Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 30 juin 2019

Un estrait dech réglémint d'un achuchon

... alintour d'Azincourt.

Echl'achuchon rfoait vive ches batalles d'Azincourt qu'i i o ieu in quatore-chint et quèks, inter ches frinchoés et ches inglés, durant l'Djère ed chint ins.

Ches gins dechl'achuchon s'abille'te conme achl'époke-lò, et jue'te à l'djère.

Mais atincion !

Ech premier article dech réglémint est : "avoèr du plaisi".

Ech deusienme article est : "bailler du plaisi".

Vu ch'nom ed min blog, et l'région lò dò qu'est chl'achuchon, falloait eq j'in cause innui.

Boinne jornée à tertous.

N'obliez mie ed boère del'ieu. Granmint d'ieu.


vendredi 28 juin 2019

L'vraie misère périsiène

Os l'vivez tertous, i foait fin keud.

A pèrt in Bretanne, ej vos in o causé i o quèks jours.

Causons del Frinche mise à pèrt l'Bretanne.

Pour ête à l'frèche din no'moaison, i feut, quanq os l'pouvons, warder ches contervints et ridieus frunmés à ches fernètes.

A l'cour o din nos voétures, ch'est fin malaisié d'i ête, à l'frèche.

Et pour dormir, casi pertoute, os avons keud.

I o quèks jours, adon qu'i avoait l'fanmeuse canitchule, j'o dormi deus nuits à Pèris.

Et chake keup eq j'alloais o tchittoais min ôtel, ej voéyoais des gins.

Qu'is vive'te din leu voéture.

Jonmoais vu cho !

Ches gins ont des voétures, n'les cangen'te jonmoais d'indroėt, qu'i m'sanne, et dorme'te ndan à deus, troés o quat, des tiots, des jonnes o des vius (d'ems âges !).

Qué misère qu'ed vir cho à Pèris !

Vu qu'i foait keud, o vu ch'nombe din ches voétures, o vu ches deus coses, is ont toudi ches uis côté trottoèr d'ouvertes.


Feut qu'ej fuche honnête avuc vos : ch'est mie à Pèris eq j'o vu tout cho, mais à Sin-Mindé.

A deus-chint mètes ed Pèris.

I o mie ed misère à Pèris !



Contrairemint à ch'qu'ej o écrit in heut ed min blog, j'o mis, pour ch'premier keup edpi eq j'écris,  ches djiffes ed ches gins in photo. Désolé ! Mais ej pux mie indurer qu'ed vir ech misère. Pauves gins !


jeudi 27 juin 2019

Ches minutes in moinss

Cho i est ! Edpi verdi, ches jours perde'te des minutes.

Unne jornée foait toudi vint-quat eures o mile-quat-chint-quarante minutes, mais os avons pu ches minmes minutes.

Ech vint-et-un dech moés ed join, os avoème sèse eures et onze minutes ed jours, o bin, os pouvons dire, nu-chint-soéçante-et-onze minutes ed jours.

Ch'o duré deus o trés jours conme cho, et edpi, os avons perdu quèks minutes. Unne justch'à ièr, deus à pèrtir d'innui, troés à pèrtir dech vint-nu dech moés.

J'ainme poin.

Surtoute quanq os arrivons à l'fin dech moés d'eu. I éro seulemint quatore eures et chonc minutes ed jour ech vint-et-un dech moés d'eu, et trèse eures trinte-et-unne minutes ech trinte-et-un

Quoé qu'os in disez ?! Mettez-mi un tiot conmintère pour m'dire.

Boinne jornée, et profitez bin ed l'étè.


mercredi 26 juin 2019

Eute pèrt

... eq lò dò qu'ej croėyoais eq ch'est !

Ech Tchatar ! Chin pétrole, ches émirs et ches droéts ed l'Onme !

Mi, ej croėyoais eq ch'est alintour ed l'Arabie Séoudite et ch'Tchowoét !

Bin nan, qu'i sanne, vu qu'echl'étchipe ed fotbal jue achteure el Keupe ed fotbal ed ches Anmérikes dech Sud !

Feudro que jé rbée unne carte dech monde, mais chi is ont du pétrole din ches Anmérikes dech Sud, cho doét ête alintour dech Vénézuela.

Ech Vénézuela ! Chin pétrole, ches droéts ed l'Onme, mais mie d'émir.

Qu'il m'sanne !

Boinne jornée et boin étè.


mardi 25 juin 2019

Edvinète ed cartchul

Din un abe dò qu'i des boinnés srises, i o étou granmint ed moinieus qui vien'te matcher ches srises.



Echt'onme qu'o cht'abe, et qu'est mie un boin cacheu, tire un keup ed fusike.

Un keup tout seu, mais cht'onme, ej lé rdis, est mie un boin cacheu.

Combin jou qu'i o achteure ed moinieus din cht'abe ?





















Autchun ! Is ont tertous ieu l'freusse et z'ont involé.


lundi 24 juin 2019

Vnez in Bretanne

Os ainmez l'Frinche, os ainmez qu'i foaiche keud et bieu solé, mais os ainmez mie qu'i foaiche granmint keud conme achteure ?

Mettons qu'os disons que l'Bretanne est in Frinche. Seuchez qu'i o des bretons qu'is di'te eq nan.

Adon, vnez in Bretanne.

Achteure, i foait bieu, mais jonmoais os érez granmint keud.

Adon, vnez in Bretanne.

Chi os l'savez mie, ej vo vos l'apprinde : in Bretanne, i o deus saisons.

- l'ivèr, dech sèse dech moés d'eu à quatore dech moés ed juillet, et i o casi jonmoais ed rimèe.

- l'étè, dech tchinze dech moés ed juillet à tchinze dech moés d'eu.

Cht'innée, in Bretanne, l'étè est in avinche. Adon, vnez !

Boinne journée o boinnes vagances.

In Bretanne.


dimanche 23 juin 2019

Ej maginoais poin

Pauve présidint ed ches Anmérikes !

Verdi, il baille chl'orde d'attatcher l'Irin, et d'un keup, i s'pose unne tchestion, o il o intindu unne voée : i pourroait i avir chint-chincante morts.

- "Nan ! Ch'est possibe qu'une attaque avuc eds avions ed des bombes foaiche chint-chincante morts ?! Artez toute."

Qu'il o adon déchidé.

P't'ête qu'ech présidint s'disoait qu'i éroait zéro mort, o bin chint-quarante-sis, chint-quarente-sèt ! Mais lò, chint-chincante !

Nan !

Ches mneus d'avion étoai'te djò din leus avions, prêts à pèrtir, pour Téhérin, Ispahiein o Kermin, mie pour ch'Bourget. Is ont rbéïé leu téléphone portabe. Ch'étoait écrit : "Artez ! Rintrez à vo'moaison ! Del pèrt ed vot présidint."

Ch'étoait dis minutes avant ed pèrtir !!!

Ches iriniens et nos avons del canche d'avir un présidint anméritchin qui fuche ginti.

Jou qu'il éro infin ech prix Nobel del paix ?

Jou qu'i sro réélu présidint din deus ins ?

Feut saprémint buser ! I sanne quanq minme qu'il o mie grind cose din chin cervieu.

Prions pour l'paix din ch'monde, et pour eq ches anméritchins n'foaiche'te mie un deusienme keup unne fin crosse berlure.

Din deus ins.

Boin diminche à tertous.


samedi 22 juin 2019

Echt'onme d'éto o l'freusse

Qu'i m'sanne !

Qu'ej vos conte.

Din emn interprinze, j'o étè, i o quèks moés, lonmé responsable d'unne tiote étchipe ed gins, uit, avuc qui j'ouve.

Ch'est nouvieu, et j'vux foaire dech miu qu'ej puche.

Pèr eximpe, ête régalant avuc ches gins d'emn étchipe, els acouter quanq is ont dzoin ed causer o qu'is ont un problinme, et els aider.

 Mie toudi aisié,  mais i sanne eq j'i arrive.

Et eq ches gins ouve'te.

Mais i m'sanne qu'echt'onme d'éto, qui m'o lonmé, achteure rgrète o bin o l'freusse ed mi et d'mes méthodes.

Fin dommage ! Pour li ! Mi, ej su déchidé à avincher.

A suive.


vendredi 21 juin 2019

Eute cose m'étonneroait

Intindu del bouke d'un jornaleu, ech dis dech moés ed join, pour unne rinconte ed fotbal inter l'Suiche et chl'inglétère :

- "Os avons chl'impression eq chake étchipe vut gaingner."

Jou qu'i o eds étchipes, ed fotbal o eute, qu'is ju'te pour perde ?

Et jou qu'is éroai'te du mau à perde ?


mercredi 19 juin 2019

Fin tiot mais corageus

Din unne gasète lonmée "Bojour ches cousins", d'un achuchon d'unne grinde famille dech nord del Frinche à qui eq j'appèrtiens, j'o lu avant-ièr un bieu conte :

I avoait un jour, unne fin grinde forêt in route à asir.

Ech fu étoait fin cros, unne vraie cacastrophe, et tertous ches bétails qui restoai'te din ches bos s'seuvoai'te et rbéïoai'te chin rin foaire.

A pèrt un, un colibri.

Ech fin tiot moénieu, il alloait prinde de l'ieu, unne goutte o deus din chin tiot bec, pour assayer d'éteinde ech fu.

Voéyant cho, au beu ed quèks tans, un animal i dit :

- "T'es un cros nikdouille ! Tu vos jonmoais i arriver !"

- "Ej sais bin" qu'il i répond, ch'colibri, "mais  mi, j'éroai assayé".

J'o erchu cho ech jour dechl'épruve ed philosophie ; quoé qu'is in éroai'te pensé ches candidats ?

Merchi granmint à min cousin qui nos o conté cho, et merchi achl'achuchon ed ches cousins ed nos avoèr invoéyé s'gasète.


mardi 18 juin 2019

Is sont in route à apprinde

Maginez des russes, mettons ed Sibérie, qu'ont alintour ed vint ins d'âge et qu'apprinde'te à causer frinchoės.

Mettons coèr qu'is foaiche'te cho avuc m'fille.

Conme in Frinche, avant chl'ėtè et ches grindes vagances, feut vérifier quoė qu'is ont rtenu.

M'fille :

- "Disez-mi kmint qu'os appelons un cros morceau ed bos qui, accreuchė à un eute, tient ech toėt d'unne moaison ?"

I in o un qui i dit :

- "Unne pute*"

Ch'est casi cho.

In seuchant ho, m'fanme o dit à m'fille eq ches élèves dvoai'te coèr ouvrer.

Mi, ej vux remercier ech courageus élève.

Boinne jornée à tertous, et surtoute à ches jonnes qui trinspire'te dvant unne feuille blanke.



*mot frinchoės pour causer d'unne fanme qui foait ech puss viu ouvrage dech monde.
Prudinche : à Pèris,  i o eds onmes dėdjisės in fanme.

lundi 17 juin 2019

Del tchulture

Maginez un cinsier et s'fanme qui ouve'te insanne din un can, in étè.

I foait bieu, et ch'est l'eure ed minger.

L'fanme dit à sn'onme :

- "A quoé eq tu penses ?"

Ech cinsier i répond :

- "A ch'émission d'ièr au vèpe à l'télé. Chu l'finalité ed l'onme, en tant qu'entité sidérale, au plan cosmike !"

S'fanme i répond :

- "Cho dépind ed chi t'os unne vision kantiène o bin nietzchéïène dechl'univers !

Is l'ont dit à l'télé".

Cht'onme :

- "Ouais, mais ch'est dit rade ! Quanq tu buses un molet à ches paramètes concomitants dech problinme, ch'est mie aisié conme cho sanne l'ête !"

- Vu eq tu tiens mie compte ed ches prolégomènes del métaphysike trinschindintale !" i dit adon l'fanme.

Ech cinsier boét un keup ed rouve et dit :

- "Seuremint ! Mais poin d'vue ed ches concepts hégéliens ed l'ête ed del pensée, cho modifie toute echl'appreuche perceptionèle del problinmatike in-soé."

Is ont défini ed minger et rpèrt'te à l'ouvrage. L'fanme dit :

- "Ah ! Quoé eq tu vux ! Feut bin asseumer ches contradictions inhérintes à l'condition ed l'onme prinze poin ed vue ed ches notions fondamintales dech devnir !"

- "P't'ête bin  ! P't'ête bin ! Mais mi, cho mé stresse !" qu'i dit, ech cinsier.

Quèks minutes aprè, il ajoute:

- "Au vèpe, je rbée Ches visiteus à ches Anmérikes."

Tout cho o étè écrit et déssiné pèr Jacques Foaizant un mile-nu-chint-soéçante-dis-uit.

Boinne canche à ches jonnes qui vont philosopher innui.

dimanche 16 juin 2019

T'os mis un caske

... , jou eq tu vos ouvrer ?

- "Nan ! Ej vo à l'messe !"

- "Ch'est à l'cour, i vo pluvoèr et t'avoais mie ed castchète ?"

- "Nan ! ch'est din l'cathédrale à Pèris qu'o asi i o quèks smangnes, et des pierres peu'te tchair durant l'messe."

- "Ch'boin Diu sro lò pour vos protéger !"

- "Minme avuc min caske dsu m'tète, ej l'espère."

Boin diminche à tertous.


samedi 15 juin 2019

Ej vos confirme

... eq j'o étè confirmé pèr echl'évêke del Sonme.

El confirmation, o bin chrismation pour ches orthodoxes, ch'est un sacremint rligieus.

Pour ête confirmé, feut un parrain et unne morraine. Qu'ont étè étou confirmés.

M'fanme et mi allons béto ête parrain et morraine ed confirmation.

Em fanme, ch'est seur, o étè confirmé i o moinss ed tchinze ins.

Mais mi ?

Ej mé ranmintuvs avoèr étè confirmé étant fin jonne.

Pour in ête seur, j'o écrit achl'évêke d'achteure del Sonme, et i m'o répondu : j'avoais moinss d'onze ins d'ages quanq ej l'o étè. Ch'étoait à Bértécourt, un premier dech moés d'avri.

Achteure, vu ems ages, ej pux dire qu'à chl'époque, j'avoais mie comprins ech sins dech sacremint ; tertous ches galibiés ed min age étoai'te confirmés ; j'o foait conme eux.

Pour echl'anedocte, un ed mes frères s'o foait confirmer, li, i o moinss ed tchinze ins, aprè deus innées ed préparation. Quanq il o ieu casi défini, i s'o aperchu qu'i i avoait djò étè, confirmé, conme mi, étant fin jonne.

Mais li,  avoait oblié.

Boin sinmdi à tertous, et surtoute à ches confirmés d'innui. I in o, je l'sais.


vendredi 14 juin 2019

Bieu-frère et bieu-fiu

Ej vo mie vos dire qui, inter un bieu-frère et un bieu-fiu, ej préfère.

Minme chi j'o mn'idée.

O p't'ête unne !

Tiote anecdote : un jour, unne fanme o dmindé à m'fanme qui, inter ches chonc éfants qu'ale o, qui sont étou ches myinnes, qui qu'ale coésiroait ed seuver chi no'moaison étoait in route à asir.

M'fanme o répondu qu'ale les seuveroait tertous. Chi possibe.

Dman, i m'feudro coésir inter min bieu-frère et min bieu-fiu.

In vrai, feut qu'ej coésiche echtchèle ed ses deus étchipes ed rugby qui ju'te dman au vèpe ej préfère.

I n'o unne qu'est del ville ed min bieu-frère, et l'eute, del ville ed min bieu-fiu.

Mi, j'ainme chatchunne ed ches deus étchipes, et j'ainme bin min bieu-frère et min bieu-fiu, chti qu'est frinchoés.

Ej précise, vu eq j'o étou un bieu-fiu sibérien, d'unne ville sibériène dò qu'i o étou unne étchipe ed rugby, et bieu-fiu eq j'ainme granmint étou.

Adon ?!

Dman, au vèpe, min tcheur vo baloncher.

Minme chi j'o unne tiote préférinche.

P't'ête ?!


jeudi 13 juin 2019

Ches médalles olympikes

Pour ches prochains jus olympikes,  des gins ont ieu l'boinne idée ed fabritcher ches estrades, pour remette ches récompinches à ches troės premiers ed chake compétition, avuc du plastike truvoė o recyclé.

Vo leu falloir quarante-chonc tonnes ed plastike ed rėtchupėration.

Fin bin !

Mais pour ches médalles ?!

Jou qu'is pourroè'te foaire l'minme cose ? In plastike dor ?  In plastike d'argint ? In plastike ed bronze ?

Cho, cho sroait granmint ėcologisse.


mercredi 12 juin 2019

Ale o gaingné deusienme

Mardi, din unne gasète, in causant ed fotbal, coèr un keup, un jornaleu o écrit qu'unne étchipe o gaingné ech tornoé et eq l'eute étchipe, d'unne ville russe, o quanq minme rimporté l'deusienme place.

Busez !

In fotbal, quanq t'es deusienme, ch'est eq t'os perdu l'rinconte.

Conme in bicyclète.

Poulidor n'o jonmoais rimporté ech Tour ed Frinche mais o souvint défini deusienme. L'seule cose qu'il o gaingné, ch'est unne grinde place din ch'tcheur ed ches frinchoés.

Pour toute not vie.

Boinne jornée.

lundi 10 juin 2019

N'laicions mie foaire

I o quèks jours, os avons causé ed ches crossés violinches qui avoai'te ieu in Chine i o trinte ins.

Avec granmint ed morts.

Innui, j'apprinds qu'achteure, ech gouvernemint chinoés vut pouvoèr juger, manière ed causer, ches gins qui vi'te à Kong Kong, crosse métrople proche del Chine.

Mais qui n'est mie chinoése.

Ech projet : tu vis à Kong Kong, t'es kongkongoés et tu foais quèk cose qui n'plaît mie ach gouvernemint chinoés, adon, t'es invoéyé in Chine pour ête jugé. Minme chi t'es konkongoés !

Quanq os s'ranmintuvons ech troés et quat dech moés ed join mile-nu-chint-quater-vint-nu, quanq os voéyons kmint ches chinoés sont libes, disons nan et soutnons ches kongkongoés.

Foaire plaisi à ches viux jueus

Verdi, timpe au matin, in acoutant ch'poste, j'o intindu un jornaleu dminder leu avis à ds'anciens jueus frinchoés ed tennis à propos del rinconte qu'i éro sis eures aprè, ech jour-lò, inter un suiche et un berge.

Et chatchun ed ches anciens jueus avoait des conseils à bailler, et des rmèrkes à foaire à l'un o l'eute pour gaingner.

Et patati, et patata !

Mi, ej ridjole.

Ed ches troés jueus frinchoés, i n'o mie un qu'o gaingné un jour Roland-Djarosse o Vinbledon. Miu ! Is ont p't'ête jonmaois allé in deusienme smangne d'un tournoé ed tennis !

Mais is sai'te causer à un jornaleu.

Et i foaire plaisi.


dimanche 9 juin 2019

El messe ed Pintcoute

Innui, pour ches gins qui suive'te mie, ch'est l'Pintcoute.

Et pour tertous qui suive'te o mie mais qui ne l'sai'te mie, l'Pintcoute, ch'est ech jour-dò qu'echl'Esprit Saint o vnu chu ches apôtes dech Christ.

Jésus, li, o monté à ches tans achl'Ascension.

Ches diminches ed Pintcoute, conme innui, i o din ches églises des éfants qui font leu profession ed foé.

Pour granmint, aprè cho, is sont trantchiles avuc ch'catéchisse et chl'église. Qu'is di'te.

Is art'te d'aller à l'messe.

Malureusemint !

Et malureusemint, à l'messe ed Pintcoute, granmint ed gins vien'te et randonme'te.

Vu qu'is n'in rin à foaire del messe ; is vien'te juste pour vir un galibié qui foait s'profession ed foé, foaire quèks photos, et aprè, aller matcher et i offrir un cadieu.

Qu'o rin à vir avuc l'Pintcoute o l'église.

L'messe ed Pintcoute dvroait ête unne belle messe.

Mais ch'est ed moinss in moinss vrai.

Boin diminche, quanq minme, à tertous.


samedi 8 juin 2019

Unne coeuse et chin effet

Jou qu'os l'avez lu din unne gasète ?

Un jueu italien dechl'ėtchipe ed fotbal ed Pèris o annonchė merkerdi qu'i tchitoait echl'étchipe ed Pèris.

I n'o qui diront "tant miu !".

Mettons !

Jou qu'os avez rmèrtchė aprè ?

Unne interprinze italiène o annonchė ch'minme jour, merkerdi au vèpe, qu'ale artoait ed négocier pour racater o ouvrer avuc unne interprinze frinchoėse ed voétures.

Ches italiens, is l'ainmoai'te, leu jueu ed fotbal !

 Ch'est vrai qu'il étoait boin !

Avant dė vnir in Frinche.

Mais busez !

Os pourroème écrire l'minme cose avuc un présidint ed pèrti politike qui annonche qu'i tchite chin pèrti un diminche au vèpe à l'télé, et sn'opposante, din ch'minme pèrti, qui foait l'minme cose uit jours aprè chu unne eute télé.

Chin quoė, ale o pu chin opposant.

Din ch'parti.

Ch'est bieu !


vendredi 7 juin 2019

N'jonmoais oblier

Ches viux font toute pour eq ches gins, surtoute ches jonnes, connoaiche'te et n'oblie'te mie ches deus djères mondiales qu'i o ieu.

I o miu ed soéçante-dis ins.

Et mi, j'o obliė ed causer ièr dech sis dech moės ed join mile-nu-chint-quarante-quat !

Impėrdonnabe.

Miles estchuses.


jeudi 6 juin 2019

Sitôt né sitôt batisé

J'o apprins, i o quèks jours, in dmindant un papier achl'evêke del Sonme, eq j'avoais étè batisé ch'jour d'em naissinche.

Ch'est mie conme ed nos jours : achteure, chi ti vux foaire batiser tin papar, feut aller au moinss à unne réunion, avant, pour préparer ech batinme.

Mie possibe pour mi qu'o don étè batisé ech jour d'em naissinche.

Maginez !

- "Em fanme ! Quoé eq tu foais ?"

- "Ej prépare em valise pour ête prête à pèrtir à l'maternité."

- "Et ch'batinme ?"

- "Quanq not papar éro né, os appelerons ech tchuré pour qu'i vienche."

Ech papar arrive ; ech tchuré vient ; ech papar est batisé.

Ech papar est adon in sétchurité ; ech diabe n'put pu i foaire ed mau.

Ch'est pour cho eq j'o passé l'mitan d'un sièke chin avir granmint ed problinmes.

Boinne jornée.


mardi 4 juin 2019

Pensée dech quatre dech moés ed join

... à tertous ches chinoės qui croėyoai'te, in mile-nu-chint-quater-vint-nu, et croė'te coèr achteure, chi is sont mie morts o étè tués, à l'dėmocrachie .


J'o rincontré Mdame Irma

Ej croéyoais mie qu'ale existe, mais ouais, ale existe.

Vu qu'ej l'o rincontrée.

Ch'étoait ech darain verdi dech moés ed moai, au vèpe.

J'étoais in route à matcher, avuc m'fanme, un fiu et unne fille quanq chtol-lò, qu'apprind à ête séruzyin, m'dit :

- "Min père ! Avuc l'panche et ch'sanke eq t'os, tu pux avir cho, cho, cho. Et moérir din quèks moés o innées. I feut eq t'artes ed minger du freumage, del chèrcuterie, du chuke, minme din ches fruits. Feut étou eq t'artes de bir du vin."

Merchi, Mdame Irma, ed m'avoèr dit emn'avnir.

Moralité :

Pour vive granmint ed tans, vivons malureus.




dimanche 2 juin 2019

Keupe du monde o Keupe d'Urope

Chi tu doés coésir inter gaingner unne Keupe du monde o unne Keupe d'Urope, ej pense eq tu préféreros gaingner l'première.

In principe.

Eh bin ! In Frinche, feut étou prinde in compte eute cose : onmes o fanmes ?

J'esplique.

Ach fotbal, in Frinche, l'fédération préfére gaingner l'Keupe d'Urope ed ches onmes que ch'Keupe du monde ed ches fanmes.

Qu'i sanne, vu eq ches filles doé'te tchitter Clairefontaine pour laicier leus places à ches onmes.

Ontabe.

Jou qu'ech présidint del fédération put étou ête présidint d'unne étchippe d'unne ville qui redeschind d'unne division ?


samedi 1 juin 2019

El Frinche vo à l'invers

Os avez acouté ches jornaleus l'eute smangne ?

Des frinchoés risque'te d'ête tué in Irak pour avoèr été djiyadisse in Syrie o in Irak.

Alintour ed sèt finchoés, qui sroai'te à ête condanné, pèr un tribunal iratchien, à moérir !

Et l'Frinche, ale dit "Nan ! Feut mie les tuer!"

Ej vos résume l'situation :

Ches djiyadisses, frinchoés o eute, quanq is sont in vie et libes, os les ainmons vrainmint mie. Vu qu'is térint'te mie à tuer des gins conme vos et mi, nos qui leu avons rin foait.

Qu'i m'sanne !

Qu'ej su seur !

Ches djiyadisses, frinchoés o eute, quanq is étoai'te libes et in Syrie o in Irak, l'Frinche n'o mie térinté à aller les tuer.

Durant des moés, et chin rgrêt.

Qu'i m'sanne !

Et achteure qu'el djère o défini, o l'sanne, et eq ches darains djiyadisses ont étè artés et jugés, pèr ches iratchiens, l'Frinche n'vut poin qu'is fuche'te tué.

Adon qu'ech tribunal iratchien les o condannés à moérir.

Rlisez dis lignes au dsu.

Durant l'djère, et chin tribunal, l'Frinche n'disoait rin ; ale trachoait à les tuer. Mais achteure, ales les protége.

P't'ête qu'avuc toute ech sanke eq ches djiyadisses frinchoés ont foait couler, os allons leu foaire un bieu tapis.

Rouve.