Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

jeudi 29 août 2019

Lette à un merre


... din un tiot village del Sonme.



Monsieu ch'Merre, bojour.

J'écris innui vu qu'i o quèks jours, j'o dormi à Gueuvilé et eq j'o ieu quèks problinmes.

Ej t'esplique :

M'fanme et mi vouloème dormir à Gueuvilé, et i avons dormi. In vrai, os avons assayé ed dormir. Not'problinme, ch'o étè ches canèrds et ches glinnes din ch'village.

Ches premiers, ches canèrds, cant'te fin timpe au matin, alintour ed quat eures. Os avons ieu granmint ed mau à nos indormir.

Et quanq os étoème indormis, vlò eq ches deusienmes, ches glinnes, ponde'te ed us. Et s'met'te à glousser granmint ed tans, fin ureus qu'is sont d'avir pondu. Mais l'étoait sèt eures !

Ureusemint pour nos qu'i avoait mie ed beudets, et qu'ech tchuré n'o mie sonné ches clokes !

Vu eq t'es unne boinne gin, eq min frère m'o dit, ej t'écris pour eq tu dmindes à ch'merre ed Gueuvilé, eq tu connaois seuremint, d'interdire à ches bétails ed canter inter vint eures et dis eures, pour eq ches gins peu'te dormir trantchille ; min blanc-bonnet et mi ainmeroème rtorner à Gueuvilé pour visiter ech village et ches alintours.

Boinne canche à ti, et merchi ed m'écrire pour qu'ej seuche chi ch'est foait. A moinss eq tu vienches à no'moaison, avuc t'fanme chi tu vux, bir un ju et in causer.

A béto !,

                                                                                               ED

mercredi 28 août 2019

Un chin fu n'lu pèrte in voéyage

Ch'étoait à Lile, et ch'est min frère qui m'o conté quoé qu'ej vo écrire achteure.

Don, min frère étoait à Lile un jour.

I voét un chin fu n'lu avuc unne boutèle d'ieu din s'main gueuche.

Cht'onme s'boaisse pour haper l'bertèle à main droéte ed chin so à dos, et l'mette dsu chin dos.

Pi, i met s'boutèle d'ieu à main droéte pour haper achteure l'bertèle à main gueuche ed chin so à dos.

Infin, i pose ch'boutèle et frunme ech chinture dech so dvant ch'panche.

Pi, i pèrte.

Min frère, qu'i n'boét mie granmint, et qui ch'jour-lò n'avoait poin bu, o vraimint vu cht'onme foaire tout cho.

Mais in vrai, ech chin fu n'lu n'avoait poin ed so à dos.

J'in profite pour dire à ches gins qui connoaisse'te mie Lile eq ch'est unne fin bèle ville.




Boinne jornée à tertous.


dimanche 25 août 2019

Ches lusés ed zinc

Ches lusés ed zinc, ch'est ch'tite d'un live qu'nne ed mes filles m'o offert i o quèks smangnes.

Ch'est un live écrit pèr unne russe, Svetlana Alexievitch, chu l'djère foaite pèr ches russes in Afdjanichtan, din ches innées mile-nu-chint-quater-vint.

Quanq l'Russie étoait coèr unne union ed républikes.

Ch'live, fin bin à lire, j'o kminché del lire.

- "Pourquoé qu'os sonmes allés foaire l'djère lò-bos ?" di'te ches gins qu'in sont rvenus.

- "Pourquoé qu'is sont allés foaire l'djère lò-bos ?" di'te ches gins qu'ont mie vu leu fiu rvenir..O bin rvenir saprémint nikdouilles !

Acatez mie ch'live pour des tiots, mais pour vos.

L'est fin bin écrit.

Grin merchi à m'fille.


vendredi 23 août 2019

Courir pour monter din ch'train

L'eute moés, un jiur timpe au matin, adon qu'ech train vnoait ed s'arter in station pour deus minutes, j'o vu, deus keups, eds onmes courir pour monter à l'eute beut dech train.

Pourquoé ?

Pourquoé courir quanq is n'avoai'te qu'à monter ndan lò dò qu'is étoai'te et aprè, traverser ech train pour aller s'assir dò qu'is vouloai'te !

Quanq ech train sro pèrti.

Avuc eux !

Bin nan ! I feut qu'is mont'te dò qu'is vont s'assir. Minme chi pour cho, is risque'te ed louper leu train !

Ch'est cho qu'est bin avuc ches trains, os avons des coses à conter.

Et ch'est mie défini !

Boinne jornée.

mardi 20 août 2019

O don qu'os allons conme cho

... qu'ale o dmindé, i o miu ed quarante-chonc ins djò, m'rataïonne à chin bieu-fiu qu'étoait in route à mette s'voéture, avuc s'fanme, s'bèle-mère et li, din un fossé, inter Tchin-Plage et Moreu.

Is s'in sont sortis chin mau, rasseurez-vos.

Avuc m'fanme, os nos avons posé l'minme cose in allant mèrcher in montaingne.

Feut dire qu'i avoait un sapré brouillar et qu'os i voéyoème, des keups, casi rin.

Rbéïez.

Ach dépèrt, l'étoait écrit qu'os avoème troés eures et chincante-chonc minutes à monter.

Mais miu ed troés eures choncante-chonc minutes aprè, vlò dò qu'os étoème.


Os avons coèr grimpé unne eure et trinte minutes.

Chin freusse, mais à chake keup qu'os croésoème des gins, is nos disoai'te :

- "Coèr unne dmi-eure.

Infin, os i sonmes arrivés, toudi din ch'broullar.


M'fanme étoait ureuse. Et mi étou.

Unne eure aprè, os étoème bin au keud, din un boin rfuge, ché Rfuge ed ches Mèrches.

Cros avintage : deus jours aprè, pour rintrer, i foaisoait bieu. Os avons vu des coses qu'os avoème poin vu ch'premier jour.

Chi ch'kmin vos intéresse, écrivez-mi.

Boin étè.


dimanche 18 août 2019

Combin qu'os avons ed vie

I o des gins, is di'te qu'os avons unne vie avant ed moérir. Etpi ch'est toute.

D'eutes, is di'te qu'i o deus vies: unne avant ed moérir, et unne eute aprè ête mort.

Un jour, un jonne ed trèse ins qu'alloait moérir, vu ch'mau ed chin sanke qu'il avoait, o dit à un tchuré et ches pérints :

- "Os avons qu'unne vie ; l'mort est simpemint unne mèrche à passer."

Ch'galibié est mort, mais ch'tchuré o bin ainmé quoé qu'il avoait dit.

Et ch'tchuré, minme à soéçante-dis-uit ins, ouve toudi.

Et dvise.

Busez.

Din ch'minme esprit :

Din un film, verdi au vèpe, un onme lit l'gasète du jour à un eute onme.

Qu'est mort.

Un troésienme onme i dit :

- "Pourquoé eq t'i lis l'gasète ?"

- "Chake jour, à uit eures, j'i lis l'gasète du jour."

- "Ouais ! Mais il est mort !"

- "Ouais ! Mais il est lò."

Busez coèr.

Et boin diminche à tertous.

samedi 17 août 2019

Causons coèr ed Chambly

Esn étchipe première ed fotbal o perdu seulemint quat points in quat rincontes edpi un moés.

Mais autchunne rinconte ed perdue.

Minme ièr à Caen, dvant Caen !

Continuez, ches jonnes.

Ches picards sont drière vos.

A suive.


vendredi 16 août 2019

Quanq os irez chkier

... in ivèr in Savoée, chi os voyez unne bèle nouvèle voée, seuchez eq cho n'o mie étè chin mau.

Pour l'montaingne, qu'il est ch'mau.


 Rin d'eute à dire.

A pèrt à ches écologisses qui li'te min blog.

Et qui iront chkier in Savoée : pensez à mi.



mardi 13 août 2019

Ches cos opposés à ches glinnes

Din unne vie normale, un co ainme bin ête avuc unne o quèks glinnes.

Et chi i o granmint ed glinnes, l'est miu d'avir granmint ed cos.

Eh bin !?

J'o apprins verdi eq din un hamieu del Mèrne, chl'Hamieu ed ches Cos, ches gins n'vouloai'te mie ed glinnes.

Os s'dmindons quoé qu'is ont din leu tête ?

Ch'est un molet pour cho eq j'o kminché pèr écrire "din unne vie normale".

Vu qu'i m'sanne qu'os n'i sonmes pu, din unne vie normale.

A béto.

Boinne jornée.


dimanche 11 août 2019

Ech tans

Ech tans qui passe
Ech tans à l'ouvrage
El nuit ed ches tans
Echl'air dech tans
Ech tans perdu
Avuc ech tans
Ech tans ed Diu
Ech tans ed pose
Ches tans qui coure'te
El fin ed ches tans

... et prinde chin tans.

Merchi l'Vie.

Boin diminche.


vendredi 9 août 2019

Des nouvèles dech Noèrt Rnèrd

Ech Noèrt Rnèrd, fin miu connu avuc ch'tiot nom ed Zorro, o ches âges innui : chint ins.

Eh ouais !

Cho foait chin ins eq des gins fuche'te seuvés pèr Zorro ed ches mawais qu'i o din ch'monde.

Surtoute à ches Anmérikes, qu'is sont ches mawais.

Ech Noèrt Rnèrd, il o un secret pour n'mie viusir, mais ej pux mie vos in causer, vu eq ch'est un scret.

Aprè, pour un keup, ej vo ête régalant avuc ches jornaleus : edpi chint ins, i in o toudi un pour filmer ches esploéts ed Zorro et nos les moutrer aprè.

Sapré Zorro ! I rsanne à unne gin qu'os voéyons granmint, Diego Del Védja, mais ch'est poin li.

In vrai, mie unne gin n'pense qu'ho puche ête li.

Mi, j'hésite.

Pour définir chl'article,  j'ainmeroais dminder à ch'Noèrt Rnèrd, quanq i liro min blog, ed s'otchuper d'un cros nikdouille mawais qu'i reste din unne Blanke Moaison.

D'avinche, merchi.

Et continue.

Bec à ti.

Et à tin noèrt kvau.

P't'ête qu'os pourroème foaire un film decht'onme-lò ?!





jeudi 8 août 2019

Baillez vot sanke

A l'ôpital, pour soégner ches gins, i feut granmint ed sanke.

Et ches ôpitaus, is n'in minque'te ed sanke.

Adon, os l'avez vu o intindu, i o des réclames pour qu'os baillons not sanke.

Tertout put l'bailler, chin sanke, mais tertout n'est mie accepté.

Pour mi, ch'est un problinme : ches ôpitaus, is n'in rfuse'te granmint ed gins qui voudroai'te bin bailler leu sanke.

Ches gins rfusés, l'ont djò ieu des maus. Ch'est pour cho eq ches ôpitaux n'in vu'te mie.

Disez- mi ! Achteure qu'os pouvons aller chu chl'lunme o s'vir quanq os téléphonons, jou qu'i sroait mie possibe ed néttier ches sankes érchus ?

Jou qu'i o des scieintifikes qui trache'te pour cho ?

I o lò unne vraie urginche.
 
Boinne jornée, boinnés vagances.


mardi 6 août 2019

Min voésin Totoro

In viusichant, ches galibiés oblieront p't'ête ches boins films japonoés ed Miyasatchi, conme Min voésin Totoro, Ech voéyage ed Chihiro, o coèr, Ech catieu din ches tans.

P't'ête qu'is oblieront, ch'est donmage, mais feut surtoute mie qu'is obliche'te ech sis dech moés d'eu mile-nu-chint-quarante-chonc.

Et Hiroshima, détruite d'un keup, d'un seu, pèr unne bombe anméritchiène.

Ches jonnes et mi étoème mie nés in ches tans-lò, mais chi os oblions, cho pourroait rkmincher un jour.

Quanq tu voés ches âges dech présidint anméritchin, li o seuremint connu. Et oblié.

Qué malur qu'ed n'avir un conme cho !

Pérints, causez à vos éfants.

Et n'euchez mie l'freusse ed leu moutrer ches films ed Miyasatchi. In rbéant avuc eux.

Boin étè.


lundi 5 août 2019

Os connoaissez Chambly

I o un molet puss ed deus ins, mie granmint ed gins connoaissoai'te ech tiot village ed l'Oése.

Mais i o un molet puss ed deus ins, mais un molet moinss eq ches puss ed deus ins d'au dsu, ches gins ont démuché eq Chambly existoait , pèr esn étchipe ed fotbal qu'o mantché ed gaingner l'Keupe ed Frinche.

Echt'innée-lò, echl'étchipe ed fotbal o étou mantché d'érdeschinde ed division.

Mais, n'o mie déchindu.

Ureusemint pour ches picards.

Un in aprè, ch'est l'inverse ; chl'étchipe ed fotbal ed Chambly monte in deusienme division dech championnat ed Frinche ed fotbal.

Et don, edpi deus smangnes, echl'étchipe jue in deusienme division.

Deus rincontes in championnat, deus rincontes gaingnées.

Et vlò ! Chambly est premier. Echl'étchipe ed fotbal est première. O casi, vu eq deus eutes étchipes étou ont gaingné deus rincontes.

Coèr trinte-sis rincontes, et os sérons chi is ju'te aprè in première division.

Boinne canche à eux.

Is n'éront dzoin.

Seuremint.


dimanche 4 août 2019

Vive riche et ête rgardant

Din chl'évingile d'innui, Sin Luc nos cause d'un onme fin riche et un molet, qu'i sanne, rgardant pour dépinser sn'argint, vu qu'i n'in vut toudi puss.

Mais Diu annonche acht'onme qu'i vo moérir.

Don, à rtnir, qu'ej pense, dechl'évingile : t'es riche, t'es pauve, tu creuves quanq minme.

Conme l'o étou dit Pierre Péchin. Qu'i m'sanne.

Busez !

Boin étè, boin diminche.


vendredi 2 août 2019

Un nikdouille s'filme

... in route à lancier chin érfroédoèr din in heut d'unne montaingne.

Deus coses pour eq j'écriche eq ch'est un nikdouille :

- d'unne, feut mie ruer un érfroédoèr, o eute cose conme machine, à l'cour,

- deuze, i s'o filmé et l'o montré chu internénet. Fin crosse berlure !

Ches cadoreus ont vu ch'film, ont pu retrouver cht'onme, et i ont dmindé d'érmonter chl'ingin in heut.

Et is l'ont filmé.

Miu ed chint mètes de heut !

Sanne qu'il o ieu granmint ed mau. Minme aidé pèr un eute. Qu'est p't'ête chti qui filmoait ach début ?!

Mi, ej l'éroais mis à  l'frêche.

Respectez l'nature, et fuchez prudent quanq os mettez quèk cose chu internénet.

Boin étè.


jeudi 1 août 2019

Is ont rtcheu

Des gins qui tchai'te chu leu tchu o leus génous, os in voéyons. Et quanq cho arrive, ej viens ed l'écrire, os les voéyons.

Mais mi, ej vux dviser innui ed ches gins qu'avoai'te arté ed funmer o bir granmint, edpi quèks moés o innées, pi qui, edpi quèks jours o smangnes ont rkminché.

Os les voéyez p't'ête mi funmer o bir, mais z'ont rkminché.

Is ont rtcheu ndan !

Et ch'est un vrai problinme.

Pour eux, et pour leu famille. Surtoute avuc ches gins qui chuche'te granmint, et qui des keups, dvien'te mawais. Avuc leu famille !

Prions pour tous ches gins qui sont malureusemint conme cho.

Minme chi os sonmes judi, os pouvons prier.

Des keups, l'vie est fin malaisiée.

Bec, et corage.