Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 31 décembre 2017

Un canoés lit min blog

Ach merrie ed Canes-chu-ches-mers, i n'o un qu'o lu min blog un keup ; au moinss echl'article publié ech vint-et-un déchimbe, intitulé "Ainmer unne fille ed quatore innées".

Ranmintuvoez-vos, o rtornez l'lire.

J'écrivoais qu'os disoème rin quanq un viu ed soéçante-trèse ins, i n'o p't'ête achteure soéçante-quatore,  s'merrioait avuc unne fille ed dis-uit ins. Qui n'o p't'ête , ale, dis-nu achteure.

Eh bin ! Un canoés vint d'interdire pour quèks tans un mèriage inter un viu ed quater-vint ins et unne fanme et trinte-sis ins.

Cartchulez !

Is ont quarante-quat ins ed différinche. Mi, din mn'eximpe, is éroai'te chincante-chonc ins ed différinche .

Ej su ureus ed vir que quoé j'écris est utile et foait avincher ches loés..

J'arte lò pour innui et pour cht'innée ; feut qu'ej voéche fèter cho.

A dman.

Erlusez-vos bin.

samedi 30 décembre 2017

Coésir unne védète ed fotbal

... conme présidint d'un poaiyis, ch'est foaire conme ches anméritchins qui, eux, coési'te, per eximpe,  des védètes ed film, des vindeus ed cacahuètes, des wardeus ed vakes.

Os pouvons nos dminder chi, pour ech poaiyis d'Afrike, ch'est unne boinne cose.

Os pouvons étou nos dminder chi cht'onme o étè élu vu qu'i bailloait des ballons à ches jonnes.

Mais i feut avouer eq ch'est unne canche pour tertous ches gins d'avoèr, pour un premier keup edpi eds innées, pu voter.

Adon, ej souhaite boinne canche à ch'nouvieu présidint.

Qu'étoait un fin boin fotbaleu. Mais achteure, i feut qu'i pense à tout chin poaiyis.

Boinne canche.

vendredi 29 décembre 2017

Canter blanc o noèrt

Eq tu cantes "blanc, ch'est blanc", per eximpe quanq i tchait ches nèges, o bin "noèrt ch'est noèrt", per eximpe ach saison quanq i foait nuit inter dis-sèt eures d'un jour et uit eures dech lindman, tu meurs un jour.

In ivèr, o casi.

jeudi 28 décembre 2017

Adé ch'Guy

T'es ch'premier à qui cho arrive d'ête viré. Pour un intraineu dech l'étchipe ed Frinche ed rugby.

T'es, slon mi, in vrai, mie un méchant, vu eq t'os foait gaingné granmint ed keup echl'étchipe ed Toulouse.

Mais pour echl'étchipe ed Frinche, t'os mie étè aidié.

In premier, per ches jueus, et in scond, per ch'présidint dech rugby. Li, i sanne bin qu'i t'ainmes mie.

Pour mi, j'té l'erdis, t'es un boin.

Achteure, tu vos pouvoèr quèks tans rbéïer ches rincontes à l'télé.

Et p't'ête vir kmint avir unne bèle cueillère ed bo.

Boinne canche à ti.

mercredi 27 décembre 2017

Cho rsanne à du Ken

..., Ken conme Ken Follet, un écriveu galloés qu'o écrit des lives chu ches batisseus ed cathédrales, et chu ch'vintienme sièke.

Ken Follet, quanq il écrit des lives, i foait vive des familles.

Per eximpe, pour ch'vintienme sièke : il o prins des gins nés avant l'première djerre mondiale, pi leus éfants à l'seconde, et leus tiots-éfants din ches innées mile-nu-chint-soéçante-dis et puss.

Et ches gins vive'te din ches Anmérikes, Ingletère, Russie et Allemane, et voéyage'te.

Amon mi étou, ej pourroais foaire des lives conme Ken Follet.

Ej vos esplique.

M'fanme o un frère avuc qui ale o granmint jué et foait des cacouilles din ches innées mile-nu-chint-soéçante-dis.

Achteure, is ont chatchun unne fille qu'o alintour ed vint-chonc ins. I n'o unne qui vo aller vive ach Canada, et l'eute, in Russie.

Ches deus cousines n'pourront pu s'vir.

Et p't'ête eq din trinte ins et puss, deus gins, un russe et unne canadiène, fiu et fille ed ches cousines, s'truveront achl'ONU.

Os in rcauserons chu min blog.

Din trinte ins.

Mais d'ichi-lò, j'éro d'eutes coses à vos conter.

Boinne jornée à tertous.

Et chi os connoaissez mie, lisez ches lives ed Ken Follet.

mardi 26 décembre 2017

Tout seu à Noë

Ech Zèf, min boin lecteu et achteure conmarade, causoait diminche chu chin blog d'un chin fu n'lu qu'avoait gaingné granmint d'euros.

A Noë, des chin fu n'lu tout seu, à l'cour, o des gins tout seu din unne moaison, i in o ieu.

Ch'est seur.

Mi, ech vint-quat au vèpe, j'o rincontré unne vieille fanme et i o dmindé chi ale avoait des gins avuc ale. Au vèpe, o ch'lindamn.

- "Nan !" qu'ale m'o dit.

- "Jou qu'os voulez vnir minger amon m'bèle-mère au vèpe o dman ?" eq j'i o dit.

- "Nan !" qu'ale m'o dit.

Ale vouloait rester seule.

Ej l'o respectée, mais j'o pensé à ale.

Et à ches eutes gins tout seu, o chin fu n'lu.

lundi 25 décembre 2017

Foaire Noë

Innui, ch'est Noë ; os sonmes ech vint-chonc ed déchimbe.

Mais dman, din un moés o din deus-chint-vint-sèt jours, os sro coèr Noê : chi tu sais foaire plaisi à unne gin.

Boin Noë dech vint-chonc déchimbe à tertous.

dimanche 24 décembre 2017

Conte ed Noë

Ech Père Noë vo béto passer
Ej vo foaire ramoner l'kminée
Pour n'mie salir ches bieus abits
Et pour qui n'fuche mie rimpli ed suie.

J'o kmindé ches cadieus
Pour foaire plaisi à tertous ches tiots.
Is attindent aprè cho toute l'innée,
Tiot Papa Noë is vont canter.

Quanq is vont s'déjoutcher ech vint-chonc au matin,
Is iront fin rade vir ach pié dech sapin.
Is dérachront tous ches papiés,
Pour raviser din ches paquets.

Ej sais bin qu'is vont êtes ureus,
Cho pourra s'vir din leus ius !
Pour mi, min momint préféré,
Ch'est quanq is vont vnir m'boaisier.

Is sai'te bin eq ch'est nos qui 'ls'avons kmindés,
Is nos font un calin pour nos rmerchier.
Feudroait eq cho fuche Noë tous les jours,
Mais ches portes-monnaies sront un molet court !

Chi t'os bin comprins quoé eq j'os dit,
Ch'est eq tu restes bin tout pré d'ichi,
Chi t'os rin comprins,
Ch'est eq t'es mie ed min coin !


Conte truvoé per m'fanme. Qu'ej remerchie.

samedi 23 décembre 2017

Ch'is étoai'te nés

Un canteu o, un jour, écrit unne canchon dò qu'i maginoais quoé qu'il éroait foait ch'i sroait né in dis-sèt din unne ville allemande.

Dis-sèt ! Comprindez mile-nu-chint-dis-sèt, et mie deus-mile-dis-sèt.

Innui, mi, ej vux vos causer ed ches gins nés in trinte-sèt. Comprindez achteure mile-nu-chint-trinte-sèt.

Nés quèk pèrt din ch'monde, et don, per eximpe, in Frinche.

Ches gins, chi os cartchulez bin, ont ieu quater-vint ins cht'innée.

Ch'est bieu.

Mais pour cho, feut ête né avant ech vint-quat déchimbe, et ête coèr in vie.

Chin quoé, is ont mie djò ieu leus ages, o bin, n'éront janmoais leus quater-vint ins.

Conme per eximpe min père innui, o min bieu-père i o ieu dis moés.

Mais ej pense toudi à eux.

Bec à leu fanme.

vendredi 22 décembre 2017

A quoé sert l'onme

I o quèks smangnes, j'acoute un jornaleu causer à un onme qui foait des spectakes avuc des kvaus.

- "Ches veganes di'te qu'i feut mie monter chu ches kvaus" qu'i dit ech jornaleu. Acht'onme.

- "Ouais !" qu'i répond l'eute "Mais étou, l'onme n'est mie foait pour ouvrer ; Il est foait uniquemint pour minger et boaisier."

Adon ?!

Quoé qu'is nos di'te adon ches véganes ?

jeudi 21 décembre 2017

Ainmer unne fille ed quatore innées

Ainmer, mie conme un père o unne mère peu'te ainmer leus éfants, nan !, mais ainmer conme un cadoreus.

Un cadoreus qu'o miu ed vint ins !

Jou eq ch'est possibe ?

Ouais ! Mais ch'est interdit.

Feut attinde qu'ale o dis-uit ins, l'fille, et adon, tu pux ête chin cadoreus.

Minme chi t'os soéçante-trèse ins !!!

Ej mé dminde chi tout vo bin.

mercredi 20 décembre 2017

Seuvons ech train

... inter Adville, Ech Tréport et Mérs.

Chu ches trains et ches ches gins qui s'in otchupe'te, os pouvons in écrire et in dire granmint. Vu ech brin eq ch'est.

Mais os avons dzoin ed ches trains. Et ed ches gins qui s'in otchupe'te.

Adon, feut mie laicier frunmer ech voée inter Adville, Ech Tréport et Mérs.

Pour cho, allez tertous prinde ech train-lò dman, ech vint-et-un déchimbe.

Chi t'os ages innui et eq t'es min nveu, cros becs à ti.

mardi 19 décembre 2017

Edman i tchait des nèges

Is le savoai'te, diminche, ches gins qui s'otchupe'te ed ches voées, qu'il alloait tchair des nèges ièr, fin timpe au matin.

Adon !

Pourquoé qu'is sont mie déjoutcher fin timpe au matin pour les nétier, ches voées ?

Ah ! Qué brin eq cho étoait !

Ah ! Ches arlands !

lundi 18 décembre 2017

Jou eq ches bèlés filles sont

... qu'i feut pu s'dminder.

Os savons : is sont din ch'nord.

Sinmdi, ch'est coèr unne fille dech nord, Pas-ed-Calais, qu'o gaingné ech concours ed ches miss ed Frinche.

Ej croés eq l'innée prochaine, i éro eq ches filles dech nord qui participeront.

Mais os avons étou des filles, qui, in gaingnant ièr in sport, sont bèles à vir ; à vir juer..

Félicitations à toutes.

Continuez conme cho.

Et à toutes ches eutes filles, fuchez ureuses.

dimanche 17 décembre 2017

I vo naîte

... is sont morts.

Os comprindez djò dò qu'ej vux in vnir ?!

I vo naîte.

In vrai, os allons béto fèter, conme chake innée, Noë din quèks jours. Ches jonnes et ches gins ont p't'ête oblié, o n'sai'te mie, mais Noë, ch'est feter l'naissinche ed Jésus, i o miu ed deus-mile-ins.

Is sont morts.

Lò, ej vux causer ed ches jonnes qu'étoai'te à l'école din ches Pyrénées. Minme chi, malureusemint, i o étou granmint d'éfants o d'galibiés qui meur'te chake jour din ch'monde.

Tous ches jonnes qui tchit'te l'vie achteure ! Tous ches jonnes à qui ches pèrints avoai'te djò acaté un cadieu ! Vu eq Noë, pour granmint ed gins, vu dire offrir des cadieus.

Chin vouloèr ête mawais, pour mi, tous ches tiots qui sont morts sont morts. N'in causons pu.

Mais i reste leus pèrints. Qui, seuremint, brai'te granmint.

Adon, pensons à eux et prions pour eux.

samedi 16 décembre 2017

Pauves bicycleus

... qu'ont ed l'asthme.

Ch'est un mau qui impêque ches gins qu'in ont ed bin respirer.

Des keups, is peu'te moérir à keuse dech mau lò.

Pour dgérir, o miu vive avuc, feut foaire del trompette, del flute, o du sport.

Mais ch'est quanq minme malaisié pour ches gins asthmatikes.

A vos qu'avez ed l'asthme, ej vos dis qu'i feut mie s'déconforter ; i o des asthmateus qui sont dvenus des champions.

Per eximpe, i n'o deus, in bicyclète, qu'ont gaingné ech Tour-ed-Frinche ; un in mile-nu-chint-quater-vint-quatore, et l'eute in deus-mile-dis-sèt.

Don, asthmateus, wardez l'espoèr.

vendredi 15 décembre 2017

Dò eq'étoai'te ches nèges

Merkerdi, un onme ed chincante-troés ins est tcheu d'un toét et in est mort.

Granmint ed keups, ches gins qui tchai'te d'in heut conme cho meur'te.

Mais merkerdi, cht'onme est tcheu in Savoé.

I éroait ieu ches nèges, vu qu'os sonmes in déchimbe, et in Savoé, i sroait p't'ête mie mort.

Pauve gin. Pauve famille.

Ej pense à eux.

jeudi 14 décembre 2017

Unne fin bèle jornée

Din unne vie, i o quèks jornées qui sont pour ti ches puss bèles, et tu t'in souviens toudi.

Per eximpe, ech jour ò :
- eq t'os rincontré t'fanme o tin onme,
- os os avez mèrié, in principe ch'est unne bèle jornée,
- t'fanme t'onnoche qu'ale attind un papar, ed ti. Chi ch'papar est mie ed ti, il est bin lò à vnir, mais ch'est mie unne boinne nouvèle, don, mie unne boinne jornée.
- tin papar arrive,
- tin papar mèrche un molet,
- tin papar cause un molet,
- un eute papar s'annonche,
- ...  .

I n'o granmint ed fin bèlés jornées avuc eds éfants.

Conme i o étou ed boinnés jornées avuc des frères, des soeurs, des bieus-frères et bèlés-soeurs, des nveus et des nièces.

Et des keups, i t'arrive des coses eq t'avoais reuvé.

Ej vos conte.

Ièr, j'étoais din unne école à attinde des gins quanq unne gin vient m'vir et me dminde chi ej trache quèk cose.

Ej mé rtorne, lé rbée, et lé rconnoais : ch'est unne gin avuc qui j'avoais ouvré troés ins, i o trinte-troés ins.

Et vu eq li et s'fanme restoai'te din m'voée, qu'is étoait d'ems ages, et régalants, os étoème dvenus amis.

Pi j'o cangé d'ouvrage, ed région, ej m'o mèrié, is sont vnus à min mériage, pi os os sonmes perdus ed vue.

Ch'étoait i o vint-troés ins.

Adon ièr, quanq ej l'o rconnu, et eq li étou m'o rconnu, min tcheur o battu granmint, vu eq j'étoais fin ureus.

Achteure, i feudroait qu'ej les rvir, s'fanme et li, et p't'ête leus éfants et tiots-éfants.

Les rvir, bin avant vint ins, bin avant qu'ej meurche.

Ah ! Qu'ej su ureus.

Boinne fète à toutes ches fanmes qui s'lonme'te Odile. Surtoute chi ch'est m'mère.

mercredi 13 décembre 2017

Ech saison ed ches keuchètes

Os sonmes mie in ivèr que djò i rime des keups au matin et qu'i foait mie granmint keud din l'jornée.

Adon, feut mette des keuchètes. A nos piés (ej précise pour ches gins qui n'comprinde'te mie ch'picard o qu'i n'sai'te mie dò mette unne keuchète).

Et mette des keuchètes achteure, cho m'arringe ; cho m'permet étou de n'mie perde min moral.

Boinne jornée.

Chi tu lonmes Lucie, boinne fète à ti.

mardi 12 décembre 2017

Méchante estchuse

L'eute jour, unne fanme avuc qui j'ouve arrive à l'interprinze et nos dit qu'es fille s'o berzillé es kville in glichant chu unne pétale ed rose.

Jou qu'i feut croère cho ?

L'pétale, i péroait qu'ale étoait din chl'appèrtemint del fille et ed ches pèrints.

L'fanme avuc qui j'ouve est régalante.

Mais, os pouvons nos dminder chi ale dit vrai quanq ale dit eq ch'est in glichant chu unne pétale ed rose.

lundi 11 décembre 2017

Ale o du gingin

Noë approche, et conme toutes ches innées, os foaisez des cadieus à ches gins ed vot famille. Et p't'ête à d'eutes. Mi, ej les accepte.

Des cros cadieus, des tiots cadieus, et tous ches cadieus veu'te edl'argint.

Et des keups, edl'argint, os in avez mie granmint.

Ej comprinds adon vot problinme.

Mais ej connaois unne fille, à mi, qu'o ed boinnées idées et qui put vos aidier.

Rbéiez quoé qu'ale foait.




Combin jou eq cho i o coûté, à m'fille ?

Un scalpel. Etpi, i o fallu qu'ale minge du boin camimbert.


Chi t'os ets ages innui, eq t'es m'fille et eq t'os du gingin, fin cros becs à ti.

dimanche 10 décembre 2017

Merchi min Diu

Un jour eq Franchoés d'Achise, edvenu après Saint Franchoés d'Achise, mèrchoait avuc un ed ches conmarades, i disoait, in voéyant eds abes :

- Merchi min Diu, pour ches bieus abes."

Et chin conmarade disoait étou :

- Merchi min Diu, pour ches bieus abes."

Pi, in voéyant deus cadoreus :

- Merchi min Diu, pour ches cadoreus."

Et chin conmarade répétoait étou :

- Merchi min Diu, pour ches cadoreus."

Et coèr, in voéyant des berbis:

- Merchi min Diu, pour ches berbis."

Et chin conmarade, ed dire étou :

- Merchi min Diu, pour ches berbis."

Aprè, Franchoés et chin conmarade s'art'te dsou un abe.

Et un oisieu tchie dsu l'tète ed Franchoés.

Chin conmarade s'dminde quoé qu'i vo dire o foaire.

Et Franchoés d'Achise dit :

- "Merchi min Diu, ed mie avir baillé eds ailes à ches vakes."

vendredi 8 décembre 2017

Ech train ed vint eures

... vint-deus o un rtèrd ed trinte minutes.

Qu'étoait écrit, et annonché, ech lindman, timpe au matin, din unne station.

Et ch'étoait mie unne cacouille.

jeudi 7 décembre 2017

El crosse berlure

... ed ches jornaleus.

Ièr merkerdi, Jean-Flipe Smet, canteu frinchoés célèbe, est mort.

Ch'est seur qu'os in avez intindu causé ièr.

Per eximpe, chu ch'blog dech Zèf, qui li est mie jornaleu, Chti jornal in picard.

Et ch'est cho l'berlure ed ches jornaleus : is ont causé d'cho toute l'jornée. Conme chi i avoait eq cho d'important din ch'monde.

Ch'est seur qu'ech canteu étoait ainmé ed ches frinchoés et qu'il o canté miu ed chincante innées.

Mais ièr étou, ch'présidint ed ches Anmérikes o foait unne annonche qui vo seuremint mette l'fu à un tièrs dech monde. Et p't'ête minme à tout ech monde.

Mais cho, unne cangne ed télé in o causé eq pour définir chin jornal. Deus minutes.

mercredi 6 décembre 2017

Cho m'tue

- "L'vie est bèle, vu qu'os mourrons."

Qu'o dit un onme célèbe.

Qu'est mort ièr.

Et i o des gins qui truvoe'te cho bieu.

Mi, nan.

mardi 5 décembre 2017

Kerver ches pneus

- "Quoé qu'os pourroème foaire au vèpe ?"

- "Kerver des pneus."

- "Nan ! Tu magines ?!"

- "Aisié ! J'in o djò kervé alintour ed sis-mile."

- "Nan !"

- "Ej té l'dis."

Qu'is dvise'te ches deus bordeloés.

Fuchez tranchile. Achteure, ech kerveu o étè arté i o quèks jours.

Et ch'est mie min nveu.

Et in puss, donmage pour min bieu-fiu qui, li, fabrique des pneus.

lundi 4 décembre 2017

Ej vo mie m'erprésinter

Qu'ale o annonché ièr, Mèrtine.

Ureusemint, qu'ej dis, mi.

Conme chi des gins attindoai'te qu'ale s'erprésinte ?!

Vu ches ages.

Qu'ale s'in voéche !

dimanche 3 décembre 2017

Eds effets dech rékeufemint climatike

Minme chi os sonmes in déchimbe, i feut causer dech rekeufemint dech climat.

In vrai, din ch'monde, din ches innées à vnir, i o eds indroéts o des périodes dò qu'i fro ed puss in puss froéd, pèr eximpe, ièr à Strasbourg slon echl'étchipe ed fotbal ed Pèris, et eds indroéts o périodes dò eq cho sro ed puss in puss keud.

Mais os disons qu'i éro rekeufemint climatike.

Mi, ièr, j'o constaté un effet dech rekeufemint : echt'innée, Noë étoait ech deus déchimbe !

Amon mi.

Cho foait granmint ed cangemints.

Pèr eximpe, innui, ech premier diminche ed l'avent est, pour mi et m'famille, ech premier diminche ed l'aprè.

Mais din quat smangnes, em fanme, ems éfants et mi, os irons, pour ches vagances, din d'eutes régions ed Frinche dò eq Noé est toudi ech vint-chonc déchimbe. A keuse dech climat.

Echl'avintage à tout cho, ch'est pour ech Père Noë qu'i put étaler ches livraisons chu granmint ed jours.

Chi os avez mie ieu vot Noë ièr, adon, d'avinche, boin Noë à tertous.

Et chi os avez vos ages innui, cros bec à vos.

samedi 2 décembre 2017

Is vont canger ech Not Père

A pèrtir dech troés déchimbe, i o unne phrase del prière qu'est ch'Not Père qui vo canger.

Pourquoé  ? J'in sais rin.

Mais mi qui récite l'prière casi tous les jours, j'o mie étè consulté.

Bieu eximpe ed démocratie.

Ch'est vrai étou que catholike, ch'est mie un pèrti politike.

D'avinche, passez ed boinnés fètes ed Noë.

Mi, cho m'indige.

vendredi 1 décembre 2017

Ech tatouéache vo t'tuer

Incroéyabe, mais vrai.

Un jonne, alintour ed trinte ins, vo p't'ête moérir vu qu'i s'est foait tatouer.

Os allez m'dire qu'os avez janmoais intindu causer ed cho.

Eh bin ! Ch'est pour cho qu'ej su lò : pour vos informer.

Ech jonne, qui reste à quèks kilomètes d'amon mi, o chin corps qui o incorsé echl'incre dech tatouache, conme un buveu incorse du vin.

Et dò qu'ale est echl'incre ? Din ch'sanke decht'onme.

Achteure eq j'écris, ech jonne est mie mort, mais il est din un méchant état, et ch'est casi conme chi il étoait mort.

Adon, prudinche à tertous.


Chi t'os ets ages innui mais eq t'ouves mie avuc mi, fin cros bec à ti.

Dicton dech jour : à l'St Eloé, ch'est boin quanq i foait froéd.

jeudi 30 novembre 2017

Bin vive à chint ins

L'eute jour, j'o intindu à l'radio unne fanme dech nord qui vient d'avir ches ages : chint ins.

Et ale ouve toudi ! Ale tient un bistrot edpi mile-nu-chint-chincante-deus, et l'ouvre tous les jours.

A pèrt, achteure, quanq unne conmarade i propose d'aller in vadrouille. Quanq ch'est conme cho, ale frunme in mettant chin ridieu drière echl'uis.

- " I o des gins, is nai'te fatigués. Mi, ej su bin et j'mé plains mie." Qu'ale dit, l'vieille.

Quanq ech jornaleu i dminde chi i o des gins abitués à vnir din chin bistrot, ale i répond :
- "Nan ! J'les intère tertous."

mercredi 29 novembre 2017

Noë et ches morts

Os avez vu ch'est darain film animé pour ches fètes ed Noë ?!

Ch'est un tiot éfant qui jue del musike et qui vo, chin l'vouloèr, ach poaiyis ed ches morts.

A Noë, qu'is nos présint'te cho !

Mi, cho m'surprint granmint.

Ej pux minme vos dire eq cho m'déchut un cros molet.

Ech monde est bin assez trisse pour qu'os causons ed ches morts à Noë. Et surtoute pour ches éfants.

mardi 28 novembre 2017

Et ch'glyphosète

... qu'os vos dmindez, quoé qu'i feut in penser ?

Ièr, l'Urope o déchidé del maintnir coèr chonc ins.

Chonc ins ! Minme chi i péroait qu'ech glyphosète est canchérigène !

- "I n'o qu'is di'te eq ch'est mie canchérigène" eq disoait un jonne agritchulteu, ièr, à un jornaleu.

- "I feut eq ches scieintifiques trache'te. Nos, os pouvons mie foaire eutremint." qu'i disoait coèr, avuc un acchint qu'os éroème dit qu'i causoait in s'pinsant chin nez  pour n'mie ête erconnu, vu qu'i causoait conme un nasu.

Puss nikdouille qu'unne vake blanke,
Puss mawais qu'un tchyin allemind,
Puss arland qu'unne gin à joke.

Qu'il est.

Ureusemint eq ches jonnes agritchuteus qui pense'te conme viusi'te et meur'te un jour. Et des keups, os avons l'canche qu'is n'peuche'te mie avoèr ieu ed papar.

Mais in attindant, is font du mau.

Ches pauves agritchulteus qui font ed l'agritchulture biologique, ej mé dminde kmint qu'is font, eux.

Mais is i arrivent. Surtoute vu qu'is ouve'te granmint.

lundi 27 novembre 2017

El boinne nouvèle dech lindi

J'o traché, et j'in o truvoé unne, ed boinne nouvèle : I vo tchair des nèges.

Ah ! Qu'ej su ureus quanq l'ivèr arrive et qu'ej voés ches nèges tchair.

In espérant qu'is tienche'te pèr tère quèks jours, smangnes o moés.

Conme eutés nouvèles, i o qu'ech verdi noèrt est défini, qu'ej su ureus d'aller ouvrer innui, eq l'étchipe ed rugby ed Toulouse o gaingné et qu'ech gaingnage ed novimbe vo arriver.

Mais la boinne, ch'est ch'retour ed ches nèges.

Fuchez prudints chu ches ches voées.

dimanche 26 novembre 2017

Acater eds uîtes

Noé et l'ivèr approche'te. Et ch'est l'saison pour acater et minger eds uîtes. Ches boinnés uîtes ed Bretanne.

Sinmdi, j'in o acaté.

Surtoute pour foaire plaisi à m'fanme.

Ches uîtes, ch'est du brin pour els ouvrir.

Etpi des keups, i n'o unne qu'est mie boinne et qui vo t'bailler du mau à t'panche.

Don, sinmdi, j'o ouvert ches uîtes.

Et is étoai'te fin boins à minger.

Adon, quanq m'fanme s'o mise à braire, j'o mie comprins. Ale sannoait malureuse.

Cho rsanne surtoute à del déprime. Et cho, ch'est un vrai brin.

Boinne jornée à tertous.

samedi 25 novembre 2017

Os sonmes tertous frères

... et soeurs.

Ej croés qu'ej l'o djò écrit un jour.

Os pouvons ête catholikes, ainmer ches catholikes, mais étou ainmer ches eutes.

In vrai, ch'est mie vu qu'os sonmes d'unne religion qu'os dvons n'mie ainmer ches eutes religions.

Et ch'est mie vu qu'os sonmes sinmdi qu'os n'pouvons mie prier.

Adon innui, ej voudroais prier pour tous ches musulmins qui sont morts ièr in Egypte, et pour leus familles.

Chin oblier ed souhaiter unne boinne fete à toutes ches Catherines.

vendredi 24 novembre 2017

Ech verdi noèrt

Tertout o intindu causé dech verdi noèrt. Qui nos vient ed ches anmérikes et qui o kminché edpi merkerdi.

Ch'est innui, ech vrai verdi noèrt.

Ej pense eq ch'est noèrt, vu qu'os sonmes des nikdouilles qu'acatons granmint vu qu'os nos disons eq ches coses veu'te mie granmint.

Mais qu'os in avons mie dzoin!

I o étou ches judi noèrts.

Ech puss célèbe, ch'est chti d'octobe mile-nu-chint-vint-nu. Coèr un keup à ches anmérikes.

Un eute judi noèrt, ch'étoait ièr.

Pour mi, din ch'train.

Magine !

Ej prinds un train qui doét foaire Pèris Sin Kintin, ej monte din un train qui doét foaire Pèris Sin-Kintin, et quanq ech train est pèrti, qu'os sonmes au vèpe et qu'i foait noèrt à l'cour, ech contrôleu m'dit qu'ech train vo à Lile, n'passe mie à Sin-Kintin et don n's'artero mie à Sin-Kintin.

Qué brin !

Os étoème miu ed chonc à avir ch'problinme, mais pour ch'contrôleu, ch''est nos qu'avoème mie acouté.

Qué brin, ches Kmins-ed-fèr !

jeudi 23 novembre 2017

Ches jonnes ed trinte-deus ins

Is sont jonnes, minme chi cho kminche à foaire granmint d'innées qui ont né et qui kminche'te, des keups, à avir eds éfants.

Mais edpi merdi, is sai'te eq ch'est béto Noë, vu eq ches Restos-dech-tcheur vien'te d'ouvrir.

Edpi qu'is sont tiots, is ont toudi vu ches Restos ouvrir avant Noë. Et avant l'ivèr.

Is croé'te eq ches Restos-dech-tcheur ont toudi existé.

Et is sont ureus, vu qu'is vont pouvoèr acouter ches infoérés. Conme tous ches ins edpi qu'is ont né.

Din quèks moés, quanq ches Restos arteront, ches jonnes séront eq ch'est adon l'ernouvieu. Conme tous ches ins.

Pour ches jonnes ed moinss ed trinte-deus ins, ches Restos-dech-tcheur et ches infoérés font pèrti del vie.

Pauves jonnes !

Pauves gins !

mercredi 22 novembre 2017

Méchant lindi

... pour Lile.

Mais boin pour Anmyin.

J'esplique.

Lindi, après-nonne, l'ville ed Lile n'o mie étè coésie pour edvenir Aginche Uropéene ed ches drogues.

Et pour Martine, ch'est à keuse ed not présidint. Qu'est picard, qu'i feut l'rappeler.

Et au vèpe, l'étchipe ed fotbal ed Lile o perdu. In juant face à l'étchipe d'Anmyin.

Déchidémint ! Martine o ieu unne méchante journée.

Mais au moinss, ches jornaleus ont causé d'ale. Et cho, ale ainme.

mardi 21 novembre 2017

In quat eures

Quat eures, ch'est ech tans qu'i feut pour aller ed Pèris à Moscou, o ed Moscou à Krasnoyarch. Qu'i m'sanne.

Ch'est étou ech tans qu'i feut pour tchuire un boin pot-à-fu.

Mais quat eures, ch'est étou ech tans qu'il o fallu à un photographe, anméritchin,  pour foaire une photo ed not présidint pour unne gasète. Anméritchiène, l'gasète.

Quat eures !

- "Falloait préparer!" Qu'o dit un jornaleu.

Magine !

Tu prinds unne gin qui foait conmme Léonerd-ed-Vinci, rataïon, p't'ête, del société dech nom-lò, et i t'foait p't'ête cho avuc del peinture in moinss ed tans qu'ech photographe.

Et ch'est seuremint puss bieu.

Pi mi, jé m'dis qu'un présidint qui put attinde quat eures dvant un appareil photo, cho put vouloèr dire qu'i n'o rin à foaire.

Adon qu'il o granmint ed coses à foaire pour canger not poaiyis.

Allez, présidint ! Feut aller ouvrer.

Bec à tertous.

lundi 20 novembre 2017

Feut qu'os allonche

... à Lyon.

Sinmdi, os invitons eds amis qu'ont leu moaison qu'o asi i o alintour d'un moés. Mie ed canche pour eux !

Quoé qu'is nos di'te ?! Qu'is doé'te prinde ech train pour aller à Lyon vir eds écoles pour leu fiu din un in.

Min ziu ! A mi, feut mie conter ed cacouille.

Ej su seur qu'is ont allé à ch'congrès dech nouvieu pèrti politike dech présidint.

Qué malur ! In puss eq leu moaison o asi, ches tans leu sont tcheus chu leu tète.

Ch'est mie bin ed mintir. Surtoute à eds amis. Et surtoute étou quanq os s'disons chrétiens.

Chi t'es m'bèle-soeur et eq t'os ets ages innui, cros bec à ti. Et à t'famille.

dimanche 19 novembre 2017

Annonche d'un mèriage

I o deus jours, j'o erchu unne invitation pour un mèriage.

I s'agit ed deus cadoreus qui s'mèrie'te, mie vu qu'is s'ainme'te et vu'te s'mèrier, mais vu qu'is s'ainme'te et eq cho leu baille eds avintages.

Jou eq j'o dzoin d'i aller ?

Feut qu'ej buse un molet.

Un cros molet.

samedi 18 novembre 2017

Fuche ech binvnu

- "Bojour min conmarade ! Cho m'foait granmint plaisi ed te vir et eq tu vienches minger amon mi avuc t'fanme et ets éfants.

...

Ej té rappèle eq tu m'doéches douse millon d'euros.

...

Et chonc millons à min voésin.

...

Boin accion à ti."

vendredi 17 novembre 2017

Balonche tin porcheu

Edpi quèks jours, os avez seuremint intindi dviser ed ches onmes qui éroai'te foaits du hérchelemint sescuel.

Et ch'code, pour les dénoncher, ch'est "balonche tin porcheu".

Mi, j'appreuve. Un molet.

J'ainmeroais étou qu'on balonche es truie.

Vu qu'i m'sanne qu'i in o.

Seur qu'os arrivons in ivèr, mais in étè, quanq i foait keud, i o des filles et des fanmes qui sont vêtues pour foaire grimper ches nénéphants à ches ridieus.

Et des keups, minme in ivèr, eq ches nénéphants grimperoai'te à ches ridieus.

Et aprè...


jeudi 16 novembre 2017

Echl'ami Bidasse

Quanq j'o pèrti avuc m'classe
Pour vnir ichi foaire mes troés ins
Ch'cousin m'o dit : "I o ch'fiu Bidasse
Qui vo din ch'minme régimint,
Tu dvros foaire s'connaichince."
J'o foait conme avoait dit ch'cousin
Et edpi qu'ej sersl'Frinche
Bidasse est min meilleu conmarade.
Quanq os avons mie ed punition,
Os avons chatchun not permission

Avuc chl'ami Bidasse
Os nos tchittons janmoais
Attindu qu'os sonmes
Tous deus né-naïus d'Aro,
Chef-lieu dech Pas-ed-Calais
Os avons chatchun l'siène
Et ches bros ballants
Dvant ches monumints
Din ches rues os nos promnons
Cho nos foait passer ches tans
Surtoute qu'os avons eds bieus vêtemints! (conmintères causés)


Ch'diminche au matin i o des bobonnes
Qu'is vont foaire leu mèrché
Nos, os in connoaissons deus bélottes
Et os allons les rbéïer passer
Pendint qu'is sont amon l'fruitière
Edpi l'eute trottoèr os les rbéïons
Pi ed loin chin qu'os i rsanne
Os les suivons justch'à leu moaison.
Is déméfie'te mie, is i voé'te rin
Cho foait conme cho... os s'erlusons bin

Avuc chl'ami Bidasse
Os nos tchittons janmoais
Attindu qu'os sonmes
Tous deus né-naïus d'Aro,
Chef-lieu dech Pas-ed-Calais
Os avons chatchun l'siène
Et quanq is sont din
Leu appèrtemint
Os rbéïons ches pèrsiènes
Cho nos foait passer ches tans
Surtoute qu'os avons eds bieus vêtemints! (conmintères causés)

Os allons souvint vir ches djorilles
Ach Gardin ed ches Plantes, ch'est tchurieus
Dvant l'cage ach cocodrille
Os allons passer unne eure o deus
Dvant ches singes qui font l'gringne
Pour sûr os avons ed boins monmints
Justch'a s'qu'ech warde passe
Qui crie : os frunmons ! ... Allez-vos in...
Avuc un acchint dech Berry ! (conmintères causés)
Et conme os pouvons mie rester lò
Os disons .. Tu viens ? ... et os s'in allons...

Avuc chl'ami Bidasse
Os nos tchittons janmoais
Attindu qu'os sonmes
Tous deus né-naïus d'Aro,
Chef-lieu dech Pas-ed-Calais
Et un jour din not vie
Os dirons souvint
(causé) "Vrai... ach régimint, jou eq tu tu t'ranmintuvoes, Bidasse ?
Os avons foait eds orgies... os avons bin passé ches tans.


Chi granmint permi vos connoaissez Fernindel qui cante ech canchon-lò, ej vos conseille d'acouter étou Fernind Raynaud.

Boinne jornée.

mercredi 15 novembre 2017

Tcheue ed punme

... et noéyeu ed chérise.

Granmint ed gins maque'te des chukes casi toute l'jornée.

Et des keups minme, is maque'te ches célèbes chukes anméritchins connus in Frinche edpi l'sgonde djère mondiale. Pour ches jonnes, ej rappéle eq cho fut inter mile-nu-chint trinte-nu et mile-nu-chint-quarnet-chonc. Pan din leu dints.

Os l'savez p't'ête, mais matcher ches chukes anméritchins, et ches eutes, ch'est mie boin pour l'santé.

Adon mi, j'o invinté quèk cose qu'os pouvez matcher chin dinger. Et cho veut casi rin.

J'esplique.

Os acatez des punmes eq vos mingez, et vos wardez ches tcheues, quanq i in o.

Aprè, os matchez douchemint l'tcheue. Os in foaisez des tiots fils qu'os pouvez laicier sétchir, per eximpe, din unne poke ed vot maronne. Casi inusabe.

Os pouvez étou, achl'ernouvieu, acater des chérises, les minger, et warder ches noéyeus. Lò, i n'o toudi un.

Minme cose eq pour ches tcheues ed punmes : os wardez ches noéyeus. Os pouvez aprè, conme pour ches tcheues ed punmes, laicier sétchir ches noéyeus din unne poke o dsu un meube.

Ches tcheues ed punme et ches noéyeus rsanne'te, slon mi, à ches chukes. Mais sont chin dinger.

A moinss ed les incorser.

mardi 14 novembre 2017

Tertout pense

... eq souvint, ches interprinzes allemindes acat'te eds interprinzes frinchoéses.

Eh bin nan ! I o puss d'interprinzes frinchoéses qu'acat'te d'interprinzes allemindes eq l'inverse.

Qu'is ont dit ièr, ches jornaleus.

Fuchons fièrs ed cho.

Mi, ej profite del boinne nouvèle pour dire qu'au vèpe, alintour ed vint-deus eures chincante, os pourroème p't'ête déchider d'acater unne étchipe ed fotbal.

lundi 13 novembre 2017

Minger du pan foait crossir

Adon, quanq t'artes ed minger du pan, tu perds des tchilos.

Et cho sanne vrai ; mi, per eximpe, j'o perdu miu ed deus tchilos in troés jours.

Feut qu'ej raisonne in pourchintage. Chin quoé, din moinss ed deus moés, ej su mort.

O bin, feut qu'ej minge un molet ed pan.

Boinne jornée.

dimanche 12 novembre 2017

Vive à Irkoutch

... quanq t'es russe, ch'est possibe.

I vive quanq t'es frinchoés, ch'est fin régalant, vu eq ch'est unne fin bèle ville.




Mais i sanne qui vive quanq t'es breton, chi os pouvons écrire eq ches bretons sont mie vraimint des frinchoés, et chi os pouvons étou écrire eq ches nintoés sont bretons, quoé eq cho fuche mie unne évidinche, put poser des problinmes.

Ch'est granmint malureus d'apprinde cho.

Mi, j'avoais ainmé gramint chte ville.

Prions pour eq tertout put vive libe lò dò qu'i vut.

Boin diminche à vos.

samedi 11 novembre 2017

Prinde des ristches

Os l'savez, i o des photos qu'os  foaisons quanq os sonmes in vagances o in famille.

Etpi, i o des photos eq des gins conme mi vu'te foaire pour foaire ed bèlés photos.

L'eute jour, din ch'train, pèr eximpe, vu eq j'o toudi min appareil avuc mi, j'o voulu in foaire unne, disons, un molet osée, in noèr et blanc vu ech boin solé qu'i avoait.

Ej l'o foaite.

Conme à chake keup, ej m'arringe pour qu'os rconnoaissonche mie ech gins.

Lò, j'avoais keupé l'tète del fille.

Mais l'photo pouvoait ête miu. Don, j'alloais in rpinde unne eute.

Et d'un keup, ej m'o su sinti in dinger ! Ej su mie connu conme étant un artisse ed photo.

Adon, j'o mie foait ech deusienme photo. Et j'o minme supprimé l'première eq j'avoais foaite.

Os vos disez eq j'o ieu l'freusse ! Os avez raison.

Mais ej vo continuer à vouloèr foaire ed bèlés photos. Minme osées.

Avuc moinss ed ristches prins.

vendredi 10 novembre 2017

Il o uit ins

Ièr, unne fanme avuc qui j'ouvroais est morte.

Unne jonne fanme, ed quarante-sis ins.

Et qu'avoait un tiot galibié ed uit ins.

Pauve tiot !

S'mère, cho foaisoait sèt ins qu'ale avoait un sapré mau ; un mau conme granmint ed gins ont du mau à ch'in rmette.

Os avez cartchulé ! Ech tiot o né un in avant qu'es mère euche hapé chin mau.

Prions. Pour ale, mais surtoute pour chin onme et chin tiot.

Merchi.

jeudi 9 novembre 2017

Ches dmis, ches tièrs et ches quèrts

Ej vo coèr vos causer ed ches kmints ed Saint-Jacques-ed-Compostelle qu'ej viens ed foaire avuc quat corageus qui sont m'fanme, min bieu-frère, s'fanbme et leu darain fiu.

Et d'unne cacouille eq j'o foait à d'eutes gins eq j'o rincontrés un jour au vèpe.

Ej leu o dit :
- "Ièr, j'étoais à deus-tièrs, in nombe ed jour, ed min voèyage. Innui au vèpe, ej su à troés-quèrts ed min voéyage. Jou qu'edman au vèpe, ej sro à quat-chonquienme ed min voéyage ?"

Is ont busé.

Et vous étou, os pouvez buser et cartchuler.

Boinne jornée.




mercredi 8 novembre 2017

Keuper ches ongues

Lò dò eq j'ouve, os avons unne salle pour bir des jus, et minger à nonne.

I o quèks smangnes, unne fanme avuc qui os ouvrons o vnu et s'o mise à s'keuper ches ongues. Qui, ureusemint, tchaisoai'te pèr tère.

Quanq tu voés cho, tu té dmindes quoé qu'ale o din s'tète.

Mais ureusemint étou pour nos qu'étoème lò, ch'étoait ches ongues ed mans qu'ale keupoait. Et mie ches ongues ed ches orteus ed ches piés.

Boin accion à tertous.

mardi 7 novembre 2017

Un rétus tiot-fiu

I o alintour ed tchinze jours, m'fanme et mi avons prins un avion.

Et in atindant qu'echl'avion vienche, os avons vu deus vius, un onme et unne fanme alintour ed soéçante-sis ins, qui mingeoai'te avuc leu tiot-fiu. Li avoait alintour ed sèt à dis ins.

In atindant, eux étou, ed prinde un avion.

Ej leu dis :
- "Bojour ! Os prindez l'avion ? Os in avez del canche d'avir un tiot-fiu qui vos poéye un voéyage."

Is m'ont répondu :
- "Et ouais ! Merchi."

J'ainme foaire des cacouilles conme cho.

Boinne jornée.

lundi 6 novembre 2017

Ech so ed trèse tchilos

Quanq os pèrtons in voéyage, i feut un so o unne valise pour ches vetemints.

Mi, ej prinds un so.

Chu ech kmint ed Saint-Jacques-ed-Compostelle, min so pzoait alintour ed trèse tchilos.

Adon, ej vos dminde, à vos, lecteus, chi, quanq j'o mèrché troés-chint-vint kilomètes, cho vut dire eq j'o porté :
- quarante grammes et quèks pèr kilomète,
- quat-mile-chint-soéçante tchilos in toute,
- trèse tchilos et pi ch'est toute ?

Merchi d'avinche pour vos réponses.

Rin à vir avuc ech so, mais j'o perdu deus tchilos.

Boinne jornée à tertous.

dimanche 5 novembre 2017

Vive in Bastchie

Ej lonme Bastchie, per invie, ech poaiyis ed ches baskes.

La Bastchie, ch'est fin bieu.

Mais vive in Bastchie quanq t'es mie baske, ch'est mie évidint ; ches baskes sont fièrs ed leu région et d'ête baske. Is dvise'te in espanol et in molet in inglés, mais surtoute, in baske.

Et tu sais eq t'es in Bastchie, quanq tu voés leu drapieu à leus fernètes et eq ch'est écrit chu leus murs : "N'obliez-mie : os êtes mie in Espane, mie in Frinche, mais in Bastchie."

Mi, j'étoais in Bastchie in octobe. Per eximpe, ech verdi vint-sèt octobe, quanq ches catalins is ont dit qu'is étoai'te indépindints.

Ej pux vos dire eq tous ches gins rbéïoai'te unne télévision. Et qu'i feut éviter ed foaire del politike.

Troés jours aprè, j'o causé avuc un baske. Eq chin onke o foait del prison. Ch'étoait, echt'onme avuc qui j'o causé, unne gin fin régalante. Malureusemint pour li, un ôtel, à Sintonia, in Cantabrie, n'o mie voulu ed li. Vu qu'il étoait baske !

Ah ! L'Espane !

Prions pour eux.

jeudi 2 novembre 2017

lundi 30 octobre 2017

Dò-jou qu'is sont passés

I o miu ed sis ins, quanq os avons kminché à mèrcher chu ches kmints ed Saint-Jacques-ed-Compostelle, os étoème miu ed vint gins del famille d'em fanme.

Ches vius ont viusi, et ont du mau à mèrcher vint kilomètes et puss.

Ches tiots ont étou viusi et ont, o bin unne boinne amie o un boin conmarade, o bin eds études à foaire, o bin ches deus, o bin coèr, achteure, un ouvrage.

Adon, cht'innée, os n'sonmes eq chonc del famille à mèrcher. In Espane. Trèse jours.

Innui, os sonmes alintour ed Portugalete. Atincion ! Portugalete ed din ch'nord edl'Espane ; mie ach Portudjal.

Os avons djò foait miu ed  chin-soéçante-dis kilomètes ; os pouvons dire eq nos piés vont bin, minme chi...

Et os sonmes ureus. Ch'est fin bieu.

A béto ! In Frinche. Et p't'ête pour des photos.

samedi 28 octobre 2017

Passer vint eures à Bèrcelone

L'eute jour, jé dvisoais chu ches avions inter Bordieux et Lyon qui s'art'te dis-uit eures à Strasbourg.

Minme chi chl'Alsace est bèle, feut avir du tans à perde qu'ed prinde ches avions-lò. Feudrez vir chi is ont granmint ed gins qui les prinde'te !

Fidjurez-vos eq din l'eute sins, i o des aginches qui vos propose'te quèks avions qui s'art'te vint eures. A Bèrcelone.

Et pèr ches tans qu'i o, malaisié, minme in vint eures, ed visiter l'ville.

Merchi internénet.

mardi 24 octobre 2017

Aller fin rade

...in prindant chin tans.

Os voulez voéyager fin rade, mais étou prinde vot'tans ?!

Adon, foaisez un voéyage inter Bordieux et Lyon in avion.

I o granmint eds avions qui met'te unne eure et chonc o sis minutes.

Mais pour vos, i o quèks avions, eq vos propose internénet, avuc daraine minute per eximpe, qui met'te vint-deus eures et quèks.

Pour cho, vos pèrtez pour Strasbourg, vos attindez adon dis-uit eures, et vos rprindez un avion pour Lyon.

Internénet, ch'est vraimint bin et bieu.

Et cho put nos foaire rire.

dimanche 22 octobre 2017

J'o rincontré un tchuré

- "Ech tchuré, ch'est echt'onme qui m'o merrié, io miu ed vint ins."

Qu'i m'dit echt'onme.

- "J'o causé avuc li miu d'unne eure. Et cho m'o foait granmint ed bin."

Qu'i m'dit echt'onme qui n'o pu mie ches piés din unne église edpi eds innées.

Jou eq cho cangero ?

samedi 21 octobre 2017

Ed quoé qu'est mort Pablo

Pablo Neruda.

Edpi granmint eds innées, mile-nu-chint-soéçante-trèse, tertout sait, o pense, eq Pablo Neruda est mort d'un cancer.

Eh bin ! Fidjurez-vos qu'i o, achteure, des gins qui vu'te savoèr chi ho sroait mie Pinochet, ech dictature, qui l'éroait foait tuer.

Ej vos dminde : mettons qu'ho fuche bin un meurte commis pèr Pinochet, allons-nos l'juger adon eq li-étou il est mort ?

Et qu'os savons tertous eq ch'étoait un dictature.

Cho, ch'est seur.

jeudi 19 octobre 2017

Unne mouke met ch'brin

L'eute jour, au vèpe, j'o rbéïoais ches trains qu'alloai'te arriver din unne station, quanq unne mouke o vnue mette chin brin.


Qué brin !

mercredi 18 octobre 2017

Aidons ches jotcheus

Ech gouvernemint, conme ches eutes l'ont étou voulu avant li, vut éviter qu'i o des gins à joke.

Pour cho, il utilise granmint d'argint pour eq ches interprinzes prinde'te, pèr eximpe, ches jonnes.

Ech problinme, ch'est eq ches interprinzes vu'te au moinss des jonnes qu'ont ech baccalauréat..

Et din des villes, i o granmint ed jonnes à joke qu'ont mie ieu ech baccalauréat.

Et ch'est pour cho qu'ej vos écris innui. Ej sais qu'ech présidint est picard, qu'i lit min blog et qu'i vo ête ureus d'em idée.

Pour eq ches jonnes chin baccalauréat truvoe'te à ouvrer, baillons leu ech baccalauréat ; ches interprinzes sront bin obligées ed les foaire ouvrer.

mardi 17 octobre 2017

Ches tans gannes

Tertout sait qu'i o du sabe chu ches bords ed ches mers.

Du sabe, ganne.

Eh bin ! Seuchez qu'i put étou i avoèr du sabe din ches tans.

Conme, i pèroait, edpi quèks jours in Bretanne.

Et dech keup lo, ches tans sont gannes.

Ech sabe din ches tans, ch'est mie des galibiés qui l'rue'te ; ches galibiés sont à l'école. Ch'est ech vint qui importe ch'sabe, d'Afrike, avuc li.

Conme diraoit l'eute, ches tans cange'te.

lundi 16 octobre 2017

Unne boinne assurinche-vie

Sinmdi au matin, din min gardin, i avoait des champignons. Qu'ej connoaissoais mie.

Don, ej pouvaois mie drie chi os pourroème les minger à nonne.

Adon, j'in tcheuille et vo vir un apotitchère.

- "Bojour, Msieur*", eq j'i dis, "j'o acaté ièr unne assurinche-vie pour m'fanme, chi ale vnoait à moérir. Ej voudroais savoèr chi ej pux i bailler cho à minger, chin vos ekminder, vu eq j'ainme bin acater quèk cose qu'i m'serche ?"

Echt'onme mé rbée granmint surprins. I buse un molet et m'dit :

- "Ej su mie un spécialisse, mais i m'sanne eq nan, i feudroait miu n'mie les minger. Et il les o rués."

Jou qu'i connaoissoais m'fanme o qu'il o ieu l'freusse d'ête atchusé ?

Nos, os avons mingé des punmes-ed-tère et del vianne d'ainnieu.

Et conme diroait Bébert Echcadoreus, eq ches jonnes ed moinss ed quarante ins n'sai'te poin qu'il o existé, ech lindman au matin, m'fanme étoait toudi in vie

Boinne jornée.

Et fuchez prudint avuc ches champignons.

* in vrai, ch'étoait unne fanme, mais ej vos écris eq ch'est un onme pour qu'os l'erconnaissèche mie.

dimanche 15 octobre 2017

Frunme ets ius

..., foais silinche, et pense.

Pense à tin frère qui n'ouve pu edpi eds innées et souhaite qu'i truvoe infin quèk cose,

Pense à ches galibiés qui vont à l'école, in espérant qu'is arrive'te un jour à avir un diplôme, et un ouvrage,

Pense à l'fille o acht'onme eq tu connoais et qu'ont un sapré mau, et souhaite leu ed djérir,

Pense à ches gins qui sont tout seu, et espère qu'is euche'te unne visite o unne invitation innui, pèr eximpe,

Pense à ches jonnes ed tchinze ins qui vu'te foaire l'anmour, et espère qu'is vont attinde coèr quèks moés o innées,

Pense à ches pèrints ed ches jonnes ed tchinze ins qu'is vu'te foaire l'anmour, et souhaite leus d'avir ches boins mots à dire à leus éfants,

Pense à ches gins qui s'ont berzillé un bros, unne gambe, qui sont achl'ôpital, et souhaite ed djérir,

Pense à ches gins eq t'ainme, in espérant les vir coèr granmint ed tans, et in espérant étou qu'is continuche'te d'ête in boinne santé et ureus,

Pense à ches jonnes avuc qui t'ouves et qui sont mie eds arlands, in souhaitant qu'i fuche toudi régalant d'ouvrer et ed causer avuc eux,

Pense à ches cros nikdouilles qui nos gouverne'te din ch'monde, et espère qu'is vont canger.

Pense à tout cho, et adon, t'éros prié.

Boin diminche.


samedi 14 octobre 2017

Il o foait miu

... qu'cht'onme dechl'article ed Zèf qu'avoait un bieu numéro ed chirke.

Pour ches gins qui n'connoai'te mie, ch'est din ch'blog "chti jornal in picard", echl'article dech merkerdi onze octobe. Allez vir ! J'o mis un lien chu l'gueuche ed min blog.

Ch'est ed min bieu-fiu qu'ej vo vos causer, achteure.

Verdi, avant d'aller ouvrer, vu qu'il ouve ed tans in tans aprè-nonne, il o étè foaire del bicyclète avuc un boin conmorade à li, din ches bos et ches tiotés montaingnes alintour d'amon li.

D'un keup, i voét unne tiote boche et un treu drière.

Chin conmorade s'arte, pèr freusse. P't'ête ?!

Min bieu-fiu, li, il o du corage, adon il ose sauter pèr dsu ech treu. Tout du contraire decht'onme dech'article ed Zèf.

Il éroait miu foait d'acouter chin conmorade.

Il o berzillé s'fin boinne bicyclète, et surtoute, chin tcheude.

Sapré bieu-fiu ! Je n'sais mie qui qu'i vouloait épater, mais i m'o foait rire (feut mie i dire). Et os in rcauserons granmint ed tans.

Pensez à li et m'fille. Mais ej vos rassure, min bieu-fiu put coèr lver l'eute tcheude.

Becs à tertous.

vendredi 13 octobre 2017

Ale dormoait bin

Din ch'train.

Ièr, din ch'train, unne fanme dormoait. Cho arrive granmint eq des gins dorme'te din ch'train.

D'un keup, ale ouve ches ius, rprind chin cros so et attind, assise chu l'sélète.

Sitôt, ale s'rindort.

Deus minutes aprè, os arrivons din unne station. Ale dort toudi.

Ej lo rinville in dmindant chi ch'est à Advile qu'ale deschind.

Ale m'dit ouais.

- "Adon", eq j'i dis, "os i sonmes, à Advile".

Et ale deschind fin rade.

Jour eq canche pour ale. Mais ièr, os étoème mie un verdi trèse.

Boinne jornée à tertous.

jeudi 12 octobre 2017

Feut du corage

S"assir, ed tans in tans, cho foait du bin.

Mais des keups, feut granmint ed corage.


mercredi 11 octobre 2017

Echl'inclave picarde

Ch'est nouvieu : os allons avir unne inclave picarde.

Conme ches papes ont, eux, unne inclave din ech dépèrtemint del Drôme.

Don, ches picards vont avir unne nouvèle tère. Au mitan del Neurmindie.

Kmint eq ch'est-i possibe ?!

Echl'étchipe ed fotbal d'Anmyin n'put pu juer ches rincontes à Anmyin edpi ech trinte septimbe, quanq ale o rincontré echl'étchipe ed lile.

Achteure, ale pourroait aller juer à Caen, din ch'Calvados.

Pour cho, i feut qu'ho fuche unne ville picarde. Qu'i m'sanne.

Don, unne inclave, vu dò eq Caen est situé.

Disez-mi o bin écrivez-mi quoé qu'os in pensez.

mardi 10 octobre 2017

A chake keup

... l'minme cose.

Quanq is voé'te.

- "Tu vux un keup ed vin blanc ?"

- "Nan ! De l'ieu à bulles."

- "T'es seur ?"

- "Bin ! Mettons un tiot keup ed vin blanc."

Echt'onme sert ech verre pi s'arte in dsou de l'mitan dech verre.

L'eute i dit :

- "Coèr un tiot molet."

lundi 9 octobre 2017

Vive ech Limousin libe

Achteure eq ches catalins i vu'te ête indépindints, os pouvons nos ranmintuvoer eq ches corses, ches bretons, ches occitins i vu'te, edpi granmint ed tans étou, edvenir libe.

Mais ièr, in rbéïant unne gasète, j'o lu eq ches limousins vouloai'te étou ête indépindints.

Vlò unne sapré bèle région, fin riche. Adon, baillons-leu leu indépindinche.

Et boinne canche à eux.

dimanche 8 octobre 2017

Is ont prié

... avant de vnir amon mi. Pourquoé ?

Qu'ej vos esplique.

Ièr, un nveu et s'nouvèle fanme, vu qu'is ont mèrié ach darain moés d'eu, ont vnus nous vir, em fanme, eds éfants à m'fanme et mi, et mi.

Mais avant de vnir, is ont allés prier.

Os pouvons nos dminder chi is avoai'te l'freusse ed quèk cose ! Ete mie bin erchus ? N'mie avir granmint à minger ? O qu'ho fuche mie boin à minger ?

A moinss qu'is priche'te granmint, minme quanq is vienne'te mie nos vir.

Est bin possibe !

Mi, ej prie pour qu'is fuche'te ureus ed vnir nos vir. Et pour qu'is fuche'te ureus. Tout court. Conme diraoit Tata Nicole.

Et étou pour eq tertout fuche ureus. Minme chi tertout n'vient mie nos vir. Mais pourroait.

Boin diminche. A min nveu, s'fanme, et à tertous.

samedi 7 octobre 2017

Os vos keufez

Ièr au vèpe.

- "Bojour msieur ! Jou qu'os vos keufez avuc du gasole ?" qu'i dminde un onme din ch'téléphone.

- "Nan!" qu'il i répond min fiu.

- "Avuc du bo ?"

- "Nan pu!" qu'i dit min fiu.

- Avuc edl'électricité adon ?" qu'il incite ech téléphoneu.

- "Nan !" qu'i répond min fiu, chin rire, "os nos keufons mie."

- "Adé !" qu'éroait pu dire ech onme.

vendredi 6 octobre 2017

Bir un ju

...foait picier.

Bir deus jus foait picier.

Bir troés jus rind l'jornée mie possibe.

jeudi 5 octobre 2017

Combin ed boutèles

I o unne smangne, in vagances deus jours in Alsace, ej m'arte din unne tiote boutike d'un village, village qu'ej vos in o djò causé, pour acater del'ieu.

Jé dminde à l'vindeuse chi ej pux acater unne boutèle d'ieu toute seule o chi ej doés in acater sis d'un keup, vu kmint eq ch'étoait présinté.

- "Ches prix sont pèr lite." qu'ale m'répond, froéde conme un erfroédioèr.

I falloait qu'ej comprinche qu'ej pouvoais adon in acater unne.

Aprè cho, j'o rin dmindé d'eute.

Mais i o quanq minme dit merchi.

Vu emn'éducation.



mercredi 4 octobre 2017

Mdame l'martchise

... tout vo fin bin.

T'os granmint ed tiots éfants qui t'ainme'te,

T'os un onme qui t'acate eds uites, vu eq t'ainmes cho et eq li i t'ainme,

Adon, t'es ureuse.

Feut l'dire.

mardi 3 octobre 2017

Deus génous à tère

L'eute jour, j'o dvisé chu ches gins à pieu noèrte qui rest'te à ches Anméritches et qui met'te, achteure, un génou à tère quanq is font du sport.

Innui, ej vo vos causer ed ches jonnés filles frinchoéses qui doé'te étou rouspeter o avir à quèk cose à dminder, mais os savons mie pourquoé o quoé.

Ej vos écris cho, vu leus génous.

Rbéïez quoé qu'os voéyons ed puss in puss !


Ah ! Ches jonnes !

Baillons leu ed l'argint o leu indépindinche pour qui acat'te eux-minme leus maronnes, et os verrons bin chi is i foai'te toudi des treus.

lundi 2 octobre 2017

Eroait pu ête chin tchyin

Tous ches ins, achl'apréseu, i o des cacheus qui, malureusemint, tire'te chu quèk cose qui bouge et l'tue : leu tchyin.

Echl'espression "vie ed tchyin" vient dech dinger qu'ont ches tchyins ed cacheu quanq is sont avuc eux.

Ièr diminche, i o un cacheu, din l'Hérault, qu'o du sintir un orteu bouger din ch'keuchure. Il o tiré din chin pié.

Et pour un keup, il l'o ieu. Feut dire qu'i avoait, i m'sanne, vint chintimètes inter ech beu ed chin fusike et ch'keuchure.

Malaisié ed mie l'avoèr !

A tertous qui n'cachez mie, fuchez prudint quanq os sortez vos promner.

Boinne jornée à tertous.

Et surtout à ch'pauve cacheu qu'o un treu din ch'jeuchure. Et din chin pié.

dimanche 1 octobre 2017

Ches viannes funmées

Os in avez seuremint djò mingé, des viannes funmées fabritchées in Frinche-Comté o in Alsace.

Is sai'te bin les foaire, et is ainme'te cho.

Et ch'est vrai étou eq ch'est boin.

Unne vianne funmée est unne vianne mie tchuite, mais qui vo s'conservée granmint ed tans.

Il existe étou des pichons funmés.

Mais l'eute jour, j'o ieu unne saprée surprinze.

Rbéïez !


Pour quoé qu'is vouloai'te funmer ech Christ ?

Pour l'conserver ? Ho n'sert à rin : ch'est unne estatue !

Pour conserver l'religion chrétiène ? Mie seur eq cho fuche cho qu'i foaiche foaire !

I n'o un qu'avoait funmé unne motchète ?

A moinss !

A moinss eq cho fuche unne cacouille qu'ej vos foais. Conme des keups.

Boin diminche à tertous.

samedi 30 septembre 2017

Quoé qu'is vinde'te

Ah ! Ches galibiés ! I o des jours, os ainmeroème qu'is n'fuche'te mie lò.

Mais in vrai, minme quanq os disons cho, os pensons ech contraire : qu'is sont régalants et qu'os ainmeroème qu'is fuche'te toudi avuc nos.

Adon l'eute jour, din un tiot village qu'ej pux mie lonmer, pèr respect pour li, ej m'o dmindé quoé eq ch'étoait conme redrie.


Feut vos dire qu'ej comprinds ech frinchoés. Et echl'alsacien. Ej vos traduis : rédrie éfants.

Jou qu'is vinde'te ches galibiés ed gins qui n'in vu'te pu o qu'in ont granmint, o jou qu'is vinde'te des vetemints pour éfants ?

Et qu'is ont oblié un mot ?

P't'ête, étou, qu'ej foais unne crosse berlure : ch'est p't'ête ches éfants qui vinde'te quèk cose ?! Leus vius jus ? Leus pèrints ?

A vir, dman, chi os êtes à Bergheim.

Boin sinmdi.

vendredi 29 septembre 2017

Quoé ch'est qu'is dvienche'te

..., ches ouvreus dechl'interprinze ed punmes-ed-tère dech Nord ?

Ranmintuvoez-vos !

Ach troés dech moés d'eu, ej vos o écrit un article chu ches gins qui hapoai'te du mau in ouvrant din unne interprinze ed punmes-ed-tère.

Acht'époque, granmint ed gasète o jornaleus in ont étou causé. Vu qu'is li'te min blog.

Mais aprè ? Mais edpi ?

Rin de rin !

Tous ches ouvreus-lò sont p't'ête à l'ôpital. O minme morts ?!

J'ainmeroais savoèr.

Chi unne gin peut m'dire, qu'ale m'mette un tiot conmintère.

Merchi d'avinche.





mercredi 27 septembre 2017

Os étoème nu

Cho i est ! A lire ech tite, os vos disez :

- "Feut qu'os lisonche !"

Mais ranmintuvoez-vos eq ch'est du picard. Nu, ch'est aprè uit, et avant dis. Ch'est mie mer-nud.

Quanq j'écris qu'os étoème nu, ch'est vu eq sinmdi, m'fanme et mi avoème, amon nos, tertous nos éfants, not bieu-fiu et unne fin boinne conmarade à min fiu.

Os avons granmint ed mau à tertous nos rincontrer, mais quanq ch'est possibe, et qu'in puss, i foait bieu, os sonmes ureus.

P't'ête eq din un o deus moés os arrivrons à ête dis.

Merchi à ms'éfants, min bieu-fiu et l'jonne fille qui vit achteure avuc min fiu.



mardi 26 septembre 2017

Un génou à tère

... et priez Diu.

Cantoait Armind Meastral, i o granmint eds innées, din Echl'Ingélus ed Ches Mers.

Ej voudroais mie, innui, vos causer coèr un keup ed religion.

Mais ed ches gins, noèrts et sporteus, qui met'te achteure un génou à tère ach ches anméritches quanq is font du sport.

Pour dire à leu présidint qu'is sont mie ureus del vir.

Et p't'ête qu'is prie'te un keup pour qu'i pèrte fin rade, leu présidint.

Malureusemint, ch'est mie gaingné.

lundi 25 septembre 2017

Rinde ches étoéles

I o granmint ed tchuisiniers in Frinche et din ch'monde qui vu'te avir unne, deus o troés étoéles à leu boutike.

Mais l'eute jour, j'o apprins eq Michel Bros, fin boin tchuisinier ed Ladjole, in Aveyron, vouloait qu'os i rtironche.

- "Pour ête puss libe" qu'i dit.

- "Michel, chi tu lis min blog, ch'qui sroait unne boinne nouvèle pour mi et qui m'froait granmint plaisi*, feut qu'ej té diche eq pour qu'os té rtirons ets étoéles, t'os rin à foaire. A pèr d'arter d'ête prinde l'tète quanq tu tchuisines. Et ches gins dech guide Michelin t'les inlévront fin rade. Mais ch'est donmage."

* Michel, chi tu lis min blog ed tans in tans, mets mi un tiot message et os irons minger amon ti avuc m'fanme et ems éfants.

dimanche 24 septembre 2017

Ches troés gins mie ed Nintes

Granmint ed vos connoai'te ches Troés-Gins-ed-Nintes et leus canchons bretonnes conme pèr eximpe, L'jumint ed Michau, Pelot d'Hennebont, o coèr, Din ches prisons ed Nintes.

Mais il existe étou granmint ed troès gins qui n'sont mie ed Nintes.

Pèr eximpe, ach moés d'eu, min bieu-fiu, un bieu-frère et mi avons étou canté unne canchon à un mériage. Et os sonmes des troès gins mie ed Nintes. Os sonmes minmes troès gindes mie ed Nintes.

Innui, ej vux vos causer ed troès - eutes - gins mie ed Nintes : unne nièce, o casi, et deus gins avuc qui j'ouve.

Ches troés gins lò, ej pense à eux granmint, vu qu'is ont un crabe. Un mawais crabe, malureusemint !

Pour m'nièce, ech crabe est din chin sanke edpi ech moés ed moai. Ches eutes ont un crabe, unne din ches deus tètes, et l'eute, din ch'bouke.

Adon, ej prie pour eux.

Mais ej prie étou pour granmint d'eutes gins !

Slon qu'is sont tout seus, conme em mère et m'bèle-mère, qu'is trache'te à ouvrer, qu'is ont perdu leu fanme (cacouille : avant d'rlire, j'avoais écrit "qu'is ont leu fanme") , qu'is ont d'eutes maus à leu tète, qu'is ont unne épreuve pour un examen, qu'is pèrt'te fin loin, qu'is sont fin loin,...

Cho m'prind du tans.

Mais, j'in prinds, o j'in o ; pèr eximpe, unne eure tous ches matins din ch'train. Atincion : j'o unne eure pour prier, mais ej prie mie unne eure.   

Etpi des keups, j'o des boinnés nouvèles. Coèr pèr eximpe, l'eute jour, min fiu m'o dit qu'es boinne conmarade avoait réussi ches deus épreuves qu'ale passoait.

Ale étoait seur ed mi les avir ed de rkmincher s'quatriènme innée, mais mi ej prioais pour ale.

Os avez qu'ò croère ! Et prier.

Bec à m'nièce,
Corage à ches troès.

samedi 23 septembre 2017

Fin corageus minisse

... frinchoés ed l'agritchulture.

Magine !

Merkerdi, i vo à un indroét dò qu'i avoait granmint ed gins qui font ed l'agritchulture biologique o qui vu'te in foaire et rinconter et causer avuc d'eutes gins qu'in font djò.

Ej précise eq ches gins-lò, Jacques Brel n'in o mie causé din ch'fameuse canchon, mais is piche'te et ainme'te. D'aprè quoé qu'i s'dit in Anméritche. (cacouille pour vos).

Et ch'minisse, il annonche à tertout qu'i vo arter ed bailler unne pèrtie ed l'argint achl'agritchulture biologique.

J'o mie intindu dire o lu din ches gasètes qu'il avoait, aprè, erchu eds us chu li.

P't'ête eq ches gins n'ont mie bin comprins ?! O qu'is étoai'te pèrti quanq il o arrivé et foait s'causète. ?!

Boinne jornée à tertous.

vendredi 22 septembre 2017

Berlure

... o il étoait mort ?

L'eute smangne, din emn interprinze, os nos annonche eq not patron n'sro mie lò din tchinze jour vu eq chin père est mort.

Ech lindman, os nos dit eq cho sro din quat jours eq not patron n'sro mie lò .

Adon ?!

Jou eq chin père avoait granmint ed mau mais n'étoait mie vraimint mort quanq unne gin nos o foait ech premier message, in pensant qu'i sro mort din dis à douse jours ?

O bin jou eq ch'étoait unne berlure din ches dates et qu'echt'onme étoait djò mort ach premier message ?

Feut mie rire, vu qu'achteure, il est vraimint mort.

mercredi 20 septembre 2017

Rinconte ed tennis

Rinconte inter, magine, Dédé echl'anméritchin et Bébert ech suédoés.

- "Hhannn !" qu'i foait Dédé.
- "Hhinn !" qu'i foait Bébert.
- "Hhannn !"
- "Hhinn !"
- "Hhannn !"

- "Tchinze à zéro." qu'i dit echt'arbite.

- "Hhannn !"

- "Trinte à zéro."

- "Hhannn !"
- "Hhinn !"
- "Hhannn !"
- "Hhinn !"

"Trinte à tchinze."

- "Hhannn !"
- "Hhinn !"
- "Hhannn !"
- "Hhinn !"
- "Hhannn !"

Quarante à tchinze.

- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"

- "Ju à Dédé ! Un à zéro." qu'i dit echt'arbite.

- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"

- "Zéro à tchinze."

- "Hhinn !"
- "Hhannn !"
- "Hhinn !"

- "Zéro à trinte."

- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"

- "Tchinze à trinte."

- "Hhinn !"
- "Hhannn !"
- "Hhinn !"

- "Trinte à."

- "Hhinn !"
- "Hhannn !"

- "Avantage à Dédé."

- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"
- "Hhinn !"
- "Hhannn !"

- "Ju à Dédé ! Deus à zéro."

Et cho continue eds eures conme cho. Aprè miu ed sis jus, i o ches sets. Et pour gaingner, des keups feut avir gaingner deus sets, des keups troès. Cho dépind dò tu jues.

Chi os voulez apprinde à vos éfants à cartchuler o à bin causer, ch'est mie avuc ech tennis.

Ej précise étou eq Dédé et Bébert sroai'te suisse, frinchoés, inglés, ougandoés, malaisiens, éthiopiens, burhinaboés o eute, is causeroai'te conme cho étou.

Bec à tertous.

mardi 19 septembre 2017

Un voéyage à Lima

I o quèks jours, Pèris o étè coésie conme ville pour ches jux olympikes ed deux-mile-vint-quat.

Ch'est à Lima, et mie à Dima (cacouille pour ches gins d'em famille qui li'te min blog), eq ch'o étè annonché.

Mais quoé qu'is avoai'te dzoin d'aller ach Pérou pour foaire unne annonche conme cho ?

Lima n'est mie l'daraine ville à avir ieu ches jus.

Lima n'étoait mie unne des villes qui vouloait avir ches jus.

Adon ?

Ch'étoait p't'ête pour qu'un jour qu'ech poaiyis fuche candidat ?!

Mi, ej pense eq ch'étoait surtoute pour foaire un bieu voéyage, vu qu'achteure, os pourroème foaire unne annonche conme cho pèr visio-conférinche

Ale est bèle , not planète !

lundi 18 septembre 2017

Ale o fiat

... in mi.

I m'sanne vos l'avir djò écrit : ej su picard mais ej reste mie in Picardie. Et j'ouve edpi vint moés avuc unne jonne fille dech Pas-ed-Calais, fin régalante. Surtoute qu'ale rit toudi.

Ale est din emn interprinze, mais j'ouve mie directemint avuc ale. Et i o d'eutes gins qui, eux, sont mie picards et qu'ouve'te avuc nos.

Verdi, j'arrive, in rtèrd vu ches trains, et ej dis bojour à ches gins. Janmoais ed bec à ches filles, eq j'o déchidé edpi granmint ed tans.

Pi, ej kminche à ouvrer. Tout seu din min burieu, conme granmint ed keups. Avuc echl'uis ed min burieu ouverte. Conme toudi.

Alintour d'unne eure aprè, l'fille dech nord vint m'vir ; et ale s'met à causer un molet.

A l'vir et à l'intinde, i m'sanne eq quèk cose n'vo mie.

- Frunme echl'uis !" eq j'i dis.

Seuremint qu'ale o fiat in mi, vu qu'ale o frunmé echl'uis.  Et, ale s'o mis à braire. Ale avoait dzoin ed braire.

Pauve tiote ! Ale o chin chef, qu'est vos in o causé in deus-mile-sèse, qu'est un vrai cros nikdouille.

I sait bin qu'el fille ouve fin bin. Et l'eute smangne, adon, qu'el jonne n'o casi mie prins ed vagances in étè, et eq li prind des jours chin rin dire à l'avanche, i i o dit nan quanq ale o dmindé un jour.

Innui, qu'ale éroait voulu ête in vagances.

Ch'est pour cho eq j'écris cho innui.

Etou pour dire à l'fille, mais ej croés qu'ale el sait, qu'ale put avoèr fiat in mi.

H'est si régalant ed la vir o ed l'intinde rire !

Lò dò qu'ale ouve.

Tiote, tu mériteroais un boin croéssant innui pour t'bailler dech corage. Minme chi ch'est seur eq t'éroais étè miu in vagances.

Chi t'es min nveu et eq t'os ets ages, fin cros bec à ti.

samedi 16 septembre 2017

Ch'étoait

L'eute diminche, je vos o causé d'unne église et j'vos dmindoait dò qu'ale étoait.

Innui, feut qu'ej vos diche.

Ch'est unne église eq j'o prins in photo in Tournus. Ch'est pour cho étou eq quat jours avant ej vos avoais écris quèk cose chu Tournus.

Pour eq vos m'croéyèche, ej vos mets unne daraine photo.


Boin diminche à tertous.

Interroger un coureu

... qu'est in route à courir est malaisié.

Mais judi, timpe au matin, j'o intindu un jornaleu qui le foaisoait.

Ej mé dminde chi, li-étou, i couroait o étoait chu unne bicyclète.

Ch'est fin malaisié ed les interroger, ches coureus, mais ch'est étou fin malaisié pour eux ed réponde et pour nos ed les comprinde.

Eximpe :

- "Os foaisons" i rprind chin souffe "tchinze kilomètes pèr jour" i rprind coèr chin souffe "et avons dzoin" i rprind un keup chin souffe " ed boinnés keuchures" i rpind chin souffe et continue ed courir.

Mais quanq minme ! Jou qu'i sro mie possibe ed poser ches tchestions à ches coureus quanq is ont défini ed courir, prind unne douche et rprind leu souffe ?

vendredi 15 septembre 2017

Os êtes moinss nikdouilles

... eq ches chinoés ed Chine ?!

Adon, continuez d'acater et ed minger ed tans in tans du Roquefort, ech fin boin freumache ed l'Aveyron foait avuc du lait ed berbis.

Conme os pouvez continuer ed minger, chin dinger, du boin camimbert, ech foée gras et eutes boins produits ed Frinche qui sont mie pasteurisés et qu'ont granmint ed goût.

jeudi 14 septembre 2017

Ech tchyin d'em mère

L'eute jour, m'fanme o voéyagé din l'voéture d'un jonne, quarante-nu-ins, qu'avoait étou un tchyin. Din l'voéture.

Un tiot tchyin blanc d'unne race eq j'ainme mie lonmée caniche.

Ch'étoait ech tchyin dech mère, qui, ale, in viusichant, avoait ed puss in puss ed maux et n'pouvoait pu s'otchuper de chin tchyin.

Din l'voéture, echl'animal étou avoait du mau ; il o déloufé chu unne sélète del voéture.

Bieu voétage eq ch'o étè !

Mi, ej m'éroais arté chu ches bords del voée, éroais laicié sortir ech tchyin del voéture, etpi, adé !


mercredi 13 septembre 2017

Severobaïkals in Russie

Ch'est unne ville fin à l'est, chu ches bords dech lac Baïkal, dò eq j'o allé in join avuc em fanme et m'fille.

L'ville o été construite alintour ed ches innées mile-nu-chint-soéçante-dis et o edvenu ville in mile-nu-chint-quater-vint..



















Ch'est pour cho eq ches cartes ed Russie ont des différinches slon quanq is ont été foaites. Pèr eximpe chtol-lò, in dsou, est ed mile-nu-chint-soéçante-sèse. ; i o mie l'ville, et i o mie ch'train.


Mais i o unne fin tiote ville qu'est Baïkalskoyè. Mie grin cose à vir avuc Severobaïkal, à pèrt eq ch'est étou chu ches bords dech lac.




mardi 12 septembre 2017

Un boin plaisi

Maginez !

Ièr au vèpe, aprè avir vérifié eq j'éroais un train qui veuche bin m'inmner ouvrer ech lindman, don innui, j'o alunmé ech poste ed télévision.

Et quoé qu'ej voés ?

Ej vos l'baille in mile, Mimile : ches deus conmarades inglés qu'étoai'te coèr jonnes quanq is juoai'te din Amicalemint vot.

Et ch'étoait Amicalemint vot.

Cho foaisoait granmint d'innées eq j'avoais mie vu ches deus-lò. Ch'étoait des tiots films foai'te din ches innées mile-nu-chint-soéçante-dis.

Achteure, in vrai, ches deus gins sont morts. Mais din ches films, is sont jonnes et toudi régalants à rbéïer.

Bret Sinclait et Daniel Seuvage !

Pour ches jonnes niacoés qui n'connoai'te mie, feut rbéïer. Quanq os érez défini d'apprinde vos lçons.

Mi, ej prins ch'train.

lundi 11 septembre 2017

Ches bèlés keuchures

- "T'os vu mes bèlés keuchures ! Ch'est ems éfants qui m'les ont acatées. Ej su ureus !".

Qu'i dit.

I o quèks moés, is i avoai'te acaté une kmise.

Coèr un keup, cho i avoait foait granmint plaisi.

Surtoute qu'il o mie d'argint pour s'acater des vetemints. O des keuchures.

Malureusemint !

dimanche 10 septembre 2017

Saprée église

Jou qu'os allez arriver à rconnoaite dò eq j'o prins ches deus photos d'église lò .


















Pour vos aidier, ej vos mets unne troésienme photo.


Erlusez-vos bin, et boin diminche à tertous.

samedi 9 septembre 2017

Truvoer un séruzyin

I dvient ed puss in puss malaisié ed truvoer un séruzyin quanq os avons du mau quèk pèrt.

Des keups, t'arrives din unne nouvèle ville et t'os mie ed séruzyin qui vuche t'soégner.

O bin, t'os un séruzyin qui vut bin t'soégner, mais quanq tu téléphones pour aller l'vir vu eq t'os du mau à tin gasio o à t'gambe o coèr à t'panche, pèr eximpe, i t'dit de vnir din tchinze jours. Mais d’ichi-lò ?!

Din l'Creuse, unne fanme o baillé unne moaison à not nouvieu Présidint pour, qu'ale pense, qu'i foaiche inlver ches éoliennes alintour de s'nouvèle moaison à li, ch'Présidint, et de l'moaison del fanme. Mie nikdouille, l'fanme !

Feudroait qu'os baillonche unne moaison à not présidint lò dò qu'i o des problinmes avuc ech manque ed séruzyin. Pèr eximpe, in Creuse.

Restez in boinne santé.

vendredi 8 septembre 2017

Disez à Diu

... qu'os voulons bin moérir, disparaîte et nos dissoude, mais os voulons pu janmoais naîte.

Ch'est conme cho que s'définit ech live ed Yann Moèx, Naissinche, qu'ej vos in avoais causé ech vint-chonc févrié quanq ej venoais ed kmincher à lire ech live.

J'o tout lu, mais i m'o fallu miu ed sis moés pour el lire !

Fin malaisié à lire : granmint ed répétitions, des keups chu miu d'unne page.

Ch'est pour cho qu'ej vos conseille mie del lire.

Minme chi j'o tout lu.

jeudi 7 septembre 2017

Acater un ordinature

Ch'est quoé eq voudroait m'fanme : qu'ej m'acate un ordinature pour qu'ej prinche pu l'syin.

Tout cho pour, mettons, trinte mintues pèr jour, des keups.

A deus-chint euros o puss !

I doét ête possibe ed s'aringer.

mercredi 6 septembre 2017

Foaire Lyon Grenobe Bourg Tournus

... in vint-quat eures, quanq tu viens dech nord, ch'est mie possibe.

J'esplique.

Don, tu viens dech nord del Frinche.

Chi t'es avant sis eures dech matin, tu passes pèr Lyon, pi tu vos à Grenobe, vu qu'i feut eq tu voéches à Grenobe.

Lò, tu minges, boés, dort , boaises p't'ête, et déposes tin fiu o t'fille.

Mais pour rintrer, feut éviter Lyon. Don, tu passes pèr Bourg pi Tournus, et tu rtornes din ch'nord.

Mais in moinss ed vint-quat eures, ch'est, i m'sanne, mie possibe.

Cho m'sanne dingeureus ; tu pux avir un accidint, t'foaire rintrer din l'tchu et ti, rintrer din chti ed dvant.

Cho sroait conme foaire Saleu l'Inglétère, Donmart et Anmyin in moinss ed douze eures. Cho put étou ête dingeureus.

Becs à tertous.

mardi 5 septembre 2017

Ches conmarades ed ches conmarades

... ed mes conmarades, jou qu'is sont mes conmarades ? O peu'te is ête eds ennemis ?

J'in sais rin !

Mais achteure, il est possibe ed savoèr quoé qu'is font.

Ech cros problinme, ch'est eq din granmint ed keups, ches gins met'te mie leu vrai nom, pour ête un molet muché.

Qu'i leu sanne !

lundi 4 septembre 2017

Phrases intindues

- "Ch'est mie vu eq tu vux mie minger ed vianne et d'pichon qu'i feut eq tu minges ches cailleus et del tère."

- "Quanq t'es in prousse et eq tu vux rinverser l'tabe, soin qu'ale n'rtchaiche mie chu tes piés !"

A buser.

Chi t'es m'mère et eq t'os ets ages innui, fin cros becs à ti.

samedi 2 septembre 2017

Ech puss malaisié

... quanq t'es pompié, ch'est, des keups, puss ed vir kmint et dò eq ches gins vive'te qu'ed vir des gins qui vienne'te ed moérir o qui meur'te.

Eq dit un jonne pompié qu'ej connoais bin.

jeudi 31 août 2017

Tiot poéyisan

Os in avez seuremint intindu causer dech film qu'est paru ièr merkerdi et qu'o pour tite "Tiot poéyisan".

I o granmint ed tans eq j'o mie été ach cinéma, mais ech film-lò, j'iro.

Ej vux vir quoé eq ches gins vont vir chu ches cinsiers, leus vakes et ches fonctionnaires.

A béto !

mercredi 30 août 2017

Nouvèle espression tchébécoèse

Aprè echl'article dech nu dech moés d'eu, vlò unne deusienme espression qui nos vient étou dech Tchébec :

Abillé conme ech tchyiène à Jacques."

Et cho, cho vut dire : mal fagoté.

Ed qué Jacques qui cause'te, ches tchébècoés ?

mardi 29 août 2017

El Niève

El'bèle Niève ; J'écris bèle pour m'foaire eds amis. Conme diroait min conmarade Zèf, PDMM.

In effet, il existe troés Niève :
- ech dépèrtemint chincante-uit,
- unne rivière dech dépèrtemint chincante-uit qui vo din la Loère,
- l'tiote rivière del Sonme, not bieu dépèrtemeint picard, qui vo s'ruer din ch'fluve l'Sonme.

Ch'est dech tiote rivière-lò qu'ej vux vos causer innui.

Ale nait din ches bos ed Talmar, alintour ed Neur et ed ches célèbés grottes, à soéçante-quatore mètes de heut, pi deschind duchmint pour aller din ch fluve l'Sonme.

Pour cho, l'tiote et bèle Niève passe à Havèrno, tiot village qu'ej vos in djò causé, Wargni, Canapes et s'boinne étchipe ed fotbal qu'ej vo in o étou djò causé, Halloé, Pernou et es fin boinne moaitresse lonmée Tiote Berte, Bertécourt, Saint-Ouin, Bétincourt-Saint-Ouin, Flichcourt. L'Etoéle, et pour définr, avant de s'ruer din l'Sonme, Conda.

J'ainme bin l'Niève picarde. Ale passoait dvant m'moaison pindint dis-sèt ins. Avuc mes frères, os avons granmint jué avuc, rbéïé étou ches pékeus, et os la traversoème chu unne planke qu'avoait posé not père, pour aller à ch'collège.

Chi os passez din ches alintours, allez l'a vir et rposez-vos un molet in la rbéïant.

Chi t'es m'bèle-soeur et eq t'os ets ages innui, cros becs à ti. Minme chi t'es in vagances avuc min frère et vos éfants.

lundi 28 août 2017

Voéyage in voéture

Aprè un molet ed voéyage in train, ej vos propose innui un tiot voéyage in voéture. Toudi in Sibérie.


Seuchez qu'ech voéyage o duré miu ed tchinze eures conme cho. Mais aprè, os étoème ureus.

Surtoute d'arter. Et not dos étou, vu kmint qu'os étoème ochés.

samedi 26 août 2017

Ches cadoreus in vagances

I o cadoreus, deus gins qui s'ainme'te, et cadoreus, ches gins qui nos protège'te et nos surveille'te.

Tertous peu'te pèrtir in vagances, mais innui ej vus vos causer eq ches cadoreus qui nos protège'te et qui sont in vagances.

Quanq ch'est conme cho, os voéyons mie eq ch'est des cadoreus. Adon eq ches cadoreus qui s'ainme'te, cho s'voét, minme quanq is sont in vagances.

Ièr, un agripeu din unne boutike o vu, in sortant, deus gins qu'il o insulté. Malureusemint pour li, ch'étoait deus cadoreus in vagances.

Donmage pour li, tin miu pour ech vindeu del boutike.

vendredi 25 août 2017

Ches boins tripous

Pèrmi vos, i n'o qui di'te, chin buser unne minute, qu'is ainme'te mie ches tripes.

Is peu'te ! Mais is doé'te buser étou.

Ches tripes, ch'est foait surtoute in Neurmindie avuc del tripe, ch'est seur, mais del tripe ed vake. Feut l'savoèr.

Et ches tripes, i m'arrive d'in acater des blankes et ed les tchuisiner pour qu'is fuche'te fin boinnes à minger. Ed tans in tans, eq j'in tchuisine. Mais i feut granmint ed tans.

Ches tripous, ch'est étou del tripe, mais ed vieu et ed berbi, et ch'est mingé din ech Sud-ouest del Frinche, surtoute in Aveyron.

Ech premier keup eq j'in o mingé, ch'étoait à l'ducasse d'un tiot village aveyronnais, au matin, à sèt eures.

Ech premier keup, cho surprind ed minger cho à cht'eure-lò.

L'jour del ducasse, tous ches gins dech village et ches glouts vont, timpe au matin, minger des tripoux, et boère quèks keups ed rouve, à ches bistrots dech village, insanne.

Ej connoaissoais mie ches tripous, j'o rin dit avant d'avoèr gouté, et j'o fin ainmé.

Edpi, j'o ieu un bieu-frère aveyronnoé, j'o étou foait démucher cho à em fanme, ems éfants, d'eutes bieus-frères et bèlés-soeurs.

Ed tans in tans, os in mingeons. Timpe au matin, avuc, per eximpe, un bieu-frère, unne béle-soeur, un nveu, em fanme, un fiu, unne fille, et avuc des punmes-ed tère, et un keup ed rouve.


Ches tripous, contrairemint à ches tripes, ej les acate djò tchuisinés.

J'espère vos avir baillé l'invie d'in minger. Boin accion à tertous, et cros bec à min bieu-frère aveyronnoé.

Chi t'es min frère eq eq t'os ets ages innui, poégnée ed man à tes glinnes, et bec à ti.

mercredi 23 août 2017

Construire un nouvieu catieu

... conme i o uit-chint ins.

Jou qu'ej vos avoais djò causé dech catieu ed Djédelon, din l'Yonne ?

Ch'est un catieu qu'existoait mie i o vint-et-un ins ! Coèr moinss i o deus o troés-chint ins. Mais un catieu qu'est in route à ête construit conme os foaisoème i o uit chint ins.

Cho foait achteure vint ins eq des gins ouvre'te inter march et novimbe, avuc eds otius fabritchés conme i o uit-chint ins.

Et ches ouvreus ouvre'te, mais vos esplique'te étou kmint qu'is ouvre'te, et pourquoé.

Avuc m'fanme et ems éfants, cho foait au moins troés keups qu'os i allons ; os voéyons ches cangemints.

Rbéïez ches quèks photos d'aprè.


















Profitez ed ches darains jours ed vagances ; Allez-i et inmnez vos éfants o tiots-éfants.


mardi 22 août 2017

Evatchuez l'merrie

...  d'Advile ! I o des saprées flérinées.

Ch'étoait ièr, alintour ed sèse eures. Tous ches gins qu'ouvroai'te ont du aller à l'cour ; I n'o qu'avoai'te du mau à leu gasio.

Mi, ej comprins eq ches gins euchent pèrtis.

Mais ej mé dminde quanq minme chi ch'est mie min tiot frère qu'éroait foait cho , vu qu'il ouve à l'merrie ; I vouloait p't'ête rintrer amon li.

J'i dmindero.

lundi 21 août 2017

I tchait des fors micro-ondes

In principe, quanq i tchait quèk cose ed ches tans, ch'est del pleuve o ches nèges.

Des keups, cho put ête ches feuilles ed ches abes, quanq os sonmes à chl'aprèseu.

Eh bin l'eute jour, din un tiot village del Sonme, village eq j'in o djò causé, malureusemint, chu min blog, unne fanme o erchu chu ch'voéture, un for micro-ondes ; il o tcheu d'unne maoison qu'est à miu ed deus mètes del keuchie.

Pour arriver lò, il est mie tcheu d'unne étagère ; feut qu'il euche étè lancié pèr unne gin.

Din l'Sonme, tout put vos surprinde !

Des keups, ej dis : malureusemint !

Chi j'o ems ages innui et qu'ej vos ouvrer, corage à mi.
I o mie ed mau à s'dire du bin.

dimanche 20 août 2017

Vive insanne

- "Ej t'ainme ; Tu m'ainmes ; Vivons insanne."

Qu'is di'te achteure ches jonnes.

I o soéçante-dis ins, quanq un jonne onme truvoait unne jonne fille régalante et que l'jonne fille l'truvoait étou régalant, i s'passoait des moés, voère eds innées, avant qu'is mèriche'te pi viche'te insanne.

Mais quanq is s'mettoai'te insanne, ch'étoait pour toudi.

Achteure, ches jonnes s'met'te insanne fin rade, mais granmint pèrmi eux n's'ingage'te pus pour toute leu vie.

Jou qu'is éroai'te l'freusse ?

O bin, jou qu'is n'vu'te pus s'ingager et pouvoèr canger d'onme o fanme quanq is vu'te ?

Mi, ej truvoe cho surtoute mie corageus.

Boin diminche à tertous. Minme à ches jonnes.

Chi t'os ets ages innui et eq t'es min boin cousin, cros becs à ti.

vendredi 18 août 2017

Ech canchon ed ches pèrtisins

Ami, intinds-tu ech vol noèrt ed ches cornailles chu nos plaines ?
Ami, intinds-tu ches cris sordeus dech poaiyis qu'os inchainons ?
Ohé, pèrtisins, ouvreus et poéyisans, ch'est chl'alèrme.
Au vèpe echl'ennemi connoaitro ech prix dech sanke et ed ches lèrmes.

...

Ch'est nos qui berzillons ches barrieus ed ches prisons pour nos frères.
La haine à nos treusses et l'faim qui nous pousse, l'misère.
I o des poaiyis ò ches gins au creux ed ches lits font ches reuves.
Ichi, nos, voés-tu, os mèrchons et nos on tue, nos on kerve...

Ichi chatchun sait quoé qu'i vut, quoé qu'i foait quanq i passe.
Ami, chi tu tchais un ami sort ed l'ombe à t'place.
Dman du sanke noèrt sétchiro ach grin solé chu ches voées.
Cantez, conpagnons, din l'nuit ech Liberté nos acoute...

Ami, intinds-tu ches cris sordeus dech poaiyis qu'os inchainons ?
Ami, intinds-tu ech vol noèrt ed ches cornailles chu nos plaines ?
Oh oh oh oh oh oh oh oh oh oh oh oh oh oh oh oh


Unne crosse pinsée à tous ches gins morts o bin afolés à Bèrcelone et Cambrils.
Brin à ches niacoés qui ont minme poin un poés chiche din leu tète.

Ech so randonne

L'eute jour, unne nièce dit à s'soeur :

- "Lulu*, ett'à l'eure, j'étoais din l'tchuisine ed Mémé** quanq j'o intindu un so qui randonnoait dsu l'tabe.

J'o étè surprinse ; adon, j'o rbéïé din ech so. Ch'étoait ches deus crabes eq Mémé o acatés et qu'is n'étoai'te mie morts.

Achteure, is sont morts, vu eq Mémé les o mis din l'ieu bolie."


* Minme chi cho s'passe alintour ed Nintes, ch'est mie el célèbe Lulu-el-Nintoése qu'est l'soeur d'em nièce.

** Nom baillé pour echl'article à m'bèle-mère, mais ch'est mie chin vrai nom.

mercredi 16 août 2017

Ech nouvieu calendrier

Boinne innée à tertous.

Feut mette à jour vos calendriers.

Edpi ech deus dech moés d'eu os avons défini ed consonmer quoé qu'os avoème pour echl'innée deus-mile-dis-sèt.

Don ?!

Don, os sonmes in deus-mile-dis-uit edpi ech troés.

Os pouvons, dech keup-lò, dire qu'i éro mie d'aprèseu in deus-mile-dis-sèt et étou, qu'i éro mie d'ernouvieu in deus-mile-dis-uit, vu qu'echl'innée-lò s'définit avant ech quat dech moés ed march.

Et deus-mile-vint kminchero avant ech quat dech moés d'octobe. Chi os avez bin lu, deus-mile-dis-nu sro à pèrtir o bin avant ech quat dech moés ed march.

In douse moés, os érons troés innées.

Ches problinmes, cho in foait :
- ches ages ! In ayant ets ages tous ches douse moés, combin eq cho t'foait d'innées ed puss ? Deus, troés ?
- ches vagances d'étè ed l'innée deus-mile-dis-uit ?
- dò-jou qu'os pouvons acater ech boin calendrier* ?

Pour éviter tout cho, os pourroème arter ed minger, ouvrer et respirer pindint quèks moés, pour pouvoèr avir à nouvieu eds innées ed douse moés qui kminche'te ech premier janvié.

Suffisoait ed buser pour truvoer ho.

* pour ches calendriers, mettez-mi un tiot message et os érez, p't'ête, un calendrier alintour ed sèt moés.

lundi 14 août 2017

Ale n'arte mie

Ed tans in tans, ej passe quèks jours ed vagances amon m'bèle-mère.

Conme l'eute smangne, pèr eximpe.

Et aprè troés o quat jour, m'bèle-mère me lonme pèr ech tiot nom ed chin eute bieu-fiu, min bieu-frère. Qui, li, n'vient casi janmoais.

J'avoais djò ieu ech keup lò in march.

Et j'o mie l'droét ed me mette in prousse.

Et feut continuer ed foaire plaisi !

Qué vie !

dimanche 13 août 2017

Os allons vir not taïon

... pour ech deusienme keup innui.

Qu'ale m'dit unne nièce, ièr.

Ech premier keup, ch'étoait in févrié.

Em nièce o tchinze ins.

Et ale sanne ureuse ed connoaite chin taïon.

samedi 12 août 2017

Fuche trantchile min nveu

L'eute jour, ej rinconte, amon min frère, un nveu, s'fanme et leu papar qu'o né i o un moés.

Un monmint, ej dminde à min nveu chi ej pux prinde leu fiu din mes bros.

I mé rbée un molet intchiet.

Adon j'i dis :
- "Fuche trantchile, min nveu ! J'o ech nivieu "père puss chonc" ".

Vu eq j'o chonc éfants, et eq j'in o janmoais berzillé un.