Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

mercredi 31 décembre 2014

Mat

Coèr un keup, tu t'dis qu'ej vos causer ed Mathieu o ed ches matins o eute cose.

Nan !

Ej causerai dech ju d'échec.

Et din un ju d'échec, tu pux définir pèr ête échec et mat, comme os disons.

Et comme ch'est chu ches deus photos d'apré. Ech jueu avuc ches noèrts vient ed bouger ech tour. Ech roé blanc o du mau.



Tu sais juer ?! Bin alorss, vérifie.

mardi 30 décembre 2014

Souvnirs ed deus-mile-quatore

Quanq os deschindons ches escaïers d'Eauze pour aller à Nogaro,


i n'o in qui kminche à dire eq ch'est bieu comme quanq os grimpons pour aller à ch'lac d'Oô et qu'ech solé est din ches abes.


Un gins, min bieu-frère, est toudi assis, avuc ech kmise et chin jornal din unne poke.


P't'ête qu'i pinse, avant ed pèrtir, à ches manèges ed quanq il étaoit jonne, eq tu voés coèr in été à Saint Cirq ech Popie,


O à un pont qui sroait berzillé, comme din ches Pyrénées, chu ch'kmin à foaire.


O i vourroait un matelas pour coèr dormir, toudi comme tu pux vir à Saint Cirq ech Popie.


Mais i feut mèrcher. Ho sro mie ches kmins ed ches Pyrénées,


et i éro mie toudi des mèrches, coèr moinss avuc des fleurs.
Feut vraimint eq tu voéche ch'Lot.


Mais eds étabes à vakes, ch'est possibe. Rbée din ch'Gers !


N'o mie un qui pinsoait eq ches ponts pour passer chu de l'ieu sroai'te cros comme un poteau, alintour ed Nogaro.


Tu mèrches, mais tu pux ed tans in tans t'arter din unne église et t'assoèr chu unne caïèle. Caïèle comme à ... Saint Cirq ech Popie.


Tu truves des voées comme foaisoai'te ches romains o comme, coèr un keup, din ches Pyrénées.


Tu mèrches, avuc d'eutes, comme ed pi Le Puy, comme edpi Faycelles, comme edpi Moissac.


Et tu pourros coèr mèrcher in deus-mile-tchinze. Boinne canche.

Deus-mile-quatore, ch'étoait surtoute Moissac-Barcelonette dech Gers, mèrcher din ches Pyrénées, et des vagances à Saint Cirq ech Popie. T'avoais comprins.

Bec.

lundi 29 décembre 2014

Abes à vinde

T'es un gins qui ouvre ech bo ? Ej vos t'vinde des abes.

Amon mi, j'o granmint ed ...tchinnes. Ech miu ed ches abes, slon mi. Et mi, ej sus mie écolo, mais ches abes n'ont janmoais vu eute cose que de l'ieu et du solé.

Intiérement naturel.

Chi ho t'interesses, ej vinds ches abes troés-chint euros.

Rbée !
















Des keups, ches tchinnes, is s'muche'te din ches eutes herbes. Mais j'os boin ziu.


T'os vu eq ch'est ed jonnes abes. Chi ho t’intéresse, mais mi un message. Merchi.

dimanche 28 décembre 2014

A ch'coin dech fu

Noë, alintour ed vint-troés eures, amon m'mère.

Granmint ed gins sont allés coutcher.

Avuc m'fanme et un frère, os sonmes din des cados, ach coin dech fu. I foait bin keud. Os sonmes bin.

Os causons ed tout et ed rin. Surtoute ed rin. Os sonmes bin.

I foait keud, mais in vrai, i o mie ed fu din l'kminèe, vu qu'i o mie ed kminée. N'impêque qu'os sonmes bin et eq ch'est un boin souvnir.

Merchie min diu.

samedi 27 décembre 2014

Crier n'sert à rin

- "Ah ! L'chouet'Berthe !  Ah ! L'chouet'Berthe !"

Qui crie'te, des gins.

Mais ed qué Berthe qu'is cause'te ? Ej croés eq min institutriche ed quanq j'étoais tiot est morte. Ch'est don mie d'ale !

Je rbée mie ech série ed ches Simpson à ch'télé, mais ej croés mie qu'ho fuche Bart o Bèrt Simpson ; ches gins crie'te bin l'chouette Berthe. Ch'est don unne fanme.

Et quoé qu'ale o faoit ed bin, pour ête chouette, l'Berthe lo ?

Ches gins qui crie'te comme ho froai'te miu d'esplitcher, chin crier. Chi ej pux, mi étou, vir l'Berthe lo, j'in sro ureus.

Etpi, ches gins, quanq is crie'te granmint, n'font mie atincion à quoé qu'is foai'te d'eute. Ho put ête dingéreux pour ches eutes gins ; magine, pèr eximpe, qu'is conduiche'te unne voéture o qu'is euche'te un coutieu din leu man !

Mais j'os p'tête mie bin intindu ; Is dise'te "Ah ! Chl'Houellebecq !"

Echl'auteu lo, os ainmons o os ainmons mie, mi, j'os mie lu ed lives à li, mais ed lo à crier !

Feut p't'ête eq jé voéche un sérusyin pour ches éreilles.

Mais, feut mie crier.

vendredi 26 décembre 2014

Ech messe ed minuit

Ah ! ches messes ed minuit !

Qu'étoai'te à ches invirons ed vint-troés eures. Quanq j'étoais fin tiot.

Mes pèrents nos mettoai'te au lit, mes frères et mi, ed vint eures à vint-deus eures tchinze, et os alloème apré à ch'messe.

In rintrant, os buvoème un tiot chucolat keud.

Des keups, ech Père Noë passoait quanq os étoème à ch'messe. Ches eutes keups, ch'étoait timpe au matin.

Achteure, ches messes ed minuit sont à pèrtir ed dis-sét eures trinte. T'os bin du mau à truvoer unne messe à vint-deus eures.

A dis-uit eures, t'os coèr granmint ed gins qui ouvre'te. Kmint qu'i foai'te pour aller fêter ches ages dech tiot Jésus ?

Mi, ej pinse qu'i feut eq ches messes fuche'te apré vint eures. Mais ches tchurés viusi'te.

jeudi 25 décembre 2014

Inter ech bu et ch'beudet gris

Qui qu'est inter ech bu et ch'beudet gris ?


























Ech tiot Jésus.

Tu pux étou l'vir edpi un drône.


Boin Noë à tertous.

mercredi 24 décembre 2014

Djirlandes écologiques

Ièr, ej t'os causé dech voée inter Saint-Kintin et Hin. Mais apré Hin, pour aller à Anmyin ?

Tu tchittes Hin, tu rintes din Eppeville. Lo, tu kminches par vir echl'interprinse d'un electricien, fin boin qu'i pèroait, et qu'o un nom ed fleuve ed Paris. Pourquoé, j'in sais rin.

Tu continues, t'os ech crosse interprinse ed chuke, qu'o un bieu nom, Saint Louis. Minme cose, ej sais mie pourquoé.

Pi, tu tchittes Eppeville.

Pour l'suite, feut qu'i foaiche nuit. Mais in ivèr, i foait nuit ed boinne eure.

Don, tu tchittes Eppeville et i foait nuit. Et lo, din ches tans, t'os granmint ed bèlés djirlandes, alintour d'Hombleux ; des blankes chu t'gauche, des rouves chu t'droéte.

Et bin in heut, à inviron chint mètes dech tère. Tertous les voét, vu qu'el bèle Picardie est plate. Ch'est bieu, et ch'est écologique.

J'esplitche.

Ches gins qui vouloai'te foaire ho ont mis des djirlandes qui s'alleume'te avuc echl'énergie dech vint. In les mettant chu eds éoliennes. Granmint écologique. Echl'éolienne torne avuc ech vint et ches djirlandes s'alleume'te.

P't'ête eq ch'est echl'electricien d'Eppeville qu'o branché ches djirlandes à ches éoliennes.

Dech keup, minme in été, i o toudi ches djirlandes. Mais feut attinde vint-troés eures pour les vir. Et ch'est mie Noë.

Boinnés fêtes à tertous.

mardi 23 décembre 2014

Ed Saint-Kintin à Hin

Causerai mie ed match ed rugby o ed babyfot inter ches deus fanmeuses villes ed Picardie.

Ej vux t'causer dech voée, qu'est fin droète et mie in montaingne, inter Saint-Kintin et Hin. Mie ed problinme, qu'i sanne.

N'impèque qu'i o quat ins, ech vint-troés déchimbe, i avoait, dsu, trinte chintimètes ed nèges et un vint à décorner ches bus.

Os étoème in voéture, mes éfants, em fanme et mi. Os avons ieu del canche d'arriver et d'foaire un bec à min père pour ches ages. Ech darain keup eq j'os foait ho ; un in apré, j'i téléphonoais et, edpi, j'i pinse.

Etpi, i o granmint ed gins, din ches alintours, qu'ont dormi din leu voéture o din ches trains. I doé'te coèr chin souvnir. Des keups, is ont passé miu d'unne muit ndin.

Mi, j'os janmoais oblié.

lundi 22 décembre 2014

Conmarade, ej t'

...

Tu mets ech que tu vux comme verbe pour définir ech phrase.

Mi, ej pinse qu'un conmarade qui foait des crosses babluches, poaiyées pèr ches eutes conmarades, din un appèrtémint chin connoaite ech prix, pour l'rinde miu nu, est mie un boin conmarade.

Minme cose chi i foait ho chin savoèr, i pèroait, kmint qu'étoait echl'appèrtémint avant ed foaire ches babluches.

Miu ed soéçante-mile euros, ej croés, ches babluches ; ch'est mie rin !

Conmarades, chin qu'ha vos coûte un euro, ej vos souhaite ed boinnés fêtes ed fin d'innée.

Continuez ed lire min site.

dimanche 21 décembre 2014

Gaingner miu de onze pèr chint

Ch'est min cadieu, pour ti, lecteu, pour ech fin ed l'innée.

Tu mets tin argint din unne banque et tu espères gaingner deus pèr chint in unnne innée. T'acates eds actions, et lo, tu pux perde.

Innuit, mi ej té propose ed gaingner miu de onze pèr chint. Mais feut eq tu t'bouges avant ech trinte-et-un déchimbe. Et chi tu vux ête seur ed gaingner, foais ho dman.

Foaire quoé  ?

Acater des timbes pour ches lettes.

Achteure, chu ches timbes, ech prix est mie écrit ; chi ech prix cange, ech timbe est toudi boin à utiliser. Un timbe eq t'acates in deus-mile quatore put ête coller chu unne lette in deus-mile-tchinze

Ach premier janvié deus-mile-tchinze, ech prix ed ches timbes rintchérit. Et mie qu'un molet.

Rbée, pour ches lettes ed moinss ed vint grammes :
- pour unne lette que ch'facteu vo prinde chin tans ed distribuer, ech prix ed soéçante-et-un chintimes vo dévnir soéçante-uit chintimes. Ches lettes lo, ch'est seur eq tu vos invoéïer. P't'ête mie à mi, mais, pèr eximpe, à ch'compagnie dech gaz, o ches impôts, o coèr à ches écoles ed tes éfants.

Sèt chintimes pèr timbe, tu n'os qu'i di'te eq ch'est mie granmint. I pu'te, mais is s'berlure'te : ho foait onze pèr chint. Foais ech cartchule.

Chint timbes, sét euros, mais toudi onze pèr chint ed gaingner.

- pour ches lettes qui doé'te arriver fin rade, ech prix i passe ed soéçante-sis chintimes à soéçante-sèse. Dis chintimes ed gaingner pèr timbe ; miu de tchinze pèr chint !

Ej té cause mie ed ches eutes timbes, os n'avons moinss dzoin, mais ch'est l'minme cose.

Chi tout ho et sanne mie important, t'es riche. Mais j'os tchèr quanq minme et j'té souhaite un boin diminche et ed boinnés fêtes ed fin d'innée.

samedi 20 décembre 2014

Echl'agripeu

Un agripeu o été arté pèr ches cadoreus, vu qu'il agripaoit des coses à des vindeus.

Il o été mis in prison, mie keuse qu'il agripoait, mais vu qu'i s'étoait seuvé ed prison.

Qu'is écrivoai'te, din ch'jornal d'ièr.

Ho m'pèroait ch'qu'i avoait à foaire, ches deus keups.

Chi t'os tes ages innuit, boins ages à ti. Et n'foais mie ed cacouilles pour n'mie aller in prison un jour.

Chi t'os ieu tes ages i o un moés, ej té rmerchie d'avoèr pinser à mie in m'acatant un bieu live chu ches paoiyisans edch monde, avuc ed bèlés photos.

Bec.

Ej rajoute qu'os pouvèche étou lire Agripine, mais ho n'o rin à vir.

vendredi 19 décembre 2014

Ete ureus

T'os unne fanme qui dit qu'ale t'ainme. T'os eds éfants qui t'ainme'te étou.

Mie un qui o d'mau qui n'soégne mie o qui t'intchiéte.

T'es ureus. O tu pux l'ête.

Mais i t'manque quèk cose : ech freumage.

T'in minges mie, vu qu'à ti, i t'foait du mau.

Ah ! Ches boins freumages qu'os avons in Frinche ! Ech Roquefort, ech Beaufort, et surtoute, ech camimbert, bin coulant et qui sint boin. I n'o qui di'te qu'i pue.

Eq ch'est boin !

Feut es dminder quoè qu'i feut accepter din ch'vie ?!

Des keups t'os invie ed te suicider, in mingeant des camimberts, des vrais ed Normindie, chu du boin pan et avuc du boin bure. T'ajouteroais un boin keup ed vin, et tans in tans, chi t'es mie mort, ech Roquefort, toudi avuc du pan.

Ah ! Qué t'mort sroait bèle !

jeudi 18 décembre 2014

Ureus ed rintrer

T'es toudi ureus ed rintrer din tin poaiyis. I m'sanne !

Surtoute chi ch'est mie à piés. Comme ches marins russes qui sont à Saint Nazaire edpi sis moés et qui dvroai'te rintrer din leu poaiyis innuit. O rpèrtir din leu poaiyis innuit.

In batieu. Mie chti qu'étaoit prévu, mais ch'est mie leu problinme. Feudro quèks jours.

Etpi, is rpèrt'te avuc eds euros din leus pokes. Boinne affoaire.

Chi janmoais is voé'te m'fille, qu'is i foai'te un cros bec.

mercredi 17 décembre 2014

Keuper ches cavieus

Verdi, j'os allé amon afuleu m'foaire keuper mes cavieus.

M'fanme, ej vux i foaire plaisi, vut mie eq j'os ches cavieus fin courts. Alorss, ej les laice pousser. Mais ale vut étou qu'ej les keupe ; Vo comprinde !

Amon min afuleu :

- "Kmint qu'os les keupons ?"

- "Comme os voulez, mais mie granmint."

Dech keup, l'fanme o keupé un molet miu d'un chintimète, chu un molet miu ed chonc chintimètes qu'i avoait quanq j'os arrivé.

- "Combin qu'ej doés ?"

- "Sèse euros."

Comme ches keups o ale keupe tout !

lundi 15 décembre 2014

Rcette dech gatieu couet

L'est possibe qu'ej t'os djo baillé ech rcette lo ; m'tète est mie un ordinateur. Tu pourros dech keup l'rfoaire.

I t'feut :
- quat us,
- deus-chint grammes ed chuke,
- deus-chint grammes ed frinne,
- un sachet ed levure

- unne tèle,
- unne couet,
 

 - un four,
- du corage pour batte.

Prinde unne couet.

Mette ndin, chu ches bords et ch'couvèr, du bure.

Din un eute tèle, berziller quat us et les batte in omblète.
Mette apré deus-chint grammes ed chuke et batte chonc minutes.
Mette alorss deus-chint grammes ed frinne et batte coèr chonc minutes.
Mette un sachet ed levure, batte un molet et tout mette din ch'couet et chin couvèr.


Mette alorss quarante-chonc à chincante minutes din un four eq t'os alunmé avant, à chint-soéçante-dis degrés, o thermostat sis.

Apré, t'inlèves dech four et dech couet.

Tu pux alorss keuper in deus, horizontalemint, mette ndin del crème, du chucola o del confiture.

Tu pux étou, chi t'es un boin tchuisiner, mette dsu unne boinne crème moka.

Boinne accion à ti.

dimanche 14 décembre 2014

Ech boin momint pour keuper eds abes

I foait keud, mais din uit jours, l'ivèr kminche. Achteure, tu pux keuper ech bo. Mi, in vagances unne smangne, j'in os profité.


Ej t'avoais djo causé de cht'abe à mrises qu'os avons din ch'fond ed not gardin, et de l'cabane eq j'os foait i o eds innées pour ches éfants.

Judi, j'os keupé tout le heut de ch'mrisier, avuc unne soée à mans, chin qu'i tcheut chu l'cabane, l'cloture, ches eutes bieus abes o chu mi. I o qu'un tiot seu qu'o prins un fin tiot keup. Feudro qu'ej m'estchuse à min darain fiu.

Qué plaisi ed keuper. Et lo, j'avoais mie ed filles à l'moaison qui disoai'te qu'ej sus un assassineu, comme i o trése ins quanq os avoème keuper d'eutes abes.

J'ainme bin keuper eds abes ; j'ainme étou granmint mes filles. Feut qu'is seuche'te qu'ej sus mi un assassineu d'abes. Ej foais ho pour qu'is fuche'te miu bieu o eq d'eutes l'fuche'te.


Quanq tu voés ho, tu pux et dire qu'echl'abe, ureus, dinche, et eq ches eutes l'rbé'te o l'incorage'te. Tu pux étou pinser qu'un jour, i éro p't'ête unne cabane ndin.

Bec à tertous.

samedi 13 décembre 2014

Odile et Lucie

Quanq j'étoais miu jonne, din ch'calendrier, i avoait sainte Odile ech trése déchimbe et sainte Lucie ech quatore.
 
Un jour, cho o cangé ; sainte Lucie est, edpi, ech trése déchimbe et sainte Odile, ech quatore. Pourquoè ?

I pèroait qu'à sainte Lucie, ch'est premier jour o ch'solé se coutche puss tard qu'ech jour d'avant. I o un dicton qui dit : "à sainte Luce - comprinds étou Lucie - ech jour avinche d'un saut ed puce".

Ho sroait pour ho qu'is ont cangé ?!

In vrai, ches jours kminch'te à est miu long ech vint-deus déchimbe.

Dech keup, j'os toudi mie comprins pourquoè qu'is ont inversé ches deus saints din ch'calendrier.

I o d'eutes saints qu'ont cangé o dispèru dech calendrier : quanq j'étoais jonne, min taïon fêtoait saint Eloi, ech premier déchimbe, avuc ches ouvriers. Min taïon est mort, saint Eloi o été rimplaché pèr sainte Florence.

Bec et pinsée pour toutes ches Odile, à pèrt unne tiote crosse arlande, et ches Lucie.

vendredi 12 décembre 2014

Mère généreuse

L'eute jour, j'étoais din unne interprinze pour acater des castroles à boin prix. Qu'i péroait, eq ch'est des boins prix !

Ej téléphone à m'mère pour i dminder chi ale o dzoin ed quèk cose.

- "Ouais" qu'ale m'dit, "unne païèle".

Pi, ale ajoute :

- "Et ti, os-tu dzoin d'argint ?"

J'i réponds :

- "Nan, ch'mère. Mais attinds ! I o ichi des gins ; ej vos leu dminder chi is in ont dzoin."

Et j'os dmindé, quanq em mère attindaoit à l'eute beu dech téléphone, à une fanme et s'fille. Is ont ri. Mi étou.

Et m'mère étou, mais janne.

Bec à tertous.

jeudi 11 décembre 2014

Vot fille o vint ins

Vot fille o vint ins, qu'ech tans passe rade
Mdame, coèr ièr ale étoait chi tiote
Et ches premiers tourmints sont vos premièrés rides
Mdame, et vos premiers soucis

Chacun ed ches vint ins pour vos a compté doube
Vos connaissoète djo tout ech qu'ale démuche
Os avez oblié ches coses qui l'trouble'te
Mdame, et vos troubloai'te étou

Os la truvoait bélote et vlo qu'ale est bèle
Pour unne gin étou un molet jonne qu'ale
Un garchon qui rsanne à chti pour qui
Mdame, os avoète imbelli

Is s'font un gardin d'un tchuin ed méchante herbe
Neuant ech fleur ed l'âge in un bouquet superbe
I o granmint ed tans qu'os vos a mise in gerbes
Mdame, ech bointans vos oblie

Chake nuit qui vos sanne ech minme qu'unne eute
Quanq os reuvez vos reuves raisonnabes
Ed plaisi d'amour is rinde'te coupabes
Mdame, din ch'creux d'un lit

Mais coupabes janmaois n'ont ieu tant d'innochinche
Chi peu ed rgrêts et tant insouchïenche
Qu'is n'dminde'te mie vot indulginche
Mdame, pour vos terts délits

Jusqu'ach jour o p't'ête à ch'première lèrme
A ch'première peine d'amour et d'fanme
I n'taro qu'à vos ed sourire Mdame
Mdame, pour qu'ale vos souriche...

Qui cantoait, fin bin, Serge Reggiani.

Etpi un jour, p't'ête innuit, ale éro vint-chonc ins.
Chi ch'est ho, foaisez i un cros bec.
O, pinsez granmint à ale.

Mi, ej foais un cros bec ed lo o j'sus.

mercredi 10 décembre 2014

J'écris un live

Amon mi, j'os un live qui s'intitule "ech tiot live ed ches grandes phrases". Uit chintimètes chu douse, et un d'épaisseur.

Eximpes ed phrases :
- "J'atchuse", ed Zola,
- "Ej sus un berlinoés", ed Kennedy,
- "J'os foait un reuve", ed Martin Luther Roé,
- "Quanq ches mouettes sui'te ech chalutier, ch'est qu'is pinse'te eq ches sèrdines vont ête ruées à ch'mer", ed Cantona.

T'os compris eq ches phrases sont des keups tiotes, et qu'i feut mie toudi avoèr un a à l'fin ed chin nom.

Tout cho, ch'est pour ech tiot live.

Mi, min live, ch'est "ech grand live ed ches tiotés phrases", ed trinte-sét chintimètes chu soéçante, pour respecter ech nombe d'or, et ed uit chintimètes d'épaisseur.

Des tiotés phrases, des vraies, i in o granmint. In avant première pour ti :
- "Bojour !"
- "Kmint qu'ha vo ?"
- "Merchi granmint !"
- "J'os bin mingé."
- "Combin qu'ha veut ?"
- "Rbée dvant ti !"
- "J'os lsouglou !", qui dit chti qui vo coèr grandir, vu qu'il o l'souglou
- "Tu vos prinde unne bornife chu t'dgife !"
- "Ch'est coèr loin d'ichi ?"
- "Ches jours, is ratincht'te"
- "Tin lévié est tout crapé."


Ej vux mette des phrases eq ches gins pu'te utiliser tous ches jours, comme pèr eximpe, pour aidier ches étrangers qui vien'te in Picardie.

Eutes eximpes :
- "Vlo m'tète, min tchu i vyint !"
- "A ttaleure !"
- "Adé !"

Os pouvez tertous kmander min live, dis-nu euros et quater-vint-dis-nu chintimes, in mettant un mot chu min site. Pour ches fêtes ed Noé, ho sro un bieu cadieu. Poaiyer d'avinche.

mardi 9 décembre 2014

Kmint causer à Kinshasa

O ach Congo Kinshasa ? Tu pux té dminder !

Ej vos t'esplitcher.

In deus-mile-douse, i o ieu, à Kinskasa, ech quatorienme sommet Frinco-afritchain, qui s'tient tous ches deus ins inviron edpi mile-nu-chint-quater-vint-sis, din unne ville et un poaiyis différints dech keup d'avant.

I o quèks smangnes, ch'étoait à Dakar, ach Sénégal.

Don, à Dakar comme à Kinshasa, os causons, chi os voulons, frinchais.

Mais, mi ej pux t'dire qu'ach Congo Kinshasa, étou lonmé Répubique Démocratique dech Congo, os pouvons étou causer picard, et ête comprins, vu, ch'est seur, qu'i s'agit mie ed causer chin ête comprins. 

Quanq i avoait ech tchinzienme congrés à Dakar, feut suive, i o un congo-kinshasais, qui cachoait mie echl'éléphant, qu'o rbéïé min blog. P't'ête qu'i manifestoait.

Bec à li et tous ches afritchains qui li'te mes articles ed tans in tans.



Atincion : 
Pour tous ches gins qui ainme'te, 
din deus jours, unne canchon. 
A pèrtir d'unne eure, eure d'Europe chintrale,
vu qu'i o des gins qui s'déjoutch'te à cht'eure lo.
A en mie mantcher.

In picard, ch'est unne évidinche.

lundi 8 décembre 2014

Rconnoaite un boin minisse

J'ainme bin  ech ville ed Glasgow, in Ecosse. Bèle ville, avuc ed boinnés étchipes ed fotbal, Celtic et, Rangers, mais étou, eds étchipes ed rugby.

Ièr, j'os rbéïé ech match inter Toulouse et Glagow. Ti étou ? Os-tu bin vu ech maillot ed ches jueus ed Glasgow ? Ch'étoait écrit Macron, chu ch'gauche.

Mie ed doute : ch'est un honmage à not minisse ed l'économie, qu'est d'Anmyin et qu'est ed gauche, in principe, vu qu'il est socialisse.

Ches écossais ont rconnu qu'os avoème un boin minisse.

Dech keup, j'ainme coèr miu ech ville ed Glasgow et ches gins.

dimanche 7 décembre 2014

Najeus musclés

L'eute jour, à ch'télévision, un journaleu cause ed ches uit najeus qu'os voéyons quèks sgondes avant ch'dépèrt d'unne épreuve :
- "... os sintons ech testostérone..."

Musclés chu ches épeules comme un toèr.

Granmint de rcords roustis.
Rin d'eute à dire.

Ah chi ! Ech testostérone s'acate.

samedi 6 décembre 2014

Manque ech toét

Kminchons pèr souhaiter unne boinne fète à tous ches Nicolas. Chi os in connaissez, foaisez leu un bec.

Edpi ièr, m'fanme et mi avons défini ed poéyer not moaison. Os sonmes bin ureux.

In vrai, os avons ches murs, ech gardin avuc ches abes, mais mie coèr ech toét. I feudroait dire qu'os avons ech toét, i pleut mie din ch'moaison quanq i pleut, mais ech toét est mie intiéremint poéyer. Ho viendro. 

Tiot article, mais granmint ed joé.

Vnez quanq os voulez. 

vendredi 5 décembre 2014

Deus ins et quèks

... jours o moés ; ch'est ch'différinche ed ches ages inter ches éfants d'un ed mes frères.

Mais !
Ech première est née in novimbe,
Ech  deuxienme, in déchimbe, deus ins et quèks jours apré.
Ech troésienme, étou in déchimbe, mais ech date à li, ch'est deus jours apré ech deuxienme,
Et ch'darain est né in...janvié. Deus ins et quèks jours apré ech troésienme.

Donmage !

T'os comprins ech qui vo mie ?

Chi ch'darain étoait étou né fin déchimbe, comme ech tiot Jésus pèr eximpe, ches quat éfants éroai'te ieu eds ages pairs el minme innée. P't'ête impaire, echl'innée. Et eds ages impairs étou el minme innée. P't'ête impaire étou echl'innée. Vo savoèr !

Mais os les ainmons bin tous. Peuk mantcher leus ages.

Et chi innuit t'os tes âges, boins âges à ti.

jeudi 4 décembre 2014

Qué vie in interprinze

Ech fin boin conmarade d'em fille, vu qui vit avuc em fille, pour et dire eq ch'est un fin boin conmarade, ouvre pour ed vrai edpi troés moés.

A chin kminchemint, ch'étoait ed cinq eures à quatore eures o ed treize à vint-et-unne eures. Et ed tans in tans, ed vint-et-unne eures à cinq eures.

Achteure, il ouvre pour toudi din ch'interprinze lo. Et lo, ches eures, ch'est vraimint mie régalant. Pour li, et pour em fille.

Ej t'esplitche :
Per eximple, l'eute smangne, il o ouvré dech verdi à ch'lindi, ches nuits. Pi, il o mie ouvré deus jours, mardi et merkerdi. Pi, il o ouvré ed cinq eures dech matin a quatore eures, judi et verdi. Sinmdi et dinminche, il est vnu nos vir, m'fanme, min fiu et mi. Edman, il ouvre mie. Et mardi, i rkminche à treize eures.

Qué vie pour li, ches conmarades d'interprinze et m'fille.

mardi 2 décembre 2014

Os étoème quèks boins conmarades

Unne gin :
- "Quanq os pèrtoème chu ches kmins à bicyclette, os étoème quèks boins conmarades. I avaoit Fernand, i avoait Firmin, i avoait Francis et Sébastien."

Unne eute gin :
- "Félicie, étou ?"
 
Ech premier :
- "Etpi Paulette."

L'eute :
- "Avez-vous faoit ech tour ?"

Ech premier :
- "Nan, mais j'os des tours.

L'eute :
- "Des tours ed quoé ?"

Ech premier :
- "Des tours ed vélo, pèrdi. Ej m'in alloais tracher eds ésons, à ches alintours ed Fouilly-ches-ésons, à bicyclette. Chu ches tiots kmins ed tère, os avons souvint vétchu l'infèr."

L'eute :
- "Os voulez mie réponde ?"

Ech premier :
- " Mais, ch'est mie qu'ej vux mie, mais kmint tu vux eq jé m’ranmintuche, mi. Bastien, ch'est ech fiu de l'soeur à min père, comme qui diroait, un cousin direct. Os aerdez ech complication !"

L'eute :
- "Ouais, ej voés... Os voulez boère un keup ?

Ech premier :
- "Nan, nan merchie, janmoais inter ches repas."

L'eute :
- "Os êtes un cacouilleu."

Ech premier :
- "Ej vos mie vos rténir granmint."

L'eute :
 - "Msieur Jambier, quarante-chonc rue Poliveau, pour mi, ho sro mile francs."

Ech premier :
- "Ch'est vrai ?

L'eute :
- "Kmint chi ch'est vrai ?

Ech premier :
- "Acoute : os t'connoaissons mie. Mais laice mie et dire eq tu t'prépères des nuits blankes, des maux ed tète, des nervousses brékdones comme os disons ed nos jours."

L'eute :
- "Ej savoais mie."

Ech premier :
- "Achteure, tu sais."

L'eute :
- "Tu m'finds ech tcheur."

Ech premier :
- "Ouais."



T'os rconnu ches morcieus ed canchons o films ?

In honmage à Ivo Livi dit Yves Montand, Fernand Contandin, dit Fernandel, Dédé Raimbourg dit Bourvil, Angiolino Ventura dit Lino Ventura, Francis-Jean Blanche, dit Francis Blanche, Jean Moncorgé, dit Jean Gabin, Louis de Funès de Galarza, dit Louis de Funès, Jean Lefebvre dit Jean lefebvre, Jules Muraire, dit Raimu, et tous ches eutes boins canteus o jueux ed cinéma.

lundi 1 décembre 2014

Méchand sinmdi à Toulouse

Ej vux mie causer ed ches gins qui berzille'te tout des keups pour ech plaisi et in disant eq ch'est à keuse dech jonne qu'est mort din ch'Tarn.

Nan ! Ej vux causer sport ; fotbal et rugby. Sinmdi, ches deus boinnés étchipes ed Toulouse ont mie été boinnes. Ont perdu in juant à Toulouse. In fotbal, cho arrive ed tans in tans, mais in rugby, est granmint mie fréquent. 

Magine qu'avuc ho, t'ainmes Franchoés Hollande, o surtoute, eq t'ainmes mie Nicolas Sarkosy ! 

Vraimint un méchand sinmdi à Toulouse.

dimanche 30 novembre 2014

Saprée rcette pour ches fètes

Il existe des rcettes qui sont mie pour foaire à minger. Mais pour foaire bieu ; et plaisi à ches ius.

Lis !

Rcette :

Prinde del cire, deus castroles, de l'ieu à keufer un molet, et des ballons à gonfler avuc et bouke.
Mette l'ieu din l'castrole.
Foaire keufer duchmint.
Mette ech cire din une tiote castrole.
Poser din l'eute castrole o i o de l'ieu qui keufe.
Gonfler un molet un ballon et l'mette din l'cire.
Attinde un molet.
Rassatcher ech ballon.
Attinde.

T'os défini. Tu pux alorss mette ho chu unne tabe pour ches fètes, avuc ndin une tiot bougie.

Corage ; ch'est bieu, mais casuèle.

D'avinche, boinnés fètes à ti et t'famille.

vendredi 28 novembre 2014

Ech roé ch'meurt

T'os lu ech live o vu ech pièce ed théâte ? Ch'est Uginne Ionesco qu'o écrit ho in mile-nu-chint-soéçante-deus ; boinne innée eq ch'étoait, qu'ej dit.

Ech roé ch'meurt, ch'est conte d'un roé à qui chin sérusyin annonche qu'i vo moérir.

Tiot passage dech live :

....
Ech séruzyin :
- "Ech roé disoait que peuk mantché, is (ches gins) alloai'te tous moérir."

Ech roé :
- "Ch'étoait pour des raisons d'Etat."

Margrite :
- "Tu meurs étou pour unne raison d'Etat."

Ech roé :
- "Echl'Etat, ch'est mi."

Juliette :
- "Ech malureux ! Din qué Etat !

Marie :
- "Il étoait ech loé, ed dsu ed ches loés."

Ech roé :
- "Ej sus achteure mie ech loé."
....

Achteure, i o un eute roé, ed nos tans, qui, quanq ej sus à écrire tout ho, ech'meurt étou ; ech roé Edson Arantès Do Nascimento, connu sous ech nom ed Pelé. Roé dech fotbal. Granmint ed tristesse pour mi.

Corage, Pelé.

jeudi 27 novembre 2014

Tchuisine

Tu lis tchuisine, tu pinses minger.

Mie toudi !

Avant ed minger, feut tchuisiner, din des castroles pèr eximpe.













Tu mets mie ches castroles chu ch'tabe ; t'os p't'ête des vacheus pour servir ?


I o du sé, du poève, du pouillu et du persin.

Et pour minger, feut eds assiettes, des verres, des jutes pour ech ju.


Pi, feut pouvoèr tout ringer.

Tu voés chu ches photos eq tu pux vnir amon mi, quanq tu vux, i o granmint eds assiettes, mais étou, ej té l'dis, fortchètes et tchuilléres.

Adé !

mercredi 26 novembre 2014

Mets unne pièce

...din ch'téléphone.

Qui disoait l'eute, à l'eute beu dech fil. Craindoait qu'ho keupe.

Et tu mettoais des pièces, puss o moinss slon o eq tu téléphonais et slon combin ed tans tu téléphonoais. Tu mettoais des pièces et tu les intindoais tcheur din ch'téléphone, puss o moinns rade.

Chi tu télephonoais à Paris o din unne eute région qu'amon ti, ech téléphone mingeoait alorss fin rade tes pièces.

Des keups, ho keupoait avant eq t'euches truvoé unne nouvèle pièce din t'poke. Des keups, i avoait coèr du crédit mais t'avoais pu rin à dire ; et t'avoais mis unne crosse pièce, comme un nikdouille.

Din ches tans lo, tu pinsoais mie à appeler din un eute poaiyis.

Innuit, tu causes granmint eds eures avuc tin fiu o avuc un conmarde qui reste, pèr eximpe, in Chine,. Et tu pux minme l'vir in causant. Et ho coûte rin. In vrai, i sanne eq cho coûte rin. Mais ho coûte quanq minme. Feut dire qu'ho coûte granmint moinss qu'avant, et t'os mie dzoin ed pièces avuc ti.

Ch'est bin moderne. Et bin pratique.

Achteure, i o des gins ed miu ed chincante ins qu'ont mie connu l'inter, comme ech vint-deus à Asmières ed Fernand Raynaud. Béto, t'éros des jonnes ed tchinze ins qui n'éront janmoais vu unne cabine ed téléphone. O din un musée ?!

mardi 25 novembre 2014

Quat notes ed musique

L'eute jour, min fiu rinte ed l'école et m'dit :
- "Ech père, feut qu'ej té foaiche acouter unne musique."

Alors, i m'met ech musique.

Un accord et quat notes ed guitare après, j'i dit "Angie" ed ches Pierres qui Roule'te, avuc Mike Jagger, Keith Richards o Charlie Watts, pèr eximpe, et qui slon mi, ont granmint miu viusi eq Jean-Flipe Smet.

Qu'ej connoaiche , min fiu in étoait surprins. Qu'ej rconnoaiche fin rade étou. Un molet ed tchulture, un molet ed canche.

Mi, j'étoais né edpi quèk innées quanq, in mile-nu-chint-soéçante-trése, ches canteus ont foait chte canchon Angie.

L'eute canteu, Jean-Flipe Smet, cantoait li, cht'innée lo, Toute ech musique eq j'ainme. Fin boinne étou.

Feut qu'ej té dise eq quat ins apré, à l'internat, à ches vèpes, i avoait un jonne, noèrt, qui s'mettoait à canter chte canchon ed Jean Flipe Smet, quanq ches lampes dech cambe étaoi'te éteintes. Dbout chu chin lit ; ech surveillant djeuloait granmint, et nos, os rioème.

lundi 24 novembre 2014

Triglychérides

T'os des maus à et tète o t'panche, feut eq tu voéches vir un sérusyin.

Et ch'gars i t'dit :
- "os allons os prinde un molet ed sanke et rbéïer ékmint qu'il est".

I o miu ed triglychérides qu'il in feut.

Pour mi, ches triglychérides, ch'est à keuse ed ches graisses. Mie vrai ; i pèroait eq ch'est à keuse dech chuke et ed l'alcool.

Ej sus fin ureux : mie ed problinme, pour mi, d'arter ed minger o boère ho. Et mi qu'ainme granmint ches fromages et ches chèrcuiteries, mais qu'in mingeoais mie ed pi deus ins, ej pux rkmincher. 

J'érmerchie granmint ech séruzyin ; ej sus ureux.

dimanche 23 novembre 2014

Feut-i miu

... un viu présidint ed quater-vint-sét ins o un nikdouille qu'intindroait Diu i dire ed foaire la djerre à qui i vut ?

Ch'est mie ches ages ed not Françoès, ureusemint, vu kmint qu'il est djo achteure.

Pour mi, i o mie ed question.

Pi t'os des viux ed quater-vint-dis ins qu'ont coèr toutes leus facultés din leu tètes.

Boinne canche à ches voteux.

samedi 22 novembre 2014

Sportif ed l'innée

Cht'innée, pour ech premier keup, le sportif ed l'innée est un frinchais ; ch'est un gars qui seute granmint heut, avuc unne perche.

In févrié, il o foait miu eq Sergueï Bubka et est édvenu chti qui seute ech pu heut, toudi avuc unne perche.

Il o foait ho amon Bubka, à Donetsk, in Ukraine.

Mi, ej mé dminde :
- "Donetsk, ville ed l'innée ?"

P't'ête, malureusemint.

vendredi 21 novembre 2014

Allo min onke

...qu'ale m'dit ièr, em  nièce, à deus eures du matin, "tu sais o j'sus ?"

- "Ach beu de ch'téléphone" eq j'i réponds. "Et mi, tu sais o ej sus achteure ?"

- "Ej sus din ch'Beaujolais, pour unne fète chu ech beaujolais nouvieu."

- "Et quoè tu foais lo ?" eq j' dminde alorss.

- "Ej boés des boins vins avuc del banane.

- "Kmint ! I o des bananes din ch'vin" qu'ej dis, ébeudi.

- "Ej croés", qu'ale m'dit.

- "Acoute mi, tiote, p't'ête qu'ech vin i sint l'banane, mais i in o mie din ch'vin".

- "Ch'est quanq minme fin boin, min onke."

- "Combin eq t'os bu ed vère", eq j'i dminde étou.

- "Seulemint troés."

- "Et din t'vie ?"

- "Troés".

- "Merchi. Boinne nuit, em nièce."

jeudi 20 novembre 2014

Picasso

Qué canche eq j'os : j'os rtruvoé des peintures ed Picasso. Miu ed quarante-et-un ins apré qu'i fuche mort, eq quèks jours avant ches quarante-et-un ins de m'tiote bèle-soeur qu'a dech keup, t'os comprins, mie connu Picasso, magine min plaisi !

T'es ech premier à qui ej cause d'ho. J'in os foait des photos.

Rbée !


















Ej pinse qu'il o peinturé ho quanq il o ouvré à Montmarte, à foaire des portraits, in blanc chu du noèrt. I o mie granmint ed gins qui sai'te qu'il o ouvré à Montmarte. I m'sanne eq din ches innées lo, l'étoait mie djo connu comme achteure.

I o étou quèks dgiffes in noèrt chu blanc. Admire ech trait ed crayon !


Chi, ti étou, t'ainmes granmint ech qu'ho foait Picasso, dis-le mi, et j't'in truvarai.

Bec à m'bèle-soeur qu'o innuit ches ages.

mercredi 19 novembre 2014

Rin dé rin

Innuit, j'os rin à écrire.

J'os bin un nveu qu'o ches ages innuit et qui vient ed truvoer à ouvrer, mais ho mis à pèr, rin.

Feut quanq minme qu'ej vous dise qu'ej sus fin ureus pur min nveu ; l'o mis toudi ieu unne vie régalante, et lo à vint-quat ins, ech canche arrive. Ej sus granmint ureus pour li. Chi i passe amon moaison, os boérons un boin keup.

Unne vie ed brin, mais un tcheur cros comme un nénéphant.

Bec à tertous.

mardi 18 novembre 2014

Troés milimètes

Ech nivieu des ieus grimpe ed troés milimètes tous ches ins edpi vint ins. Qu'i pèroait.

Et dech keup, i o eds iles din ch'Pacifique, o des tères din ches Anmérikes, à Miami pèr eximpe, qui vont dispèroaite.

In Ingueltère, ech nivieu qui grimpe foait ertchuler ches falaises ed deus mètes. Kmint qu'ho put foaire ho ? Ej pinse eq l'ieu berzille ches piés ed ches falaises. Comme unne secrétaire ed brin berzille ches miens.

Ech journaleu qui cause dech nivieu ed ches ieus définit in disant qu'in Alaska, i raboaice.

Mi, i m'sannoait qu'ech tère étaoit oronde. Mais chi ech nivieu ed ches ieus cange mie de l'minme manière din ches poaiyis, ej mé dminde.. A moinss qu'ech nivieu dech tère cange étou ?

lundi 17 novembre 2014

Lire ech Courrier picard

J'ainme bin lire ech Courrier picard ; un keup pèr in, quanq il est écrit in picard. Ches eutes jours, ej comprinds rin.

In vrai, ej comprinds un molet, ed tans in tans ; ches résultats ed fotbal.

Ech sis novimbe, j'os lu ndin qu'i avoait achteure ech Tiot Colas qu'alloait ête transcrit in picard, comme l'ont djo été Tintin, avuc, pèr eximpe, les pinderleots de l'Castafiore, et Astérix, avuc Astérix i rinte à l’école.

Ah ! ches aüres dech tiot Colas ed ches conmarades, Agnan et Alceste pèr eximpe. Granmint ed plaisi pour ches lecteus. Avuc ches dessins ed Sempé.






Dis rin à mes nveus o nièces, Noë est béto.

Etpi, din ch'Courrier picard, i o des nouvèles importantes, pèr eximpe, ech sis novimbe, chu Montdidji, lo o qui reste min cousin, es fanme et leus éfants.










I o eds articles eq tu pux oblier, is t'impêqueront mie ed vive ureus. Rbée apré !






























Des coses régalantes : unne tiote érchette. Ho foait toudi plaisi.












Mais ech miu, ch'est echl'oroscope:










Quanq j'alloais à chl'école, ech première cose qu'ej foaisoait, timpe au matin, ch'étoait ed lire min oroscope. Des keups qu'i m'dise ed m'inrnaler m'rcoutcher. L'o janmoais dit.

Ej définis echl'article in félicitant ches jornaleus dech Courrier picard, in disant bojour à ch'cousin qu'a ouvré un tans avuc eux, et in rmerchiant min frère qui m'a acaté ech jornal ech sis novimbe.

dimanche 16 novembre 2014

Mère Julia

Mère Julia ! T'os connu ?

Mi, j'os ieu chte canche. Feut dire qu'ale étoait unne taïonne à min père.

Quater-vint-dis ins et quèks quanq ale est morte, quater-vint tiots éfants pour ech fille, unne ed mes taïonnes, t'os comprins, et, avant ed moérir, janmoais ale ch'est berlurée chu ches tiots noms ed ches galibiés lo. Janmoais.

Etpi, ale ainmoait foaire del broderie. Rbée !




Qué souvnirs ! Fin bieu. Et qué patieinche ! Ej croés m'souvnir qu'ale avoait mie dzoin ed lunettes pour broder.

Ech miu ed ches souvnirs, ch'est ech mémoère.

samedi 15 novembre 2014

Unne cabane din ch'fond dech gardin

Pour quoé foaire ?

Ringer ech matériel ed gardin ? Possibe.

I o étou ches cabanes o eq t'alloait tout seu, pour et soulager ech panche ; i avoait des plankes in bo, des moukes et un jornal. J'ai connu. Un gins in o foait unne canchon.

Etpi, i o ches cabanes eq des boins pères ed famille fabrique'te pour foaire plaisi à leu galibiés.

I o étou unne canchon lo dsu. Ho dit eq slon ches tans, ches éfants jue'te avuc, pi jue'te mie avuc, vu qu'is pèrt'te dech moaison ed ches pèrints. Ch'est alorss ches tiots éfants qui rkminche'te à juer avuc ech cabane.

Amon mi, ech cabane pour mes éfants étoait à troès mètes ed heut, pi achteure, à un mète. Mais i o toudi quèk cose ndin.

Rbée














Bin ouais ! Alintour dech cabane, din min gardin, i o étou eds abes. Et ches abes, i perde'te leus feuilles, et leus fruits. Qui tcheu'te des keups din ch'cabane.

Din quèks innées, effectivemint, j'espère rvir des tiots galibiés vnir juer din ch'cabane