Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

vendredi 31 mai 2019

Min conmarade o ches ages

Ed tans in tans, ej vos mets in bos del page qu'i o unne gin qu'ej connoais et eq j'ainme qu'o ches ages ech jour-lò.

Innui, ej foais un article intier dsu.

Cho foait vint-quat innées qu'ej souhaite ches ages à m'daraine fille, sis innées, djò, eq j'écris dsu min blog et i mets un mot ech trinte-et-un dech moés ed moai.

Edpi deus innées, min conmarade ch'Zèf m'indique, in conmintère, eq li-étou, il o ches ages ech trinte-et-un dech moés ed moai.

M'fille, ale vo bin et j'vo l'vir au vèpe.

Mais min conmarade, l'o mis un article chu chin blog i o tchinze jours, edpi, rin.

Adon, ej vux i dire qu'ej pense à li et eq j'i souhaite unne boinne jornée.

Pour ches eutes qu'is li'te min blog, allez vir, chin vos ekmander, chti dech Zèf, lonmé Ch'ti jornal in Picard.

Boinne jornée à tertous.

Et surtoute à ches gins qu'ont leus ages innui.


mercredi 29 mai 2019

Piés et dints

Ch'est un conte qu'o arrivé à un jonne, alintour ed quarante-chonc ins d'âges.

Un méchant conte, malureusemint pour li.

Ech jonne, il avoait ches dints qui roaiyoai'te ech pèrtchet edpi quèks innées.

Diminche au vèpe, mie ed pèrtchet, mais del motchète.

Et il o prins ches piés ndan.

S'est berzillé ches dints.

Ah ! Ch'pauve !

Vo avir du mau à s'rélver !

Surtoute chi ches voésins et voésines mèrche'te dsu.


lundi 27 mai 2019

Voter pour un pèrti écologisse

...ièr, étoait corageus.

Chti qui vote écologisse n'est mie mnaché, mais i falloait qu'i buse bin.

Os avez vu ?!

I avoait un pèrti écologisse vert, pi un eute pèrti écologisse, pi, pèr eximpe, ech pèrti socialisse, toudi in vie, qui annonchoait foaire ed l'écologie.

Pour ête seur ed prinde un boin pèrti écoligisse, tu pouvoais étou coésir ech pèrti animalisse.

Quanq cho cause d'animaux, cho doét ête bin !

Ej connoaissoais mie, mais din chl'liste, i avoait unne fanme célèbe.

O bin qu'avoait ches minmes nom et tiot nom qu'unne fanme célèbe.

Malureusemint, i avoait p'ête coèr d'eute pèrti qui n'in foaisoai'te, ed l'écologie, mais ej pux mie vos in causer, vu qu'is n'avoai'te poin imprimé ed liste.

O eq j'o oblié leu nom.

Désolé.

Boinne jornée.


dimanche 26 mai 2019

J'éroais du tonde

... ièr aprè-nonne, vu eq pour un keup, i foaisoait bieu et keud.

Mais min voésin nos o invité, m'fanme et mi, à bir un keup à nonne.

Un keup à bir, pi un deusienme, et aprè ej vo tonde.

- "Os allez minger avuc mi ?! J'o acaté des brochètes ed vianne."

Mettons !

Un eute voésin arrive pour bir et minger.

- "Os voulez juer à l'pétanke ?"

Mettons ! J'o janmoais perdu ach'ju-lò.

Qu'ej m'o dit.

Ièr, avuc m'fanme, os avons foait deusienme, et nos voésins, avant-darains (clin d'ziu à Kroutchef et Kennedy).

Pi, avuc min blanc-bonnet, os avonc rintré à no'moaison.

L'étoait alintour ed dis-nu eures.

- "T'intchéte !" qu'ale dit m'fanme "no'fiu rinte lindi et sro in vagances !"

J'éroais p't'ête du tonde ièr ?

Boin diminche à tertous, et prudinche chi os voulez courir quarante kilomètes et quèks alintour dech Mont-Sin-Michel.


samedi 25 mai 2019

Nė ech douse dėchimbe

... mile-nu-chint-quater-vint-nu.

J'o apprins mardi qu'unne fille né ech jour-lò vnoait d'arriver ach ministère ed l'agriculture,  pour ouvrer.

Chi ale o né ech douse dėchimbe dech l'innée-lò, adon, ale o mie connu ches ėvênemints dech onze dėchimbe mile-nu-chint-quater-vint-nu.

Et i n'o ieu !

Per eximpe, l'jonne fanme o mie vétchu echl'abolition dech rôle dech dirigeu dech perti conmunisse buldjare. In Buldjarie.

Minme cose pour ech premier jour del trésienme session dech comité dech patrimoéne mondial.

Ale avoait mie né quanq echl'espédition Trinsantartica o arrivé ach Pôle Sud.

Et surtoute, ale o né ech lindman d'el naissinche d'em premiere fille.

Adon, minme chi ale ouve ach ministère ed l'agricultchure et qui sanne n'mie i avoèr granmint ed vint din s'tète, ale doét l'respect à m'fille.

Comprins, tiote ?


vendredi 24 mai 2019

Vnez à Anmyin

Au vèpe, echl'étchipe ed fotbal d'Anmyin éro unne rinconte fin importante.

Adon, i feut vos rinde à l'Licorne pour incorager ches jueus.

Et pour pouvoèr, din quèks moés rvir ches étchipes ed Pèris, Marseille, Sin-Etienne.

Et minme Brest !

Allez Anmyin !


jeudi 23 mai 2019

Ete minisse ed l'écononmie

Quanq un minisse ed l'écononmie est ureus qu'unne interprinze fuche seuvé in étant racaté per unne eute, os pourroème croère qu'i connoait l'eute interprinze.

Qu'i la connoait bin.

Et kmint qu'ale vo.

Eh bin, nan !

Qu'i sanne.

Quanq os apprindons ièr eq l'interprinze ed Sin-Seuve sroait racaté per Acier Breton, qui, os vnons del démucher, o ed cros problinmes d'argint, ej truvoe cho fin scandaleus.

Et vos ?!

Ej plains ches ouvreus ed Sin-Seuve.

Boin corage à eux.


mercredi 22 mai 2019

Ale o tuė

... deus morts.

Ch'est unne cose eq j'o lue ièr chu internėnèt.

Ej vos esplique.

I pėroait qu'unne jonne canteuse ėroait tuė deus morts, i o deus ins.

Maginez !

T'es in voéture, in route à conduire, et d'un keup, t'os un accidint.

Malureusemint, i o deus morts.

Achteure !

Mais avant chl'accident,  jou qu'is ėtoai'te coèr in vie, o bin djò morts ?

O jou eq ches jornaleus z'ont coèr foait unne cacouille o unne berlure ?

Fuchez prudints !  Minme in étant à piės.

Surtoute in étant à piės.


mardi 21 mai 2019

Ch'est fin malaisiė

... d'ouvrer conme i feut quanq os avons ed moinss in moinss ed gins pour ouvrer.

Eximpe :
Ech governemint d'achteure,  conme ches eutes, vut réduire ches fonctionnaires,  lonmės per tertout ches boins-à-rin.

Mais un jour, cho dvient, o dviendro,  pu possible ed bin ouvrer.

Et j'o chl'impression eq cho kminche granmint à  s'vir.

I n'o qui di'te qu'i feut imbeucher des gins pour quèks smangnes o moės.

Lò, ch'est aisié à dire !

Mais à foaire ?

Feut djò treuver des gins qui vuche'te ouvrer !

Pi,  feut leu apprinde echl'ouvrage !

Pi, is s'in vont.

Djò.

Et tu rprinds du tans pour des nouvieus o nouvèles.

Tertout m'o comprins ?

Ej su in prousse.

Don, chi os êtes à joke,  fuchez prudint quanq os m'verrez.



lundi 20 mai 2019

Pour apprinde à ête patient

I feut s'mèrier.

Et quanq ét fanme s'prépare, tu démuches l'patieinche et apprinds à in avoèr.

samedi 18 mai 2019

Is n'ont rcausé

Ch'étoait au matin, j'o mie écrit timpe au matin, vu eq ch'étoait alintour ed nu eures, j'o intindu un jornaleu causer ed Nuit Dbeut.

Os vos ramintuvoez ?

I o troés ins, in marche, des gins manifest'te, et ches jornaleus les lonme'te Nuit Dbeut.

Edpi, os les avoème oblié.

Minme mi !

Mi qu'o un nveu et unne nièce qui sont des membes ed Nuit Dbeut. Tiens ! Ej vo leu invoéyé unne carte postale.

Eh bin ! Au matin, in causant ed ches Gannes Espincers, toudi in vie, un jornaleu o causé ed Nuit Dbeut.

Feut dire eq ches deus mouvemints s'rsanne'te.

Minme chi chti ed deus-mile-sèse o granmint moinss berzillé ed coses o monumints eq ches Gannes Espincers.

Bec à min nveu et m'nièce.

Et à tertous.


vendredi 17 mai 2019

Quanq ches ėfants cause'te ed leu père

Quanq ej vo amon m'bèle-mère, i o din unne cambe ch'texte d'aprè. Ch'est eds éfants qui juge'te leu père slon ches âges qu'is ont.

A chonc ins :
- "Ch'père sait toute."

A dis ins :
- "Ch'père, i n'in sait granmint  ."

A tchinze ins :
- "Os in savons autant qu'ech père."

A vint ins :
- "Déchidémint, not père n'sait mie grind cose."

A trinte ins :
- "Os pourroème quanq minme dminder à ch'père    ."

A quarante ins :
- "Ch'père, i sait quanq minme quèk cose."

A chincante ins :
- "Ch'père sait toute."

A soéçante ins :
- "Ah ! Chi os pouvoème coèr dminder à ch'père."

Ah ! Chi nos galibiės pouvoai'te connoaîle ech texte-lò et s'in ranmintuvoet !

Bec à ms'éfants.


jeudi 16 mai 2019

Unne innée ed jornaleu

Busez un molet ! Quoé qu'is di'te o bin qu'is  écri'te ches jornaleus chake innée ?

Ech premier janvié, is nos mout'te ches images dech rinvillon à Melbeurne, Tokyo, Moscou, Pèris...

Alintour dech dis dech moés ed janvié, is cause'te ed ches soldes et ed ches gins qui coure'te pour acater (des coses qu'is ont mie dzoin).

In févrié, ches jornaleus cause'te ed ches nèges : i in o, i in o mie o coèr, i in o mie granmint.

Pi, is cause'te étou ed ches vagances, ed ches gins cuinchés din leu voéture in pèrtant in vagances pèr ches néges.

In marche, ches jornaleus cause'te ed ches soldes qu'ont arté, font un bilan, et cause'te étou et coèr ed ches vagances ; coèr un keup, is font un bilan.

Is dvise'te ed l'étchipe ed fotbal ed Pèris qui perd.

Quanq arrive ech moés ed moai, ches jornaleus cause'te ed ches jours chin ouvrage, ed quoé eq cho veut à ches interprinzes.

Juillet vient. Sapré trafic chu ches voées. Os voéyons des gins qu'ont intindu granmint adon qu'i foait keup, des gins arrivés in vagances et qui rtruvoe'te des conmarades ed vagances.

Ech moés d'eu est lò. Ches jornaleus cause'te adon ed ches gins qui tchit'te ch'bord ed ches mers et qui sont trisses.

Is nos mout'te étou ches familles, surtoute ches mères et leus galibiés qu'acat'te des coses pour ches éfants qui vont rtorner din leu école.

Septimbe, octobe, pi djò qu'i feut causer ed Noë et ches jus qui sont à vinde.

Novimbe, ches conmémorations.

Etpi déchimbe.Noë, ches fètes, ches repas ed fète,...

Aprè cho, os érvnez ach début dechl'article.




mercredi 15 mai 2019

Aler pi èrvnir

I o quèks jours, au vèpe, in Mayène,  départemint qu'ém fanme et mi connoaissons bin, unne fanme o ėtè achl'ôpital, inmnėe per ches pompiės, vu qu'ale avoait un mau.

Echtchel ? Ej sais pu.

Achl'ôpital,  ches sėruzyins s'otchupe'te d'ale.

Et ches pompiės s'in vont.

Normal.

Alintour ed deus eures au matin, l'fanme put tchiter chl'ôpital.

In vrai, ale doėt tchiter ech lieu.

Mais, pu ed pompiės !

Un taxi ? Feut poaiyer !

Finalemint, ale o rentrė à piės.

Et lò, ale o ieu du mau.

 I n'o qui définiroai'te in écrivant :
- "Bin foait pour ches piės !"


lundi 13 mai 2019

Un boin film

I o quèks innées, au vèpe, chi tu rbéïoais un film à l'télévision, i kminchoait alintour ed vint eures trinte et étoait défini alintour ed vint-deus eures thinze.

Achteure, feut attinde alintour ed vint-et-unne eures et dis minutes pour cho kmnche, et i o surtoute des séries qui dure'te chincante minutes. Chi tu vux vir kmint cho s'définit, feut rbéïer troés épisodes un jour, et troés l'eute smangne.

Et p't'ête coèr troés eute unne eute smangne.

A chake keup, tu t'joutches à vint-troés eures et des beurroètes.

Adon, chi tu déjoutches fin timpe au matin, per eximpe pour prinde un train, tu rbées rin.

Brin.

vendredi 10 mai 2019

Ches ainnieus vont apprinde

... à lire et à cartchuler.

Ch'est din un tiot village ed l'Isère, Sin-Pierre-d'Allevèrd.

Des gins qu'in ont din l'caboche ont inscrit eds ainnieus à l'école dech village pour éviter qu'ale frunme.

Is vu'te eq ches animaus fuche'te considéré conme eds élèves.

Chi i o granmint d'éfants achl'école, ale n'frunmero poin.

Fin boinne et régalant idée.

A suive.

jeudi 9 mai 2019

Unne basilike souffle ches bougies

Ch'est quoé eq j'o lu ièr conme tite d'un article.

Ch'est à Saulieu, in Côte d'Or.

Des bougies, i in éroait nu-chint, qu'i péroait.

Mi, ej dis :

- "Atincion ! El cathédrale ed Péris o asi i o quèks smangnes."

mercredi 8 mai 2019

Ches nindicapės brai'te

I o quèks jours, ej vos causoais d'un jonne qui disoait du mau d'un soė-disant mondjol.

Innui, malureusemint pour eux, ej vos causero coèr ed ches nindicapės ; Jean Vanier, qu'o foait granmint ed bėlès coses pour eux, est mort.

Ej suppose qu'achteure, granmint ed nindicapės, o d'gins qui les aide'te, sont trisses o brai'te.

Is peu'te.

Jean Vanier, quater-vint-dis ins, ėtoait unne gin bin.

Boin voéyage,  Jean !

Adė !


mardi 7 mai 2019

Dò-jou qu'il est chl'aigue

In Bretanne, à Audièrne, echl'aquérium o unne crosse intchiétude : il o perdu chin aigue.

Un aigue din un aquérium ?! Jou qu'i o mie unne berlure quanq j'écris, o jou qu'ej su seu ?

Nan !

Feut savoèr qu'Audièrne est chu ches bords ed ches mers, din ch'dépèrtemint dech Beu-dech-tèr, et chl'aigue qu'o disparu est un aigue-pêkeu.

Kmint jou qu'est i possibe qu'un aquérium ainme un aigue-pêkeu ? Qui matche des pichons !

Ben ! Ches pichons, i n'o toudi qui meur'te.

Don, avir un aigue qui matche ches pichons, cho put ête bin conmode.

Chi os voéyez un aigue, pêkeu, aplez echl'aquérium.

Boinne jornée.


lundi 6 mai 2019

Disez trinte-troés

Cho, ch'est quanq os allez amon vot séruzyin.

Trinte-troés, edpi sinmdi, ches nombes ed listes politikes qu'i éro in Frinche pour ches elections uropéïènes dech vint-sis dech moés ed moai.

Trinte-troés listes ! Et deus-mile-sis-chint-sèt candidats !

Ureusemint qu'os avons coèr vint jours pour coésir ! Et pour nos déchider à aller voter.

Et chi os étoème inglés ?

Eux, is n'sai'te minme poin chi i vont coèr ête din l'Urope économike din sis moés.

Boinne jornée à tertous.

dimanche 5 mai 2019

Pâke et ches diminches qui suive'te

Ches diminches ed l'église, i n'o qui sont ordinaires, et d'eutes qui ne l'sont mie.

Per eximpe, i o ches diminches ed l'Avent, ches diminches ed Carême, ches diminches aprè Pâke.

Ches diminches ed l'Avent sont avant Noë.

Ches diminches ed Carême sont avant Pâke.

Et ches diminches ed Pâke sont aprè Pâke et s'art'te à l'Pintcoute.

Don, innui, os sonmes un diminche aprè Pâke. Ech troésienme, qu'i péroait.

Et lò, j'o du mau à comprinde : Pâke étoait ech vint-et-un dech moés d'avri, don, ech diminche vint-uit, os étoème, slon mi, ech premier diminche aprè, et innui, os sroème ech deusienme diminche d'aprè.

Adon !?

Adon, ej comprinds mie dò qu'est passé ech premier diminche aprè Pâke, vu qu'i péroait su'ech vint-uit dech moés d'avri étoait ech sgond diminche aprè Pâke, et qu'os pouvons mie dire qu'ech diminche ed Pâke est ch'premier aprè Pâke.

Qu'i sanne.

Merchi à tertous ed m'esplitcher.

Boin diminche (cho os in sonmes seur qu'os sonmes diminche).

vendredi 3 mai 2019

Ech nindicapé

Vu et intindu.

Deus jonnes dvise'te.

I n'o un, quatore ins et grinde djeule, qui dit à l'eute, in causant d'un troésienme jonne qui m'est présint :

- "Li, t'os vu kmint qu'il est ! Ch'est un mondjol."

Mondjol, quanq ech jonne i cause, ch'est mie unne gin d'asie, mais un trisomique.

Mais din l'pièce, i avoait quanq minme un troésienme jonne qui, li, est autisse.

Autisse, mais fin bin aidié pèr ches pérints.

Et chl'autisse, quatore ins, li-étou, o intindu ech méchant galibié causer dech troésienme jonne qui n'est mie présint.

Soin à vos ! Din ch'conte, i  o deus troésienmes jonnes : un qu'est mie lò et qu'est traité ed mondjol, et un qu'est lò et qu'est autisse.

Don, echl'autisse o toute intindu et, vu quoé qu'i vo réponde, n'o mie apprécié. Chin inrager, i dit :

- "Kmint jou eq tu pux dire cho dech jonne eq tu dis qu'il est mondjol ? jou eq tu connoais ed ches nindicapés ? Mi qui su nindicapé, jou qu'ej sanne puss nikdouille eq ti ?"

L'eute, chti qu'o dit ed méchantes coses, i sait pu quoé foaire. Il o arté ed causer et o dvenu tout péteus.

Vlò kmint qu'unne lçon o étè jolimint baillée.

Et rchue.

Boinne jornée.


mercredi 1 mai 2019

Ech beu dech grind kmin

Mimile couroait, et dvoait courir p't'ête coèr un jour o deus.

Chu des voés o chu des keuchies, qu'i dvoait coèr courir.

O des kmins.

Mais ièr, i o unne fanme, qu'o rindu un grind kmin célèbe à Rouinche, in Loère Atlintike, qu'o berzillé s'ligne ed vie.

Nénome, qu'os l'lonmoème.

Conme ches fleurs.

Némone étoait unne fanme qui foaisoait du théïâte et du cinémo.

Ale sannoait régalante, minme chi edpi ièr, j'o apprins qu'ale avoait un sapré caractère.

Mais j'ainmoais bin el vir au cinéma.

Din Ech Grind Kmin, per eximpe, avuc Richard Boringher.

Ch'est défini ; à soéçante-uit ins, ch'est jonne, un mau l'o importée eute pèrt. Pour toudi.

Adé ! Némone, continue tin nouvieu kmin.