvant s'carue, avuc l'eute bu.

Et chl'orse o obéi.

Din ch'can dò qu'i o ieu conme un mirake, ches gins éroai'te construit unne abbaye lonmée chl'abbaye d'Orsecan (achteure, Chiry-Orsecan).

Quanq ej vos écris tout cho, os vos disez eq j'o granmint ed gingin. Nan ! Ej lis.

Echl'histoère dech l'évêke et dechl'orse, j'o lu cho din un live qu'o pour tite "Echl'orse, histoère d'un roé déchu*, écrit pèr Michel Pastourieu.

Ej vos conseille del lire ch'live, et d'aler vir l'cathédrale ed Noéyon. Os pouvoète minme, avant o aprè, aler minger din un manoèr, ch'Manoèr Sint Eloé, inter él station ed Noéyon et ch'cathédrale ; ch'est fin boin.

Boin premier déchimbe à ches forgerons, orfeuves et poéyisans. Et à ches eutes.

*déchu, din ch'sins "avir tcheu d'unne boinne situation".

Ches boins écologisses et l'ieu

Pour ches boins écologisses d'achteure, i o deus saisons :

- Echl'étè qui est achteure inter dis dech moés d'avri et ch'tchinze dech moés d'octobe, et chl'ivèr.

Pour s'laver in ivèr, ches écologisses économise'te l'ieu in nettiant leu sesque, leu tchul et dsou leus bros. In moéyène, un lite pour laver et un lite pour rincher.

Et ed tans in tans, is nettie'te leus cavieus et ch'reste. Troés lites, et de l'ieu del pleuve.

In étè, cho cange un molet, quanq is trinspire'te granmint ; is peu'te s'laver deus keups pèr jour. Cho foait quat lites. Puss un lite ed rouve à boère pour mie gadrouiller l'ieu.

Ch'est bieu ed savoèr cho, et ch'est boin pour no'planète.

Pour ches flérinées à tabe o din un train, pèr eximpe, ch'est eute cose.

Boère

In ivèr conme in étè,

Avant-nonne o bin au vèpe, 

Onme, fanme o bétail,

Seu o avuc d'eutes,

Tchuré o cinsier,

Riche o pauve,

Ayant du gingin o étant nikdouille,

I feut boère.

De l'ieu.

Chti qui vut boère eute cose que del'ieu, i put. Mais feut adon granmint ed prudinche.

Ches cots et ches nèges

- "J'ainmeroais bin savoèr kmint qu'is font ches cots pour mèrcher quanq i o ches nèges* pu heutes qu'eux."

Eq dit un tiot, din un live qu'ej sus in route à lire et qu'o pour tite "El moaison din éltchèle";

Ch'live o étè écrit pèr unne érméniène qui, ureusemint, l'o écrit in frinchoés. 

In premier, i sanne qu'él fanme o oblié ed définir ch'tite dech live. Ale éroait pu écrire "El moaison din éltchèle is vive'te" o bin "El moaison din éltchèle i foait boin vive", mais nan, ale o jusse écrit "El moaison din éltchèle".

Rvenons à l'tchestion dech tiot et l'réponse. Ch'est eq ches cots, quanq i o granmint ed nèges, is seut'te. Et don, malureusemint, p't'ête, is rtchai'te à chake keup leu djife din ches néges.

A moinss, p't'ête, coèr un keup, eq ches cots is foaiche'te conme ches teupes ; is creuse'te din ches nèges pour mèrcher in dsou.

Chti qui sait put mé l'dire.

Boinne jornée, et cros bec àm'mère. 

* A béto pour ches premières nèges !

Min voésin est fin rmonté

L'eute jour, j'étoais à l'cour quanq d'un keup, j'intinds min voésin hurler :

- "Chi ej truvoe chti qui m'prind mes vêtemints quanq is sont chu ch'fil in route à sétchir, j'i berzille ch'djife !"

Mi, j'o ieu unne crosse freusse in l'intindant, et j'o mantché ed tchier din s'maronne.

 

Bèle o méchante mort

I avoait un keup, unne fanme maristère qui dminde à ches élèves :

- "Quoé eq ch'est unne bèle mort ?. 

Un galibié lève és main et est autorisé à réponde. Adon i répond :

- " Unne bèle mort ! Ch'est conme pour min taïon qu'est mort in dormant".

- "Bin !" qu'ale dit l'fanme, "bieu eximpe".

- "Achteure, jou qu'os pouvez m'bailler un eximpe ed mort qu'est méchante ?"

Ech minme tiot lève coèr un keup s'main et est coèr autorisé à réponde.

- "Unne méchante mort, ch'est conme pour ches amis ed min taïon qu'étoai'te din l'voéture avuc li quanq i s'o indormi."

Un fin bieu baptinme

Ch'étoait i o quèks smangnes, din no'bèle région ed Picardie, unne famille déchide ed foaire batisier chin darain éfant. Pour cho, ale rinconte ech tchuré ed chin village et coésit un diminche pour ch'batinme.

Quanq arrive ch'diminche, ch'tchuré est à l'église et attind ches jonnes et leu galibié. mais is vienne'te mie.

Quèks jours aprè, cht'onme d'église croése ches pérints et leu dit :

- "Et ch'batinme ?"

- "Oh, Msieur l'tchuré, ch'étoait fin bin. Os avoème toute not famille, i foaisoait bieu, os avons passé un boin diminche."

- "Et l'messe ?"

- "Oh zut ! Os avons oblié d'i vnir."

Mais pour eux, ch'baptinme étoait fin bieu.

Il o unne crosse driche

Ch'est des coses qu'arrive'te et qui font mie rire, avoir unne driche ; surtoute quanq ch'est un papar* d'un an qu'o cho.

Et l'eute smangne, un papar o hapé l'driche ; unne fin crosse driche;

Pour ches pérints, i avoait deus problinmes : 

- in premier, ch'papar à soégner, 

- et un deuse, ches vêtemints dech papar à nettier.

Pour esplitcher ech deusienme, és mère o ieu unne bèle phrase :

- "Edpi quèks eures, quanq no'fiu i tchie din s'tchulotte, cho rmonte chu chin maillot. conme quanq tu trimpes un molet un chuke blank din un tiot ju."

Ch'est unne compèraison aisiée à comprinde, qu'i m'sanne.

Boinne jornée à tertous. Nettiez bin vos mains, et corage à ch'tiot et ches pérints.

* Mettons que quanq qu'os sonmes eds adultes, os savons, in principe, nos tribouler tout seu.

Ête à deus indroéts in minme tans

Jou eq ch'est possibe qu'innui, ej prinche un ju avuc m'fanme au matin, alintour ed uit eures à m'moaison, in cantant unne canchon à min premier tiot-fiu pour ches âges, innui, et qu'ej fuche étou din un train à chint kilomètes d'ém moaison ?

Ouais ! Ch'est possibe.

I o unne asteuche.

N'disez rin à min tiot-fiu, mais ch'film avuc m'fanme et mi in route à bir un ju din no'lit et à canter qu'os invoéyons pèr internénet à not tiot-fiu innui o été foait ièr. Os avoème muché ch'calendrié.

Mi, ej vos i foaire unne surprinse in arrivant din quèks minutes.

Bec à tertous, et surtout à mes tiots-fius.

Unne fin grinde rinconte ed fotbal annulée

Lindi, quèks jornaleus étoai'te fièr d'annoncher, sis jours avant unne rinconte ed fotbal diminche inter Bress et Strasbour qu'ale sroait annulée à coeuse del pluve dech merkerdi premier et judi deus novimbe.

Seuremint qu'i avoait rin ed puss important à dire lindi !

Conme os sonmes tertous fin trisse d'apprinde cho !*

Conme os ainmeroème pouvoèr ête à Bress ech douze novimbe et vir ches jueus juer ach fotbal !*

Boinne jornée.

*Os m'croéyez chi os voulez.

Echl'orse et ches moukes

I avoait un keup, un viu qui vivoait seu din s'moaison. 

Un jour, il atcheuille un orse qu'étoait deschindu d'és montaingne, et ches deus vive'te insanne.

Chl'orse est ureus et aide ch'viu, pèr eximpe, à truvoer ed quoé minger in allant àl cache.

Un jour qu'echt'onme i dort, vlò des moukes qui bordure'te, qui appreuche'te ed li. Cht'orse foait toute pour els éloégner, avuc s'crosse patte.

Mais malureusemint, unne mouke réussit à s'poser chu l'dgife dech viu qui dort.

Adon, chl'orse prind un cros cailleu et épeutre l'mouke.

Et tue ch'viu, malureusemint.

Ch'est un conte truvoé din ch'live ed Michel Pastourieu qu'o pour tite "Echl'orse, histoère d'un roé déchu*. Ej vos in rcauseroai coèr.

*déchu, din ch'sins "avir tcheu d'unne boinne situation".

Détouiller unne girafe

L'eute jour, unne jonne fille, sèse ins d'âge, dit à ches pérints, avant ches vagances d'octobe :

- "J'ainmeroais bin canger d'école."

- "Ah ouais !" qu'is i réponde'te ches pérints, "Quoé-jou eq tu vourroais foaire ?"

- "J'ainmeroais bin apprinde à m'otchuper ed bétails. Edpi qu'ej sus fin tiote, j'os toudi ainmer ches bétails. Pèr eximpe, ches lynsks. Adon, ch'est pour cho qu'ej vux canger d'école".

- "Ouais ! Mais os sonmes djò in octobe, cho vo mie ête aisié, etpi, cho sro mie eds écoles gratiss !

- "Min onke o apprins à s'octhuper ed bétail din unne école privée, et achteure, il o bin vétchu !"

- "Din l'ville dò eq tin onke o apprins chin premier ouvrage, i avoait un minisse (qu'o mantché d'aler in prison) et tin onke, aprè dis innées à ouvrer, il o rgrèté és études."

Achteure, ches pérints dél jonne fille buse'te ; put qu'mantcher, inter détouiller* unne girafe o traire des vakes, castrer des coéchons, élver des glinnes et ête ureuse, i sanne aisié ed coésir.

Mais is buse'te coèr.

D'avinche, boin rtour dmain à l'école à tertous ches galibiés.

*Atincion ! Feut mie confonde détouiller unne girafe et peinde unne girafe ; ch'est poin l'minme bruche.

Unne glinne ed ches bos

Justch'àch trinte dech moés d'octobe, ej connaissoais unne seurte ed glinne, ches glinnes qui ponde'te eds us.

Mais edpi ech trinte au vèpe, j'o apprins qu'i avoait étou ches glinnes ed ches bos. Ch'est mie des cèpes, mais ch'est étou des mousserons.

Et ch'est fin boin à minger ; l'pruve, ej sus toudi in vie (merchi àm bèle-fille).

Alez din ches bos, et trachez bin. 

Boin accion.

Deus coses à mie confonde

Ièr au matin, un juge esplitchoait o assayoait d'esplitcher à un jornaleu qui feut mie confonde ches gins qui tue'te eds innochints pour obtenir quèk cose et qu'os pouvons dire eq ch'est des terrorisses avuc ches gins qui ainmeroa'te avir un poaiyis pour eux edpi granmint d'innées, qui sont in prousse mais tue'te mie d'eutes gins.

Minme chi ch'est deus vive'te insanne.

Busons et prions.

Foaire fiat

Avuc ech bouton d'ém maronne, éne chinture et ches bertelles, cho dvroait tnir.

Feut toudi ête prudint.

Boinne jornée.

N'in feut unne saprée dose

Quand unne gin dit à unne eute qu'ale l'ainme et qu'ale vut vive avuc ch'reste dech vie, chi ch'deusienme dit qu'ale vut bin, i feut qu'is euche'te unne sapré dose d'Anmour pour eq cho mèrche. 

Ems vagances in Guad'leupe

Ej viens ed rintrer ed tchinze jours ed vagances in Guad'leupe et j'vouloais vos conter quèks ranmintuves.

Ah ! El Guad'leupe ! Un insanne d'iles au mitant ed ches keudés mers ! Un indroét dò qu'i foait toudi keud, puss o moinss slon ches deus saisons qu'i o, unne sèke lonmée Carême (!!!), ed déchimbe àch moés d'avri, et l'eute, humide, lonmée ivèrnége, pour ches eutes moés edl'innée.

Mi, os l'constatez, j'o pèrti inter sectimbe et octobe.

Ah ! Eq ch'est bieu l'Guad'leupe !

Nos, deus jours aprè qu'os arrivons, i o ieu del pleuve ; "alerte rouve" qu'is ont dit ches gins qui surveille'te ches tans. Os avons resté unne tiot jornée din no'cambe d'hôtel, pi unne eute, ech lindmain, à être prudint ; alerte orangé, qu'i péroait.

Mais aprè, toute étoait fin bin ; ech sabe ed ches bords del mer, pi ches mers, fin keudes. 

Os avons foait unne baingnade dò qu'os avons vu des crosses tortues et des bieus pichons qu'os voéyons mie in Frinche din ches mers. Tout conme ches arignies !

Un tiot problinme, ches méduses qu'i o din ches mers ; i n'o unne qu'i m'o pitché à min pié, et j'o ieu granmint ed mau durant quèks jours.

Mais cho mis à pèrte, ch'étoait fin bin et fin bieu.

Ah ! J'oblioais : avuc ém copine, os avons étou ieu del fiève durant deus o troés jours, fiève ganne, noèrte o bleue, os savons mie, mais trinte-uit, trinte-nu degrés, cho, ch'est seur. Et avuc cho, deus o troés jours à poin foaire grin cose.

Pour définir ed vos conter ems aüres, ej diroais eq ch'étoait fin bin. A pèrte quèks keups. Mais feut i aller, o i rtorner.

Boinne jornée à tertous, et j'espère vos avir foait reuver.

Pour ches inseignants d'Aro

... et ed Frinche, fin crosse pensée pour eux, pour leu ouvrage et leu corage.

Innui, au moinss un onme est mort in ouvrant et in voulant protéger ches eutes inseignants et ches galibiés d'ésn'école ; prions pour li, s'famille et ches collègues.

Ech Canal dech Nord

Ch'est unne voée d'ieu construite, quanq j'étoais un papar, inter l'Oése et Duntchèrke, pour ches cros batieus ed mérchandises.

Ch'Canal, i trécope granmint ed villages, conme pèr eximpe, ches villages ed Catigny, Noéyon din l'Oése, Etricourt, Molin, Alaine, Epinancourt, Rouy-Grind et Tchiot-Rouy, chin voésin, Buvèrchy din l'Sonme, Graincourt-ches-Havrincourt, Ytes, din ch'Pas-ed-Calais, et Arleux, din ch'dépèrtemeint dech Nord.

Quèks clitchés alintour ed Rouy-Grind et Tchiot-Rouy

Mais vu ch'nombe ed batieus qui i passe, i sroait tchestion del ragrandir.

I péroait étou qu'avuc leus manicraques, is pourroai'te béto ouvrir un nouvieu canal, ech Canal Kérpien*, alintour del ville de Hin.

Boinne jornée.

* tiote cacaouille pour min frère.

J'o rtruvoé unne grinde fille

Ch'étoait merkerdi au vèpe, in rintrant ed min ouvrage in train. unne jonne fanme vient s'assir casi à côté ed mi, et jé m'dis qu'ej l'o djò vu, mais i m'sanne eq ch'étoait i o quèks innées.

Et j'i o dmindé. Ouais ! ale s'ramintiuvoait étou ed mi. Os nos avoème rincontré, din ch'train, quèks keups, din ches innées deus-mile-dis-uit, deus-mile-dis-nu, et p't'ête minme avant cho.

A l'époke, j'i o mie dit et j'croés eq j'i diroais janmoais, j'avoais prins un clitché ed ches gnous. eq j'o étou rtruvoé.

Rbéïez :

Edpi ch'clitché, él grinde fille d'avant o devnu unne jonne fanme, toudi fin bélote. Achteure, ale ouve et prinds ch'train ed tans in tans, conme mi.

Seuremint qu'os s'rvoérons. Mais pu ed clitché.

Boinne jornée.

Em bèle-fille est unne influincheuse

Unne influincheuse, o un influincheus, ch'est deus exist'te, ch'est surtoute edpi quèks innées des gins qui s'filme'te in baillant des conseils sur toute et sur rin à des gins conme vos et mi, chu internénet. Ch'est mie croéyabe, mais vrai, et i in o qui arrive'te à vive ed cho pèr ches réclames qui font.

Em bèle-fille, ej sais mie chi ale est influincheuse chu internénet, mais ale l'est din ches ôpitaux. Et ale est unne boinne influincheuse.

Conme à chake keup, ej vos esplique :

Em bèle-fille ouve pour no'santé à tertous.

Quanq ale apprindoait à dvenir séruzyin, ale alloait din eds ôpitaus del région dò qu'ale restoait, et janmoais, à pèrte quanq i o ieu ech sapré mau vnu ed Chine i o puss ed troés ins*, janmoais os intindoème ches jornaleus causer ed problinme din ches ôpitaus del région-lò.

Un jour, ém bèle-fille cange ed région, et edpi, ed tans in tans, ches jornaleus di'te u'i o achteure sdes problinmes din l'région dò qu'ale étoait.

Mais janmaois, à pèrte chi ej foais unne berlure achteure, j'o intindu causer ed problinme din ches ôpitaux o amon ches séruzyins de s'nouvèle région.

Et ch'est pour cho qu'ej pux dire qu'ém bèle-fille est unne boinne influincheuse pour ches ôpitaus et ches séruzyins. 

Ej définis in i disant boin corage pour aprè, in i foaisant un tiot bec ainsi qu'à chin onme, min fiu.

Boinne jornée à tertous.

* A cht'époke-lò, tous ches ôpitaus ed toutes ches régions ed Frinche avoai'te ed cros problinmes, malureusemint.

Pour acater quèks chukes

... à nos tiots-éfants, j'o répéré ém tondeuse.

Ej vos conte.

L'eute jour j'étoais in route à tonde min gardin quanq, d'un keup, d'un seu, m'tondeuse arte ed fonctionner. In rade ! Qu'ale étoait, et ch'étoait poin un problinme d'essinche din ch'réservoèr.

Ej buse deus sgondes, et m'dis qu'ej pux écononmiser quèks sous chi jé l'répére pèr mi-minme.

Démonter, minme et surtoute chin martieu, ch'est poin un problinme.

Ermonter toute, ch'est djò moinss aisié.

Mais érmonter toute et eq cho fonctionne, ch'est coèr eute cose.

Durant troés o quat eures in troés jours, j'o traché pi assayé del érdémarrer, mais rin.

Verdi au vèpe, j'o rbéïé chu internénet. I o granmint ed coses pour qu'unne tondeuse fuche in rade, et ch'est mie toudi aisié à répérer, qu'is écri'te mie chu internénet, mais qu'ej pense. Tant piss ! Ej vos assayer.

Sinmdi au matin, j'o lu ches eximpes ed problinmes possibes, et alintour d'onze eures, mirake, m'tondeuse o démarré.

J'étoais fin surprins et granmint ureus ; ej vos pouvoèr, avuc ches tiotes écononmies foaites, acater des chukes à mes tiots-éfants.

Ej vux qu'os sachèche qu'ej sus mie un avaricieus, mais min argint, et chti d'ém fanme, bin seur, os préfèrons qu'i serche pour des gins o des coses qu'os ainmons, m'fanme et mi.

Boin diminche à tertous, din vot gardin, p't'ête.

Allez à Sin-Kintin

Chi os restez in Picardie o chi os i passez,

Cho os ainmez ch'bastchète, et minme chi os ainmez mie,

Feut aller, cht'innée, vir juer chl'étchipe ed bastchète ed Sin-Kintin.

Pour ch'premier keup dech vie, chl'étchipe ed Sin-Kintin jue in première division ed Frinche. Et i éro ed fin bèlés rincontes à vir.

I o djò ieu unne rinconte avuc l'grinde étchipe ed Villeurbénne, et Sin-Kintin o gaingné aisiémint.

Don, rbéïez chu internénet à "bastchète pro a" et coésichez un jour dò eq l'étchipe ed Sin-Kintin i jue à Sin-Kintin.

Ech sinmdi sèt octobe (don dman), pèr eximpe, Sin-Kintin rchut chl'étchipe ed Chalon-chu-l'Saône, unne fin bèle tiote étchipe qui pourroait gaingner à Sin-Kintin. Don, echl'étchipe ed Sin-Kintin o dzoin ed vos

Amusez-vos bin !  Et cho cange dech fotbal.

Cros bec.

Coésir un tiot nom

In Frinche, quanq un papar nait, il o un nom, chti d'és famille, et ches pérints i baille'te un tiot nom. Pèr eximpe, Titisse o Guète o coèr Zabète.

Prindons deus cousines qu'ej vos lonmer Pépète et Zézète, minme chi ch'est mie leu vrai tiot nom. J'os del canche, ch'est poin ches minmes tiots noms eq j'os prins din min eximpe.

Ches deus cousines sont achteure des fanmes. 

Un jour, Pépète o un fiu qu'ale lonme Jean, mettons.

Quèks innées aprè, l'eute cousine o étou un fiu qu'ale lonme étou Jean.

Cho surprind, mais quanq ches fanmes appéle'te leu fiu et qu'is sont din leu moaison, is ont mie ed problinme :

- "Viens-lò, min fiu !"

Et mettons eq leu fiu i vient.

Mais quanq ches deus cousines sont amon leu taïonne avuc leu fiu, maginez ch'problinme pour l'taïonne ed ches cousines qu'est l'rataïonne ed ches tiots !

Deus eximpes. Quanq él rataïonne dit à un tiot :

- "Jean, jou eq tu pux vnir m'foaire un tiot bec ?"

- "Jean, jou eq tu vus vnir avuc mi acater du pain ?"

Echtchel vo vnir i foaire un bec o acater ch'pain ?

Il est possibe eq ches pérints ont baillé deus eutes tiots noms à leu éfant, mais i feut les connoaite, et ch'est poin évident.

Tertous ches acadiens et tertoutes ches acadiènes dech Canada ont truvoé unne solution ; is di'te, chi os prindons min eximpe :

- "Ech Jean ed Pépète, jou eq tu pux vnir m'foaire un tiot bec ?"

- "Ech Jean ed Zézète, jou eq tu vus vnir avuc mi acater du pain ?"

I in o minme qui di'te :

- "Ech Jean ed Pépète ed Tine (mettons eq ch'est l'taïonne dech tiot et eq ches acadiens et acadiènes is l'connoaisse'te puss qu'ech taïon), jou eq tu pux vnir m'foaire un tiot bec ?"

- "Ech Jean ed Zézète ed Bastien (mettons eq ch'est l'taïon dech tiot et eq ches acadiens et acadiènes is l'connoaisse'te puss qu'ech taïonne), jou eq tu vus vnir avuc mi acater du pain ?"

Z'ont granmint ed gingin tertous ches acadiens et tertoutes ches acadiènes. Et is sai'te canter.

Boinne jornée. 

Quanq un tiot ainme minger

D'unne mère à chin fiu ed vint-troés moés :

- "Min fiu, jou eq tu vux un tiot morcieu ed punme ?"

- "Nan ! Un cros."

Ah ! Quanq ches galibiés kminche'te à causer !

Ete bin soégné

J'ainme bin prinde eds eximpes pour dviser ed quèk cose. 

Innui, prindons deus frinchoés qu'ont chatchun mau à unne épeuille, mettons à main droéte*.

Ech premier frinchoés, mettons qu'i s'lonme Zèf**, pèr eximpe, téléphone à chin séruzyin qui i dit :

- "Vnez din un moés".

- "Ch'est din granmint ed tans et j'o mau !"

- "Ouais ! Mais os pouvons mie avant".

Et ch'est toute.

Ech deusienme frinchoés, disons eq li, i s'lomne Tiène**, pèr eximpe, téléphone à chin séruzyin qui i dit :

- "Vnez din un moés".

- "Ch'est din granmint ed tans et j'o mau ! Os pouvez vraimint mie avant ?"

- "Os pouvons judi del smangne qui vient, mais cho coûtero chint-chincante uros ed puss qui sront mie rimborsés."

Os voéyons bin ichi qu'in Frinche, tertout est soégné. Ch'est bieu ! Et ches séruzyins, os pouvons mie dire qu'is sont malureus. Donmage pour ches eutes qui sont mie séruzyin !

* Ch'est des tiots noms pour ches eximpes, poin pour du vrai. O bin ej l'o mis foait sprés.

** Qu'ho fuche à main droéte o main gauche, cho cange rin. Cho éroait pu ête un pié o unne gambe, coèr un keup, cho cangeoait rin.

Porette din ch'vint

Ch'est ch'tite d'un live qu'ej sus in route à lire. 

Chin auteu est cubain et a étou écrit un live eq j'o djò lu, fin bin, et qui s'lonme "Cht'onme qu'ainmoait ches tchyins".

Din "Porette din ch'vint", echl'écriveu cause granmint ed chin poéyis, Cuba ; ed ches innées mile-nu-chin-soéçante à achteure. 

Os connoaissez ch'poaiyis ? Granmint ed gins qui restoai'te à Cuba ont voulu tchitter ch'poéyis, minme chi is dvoai'te étou tchitter leus familles et amis.

Quanq à ch'tite, cho vient d'unne canchon ed ches innées mile-nu-chint-soéçante-dis-sèt écrite pèr Kansas, un groupe ed musike, mie chl'Etat ed ches Anmérikes.

Infin, chl'écriveu, aprè avir défini chin live, esplique kmint qu'i foait pour écrire ches lives :

- "Ej mé norris del réalité, mais ej sus mie responsabe d'ale".* 

Ej définiro in vos disant qu'unne seule cose : lisez ch'live-lò !

Boinne lecture et boinne jornée. 

*I précise :

- "à pèrte quanq qu'ej l'o foait, bin seur".

Lile o rchu Reims

Ej cause ed fotbal. 

 

Ch'étoait mardi au vèpe ; echl'étchipe ed fotbal ed Lile rchuvoait chtol-lò del ville ed Reims, ville casi voésine, mais moinss eq ches villes ed Valenciènes, Lens o Anmyin dò qu'i o étou ed boinnés étchipes ed fotbal.

Don, mardi, echl'étchipe ed Lile o rchu chl'étchipe ed Reims. Et ale l'o bin rchu, vu qu'ale rchut étou unne punition del pèrte ed l'étchipe qui vnoait l'rincontrer pour juer.

Donmage !

Mais ch'est conme ho, et cho cangero un jour.

Boinne jornée à tertous

Ete écologisse achteure

Ches pèrtis écologisses ont étè créés, i m'sanne, quanq ches centrales nucléaires is ont étè mis in Frinche din ches innées milu-nu-chint-soéçante.

Mettons qu'is ont mie étè créés achl'époke-lò, mais ches pèrtis écolgisses z'ont granmint grandi avuc ch'développemint ed ches centrales.

Ches gins disoai'te eq cho sroait dingéreux ; pour eux, ches produits utilisés poseront coèr un problinme din mile o dis-mile ins. O puss.

Eh bin ! Soéçante ins aprè, ches centrales nucléaires ont dvenu écologikes, pour ches onmes et fanmes politikes ; ch'est chl'avenir ! Et ch'est écologike.

Ch'est toudi ches minmes produits ndan, is sront toudi mawais din mile o dis-mile ins, mais i o pu ed problinme.

Qu'i sanne !

O j'o rin comprins.

J'o oblié

Innui, ej vouloais vos dire quèk cose, et j'o oblié ed quoé qu'ej vouloais vos causer.

Brin !

J'espère qu'ej m'in ramintuvroais un jour et eq cho m'arrivero pu.

Mais chi cho rkminche ?!

Brin !

Crosse pensée pour min bieu-père mais étou és'fanme, leus éfants et tiots-éfants.

  

Os diroème eds uropéïens

Jou qu'os ainmez ech rugby et qu'os rbéïez l'keupe du moude achteure ?

Mi, je rbée un molet.

Et j'constate eq ches étchipes ed japonnoés, namibiens o inglés, pèr eximpe, os diroème qu'i n'o qui sont eds uropéïens.

 

Et ouais ! Minme ches inglés sanne'te avir des jueus uropéïens. Mie Croéyabe !

 

Chti qui respire pu i meurt

Soin à vos ! Echl'article put foaire du mau à çartains.

In mathématikes modernes , i suffit qu'i o un seu eximpe qui moutre qu'unne phrase est mie vraie pour dire qu'él phrase est mie vraie. Din l'vie, os disons in vrai eq ch'est un mawais eximpe.

Eximpe : 

Mettons qu'os disons :

- "tertout minge du bure chin sé". 

Mi, ej réponds 

- "Nan ! I o au moinss une gin, ém fanme, qui minge du bure avuc du sé".

Conclusion : l'phrase "tertout minge du bure chin sé" est mie vraie.

Achteure, prindons l'phrase qui m'intéresse innui : "chti qui respire pu i meurt".

I o des gins conmme mi et d'eutes qui di'te:

- "Nan ! Ech Christ est mort chu unne croéx pi l'o ressuschité quèks jours aprè ; don il est in vie".

Et don, él phrase est fausse.

Pour chl'eximpe-lò, chi os causons poin ed ches mathématikes modernes, os connoaissons qu'un eximpe chu des mile ed millars ed gins qu'ont vétchu edpi puss ed sis-mile ins. Ch'est mie granmint !

Disons don eq ches gins qui respire'te pu, is meurt'te. Chi os causons mie ed gins eq ches pompiés is seuve'te après quèks sgondes o minutes, pompiés à qui i feut rinde honmage.

Don, ej résume, chti qui respire pu i meurt.

Ch'est ho qu'o arrivé à l'bèle-mère ed min bieu-frère, bèle-mère qu'il avoait hérité in mérriant unne fille qu'avoait pour mère él fanme-lò.

Et l'bèle-mère-lò, lonmons-lò Guète, 'ho sro puss aisié pour aprè, alloait àl messe din chin tiot village à chake keup qu'i avoait l'messe din chin village et quanq ale respiroait coèr.

Ech mot "respirer" est conséquent.

Feut savoèr eq chu tère, ches gins is vi'te vu qu'is respire'te ed l'air d'àl'cour granmint ed keups chake jour. Mais i n'o étou qui vi'te in respirant ed l'air qu'i o din des boutèles d'ocygène pèr des tuyeus reliés à leu nez.

Guète, l'avoait connu ches deus systèmes ; ch'premier durant alintour ed quater-vint-troés innées pi l'eute durant alintour ed quat innées, avant ed moérir.

Et ouais ! Guète est morte cht'étè. Mie à coeuse d'un problinme ed tuyeu épeuté pèr accidint o à coeuse d'unne boutèle vide, nan, mais réüse, granmint ercrande.

J'o alé à chin interremint. Fin bieu ! Granmint ed gins présents qu'avoai'te connu l'fanme, à ch'catéchisse, à l'musike, à l'fête dech village,... .

Ech tchuré qu'étoait jonne (chincante ins d'âge !) et qu'étoait din l'péroèsse edpi quèks innées connoaissait mie granmint l'bèle-mère ed min bieu-frère mais un molet quanq minme. Il o dit durant l'messe :

- "Guète, minme avuc ches boutèles et chin bazèr, ale vnoait àl'messe à chake keup qu'i avoait messe din chin village. Adon eq d'eutes, in boinne santé, is rbé'te à leu moaison !"

Ej définirai min article in vos disant qu'él mère d'ém bèle-soeur (chi os avez bin lu, l'bèle-mère ed min bieu-frère est l'mère d'ém bèle-soeur) respiroait l'Anmour, l'joée ed vive, l'foé, et il étoait fin régalant del rincontrer. J'o ieu l'canche-lò quèks keups. 

Innui, Guète respire pu, mais ale continue ed vive din et pèr ches éfants et tiots éfants qu'ale o ieu. Et ale vivro coèr granmint ed tans. Euh ! Cho vos ranmintuve rin ?!

Adé Guète ! Vo rjoinde tin onme, et chi tu pux, dis bojour à min père et min bieu-père.

Ches mawaises gins

Din ch'moude, i in o granmint, des mawaises gins.

Innui, mi ej vos vos causer ed gins avuc qui, pèr eximpe, tu ouves.

Pour ête gintil avuc eux, tu vux bin réponde à leus tchestions pour els aidier, vu eq t'os apprins chl'ouvrage avant eux. don, tu réponds à leus tchestions.

Et lò dò eq j'o un problinme edpi quèls tans, ch'est avuc çartains qui vont aprè poser ches minmes tchestions à unne eute gin. Et qui prinde'te l'réponse qui les arringe. Ch'est surtoute l'réponse qui leu baille l'moinss d'ouvrage.

Adon !?

J'ainme vraimint mie cho.

Mais j'o del canche : achteure, ej leu dis d'aler vir directemint l'eute gin, don j'o moinss d'ouvrage, et ej pux foaire un molet ed philosophie : din moinss ed deus ins, ej sro pu lò.

Boinne jornée à tertous, et vive l'értraite !

Pour un bec chu l'bouke

... is vu'te pu juer ach fotbal pour l'étchipe ed leu poéyis. 

Is, ch'est ches jueuses ed l'étchipe ed fotbal d'Espane.

Ech vint dech moés d'eu deux-mile-vint-troés, is ont gaingné ech championnat du moude ed fotbal ed ches fanmes, dvant ches inglèses.

J'ainme bin ch'résultat.

Et ch'présidint ed ches étchipes ed fotbal d'Espane, li, l'o bin anmé foaire un bec, ech jour dò ches jonnes fanmes ont gaingné, chu l'bouke del cqpitaine edl'étchipe, dvant tertout, adon quél fanme avoait rin dmindé.

 

Ches jornaleus ont granmint causé ed cho, pi ch'présidint o étè esclus del présidinche.

Mais i o eq li qu'o étè viré ; ches conmarades is ont resté à leu place.

Adon, ches fanmes, achteure dò eq j'écris, is vu'te pu juer pour leu étchipe d'Espane en attindant eq cho cange.

Et is ont granmint raison.

Corage, ches filles !

Os ainmeroème eq tu pèrches

Ch'est ch'deusienme keup d'ém vie eq cho m'arrive : qu'os m'disoème "os ainmeroème eq tu pèrches !".

Jou qu'os avez djò connu cho ? Os ouvrez edpi quèks innées din unne interprinze et une jour, unne gin vient vos vir et vos dit :

- "Os ainmeroème eq tu pèrches."

Pèrtir ! Mais dò ?

Ech premier keup, l'réponse étoait "eute pèrte !".

Achteure, ch'est "àl értraite !".

Cho foait du mau eq d'intinde cho. Mais quanq ch'est à quèks moés ed pèrtir in rtraite, cho vo miu ; is peu'te achteure ouvrer conme is vu'te, ej sro mie lò pour vir ches résultats. 

Unne cose est seur : avant qu'éj m'in voèche (vint-deus moés et vint jours), i feudro mie vnir mé dminder un conseil.

Nu moés aprè

Jou qu'os l'savoète ? Ej sus né uit moés et vint-sèt jours aprè ch'mériage ed mes pérints.

Pour foaire un papar, i feut nu moés, qu'i péroait.

Achteure, i o mie ed problinme quanq un papar nait adon eq ches pérints ont mie mèriés, mais i o soéçante innées ed cho, ch'in étoait un. Et chi ches pérints avoai'te mèrié, i falloait (ch'étoait granmint miu vu) qu'ech tiot o ch'tiote naiche puss ed nu moés aprè.

Pour mi, ch'problinme vnoait d'unne taïonne ; 

- "Moinss ed nu moés après ch'mériage !"

Chin onme, min taïon, l'rasseuroait in i disant :

- "Rbée ! Il o eds ongues."

Mes pérints savoai'te l'vérité.

Ed nos jours, i o coèr des jonnes - j'in connoais - qu'attinde'te d'ête mèriés pour foaire un papar.

Aprè, is ont un galibié qui nait dis, onze, douze, ... , dis-sèt moés o puss aprè leu mériage. Des keups, i feut malureusemint quèks innées.

Et des keups, alintour ed nu moés après, à quèks jours près.

Bec à ches jonnes mériés.

Min tiot nom

Diminche, adon eq j'étoais din unne station avuc un ed mes fius à attinde chin train, vlò troés cadoreus qu'arrive'te pour contrôler not idintité.

Ej moutre ém carte d'idintité à un ed ches cadoreus et i mé dminde ches origines ed min tiot nom ; i connaissoait mie.

Mi, j'o comprins qu'i vut savoèr chi min tiot nom est d'un poaiyis horzain conme p't'ête el Bergike, l'Italie, l'Espane, o coèr ch'Népal mais j'i réponds :

- "Cho vient ed mes pérints ; ch'est eux qu'ont coési quanq j'o né."

Suivant !

J'o ri, mais aprè.

I connoait mie Anmyin

I o quèks jours, ém fanme et mi avons pérti in vagances alintour ed Beaune, ch'poaiyis ed ches boins vins.

Un jour, os avons mingé à nonne à un indroét dò qu'os pouvoème vir fin loin ; d'un côté, ch'Mont Blank, ed l'eute, un can, coèr d'un eute, des vignes et Dijon, et infin, coèr d'un eute, des tiots villages.

Unne gin, seuremint poaiyée pour foaire cho, avoait mis àcht'indroét-lò unne tabe d'orientation, avuc ches noms ed ches villes qu'os pouvoème vir, et ceusses ed ches villes qu'os voéyoème mie, vu qu'is étoai'te à puss ed chint kilomètes. Des keups, ch'étoait minme à puss ed mile kilomètes.

J'o bin rbéyé l'tabe. I avoait unne fin crosse berlure : à l'ouest dech point ed vue, i avoait Agen à un molet puss ed quat-chint kilomètes, Bordieux à un molet moinss ed chonc-chint kilomètes, et inter ches deus, toudi à l'ouest ed dò qu'os étoème, m'fanme et mi, Anmyin, à troés-chint-soéçante-chonc kilomètes.

Os maginez ! Anmyin in direction d'Agen et Bordieux !

Unne gin qui s'promnoait durant eq l'eute peinturoait l'tabe et ches noms ed villes, et qui connaoissoait, i sanne, l'Picardie, avoait esplitché l'berlure. Ech peinte avoait adon étou mis ch'nom ed not capitale picarde à troés-chint-soéçante-chonc kilomètes ach nord ed dò qu'os étoème, inter Péris et Aro, Troées et Lile.

Pour vos qui lisez chl'article et qui comprindez rin, vlò unne pèrtie d'unne carte ed Frinche avuc ches quèks villes lonmées inditchées dsu.

Boinne lecture, et boinne rintrée à tertous ches galibiés qui rtorne'te à l'école innui. Et à leu moaite d'école.

Chi os avez vos âges innui, fin cros bec à vos.

Cafougnète et chin conmarade sont malprins

Cafougnète et chin conmarade sont din unne mine dsou tère et n'arrive'te pu à in sortir.

Cafougnète dit à chin conmarade :

- "tu connoais unne prière, ti ?"

- "Nan !" qu'i répond l'eute "j'in connoais poin !"

Cafougnète insiste un molet :

- "Mais tu vos à l'église, don, tu doés in connoaite !"

- "Nan !"

- "Tu voés mie qu'os allons moérir ichi ! Feudro foaire quèk cose d'érligieus conme din ches églises !"

 

- "J'o unne idée ! Os allons foaire unne tchète !"

Boin diminche à tertous.

 

Un boin début ed saison

Echl'étchipe ed fotbal ed Lyon o bin kminché és nouvèle saison ed fotbal ; achteure, ale o seulemint deus points ed moinss eq l'étchipe ed Péris qu'avoait gaingné ech championnat i o quèks moés.

Echl'étchipe d'Anmyin étou o bin kminché, mais un nivieu in-dsou, in deusienme division frinchoése.

Vive ch'fotbal !

S'intraîner à évingéliser

Ech mardi tchinze-eu, ej vos causoais ed deus nveus et d'unne nièce qui, durant l'étè, évingélise'te chu ches bords del mèr o à Béyonne.

Is assaye'te d'évingéliser. Mie toudi aisié !

Adon innui, ej vourroais, pour els aidier, o aidier d'eutes nveux, nièces o eutes gins qui ainmeroai'te évingéliser, leu proposer d'aler vir min premier frère pour s'intraîner.

Min premier frère, l'o intindu causer dech Christ, Diu, Moïse, ches apôtes, ches évingiles quanq il étoait jonne (vu qu'il o mie soéçante ins d'âge, os pourroème dire qu'il est coèr jonne ; durant unne smangne !).

Mais edpi quèks innées, i vut mie intinde causer ed tout cho et i vut mie rtorner din uune église. Don, chi i o des gins qui vu'te s'intraîner à évingéliser, is peu'te kmincher pèr aler causer avuc min frère ; cho fro un boin début.

Boin corage à tertous, et cros bec à min frère. 

Mouke tin nez

I o puss ed quarante ins, mes frères et mi avons allé à bicyclète vir un onke qui restoait avuc s'fanme et leus éfants (mes cousins) à Anmyin*. Alintour ed vint-chonc kilomètes edpi Parnou, et l'minme cose pour rintrer à no'moaison.

Ech jor-lò, min onke étoait seu às'moaison et nos avoait invité à minger à nonne.

Durant qu'os étoème in route à minger, d'un keup, i nos o dmindé un tire-jus ; edpi chin nez, muché un tiot molet drière ches mains, i avoait quèk cose ed vert qui couloait.

Qui sannoait couler ! In vrai, min onke avoait prins discrètement din s'gate un morcieu ed poérion vert qu'il avoait tchuisiné, et i nos foaisoait unne crosse cacouille. Os avons bin ri. Conme à chake keup qu'os voèyoème not onke.

Mi, ej l'o rvu in déchimbe. Minme ch'il avoait granmint viusi, minme chi os alloème àl messe, 'm'o coèr conté unne cacouille avant ed rintrer din chl'église.

Innui, min onke i nos tchitte. Pour toudi. Ej vux, pèr chl'article, dire eq jonmaois ej l'oblierai, et qu'ej pense granmint àm'tante et mes cousins, et à ches bieus-frères et bèlés-soeurs.

Adé, min onke, et grin merchi pour toutes tes cacouilles ! Fuche ureus lò dò eq tu vos !

* Min onke, s'fanme et mes cosuins ont vétchu étou à Monsure, mie loin dech catieu, mais os i avons mie allé à bicyclète.

Ale o allé à meurons

Os sonmes ach moés d'eu, et i kminche à i avir des meurons bin noèrtes à tcheuillir chu ches bords ed ches voés, pour foaire des confitures et p't'ête un watieu. 

L'eute lindi, j'i o allé, avuc min frère et s'fanme, ém bèle-soeur.

Quat lites ed tcheuillis in unne eure.

Et j'pux vos dire qu'èm bèle-soeur o bin ouvré ; pertoute dò qu'ej passoais aprè ale, i avoait rin in dsou d'un mète soéçante-tchinze, un mète quater-vint. Feut savoèr qu'ém bèle-soeur, ale mesure un mète soéçante-tchinze à un mète quater-vint quanq ale o ches bros in heut.

Grin merchi à ches deus d'ête vnus quèks jours ; os avons bin ri, bin mingé, bin jué à cartes. Et bin tcheuilli ches meurons.

Boinne jornée.

Is évingélise'te

... durant chl'étè in deus-mile-vint-troés conme ches apôtes dech Christ i o mile-nu-chint-quater-vint-dis ins.

Kminchons pèr esplitcher ches dates.

Quanq ech tiot-Jésus o né, ches gins ont rmis ches calendriers à chl'année zéro. Pi, Jésus o vétchu, pi il est mort (mettons qu'il fuche mort !) quanq il avoait trinte-troés ins d'âges. Don, i o mile-nu-chint-quater-vint-dis ins. Et ch'est lò eq ches apôtes à Jésus ont kminché o bin continué d'évingéliser.

Et in deus-mile-vint-troés, achteure, durant chl'étè, j'o apprins qu'i avoait des jonnes qui, eux-minmes, évingélise'te. Coèr, conme ches apôtes, o étou, conmme d'eutes jonnes o d'eutes chrétiens.

Pèr eximpe, chu ches bord del mèr, ach Crotoé, Sin-Wary, o eute pèrte ; din l'jornée, is vont vir ches gins qui sont in route à asir, is cause'te un molet avuc eux et is leu propose'te d'évnir au vèpe causer puss, canter, prier.

Des keups is ont alintour ed vint o trinte gins qui vien'te au vèpe. Ej sais mie ches tans qu'i o au vèpe (del pleuve !) quanq is ont du moude qui vient.

Mi, j'o un nveu et s'fanme, ém nièce, qui font cho. Is ont deus fin jonnes éfants, un qu'o un molet puss ed deus ins d'âge, et l'eute, troés smangnes. Ech grin s'otchupe d'és soeur quanq ches pérints ont pèrti évingéliser. 

Eute eximpe ed jonne qui évingélise, un eute nveu. Qu'o p't'ête puss ed corage ed ches deus eutes, vu eq li, il o pèrti à Béyonne durant ches fêtes dech moés ed juillet, à uit-chint kilomètes d'és moaison.

Os maginez ! 

Ches fêtes ed Béyonne, i o puss d'un millon ed gins qu'i vont. Et min nveu, li, il évingélise.

Vu qu'il o granmint ed gingin, i put adapter ches causeries, ches conmindemints ed Diu. 

Eximpe :

- "Tu tueros poin" put dvenir "tu picheros mie chu chl'uis d'unne gin".

Min nveu éro pu ajouter "... et tu tueros poin".

Bieus eximpes ! Mi, je truvoe eq ches jonnes sont fin corageus, et ej sus fièr d'eux.

Boin tchinze-eu à tertous.

Chi os lisez cho et qu'os vos lonmez Marie, bonnie fête à vos.

Ch'étoait miu

D'aprè un canteu qu'ej connaissoais mie avant ed lire chin tiot nom din unne gasète :

-"Quanq ches gins di'te eq "ch'étoait miu avant", ch'est pasqu'is étoai'te puss jonnes."

Et il ajoute qu'achteure, i o ed fin belles coses.

Busons !

Boinne jornée à tertous.

Ches punmes-ed-tère augmint'te

I péroait eq ches punmes-ed-tère is augmint'te ! 

Conme toute, qu'os pouvez réponde. Et os avez p't'ête bin raison.

L'eute jour, àl'télé, un cinsier esplitchoait :

- "...  . Os vindons nos punmes-ed-tère alintour ed troés-chint-chincante uros el tonne ; cho foait du troés uros chincante ech tchilo ..."

Et ches jornaleus laisse'te causer cht'onme, chin foaire dé rmèrke.

Mi, j'in éroais bin foait unne, mais ch'cinsier m'éroait mie intindu.

P't'ête eq pèrmi vos, i n'o qu'éront cartchulé eq ches punmes-ed-tère, is sont à trinte-chonc chintinmes pèr tchilo.

Boinne jornée, et vivemint eq ches écoles rkiminche'te.

Ouvrons moinss et vivons miu

Din un boin live écrit pèr eds économisses, eq chi is vu'te un jour ête présidints, mi ej vote pour eux, il est écrit eq chi os ouvrons troés eures pèr jours o tchinze eures pèr smange, tertout éro edl'ouvrage.

J'ainme. Granmint.

Mi, ej su minme prêt à laicier mes troés eures, o ches tchinze, slon, à d'eutes.

Avule mais poin nikdouille

A un jornaleu qui dmandoait à un canteu avule edpi qu'il avoait ieu sèt ins d'âge chi ch'étoait un problinme pour li, cht'onme i o répondu :
 

- "Ej sus avule, mais os truvons toudi puss malureus eq nos. Pèr eximpe, j'éroais pu ête noèrt"

Et il étoait noèrt.

Busons !

Ech cot artificiel

Ches cots artificiels, os in truvoez ed puss in puss chu internénet. Ch'o un lien avuc ech gingin artificiel qu'ej vos in o causé i o quèks jours.

Ches cots artificiels, os les voéyez d'un keup chu internénet quanq is pense'te qu'os avez dzoin d'un keup ed main pour rimplir unne déclération.

I o quèks smangnes, j'in o un qu'o apéru quanq j'étoais chu internénet.

Ej vos conte.

-" Bojour, ej su lò pour vos aidier. Jou qu'os avez unne tchestion ?"

-" Bojour ch'bétail, ouais, j'o unne tchestion : kmint qu'ej foais pour valider ém déclération ?"

-" J'o mie comprins vot tchestion ; jou qu'os pouvez rkmincher ?"

-" Ouais ! Ej trache un bouton pour définir em déclération."

-" J'o mie comprins vot tchestion ; os pouvez contacter unne gin pèr messagerie."

Adon, j'o invoéyé un message à unne gin, in i posant mes tchestions et in i disant eq chin cot avoait mie ed gingin.

El gin o bin répondu à mes tchestions, mais ej sais mie quoé qu'il o foait dech cot.

Boinne jornée.

Ech poéyisan et ches troés fanmes

Din un tiot village ed Picardie, i avoait un poéyisan qu'avoait troés fanmes.

 

Un jour, unne gin i dminde pourquoé.

Echt'onme répond :

- "Unne fanme, ch'est mie assez. Deus, is s'chipouilloai'te toudi. Adon, j'in o prins unne troésienme pour els impêtcher de s'chipouiller".

Ech gingin artificiel

Ches jornaleus nos in cause'te ed puss in puss, dech gingin artificiel.

Ch'est quoé, ech gingin artificiel ?

Mi, ej diroais eq ch'est quanq ches ordinatures rimplache'te ches onmes ; ch'o djò bin kminché, chu internénet, din des voétures, pèr eximpe, et des keups, os s'dmindons chi i o mie du dinger à développer ech gingin artificiel qui, un jour, nos diro p't'ête eq ch'est li qui déchide ed nos vies.

Mi, ej térintoais, mais edpi sinmdi apré nonne, ej sus pour.

Kmint eq cho s'foait ?

Sinmdi, j'o tondu min gardin, et vu ches timpératures à l'cour, j'éroais ainmé qu'un manicraque foaiche cho chi mi.

Don, chi os avez du gingin humain, merchi ed buser pour m'fabritcher un manicraque qu'éro du gingin pour tonde seu. Cho m'fro granmint plaisi.

A béto !

Ches mawais et ches méchants

Un grind poète frinchoais o dit un jour :

" Ems amis, rténez cho ! I o mie ed mawaises erbes et mie ed mawais onmes. I o qu'ed méchants cinsiers."

Os ainmez ?

Mi, ouais. Et granmint.

Boinne jornée à tertous.

Un tiot onme vert est mort

Jou qu'os croéyez à ches tiots onmes verts ?

Eh bin, is exist'te !

Ch'est eds onmes qui juoai'te ach fotbal din ches innées mile-nu-chint-soéçante, mile-nu chint-quater-vint et qu'avoai'te un maillot vert.

 

Echl'étchipe étoait à Sin Etienne, din ch'dépèrtémint del Loère.

Pèrmi ches jueus, i in avoait des grinds, et i in avoait des tiots.

Ièr, ch'est un tiot, George Bereta, qu'est mort.

Ej sus un molet trisse ; ch'étoait un fin boin jueu ed fotbal.

Adé, ch'tiot !

Dò qu'is vive'te ches picards

Ej m'o posé l'tchestion in voéyant ech nombe ed gins qui lise'te ems articles.

Eh bin ! Des picards, i in o pèrtoute din ch'monne .

Rbéyez !

In Frinche, os s'in doutons.

Nos voésins et cousins picards ches berges, sont p't'ête din "eute".

Mais à Singapour, ch'est pour mi unne vraie crosse surprinze.

Continuez à lire ches articles,

Boinne jornée.

Deus-chint-miles

Din quèks smangnes, in sectimbe, cho fro dis ins qu'ej vos écris.

Innui, ej sus ureus ed vos dire eq din quèks jours, j'éro ieu puss ed deus-chint-mile gins qu'éront un jour lu ems articles. 

Durant ech moés ed juin, os avez étè puss ed chonc-miles (casi sis-miles).

Ej sus granmint ureus, et fiér.

Grin merchi à tertous, continuons. 

 

Pourquoé courir

Lò in dsou, os truvoerez une boinne espression d'un sage :

 

- "Chi él canche est avuc ti, pourquoé courir ?

Et chi él canche est mie avuc ti, pourquoé courir ?"

 

Pourquoé courir ? N'in vlò unne boinne tchestion !

Ech premier onme avuc qui j'o ouvré étoait un "viu" pér rapport à mi et disoait à ches gins :

- "Os avons tertous ch'minme tans, mais os l'utilisons mie del minme manière." 

Busons chu quoé qu'os foaisons ed no'vie.

Boinne jornée.