Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

jeudi 31 mai 2018

Feut arter

Feut arter, in Frinche, ed laicier des gins conme vos et mi foaire ech droét conme is vu'te.

Quanq unne réclame n'foait mie plaisi à des gins mais qu'ale est autorisée, ches gins n'peu'te mie déchider del foaire inlver.

Surtoute in utilisant del'violinche.

Bec à m'fille qui foait del bicyclète pour aller ouvrer et qu'o ches ages innui, et pugnie ed mans à ches eutes qu'ont étou leus ages innui.

mercredi 30 mai 2018

Ech nouvel onme-èrignie

Os avez tertous vu ches images decht'onme qu'o seuvé un papar à ch'chonquienme étage d'un immeube ?!

Quarante-chonc sgondes pour monter in heut, per l'cour.

Fin bin !

Mais aprè cho, chi os dormez, minme ach sizienme étage et qu'i foait keud, frunmez vos fernètes.

Appleudichemints quanq minme pour cht'onme.

mardi 29 mai 2018

Ech tiot

Ièr, in rintrant ed Marseille dò qu'em fille s'o, infin, merié, j'o picié avuc ches jonnes ed l'étchipe ed bastchète ed Dunkerke.

Din unne station pour acater ed l'essinche et dò qu'os pouvons don étou minger et picier.

Ches jonnes jueus, eux, rintroai'te d'Intibes dò qu'is ont gaingné ech championnat ed ches Espoèrs.

Un mète quater-vint-tchinze, deus mètes zéro-sis, deus mètes troés, ..., et mi, un mète quater vint-deus quanq ej su bin déplié.

Que des grinds !

Ches jonnes picioai'te, et mi, j'avoais l'minme invie, don, j'o foait.

Quanq j'o dis cho à eunne eute ed mes filles, ale m'o dmindé chi is étoai'te grinds ed pertoute.

- "J'in sais rin, ém fille ! Cho m’intéresse mie !" eq j'i dis.

- "Ouais ! mais mi, i o eq cho qui m'intéresse." Qu'ale m'répond.

dimanche 27 mai 2018

Ches impoules dimabes

Unne impoule, quanq ale est mie foaite pour contenir unne drogue, est
adon foaite pour lunmer.

Lunmer din unne moaison o à l'cour, lunmer unne voée o unne keuchie, lunmer un train.

Mais jou qu'os savez qu'i o eds impoules dimabes ?

Ej vos esplique.

Unne impoule dimabe est unne impoule qui put canger ed force chi t'os
invie et eq t'os installer quoé qu'i feut pour l'foaire.

Eximpe :
- t'es tout seu avuc t'fanme, moinss ed lunmière. Et un molet ed musike.
- t'ouve, o i foait granmint noèrt à l'cour, puss ed lunmière pour bin vir.

Dimabe ?

Ej mé dminde chi ch'nom i vient mie de chti qu'o invinté cho. Bébert
Dimaquité ? O p't'ête Tatave Dimabinvu ? O p't'ête coèr, Dimachéki
Chtonmequélo ?.

Chi os savez, disez-lé mi.

Bec à tertous

Ech tiot batieu

L'mère, ches tiots batieus qui vont chu l'ieu
Ont-is des gambes ?

Tertout connoait l'fameuse canchon

Et des tiots batieus, chu l'ieu, chu ches mers, i in o.

Lisez et rbéïez !

Il étoait un keup, un tiot batieu, qu'ej lonme David, qui navidjoait chu ches mers, quanq il o vu arriver dvant li, un cros batieu. Un fin cros batieu, qu'ej lonme Goliath.


Kmint eq cho ch'est défini, tout cho ?

Fin bin, vu eq ch'est l'gin dech tiot batieu qu'i m'o baillé ches tiots noms ed ches deus batieus.

vendredi 25 mai 2018

Alintour ed l'Aschinsion

... et del Pintcoute.

Ches corridas, din l'sud del Frinche o in Espane, avuc ed jonnes toèrs, ch'est à pertir ed l'Aschinsion eq cho rkminche vraimint.

Qu'i m'sanne !

Os ainmons, o os ainmons mie, mais ch'est ches traditions.

Don, mi, ej respecte.

Mais qu'i o des gins, jonnes o mie, qui jue'te avuc un ho ed vakes in Moselle et ed nuit, à chl'Aschinsion, chu ches voées, ej truvoe cho lamintabe.

jeudi 24 mai 2018

Ech rétour ed Tiot Quinquin

Os vos ramintuvoez ?!

L'série à l'télé, lonmée "Tiot Quinquin" !

Ch'étoait, djò, i o quat ins. Ches tans passe'te fin rade !

Eh bin ! Din quèks smangnes, os pourrez vir l'suite. Tiot Quinquin o bin grandi, et ches deux cadoreus, mitan nikdouilles, o minme puss qu'à mitan, sont toudi lò.

Cho, ch'est unne boinne nouvèle.

Ayez del patieinche.

mercredi 23 mai 2018

Bèle panche

Ièr au vèpe, j'acate du café din unne grinde surface pour m'foaire des jus à mn'interprinze.

Quanq j'arrive pour poaiyer, ech caissié m'dit qu'i frunme.

- "Aprè mi !" eq j'i réponds.

- "Nan ! Avant vos, et aprè l'fanme qu'est dvant vos et qu'ej laice passer, vu qu'ale est inceinte." qu'i m'dit.

- "Mi, étou, ej su inceint" eq j'i dis, in montrant em bèle panche.

- "Fille o garchon ?" qu'ale mé dminde, l'fanme inceinte qu'est dvant mi et qui s'o rtorné.

- "Ches deus." eq j'i dis.

Et j'o alé à unne eute caisse.

Caisse dò qu'unne jonne fille m'o laicié passer dvant ale, vu eq j'n'avoais eq deus patchets ed café.

J'o félicité s'mère d'avoèr unne fille bin élevée conme cho.

Pi, j'o poaiyé.

Et j'su perti.

lundi 21 mai 2018

Ches picards à Marseille ech sinmdi

D'anmyin à Marseille, miu ed sèt-chint kilomètes.

Mais ches picards vont à Marseille.


Ech darain sinmdi, is étoai'te onze anmyinoés à Marseille.

Et vu qu'is alloai'te rester in première division, et eq ches marseilloés étoai'te trisses d'avir perdu merkerdi, ches picards ont laicié gaingner echl'étchipe ed fotbal ed Marseille.

Eh bin ! Ech prochain sinmdi, i i éroait un eute picard à Marseille, mi. Eute, vu qu'ej jue pu ach fotbal, et don, qu'ej i étoais mi l'eute jour.

J'i sro sinmdi, vu qu'em fille m'o invité à visiter l'merrie ed Marseille.


Pour cho, i feut qu'un russe ed Sibérie, qu'ale ainme edpi miu d'unne innée, fuche arrivé in Frinche.

Seuchez qu'à Marseille, i o unne voée qui s'lonme "Voée d'Anmyin".

I feudroait mette unne "Voée ed Marseille" à Anmyin !

Rin à vir, mais à Toulouse, i o unne "Avenue ed Castes".


Boinne jornée.

dimanche 20 mai 2018

Perti et rvenu

Innui, diminche ed Pintcoute, min esprit est eute pert.

Boin diminche à tertous.

samedi 19 mai 2018

Voéyeurisme

Quoé qu'ej lis conme tite d'article din unne gasète ?!

"Unne vie dsou unne noèrte boaiyète ... d'avocat."

Avouez eq cho foait voéyeurisme !

I n'o qui, pour unne cose conme cho, prindroai'te un avocat.

Boinne jornée.

Innui, vu ech bieu solé, i sanne qu'i fuche, pour ches fanmes, miu mette un cotron.

vendredi 18 mai 2018

...isses sont méchants o mawais

Racisses,
Zadisses,
Syndicalisses,
Socialisses, chi i n'o coèr,
Tchulturisses,

sont, pour mi, des méchants o mawais.

Mais is définisse'te par perde.

L'preufe, innui, ches trains roule'te bin. Casi conme avant ech moés d'avri.

Et pour ches zadisses, ej préfère n'mie vos conter quoé qu'is vont dvenir.

D'avinche, boin fète ed Pintcoute à tertous.

jeudi 17 mai 2018

Ches méchants lyonnoés

Os l'savez, echl'étchipe ed fotbal ed Lyon pensoait juer ièr l'finale del coupe d'Urope à s'moaison.

Mais ale o perdu i o quèks smangnes.

Don, pas ed finale.

Pour echl'étchipe ed Lyon.

Mais finale, à Lyon, pour echl'étchipe ed Marseille.

Ches supporteus ed Lyon qu'avoai'te acaté, i o des moés, des billets pour ièr, ont voulu les rvinde.

- "Chi ch'étoait pour un supporteu d'unne eute étchipe eq Nintes o Anmyin per eximpe, ej la rvindroai ach prix qu'ej l'o acaté. Mais vu eq ch'est des supporteus ed Marseille, ej vux gaingner granmint d'argint !" qu'i dit ech lyonnoés.

Ch'est bieu l'fotbal !

Os pouvons in douter.

Mais ranmintuvoez-vos bin ! Toéne Griezmann, echl'étchipe ed Lyon n'in o mie voulu, i o miu ed dis ins.

mercredi 16 mai 2018

Ale o mie ed vagances

Ch'est unne fanme qui ouve, mais qui n'o mie ed vagances.

In vrai, conme tertoutes ches gins qui ouve'te, in Frinche, ale o des vagances.

Mais ale sanne janmoais pouvoèr les prinde.

Vu qu'ale put mie, qu'ale dit.

Adon, chin onme i pèrt tout seu. In vagances.

Ch'est un problinme. Qu'i m'sanne.

Ches chinmetiéres sont rimplis ed gins qui croéyoai'te qu'is étoai'te indispinsabes à leu ouvrage.

Ches tribunaux étou sont rimplis ed gins qui pouvoai'te mie pèrtir in vagances insanne.

Donmage !

In busant un molet, os pouvons étou s'dire eq des keups, ch'est bin ed pouvoèr pertir chin s'fanme.

L'miu, ch'est minme d'i dire qu'os rgrettons qu'ale vienche mie, adon qu'in vrai, os rgrettons mie.

O mie granmint.

mardi 15 mai 2018

Accidint ed cactus

Qué malur !

Unne vieille fanme, quater-vint-douse ins, est morte verdi à Monaco d'un accidint avuc un cactus.

Ches cadoreus di'te qu'is n'sai'te coèr mie vraimint kmint qu'ale o mourru.

Mi, ej dis qu'el vie o du piquant.

Mais l'mort étou ! Qu'i sanne.

Unne pensée pour l'famille del fanme.

lundi 14 mai 2018

Pleumez ch'co

..., mie ches mneus ed voéture !

In Alsace, à ,Strasbour, unne gin qui vo des keups un molet rade in voéture in o marre de s'foaire flasher per ches radars chu ches bords ed ches voées.

Adon, verdi, i s'o dédjisé un co et o monté, in ville, dsu un radar pour manifester.

Il o bin raison !

Surtoute qu'achteure, os pouvons coèr rouler à quater-vint-dis in campagne !

vendredi 11 mai 2018

Tout est boin à prinde

J'o intindu i o quèks smangnes, un merkerdi, timpe au matin, un onme, éducateu sportif din
unne école, et, feut l'dire, syndicalisse, dminder à pèrticiper à l'préparation ed
ches jus olympikes qui sront din sis ins à Pèris et ches alintours.

I o quèk cose à gaingner ? Qu'ej mé dminde.

Et vos !

Chi t'es min darain fiu et eq t'os ets ages innui - vint ins, ch'est quèk cose - cros bec à ti.

jeudi 10 mai 2018

Unne boinne boutèle

I o quèks smangnes , un jour au vèpe, avuc troés conmarades, os allons amon un coupe ed gins fin régalants.

Tant régalants qu'is ouve'te unne boutèle ed blanc.

Mais unne boutèle chin étitchète.

Allez savoèr pourquoé !

Vu qu'os étoème chonc, après ech premier keup, i restoait moins del mitan del boutèle.

Ech blanc étoait fin blanc.

Casi couleur del'ieu.

Quanq l'fanme o kminché à bir - ale étoait l'première ! - os avons comprins pourquoé qu'ech vin étoait conme del'ieu : ch'étoait del'ieu. Ed vie.

Vlò à quoé ser'te ches étitchètes : à éviter ches berlures.

Fuchez rassurés : os avons mie vidé nos verres din chl'évier ; os les avons rmis, chin dinger vu ch'contenu, din l'boutèle. Et os avons rfrunmé l'boutèle. Chin dinger, vu ch'contenu.

Pour éviter eq cho rkminche un jour, l'fanme o écrit chu l'boutèle quoé qu'i avoait ndan.

mardi 8 mai 2018

N'oblions mie

Ch'étoait i o eds innées.

Tertout o dit eq ch'étoait l'daraine !
















 Ch'étoait unne berlure qu'ed croère cho.


lundi 7 mai 2018

Boin accion

Qu'ej dis à unne fanme qui minge.

Quanq mi, ej passe dvant lò dò qu'ale minge, et qu'ej vos picier un keup.

- "Boin accion à ti étou !" qu'ale m'répond.

A mi qui vos picier.

Et qui n'minge mie quanq ej pice.

Et vos ?

samedi 5 mai 2018

Ej mins

Ch'est mie bin de l'foaire, ej dis cho pour tertous ches galibiés, mais conme ch'est bieu qu'ed dire ho !

Ej mins.

J'o lu, merkerdi au vèpe, eq ches mathématichieins ainmoai'te l'phrase-lò.

Et dech keup-lò, mi étou.

Pourquoé ?

Quanq os disez "ej mins", jou qu'os disez vrai, eq vos mintez, et dech keup-lò, os mintez mie, jou qu'os mintez in disant cho, et adon, os disez vrai : os mintez.

Aprè cho, l'est possibe qu'os ayèche du mau à vot tête.

Donmage !

Boin sinmdi à tertous.

vendredi 4 mai 2018

Ches deus cinsiers

L'eute jour au vèpe, in promnant, ej passe dvant unne cinse dò qu'i o deus cinsiers qu'ouve'te d'habitude.

Et in passant, ej voés qu'i o troés tracteus. Pi minme un quatrienme.

Quat tracteus, pour deus cinsiers, don pour deus mneus.

Quoé eq cho vut dire ?!

Eq ches deus n'peu'te mie mner ches quat ingins in minme tans.

J'o busé. Un molet.

I o des machines à mette drière ches tracteus eq ches deus mneus, is ont mie dzoin d'aotcher o déotcher.

Qué corage !

Béto, is pourroai'te avir puss ed tracteu qu'ed machines à aotcher.

Pour chi i in o un in rade ?!

jeudi 3 mai 2018

Is ont ieu deus papars

- "Quoé qu'i o d'éspécial à avir ieu deus papars ?" qu'os vos disez p't'ête ! "Jou qu'is sont nés ech minme jour ?".

Nan !

Ch'est des gins conme vos et mi, qu'ont ieu deus filles : l'deusienme, quèks innées aprè l'première. Conme din granmint ed keups.

Mettons eq ches filles s'lonme'te Nénète et Gélike, cho m'baille echl'occasion ed penser à l'tiote ed trèse ins qui vient d'ête assasinée.

Mettons étou eq ches filles ont miu ed dis-uit ins.

Don, pour résumer, ches gins ont ieu deus filles.

Mais achteure, edpi moinss d'un in, is ont unne fille, l'première, et une filliu.

Une filliu ?! Ch'est deus mots qu'ej viens invinter pour dire eq ch'est unne fille qu'est pu vraimint unne fille. Ale o un corps ed fille, mais achteure, un tiot nom d'onme. Mettons eq ch'est Natole.

Et béto, ches gins is éront unne fille, toudi l'première, cho n'cange mie, et un fiu. Qui sro don l'fille edvenue une filliu pi un fiu.

Qué monde !

Nénète o dit à ches pèrints eq Natole sro toudi s'soeur.

Et ches gins, is éront toudi deus éfants.

mercredi 2 mai 2018

Ech jornée dech bieu-père

Os connoaissez l'fète ed ches mères, l'fète ed ches pères o, eute eximpe, l'jornée del fanme qu'est ech uit dech moés ed marche.

Il existe étou, ej vo p't'ête vos l'apprinde, l'jornée mondiale chin marrone. Ech trèse janvié. J'o janmoais vu ed gins l'fèter !

Et granmint d'eutes. Casi chake jour, i o unne jornée ed quèk cose !

Eh bin, mi, j'o créé l'jornée dech bieu-père : ech trinte dech moés d'avri.

Ej vos esplique.

Lindi, emn interprinze étoait frunmée, vu eq ch'étoait inter diminche et ech premier dech moés ed moai, deus jours ò eq ches gins n'ouve'te mie. In principe !

Don, lindi, j'étoais à m'moaison.

Et j'o foufté.

Pour bin foufter, j'o utilisé ech "Troés-quat-chonc" ed Pythagore eq min bieu-père m'avoait apprins, et unne machine, eq min bieu-père, coèr li,  avoait acaté. Et janmoais utilisé.

Adon, toute l'jornée, j'o pensé à li.

Mais qu'ej vos diche, ej pense à li d'eutes jours.

mardi 1 mai 2018

Fêter echl'Ouvrage

Ches premiers dech moés ed moai, os fetons toudi echl'Ouvrage.

Fin bin !

Fêter echl'Ouvrage, quanq os ouvrons ches eutes jours, fin bin.

Fêter echl'Ouvrage, quanq os avons ouvré granmint et qu'achteure os sonmes vius et qu'os dzoin ed nos rposer, fin bin.

Fêter echl'Ouvrage, quanq os éroème invie d'ouvrer - i o des gins qu'ainmeroèt'te ouvrer mais qui n'ouve'te mie, vu qu'is n'truvoe'te mie - fin bin étou.

Mais fêter echl'Ouvrage, quanq os avons mie invie d'ouvrer o qu'os mettons ech brin pour ches ouvreus, ch'est scandaleus.

Minme quanq os disons qu'os défindons ches ouvreus.