Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

mercredi 31 janvier 2018

Ervenez juer amon nos

Echl'étchipe ed fotbal ed Lile, qu'o du mau à gaingner cht'innée, vut foaire ervenir ches jueus qu'ale o prêté à d'eutes étchipes ed fotbal.

Mais ches jueus, o ches étchipes dò qu'is sont, n'vu'te mie.

Is di'te eq ch'est vu qu'ech prêt est pour unne innée.

Mais j'vos l'o écrit in heut, edpi septimbe, echl'étchipe ed Lile o du mau à gaingner.

Cho put étou esplitcher pourquoé qu'is vu'te mie erjuer achteure à Lile, ches jueus prétés.

Boinne canche achl'étchipe ed Lile.

Et achl'étchipe d'Anmyin. Etou et surtoute.

mardi 30 janvier 2018

Pour bin voéyager

 ... prinde unne carte.

Min conmarade Zèf in causoait ièr chu chin blog, blog eq j'in foais del réclame à main droéte d'ems'articles.

Feut étou qu'ej vos conte..

In Anmérike, troés gins qu'étoai'te insanne in voéture foaisoai'te quoé eq leu disoait echl'assistint ed navidjation qu'is avoai'te avuc eux in voéture.

Et is sont arrivés dò qu'is avoai'te seuremint mie prévu, din un lac.

Lo, ej rigole ! Mais ch'est vrai.

Qu'is suiche'te ech navigateu, ej vux bin ! Mais qu'is rbéche'te mie ches voées et n'voéche'te mie qu'is arrive'te din ch'lac. ej su granmint surprins.

Mais avuc ches anméritchins, tout est possibe.

A moinss, pour les définde un molet et vu l'saison, qu'is fuche'te chu ches nèges et p't'ête minme chu ches glaces. Mais ch'est mie seur.

Mi, j'ainme bin avir ches cartes pour savoèr dò aller.

Boinne jornée.

lundi 29 janvier 2018

Un cacheu sachant cacher

... chin chin tchyin est un boin cacheu.

Cho, ch'est unne première lçon.

Et surtoute, qu'ej dis, ech cacheu o moinss ed canche ed moérir.

Lisez :

In Russie - cho vo coèr m'foaire granmint d'erbéîeus - un cacheu, qu'étoait mie seu, o mouru, tué d'un keup ed fusike tiré per chin tchyin.

Mie croéyabe ! Mais vrai.

In vrai, chin tchyin i o seuti dsu vu qu'il étaoit ureus ed pèrtir à l'cache avuc cht'onme ; cht'onme étoait in route à préparer chin fusike, et chin l'vouloèr, chin tchyin o apoéïé chu fusike et ch'keup est perti.

Qu'o tué chin moaite.

Qué mort !

Fuchez prudint avuc ches tchyins, surtoute russes !

Cho ch'est l'deusienme lçon.

dimanche 28 janvier 2018

Pour bin canter

... à l'messe, feut s'intrainer.

Merkerdi au vèpe, j'étoais tout seu amon mi quanq ech téléphone sonne.

Adon, ej décreuche et répond.

- "Bojour !" qu'em dit un onme qu'est un voésin fin régalant, "dman au vèpe, ej vo répéter ches cants amon Dédé* pour l'messe avuc echl'évêque** din deus moés.  Tu pourroais vnir avuc mi, chin quoé ej vo ête tout seu ?"

J'os rin vu vnir.

Vraimint fin régalant qu'il est ech voésin.

Adon, j'o accepté.

- "Ej vux bin", eq j'i dis, "mais j'inméne un keup ed blanc***."

- "D'accord" qu'i m'dit adon, "mi ej prindro un seucisson."

Ech judi au vèpe, nos vlò perti.

Quanq os arrivons, Dédé est in route à téléphoner.

S'fanme, qu'est ed Molien, nos esplique qu'il o ches ages innui.

Adon, os i offrons not boutelle et ch'seucisson.

Et avant ed canter, os buvons un keup et mingeons un molet.

Os cantons unne tiote eure, pi s'fanme nos offre un eute keup à bir et un morcieu ed tèrte.

Jé rgrète mie d'ête aller canter. Et i o coèr quèks judi avant qu'echl'évêque vienche.

Mi, ej dis eq chi tertous ches chrétiens vouloai'te apprinde à bin canter à l'messe, echl'économie iro bin miu.

Boin diminche.


* Chin vrai nom, ch'est Jacky, mais jé lonme Dédé pour qu'i fuche mie rconnu.

** Echl'évêque vient din not village, avuc chint tchurés, un mardi au vèpe. I éro p't'ête puss ed tchurés qu'ed chrétiens din l'tiote église.

*** j'o toudi du muscadet din m'cave.

samedi 27 janvier 2018

I avoait mie ed quoé rire

Mi, quanq ej vos in montaingne din ches Alpes, j'ainme passer per ech viaduc ed Nintua, din chl'Ain, heut ed soéçante-dis-sèt mètes ; i o unne fin bèle vue, et mi ej dis que chti qu'o construit cho étoait mi un nikdouille.

Malureusemint, l'eute smangne, unne fanme o seuti dech viaduc.

Et ale est morte.

Conme ale le vouloait, qu'i sanne.

Conme ale le vouloait, ch'est seur.

Mais chu internénet, des gins qu'ont lu cho din l'gasète électronike, ont mis des conmintères :

- "Wouah ! Qué rcord !"

- "Ale o oblié d'aotcher chl'élastike ?

Ches gins ri'te, mais l'fanme est morte !

Etpi, is ne l'sai'te p't'ête mie, mais l'fanme avoait troès galibiés ed moinss ed dis ins.

Adon ?

Mi, ej dis qu'os pouvons rire ed granmint ed coses, mais mie ed tertoutes.

Du respect, ch'est bin. Au moinss un molet.

vendredi 26 janvier 2018

Uit et troés font douse

Lindi, au vèpe, j'o intindu, cho foaisoait granmint ed tans, un jornaleu nos in dire unne fin boinne.

Din unne rinconte de sport, un molet avant l'mitan del rinconte, ches frinchoés avoai'te dis-sèt, et ches eutes, dis.

Et ch'jornaleu ed dire :

- "Avir dis points d'avinche achteure, ch'est bin."

Dis-sèt, dis, ch'est fin malaisié ed cartchuler l'différinche inter ches deus chin un ordinature avuc ti !

jeudi 25 janvier 2018

Ontabe

Unne gin célèbe est morte i o quèks jours, et tertout cause dech gin in bin : il étoait régalant, corageus, doué... et coèr et coèr et coèr.

Mais echt'onme - l'gin est un onme - avoait troés fanmes.

Mais il o mie ieu troès fanmes conme d'eutes, étou, ont ieu granmint ed fanmes : unne fanme, pi aprè unne eute, et coèr aprè, unne troésienme.

Nan !

Troés fanmes din ches minmes tans.

Et mie unne gin dit quèk cose ?!

Eh bin ! Mi qui vient d'apprinde cho, ej dis eq ch'est ontabe.

Unne gin qui sroait mie célèbe éroait des problinmes. Des cros problinmes.

Mais l'eute étoait célébe. Adon os disons rin. Edpi chincante innées, os disons rin ?!

Ontabe.

Et lò, ej pux mie croère qu'os rindroème honmage à un onme conme cho.

mercredi 24 janvier 2018

Cho surprind

Ej vos esplique.

I o quèks moés, j'avoais inter quat-chint à sis-chint gins qui rbéïoa'te min blog chake jour.

J'o ieu cho pindint sèt moés. Cho foait granmint plaisi.

Pi, duchmint, ches nombes ont raboaicié ; chint à deus chint, pi trinte à chincante o soéçante gins per jour.

Mais ej continue d'écrire.

Casi chake jour.

Et lindi, jou eq ch'est qu'ej causoais del Russie - i o ieu ech jour-lò chonc-chint anméritchins qu'ont rbéïé - o quoé, j'o ieu miu ed chonc-chint rbéïeus.

Adon, ej cange rin, vux toudi vos foaire plaisi, causer ed quoé j'o invie et qu'i m'sanne boin à écrire.


mardi 23 janvier 2018

Ech boin jour

L'eute jour, sèt eures nu au matin, m'fanme rinville in m'disant :

- "Jou eq t'os du mau à t'tète ou jour eq t'attinds echl'onme d'éto qui doét vnir eq t'es mie déjoutché achteure ?"

- "Os sonmes diminche." eq j'i réponds.

Et os étoème diminche.

lundi 22 janvier 2018

M'voéture o injlé

Mie croéyabe, mais vrai.

In Russie, quanq i foait granmint froéd, conme achteure dò qu'i foait per indroéts ed moinss quarante à moins soéçante degrés in dsou ed zéro, ches gins peu'te, l'nuit et edpi leu moaison, chin sortir, apoéïer chu un bouton , pour eq leu voéture keuffe.

Conme cho, au matin, ale démarre chin problinme.

Ej savoais mie eq cho existoait, mais ej truvoe cho fin bin.

Mais chu russes doé'te mie oblier d'apoéïer chu bouton.

Ed nuit. Feut don qu'is rinville'te.

Chin quoé, aprè, el voéture n'démarre pu.

Pindant quèks jours.

Mi, ej pense qu'i feut miu unne voéture in rade quèks jours que trinte sporteus qu'ont du mau à Irkoutsch et qu'is peu'te mie foaire , malureusemint, leu sport.

Corage à ches russes.

Et à chti qui pourroait béto dvenir min bieu-fiu.

dimanche 21 janvier 2018

T'os vu Diu

Unne gin dit à un restaurateu célèbe :

- "Os vous voéyons ed moinss in moinss din vot auberge !"

L'eute, un molet caterneus, i répond :

- "Quanq os allez à l'église chake diminche, os i voéyez Diu à chake keup ?"

Busez, et boin diminche à tertous.

samedi 20 janvier 2018

Ches chingliers

Inter amon mi et unne tiote ville dò qu'em fanme et mi allons granmint, i o unne forêt.

D'abes, qu'ale est, l'forêt, mie ed moaisons o interprinzes.

Din ch'forêt lò, inter l'aprésieu et l'ernouvieu, quanq ches jours sont courts, ej ralintis pèr prudinche.

Et diminche au vèpe, alintour ed chonc eures chincante, ej rouloais à soéçante-dis kilomètes per eure quanq min fiu et mi avons vu un cros chinglier.

Pi ches troés tiots drière li.

Ch'étoait fin bieu à vir, et j'étoais fin ureus de n'mie rouler fin rade.

A moinss ed quater-vint kilomètes per eure !

M'voéture étou est ureuse, minme chi ale m'o rin dit.

Chi t'os ets ages innui et eq t'es m'bèle-mère cros becs à ti, et fuche prudinte in voéture.

vendredi 19 janvier 2018

Os pouvez m'inmner

... qu'i dminde, ièr, un jonne in lvant chin peus chu ch'bord ed ches voées pour qu'unne voéture s'arte et qu'i puche monter ndan.

L'étoait à Pont d'Ermy, alintour d'Adville, din l'Sonme.

- "Ouais !" qu'il i dit min frère qui s'étoait arté. "Os allez dò ?"

- "A Ieucourt." qu'i répond ech jonne.

- "Ch'est boin ! Montez don in voéture."

Moinss ed deus kilomètes pu loin, min nveu, qu'étoait avuc chin père, dit :

- "Au moinss, os i avons foait plaisi."

Echt'onme avoait déchindu del voéture, vu qu'il étoait arrivé. Il avoait moinss ed deus kilomètes à mercher.

Pour ches gins qu'i connoai'te mie, rbéïer chu unne carte.

Boinne jornée à tertous.

jeudi 18 janvier 2018

Ech boin timbe

Mette un boin timbe chu unne lette, cho n'suffit mie toudi pour qu'el lette arrive conme i feut.

A Lyon, in Frinche, unne gin o posté unne lette ech dis-nu déchimbe deus-mile-dis-sèt ; ale o arrivé ech ... nu janvié.

Vint-et-un jours ! Qu'il o fallu.

Et pour foaire troés kilomètes troés-chints.

Maginez !

Chint-chincante-sèt mètes pèr jour.

Donmage ! L'lette étaoit pour faoire plaisi à unne eute gin qu'avoait ches ages ech vint-et-un.

Vint-et-un déchimbe.

mercredi 17 janvier 2018

L'o du mau à dormir

L'eute smangne, timpe au matin, sis eures dis, min frère m'invoée un message per téléphone portabe, conme cho s'foait granmint achteure edpi eds innées :

- "Cho foait deus eures qu'ej dors pu et eq j'o invie de m'déjoutcher."

Donmage pour li, mais cho arrive. Per eximpe, à mi étou.

Troés jours aprè, nouvieu message :

- "Cho foait puss ed quat eures eq j'o invie de m'déjoutcher."

Adon, j'i réponds :

- "Coèr quèks keups conme cho, et un jour, au vèpe, avant d'aller t'joutcher, t'éros invie de déjoutcher."

- "T'os raison." qu'i m'o répondu.

A suive.

Bec à mes frères et leu mère.

mardi 16 janvier 2018

Quanq ches gins dech voéyage

... voéyage'te in train, is n'méne'te mie ch'train.

Et don, is peu'te boère un keup.

Pi un eute.

Et coèr un eute.

Dech keup, i o troés jours, is - alintour d'unne chintaine ! - ont granmint randonné, mis del musike et foait ed crossés cacouilles din un train inter Pèris et Evian-ches bains.

Quanq is ont apprins cho, ches cadoreus ont déchidé ed foaire passer ch'train pèr Lyon - ch'étoait mie prévu - pour attinde et arter ch'train, et pour arter ches niacoés.

Ches eutes gins ont ieu unne crosse freusse, mais i sanne .qu'i o mie ieu d'afolure.

Sapré monde !

lundi 15 janvier 2018

Unne mouke à vianne

Pour mi, unne mouke, ch'est unne mouke à brin, o unne mouke à mié.

Eh bin achteure, i o étou des moukes à vianne !

Unne mouke à vianne, ch'est mie une mouke eq tu pux minger vu qu'ale o del vianne !

Nan !

Ch'est unne mouke qui minge del vianne.

Et del boinne vianne, vu qu'ale minge del vianne d'ainnieu.

I péroait qu'el mouke s'met din ches piés ed ches animaux pi les minge pèr ndan.

Cho doét foaire granmint ed mau. Ch'est minme seur, cho leu foait du mau.

Ches moukes lò, i n'éroait in Charinte et in Vienne, quanq i foait fin keud. Et is vienne'te ed ches Pyrénées. Qu'i péroait !

Mais is ont un nom, wohlfartia, qu'os diroème eq cho vient d'Allemane.

Soin à vos quanq os mingerez des tchuisses d'ainnieu din quèks tans, à ches Pâkes !

Et in étè din ches régions lò, pensez à bin vos néttier vos piés.

dimanche 14 janvier 2018

Ches chrétiens ont du gingin

Din des tiots villages ed Saône-et-Loère dò qu'i o pu ed tchuré, ches chrétiens s'sont dit qu'i falloait moutrer à ches gins qui sai'te vive.

Adon, pour echl'Epihanie, ech sinmdi sis janvié, après-nonne, is ont ordjanisé unne tiote fète, pour présinter leus voeus à tertout, et pour pèrtager des galètes.

Is ont mie causer dech Christ o ed cin Père, is ont simplemint pèrtegr des galètes

Fin bin ! Et fin boinne idée !

Minme chi i péroait qu'i leu o resté unne o deus galètes.

Boin diminche à tertous.


samedi 13 janvier 2018

Vir rouve

In vrai, ch'est vir du rouve. Des cavieus rouves !

Mais cho n'plaît mie à tertout que d'vir des cavieus rouves.

Per eximpe, din unne école privée, i o quèks jours, unne fille o mantché d'ête virée, vu qu'ale o ervnu asn'école in janvié avuc ches cavieus rouves.

Et qu'is étoai'te mie rouve in déchimbe.

Chin père, à l'jonne fille, o vu rouve, li étout, mais vu eq ch'étoait un cadieu ed Noë à s'fille.

Mi, din unne église, avuc des cavieus bleus, rin n'm'o étè dit. Feut dire qu'ech plafond étou étoait bleu, eq ch'étoait Noë, et qu'i avoait m'bèle-mère avuc mi. I o quat ins.

Boinne jornée à tertous.

vendredi 12 janvier 2018

Unne réclame ed brin

Edpi quèks jours o smangnes, chu unne télévision, au vèpe, avant ed nos présinter ech tans qu'i fro ech lindman, i o unne réclame pour un poaiyis.

Sapré poaiyis ! Ech Républike Dominitchaine.

Cho m'baille invie ed déloufer.

L'Républike Dominitchaine, ch'est un indroét dò qu'etn argint, et chti d'interprinzes, est mie imposé, et dò, i o quèks innées, deus frinchoés mneus d'avion ont ieu ed cros problinmes. Is ont minme foait del prison.

Ch'est seur qu'ech républike, din ches Caraïbes, est un poaiyis dò qu'i foait granmint bieu.

Pour ches vagances, cho foait reuver tertout.

Mais quanq minme ! Chi ch'est mie un poaiyis honnete, feut mie foaire ed réclame pour eq ches gins i voéche'te.

Ej su in prousse. Os l'avoète comprins.

Boinne jornée.

jeudi 11 janvier 2018

Ches irondèles

A l'Saint Paulin, os comptons ches irondèles alintour d'Anmyin.

Qu'i s'dit.

Et ej pense eq ch'est aisié. Ed les compter, ches irondèles.

In janvié.

Bec à min nveu qu'o ches ages innui.

mercredi 10 janvier 2018

Moinss tu vos rade

... moinss t'os ed ristches ed moérir din un accidint.

Qu'i péroait !

Unne pruve ? Quanq tu n'avinches mie, t'os mie d'accidint.

Mais tu n'avinches mie.

J'o apprins lindi au vèpe qu'os pourroème écanger nos pannieus avuc ch'Danemèrk qui li, vo rintchérir ches limites ed vitesse ed quater-vint à quater-vint-dis.

Qué monde !

mardi 9 janvier 2018

Pèrtir un jour

 ... arriver l'veille.

Ch'est quoé qu'est arrivé à un avion qu'est pèrti ech premier janvié, avuc un molet de rtèrd, vu qu'il éroait du décollé ech trinte-et-un déchimbe à vint-troés-chincante-chonc, et qu'est arrivé ech ... trinte-et-un déchimbe, à dis eures sèse.

Ches gins ont don ieu deus nouvèlés innées. Qu'étoai'te l'minme.

Cho foait rire.

Mais maginez ech retour !

Echl'avion décolleroait à vint-deus-eures quarante-nu, ech nu janvié, et arriveroait, per eximpe, timpe au matin, à quat eures unne. Ech onze janvié.

O-jou qu'est passé ech dis janvié ?

I n'éroait mie ieu ?!

In vrai, ches gins din chl'avion l'éroai'te mie vu.

Mort ed rire. A picier din m'marronne

Ches aüres dechl'avion font m'plaisi.

lundi 8 janvier 2018

Voéyons ech boin keup

Ièr, echl'étchipe ed fotbal d'Anmyin o prins unne détchuloté.

Mais din troés jours, ale atchueille echl'étchipe ed Pèris.

Adon, ech keup chi, minme chi ale n'gaingne qu'un à zéro, tertous oblieront ches sis buts qu'ale o prins din ch'Doubs.

Boinne canche à ches jueus.

dimanche 7 janvier 2018

Ches roés

Echl'Epiphanie, ch'étoait ièr. Ch'est toudi ech sis janvié.

Minme chi tertout vo surtoute fêter cho innui, diminche.

Fêter echl'Epiphanie, ch'est minger del galète pour avir l'fève. Et ête lonmé roé.

In honmage à ches roés mages qui sont aller vir ech tiot Jésus i o miu ed deus-mile-ins.

Mais mi, edpi ièr, et minme chin avir ieu l'fève, ej su roé. Vu qu'ej passe ed eures chu tronne.

Boin accoin à tertout, boinne canche et boin diminche.

Soin à vo'panche.

samedi 6 janvier 2018

Echl'éçu

- "Pourquoé qu'i nos cause dechl'éçu adon qu'i pleut conme vake qui piche ?" qu'os vos dmindez seuremint.

Echl'éçu, ej vos l'dis, sro din sis moés.

Ches cinsiers s'plaindront qu'i foait fin sé. Et qu'i leu feut eds aides.

Comprindez, qu'is vu'te ed l'argint, vu eq ch'est fin sé et eq leus vakes o berbis n'ont pu rin à minger..

Adon qu'achteure, i pleut à n'pu savoèr quoé foaire ed l'ieu qui rinte din ches moaisons et monte chu ches voés.

Vu qu'os sonmes ach début d'innée, reuvons un molet.

Per eximpe, mi j'ainmeroais qu'ech tiot Jésus i rfoaiche ech keup ed Cana. Avuc du rouve, qu'ej préfrère ach blanc.

Cho sroait fin bieu à vir, mais i éroait toudi du dinger à tchair ndan.

Boin voéyage à ches gins qui voéyage'te.

Et boinne galète ed ches roés à ches gins qui minge'te del galète.

jeudi 4 janvier 2018

Lette à ch'Présidint

Min Présidint,

Vu eq j'ouve pour ti et ches frinchoés, tous ches moés, tu m'bailles deus euros et vint-nu chintimes in puss ed min gaingnage vu eq j'o coèr un éfant qui m'coûte.

Pour deus éfants, tu m'versoais soéçante-trèse euros et soéçante-dis-nu chintimes. Cho, cho kminche à foaire du bin à unne famille.

Mais deus euros et vint-nu chintimes ?!

P't'ête qu'i o des familles qui ont étou un éfant à leu charge et qui ont dzoin ed ches deus euros, mais mi, chi ej les avoais mie, ej pense eq cho cangeroait rin. O bin vraimint mie grin cose.

Adon, chi i o eds économies à foaire, tu pux m'prinde, o n'put m'les bailler, ches quèks sous.

Chu unne innée, tu gaingnes alintour ed vint-chonc euros.

Mais, avuc tertous ches fonctionnaires qui n'ont qu'un galibié, cho dvroait kmincher à foaire miu d'un millon pèr in.

Boinne innée à ti.

mercredi 3 janvier 2018

Quanq un canteu-mneu causoait

Un jour, aprè avoèr mné unne voéture in Afrike, Jean-Flipe Smet o dit :

- "Chi os avoème mie perdu unne eure et quèrt, os sroème lò edpi unne eure et quèrt."

Chi t'avoais ets ages ièr, bec à ti.

mardi 2 janvier 2018

Un plake ed Loulou Rispal

Edpi qu'ech Père Noë est passé ech darain keup, ej pux ed nouvieu acouter mes vius plakes.

Et ndan, i n'o un ed Loulou Rispal, cantalou, qui jue del cabrète.

Unne cabrète, pour ches gins qui connoai'te, cho rsanne à unne cornemuse, mais tu n'souffles mie ndan ; tu foais ch'vint avuc tes bros qui pompe'te unne pieu.

J'ainmoais acouter cho i o granmint d'innées, quanq j'étoais din chl'Aveyron.

J'ainme toudi, mais conme ej pouvoais pu els'acouter...

Don, l'eute jour, in écrivant, j'o acouté Loulou Rispal.

Qué bonnur ! L'polka pitchée, Chu ch'pont d'Intraygues, L'Canchon dech pastre.

Et tertous ches eutes.

Un jour, ej vos causero p't'ête ed Maumau Echlarchange, o bin étou Bébert Bras.

Mais ej pux surtoute vos conseiller d'aller dincher in Aveyron, quanq i o un jueu ed cabrète.

Continuez bin ech nouvèle innée.

lundi 1 janvier 2018

In attindant

... deus-mile-dis-nu, ej vos souhaite ed passer unne boinne innée deus-mile-dis-uit.


Ayez ed boinnés gambes pour bin avincher cht'innée, vos, ems amis lecteus, et étou vot famille.


Fuchez ureus.

A béto !