Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 30 décembre 2018

Edpi ches tans

... qu'ej vos in o djò causé, ed ches rincontes ed rugby inter Toulo (se) et Toulo (n), falloait bin eq cho arrive un jour : eq j'i fuche pour rbéïer.

Au vèpe, à Toulo (se) !

Pourvu eq Toulo (?) gaingne !

A moinns eq min cros catare o ches nèges m'impêque'te qu'i aller.

Boin diminche à tertous.

vendredi 28 décembre 2018

Offrir un bétail à Noë

Ch'est p't'ête echl'idée qu'os avez ieu cht'innée à Noë : offrir un cot, un tchyin o, ch'est possibe, un beudet à un éfant.

O coèr, un pichon rouve, o unne glinne et un co !

Et ch'galibié est fin ureus.

Tant miu !

Mais, ech galibié vo béto rtorner à l'école, et in févrié, i voudro pèrtir in vagances, avuc o chin vos.

Et ch'bétail ?

Quoé qu'i vo adon in foaire ?

L'inmner ?

A chl'école, seuremint poin. O p't'ête un jour, pour in causer avuc chin moaite et ches conmarades ed classe.

In vagances ?

Chi ch'est amon chin taïon, p't'ête !

Mais chi ch'est à ches nèges, din un appèrtémint, mie possibe.

Surtoute chi il o ieu un beudet !

Etpi, jou qu'os avez pensé à ches eutes gins quanq os avez acaté ch'bétail ?

Magine deus familles qui vienche'te deus jours amon leus pèrints, chatchunne avuc un tchyin !

Magine quanq il arrive d'eutes gins pour ête avuc eux !

Cho put mette un cros brin din l'moaison : pour vive trantchille, et aprè, inter ches gins.

Adon, vraimint, quanq os voulez offrir un tchyin,un cot o eute à unne gin, busez granmint.

Et bin.

Boinne jornée.

jeudi 27 décembre 2018

D'ivèr o bin d'étè

Os l'savez p't'ête, chin quoé, os allez l'apprinde achteure, i o des freumages, dits, d'étè o d'ivèr.

Per eximpe, ch'Bieufort.

Slon quoé eq matche'te ches vakes, à l'cour in étè o din unne étabe l'ivèr, ch'Bieufort n'o mie ch'minme goût.

In général, feut miu acater et minger ech Bieufort d'étè, minme chi chti d'ivèr est fin boin étou.

Eh bin ! Rin à vir avuc ches freumages, mais j'o démuché ièr qu'i avoait deus Sin-Jean : unne in étè, ech vint-troés join, et l'eute innui, ech vint-sèt déchimbe.

Mie croéyabe, mais vrai !

Don, boinne fête à ches Jean qu'ont leu fête innui, et boinne jornée à tertous.

dimanche 23 décembre 2018

Ch'étoait un vint-troés déchimbe

Un éfant est né.

Alintour ed li, mie ed roés-mages, vake o beudet, mais des frères et unne soeur, ed des punmes-ed-tère.

Ch'étoait mie i o deus-mile-dis-uit ins, mais quater-vint-uns.

Edpi, il est mort, un molet aprè Pâke i o miu ed sis ins, adon eq l'eute, né ech vint-chonc i o deus-mile-dis-uit innées, sroait toudi vivant, minme chi li étou étoait in premier mort à Pâke.

L'un alloait dvenir min père, l'eute sroait not Père à tertous.

Bec à tertous, et boin diminche.


samedi 22 décembre 2018

Ch'est du chinoés

El joée est in toute. I suffit ed savoèr l'estraire.

Qu'il o dit, un chinoés né chonc-chint-chincante-et-unne innées avant ech Christ, est mort edpi.

Feut del déméfiance : ech chinoés, fin célèbe, il avoait un nom ed romain.

Boinnés vagances à tertous.


vendredi 21 décembre 2018

Edpi qu'is ont né

J'ainme mie ête mawais conme ej vo l'ête aprè, mais ch'est malureusemint vrai.

Din l'vie, i o toudi des gins qui djeule'te.

Pour un ouais o pour un rin, des gins djeule'te.

Achteure, os voéyons minme des jonnes os indjeuler.

Mais mardi, din ch'train eq j'o prins au matin pour aller ouvrer, l'étoait miu ed uit eures pour un keup, ej m'o su foait indjeulé per un papar.

Mie croéyabe, mais vrai !

I avoait unne jonne fanme, qui vnoait d'un poaiyis ed l'est, qu'étoait din ch'train avuc ches quat galibiés. Ech pu grind avoait alintour ed chonc o sis ins.

Et ches tiots juoai'te, conme chi 's'étoai'te tout seu din ch'train.

Leu mère laicoait foaire et n'disoait rin.

D'un keup, un ed ches quat foait tchair ech pu grind.

Qu'o cru eq ch'étoait mi qui l'avoait poussé.

Et qui m'o indjeulé.

Un molet aprè, adon qu'ech train alloait s'arter in station et eq j'alloait deschinde, ech darain, moinss d'un in, assis din ch'poussète, me rbée et m'indjeule étou.

J'o rin comprins, à pèrt qu'i m'indjeuloait.

A croère qu'is apprinde'te in sortant del panche ed leu mère.


jeudi 20 décembre 2018

L'ėtoait bin trop jonne

Ièr au matin, adon eq j'alloais, conme chake jour, prinde min train pour aller ouvrer, vlò eq chu un pont, i avoait un car d'arté.

Ej passe à man gueuche, et jé m'rinds compte que ch'mneu est deschindu ; i tient une jonne fille qui brait granmint.

Mi étou, ej m'arte et cht'onme m'dit :

- "Ale vouloait seuter dech pont."

L'étoait alintour ed sis-eures et quèrt, et l'ieu, dis à tchinze mètes in dsou dech pont, est froéde.

Adon, j'appelle ches cadoreux qui rest'te à un kilomète.

Z'ont mis tchinze minutes à vnir !

Durant un quèrt d'eure, cho sanne fin long quanq ch'est conme cho, cht'onme o toudi tnu l'tiote, alintour ed seize o dis-sèt ins d'ages, qui braiyoait et qu'o minme déloufé.

- "Os êtes bin régalant" qu'ale disoait l'pauve fille à chin seuveu, "mais laiciez-mi moérir !"

L'eute n'o rin laché.

Et ches cadoreus sont arrivés.

Infin !

Mi, j'o loupé min train pour troés minutes, et ch'deusienme étoait supprimé.

Mais i m'sanne eq j'o étè utile.

Jornée à oblier, malaisié, mais mie l'tiote et cht'onme.


mardi 18 décembre 2018

Is ont-i confondus

Quanq ches agricultcheus sont in prousse aprè ech gouvernemint et ch'présidint, is mettent du fyin et du brin chu ches voées et ches keuchies, o dvint ches moaisons ed ches onmes politikes ed leu région.

L'eute nuit, in Picardie, is ont du foaire unne berlure chin l'vouloèr : is ont ch'fyin dvint l'permaninche dechl'insoumis Frincoés Ruffin.

P't'ête qu'echt'onme reste mie loin d'amon not présidin, à Anmyin, o qu'in vrai, ch'est à boin conmarade à ch'Présidint.

Mais, à pert ches agricultcheus, mie unne gin ne l'savoait.

Avant eq j'in cause.

Boinne jornée.

lundi 17 décembre 2018

Ndan ed ti

Jou eq tu t'connoais bin ? In ndan ed ti ?

Os pouvons nos l'dminder.

Quanq ej su rintré ed mes vagances chu ches Kmins ed St-Jacques-ed-Compostelle, in octobe, conme chatchun l'foait aprè ches vagances, j'in o causé à mn'interprinze.

Et lò, unne fanme m'dit, quanq os étoème ale et mi à bir un tiot ju :

- "Tu traches tin ndan ?

- "Euh ! Mie vraimint !" eq j'i réponds.

- "Tu mèrches tou seu et in silinche ?" qu'ale continue à mé dminder.

- "Nan !".

- "Adon, tu foais mie ech Kmin ed St-Jacques-ed-Compostelle ! Tu foais del mèrche."

- "Euh ! ..." eq j'hésite coèr à i réponde.

- "Mi, ej l'o foait, ech Kmin ed St-Jacques-ed-Compostelle, i o quèks innées. In voéture.

Ch'étoait fin malaisié, vu qu'i falloait truvoer ches écailles pour avincher.

Ti, tu t'proménes."

Mes bros ont tcheus, et j'o mie ieu invie ed continuer dé dviser avuc l'fanme-lò.

Ches kmins ed St-Jacques-ed-Compostelle in voéture !!!!!!


dimanche 16 décembre 2018

Eglise o théïâte

L'eute jour, à l'télé, j'o vu un tchuré ed l'Abbaye dech Mont-Ste-Odile causé ed ches gins qui vienche'te à l'église.

- "Ach théïâte, ches gins s'mette dvan si possibe ; à l'église, is s'mette din ch'fond."

Busez.

Boin diminche.

vendredi 14 décembre 2018

Din ches gasètes

... puss qu'ej trache, moinss qu'ej truvoe ed coses régalantes à vos conter.

Dech keup-lò, ej vo p't'ête arter ed vos écrire quèks lignes chake jour.

Mais ej vos écriro ed tans in tans. P't'ête chake jour, chi ej pense qu'i o des coses à dire.

Din qué monde qu'os sonmes ?!


Chi conme mi, t'os unne mère qui s'lonme Didile, foais-i un cros bec innui.

jeudi 13 décembre 2018

I in o coèr

... ed ches obus del première djère mondiale.

Din ches tères

Malureusemeint !

L'eute jour, i n'o un qu'o esplosé à Maricourt, din unne cinse dech Bos Mdame, adon qu'eds ouvreus ouvroai'te.

Deux ouvreus ont étè inmnés achl'ôpital d'Anmyin, mais rin ed grave.

Ureusemint.

mardi 11 décembre 2018

Ches dis et douse déchimbe

J'o un cros problinme avuc ech onze déchimbe, jour ed ches ages d'em première fille.

Ièr, à dis-uit eures deus à Fienvileu, z'étoème djò ech onze déchimbe à Krasnoyarschk.

Jou qu'ej pouvoais adon souhaiter ches ages à m'fille ?

Et innui, à vint-troés eures chincante-nu à Parnou, jou qu'ej pourrai coèr souhaiter ches ages à m'fille, adon qu'is sront djò ech douse dech moés ed déchimbe à Krasnoyarschk ?

M'fille o l'réponse :

- "Ems ages vont durer trinte eures."

Ale est ureuse.

Cros bec à m'fille.

Minme probinme : pour ech tchinze déchimbe etches ages ed min bieu-fiu qu'est avuc m'fille.

lundi 10 décembre 2018

Unne moaison à l'campaingne

Qui n'o jonmoais reuver d'acater o d'avir unne moaison à l'campaingne ?

Mi, j'i su.

Et ureus de l'ête.

Mais i o unne famille, ej mé dminde chi l'o du plaisi ?!

Rbéïez !


Qui, del moaison o ed ches interprinzes, étoai'te lò in premier ?

Boinne jornée.


dimanche 9 décembre 2018

Ches tchus-cuinchés

I o unne smangne, ej vos o causé d'unne série qui o chu l'picarde cangne, Arte, l'judi au vèpe.

Et j'in o causé, étou, à ches chrétiens ed min village, pour qu'is rbéche'te et n'in foaiche'te, chi is vu'te, del réclame.

Mais is ont dit nan.

Ch'est vrai eq ch'est unne série qui cause'te ed réligion, mais dò qu'ech tchuré est un pasteur mèrié, dò qu'os voéyons du tchu, des gins qui boaise'te, o ches tètes ed fanmes.

Ch'est p't'ête pour cho qu'is m'ont répondu nan, ches responsabes chrétiens.

Mais chi ches tchus-bénis vu'te qu'i o du monde, des jonnes din nos églises, feut savoèr évoluer.

Din l'série, tout n'est mie boin à prinde o à vir, mais i avoait des boinnés coses.

Donmage d'én mie in avoèr foait puss ed réclame.


samedi 8 décembre 2018

Réponse pour l'édvinète

... dech vint-uit novimbe.

Ches vakes, qui sont eds Aubrac, ont été prins in photo in Espane.

Ej merchoais din l'provinche ed Cantabria eq j'alloais tchitter quèks kilomètes aprè, alintour d'Unqueria, quanq ej les o vues.

In vrai, in Cantabria, et din ches Asturies, i o granmint ed vakes Aubrac.

Tant miu, vu qu'is sont fin bieus.

Et vu eq j'ainme granmint l'région d'Aubrac, in Frinche.

Boinne jornée à tertous.

vendredi 7 décembre 2018

Ches leus

I éroait achteure, qu'i péroait, miu ed chonc-chint leus in Frinche.

Avuc ch'nombe-lò, ches leus, qu'i péroait, peu'te s'rproduire.

J'lé savoais mie, mais à moinss ed chonc-chint, tu pux mie t'érproduire !

Don, ches leus vont coèr s'multiplier.

Et conme cantoait Serge Reggiani, in frinchoés, ches leus ont intré din Pèris.

Manière ed causer.

Mais il avoait raison.


jeudi 6 décembre 2018

Un fin bieu chinglier

Lindi au vèpe, in rintrant ed min ouvrage, j'o vu un fin bieu chinglier.

Fin cros, alintour ed chint tchilos.

Ej l'o bin rbéïé.

Feut dire eq ch'étoait aisié !

L'étoait allongé, et mort, chu ches bords del keuchie.

Et à côté, i avoait unne voéture. In rade.

Ches ch'boucher ed Saint Nicolas qu'éroait étè ureus ed mette toute l'vianne din chin saloèr.

J'in profite pour souhaiter unne boinne Saint-Nicolas à tertous ches gins qui s'lonme'te Nicolas.

mercredi 5 décembre 2018

Tu pux alunmer

Ièr, echl'ôpital d'Anmyin o ieu un problinme d'éctricité.

Un sapré problinme, vu eq durant miu d'unne eure, i avoait pu d'éctricité.

Magine !

Un séruzyin qu'étoait in route à opérer unne gin quanq i o ieu ch'problinme.


Quèks minutes aprè :

- "Quoé eq t'os foait ?" i dminde un collègue.

- "J'os voulu keuper l'man qu'étoait afolée" qu'i répond echt onme.

- "Ouais ! Bin t'os keupé l'gambe !"

Mi, ej dis eq pour ches gins qui sont opérés, i o mie ed problinme, vu qu'is dorme'te quanq ches séruzyins s'otchupe'te d'eux.

Mais quanq minme !

Chi t'es unne fille qui vit avuc min fiu, eq t'ouves des keups din un ôpital, et eq t'os ets ages innui, cros à ti. Et à min fiu.


mardi 4 décembre 2018

Adé min père

Ej vos o, granmint ed keups, causé dech Christ, ed ches évingiles, et ed ches tchurés.

Adé min père !

Min père, él seul vrai eq j'o ieu, o défuncté i o miu ed sis ins.

Edjò !

Innui, ej causero d'un eute père qui vient d'ertorner vir chin Père : not ancien tchuré.

L'o rindu chin darain souffe verdi, à quater-vint-deus ins.

Etoème coér in novimbe.

Innui, à nu eures, i sro interé.

Pour m'fanme et éms éfants, ch'étoait un onme régalant, ouvert d'esprit, et seuchant acouter.

Quanq il o prins s'artraite, à soéçante-quatore ins, os l'avons granmint rgretté.

Nu innées aprè, l'est mort.

Trantchillemint, din chin lit dò qu'il étoait edpi quèks innées.

Adé, brave tchuré ! Fuche ureus lò dò eq tu vos.

Chi t'es min fin boin cousin, eq t'os l'canche, ti, d'ête in vie, et eq t'os ets ages innui, fin cros becs à ti.


lundi 3 décembre 2018

Unne surprinze ed puss

Névers, din l'Niève, os connoaissez ?

Ach poaiyis des vakes, i o achteure des gins qui ju'te ach rugby.

Et edpi diminche quanq is ont gaingné in juant dvant Carcassone, echl'étchipe ed Névers est première del deusienme division ed rugby ed Frinche.

Ech campionnat n'est mie défini, mais maginez din un in Névers juer avuc Clermont o bin Toulouse !

Mi, ej dis eq, ch'est étou unne conséquinche dech rékeuffemint dech climat : pu cho vo, pu ches étchipes dech nord ju'te ach rugby, et puss is gaingneront.

Jou qu'is vont in causer à Katoviche ?

A vir.

Chi t'os ets ages innui , eq t'es m'nièce et eq t'es ach Québec, cros bec à ti.

 

dimanche 2 décembre 2018

Au nom dech père

Ch'est ch'tite d'unne série in plusieurs épisodes qu'o kminché judi chu Arte, l'fanmeuse cangne picarde qu'ej vos in o djò causé.

Ches épidodes cause'te d'unne famille chrétienne et de s'vie.

Et ch'premier épisode o bin kminché.

Ej vos conseille de rbéïer.

Boin diminche à vos.


samedi 1 décembre 2018

Ches éfants-roés

Tertous ches jornaleus in cause'te edpi quèks jours, ches politikes vu'te interdir eq ches pèrints butch'te leus galibiés.

Unne tiote fessée ?

Nan ! Pu l'droét.

Merkerdi, j'o lu un article qui dvisoait chu ches éfants suédoés. O norvégiens. Ej sais pu, mais is étoai'te dech grind nord.

Il étoait écrit eq din ch'poaiyis dò ches pèrints n'peu'te pu butcher leus éfants edpi granmint ed tans, ches éfants sont dvenus roés.

Ches galibiés déchide'te achteure quoé qu'is vont minger, quanq is vont aller s'joutcher, et minme dò qu'is vront in vagances.

Quanq ej lis cho, j'o invie ed dire à nos politikes ed foaire atincion à quoé qu'is vont prinde conme déchision.

Et chi un tiot dech grind nord vient à m'moaison, feut i dire qu'ej su indépindint.

Boinne jornée, et boinne fète àntertous qui s'lonme'te Eloi.