Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libe d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

lundi 31 mars 2014

Donner invie d'lire

-"D'ichi mie granmint ed tans, et p't'ête avant, ches collègues ed Lyon vont granmint ed tans rigoler eq cho fro dédjeuler ech Rhône."

-"Ale sait minme pu chi os sonmes merkerdi o chi ale doét prinde un bain ed piés ed moutèrde."

-"Os avez unne voéx à heute frétchuince avuc inverseur phare-code à kènnelures conkèves. Un d'ches jours, éj vos frai vérifier ech nivieu ed min electrolyte. J'in os in avuc vue chu ches mèrs et purge dech sytème hydreulitche, éj sus seur eq vos ainmerez."

-"Os vos mettez à causer patois in moinss ed tans qu'i feut à un indien pour mette un tiot sioux din ch'tirlire de s'fanme."

-"Esn'interpretation, ach piano, rsanne ach pas d'un kvau ed corbillèrd grimpant ech Galibier."

T'os vu comme tout cho ch'est bieu ! T'os invie ed tout lire ? Tout cho est din "San Antonio amon ches gones". Boinne lecture.

dimanche 30 mars 2014

Dis ins

T'in foais des keuses in dis ins :

- t'acates et poaiyes unne voèture, voère, chi t'es riche, unne moaison,

- tu pux foaire ech tour du monde à piés,

- tu t'mèries et t'os, pér eximpe, chonc bieus éfants.

Mais in dis ins étou, tu pux naîte pi avoèr innuit dis ins.

Dech keup, éj te dis "boins âges. T'os coèr granmint d'innées dvant ti ; Qu'is fuche'te bèles ! Continue d'ête ureus. Bec à ti. "

samedi 29 mars 2014

Canjmint d'eure

Edman, os cangeons d'eure.

-"Os rtchulons, vu qu'os dormons unne eure ed moinss."

-"Ej te dis qu'o troés eures, i sro quat eures ; Donc, os avanchons nos montes d'unne eure."

-"Du keup, quanq os avanchons nos montes d'unne eure, os dormons unne eure ed moinss. Et quanq os rtchulons nos montes d'unne eure, os dormons unne eure ed miu."

-"Mi, éj voérai edman in m'elvant", dit coèr un eute.

Et ches vakes ?

vendredi 28 mars 2014

Ch'est qui qui décide ?

Un conmarade ed soéçante-chonc ins a unne fanme, unne fille et unne cinse. Ech cinse, ale étoait ach taïon dech fanme. Feut l'savoér pour comprinde.

Achteure, quanq i vut smer ed l'orge o du blé, pér eximpe, i doét dminder à s'fanme chi ch'est possibe.
Ale, ale dminde à s'mére, quater-vint-sèt ins, qui répond slon kmint eq foaisoait chin pére à ale.

Ech pére lo est mort edpi eds innées, mais quanq minme, ch'est coèr li qui décide.

Magine !

-"Eh ! Ech'bieu-fiu ! Edman, feut smer ed l'avangne et du blé."

-"Mais ! Ech l'avangne, ch'est pour ches kvaus !"

-"Et alorss ?"

-"Bin, os in n'avons pu !"

-"T'éros qu'o planter des topinimbours."

jeudi 27 mars 2014

Biétôt Noë

-"Es-ti mie tcheu chu t'tète ?", qu'os vos dîtes.

-"Bin nan !", qu'éj vos réponds.

Quanq os avons, comme mi, une famille étranmer din ch'monde, tu pux mie ête ech vint-chonc déchimbe din t'famille et t'bèle-famille.

Dech keup, os allons foaire Noë à Pake, avuc em'famille ; Que fête ed Pake !

Aprés ech messe ed ...Pake, alintor ed'nonne, os s'offrirons ches tiots cadieus. Pi, alintor ed trèse eures, os s'souhaiterons unne boinne innée et unne boinne santè, avuc un tiot keup à boère. Apré nonne, alintour ed sèse eures inviron, os tracherons ches eus...ed Pake din ch'gardin, avuc nos panches rimplies.

Pour finir, unne bistouille pi, unne pèrtie d'cartes. Unne manille ! Ej buke et l'eute erbuke aprés.

Quanq os rintrerons, os rmerchierons granmint not'mére pour l'boinne journée.

-"Adé ! A nos rvir ! Merchie l'mére ! Ch'étoait bin."

Donmage eq ch'est djo fini.

mercredi 26 mars 2014

Ti, mi et li

Histoère vraie, i o inviron quarante ins.

-"Allo, ch'est ti ?"

-"Euh ! Ouais,ch'est mi."

-"Ej rconnoais mie et'voéx. Ch'est bin ti ?"

-"Mais ouais, éj te dis eq ch'est mi."

Quèk sgondes aprés :

-"T'es bin Dédèle* ?!"

-"Ah nan ! Mi, ch'est Nénète*."



* Pér respect  pour ches gins, ches tiots noms ont été cangés.

mardi 25 mars 2014

Cho foait buser

Ej t'os djà dit, quanq j'ouvre, éj prinds ech train. Pour aller, pi pour rvnir.

L'eute smangne, cho foaisoait dis voéyages. Chonc jours à ouvrer. Chu ches dis, j'os été contrôlé un keup. Tu pux, din ches keups lo, te dminder chi t'os bin foait d'acater ches billets.

Mi, pour unne smangne, éj poaiye chincante-chonc euros. Ch'est mie freïeus, vu qu'un voéyage in veut sèse.

Mais, chi i o mie grandmint ed contrôle, éj comprinds qu'i o des gins qui vu'te tricher.

C'est cho qui foait buser.

lundi 24 mars 2014

A l'pitchète dech jour

Achteure, timpe au matin, aux invirons ed sis eures tchinze, sis eures quarante-chonc, slon o tu restes, i kminche à foaire jour. Tu voés mie ech solé, mais i foait jour.

T'intinds ches osieus qui cante'te, foais mie trop keud et tu voés ches couleurs qui sont douches. Pi, ech solé pèroait. Ch'est bieu ; Feut profiter. Unne eure ed miu et cho n'o pu rin à voèr.

Din uit jours, avuc ech canjmint d'eures, i frot nuit. Et din troés moés, i feudro s'déjoutcher à quat eures et i frot keud.

Profite d'achteure.

dimanche 23 mars 2014

J'os unne carte FN

Histoère ed nationalisme ?

-"Ah, ches nationalistes !", qu'os vos dites p't'ete.

Achteure, lo où i o des russes, i feudro qu'o fuche Russe.

Chi ch'est comme cho, Paris et New York sont un molet chinoès, Munich, un molet turque, St Ouen o Bertaucourt ches dames, portudjais, Annecy, chuisse et, coèr pèr eximpe, Texas, méxitchain.

Mi, éj pinse qu'i feut mie laicier dire cho et coèr moinss laicier foaire.

In réalité, éj voulait mie causer politique, vu qu'os votons innuit.
Ech carte FN, ch'est cose eq j'os ieu chonc rétus galibiés avuc em'fanme ; FN, comme Famille Nombreuse. Rin d'eute.

samedi 22 mars 2014

Acoute mi bin

-"Allô, tu m'intinds ?"

-"Ouais, éj t'acoute."

-"Mi étou, éj'l'acoute. Mais j'i dis mie."

-"Pi mi étou, éj l'acoute. Mi étou, je l'dis mie. D'écalo, j'linregiste."

vendredi 21 mars 2014

Raspoutine

Ch'étoait un russe, mort in dis-nu-chint-sèse. Grigori, chin tiot nom.

Avant ed'moérir, ch'étoait un conmarade dech tsar ed Russie et dech famille. I s'dit qu'il avoait du gingin, mais étoait un molet spécial ; Ch'est p't'ête pour cho qu'il o été assassiné.

Cho n'impêque mie des gins d'achteure, d'avoèr un nom qui rsanne. Mais Raspoutine,li, étoait ginti, avoait granmint ed cavieus et unne barbe.

jeudi 20 mars 2014

Ches punichions

Quanq tu vux punir ches gins, tu pux leu prinde leu argint, pér eximpe din t'banque.Tu pux én'mie leu acater quèk keuse. Tu pux étou én'mie leu vinde quèk keuse.

Din ech premier eximpe, t'es riche.

Din ech deuxienme, tu doés pouvoèr acater ches d'eutes. Souvint, ch'est possibe.

Mais din ch'darain eximpe, feut pouvoèr rvinde à d'eutes. Minme keuse, ch'est souvint possibe. Mais chi ch'est un o deus batieus, ch'est mie aisié. Edpi, i o ches gins qui ouvre'te dsu. Quoé qu'i front ?

mercredi 19 mars 2014

Min fiu, in prison

- "Min fiu est in prison" qui cantoait Félix Leclerc din unne canchon, "Echl'alouette in prousse". Unne canchon !

- "Allo ! Ech'père ? Innuit, éj sus allé in prison", qui m'o dit min fiu. Ch'est mie unne canchon.

Mes gambes ont tranné. Min tcheur a battu granmint.

- "I i o été mais i est mie resté" qu'éj em'sus dit, vu qu'i m'téléphone.

- "Ej vos voèr ches gins pour els'aidier", qui m'dit coèr.

- "Ouf", qu'éj m'dit. "Il o granmint ed corage."

mardi 18 mars 2014

Ches Bermudes

Ej vos mie ét'causer dechl'archipel ed ches Bermudes, mais dech triangue.

Ech nouvieu triangue ed ches Bermudes ; Ed l'est. Din chl'Océan Indien.  Sapré triangue !

-"Allo, Papa Tango Charli, répondez, nos vos trachons.", qui cantoait Mort Shuman. I put rkmincher.

Un Boeing, o un Airbus, din l'Océan Indien, ch'est comme unne adjuille din ech'fain o din du feur.

Boinne canche.

Du brin din ch'carbu

Ach'mitan ed marche, vlo qui foait keud. Et chl'herbe in profite pour pousser. I feut tonde.

Ej prinds em'tondeuse, mets edl'echinse ndin, etpi démarre ; "Teuf, teuf, teuf ", etpi pu rin.

J'rkminche. Coèr "teuf, teuf, teuf", etpi coèr pu rin. Brin ! Io du brin din ch'moteur. Lo, j'os pinsé grandmint à min bieu-pére : "Sapré boin diu ed saloperie d'brin". Qui disoait, des keups.

Alorss, feut ech qui feut ; Réparé. Premier qu'éj foais cho, premier keup qu'éj réussis.

Mais, j'oblie mie min bieu-pére. Et étou, min pére. Et leu fanme.

lundi 17 mars 2014

Echl'évêque et ches manifestants

Ièr, i avoait unne messe avuc echl'évêque. Bin ! Rin à dire.

Mais aprés, vu eq ch'étoait annonché qu'il alloait vnir, i o des gins qu'ont vnu manifester pour qu'os frunmonche mie unne école privée. Pourquoé mie !

Aprés ech'messe qu'is ont vnu.

Mi, éj leu os dit qu'is éroai'te pu vnir ach'messe, vu qu'i i avoait del place din chl'église.

Ont mie répondu.

Mie frunmer echl'école privée, mais mie vnir ach'messe ?!

dimanche 16 mars 2014

Echl'évêque et ech'nénéphant

Verdi, unne conmarade à m'fanme téléphone et i dit :

-"Ej sus ercrand. Ches gins m'épine'te. Diminche, pour ech'venue edl'évêque, tu foais comme tu vus. Tu pus minme vnir avuc un nénéphant."

Em'fanme vouloait qu'éj vienche avuc ale voèr echl'évêque.

Quoé qu'ch'est eq cho vut dire ?

samedi 15 mars 2014

Ches vacheus

Vacheus et vakes, feut mie confonde.

Ches vakes, is minge'te.
Ches vacheus, ch'est quanq t'os mingé.

Quanq j'étoais miu jonme, vlo kmint qu'os foaisions pour lavinder.

Aprés avoèr foait à minger, flanmitcher, éplutcher, tchuire o minger, tu mettoais ches castroles, couets, païèles, louches, fortchètes et coutieus din echl'évier. Pi, tu mettoais de l'ieu prope et keude, du savlon, et tu frottoais.












Aprés, tu mettoais ches vacheus à réçuer o tu l'foaisais avuc un torchon, prope étou.

Ches jonmes d'achteure is lavinde'te mie avuc ches mans et sai'te mie foaire. Dech keup, quanq i feut foaire, comme pér eximpe, in vagances, i n'o eq ches vius qui foai'te.

Pour ches photos lo, j'o mie posé ches vacheus din echl'égouttoèr, vu kmint eq ch'étaoit prope.


I o des gins, des keups is rest'te à Nantes, qu'ont des appèrtémints in Auvergne qui sont bouzrés, crapés. Feut miu n'mie y aller. D'eutes keups, t'es boaisié.

jeudi 13 mars 2014

Ech trait d'union

Ej t'o djo causé dech kmin ed grinde rindonnée, ech GR soéçante-chonc, in novimbe deus-mile-trèse, quanq éj t'os causé dech cathédrale du Puy-in-Velay. I vo à St Jacques ed Compostelle, in Espagne.

Ech kmin lo, os l'foaisons avuc ém bèle-famille edpi troés ins ; "Le Puy-in-Velay - Nasbinals", "Nasbinals - Faycelles" pi, l'in passé, "Faycelles - Moissac".

Atincion, pour bin comprinde, un intervalle d'un in donne deus mèrches. Donc, deus ins donne'te troés mèrches.
Atincion coèr : lo o os s'arrêtons unne innée, os rkminchons l'eute innée.

I sont, ém fanme, des frères, soeurs, bèles soeurs,bieus-frères, nveus, niéces à m'fanme, em bèle-mére, chin frère et s'fanme. Souvint, miu ed vint gins qui s'connoai'te. Des keups, un o unne conmarade à l'un o l'eute ed ches randonneus.

Ej te dit mie echl'imbiance qu'i o, in kmin o au vèpe.

Din deus moés, keuse ches vagances d'école, os frons "Moissac - Aire chu chl'Adour".

Mais j'o un problinme : em bèle-mère, qui prind eds'ins, vut mie vnir.

Mi, j'comprinds qu'ale fuche ercrand. Mais éj dis eq ch'est ale ech trait d'union inter tertous. Minme chi ale mèrche mie, o seulmint un molet, i i éro toudi ches souvnirs ed quanq os mingerons o au vèpe.

Ech kmin ed St Jacques chin m'bèle-mère, ch'est comme un cassoulet chin vianne o unne flanmike o poérions chin poérions.

"A ti el miu ed mes bèle-méres, éj dis eq din un in - deus mèrches, rappéle-ti, Barbara - os srons à St-Jean-Pié-ed-Port.. Ej croés qu'i feut tu i vienches. Mi, ech mari det fille, éj te l'deminde."

mardi 11 mars 2014

Em fidjure

I m'sanne eq tu m'os janmoais vu. Alorss, éj vos ét montrer à quoé j'ersanne.

Rbée ech photo ed mie.


 Ej sus comme ti : deus éreilles, un nez au mitan dech fidjure, des ius, unne bouke, un menton, des cavieus chu m'tète. Et, éj sus blanc comme ches nèges.

Ej pinse eq tu m'truvoes bieu. Chi ch'est mie cho, tu pourroais prinde min quarante-quat quèk part.


A nos rvir !

lundi 10 mars 2014

Not'Obélix d'achteure

Il est allé vive in Russie, et est dvenu Russe.

Mi, éj dis eq ch'est bin. Ech Russie est unne démocratie et chin président est fort. Il est respecté pér, et respecte étou, Merkel, Cameron et Obama.

Chi t'acoutes ches radios, i o d'eutes gins qui vu'te dvnir russe. Cha vut bin dire eq not'Obélix d'achteure a bin foait.

Etpi, ches russes, qu'ont organisé, et gaingné ches jus olympiques d'ivèr, li'te granmint min blog.

Vive ech Russie ! A moinss qu'o m'euche mie tout dit.

samedi 8 mars 2014

Parité, feut coère ouvrer

Edpi quèk innées, ech uit marche est appelé journée ed ches fanmes. Cho vut dire qui reste troés-chint soéçante-quat jours pér in pour ches onmes. Lo, éj ridjole ; Ch'est mie cho eq cho vut dire.

Quanq os causons ed parité, ch'est mie gaingné. Mais feut-i toudi ech parité ?

Ej croés eq pour ches gainniages, i feut ; Ches fanmes ouvre'te souvint comme ches onmes.

Mais in politique ? Feut-i mette des fanmes, o des onmes, qui vu'te mie foaire ed politique, o qui sont niacoés, pour avoèr "chincante-chincante" chu ches listes electorales ? Lo, éj pinse mie cho. Feut miu chint pour chint ed fanmes, o d'onmes, qui vu'te ouvrer pour unne ville o unne région et qui sont mie nikdouilles, qu'ech parité.

Innuit, ch'étoait ech momint d'in causer. Qu'i m'sanne.

Chi t'es unne fanme et qu't'os tes ages innuit, éj te foais un bec spécial. Chi, in plu, t'es in vagances, profite.

vendredi 7 mars 2014

Cause toudi, tu m’intéresses.

J'o unne fille qui vux ête sérusyin. Ch'est granmint malaisié.

Pour l'aidier à bin comprinde et apprinde ches lçons, j'i o acaté un dictaphone. Ch'est foait pour inregistrer ech prof qui cause rade, edpi ét'caïelle, minme à tchinze metes.

Em fille dit qu'o fonctionne bin. Minme din t'poke ed casake, t'arrives à inregistrer pi à comprinde ech qui ch'est dit. Chi t'oblie ed l'arrêter, cho pux inregistrer vint-quat eures.

Ej sus ureus : j'o acaté quèk cose ed bin et mie dingéreux.

jeudi 6 mars 2014

Dinger. En mie toucher.

- "Bonjour Mdame, os sommes in vagances din vot'appèrtémint, mais internet n'fonctionne mie".

- "Bonjour Mdame, cho doét ête ech livebox. Ej vos invoée min omne. Ej vux mie qu'o n'i touche".

Ch'est prudint.

mercredi 5 mars 2014

Ech pèke au treu

Tous ches innées, aux invirons dech Mardi Cros o dech diminche d'aprés, qui s'appéle Diminche ed bourdi, ach lac ed Guéry, in Auvergne, i o unne péke au treu.

Unne péke au treu, i feut un lac qu'o granmint injlé et où tu pux mèrcher dsu ; Ch'est pour o eq tu foais mie cho in déchimbe et eq tu foais cho in montagne. Rbée chu unne carte où qu'ch'est qu'il est ech lac ed Guéry et tu comprindros.

Ches gins i vien'te avuc ches pèkes, pour pêtcher. Is foai'te un treu din ches glaches, et is pêque'te. Ch'est pour cho eq cho s'appéle "unne péke au treu".

Echt'innée, ech lac i minque mie d'ieu, vu ches draches qu'i o ieu edpi des moès, ichi, amon ti o amon mi.

Mais i minque ches glaches dsu. Mie ed treu à foaire et mie possibe ed mèrcher dsu. O tu t'appéles Jésus ! Dech keup, mie ed pèke au treu.

Achteure, i foait mie granmint ed caleur pour s'baingner din ch'lac ;  Mais din dis o vint ins, in janvié, tu pourros p't'te ?

mardi 4 mars 2014

Ech mot ed chonc lettes.

Un diminche, in janvié, au catéchisme d'avant ech'messe, ech catéchiste dminde à ches galibiés ed dis ins ed foaire un mot avuc ches chonc lettes lo :

I, M, R, E et C.

Cho put mie ête ech mot ed Cambronne, vu qu'i n'o eq quat lettes, I, R, N et B.

Ches éfants trache'te un momint, pi truvoe'te : CRIME.

-" Ch'est bin, ches éfants, qu'ale dit ech catéchiste, mais ch'est mie o qui fallaoit truvoer !"

Ches galibiés ont fini par écrire ech mot qu'ale vouloait.

Ti étou, tu pux tracher ech mot ed chonc lettes.

Tu sais eq ch'est mie CRIME, o CRIMEE, i feudroait une eute lette. Minme chi i put avoèr des crimes in Crimée.

lundi 3 mars 2014

Ech premier keup d'unne premiére rinconte

Falloait eq cho arrive ! Avuc des filles et des fius, fallaoit qu'un jour i n'o un qu'o un jules o unne julie. Fallaoit qu'un jour ém fanme et mi fuchonche invités à rincontrer ches parents dech julo o julotte.

Ch'est foait edpi ièr. Unne premiére ed premiére.

Bins, ches gins ! Futurs bieus-gins d'ém fille ?! Avons bin mingé, causé et bu. Unne boinne promnade étou, in forêt et alintour d'un lac pi, din ch'tiot village.

Espérons eq cho fuche toudi comme o. Pour chte fille, ches eutes éfants et ches eutes rincontes.

dimanche 2 mars 2014

Vive à deus, indépendints

- "Mie, éj vux vive avuc min compagnon, chatchun din not'appartemint. Quanq éj vux, éj vos amon li, o li vient amon mi."

Et ches éfants ?

- "Feut miu avoèr unne garde à l'tourète, et des parents qui s'ainme'te."

Lo, éj reste assis chu min tchu. Ch'est granmint moderne comme vie ed famille.

samedi 1 mars 2014

Un tiot molet ed philosophie

Ch'est mie cose eq ches keuses sont malaisiées qu'os les osons mie, ch'est cose qu'os les osons mie qu'is sont malaisiés.

Qu'o dit Sénèque, mort achteure.