I sro présidint

... del Frinche in deus-mile-vint-deus.

Ej cause dech syndicalisse qu'avoait djò étè candidat i o quèks innées pour ête présidint, mais qu'avoait mie étè élu.

Din troés innées, i le sro.

Kmint jou eq ch'est possibe qu'ej lé seuche djò ?

Esn interprinze vo béto frunmer. IEch conmarade vo, malureusemint pour li, et p't'ête pour nos, ête béto à joke, et don avoèr du tans pour batte l'campaingne.

P't'ête étou qu'os vos disez, conme mi, que djò, i n'ouvraoit mie, vu qu'il est syndicalisse !?

Os pouvez mie l'dire ! Seulemint l'pinser.

Conme mi.

Quanq à savoèr pour ed vrai chi i sro présidint, os voérons din troés ins.

Seuchant qu'is sont djò deus candidats.

Qu'i m'sanne.

Dicton del sainte Honorine

Miu veut ech leu près dech fyin qu'el pleuve in févrié.

Min onke Pierre

Combin jou eq j'o d'onkes ?

Onze, chi j'o bin cartchulé.

Jésus avoait douse apôtes, et i n'ovaoit un qu'il avoait lonmé Pierre.

Eh bin mi, j'o onze onkes, et i n'o quat qui lonme'te Pierre !

Miu qu'ech Christ !?

I n'o un, ech puss viu, qu'o merrié unne soeur à min père, un eute qu'o coési l'puss jonne soeur ed  min père, pi deus, per eximpe, ech puss jonne ed ches quats, qu'ont épousé chatchun unne soeur à m'mère.

Edjalité pour ches soeurs ed mes pérints.

Mais em mère o quat bieus-frères qui s'lonme'te Pierre adon eq min père n'avoait seulemint troés.

Don, i o un Pierre, chi os avez bin suivi, qu'est un frère à min père.

Et don, vu eq ch'est mie possibe qu'il o mérrié es soeur, li o coési unne soeur d'em mère.

Ch'est ed li qu'ej vux causer innui.

Ech verdi vint-deus févrié, alintour ed vint eures quarante, ech téléphone sonne : ch'étoait Pierre, frère ed min père, qui m'appeloait pour savoèr chi j'avoais réussi ches sudotchus qu'i foait.

Eh ouais ! Min onke fabrique, edpi eds innées, des sodutchus.

Et pour rinde ches coses aisiées, i rimplache ches chiffes pèr des lettes.

Puss aisié, manière ed causer, i met chonc grilles insanne, et unne lette pèr grille.

Achteure, toudi pour foaire simpe, i met deus lettes din unne case ed chake grille.

Et i t'invoée cho, pèr l'poste, chin rin t'esplitcher.

Ureusemint eq j'o des cavieus : ej pux m'les arracher.

Li, l'est ureus ed fabritcher ches sodutchus.

L'eute verdi, in causant, i m'o foait rire in m'disant qu'i fètoait ches ages nu moés et un jours avant ech jour dò qu'il o sorti del panche d'es mère.

- "L'naissinche kminche ech jour dò qu'un onme et unne fanme font ch'papar", qu'i dit.

Mettons !

Mais in mile-nu-chint-trinte-sis, chl'innée étoait bissète.

Adon ! Jou qu'il o né ech quat o ech chonc févrié ?

Min onke o unne réponse, mais j'pux mie vos l'écrire.

Cros becs à tertous, surtoute à ms'onkes Pierre, à ches eutes onkes, à leu fanme.

Et à m'mère.

Boinne jornée.

Ech leu agressif

Alintour dech quatore févrié, un leu o étè aboli din ch'Var, vu qu'i sannoait agressif.

- "Un leu agressif ! Ch'est mie possibe !" diroai'te ches écologisses.

- "Un leu, ch'est doux conme un ainnieu . Quanq i put in minger, eds ainnieus. Mais ches cinsiers n'vu'te mie eq ch'est leus n'in minge'te, eds ainnieus. Chi un leu dvient agressif, Ch'est coeuse à ches onmes. Z'ont qu'à leus laicier minger eds ainnioeus. O des glinnes." ajouteroai'te mes conmarades écologisses.

Conme ch'est bieu un monde ed doucheur ! Qu'ej dis.

Mais feut mie reuver.

Puss cho vo, moinss j'o invie d'aler in montaingne, et cho m'inrage.

Conme un leu, qu'ej dviens.

Boinne jornée.

Edutcher ches filles

Granmint ed familles qu'ont ieu des filles ont réussi à 'ls élever conme i feut.

Minme chi des keups, o bin à des périodes ed leu vie, ch'étoait p't'ête puss malaisié.

Mais in principe, in général, z'ont réussi.

L'eute jour, j'o lu quèk cose qui m'foait buser :

Un onme, jornaleu célébe, o deus tiotés filles. Et l'o mèrié avuc un eute onme, cose qu'est achteure admise edpi quèks innées.

Don, ches deus onmes s'otchupe'te ed leus filles. Qu'ont un molet moinss ed dis ins, qu'i m'sanne.

Fin bin !

Mais din troés o quat ins ?

Seuremint qu'is voudront toudi s'in otchuper conme i feut !

Mais jou eq des gins n'pourroai'te mie s'dminder chi i feudroait mie unne vraie mère à ches deus éfants ?

Qui n'in sront pu vraimint eds éfants !

Merchi ed mé bailler vot avis lò-dsu.

Boinne jornée.

Et din ch'vrai Est

- "Din l'Est (ech vrai Est del Frinche qu'ej précise), ech Chinte-Est et ch'Nord-Est, i éro des rimèes."

Qu'o dit un eute jornaleu ièr.

Disez-mi !

Jou qu'ech Chinte-Est et ch'Nord-Est n'sont mie din chl'Est ?

Ches jornaleus sont p't'ête poaiyés à chake mot !?

O bin, à chake cacouille ?!

N'sais mie ! Mais i m'font rire.

Conme is m'intchiét'te étou.

Boinne jornée, et prindez unne crosse casake pour aller à l'cour.

Ech boin indroét

Sinmdi, in rbéïant l'télévision, j'o intindu un jornaleu causer ed ches timpératures dech lindman qui éro din ch'sud-ouest del Frinche :

- "Dis-sèt à Biérritz, vint Clermont-Ferrind, dis-uit à Lyon et Dis-sèt à Grenobe."

!

Lò, ej croés eq ches gins dech sud-ouest ont annexé granmint ed térritoère dech sud-est del Frinche.

Mais mie un n'in avoait causé.

A coeuse ed ches Gannes Espincers, p't'ête ?!

Prudinche.

Et boinne jornée.

J'in profite pour annoncher à Tertous eq Ches Bleusés Castchètes ont achteure un site chu internénet.

Ches moéyins ed transport

Edpi quèks smangnes, i o, casi pertoute in Frinche, des rincontes pour dviser ed toute, et d'rin.

Ech grind débat !

L'eute jour, in voéyageant, j'o intindu à l'radio unne réclame pour unne rinconte chu ches moéyins ed transport. In Bourgone-Frinche-Comté.

A Coèrbiny, din l'Niève, qu'ale sro l'rinconte.

Foaisez conme mi, rbéïez chu unne carte dò qu'es truvoe Coèrbiny !

A l'ouest del Bourgone.

Et ches voées pour s'i rinde oblige'te tertout à rouler à moinss ed soéçante kilomètes per eure.

Ed Bsançon à Coèrbiny, miu ed deus eures.

Ed Dijon à Coèrbiny, casi deus eures.

Ed Macon à Coèrbiny, miu ed deus eures.

Seur eq ches gins ed Coèrbiny ont invie de dviser chu ches moéyins ed transport.

Mais ches eutes, z'ont mie ches moéyins d'i aller.

Adon, dvisons chu ches rincontes.

Boinne jornée.

Ureus ches pauves

... qu'i o d'écrit din chl'évingile d'innui.

Malur pour ches riches.

Qu'i o étou d'écrit aprè.

Conme o dit Jésus à chl'apôte Thomas quanq i l'o ressucité, ureus chti qui croét chin vir.

Bin innui, ch'est l'minme cose : feut croère eq ches pauves sont puss ureus eq ches riches.

Mais, seur qu'i n'o qu'ont du mau à l'croère.

Boin diminche.

I vo s'intraîner

Ch'est l'histoère d'un boskeu qu'o bostché des cadoreus i o quèks smangnes, un sinmdi.

Ièr, ch'tribunal l'o condanné à deus innées ed prison.

Bin lò, ech nouvieu célèbe boskeu - avant ed passer à l'télé o din ches gasètes, l'étoait mie célèbe - i vo pouvoèr s'intraîner.

Per eximpe, à rconnoaite ches cadoreus pour n'mie les butcher.

In étant innui, ech quatore dech moés ed févrié, ej souhaite unne boinne fète à ches cadoreus. Ches eutes cadoreus.

Qui s'ainme'te.

Em cacouille ed lindi

Coèr un keup, ej vos dviser dech train.

Inter Péris et Sin-Kintin.

Ièr au vèpe, adon qu'ej rintroais ed min ouvrage, l'étoait miu ed dis nu eures.

Ej dis cho pour qu'os comprindez : à l'cour, i foaisoait fin noèrt.

Os alloème arriver à Noéyon, l'station lò dò qu'ej deschinds, quanq unne fanme, assise, mé dminde :

- "Jou qu'os arrivons à Cheuny ?"

Pour rire, mais chin rire, j'i réponds :

- "Cheuny, os l'avons djò passé."

L'fanme rit adon conme un Espincèr : ganne

J'i dit adon quoé qu'est vrai :

- "Os arrivons à Noéyon."

Pi, ej m'in vo.

Ureus d'ém cacouille.

Boin voéyage.

In train.

Un monumint

... put in mucher un eute.

Din un village del Drôme, chu l'place, i o deus monumints, dont un qu'est pour ches jueus ed boules ed pétanke, et qui s'lonme Fanny.

Quanq ches jueus perde'te trèse à zéro, is doé'te imbrasser ech tchu ed Fanny, el statue.

Bin ouais ! Mais l'eute monumint, chu l'place, est in mémoère ed ches gins morts à l'djère.

I o quèks tans, l'staue ed Fanny o étè déplacé, et achteure ches gins qui vienne'te vir ech monumint pour ches morts, is pense'te qu'ech monumint pour l'pétanque est un molet trop près.

I feudroait don déplacer Fanny coèr un keup.

Mais dò-jou eq ches jueus vont aller juer ?

Qué donmage d'in arriver lò !

Dvant un mur

Pour ches gins qui ont jonmoais allé à Jérusalèm pour, per eximpe, vir ch'fanmeus mur, ej vos propose unne photo.

Conme cho, os érez chl'impression d'i ête allé.

Minme chi ch'mur lò, ch'est ch'mur d'amon min voésin.

Mais boin ! Mi étou, j'o jonmaois allé à Jérusalèm.

Boin diminche.

Et pour prier, os êtes mie obligé d'ête dvant un mur.

Ches avules et ches trottinètes

... électrikes.

Ches trottinètes électrikes, ch'est nouvieu edpi quèks innées.

Mais i o coèr puss nouvieu : ed pouvoèr els imprunter.

Et d'les laicier dò qu'os voulons, quanq os voulons.

Os voéyons cho granmint in ville, os in voéyez in ville.

Conme mi.

Mais ches avules, vu qu'is sont avules, minme avuc unne canne, is n'les voé'te mie.

O bin is in évit'te unne, mais i in o unne sgonde et p't'ête minme unne troésienme à côté

Et ch'est un cros problinme.

Un sapré cros nouvieu problinme.

Pour des gins qu'in ont djò un.

Ech brin ! Ech nouvieu brin !

Dints d'soée

Os connoaissez echl'espression "in dints ed soée" ?

Ch'est quanq os avez vot moral qui monte pi qui deschind pi qui rmonte pi... . Vot moral varie.

Mais ches dints ed scie ! Quanq l'soée viusit, ale warde ches dints. Qui s'use'te.

Mais ches vius gins, eux, leus dints n'use'te mie, mais tchai'te.

Je n'sais mie chi unne gin o vérifié kmint eq ches retchins ont leus dints qui viusi'te.

Chi os l'savez, o l'avoai'te foait, disez-le mi.

Boinne jornée à tertoutes et tertous.

Un chintimète

Un chintimète d'anisète din un verre d'ieu, cho vo, j'ainme bin, mais aprè, feut miu, pour conduire, del prudinche.

Un chintimète ed ches nèges chu l'keuchie, cho vo, j'ainme bin, et pour conduire, feut étou del prudinche.

Boinne jornée.

Et prudinche chu ches keuchies.

Kmint coésir un présidint

N'in vlò d'unne cose qu'os pouvons tertous et tertoutes se dminder.

In Frinche, ches Gannes Espincers vu'te qu'os cangeons ed présidint.

Ach Vénézuéla, minme cose : des gins di'te qu'is ont cangé ed présidint.

A ches Anmérikes, is devroai'te canger.

In Russie, i n'o p't'ête qu'ainmeroai'te canger. Mais is di'te rin. z'ont l'freusse. Minme, des keups, l'freusse ed penser.

Etpi, etpi, i o chl'Algérie ! Sapré eximpe ! Is cange'te mie ed présidint, adon qu'il est fin viu et qu'il o du mau.

Is cange'te mie, et vont minme l'rmette ch'prochain keup.

Adon eq cho foait des moés, p't'ête eds innées eq mie unne gin l'o vu.

?!?!?!

Pauve démocrachie !

Ouvrir ches fernètes

Seuremeint qu'os l'foaisez din vos moaisons : ouvrir ed tans in tans unne o des fernètes.

Pour aérer vo'moaison.

Minme in ivèr, feut ouvrir.

A pèrt qu'in ivèr, feut rfrunmer quèks minutes aprè.

Sinmdi au matin, j'avoais ouvert l'fernète d'ém cambe. Qu'est étou l'cambe d'ém fanme.

Unne eure aprè , j'l'o frunmée.

Malureusemint, juste aprè, j'o un vint, passé per mes boéyeus, qu'o sorti, avuc des flérinées.

Ureusemint eq diminche, j'o rouvert l'fernète !

Tout vo bin.

Boinne jornée.

Zèf et chin blanc-bonnet

Din ch'tite, ej foais un coin d'ziu à min conmarade Zèf ed ches alintours ed Boulonne-Chu-Ches-Mèrs.

Mais in vrai, ej vux vos causer dech célèbe Zèf et d'es fanme, Mèrie, ches pérints ed Jésus, i o miu ed deus-mile ins.

Zèf 'étoait mie ech vrai père ed Jésus qu'étoait ch'fiu d'es fanme, Mèrie.

Innui din chl'évingile, l'est écrit qu'ech Zèf et s'fanme vont présinter leu fiu din unne église. A chl'époque-lò, os lonmoème cho un timpe.

Ch'étoait unne vieille loé ed Moïse : ech premier papar sro consacré ach Seigneu.

I m'sanne eq cho o cangé.

Mais dvisons chu ches éfants din ches églises.

Ej su toudi ureus ed vir qu'i o coèr des gins, des jonnes, qui vienche'te ech diminche à l'église avuc leus éfants.

Ech puss cros problinme, ech diminche din ches églises, ch'est ed bailler l'invie à ches pèrints, et surtoute à leus galibiés, d'érvnir.

Mais ch'est possibe.

Boin diminche à tertous.

Deus billets à vinde

J'o deus places pour unne rinconte ed fotbal qui sro ech trinte marche à Pèris, rinconte inter Pèris et Marseille.

In vrai, j'o acaté ches billets mille euros chatchun in m'disant qu'echt'innée, ch'alloait ête inter Pèris et Marseille.

Mais achteure, ej sais : cho sro inter Strèsbourg et Guingamp.

Don, ej vinds mes deus billets.

Ch'est unne boinne affoaire : os avez ches deus billets, et dis euros qu'ej vos baille per billet.

Feut quoé qu'i feut.