Feut i moérir in déchimbe

... pour qu'os causons ed nos ?

 

Os pouvons s'dminder. I o quèks jours, ech jueu ed fotbal et troés jours après, un pape. Ches jornaleus, innui, cause'te tertous que dech pape. Et os sonmes ech trinte-et-un déchimbe. 

Dman, ches gasètes causeront ech darains papars deux-mile-vint-deus, et surtoute ed ches premier papars deus-mile-vint-troés, vu eq deux-mile-vint-deus puss un, cho foait deus-mile-vint-troés. Chi os l'savoète mie o pu, rvoéyez vos tabes d'addition ed deus-mile-vint-deus. Deus-mile-vint puss un, cho foait deus-mile-vint-troés ; deus-mile-vint puss deus, cho foait deus-mile-vint-quat ; deus-mile-vint puss troés, cho foait deus-mile-vint-chonc ; deus-mile-vint puss quat, cho foait, euh ! deus-mile-vint-sis ; ...

 

Aprè ches premiers papars vienche'te ches premiers morts célèbes : des canteus ? Eds onmes politkes ? Surprinse, à l'eure ò eq j'écris.

Os verrons din quèks jours.

In attindant, définissez bin deus-mile-vint-deus, et d'avinche, boinne innée deus-mile-vint-troés, vu eq deux-mile-vint-deus puss un, cho foait deus-mile-vint-troés. Chi os l'savoète mie o pu, rvoéyez vos tabes d'addition ed deus-mile-vint-deus. Deus-mile-vint puss un, cho foait deus-mile-vint-troés ; deus-mile-vint puss deus, cho foait deus-mile-vint-quat ; deus-mile-vint puss troés, cho foait deus-mile-vint-chonc ; deus-mile-vint puss quat, cho foait, euh ! deus-mile-vint-sis ; ...

 

Ech pu grind jueu ed fotbal du monne

Edson Arantès do Naschimento, lommé Pelé pèr tertout, est mort i o quèks eures.

L'avoait quater-vint-deus ins.

Quanq j'o apprins cho, ej m'o déjoutché pour vos l'annoncher.

Ch'est li qui m'avoait foait démucher et ainmer ch'fotbal, din ches innées mile-nu-chint-soéçante et quèks.

Adé chl'artisse ! Tu m'os rindu ureus ; innui, ej su trisse, mais ch'est l'vie.

Cafougnete et ches cadieus ed Noë

 Avant Noë, Cafougnete cause avuc un conmarade :

- "Quoé eq t'os dmindé ach Père Noë, ti  ?"

- "Un train électrike."

- "Un train électrike !"

- "Ouais !  Et ti, Cafougnete ? "

- "Un tampax."

- "Un tampax ! Ch'est quoé ? "

- "J'in sais rin, mais avuc, i péroait eq tu pux foaire granmint ed coses ; tu pux, pèr eximpe, courir, monter à bidet et minme aller nager."

Cafougnète s'o perdu din ches bos

Pour rire un vint-troés déchimbe.

Cafougnète s'o perdu din ches bos. 

 

Un keup, i voét unne tiote canmuche. Il avinche et buque àchl'huis :

- "I o unne gin ichi ?"

 

- "Ouais !" répond un éfant.

- "Tin père est lò ?"

- "Nan ! L'o pèrti i o un quèrt d'eure !

- "Et t'mère ! Ale est  lò ?"

 - "Nan, ale o pèrti quanq j'arrivo !"

 - "Mais qué famille ! Os êtes jonmaois insanne ?"

- "Nan ! Ichi, ch'est ches cambinets !"
 

Ech vrai Père Noë

I o quèks smangnes, adon qu'éj rindoais visite à unne boinne jonne conmarade, vlò qu'ale mé dminde chi j'accepteroais dé vnir foaire ech Père Noë ech verdi sèse déchimbe lò dò qu'ale ouve.

Ej buse quèks minutes, et pour i foaire plaisi, j'i dis qu'éj su d'accord.

Em copine ouve din un chinte qu'atcheuille éds éfants qu'ont mie ed pérints ; ches éfants ont bin des pérints, mais is les voé'te pu, pour granmint ed raisons.

Et don, verdi ed l'eute smangne, j'o allé m'dédjiser in Père Noë, avuc unne crosse invie ed foaire plaisi à chatchun ed ches galibiés.

 

Ch'o fin bin étè. I o minme un galibié qui m'o foait un tiot cadieu. qu'il  avoait fabritché li-minme.

Mi, j'o étè granmint surprins ed vir des garchons qu'ont inter uit à douse ins avir invie ed calins avuc ch'Père Noë. Qu'o mie rfusé.

Pèrmi ches garchons, i n'o qu'ont dit in riant un molet eq j'étoais mie ch'vrai Père Noë.

- "Qui don qu'éj sroais chi ej su mie ch'Père Noë ?

- "Sin Nicolas  ?"

- "Sin Nicolas ! Nan ! Ej su ch'Père Noë."

- "Nan ! T'es ch'Père Fouétérd."

J'o ri.

 

Pi, alintour ed vint-et-unne eures, ches éfants ont pèrti avuc leus édutchateus. Et lò, un garchon qu'éj vo lonmer Louis pour mie dire qu'in vrai, chin vrai tiot nom ch'est Tiot Louis, o vnu m'vir pour avir un darain calin dech Père Noë. J'o étè granmint émotionné

 

Et ej su granmint ureus d'avir allé lò-bas.

 

D'avinche, boin Noë à tertous.

 

Aller promner

Os sonmes béto in iver ; des keups, os avons djò pu vir ches nèges et des rimées.

 

Innui diminche, justemint, i rime. Adon, aprè avir minger unne boinne tête ed vieu, après nonne, j'iro promner avuc min tchyin. Et p't'ête ém fanme.

 

Alintour ed sèse eures, durant au moinss unne eure. Os mettrons des casakes bin keudes pi os prindrons des clitchés et boérons un boin tiot ju quand qu'os rvarons à no'moaison.

 

Et vous ! Quoé-jou qu'os frez aprè-nonne ?

 

Bec à tertous

El fanme est chl'avenir ed l'onme

... qu'éroait dit Aragon.  

Et Jean Ferrat o canté cho.

Eh ouais ! Jean Ferrat cantoait qu'el fanme est chl'avenir ed l'onme, slon ch'poète Aragon.

Mais in vrai l'phrase d'Aragon est "Echl'avenir ed l'onme, ch'est l'fanme".

Jean Ferrat o cangé ech sens ed ches mots pour foaire rimer onme et roéyeume. Il éroait miu foait ed mette onme et Sonme, cho rimoait puss.

Pour mi, écrire o dire qu'él fanme est chl'avenir ed l'onme, o qu'echl'avenir ed l'onme ch'est l'fanme ramène à l'tchestion del glinne et ed l'u : qui-jou qu'étoait lò ech premier ? et don, qui-jou qui sro-lò ech darain ?

 

Os allons coèr avir dzoin ed buser.

Boinne jornée.

Des wardeus ed vakes ed not'sièke

L'eute smangne, pour un keup, j'o rbéïé un film ed wardeus ed vakes à l'télé ; j'ainme, ed tans in tans, rbéër ches films-lò.

 

In principe, ch'est à ches Anmérikes, din ches innées dis-uit-chint et quèks ; ches gins voéyage'te granmint avuc des kvaus, warde'te des vakes, et des keups, i o des problinmes inter ches wardeus ed vakes et eds indiens ed ches Anmérikes.

 

Lò, i o un momint din ch'film eq j'o rbéïé, i o unne messe. Et din l'messe, i o l' prière dech Not'Père. Din ch'film.

Ej l'écris mie, os connoaissez :

"Not'Père, qui êtes à ches tans,

...

Et nos laisse mie intrer in tentation

...

Amen."

 

Ems éreilles ont bin intindu, et vos ius ont bin lu : "... et nos laisse mie intrer in tentation ...".

 

Jou qu'os avez vu min problinme ? L'phrase-lò, in Frinche, ale est din l'prière edpi ech deus déchimbe deus-mile-dis-uit.

 

I sanneroait don qu'i o coèr des wardeus ed vakes achteure à ches Anmérikes qui vi'te conme i o deus sièkes, mais qu'ont apprins ech nouvieu Not'Père.

 

Boinne jornée.

 

Ech corage d'unne chincantainne ed fanmes russes

Os l'savez malureusemint, achteure - nan ! mie achteure, mais edpi dis moés - i o unne trisse djère in Ukraine.

 

In septimbe, ech présidint russe o déchidé d'invoéyer tous ches onmes russes qui pouvoai'te aler foaire l'djère foaire l'djère.

 

Tertous.

 

Et bin, in novimbe, unne chincantainne ed fanmes russes ont déchidé, avuc granmint ed corage et d'anmour, d'aller tracher leus onmes in Ukraine et les ramner à leu moaison.

 

Is ont mie ieu ch'droét.

 

Brin ! 

 

Is i ont quanq minme alé et ont bin foait, vu qu'is ont truvoé leus onmes, afolés et tout seus din un indroét ò ches eutes russes vouloai'te pu aler, minme ches merchénaires russes.

Is ont truvoé leus onmes, et les ont ramné.

 

Achteure, din quèks jours o moés, ches fanmes et leus onmes sront p't'ête juger. Tant piss ! Au moinss, is sont in vie.

Quat frères sont insanne

Din ches familles dò qu'i o eds éfants, il est toudi fin agréabe ed vir ches éfants qu'ainme'te s'rincontrer, minme quanq qu'is ont viusi, minme quanq is ont merrié et qu'is ont étou des galibiés, et un jour, des tiots-éfants.

Maginez achteure unne famille dò eq ches filles ont troés foés puss ed frères qu'ed soeurs et dò eq ches frères, eux, ont deus foés puss ed frères qu'ed soeurs.

Un jour arrive, malureusemint, dò qu'un frère meurt. Lonmons-li Zèf.

Ches innées passe'te, un eute frère meurt. Mettons eq ch'est un tchuré.

Pi un troésienme. Disons eq ch'est min père.

In-heut, quèk pèrte din ches tans, ches troés frères attinde'te leu grinde soeur. Mais ch'est un jonne frère, pèr comparaison à ches troés qui sont djò morts et pèr rapport à leu soeur ainnée qu'est coèr in vie, qu'arrive ; i sanne eq Diu o foait unne berlure. ej dis toudi eq Diu, os érons toudi du mau à l'comprinde.

Achteure, is sont quat frères insanne din ches tans et i vont p'tête pouvoèr juer à cartes. Minme chi avec leu soeur, is éroai'te pu étou, et minme chi d'eutes éroai'te ainmé qu'ech quatrienme frère fuche coèr in vie innui, dman et aprè-dman. Conme is éroai'te ainmé eq tertous fuche'te coèr in vie.

Innui, ej pense à ches gins qui dise'te adé à min onke.

Eq Diu et l'famille ed min onke aide'te s'fanme, ess éfants et tiots-éfants pour qui l'vie vient ed canger.

 

Bec à tertous.

Ej pux mie ouvrer

Innui, j'o inditché din ém'boéte électronike ed messages pour min ouvrage eq j'ouve mie "in raison dech nu novimbe deux-mille-vint-et-un".

Seurement eq nu-mile-nu-chint-quater-dis-nu por dis-mile ed ches gins qui vont lire ech message vont mie comprinde, mais ej sus seur eq vos, os érez comprins.

In puss, ej vos mets deus clitchés.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Boinne jornée, et crosse pensée pour ches gins, vius o fin jonnes, qu'ont leus âges innui.

Falloait i penser

L'eute jour, un bieu-frère mé dminde :

 

- "Kmint qu'i vo Noé ?"

 

Jou qu'os avez vu l'cacouille ?

 

Grin merchi à min bieu-frère pour nos avoèr foait rire et pour s'intchiéter del santé min tiot-fiu.

 

Bec à tertous.

Ech vrai bonnu

I o des coses qu'os atteindons granmint ed tans, et quanq is arrive'te, os sonmes fin ureus.

 

Per eximpe, chake innée, ches éfants qu'ont inter deus à quater vint-dis-uit ins d'âge atteinde'te qu'ech vint-chonc dech moés ed déchimbe fuche lò. Pour fêter el naissinche dech tiot Jésus, bir, matcher, avir mais étou offrir des cadieus à ches gins qu'os ainmons.

Chake innée.

 

Béto Noë ! qu'ej pux écrire. Et dire.

Mais edpi quèks jours, i o des pérints qu'ont djò ieu ech pu bieu cadieu ed leu vie : un papar lonmé Noé. 

 

Noé et Noë ! Un hasèrd ?

Ech deusienme, Noë, est à coeuse d'un papar qu'o né i o puss ed deus-mile ins, et eq des gins ont atteindu avant et durant puss ed dis, chint ins et seuremint puss ; ch'étoait annonché, qu'i paroait ! Pi, un éfant lonmé Jésus o vnu.

 

Pour ech premier, Noé, il o né i o quèks jours, din unne région ed vakes blankes. Ches pérints l'ont atteindu durant alintour ed sis ins. Des keups, is ont brai pèr manque o perte d'espoèr. Mais is i ont cru et ont été fin corageus. Achteure, ch'est l'bonnur. Un fin cros bonnur !

 

Achteure, maginez un taîon à qui unne gin dminderoait ed coésir inter deus tiots-éfants chti qu'il ainme ech puss !

Fin cros problinme, qu'os pouvez pensez.

Eh bin nan !

Ech taïon, il o deus tiots-fius ; un qu'o mantché ed moérir quanq il o né, l'eute qu'o été atteindu sis ins. Ech taïon, il ainme ches deus, et i coésiro jonmoais. Minme avuc deus, troés, quat o vint tiots-éfants ed puss, il les ainmero tertous autant.

 

Boinne jornée à tertous, et merchi min Diu.

Quand os viendrez m'vir

 ... os pourroète pu dire qu'i o granmint ed kilomètes. Minme chi j'o poin cangé ed moaison.

Mais achteure, pour éms éfants, pour mes frères, leu fanme, leus éfants, pour éms onkes et tantes, pour ém mère, pour mes cousins cousines et leus galibiės, quanq is viendront, is pourront étou vir min cousin qu'achteure ej lonme étou min voésin.

Don, is front ches minmes kilomètes, mais pour vir au moinss deus familles.

Et p't'ête bir deus jus, matcher deus keups,...

Os avez comprins min cartchul !?

P't'ête minme qu'os érez l'canche ed vir mes deus tiots-fius qui sont fin bélots.

A béto.

Cros becs à tertous.

J'invinte rin

J'invinte rin quanq j'écris qu'edpu quèks smangnes, il est granmint malaisié, et des keups, mie possibe d'acater du gasole pour mette din ches voétures, ches tracteus o coèr, ches tronchonnoères.

J'invinte rin quanq j'écris eq cho baille puss invie d'acater unne voéture alectrike.

Eh bin, quanq j'écris qu'unne fanmme qui o unne voéture alectrike pour aller ouvrer o tombé in rade vu qu'és voéture n'avoait pu d'éctricité, j'invinte rin ; ch'étoait l'eute smangne, et l'fanme avoait oblié d'in rmette, ed l'alectricité.

Boinne jornée à tertous, et ch'miu, ch'est ed rester à vo'moaison.

Pour foaire un papar

Minme chi os avez mie sorti del tchuisse ed Jupiter, os savez tertous eq pour foaire un papar, i feut un onme et unne fanme.

 

Aprè, os pouvons dire, quand ech papar nait, qu'os sonmes seur del mère. Des keups, os térintons chu ch'père. L'est possibe que ...

 

Eh bin tout cho, ch'étoait avant !

 

Achteure, pour foaire un papar, i feut toudi un onme et unne fanme, mais ches séruzyins peu'te foaire ch'papar din unne éprouvoète, et aprè rmette ch'papar din l'panche d'és mère. Chi os cartchuloème ches âges conme font ches chinoés, edpi ech jour dò qu'ech papar o été foait, cho pourroait foaire, des keups, des papars qu'ont deus ins d'âges quanq is sortiroai'te del panche ed leu mère.

Qu'in dire ?

I o deus riskes :

- d'unne, eq ches séruzyins met'te poin l'boin onme avuc s'fanme,

- ed deus, eq ches séruzyins rmette poin l'boin u din l'panche del fanme

Minme chi, is font seurement granmint atincion.

.

Aprè, feut rconnoaîte eq ches technikes-lò font granmint d'ureus. Adon, acceptons-les.

Boinne jornée, et boinne canche à tertous ches pérints qui vu'te eds éfants.

Echt'abe est din ches feuilles

Et din cht'abe, i o unne tiote branke,

Din l'branke, i o un tiot noeud, 

Din ch'noeud, i o un tiot treu,

Din ch'treu, i o un tiot nid,

Din ch'nid, i o un tiot u,

Dun chl'u, i o un oésieu,

Din chl'oésieu, i o un tiot tcheur,

Din ch'tcheur, i o unne tiote bague          (rmèrke ed mi : cho, cho surprind)

Din ste bague, i o un tiot mot,

Et ch'tiot mot s'apèle l'anmour.

L'anmour qu'est l'mot, l'mot qu'est din l'bague, l'bague qu'est din ch'tcheur, ch'tcheur qu'est din l'oésieu, l'oésieu qu'est din l'u, l'u qu'est din ch'nid, ch'nid qu'est din ch'treu, ch'treu qu'est din ch'noeud, ch'noeud qu'est din l'branke, l'branke qu'est din chl'abe, chl'abe qu'est din ches feuilles.

Tout cho, sont ches paroles d'unne canchon cantée pèr Mes Seuïers sont Rouves, des canteus qui cant'te fin bin mais fin rade. Ch'est pour cho qu'ej vos les o traduite. Trachez chu internénet, os les truvarez. Et leus canchons étou.

Boinne acoute !

Eq ches inglés fuche'te ureus

..., leu reine, qui vient ed moérir, éro vétchu soéçante innées in minme tans eq mi. Ale o ieu del canche !

Os pouvons minme leu dire qu'ale o étou vétchu casi dis moés (nu moés et vint-nu jours) in minme tans eq min premier tiot-fiu. Un vrai bonnur pour él reine, qu'ej pense.

Boinne canche à ches inglés avuc ech nouvieu roé qu'is ont achteure. Unne cose est seur, vu és'éreilles, is sront acoutés.

 

Boin diminche à tertous.

Cafougnète et ches cartchules

En pensant à ches galibiés qui vont rtorner béto à l'école.

 

A l'école, ech moaite pose un problinme et dminde à Cafougnète d'i réponde.

 

- "Cafougnète, mettons eq tin père acate dis lites ed vin à un frinc et chincante chintinmes pèr lite. Combin eq cho i foait ?"

 

 - "Oh ! Avuc min père, cho i fro deus jours !"

Ch'est un tiot

 ... qui doét seuremint foaire unne cacouille o p'tête dire des mintiries ! Qu'ont du penser ches pérints ed min taïon quanq il avoait  alintour ed sèt ins d'âge.

 

J'esplique.

Ch'étoait un jour dò eq min taîon juoait à l'cour o din ches cans et avoait rintré às'moaison, à Lillers, din ch'Pas-ed-Calais - feut l'savoèr pour comprinde aprè - in disant à ches pérints qu'il avoait vu troés yons .

Maginez ches pérints !

Chu ch'keup, is ont rin dit à ch'galibier.

Deus jours après, din l'gasète, mes rataïons, don ches pérints ed min taïon, ont lu :

"Troés yons sont seuver d'un chirke."

Quanq ej buse, innui, jé m'dis eq j'o mantché d'én mie avir ch'taïon-lò et ém mère.

Boin été à tertous, ouvrez bin vos zius, et croéyez un molet vos éfants.

Croère à ches mirakes

J'o allé à Lourdes avuc m'fanme.

Poin ed mirakes ; j'o rvnu avuc.

Un hernu in montaingne

Echt'étè, os avez p't'ête, conme mi et min cousin, allé mercher in montaingne et dormir din unne tente, casi  dò qu'os avez invie ed dormir.

Lò dò qu'i o del'ieu, ch'est miu.

Maginez ! 

L'est alintour ed dis-nu eures, i foait bieu, et chl'indroét dò qu'os êtes est bieu étou. Os artez et os plantez vo'tente. 

 

Quèks clichés au vèpe

Vint-deus eures, os vos joutchez..

Vint-deus-chonc, i pleut. Conme un ho ed vakes qui pisse'te ! Durant quat eures.

Au matin, quanq os êtes prêts à pèrtir, il o rkminché à pluvoèr. Et dech keup-chi, os avez del'ieu pèrtoute alintour ed vo'tente. Pour pèrtir  - ej pux dire : pour és seuver" -, feudro mercher din l'ieu !!!

 

Quèks clichés ed ches minmes indroéts, au matin

 

 

Et quanq os êtes achteure in sétchurité, os rmerchiez Diu. Vu eq chi il avoait plu durant toute él nuit, os éroème rpèrti, chi os avoème pu  - poin seur ! -, in tchulotte, chin keuchure, maronne et casake.

Boin vacances à tertous, et fuchez toudi prudent.

Min père étoait mie viu

Merkerdi, adon eq j'étoais in route à pichier et acouter del musike, d'un keup, ej m'o dis eq j'avoais mie connu min père viu.

 

Cho put surprinde, mais quanq os pichions, os pouvons foaire granmint ed cose, conme pèr eximpe, buser o bin apprinde des coses.

 

Don, d'un keup d'un seu, ej m'o dit cho : j'o mie connu, et surtoute mie vu min père viu.

Quanq chti-lò est mort, i o un molet puss ed dis ins, l'avoait moinss ed soéçante-tchinze ins d'âge. Ch'est un molet viu, surtoute étou quanq os avons moins ed chincante ins d'âge ! Cho sanne viu ! 

Mais merkerdi, ej m'o dit qu'és dgife étoait mie l'dgjfe d'un vrai viu, ed quater-vint-dis ins pèr eximpe..

 

Etpi, quèks moés avant ed moérir, min père foaisoait granmint ed coses, conme ches jonnes ed chincante o soèçante ins, pèr eximpe : conduire, mèrcher, juer, minme ach fotbal, foufter, keuper eds abes, cartchuler, ...

 

In sortant ed ches toélètes, j'étoais ureus.

Et vos, quoé-jou qu'os avez conme boinnés ranmintuveries ed vos pèrints ?

Boinne jornée à tertous.

Ches verdi trèse à vnir

I o unne smangne, ej vos o annonché qu'i éroait qu'un verdi trèse cht'innée.

Et os nos sonmes dmindé chi i avoait eds innnées chin verdi trèse.

Ranmintuvoez-vos ! Ej vos o causé d'internénet et ches cartchuls qu'os i truvons.

Mi, j'o traché in pèrtant dech calendrié deus-mile-vint-deus.

Et vlò ches résultats, innée pèr innée et moés pèr moés.

 

Durant ches trinte-sèt innées à vnir, i éroait au moinss un verdi trèse pèr innée. Aprè, ej pux mie vos dire. Os in rcauserons quanq i feudro.

 

 

Qué l'canche fuche avuc vos !

 

Boinne jornée.

Pauve jonne sibérin

Avuc l'djerre d'achteure in Ukraine, granmint ed gins, pèrtoute din l'monde, di'te poin o pu ainmer ches russes. Os pouvons les comprinde.

 

Mais quanq minme !

Ièr, granmint ed jornaleus ont causé d'un jonne sibérin né à Irkoutch i o vint-et-un ins et jugé pour crime ed djerre pèr ches ukrainins ; il o tué au moinss unne gin qu'étoait mie un soldat ukrainin.

Seur eq ch'est vraimint mie unne cose à foaire qu'ed tuer des gins, et i feut ête puni.

 

Mais mi, j'o du mau pour ch'jonne russe.

 

Echt'onme, l'o pèrti s'batte in premier pour gaingner ed l'argint et aidier s'famille à vive. Chi os connoaissez mie l'bèle Sibérie, os érez p't'ête du mau à comprinde. Ej vux bin croère et dire eq ch'est mie unne estchuse pour tuer.

 

Mais ête fièr ed juger un russe pour crime ed djerre adon qu'ech jonne o surtout obéi à ches ordes et eq d'eutes russes in ont p'tête tué granmint puss, ej supporte mie.

Ete fièr ed moutrer un onme conme un leu qu'os avons hapé, adon qu'ech vrai coupabe est eute pèrte, j'o granmint ed mau.

Ej vos l'dis chin honte : ej vos prier pour ech sibérin. Et s'famille. 

 

Fuchez rasseurés, j'oblie mie ed prier pour ches ukrainins.

 

Boinne jornée.

Béto din ches montaingnes

Slon ches dépèrtémints ed Frinche, ches cinsiers ont kminché, o bin vont béto kmincher à sortir leus vakes ed ches étabes et les met'te à l'cour, din un pré.

 

Din ches montaingnes, et coèr un keup, slon ches dépèrtemeints ed Frinche, ches cinsiers méneront leus vakes pour quèks moés.

Ches vakes, i feudro continuer à les traire.

 

A unne époke, eq j'o connue, ch'étoait conme chu ch'clitché d'aprè.

Et ch'étoait bieu.

Cafougnète et l'lunne

Un comarade ed Cafougnète o unne édvinète :

 - "Dis-mi, Cafougnète, tu connoais l'différinche inter él lunne et tin père ?"

- "Nan" qu'i dit Cafougnète, "ej voés mie !"

- "Eh  bin !" qu'i dit l'eute, "él lunne est un aste, et tin père, un désaste !"

 

- "Pourquoé jou eq tu m'dis ho, ti ?"

 

- "Pastche él lunne est oronde un keup pèr moés, et tin père, ch'est chake jour !"

 

I in éro qu'un cht'innée

.. ed verdi trèse, jour qui, pour d'autchuns, est un jour ed canche.

 

Ches verdi, i in o chincante deus, et des keups, chincante-troés pèr innéee.

 

Ches jours qui sont un trèse, i n'o douse. Conme ches moés.

 

Mais des verdi trèse, ch'est slon ches innées : un, deus, o, ed tans in tans, troés.

Tchestion : jou-qu'i put i avir unne innée chin verdi trèse ? 

 

Nan ! Qu'i sanne !

 

I péroait, in trachant chu internénet, eq pour i réponde à cho, i feut prinde ech nombe de smangnes pèr moés pi ches jours qui i o coèr pour foaire un moés intier, pi toute ajouter.

Cho baille cho :

  janvié : quat smangnes et troés jours

  févrié: quat smangnes, et des keups, ches innées bissètes, un jour

  marche : quat smangnes et troés jours

  avri : quat smangnes et deus jours

  moai : quat smangnes et troés jours

  join : quat smangnes et deus jours

  juillet : quat smangnes et troés jours

  moés d'eu : quat smangnes et troés jours

  sectimbe : quat smangnes et deus jours

  octobe : quat smangnes et troés jours 

  novimbe : quat smangnes et deus jours

  déchimbe : quat smangnes et troés jours.

 

Don, din unne innée, i o quarante-uit smangnes et vint-nu o trinte jours, slon.. 

 

I o unne gin qui dit, chu internénet :

-" Ej su d'accord avuc ch'cartchul, mais kmint cho preuve qu'i o au moinss un verdi trèse chake innée ?"

Et lò, pu rin ! Mie ed réponse o d'eutes esplications !

Et slon vos ! Busez, et boin verdi à tertous.

 

Ches différinches inter unne punme-ed-tère et un beudet

Ej croés qu'i o deus différinches

- l'première, ch'treu pour mette ch'beudet ndan est granmint puss grind eq pour unne punme-ed-tère.

- l'deusienme, ches beudets, cho pousse mie dsou tère.

Boinne jornée.

Chi os connoaissez d'eutes différinches, disez-lé mi.

Continuons à causer cartchuls

Ièr, ej vos os moutré qu'aprè avir ieu uit premières punmes-ed-tère din vo'gardin o vo'can, quat nouvèlés punmes-ed-tère qui sort'te ed tère, cho foaisez chincante pèr chint ed puss.

Et os avoème adon douse punmes-ed-tère.

Innui, pèrtons ed ches douse punmes-ed-tère qu'os avons. Un tiers o poussé après ches uit premières.

Os avez vu ?!

Din un sins, os disons chincante pèr chint, et din l'eute, un tiers. Toute in causant toudi ed ches quat punmes-ed-tère. Surpindant, nan !

Ej pux vos dire eq pour vinde o acater des coses, des keups, ch'est fin bin ed connoaite et maitriser ches cartchuls-lò.

Boinne jornée.

Un eximpe ed bieux cartchuls

Os l'savez : j'ainme ches cartchuls. Surtoute quand is sont bieux (ch'est possibe eq cho arrive).

 

L'eute jour, j'in o truvoé des bieux.

 

Ej vos conte, in prindant un eximpe aisié à comprinde.

 

Mettons qu'os mettez des punmes-ed-tère* in tère (chi os l'mettez dsu l'tère, cho iro mie).

 

Un jour, os in avez uit qui pousse'te et sort'te ed tère. Os êtes ureux.

 

Deus jours aprè, os in voéyez nu. Cho foait unne ed puss et don, douse o trèse pèr chint ed miu edpi ch'keup d'avant. Mais poin quatore pèr chint ed puss.

Chonc jours aprè, i foait du solé, et achteure, os comptez douse punmes-ed-tère. Cartchulez, et os verrez qu'os in avez troès ed puss ; cho foait puss trinte-troés pèr chint et quèks bérouètes. Mais lò étou, os pouvez poin dire eq cho foait puss trinte-quat pèr chint.

Achteure rbéyez bin et cartchulez !

Os avoai'te uit punmes-ed-tère pi, mettons, trèse pèrchint ed puss pi trinte-troés pèr chint ed puss. Eh bin ! Os pouvons mie dire qu'i o ieu quarante-sis ed puss vu qu'os avons, achteure, quat punmes-ed-tère in puss eq ches uits dech début, don, chincante pèr chint ed puss.

Ch'est bieu, aisié à comprinde et à esplitcher à ches galibiés, pour qu'is euche'te leu diplonme in join.

Boinne jornée, et grind merchi à ches cinsiers ed m'avir aidier.

*Soin ! Pour ches eximpes, os pouvez causer d'avangne, ed soèle o bétraves, mais mie ed vakes avuc leus vieus o d'kvaus dech boulonnoés : os pourrez mie les mette in tère.

Din un rfuge ed ches Pyrénées

Vu tous ches gins qui vont et vien'te in montaingne, i o un mérre, din ches Pyrénnées, qu'o prins et affiché un arté municipal chu chl'uis d'un rfuge, à mile-uit-chint mètes d'altitude.

 

Vlò ech texe lò-dsou:

 

"Chi tu t'proménes, t'es ichi ch'binvnu.

Chi t'es unne gin del montaingne, t'est conme à t'moaison.

Et chi t'es un cros nikdouille, écris tin tiot nom chu l'poute."

 

Et i o granmint ed gins qu'écri'te leu tiot nom !

Sont coèr puss nikdouille qu'os pourroème l'croère.

 

        Ach lac Saussat                                                                         

                                      

Merchi à Nadau, un canteu ed ches Pyrénées qui m'foait granmint rire et qui m'baille eds idées à vos conter.

 

Réponse àl édvinète

... dech vint-uit-dech moés d'avri.

 

Ech caminbert.

 

Bonne jornée, et boin accion.

 

 

Un cousin ed Nièles-ches-Ades

Din l'grinde et bèle achuchon d'èm famille qu'ej vos in o djò causé, i o achteure des gins casi nés pèrtoute din ch'monde.

Mais vu ches rataïons dechl'achuchon, Gustin et Zabète, leus éfants sont nés din ch'Pas-ed-Calais, à Hesdin-chl'abbé, Carly, Vimille...

Et is ont vétchu din ch'dépèrtemint. Tardinghen, Sin-Inglevert, Audinghen, Isques,...

Em mère avoait don des cousins la-bos. 

 

Ej mé ramintuve bin qu'ale m'causoait granmint ed ches trèse cousins et cousines ( i n'avoait douse ed prévus et i n'o arrivé un ed puss) ed Nièles-ches-Ades  dò qu'os étoème allé un keup quanq mes frères et mi étoème fin jonnes. Unne grinde cinse avuc des vakes et des cousins (deus ?) qui fouftoai'te unne tiote voéture.

 

Mardi, au vèpe, unne gin m'téléphone. Un cousin ! Ed Nièles-ches-Ades ! Mais, étoais mie ed ches trèse. L'étoait d'unne eute famille ed cousins ed Nièles-ches Ades.

J'o étè granmint surprins ! Ureusemint qu'i mo' téléphoné, chin quoé, j'éroais jonmoais su eq j'avoais d'eutes cousins din ch'village-lò.

Ech cousin ed Nièle, achteure, i reste à Livarot, in Neurmindie. P't'ête qu'il o l'réponse àm devinète ed judi !

Bec à ch'cousin ed Nièles-ches-Ades-qui-reste-in-Neurmindie, bec à tertous, et boinne jornée.

Edvinète

Pour vos otchuper innui et durant quèks eures o quèks jours, vlò unne tiote édvinète :

 

Puss ej viusis, puss ej sus fort. 

Qui-jou qu'ej sus ?

 

Busez !

 

Réponse din uit jours.

 

Em conmune

Qu'ej vos présinte él tiote conmune dò qu'ej vis.

Alintour ed mile-chonc-chint gins qui i rest'te,

P't'ête un noèr pèrmi eux !

P't'ête étou un fiu o tiot fiu ed maghrébin !

Autchun chinoés !

 

Des cinsiers,

Quèks boutikes,

Deus séruzyins,

Unne église mais poin ed tchuré,

Unne école pour ches jonnes galibiés,

Unne bibiotèke.

Des terrains ed fotbal, tennis, bastchète.

Quèks villes a puss ed trinte kilomètes,

Une grinde ville a puss ed chint kilomètes.

Mie ed Wèrtier nord !

Mie ed Nuf Troés !

Mie ed Zep o Zup !

Quèks jonnes, éfants o tiots-éfants ed pèrints o taïons qu'avoai'te djò leus taïons et rataïons nés in Frinche, qui font ches mawais et qui, ed tans in tans, berzille'te des coses din l'conmune

Mais din m'conmune, ches gins éroai'te voulu, diminche, avir unne fanme présidinte. Miu ed chincante-chonc pèr chint éroai'te voulu !

Et cho foait djò quèks innées qu'is ainme'te l'fanme-lò.

Des fanminisses ?

Nan ! Seuremint poin !

Des nikdouilles ?

Des niacoés ?

A vos ed vir.

Ech touillamini dech votage ed diminche

Ièr, os pouvoème voter pour coésir inter deus gins qui qu'i sro achteure not présidint pour chonc innées.

Pour voter, deus candidats, mais granmint ed possibilité :

Manu-ech-picard, Marine-Ech-Pen, blanc, nul, o coèr, n'poin voter.

Voter blanc o nul, ch'est conme n'poin voter. Feut l'savoèr.

 

Mais i avoait coèr deus coses possibes :

- voter pour unne gin qui os o dmindé ed voter Manu-ech-picard, Marine-Ech-Pen, blanc o nul et qu'o foait ches papiers pour cho, in allant vir ches cadoreus avant.

O bin

- voter pour unne gin qu'éroait ainmé voter mais qu'o oblié d'aller vir ches cadoreus et qu'est fin loin. Pèr eximpe, in Chine.

Pour cho, i feut avir granmint ed fin boins conmorades, et qu'i in o un qui vouloait voter blanc o nul et qu'accepte ed canger chin vote pour coésir Manu-ech-picard o Marine-Ech-Pen. Seuremint un fin boin conmarade.

 

Boinne jornée.

 

Feut ête puss qu'à mitan nikdouille

 ... pour avincher unne sonme ed chonc millons d'uros in s'disant qu'os sro rimborsé.

Qu'i m'sanne !

Dech keup-lò, ej sus rasseuré ed vir qu'el gin sro mie présidinte del Frinche.

A béto !

Min tchyin nettie m'moaison

Causons vrai. Nan ! Min tchyin nettie mi m'moaison. Mais i m'aide granmint.

Ej vos esplique aprè pour qu'os comprindèche, poin pour qu'os ayèche o acatèche un tchyin.

 

Min tchyin, il o des poèilles, qui tchai'te, et des pattes, qui mèrque'te des traces. 

Adon quand ej nettie m'moaison, jé kminche pèr aspirer toutes ches poèilles, et ches eutes coses. Quanq i o coèr des poèilles, cho vut dire eq j'o mie défini d'aspirer.

Aprè, jé rlocte, avuc unne wassingue, in suivant ches traces qu'i o coèr chu ch'sol.

Os avez vu min gingin !

Em moaison, ale est prope durant inviron unne o deus eures après qu'ej l'euche nettiée. Mais ej sus ureus quand ale l'est. Adon j'aspire et rlocte granmint. 

Et j'o un tchyin.

 

Boinne jornée.

Mes deus pensées dech diminche-lò

Chake jour, os avons granmint à penser, mais i o, chake jour, des coses puss importantes eq d'eutes.

Eximpe, innui ! 

Ej pense surtoute à deus familles, minme chi ej les connoais mie :

- in premier, l'famille del fille ed vint-chonc ins qu'est morte ièr, d'unne balle pour singlier qu'ale o prins din s'panche, adon qu'ale promnoait.

- in deuze, l'famille del fille ed dis-sèt ins, et l'fanmeuse fille ed dis-sèt ins qu'o tué l'eute, in allant à l'cache. Elle pensoait vir un singlier et l'tuer, obin ale o vu un singlier et ale o foéré. Mais ch'keup o pèrti. 

Tuer unne gin, ch'est terribe, mais quanq os tuons à dis-sèt ins, chin l'vouloèr, cho doét coèr ête puss terribe. Seuremint qu'èl jonne fanme i pensero toute és vie.

Adon, innui diminche, prions pour ches deus jonnes filles et leu famille.

Merchi.

D'un canteu neurmind

J'ainme bin l'Neurmindie, mie granmint ch'canteu qu'ej lonmeroai mie mais eq j'acoute un tiot molet..

 

L'eute jour, ej l'o intindu din ch'poste, et j'o bin ainmé cho :

- "... un jour os allons moérir, ches eutes, os allons vive..."

 

Et il o raison ! Des gins pense'te àl mort et oblie'te eq ches eutes jours, is vi'te. Ch'est donmage ed poin i penser à ches jours qui sont granmind puss nombreus !

 

Merchi, ch'neurmind.

 

Boinne jornée, et cros becs à mes cousins et cousines ed Neurmindie.

 

Un grind nikdouille court à Anmyin

Foaire du sport, ch'est boin pour vo'santé. Surtoute chi os restez in ville, conme pèr eximpe, à Anmyin.

 

Don, din l'bèle ville del Sonme, i o des gins qui font du sport. Des keups, ch'est ch'fotbal, des keups, i in o qui cour'te.

 

Is cour'te din ch'Parc del Hotoée, mais i n'o étou qui font cho din ches rues del ville, lò dò qu'i o d'eutes gins in jornée.

 

I o quèks jours, unne cousine, qu'ej vos lonmer Didith pour mucher chin vrai tiot nom, et unne tante qu'ej vos mie lonmer, pèr respect pour ale, promnoète din Anmyin, côte à côte, quanq d'un keup d'un seu, un grind nikdouille qui court passe inter ches deus fanmes. Et les boustchule'te.

Ej sais mie kmint qu'ém cousine o réagi, mais ém tante o tcheu. Et o berzillé s'main droéte.

Pauve fanme ! Ale ainmoait granmint mercher din Anmyin, minme in ayant alintour ed quater-vint ins, mais edpi ch'jour-lò, ale o l'freusse ed sortir pour aller acater chin pain o s'vianne.

In puss, ale put mie, achteure, rester toute seule às'moaison, vu qu'ale put mie foaire toute seule ches coses del vie conme tchuisiner, pèr eximpe.

Quanq à ch'nikdouille, i court coèr. O poin arté pour s'estchuser o vir kmint qu'alloai'te ches deus fanmes. L'o continué ed courir.

Vos qui lisez min blog, chi os restez à Anmyin et qu'os voéyez unne gin qui court, prudinche ! Chi i rbée mie dvant li, prindez un beu ed bo pour l'arter.

Boinne jornée, et boin rétablissemint àm tante..

Ech kvau et ch'coéchon

I avoait un keup, un cinsier qu'avoait un kvau. Un jour, ch'bétail o ieu granmint ed mau. Conme os disons, ech kvau s'in alloait à teupes. P't'ête qu'il alloait moérir.

Ech cinsier appèle chin vétérinaire pour qu'i vienche soégner et chi possibe seuver ch'bétail.

Ech vétérinaire vient, foait unne pitchure à ch'kvau et dit aprè àch'cinsier :

- "J'i o baillé un rmède ed kvau ! Chi din troés jours, vo'bidet est mie dbout, feudro i foaire unne pitchure, mais ch'keup-chi, pour l'déblaiyer."

 

Et ch'vétérinaire s'in vo.

 

Un coéchon qu'étoait lò et qu'avoait toute intindu dit àch kvau qu'i connoait bin, edpi qu'is vi'te insanne din l'cinse :

- "Feut eq tu t'déjoques chin quoé, is vont t'tuer !"

Mais ch'kau n'bouge poin.

Ech lindman, ech bidet est toudi coutché. Ech porcheu i dminde coèr de s'déjoutcher pour n'mie ête tué din deus jours.

Mais rin n'cange. Pauve kvau ! Pauve coéchon qu'est trisse !

Deusienme jour, minme cose, ch'kvau est allongé.

 

Et arrive ch'troésienme jour.

Ech bétail n'o poin lver, adon ch'coéchon i cause coèr un keup :

- "Acoute-mi bin ! Ech vétérinaire et ch'cinsier vont arriver. Feut eq tu t'déjoques chi tu vux mie ête tué !"

Et lò, minme chi ch'est fin malaisié pour li, et conme un miraque, ch'kvau s'met dbout.

Ach momint-lò, ech cinsier et ch'vétérinaire arrive'te. Quanq i voét chin bidet, ech cinsier est fin ureus et crie :

- "Hourra ! Min bétail est dbout ! Foaisons unne crosse fête ! Et pour cho, feut tuer ch'coéchon."

 

 

Merchi à min conmarade Dji ed m'avir conté cho mardi quanq os buvoème un ju, et unne crosse pensée à min cousin dech nord qu'ainme granmint ches bidets.

Ech gazoél a un uro et chincante chintimes

Aprè avir proposé ed mette ech gazoél à deus uros, pour rinde aisié ches cartchuls, unne gin m'o répondu qu'in l'mettant à un uro et chincante chintimes, ej sro élu présidint del Frinche.

A buser. P't'ête bin !

Et à suive. 

A béto !

Mettons ech gazoél à deus uros

Edpi sinmdi, j'o busé. Cho arrive.

Ech problinme pour granmint ed  gins, ch'est ches cartchuls. 

Quarante-sèt lites et douze chintilites à un uro et chonc-chint-soéçante trèse dizienmes ed chintimes, combin jou es cho foait ?

Pi ech gazoél rintchérit ! Pi tu mets à chake keup toudi quarante-sèt lites et douze chintilites !

Adon, j'o busé et truvoé quèk cose ed bin conmode : mette ech gazoél - et l'essinche - à deus uros. Toudi à deus uros.

Pour tertout, 'ho sro aisié ed cartchuler ch'total à poaiyer, et jonmoais i éro ed méchantes surprinzes.

Ed boinnés idées, j'in o toudi, et granmint. P't'ête qu'ej devroais foaire présidint !

Quanq ech gazoél rintchérit

... conme achteure, ed dis chintimes pèr lite et pèr smangne, mi, j'o unne astuche : ej cartchule in lites.

Eximpe : pour aller vir, avuc m'fanme, ém mère o bin m'bèle-mère, i nos feut alintour ed quarante-chonc lites pour aller, et l'minme cose pour rintrer à no'moaison.

Ches qurante-chonc lites pèr voéyage, cho o mie cangé edpi qu'os avons acaté unne nouvèle voéture, i o deus ins.

Asteus, nan !

Bonne jornée à tertous.

J'o foait dmi-tour

Bojour à tertout.

Os pouvez dire qu'edpi ech premier janvié, j'o mie granmint écrit. Et os avez raison.

Jou qu'ej su ercrand ou arland ?

P't'ête ches deus !

Arland, ej l'o toudi étè: ch'est pour cho que quanq j'ouve, j'ainme bin foaire, pour n'mie avir à rkmincher.

Ercrand ? Justch'à ièr, j'in savoais rin. Mais ièr au vèpe, ej vo promner et, un molet puss qu'au mitan del tiote promnade, j'm'o sinti ercrand. Brin ! Ej n'avaois pu invie ed foaire l'eute mitan del boucle. Adon, j'o prins min corage et o foait dmi-tour pour rintrer à m'moaison.

A béto !

Ches nouvèlés voétures

Edpi quèks innées achteure, ches nouvèlés voétures ont quasi toutes un ordinature ndan.

Ech bétail qu'est din ch'moteur, i sait toute : ches lites ed gasole qu'os consommez, ches kilomètes foaits, combin ed kilomètes pour lò dò qu'os voulez allez, combin ed tans qu'i feudro, ... , i n'o un qu'o poin mie és chinture, ... , i o un pneu qu'o dégonflé, et coèr granmint d'eute coses. Des coses qu'un onme o unne fanme n'put cartchuler aisiémint.

Mais quanq minme !

 

L'eute merkerdi, in rintrant àm'moaison, j'o constaté, coèr un keup, que puss os avinchoème, puss echl'eure quanq os alloème arriver rtchuloait. 

Mettons qu'in premier, os avoème uit-chint kilomètes à foaire et qu'in principe, os devoète i ête alintour ed dis-sèt eures à no'moaison. 

 

Moinss ed eures après, minme chin s'ête arté et chin avir foait ed berlure, i avoait coèr sis-chint-vint-deus kilomètes à pèrcourir, et os devoète arriver alintour ed dis-sèt eures onze.

Os artons tchinze minutes, roulons à nouvieu deus eures et dis-nu minutes, et lò, chl'ordinature nos indique qu'os arriverons alintour ed dis-sèt trinte-troés, et nan dis-sèt eures vint-sis conme il éroait du (dis-sèt eure onze puss ches tchinze minutes qu'os avons arté).

Pour définir, avuc unne nouvèle pause ed vint-deus minutes, os avons arrivé à dis-uit eures et sis minutes.

Conclusion : él voéture o un ordinature mais sait mie qu'i feut s'arter ed tans in tans et pense eq tu vos toudi à ches vitesses prévues. Crosse berlure !

 

Ej mé ranmintuve ch'conte dech beudet lonmé Ertchul. Chin moaite disoait toudi :

- "Avinche, Ertchul !"

Boinne jornée, et boinne innée.

A béto !