Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libe d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

samedi 31 décembre 2016

Et coèr unne sgonde

Tertout o vu in févrié qu'echl'innée deus-mile-sèse étoait bissète. Don, avuc un jour ed puss.

Eh bin , i o des gins qui truvoe'te eq ch'est mie assez !  Dech keup-lò, is ont mis unne sgonde ed puss innui, inter vint-troés eures chincante-nu et vint-quat eures d'innui.

Ureusemint qu'acht'eure lò, os ouvrons mie.

Mais pour l'boinne innée, feudro attinde. Unne sgonde ed puss.

vendredi 30 décembre 2016

Ches jornaleus picards

I in o ieu, i in o et i in éro toudi, des jornaleus picards.

Pèr eximpe, pour l'gasète eq tertout connaoit, ech Courrier Picard. I o granmint ed jornaleus picards, ch'est seur.

Un cousin d'em fanme i o ouvré i o casi trinte ins. Vu qu'il étoait mie picard, i causoait picard conme unne vake espanole. Adon il est pèrti ach Poaiyis baske.

Din ch'tiot écran, os avons Jean Pierre Pernaut, chu la unne edpi miu ed vint ins, à trèse eures. I nos cause bin ed ches bèlés régions ed Frinche.

Etpi, i o Hinri Sannier qui vit à Ieucourt-chu-Sonme, et qui , li, est chu el troés, à vint eures. I cause sport. J'ainme bin rbéïer ho.

A l'radio, i péroait eq Maxence, ech jonne qu'est chu Radio Luxembourg, n'sroait mie picard. Mais il o unne boinne tète et put foaire un bec à m'jonne cousine.

Définissez bin l'innée.


jeudi 29 décembre 2016

Chin cloke

Avuc des clokes, os connoaissons ches églises, ches orloges et ches vakes in montaingne.

Causons mie ed ches églises et ed ches orloges, mais ed ches vakes.

Fidjurez-vos qu'i o un onme à qui ches clokes ed vakes berzillées ches éreilles.

Adon, echt onme o acaté eds assistants ed navigation personnel, lonmés in frinchoés "GPS", à ches vakes. Pour rimplacher ches clokes.

Ch'est les vakes ed chin voésin, mais i supportoait pu ches clokes. Don, il o poaiyé.

Achteure, i feut qu'ech cinsié apprinche à utiliser ches assistants pour ertruvoer ches vakes. H'est mie unne evidinche.

Surtoute pèr tans ed brouillar, et in montaingne.

Mi, ej sro trisse d'aller in montaingne et ed pu intinde ed clokes ed vakes sonner.

mercredi 28 décembre 2016

Quarante-chonc ins

... à prinde ech train inter Hin et Anmyin, pour aller ouvrer.

Ch'est quoé qu'o foait unne fanme qui reste alintour de Hin, et qu'o conté s'vie à ches gins ed ches trains

Et à ches jornaleus.

- "Troés eures ed train pèr jour. Jonmoais moinss, granmint ed keups puss." qu'ale o dit.

- Un jour ech contrôleu o sifflé ech dépèrt dech train, mais l'locomotive étoait mie accrochée à ches wagons !" qu'ale dit étou in riant.

Ches gins del société ed ches trains i ont offert des fleurs. Et un billet ed train pour ale et chin onme. Merchi à eux. Mais avuc tous ches rtèrds, is pu'te.

Mi, feudroait coèr attinde trinte-nu ins !

Qu'em fanme fuche ureuse : j'éro arté d'ouvrer avant. Tant pis pour ches fleurs et ches deus billets.

mardi 27 décembre 2016

Merchi Jules

Foaire ech tour dech monde in quater-vint jours, Jules Verne, eq tous ches picards connoai'te vu qu'il est mort in mile-nu-chint-chonc à Anmyin, l'avoait maginé et reuvé.

Achteure, in avion, h'est granmint aisié.

Mais in batieu ?

Edpi quèkes innées, i falloait un molet moinss ed soéçante jours.

Achteure, pour un onme, o unne fanme tou seu chu un batieu, l'est possibe ed mette moinss ed chincante jours.

In vrai, ej pense qu'echt onme qu'o foait ho vouloait vir ech Père Noë à s'moaison. Adon, il o rintré ech vint-chonc déchimbe.

A Noë, p't'ête qu'il o ieu unne maquette d'avion ? O ed batieu !

Merchi à Jules Verne, ech picard, d'avir lancier echl'invie i o miu ed chint ins.

lundi 26 décembre 2016

S'tribouler pour seuver unne vie

Un jonne pompier, quanq i put et qu'il intind chin bip sonner, s'dépêche d'aller à s'caserne.

Vu qu'il o mie chin permis, i conduit mie ed voéture. Pèr prudinche !

Mais i o casi toudi unne gin pour l'inmner fin rade.

Casi !

L'eute jour, in ivèr don, il étoait tout seu à s'moaison à attinde, quanq chin bip o bipé.

Adon, il o pèrti avuc es bicyclète. Fin rade, mais à bicyclète, et quanq il o arrivé, troés kilomètes après, il o croésé ches conmorades qui pèrtoai'te seuver unne vie. P't'ête ?!

Pauve jonne !

Ureusemint qu'il o invie ed foaire quoé qu'i foait, qu'il ainme quoé qu'i foait. Et qu'il est granmint corageux !

samedi 24 décembre 2016

Echt onme rouve

Echt onme in rouve, edpi quèkes smangnes, tertout in cause.

Achteure, ej voudroais, mi, vos causer ed quoé eq j'o lu din un fin boin live, chu l'onme rouve. Un eute onme rouve que ch'Père Noë. Soin à vos, i o des keuses qui sont mie pour ches tiots éfants.

Os nos sonmes mis à croère in Diu, vu qu'os avoème pu rin d'eute in quoé croère.

Un onme chin utopie est bin puss terribe qu'un onme chin nez.

Mes pèrints sont morts ; Em mère, edpi sèt ins, et min père, edpi uit ins. Mais ej me sers coèr ed ches réserves d'alunmètes d'em mère, et j'o coèr del semoule qu'ale avoait acatée. Et du sé.

Os disoème mie acater, mais s'protchurer.

Deus gins cause'te :
- "Ech dirigint étoait bin, mais il o vétchu granmint ed tans." dit un onme.
- "Ouais" dit un eute qu'est viu, "mais mi, j'o vétchu puss qu'ech méchant.

I m'lonmoait Manounette. Ho est un coin d'ziu pour ems éfants et m'fanme.

Quanq eq not dirigint nos causoait, i mintoait. Et tertout savoait qu'i mintoait. Et li savoait qu'os savoème qu'i nos mintoait. Mais i continuoait ed causer, et os continuème ed l'acouter.

I o eq l'anmour qui seuve.

Ches gins ont rtornés un tabouré, planté un cleu ndan, foait asseoèr echt onme dsu pi l'ont foait torné. Il o tout avoué :
- "Ej su un espion."
- "Pour qui ?"
- "Jou qu'os voulez qu'ej diche allemand o polonoés ?"
- "Polonoés."
- "J'o espionné pour ches polonoés."

Achl'ernouvieu, quanq ches nèges fonde'te et qu'i pleut, ches os ermont'te inter ches punmes ed tère.


J'arte lò ches estraits dech live. Granmint malaisié à croère, mais vrai.

Unne tiote daraine :

Quanq j'o dmindé à em mère ed quoé qu'étoait mort chin père, ale s'o évanouïe.

Ches gins ont ieu granmint ed mau. Quoé qu'est granmint puss malaisié à croère, ch'est eq ches gins ainmoai'te toudi leu poaiyis. Chti d'avant mile-nu-chint-quater-vint-dis.

Unne vraie daraine :

Ches gins faibes, in ivèr, au vèpe, is rintroai'te mie : os leu méttoème del'ieu edsu eux et is restoai'te à l'cour, conme des statues.

Falloait qu'ej vos l'conte.

Boin Noë à tertous. Et n'tirez mie chu cht'onme rouve qui vo passer din vo kminée.

vendredi 23 décembre 2016

Rin

Innui, ej vos mets mie d'article.

D'unne, vu eq min père éroait du avoèr soéçante-dis-nu ins innui, quater-vint din un in, et qu'i els éro mie.

Ed deus, vu qu'i o sis ins, quanq j'o allé foaire Noë pour ech darain keup avuc mes frères, mes bèlés-soeurs, em mère et min père, os avons manqué ed janmoais arriver, vu ches nèges alintour ed Saint-Kintin.


Et ed troés, pour définir, ej roule.

Don, mie d'article innui.

Boinnés fètes à tertous.

jeudi 22 décembre 2016

Il o tcheu des nèges

Ch'est ed saison, qu'os m'direz.

Os sonmes in ivèr edpi ech vint-et-un déchimbe.

Ouais ! mais il o tcheu des nèges in Afrike, din ech Sahara.

N'mie confonde Sahara avuc Sahra, unne fanme qu'est din ch'lit d'un onme et qu'o pu vint ins edpi granmint ed tans. Ej vos in rcausero un eute keup.

Des nèges chu ech Sahara !

Os foaisez trinte-sèt ins eq ches gins qui rest'te lò, is sont mie granmint, n'avoai'te mie vu ho.

Din not région, os attindons.

Boin Noé à tertout.

mercredi 21 décembre 2016

Vive chin ieu

..., ch'est possibe.

L'preuve !

I o achteure un village in Bourgone, lonmé Etoais-L'Seuvin, qui n'o pu d'ieu. A keuse ed ches pesticides qu'i i éroait ndan.

Mais ches gins vive'te.

Kmint ?

In buvant des boins jus ed raisin ed ches alintours : Pouilly, Chablis, Sincerre et eutes.

Feut s'qui feut, quanq os voulons mie moérir ed soé.

 Une cose est seur : quanq os buvons dech vin, os nos disons eq ch'est mawais pour not santé. Don, os l'savons. Mais quanq os buvons del'ieu, granmint ed keups, os nos disons mie qu'ho put ête dingereus.

Echl'article lò vo mie foaire plaisi à tertout, mais ej su libe.


lundi 19 décembre 2016

Ej su un berlinoés

J'avoais mie un in quanq Jean Filtzegald Kennedy o dit ho pour ête bin vu pèr ches berlinoés,

Ej su né picard et fièr ed l'ête,

Mais achteure, ej vux dire à ches berlinoés qu'ej pense à eux.

Ej su un berlinoés. Din min tcheur.

A ches cros nikdouilles et mawais qui vu'te nos mette l'freusse, ej leu dis qu'os continuerons ed feter Noë, ed vive et ed rire.

Prions.

A moinss trente-et-un degrés

... in dsou ed zéro, quoé qu'i s'passe quanq t'es à l'cour ?

Mettons qu'os fuchons au vèpe. Ech tan est gris.

Prindons unne jonne fille.

In premier, din esn appèrtemint, ale o des cavieus et des sorzius noèrts, conme edpi qu'ale est née.

Ale vo à l'cour ; Moinss trinte-et-un degrés !

Quèkes minutes aprè, ches cavieus et ches sorzius sont blancs. I péroait eq ch'est fin bieu à vir. Feudroait prinde unne photo, mais à ches timpératures lò, mie évidint.

Ech noèrt erviendro quanq l'fille rintrero din esn appèrtemint.

Amon mi, i foait achteure alintour ed tchinze degrés. Mais j'o quanq minme des cavieus blancs. Pour deus coses : ems ages, et unne eute cose qu'ej pux mie écrire.

Mais des sorzius blancs, ej croés mie n'n'avoèr.

dimanche 18 décembre 2016

Et pour l'moaison d'em mère

..., quoé qu'i vo foaire, ech présidint ?

Em pauve mère, i o un in, o ieu un fu din ch'moaison. Ej vos in avoais seuremint causer din un article.

Ale o mie erchu d'argint , o mie granmint, pour ho.

Adon qu'el moaison ed William Sairin qu'ej vos in causer verdi vo erchuvoèr soèçante-dis millon d'euros pour ête seuvée. Pèr ech présidint.

Déchidémint !

samedi 17 décembre 2016

O-jou eq ch'est

... Metz ?

In Lorraine.

Eq tertout répond. O casi tertout.

Eh bin nan ! Metz o manqué d'ête Taïwoéné.

In vrai, ch'est ech tournoé ed tennis ed Metz qu'o manqué d'ête vindu à Taïwoén.

Maginez !

Chu unne affiche :
"Béto, à Taïwoén tournoé ed tennis ed Metz".

J'o du mau à comprinde eq cho puche fonctionné. Ches taïwoénés s'dmindraoi'te quoé eq ch'est qu'ho !

"O manqué", eq j'o écrit. Ech tournoé ed tennis ed Metz, à ches darainés nouvèles, vo rester à Metz. In lorraine.

Ureusemint !

vendredi 16 décembre 2016

Quoé qu'os frons ed li

Ah, ches pauves pèrints !

Is ont ieu un fiu qu'is ont lonmé William.

Djò, quoé qui  leu o prins ed li bailler un tiot nom inglés ? Mais ch'est mie leu problinme.

O bin, in vrai, ch'est leu problinme mais ch'est mie d'ho qu'ej voulaois causer.

Leu William, il ouvre janmoais. A kmincher pèr l'école.

Et ch'est ho qu'o intchiété ches pèrints. William o grindi, et eux disoai'te à leus famille o amis :
- "William, i sait rin."

Adon ?!

Kmint qu'ho s'foait qu'achteure i o unne interprinze qui s'lonme William Sairin, dech nom dech galibié qui savoait rin ?

Qu'i pèroait qu'i savoait rin. Mais vu qu'il o ieu unne interprinze à chin nom, ej mé dminde quanq minme.

Pour définir echl'article, i sanne quanq minme qui savoait rin, o p't'ête mie grind cose, vu qu'echl'interprinze vo frunmer.

Malureusemint.


jeudi 15 décembre 2016

I o vint-uit ins

I o vint-uit ins, ech vint-uit octobe étoait un verdi. Conmme echt'innée. Et don, ech vint-nu octobe étoait un sinmdi. Conmme echt'innée.

Mais étou, ech premier févrié étoait un lindi, conme echt'innée, et l'innée étoait étou bissète.

Os pouvons don conclure qu'os avons echt'innée, et chti d'aprè, ches minmes calindriers qu'i vint-uit ins.

Mais ches gins qu'étoai'te mie nés i o vint uit ins n'ont mie m'canche ed vive deus keups ech minme calindrier. Ho viendro ! Un jour.

Ej truvoais ho régalant ed vos in causer. Ch'est foait.

Soin à vos : chi os avez foait unne berlure i o vint uit ins, z'êtes mie obligé de la rfoaire.

Feut étou qu'ech vos diche eq vos pouvez racater des calindriers. Vu eq ches innées cange'te.

Becs à tertous.

mercredi 14 décembre 2016

Canger tin gaingnage

Magine !

T'ouvres, et don, tu gaingnes edl'argint. In principe.

Et tin patron, des keups, i t'rintchérit, vu eq t'ouvres bin, o vu qu'ho foait eds innées eq t'ouvres pour li.

I t'rintchérit, mais un tiot molet.

A moinss d'ouvrer p't'ête din unne fin crosse interprinze ò des keups i o unne o deus gins qu'ont un vrai rintchèr.

In vrai quoé qu'est une vraie surprinze, ch'est quanq eq t'es rintchéri ed chint pèr chint din keup.

Et ho existe.

Ej vos conte.

J'o unne fille qu'o ieu chte fin boinne surprinze. Ale avoait chint-trinte euros pèr moés. Achteure, ale in éro deus-chint soéçante.

Pourquoé ?
- Un, ale ouvre mie in Frinche. Tu l'avoais comprins quanq ej t'os écrit chi gaingnage.
- Deus, ches gins sont ureus ed quoé qu'ale foait.
- Et troés, ej diro qu'ale gaingnoait mie granmint.

Mais ale étaoit quanq minme ureuse avuc chint-trinte euros pèr moés.

Corage à tous ches ouvreus.
Boinne fète à ches fanmes qui s'lonme'te Odile.

mardi 13 décembre 2016

Ches vakes pét'te

Conme ches gins.

Mais ches vakes sont bin puss crosses eq ches gins. Et quanq is pét'te, i o granmint ed gass qui pèrt.

Et ho froait fonde ches glaces à ches pôles.

Adon, deus possibilités :
- interdire à ches vakes ed péter,
- nn' pu avoèr ed vakes chu tère.

?

O bin coèr, bin s'otchuper ed ches eutes coses qui font des gass.

lundi 12 décembre 2016

Arter l'djerre in Syrie

Ièr diminche, troés onmes politikes frinchoés ont pèrti in Syrie pour foaire arter l'djerre qu'i o malureusemint lò-bos edpi chonc ins.

Ches troés onmes sont in vrai unne fanme et deus onmes.

Quoé qu'est bzarre mais bieu, ch'est qu'is rprésinte'te troés pèrtis politikes ed Frinche. Conme quoé, quanq os voulons, os pouvons.

Chi tout vo bin, is sront in Syrie innui. Feut djò qu'is fuche'te autorisés à intrer in Syrie edpi l'Turtchie ! Mie gaingné.

Aprè, quoé penser ed leu voéyage et ed ches objectifs ?

Un, ches troés politiciens n'sront mie présidint del Frinche din chonc o sis moés : is sont mie candidat o ont perdu à ches primaires din leu pèrti. Ho kminche bin !

Deus, is sont troés chu tère, et din ches tans, i o malureusemint granmint d'avions qui laice'te tchair ches bombes, pèr eximpe, chu l'ville d'Alep. Soin à eux !

Troés, is éroai'te p't'ête pu inmner not Présidint d'achteure, pour qu'i els aide, et vu qu'il o achteure eq cho à foaire.

Ej leu dis quanq minme boinne canche.

Pour définir, chi is arrive'te mie in Syrie, is ont p't'ête ed quoé foaire in Turtchie ?

dimanche 11 décembre 2016

Tiot ju o bistouille

Din not bèle région, os buvons granmint ed tiots jus.

Mais pour ches gins qui connoai'te mie not région, ej doés leu dire qu'il existe étou l'bistouille.

Quanq j'étoais fin tiot, not voésine invitoait souvint m'mère à boère unne bistouille.

Qué différinche inter un tiot ju et unne bistouille ?

Din unne bistouille, i o ech tiot ju, et un molet d'ieu. Del'ieu ed vie. P't'ête pour éviter, in ivèr, d'injler quanq os allons à l'cour.

Etpi, vu qu'os pouvons ed moins in moinss ed boère ed l'ieu ed vie toute seule, à pèrt à no moaison, feut la boère avuc eute cose.

Et ho, ches picards i ont pensé edpi granmint d'innées.


Chi t'es mie présidint et eq t'os ets ages innui, fin cros becs à ti. Minme chi t'es à sèt-mile kilomètes.

samedi 10 décembre 2016

Judi uit déchimbe

A l'eure ò ches galibiés tchit'te leu école,
A l'eure ò ches lyonnais dvroai'te prier Mèrie pour el rmerchier d'avoèr seuvé leu ville i o quèkes smangnes o sièkes,
A l'eure ò des keups ej su din ch'train,

J'o vu et intindu unne fanme indjeler chin onme :

- "Arte ed foaire ho, ho foait du mau. "

- "Ch'étoait pour rire."

- "Ho foait mie rire ! I o mie unne gin qu'ainme eq tu foaiches ho !"

Ale étaoit in prousse, et li sannoait granmint déchu.

I o des gins conme ho.

vendredi 9 décembre 2016

Vos mans in heut

Eq j'o dit à m'bèle-mère merkerdi.

Conme des keups os voéyons din ches films avec ches wardeus ed vakes et ches indiens d'Anmérike. O bin conme di'te ches agripeus din unne banke. Din ches films o in vrai.

Adon, m'bèle-mère o lvé ches bros et ches mans.

Un mète quater-vint-dis sèt de heut, qu'ale foait quanq ale est conme ho.

Dech keup-lò, j'o rintré du bo justch'à un mète quater-vint, pour qu'ale puche l'prinde et l'mette din chin fu.

Unne boinne cose ed foaite.

Feut qu'ej vos rasseure : m'bèle-mère, qu'o mie ieu l'freusse et qu'est mie unne nikdouille, n'o mie attindu eq j'o défini ed rintrer ech bo pour baicier ches bros. Et ches mans..

Boin ivèr à tertous.

jeudi 8 décembre 2016

Des rincontes

Il le vouloait, i l'o foait. Casi.

- "Quoé ?" qu'os vos disez.

- "Aller ed Frinche in Inde à piés." qu'ej pux vos écrire.

Eh ouais ! Casi.

L'est pèrti ed no moaison début septimbe. A piés, in utilisant chin pouce. Pèrti in Inde, in kminchint pèr l'Bergike, pi l'Allemane, l'Tchékie, l'Autriche, l'Roumanie, l'Bulgarie, l'Grèce et l'Turtchie. Pi l'o arrivé in Inde.

A pèrtir ed novimbe. L'o prins chin tans.

Quoé qu'i vouloait, ch'étoait rinconter des gins, et chi possibe, dormir amon eux. Et i n'o rinconté des gins. Et des keups, il o dormi amon eux.

Qu'ej fuche honnete, des keups étou, ches nuits, il o ieu froéd. Dsou unne tinte, in octobe.

Mais il est ureus, et i ch'o foait des conmarades.

Chin problinme : falloait causer in inglés, et mie in picard. Mais il o apprins l'inglés à l'école.

Message pour ches jonnes : apprindez bin l'inglés, et chi os pouvez, allez in Inglétère quèkes smangnes o moés pour miu apprinde. Pèr eximpe, in ouvrant in étè.

- "Inter l'Inde et l'Turtchie, i o d'eutes poaiyis !" qu'os vos disez. "Kmint qu'il o foait ?"

- "Casi" eq j'o écrit pour kmincher. "L'o étè obligé ed prinde un avion inter ches deus poaiyis. O i passoait pèr l'Russie, mie aisié, o i passoait pèr l'Syrie, l'Iran... Interdit."

Achteure, i o rintré. Pi vo rtorner asn école. Pour ouvrer sis moés.

Unne césure. Ch'est conme que s'lonme l'période ò ches jonnes, alintour ed vint ins, art'te quèks moés d'aller à l'école. pour mner un projet qu'is invint'te eux-minme.

Os ainmons o os ainmons mie, mais i n'o ed puss in puss, des césures.

Ech jonne, qu'est min fiu, o foait unne boinne césure. Ej su fièr ed li.

Achteure, feudro rvive conme un frinchoés. J'o fiat in li.

mercredi 7 décembre 2016

Interprinze picarde

Eds interprinzes picardes, ch'est seur, i n'o in Picardie.

Mais i n'o étou in Frinche.

P't'ête qu'ej devroais mie in causer, vu qu'ale vo mie bin achteure, mais alintour ed Toulouse, i o Latécoère.

Latécoère, pour ches gins qui connoai'te ech picard, o kminche'te à l'connoaite, ho vient ed "Lò 'tes coèr..."

Magine !

In Picardie, ches gins ainme'te rire granmint. Seuremint puss eq din d'eutes régions, qu'ej croés. Et don, ed tans in tans, quanq des gins cause'te, is di'te :
- "Lò t'es coèr in route à m'foaire unne cacouille".

O bin, d'eute keups :
- "Lò t'es coèr in route à gaingner edl'argint".

Et ch'est pour ho qu'un jour, un picard a baillé s'nom lò à unne interprinze. Surtoute qu'il étoait loin del Picardie.

Qu'ej pense.
 
Et ti ?

mardi 6 décembre 2016

Pour des sièkes et des sièkes

Ièr, j'étoais in voéture quanq not premier minisse, chti qu'ièr au matin étoait not premier minisse, annonçoait à tertout qu'i vouloait dvenir présidint.

I causoait bin. Qu'ej fuche honnête.

- "Ej vux..., ej vux.... .Et ej vux..., ej vux..."

J'o mie cartchulé combin ed keups il o dit ho.

Et ch'est mie quoé qu'ej retiens de s'causerie.

Mi, ej croéyoais ête din unne église, à l'messe, quanq ech tchuré cause à ches gins qui sont lò. I avoait un silinche, à pèrt ech nouvieu candidat à ches elections qui causoait.

Et quanq i causoait, ess voéx montoait , pi rdéchindoait, fin grave. I s'artoait un fin tiot molet, pi rkminchoait.

J'avoais invie ed dire "pour ches sièkes ed ches sièkes, merchi", et j'avoais, dech keup lò, invie ed rire que d'penser ho.

Casi seur eq d'ichi quèks moés, j'éro coèr l'possibilité ed rire.

Boinne jornée à tertous.

lundi 5 décembre 2016

Os allons gaingner

Ièr, ches jueus ed Londjo juoai'te ach fotbal, in keupe ed Frinche.

Pour ête seur ed gaingner, is étoai'te aller, avant, s'mette ach vert à Clairefontainne, din in catieu. Ech minme catieu eq pour ches jueus ed l'étchipe ed Frinche ed fotbal. !

Pour vos dire conme is étoai'te bin.

Avuc ho, is vont gaingner. In puss, is jueront à Anmyin, din l'stade Moulondjet. I éro granmint ed gins pour els incorager.

Is dvoai'te gaingner, mais is ont mie gaingné.

Don is ont perdu.

Zéro à un, o zéro à deus o p't'ête un à deus ?

Nan !

Zéro à sèt !

I m'sanne eq ches jueus étoai'te trop bin ach catieu. O avoai'te fin bin mingé ?!

O p't'ête eq leu présidint leu o offert ches quèks jours in sachant qu'is alloai'te prinde unne sapré casake.

Chi t'es un jueu ed Londjo, esplique mi.

Slon mi, à Croéx, is i croéyoai'te. Puss. Aisié à foaire, conme cacouille.

Chi t'os ets ages innui, cros becs à ti.

dimanche 4 décembre 2016

Vir ech Cap Gris-Nez

... in pèrtant ed Wissant ?

O, vir ech Cap Gris-Nez et Wissant ?

Conme os voulez.

Feut djò mie confonde ches deus caps : Blanc-Nez et Gris-Nez. Surtoute quanq t'es à Wissant ! Un est à l'ouest dech bieu village, l'eute est ach nord.

Wissant ?

Mile gins qui i rest'te,et l'fète dech Flobèrd ech darin diminche dech moés d'eu edpi casi trinte ins. Ej vos précise eq Flobèrt est mie unne gin célèbe, mais ech nom ed batieus utilisés chu ches mers dech Pas-ed-Calais pèr ches pékeus.

Wissant et chin mnu ed Noë ech judi tchinze déchimbe pour ches éfants qui minge'te à l'cantine ed l'école, mais avant, Wissant et chin mèrché ed Noë, innui, diminche quat déchimbe.

Wissant, inter ches deus caps.

Pour aller à Wissant et ach Cap Gris-Nez, i o unne voée qui, à un monmint, vos inmène chu unne eute voée. Et lò, os avez deus pannieus. Quanq os rbéïez ches deus pannieus, os pouvez pèrtir à droéte, o à gauche. Pour aller à Wissant et ach Cap Gris-Nez.

Don, à Wissant o din ches alintours, is sai'te étou vos foaire rire. Quanq os vrez à Wissant, trachez bin ches deus pannieus.

Boin diminche.

Chi t'os ets ages innui, fin cros bec à ti.

samedi 3 décembre 2016

Ches rcords

... sont foaits pour ête battus.

Tertout l'sait.

Battus, chin tricher.

Mi, pour min blog, des keups ej foais del réclame. Et quanq j'invoée ches messages ed réclame pour min blog, j'o miu ed lecteus.

Adon ?

In octobe deus-mile-trése, mile-deus-chint-quater-vint-dis lecteus. Ej kminchoais. Seuremint des tchurieus.

Pi je n'o ieu moinss. Alintour ed deus à quat-chint pèr moés.

Pour ches articles, minme cose : un à dis lecteu pèr jour pour kmincher.

Pi un jour, ho cange. Après unne tiote réclame, o après un keup ed canche.

Déchimbe deus-mile-tchinze, i o echl article chu "tout kminche ach Beu-dech-tère" qu'arrive à quat-chint-chincante-uit keups rbéïé. Béle surprinze pour mi.

Granmint esseptionnel.

Et nos vlò arrivés in novimbe deus-mile-sèse. Miu ed chint lecteu pèr jour ! Miu ed deus-mile-chonc-chint lecteus in un moés !

Et achteure, il est possibe qu'ech rcord dech l'article chu ech Beu-dech-tère fuche battu béto.

Ej su ureus. Ecrire m'amuse et m'foait plaisi. Don, chi i o granmint ed gins à rbéïer, ho m'foait granmint plaisi.

Et ej vo continuer.

Merchi à tertous.

vendredi 2 décembre 2016

A te rvir

Nan !

J'o surtoute mie invie ed te rvir din sis ins o din onze ins conme présidint. Chi tu lis min blog, tu l'avoais p't'ête comprins edpi granmint ed tans. A moinss eq tu fuche trop nikdouille pour ho.

Ièr, t'os rgretté unne cose eq t'os foait.

Timpe au matin, un jornaleu disoait eq pour annoncher eq tu pèrtiros, t'étoais mie obligé ed causer ed quoé eq tu rgrettoais.

Ej dis conme li. Surtoute eq t'éroais du in mette granmint d'eutes, ed coses.

Angela, Vladimir et mi, os te rgrettrons mie.

Achteure, tu vos ête un présidint in vagances chonc moés. Profite !

Te dire eq j'o invie ed te rvir, nan.

Mais et dire adé, ouais ! Et avuc granmint ed plaisi.

Ej sro perdu

T'es in voéture, et tu tchittes Anmyin pour aller à Flesselles. Ch'est fin aisié : tu passes edvant echl'interprinze ed pneus "Boinne  Innée" chu t'gauche. Qu'i m'sanne qu'ale est chu t(gauche.

Chi tu voés echl'opital, t'es in route à rouler pour Saleux, Salouël. Vers ech sud.

Mais i péroait eq des gins vu'te supprimer echl'interprinze "Boinne  Innée", et inlver ches murs et toute !

Sapré boin sanke !

Adon, kmint qu'ej séroais qu'ej vo din ch'nord chin ête obligé ed vir echl'opital qui m'fro dire qu'ej su mie din l'boinne direction ?

Ej croés qu'ej vo ête obligé d'acater unne carte routière !

A moinss eq j'in o unne pour Noë ?

Don, ej vo attinde quèks jours.

jeudi 1 décembre 2016

Chint-dis-sèt ins

Ch'est ches ages del fanme l'puss vieille dech monde.

Ale o née in mile-uit-chint-quater-vint-dis-nu, ech vint-nu novimbe.

Cartchule !

Ale avoait un in in mile-nu-chint, quater-vint-dis avant qu'em première fille naiche, et chint quanq j'o acaté m'moaison.

I péroait qu'ale minge un us cru pèr jour, del vianne, et jamoais ed lédjumes. Jous eq ch'est pour ho qu'ale ches ages lò, o jou qu'ale o jamoais ouvré ?

Quoé qu'est seur, ch'est qu'ej vux mie vos mette ess photo.

Feut qu'ej vos diche étou qu'echt onme qu'o invinté ech Cros-Mac est mort à quater-vint-dis-uit ins, lindi.

Boinne fète à tous ches gins qui s'lonme'te Eloi.

mercredi 30 novembre 2016

Quarante mètes ed puss

..., inter Compiènes et Aubencheul-ach-Bac. 

Ch'est quoé qu'i éro ed nouvieu din quèks innées : ches cros batieus pourront navidjer chu ch'canal lonmé Seine Nord.

Conme chin nom l'indique, i vo ed Compiène din Nord.

Achteure, ches batieus doé'te foaire moins ed quatore mètes ed large. Din dis ins, is pourront in foaire quarante ed puss.

Mais ches quarante mètes ed puss, vo falloèr les prinde quèke pèrt.

A des cans ed punmes ed tère o bétraves, mais étou, à des gardins et p't'ête minme à des moaisons.

Magine !

T'es din t'moaison, tu rbées ets abes din tin gardin, et un jour, tu pèrs in vagances. Quanq tu rviens, i o pu ches abes, et p't'ête minme un molet det tchuisine in moinss. Mais tu voés passer des bieus batieus.

Et t'es ureus.

In vrai, cho, ch'est mie seur.

In tout, j'o cartchulé, ho fro quate-chint-vint-uit hectares ed tère in moinss. Chint-sèt kilomètes ed long, et quarante mètes ed large. Os pouvez vérifier.

Mi, quoé qu'ej me dminde, ch'est quoé qu'is vont foaire dech tère qu'is vont ertirer pour mette del'ieu à l'place ? Vu qu'i feut creuser !

Chu quarante eutes mètes ed large ?

Et lò, tu voéros pu rin.

A moinss qu'is creuse'te un treu pour l'mette, ech tère.

Avuc du vint

Lindi, quanq j'o rintré amon mi, i avoait deus degrés din ches tans.

Ch'est mie un cros problinme.

Mais i avoait un vint à décorner ches bus. Et dech keup-lò, os nos sroème crus in Sibérie. Qu'i m'sanne.

O qu'ej magine eq ch'est conme ho lò-bos.

Cros bec à m'fille.

mardi 29 novembre 2016

Unne Boulète d'Avesnes

Ch'est un fin boin tiot fromage, in forme ed cône, foait à pèrtir ed frouettes ed Maroèlles.  Din ch'Nord.

I o granmint ed gins qui connoaisse'te mie ech boin fromage.

Malureusemint !

O des keups, ureusemint. Pèr eximpe, pour mi et min fiu.

Ej vos esplique.

Quanq os restez à din ch'paoiyis ddechl'Avesnoés o del Thiéraches, os connoaissez l'Boulète d'Avesnes. Et os in acatez quanq os voulez.

Quanq os êtes à Anmyin o Adville, os avez puss ed mau pour in acater. Mais ch'est toudi aisié quanq minme.

Et pour mi, à chonc-chint-chincante kilomètes dech région eq j'ainme granmint, acater unne boinne Boulète est casi un reuve.

Et verdi au vèpe, j'o ieu del canche. J'o vu unne Boulète din l'boutike ò j'étoais.

Pauve Boulète ! L'étoait toute seule, et vieille. Ej vo l'disez : tertout n'connoait mie. Adon, j'o acaté avuc granmint ed plaisi l'pauve boinne Boulète. Ech vindeu avoait minme foait unne ristorne dsu ch'prix, pour l'déblaiyer.

Ah ! Qu'ale étoait boinne !

Conme à chake keup eq j'in minge unne.

lundi 28 novembre 2016

Tiot plaisi pour unne fanme

Edpi qu'em fille est pèrtie in Sibérie, j'avoais invie ed prinde, pi d'i invoéyer, unne revue qu'est distribuée in ville chin qu'os ayonche à poaiyer quèk cose quanq os la prindons.

Et judi, j'in o prins unne.

Ndan, i o toudi granmint des réclames, et dsu, i avoait quat dessins ed bèlés lipes, bin rouves.

Ej prinds don ho à unne jonne fille qui les distribuoait, et ej monte din ch'train. Pi je rbée un molet.

Chu l'couverte, in dsou ed ches quat dessins, i avoait quat tiots conmintaires :
Mmmh.., Oh ouais..., Coèr !!, et Ouais ! Ah ! Ouh ! Youhou ! Ouh ! Ouh !

?

Din ech revue, i avoait un article qui lonmoait "Prinde soin ed ches lipes". Chonc pages d'esplications, chin images mais avuc des dessins, pour apprinde à ches fanmes et ches filles kmint s'foaire plaisi.

Unne ed ches manières, pour vos dire, s'lonme ech Grind Uit. Unne eute, l'Géométrie Variabe.

Et chl'article disoait eq malureusemint, ch'étoait mie inseigné din ches écoles. Ho m'sanne malaisié.

J'o décidé ed mie invoéyer l'revue à m'fille. O bin, mie pour ech premier keup qu'ej vo i in invoéyer unne.

A suive !

dimanche 27 novembre 2016

A pèrt ho

... tout vo bin.

Mardi au vèpe, je rbéïoais l'météo à l'télévision.

Quoé qu'ale disoait l'fanme ?

- "Edman, i fro bieu pèrtoute in Frinche, à pèrt in Atchitaine, chtol-lò d'avant ech Nouvèle-Atchtaine, din ches Poaiyis-ed-Loère et din ch'Gard.

Ches timpératures sront bèles pour l'saison, à pèrt à Nantes et à Pau."

Mi, ej proclame qu'in Frinche, tertout est ureus. A pèrt ches gins à joke, ches gins qu'ont mie d'argint, et ches gins qu'ont granmint ed mau. Mais à pèrt pour eux, ej dis vrai.

Ho m'épine granmint d'intinde des gins, surtoute des jornaleus o casi-jornaleus, n'mie bin causer.


samedi 26 novembre 2016

Pauves chèrcuitiers

Ah ! Ech bel ouvrage que chti ed chèrcuitier.

Prinde des boins coéchons et in foaire ed boins gambons, des catchuses avuc echl'échine o ch'filet, du bacon, des boudins noèrts o coèr, des seucisses. Eq ch'est bieu ed savoèr foaire ho !

Mais ches chèrcuitiers sont in dinger : i n'o un qui vut foaire des seucisses chin vianne. Chin coéchon !

In vrai i l'in foait djò, des seucisses chin vianne : dis pèr chint ed tout quoé qu'i foait. Mais i dit eq din dis o vint ins, i n'fro qu'ho. il acatero pu ed coéchons et n'mettro pu ed vianne din toutes ches seucisses qu'i fro.

Ches cinsiers s'intchiét'te, surtoute qu'ech chèrcuitier, ch'est unne crosse interprinze qu'il o.

Et ch'est un allemand.

Magine un jour des choucroutes allemandes chin vianne ed coéchon ! Ho sroait conme l'foaire l'fète ed Munich chin bière. A l'ieu !

Mi, chi j'avoais un fiu o un nveu qui vuche edvenir chèrcuitier, ej sroais intchiet.

vendredi 25 novembre 2016

Causer frinchoés

... pour ouvrer in Neurmindie.

Ch'est quoé qu'o déchidé ech présidint del région neurminde. Echti-lò qui o vindu l'eute smangne des vakes neurmindes à ches iraniens.

Ech keup chi, ho m'foait mie plaisi d'apprinde echte nouvèle lò.

J'ainme bin l'Neurmindie. Minme granmint ! J'o un fin boin cousin qui i reste, et unne cousine régalante étou.

Et l'Neurmindie est bèle. Ech Caule-Ste-Beuve, Biéville-Beuville, Grindcourt, Villediu-ches-Païèles, ech Mont-St-Michel ! Tout ho est à vir un jour.

Mais mi, ej cause picard. Don, ej su granmint déchu d'apprinde qu'ej pux mie, achteure, aller ouvrer in Neurmindie.

Cros bec à min cousin neurmind. Et s'fanmme et ches éfants.

Cros bec étou à ti chi tu t'es mérié un vint-chonc novimbe. Surtoute chi tu reste in Picardie.

jeudi 24 novembre 2016

Combin qu'ha veut

..., un vieu ?

In Neurmindie, ches gins répondroai'te qu'ho dépind. Ho dépind dech vieu, et ho dépind ed ches acateus.

Et ches Neurminds di'te vrai.

Pèrtoute in Frinche, ho dépind dech vieu, et ho dépind ed ches acateus.

L'eute jour, un cinsier din l'Aisne o ieu un vieu poéyé un euro et dis chintimes.

Jou eq ch'étaoit un mawais vieu ed race noèrte et blanke ? Feut qu'ej vos diche eq ches vieus veu'te étou slon leu poéds et leu race.

Un euro et dis chintimes ?! Ch'est seur qu'ho poéche mie echl'ouvrage dech cinsier. Ho poéye étou mie ches kilomètes pour aller vinde ech vieu.

I péroait que quanq ches vieus veu'te rin, o mie grind cose, i n'o puss qui meur'te quanq is naiche'te. I péroait !

mercredi 23 novembre 2016

Quoé prinde in vagances

... , et pour in foaire quoé ?

Ej me dminde, et dech keup, ej vos dminde étou.

Mettons qu'os partons à ches mers, unne à troés smangnes in étè. Tertout prindro des vetemints mie granmint keuds, quèks lives, ed l'argint pour acater à minger, aller din eds indroéts pour juer o pour aller minger din des restaurants. Pèr eximpe.

Pour unne famille ed chonc o sis gins, mettons qu'i feuche troés-mile euros, et p't'ête, chi tu vux ête fin bin et fin ureus, tchinze-mile euros. Puss echl'argint pour ech voéyage.

In ivèr, din no poaiyis, i foait froéd. Et ches gins, i vont à ches nèges pour skier. Granmint ed keups, is i vont unne smangne seulemint. Mettons deus pour ches riches.

Tu vos p't'ête puss din ches restaurants au vèpe. A chonc o sis, feut, im'sanne, sis-mile euros. Et, minme cose, chi tu vux ête fin bien, trinte-mile euros. Chin oblier ech voéyage.

Mais in vagances achteure, i feut edl'argint pour ches musées, pour unne o deus casakes, des boinnes keuchures et pour minger. A deus, chin ches éfants qui sont à leu école, cartchulons qu'i feuche deus-mile euros pour unne smangne. Mettons quate-mile chi os voulez.

Adon ?

Kmint jou eq ch'est possibe eq deus fanmes avoai'te chonc-millon d'euros avuc eux din leu voéture l'eute jour ? Pour quoé, étou, eq ches deus fanmes ont moutré pèr leu voéture et leus attitudes qu'is avoai'te granmint d'argint ?

Feut mie s'dminder pourquoé qu'i o eds agripeus qui leu ont ont tout prins.

Unne cose est seur, mi, ej su mie in dinger quanq ej voéyage ; I o rin, o mie grind cose, à m'prinde.

Ermertchez ! Achteure, i o unne fanme qu'est in Inde avuc uit-chint euros din ches pokes. In Inde, h'est étou dingéreus eq d'avoèr chonc-millon din ches pokes in Frinche.

Becs à tertous.

mardi 22 novembre 2016

Ech Théïâtre à Guernons

Ch'est un indroét, à Compiènes, din l'Oèse, ò ches gins pu'te apprinde kmint utiliser ech rire pour miu vive.

H'o kminché in octobe decht'innée, un sinmdi chu deus.

In vrai, ches gins apprinde'te à miu vive, in riant, et i péroait étou, à vive puss viu.

Mi, ej vux bin. Mais ej truvoe eq ch'est granmint donmage d'ête obligé d'apprinde à rire. Jou qu'il est mie possibe ed rire chin avoér dzoin d'apprinde ?

Sapré monde d'achteure !

Ej précise pour ches fanmes qu'is sont mie obligés d'avoèr des bèlés guernons pour aller ach Théïâtre à Guernons. Ureusemint !





lundi 21 novembre 2016

Sapré timpète

Pour un keup, ches jornaleus l'avoai'te annoncé edpi quèks jours : "ho vo souffler granmint."

In premier, din l'Ouest, verdi pi surtoute sinmdi.

Pi diminche, ches vints sront granmint puss din l'Est, pi din not bèle région, l'Picardie.

Don, prudinche. I falloait ête prudint.

Conme toudi din ches keups lò, i o des gins qu'acout'te mie.

Ièr au vèpe, ho s'voéyoait bin.

Pèr eximpe, ech tiot Nicolas l'o prins ches vints din s'djife. I pinsoait foaire premier, o surtoute deusienme, vu qu'i savoait eq chin conmarade Alain couroait fin rade. Mais puss ches eures tornoai'te chu ch'monte à chincante-chonc-mile euros, moins il étoait deusienme, et coèr moins premier. Timpète in pleine djife.

- "A quoé qu'ho sert d'avoèr unne monte conme ho pour foaire ho ?", qu'ej vos dminde.

Etpi, eute eximpe toudi ièr au vèpe, i o Françoés qui li o prins ches vints din chin dos.

- "P't'ête troésienme" qui disoai'te ches jornaleus verdi.

- "Premier, avuc granmint d'avance" qu'is annon çoai'te ièr au vèpe.

Feut qu'ej précise :
- Lò, ej cause mie ed not présidint d'achteure,
- Ech Françoés dont ej cause o vétchu à chint-chincante kuilomètes ed ches mers. Don, ches timpètes, i put connoaite. Miu qu'ech tiot Nicolas, ch'est seur.

Pour conclure, i sanne qu'ech keup ed ches inglés in join o ed ches anméritchins ech uit novimbe, os l'ayonche foait ièr.

Rin n'dit qu'os l'erfront mie in deus-mile-dis-sèt.

Ho vo keufer.

dimanche 20 novembre 2016

Puss et moinss

... o puss o moinss. Ho dépind des keups.

In premier, puss et moinss sont des signes pour cartchuler.

Eximpe : des carotes puss des navieus, ho foait...
- "Ho foait rin du tout", qu'ale éroait dit Tiote Berte, em moaitresse. "A pèrt unne soupe. Mais os pouvons dire eq mile carotes puss chint-deus carotes, ho foait granmint ed carotes. Alintour ed mile-chint carotes".

Ervenons à ches carotes et ches navieus. Feut mette étou, din un couet, des punmes ed tère, de l'ieu, du sé et foaire keufer pour avoèr unne boinne soupe, un boin minger o ches deus.

Din un eute poaiyis, tu canges ches carotes, ches navieus, ches punmes ed tère et ech sé pèr une bétrave pour avoèr ed quoé minger.

Moinss ?

Eximpe :Puss t'acates à minger o des dorlos pour t'fanme, moinss t'os d'argint.

Après, i o des coses régalantes à savoèr : pèr eximpe, des keups, os causons ed zéro puss, et des keups, ed zéro moinss. Quoé eq ch'est qu'ho ?

Zéro puss, ch'est quanq qu'ho vient ed un o puss, et eq cho deschind alintour ed zéro. Mais h'est in dsu.

Zéro moinss, ch'est quanq qu'ho vient ed moinss dis o coèr moinss, et qu'achteur ch'est un molet in dsou ed zéro. Zéro moinss.

Cacouille : zéro puss zéro, ho foait l'tète à Toto.

Etpi, i o des moinss o des puss qui se sranne'te, mais qui chont granmint différints.

Eximpe avuc moinss trente-et-un :
- A m'banke, j'o, malureusemint, moinss trinte-et-un euros. Ch'est mie un cros problinme, vu eq din dis jours, j'éro min gainniage dech moés, mile-deus-chint-vint-sèt euros.

- Din un poaiyis achteure, i foait moinss trinte-et-un degrés. In dsou ed zéro, t'avoais comprins. Et cho , ho kminche, quanq t'es né in Frinche, à foaire granmint ed froéd. Os pouvons écrire qu'ho vo puss o moinss bin, slon ches gins. Mais feut s'i foaire, vu ed din quèkes smangnes, i fro moinss chincante degrés.

Boin diminche à tertous,

Bec à ti chi t'os ets ages innui.
Bec à Chabot, pour ches gins qui li'te unne tiote gasète chu ches animaux.

samedi 19 novembre 2016

Ale o seuvé l'Frinche

... mais achteure, sanne obliée.

Ch'est l'histoère d'unne fanme qu'o prévnu ches cadoreus, i o un in, ech tchinze novimbe deus-mile-tchinze, qu'ale savoait ò un mawais qu'avoait tué granmint ed gins quèks jours avant étoait muché.

Et ale disoait vrai.

Ches cadoreus ont ieu gramint ed mau à s'débarasser dech mawais lò et ed ches conmarades, ech dis-uit novimbe deus-mile-tchnize. Ches conmarades decht'onme étoai'te étou des fin mawais.

Mais l'fanme qu'o prévnu ches cadoreus, edpi, o du tchitter s'moaison, chin quèrtier, et minme canger ed nom. Ale dit qu'ale o tout perdu, qu'ale o été tué. Minme chi ale est in vie.

Canger ed nom. Ch'est mie coèr foait. Edpi un in, ale est chin nom.

Et est malureuse !

Mi, ej l'o rmerchi granmint pour l'corage qu'ale o ieu.

vendredi 18 novembre 2016

Acater mes boinnés vakes

Lindi au vèpe, in Iran, ech présidint ed Neurmindie causoait dech région, et don ed ches bèlés vakes neurmindes qui i rest'te. A eds iraniens.

D'un keup d'un seu, un iranien i dit qu'i vut acater troés-chint-chincante vakes neurmindes pour les foaire tuer din chin abattoèr. In Iran.

Et ch'présidint ed région i dit qu'i vo i truvoer ches vakes.

Un o deus keups ed téléphone, et tertout in Neurmindie trache'te pour rasanner ches vakes qui prindront l'avion.

Avant d'ête tuées.

Mi, ch'est un molet ho qui m'pose problinme : foaire tuer des vakes neurmindes.

Minme chi ch'est seur eq ch'est quoé qu'i o ed miu din ch'monde conme vianne.

Deus jours après, din unne eute gasète et din unne eute région, os pouvoème lire :
"Ambiance morose ach chincante-sètienme concours ed Semur-in Auxois". Concours ed vakes charolaises, blankes, in Bourgogne.

Ch'est du, j'in su seur, à l'vente ed ches vakes neurmindes à ches iraniens.

jeudi 17 novembre 2016

Dors min tiot minisse

Tertout connait l'canchon dech tiot quinquin. Au moinss ech début :
"Dors min tiot quinquin, min tiot pouchin, min cros rojin,
Tu m'fros du chagrin chi tu n'dors mie jusqu'à dman.
..."

Ièr, j'éroais du canter ho, o quèke cose qui i rsanne, à not minisse.

Magine !
"Dors min tiot minisse, min tiot Manu, min conmarade,
Tu m'fros du chagrin chi tu t'présintes achteure.".

Not ancien minisse, feut écrire, vu qu'il o tchitté ech gouvernemint edpi quèks moés. Et il o granmint bin foait.

L'est bin, ech gars- lò ! Qu'i m'sanne.

Mais vouloèr ête not présidint à ches ages, ch'est unne berlure. Qu'i sanne coèr.

L'éroait miu foait ed "dormir" quèkes innées ed puss, attinde, apprinde, et nan causer.

A suive.

J'i souhaite quanq minme boinne canche. Et il éro p't'ête, vu ches eutes qu'is vu'te étou ête présidint et qui sont des mawais.

Bec à tertous.

mercredi 16 novembre 2016

Em fanme est morte

Qui dit echt onme. Ech viu, alintour ed quater-vint ins.

I dvroait dire :

- "Em deusienme fanme est morte", vu eq ch'est unne fille qu'avoait alintour ed trinte ins ed moinss eq li, et qu'i s'est mis à suive pour vive avuc.

In tchittant es première fanme qu'avoait troés jonnés filles.

Don, s'deusienme fanme est morte. Bin qu'étant puss jonne eq li.

Quoé foaire ?

Edvinez quoé qu'il o foait ?

Mie possibe qu'os truvoèche.

Echt onme est rvnu vive avuc s'première fanme. Alintour ed quarante ins aprè l'avoèr tchitté. Il avoait pu d'argint.

Falloait dech corage. Pour li, et pour s'première fanme.

mardi 15 novembre 2016

Din unne gasète

Sinmdi, je rbée unne gasète et ej su surprins pèr ech tite : "L'inconnue". Avuc un e.

Surprins, vu qu'el photo in dsou est ech nouvieu présidint ed ches Anmérikes, et ch'est un onme.


Adon, busons !

- ches jornaleus ont foait unne berlure d'écriture din ch'tite. I péroait qu'i n'o ed puss in puss des berlures d'écriture.

- ches jornaleus, os l'avons granmint dit, pensoai'te eq ch'étoait unne fanme qu'alloait gaingné. Et is avoai'te anticipé leu gasète et s'dmindoai'te quoé qu'ale alloait foaire achteure.

- ches jornaleus connaisse'te ech nouvieu présidint, mais mie ch'fanme. Surtoute qu'i cange ed tans in tans. Et chl'inconnue, avuc un e, ch'est ale..

Merchi à vos ed m'écrire quoé qu'os in pensez

lundi 14 novembre 2016

Os allons nos mèrier

Eq di'te deus jonnes qui rest'te à Ingers.

- "Fin boinne nouvèle, mais quanq ?" leu répond l'gin.

- "Echt innée. Ech sinmdi douse novimbe."

- "Bin ! Ch'étoait i o deus jours !"

- "Brin ! Os avons oblié."

dimanche 13 novembre 2016

Assfaug s'proméne

Assfaug, berge, est unne gin qu'ainme granmint s'promner. Mais, adon eq des gin s'proméne'te in rbéïant leus piés, li, i rbée pèrtoute. Minme ches tans.

Et i foait des photos.

Un jour, i s'proméne aprè-nonne et voét des fils chu un cros potieu.


Des cros fils qu'ont rin à vir avuc unne interprinze inglése ò o ouvré min un bieu-frère.

- "O-jou qui vont ches fils ?" qu'i se dminde.

Echt onme s'met à suive un fil, ed potieu in potieu.


Des keups, i torne à gauche, des keups, i torne à droéte.














Achteure, un croésemint !















Pi  coèr un eute !















- "Continuons !" qu'i s'dit Assfaug, conme chi i l'étoait mie tout seu. Et p't'ête pour s'bailler du corage.


- "Déchidémint !"





















- "Mèrchons vers l'ouest !"




- "Ho vo torner"

Puss i mèrche, et moinss i foait jour.














Assfaug est ureus mais s'dminde ò qu'i vo arriver.


Ach'monmint lò, i rinconte un jornaleu. Un boin jornaleu qu'avoait prévu qu'unne fanme dviendroait présidinte ed ches Anmérikes.

Is cause'te insanne, pi s'tchit'te.

Assfaug rinte à s'moaison au vèpe, à ch'clore ; I kminche à foaire nuit. I véro mie lò ò s'termine ech fil, mais tant pis.

Ech lindman, il acate l'gasète et lit in deusienme page :

"Incroéyabe conte ed fil et Assfaug."

- "Min Diu !" qu'i s'dit, "pauve jornaleu.".

samedi 12 novembre 2016

Casi conme ièr


Suzanne t'inméne acouter ches sirènes
Ale et'prind pèr l'man
Pour passer unne nuit chin fin
Tu sais qu'ale est à mitan nikdouille
Ch'est pourquoé tu vux rester
Chu un platieu d'argint
Ale et'sert dech thé au jasmin
Et quanq tu voudroais i dire
Tu n'os mie d'anmour pour ale
Ale t'appelle din ches ondes
Et laice ches mers réponde
Qu'edpi toudi tu l'ainmes

Tu vux rester à ches côtés
Achteure, tu os pu l'freusse
Ed voéyager ches ius frunmer
Unne flamme asit din tin tcheur

Il étoait un pékeu vnu chu ches tères
Qu'o veillé granmint ed tans
Din heut d'unne tour solitaire
Quanq il o comprin eq seuls
Ches onmes perdus l'voéyoai'te
Il o dit qu'os vogueroème
Jusqu'à eq ches vagues nos défrunme'te
Mais li-minme fut brisié
Bin avant eq ches tans s ouve'te
Délaicié et casi un onme
Il o coulé dsou vot sagesse
Conme unne pierre

Tu vux rester à ches côtés
Achteure, tu os pu l'freusse
Ed voéyager ches ius frunmer
Unne flamme asit din tin tcheur

Suzanne t'inméne acouter ches sirènes
Ale et'prind pèr l'man
Pour passer unne nuit chin fin
Conme du mié, ech solé coule
Chu Not Dame ed ches brairies
Ale et'moutre ò tracher
Pèrmi ches déchets et ches fleurs
Din ches algues, i o des reuves
Eds éfants timpe au matin
Qui s'cline'te vers l'anmour
Is s'cline'te conme ho toudi
Et Suzanne tient ech miroér

Tu vux rester à ches côtés
Achteure, tu os pu l'freusse
Ed voéyager ches ius frunmer
Unne étringe afolure din tin tcheur


Ho rsanne granmint à l'canchon d'ièr, ech canteu o casi ches minmes ages. Deus innées ed moinss. Mais i vit coèr.

vendredi 11 novembre 2016

Qué bèle voée



Suzanne t'inmène amon ale près del rivière
Tu pux intinde ches batieux pèrtir
Tu pux passer l'nuit avuc ale
Et tu sais qu'ale est à mitan nikdouille
Mais ch'est pour ho eq tu vux rester
Et ale t'nourrit ed thé et ds'oringes
Qui ont foait tout ech kmin edpi l'Chine
Et juste quanq tu vux i dire
Eq t'os autchun anmour à i bailler
Elle t'intraîne din ches ondes
Et laice l'rivière réponde
Eq t'es chin anmant edpi toudi

Et tu vux voéyager avuc ale
Et tu vux voéyager ches ius frunmés
Et tu sais qu'ale éro fiate in ti
Car t'os touché chin corps perzuré avuc etn esprit.

Et Jésus étoait un pékeu
Quanq il mèrchoait chu l'ieu
Et il passoait granmint ed tans à observer
Din heut dech tour solitaire in bos
Et quanq il o ieu l'certitude
Eq  seuls ches onmes chu ch'point ed s'noéïer pouvoai'te l'vir
I dit tous ches onmes sront des pékeus adon
Jusqu'ach monmint ò ches mers les défrunmeront
Mais li-minme o étè berzillé
Bin avant eq ches tans n's'ouvre'te
Abindonné, casi humain
Il sombroait dsou t'sagesse conme unne pierre

Et tu vux voéyager avuc li
Et tu vux voéyager ches ius frunmés
Et tu penses que p't'ête ti fros fiate
Vu qu'il o touché tin corps perzuré avuc chin esprit.

Achteure Suzanne prind ete man
Et et'conduit à l'rivière
Ale est vêtue ed djenilles et ed pleumes
Vnant ed guichets ed l'Armée dech Salut
Et ech solé djile conme ech mié
Chu Not Dame dech Port
Et ale t'indique ò rbéïer
Ach mitan ed ches déchets et ed ches fleurs
I o eds héros din ches algues
I o eds éfants din ech matin
Is s'incline'te pèr anmour
Et is s'inclineront conme ho pour echl'éternité
Quanq Suzanne tient ech miroér

Et tu vux voéyager avuc ale
Et tu vux voéyager ches ius frunmés
Et tu sais eq tu pux i foaire fiate
Vu qu'ale o touché tin corps perzuré avuc chin esprit.


Adé, Léonar ! Fuche achteure ureus lò ò t'es. Halleluia !

Z'avez mie vu Mirza

I péroait qu'un canteu, o un onme qui vouloait edvenir canteu in passant à l'télé, éroait perdu chin tchyin. Din l'Aisne !

In vrai, echt'onme est mie picard, et chin tchyin, i sait mie ò qu'i l'o perdu. Mais un radiestésiste, ho existe, i éroait dit qu'il étoait din l'Aisne. Feut i croère.

Echl'Aisne ? deus possibilités :
- ech dépèrtemint, qui foait sèt-mile-troés-chint-soéçante-nu kilomètes carrés,
o
- ech fluve, o rivière, un molet moinss ed troés-chint-chincante-sis kilomètes.

Et des tchyins din l'Aisne o din l'Aisne, i in o miu ed dis.

Boin corage.

Feut qu'ej vos précise qu'ech tchyin qu'est rtraché s'lonme Balzac. Mie Mirza.

Chi t'os ets ages innui, cros becs à ti. 

In busant un molet, ej me dis qu'ech tchyin est p't'ête aller visiter ech Kmin ed ches Dames

jeudi 10 novembre 2016

Echl'eximpe anméritchin

Ah qu'ej su ureus ! Vu qu'ej ris. O eq j'o bin ri.

Ièr, din emn interprinze, ches gins étoai'te lò à causer ed ches elections din ches anméritches et dech nouvieu présidint dech poaiyis lò .

- "Ah ! Min Diu, min Diu ! Qué malur !" qu'is disoai'te quèks uns.

Et mi :

- "Ch'est fin bin ! Ch'est un boin eximpe ed démocratie."

Pour un keup qu'os pouvons causer ed démocratie qu'in est unne !

In disant ho, ch'est seur, feut mie rire. Minme chi t'in o granmint invie, vu eq ti étou, tu penses eq ch'est p't'ête un malur.

Adon, ches gins avuc qui j'ouvre m'ont rbéïé avuc eds ius conme chi is avoai'te invie d'em minger. O d'em tuer ?

Toute l'jornée, j'o mis un molet ed brin.

- "Os érons l'minme cose in Frinche din quèks moés" qu'ej disoais.

- "Què malur !" qu'ej pensoais. Vu qu'os pourroème avir l'minme cose.

Un clousse présidint ? Feut i buser.


mercredi 9 novembre 2016

Ech chuke d'Epville

I o des gins qui boé'te leu ju, in mingeant un tiot morcieu ed chuke avuc. Is n'o étou qu'ainmeroai'te l'bir in mingeant un tiot chuke, mais ho leu froait du mau.

Et du chuke, i n'o qu'est fabritché à Epville, alintour d'Hin, din not bélote Sonme.

J'écris innui echt'article lò pour et in pensant à ches chonc ouvreus del chukerie d'Epville qu'ont étè afolés lindi in rchevant de l'ieu keude chu leu dgife adon qu'is ouvroai'te.; Is étoai'te mie in route à foaire keufer un ju.

Boin corage à eux.

mardi 8 novembre 2016

Ches colets de Bzançon

Granmint pèrmi vos connoai'te et ont djò mingé des colets ed Bruxelles ; i n'o des boins, et i n'o granmint ed mie boin. Surtoute din ches cantines d'école !

Granmint pèrmi vos connoai'te étou ches colets rouves o ches colets verts qui, des keups, sont frisés et serve'te à tchuisiner ech colet fèrci. Fin boin !

Eh bin achteure, il existe ech colet de Bzançon ! Ch'est des colets qu'ele ville o mis pour analyser l'tchalité ed ches airs. I péroait eq ches colets prinde'te din leus feuilles tout quoé qu'est din ches airs et qu'est mis boin.

In ville, ech colet foait ho. Et din tin gardin ?

Il le foait étou, mais din tin gardin, i o mis ed voétures qui roule'te toute l'jornée.

Chi tu restoais ach Gabon et eq tu viens vive à Bzançon, boinne canche à ti. N'oblie mie d'acater unne casake.

Chi tu restes din ches Anmérikes, boinne canche à ti étou. Jue mie, innui, ach nikdouille, tu pourroais gaingner.

lundi 7 novembre 2016

Ech cabotan

Tertous connoait Lafleur et ches Cabotans d'Anmyin. Is nos font toudi rire.

Eh bin ! Mi j'ouvre avuc un cabotan.

In vrai ch'est mie un cabotan, os vos doutez, vu qu'i bouge tout seu et qu'il o mie ed fils à ches bros, ches gambes et s'tète.

Os m'direz, pourroait ête Pinocchio; Mais nan !

Pour mi, ch'in est un, ed cabotan.

Ch'est un onme qui vo à toutes ches réunions ò eq not interprinze est invitée. Il i vo, il acoute et i rinte. Des keups, i minge avuc ches eutes gins.

Pi, i rkminche : i vo à unne réunion, il acoute, et i rinte.

Janmoais i cause din ches réunions, à pèrt p't'ête pour dire bojour, vu qu'i sait rin.

Don, in vrai, ch'est seur eq ch'est mie un cabotan, mais ch'est seur étou eq ch'est un cros arland.

samedi 5 novembre 2016

Un clousse est mort

Ièr, j'o apprins qu'ech pu viu clousse dech monde, un russe lonmé Popov, rin d'étonant din chin nom, est mort i o quèks jours. In Russie. Il avoait quater-vint-sis ins.

Il étoait ech puss viu.

Quanq un un onme o unne fanme qui est ch'puss viu meurt, i o un eute viu qui dvient ech puss viu. Cho, ch'est toudi vrai.

Mais quanq un clousse meurt, jou qu'i o coèr un eute clousse pour nos foaire rire ?

Os n'avons dzoin.

Chi t'os ets ages innui, fin cros bec à ti.

vendredi 4 novembre 2016

Ches vakes bleues

I o des gins qui li'te min blog. Et des keups is utilise'te ems idées.

Ranmintuvoez-vos min article chu ches vakes peinturées, i o quèks moés o innées.


Eh bin, din ch'Doubs, i o un cinsier qu'o seuremint truvoé eq j'avaois unne boinne idée et qu'os mis du bleu chu quèkes vakes à li.

Conme ho, il arrive miu à foaire l'différinche inter ches vakes qui feut traire et ches vakes qu'il o mie dzoin ed traire.

L'éroait pu m'remerchier o m'mette un tiot message

jeudi 3 novembre 2016

Coésir

L'eute sinmdi, avuc m'fanme et min fiu, os avons pèrti passer quèks jours avuc un frère, chin fiu, m'fille et chin onme, et min bieu-frère, s'fanme et leus galibiés.

Diminche, i foait bieu.

Onze eures moinss chonc. Ches clokes dechl'église sonne'te pour annoncer eq ch'est l'eure del messe.

Mi, j'iroais bin.

Quanq ej sors pour i aller, i o min frère qu'o invie d'aller s'promner.

Feut coésir !

Vu ches kilomètes qui granmint ed keups nos sépère'te, j'o étè m'promner avuc li. Et avuc unne tiote nièce fin régalante ed nu ins.

Chi os voulez vos amuser, truvoez  ò qu'os avons étè.





Profitons ed ches gins qu'os ainmons quanq is sont lò.

Quanq à ches messes, i in éro d'eutes messes.

mercredi 2 novembre 2016

Bonnur et gloère

Des montaingnes ed saucissons din ches boutikes n'ont rin à vir avuc ech bonnur o avuc l'gloère.

Qu'écrit Svetlana.

lundi 31 octobre 2016

Merchi les walons

Tertout o intindu causer edpi quèks jours dechl'accord in route à ête signé inter l'Urope et ech Canada.

Tertout in o intindu causer, vu eq ches walons n'voulaoi'te mie qu'el Bergike signe.

Mais chin ches walons, qui qui n'in éroait causé ?

I sanne qu'i o mie unne gin, surtoute in Frinche, qui nos o dmindé quoé qu'os in pensoème.

Merci granmint à nos voésins ed Walonnie ed nos avoèr ouvert les zius.

dimanche 30 octobre 2016

Ches trains sont in rtèrd

Qu'is di'te, ches vakes, innui.

- "Ech train ed sis eures onze qui vo d'Anmyin à Adville o passé à sèt eures onze, et ch'train ed nu eures chonc pour Anmyin o passé à dis eures chonc !" Qu'ale dit unne vake.

Et l'eute i dit :
- "Qu'est jour qu'os sonmmes ?"

- "Diminche"

- " Què diminche ?"

- "Ech trinte dech moés d'octobe."

- "Adon, j'o comprins ! N'trache mie ! Ches onmes ont cangé d'eures, conme tous ches innées."

- "Qué brin !"

samedi 29 octobre 2016

Promnons-nos din ches bos

... quanq ech leu n'i est mie,
Chi ech leu i étoait,
I nos mingeroait.

Cho, ch'est unne tiote canchon eq tertout connait et o canté quanq il étoait jonne.

Merkerdi, deus fanmes qui s'otchupoai'te d'éfants pendint ches vagances ont étè avuc eux s'promner din ches bos.

Mie ed leu.

Et au vèpe, tertout est rintré amon li.

O casi tertout !

Un onme qui couroait din ches minmes bos o truvoé un galibié ed troés ins qui braiyoait. Et il avoait l'droét ed braire, vu qu'il étoait tout seu.

Achteure, ches deus fanmes n's'otchupe'te pu et n's'in otchuperont pu ed ches jonnes éfants des eutes.

Pauve tiot !



 Chi t'os ets ages ed mèriage innui, cros bec à ti.

vendredi 28 octobre 2016

Foaire unne cacouille

...   in ouvrant.

I o quèks moés, j'o participé un concours ed photos ordjanisé pèr echl'interprinze ò eq j'ouvre.

Ech sujet étoait :
"Ech rouve in agriculture"

Mi, j'o mis l'photo qu'os verrez à l'fin dechl'article.

Ches gins qui ordjanise'te ech concours m'ont dit ièr eq ch'étoait mie din l'sujet dmindé.

Chi ho avoait été in Picardie, j'éroai comprins qui diche'te ho. Mais lò, ch'étaoit din unne eute région ò eq ches gins cause'te frinchoés. Et mi qui comprins un molet ech frinchoés, ej dis qu'em photo étoait boinne.

Vlò achteure, ech momint ed vos moutrer l'photo. Rbéïez bin ! Et disez mi quoé qu'os in pensez.

Chi i feut eds esplications, j'in baillero un message un eute keup.

Ej précise qu'i o unne fille dech Nord qui ouvre avuc mi, qu'o comprins l'photo et ch'rapport avuc ech sujet. Et qu'o bin ri.

Malureusemint i o des gins qui sai'te mie rire.



Chi t'os ets ages ed mèriage innui, cros bec à ti.

jeudi 27 octobre 2016

Edjalité onme et fanme

... achl'ouvrage ?

J'ainmeroais bin vir ho !

Feut eq j'attinche echl'innée deus-mile-chint-quater-vint-sis.

Os in rcauserons.

Chi Diu l'vut.

Corage à tertout.

mercredi 26 octobre 2016

Atcheuillir eds etringers

Tertout in cause edpi quèks moés, et surtoute edpi quèks jours, vu eq ches étringers qui sont à Calais vont ête inmnés din toute l'Frinche.

Ièr, j'o vu chu internénet qu'unne tiote conmune ed Mayenne alloait in accepter unne chincantainne.

Mais chu l'photo dechl'article, i avoait des vakes vu ed drière, et unne qui pichoait.

Bel atcheuil prévu !

mardi 25 octobre 2016

Kmint jou eq min frère s'lonme

Conme toudi edpi quèkes moés, ach moés d'eu, après ête pèrtie in vagances, j'o prins ch'train pour aller ouvrer deus jours à Marseille. Conme ches eutes smangnes ò j'ouvre.

Mais lò, ej su mie bin.

Adon, je rprinds ch'train pour rintrer amon mi.

Pi, avant ed rintrer amon mi, ej vu aller vir min séruzyin. Mais, ò don qui reste ?

Pour m'aidier, ej vo appeler min frère avuc min téléphone. Mais, kmint jou qu'i slonme ?

Qu'ale conte l'fanme qui o alintour ed quarante-chonc ins.

Ale étoait réüsse, maflée. Ale s'o arté d'ouvrer miu d'un moés, n'pouvoait pu causer, mner s'voéture et o perdu unne boinne pèrtie dech mémoère.

Ale o rin vu vnir, qu'ale dit.

Sapré mau d'achteure !

Mi, j'o esplitché à l'fanme que quanq ej tchitte min ouvrage, j'o défini ; J'inméne rin amon mi pour ouvrer.

Eq tous ches gins qui ouvre'te (granmint !) pense'te à leu vie, leu conjoint, leus éfants, leus pèrints.

lundi 24 octobre 2016

Ches bananes fouées

Pour  foaire des bananes fouées, feut des bananes , unne païèle et un molet ed boin rhum.

Os mettez vos bananes din l'païèle bin keude, chu ch'gaz o ch'fu din l'tchuisine.

Quèkes minutes aprè, os versez ech rhum et os i mettez ch'fu. Os avez adon des bananes fouées. Fin boin à minger.

I o vint-sèt ins, quanq m'fanme attindoait un papar et qu'ale dvoait rester din chin lit, j'i amnoais l'païèle, avuc ches bananes in route à asir, à chin lit.

Quanq ej mé ranmintuvoée ho, ej mé dis eq j'éroais janmoais du. Ièr, j'o apprins qu'un viu étoait mort in funmant din chin cado roulant. I s'avoait indormi.

Et minme in appuyant chu ch'télé-alarme, il o mie pu ête seuver.

Vivemint novimbe.

dimanche 23 octobre 2016

Quanq un gloute cause

L'eute jour, un tchuisinier disoait que quanq il tchuisinoait des cèpes avuc du pichon, il ainmoait bir avuc du Pommerol.

Et il ajoutoait :

-"Quanq ch'est ho, à génoux, ech bon Diu passe."

J'o truvoé ho fin bieu conme espression.

Et vos ?

Boinne tcheuillète à ches gins qui chi connoai'te in cèpes, pleurottes et girolles.

Boin accion à ches gloutes.

Boin diminche à ches nouvieux pèrints, à m'nouvèle tiote nièce et à tertous.

samedi 22 octobre 2016

Ech madgète de msieur Sedjin

Il étoait un keup, un cinsier ed ches alintours ed Moreuil, msieur Sedjin, qu'avoait unne madgète.

Ech madgète, i l'avoait lonmé Noérode, pour rire, vu qu'ale étoait blanke conme ches nèges, vu qu'ale étoait dech race ed Gessenay, étou lonmée race Saanen.

Qu'ale étoait bélote, Noérode, avuc ches cornes, ech tiote bèrbiche et ches longs poèilles blancs.

Et s'madgète, i l'avoait mise din un grind pré d'ò qu'ale voéyoait l'Arve, ches trains qui vont ed Montdidier à Longueau in passant pèr Boves o ed Longueau à Montdidier in passant pèr Moreuil, et ches bos ed Morisel.

Ah, ches bos ed Morisel ! Ech Bo dech Cros Etre, ech Bo d'Anchin ! Qu'ale ainmeroait aller i gimbader conme l'font ches éfants qui pèrt'te avuc leu bicyclète.

Mais ches éfants n'i vont janmoais tout seu, vu eq leu pèrints n'vu'te mie, et n'pense'te mie à inmner Noérode avuc eux.

Put qu'mantcher, minme chi ches galibiés vouloai'te inmner Noérode, msieur Sedjin n'voudroait mie. I vut surtoute mie eq Noérode voéche din ches bos.

I pense à ch'leu qui, li, i est, din ches bos.

Un jour, chin onke qui s'lonme étou msieur Sedjin, qu'o unne madjète blanke qu'i lonme Blantchète, et qui reste din ches Alpes i avoait téléphoné :

- "Bojour, ichi ech nu à Forcaltchier. Pourroète-vos m'passer ech uit à Moreuil, chin vos kmander ?"

Et l'inter i avoait passé.

- "Bojour min nveu, ch'est tin onke Mile, ed Forcaltchier. Kmint qu'ha vo ? Ej t'appelle pour t'dire qu'ete madgète, feut mie qu'ale puche aller din ches bos ; I o p't'ête des leus. Mi, j'o djò troés madgètes qui sont janmoais érvenues."

Edpi, msieur Sedjin del Sonme foaisoait atincion à Noérode.

Mais quanq minme ! Un jour, Noérode pèrtit. Os savons mie kmint qu'ale o foait, mais ale o pèrti.

Vu eq msieur Sedjin n'vouloait mie qu'ale voéche din ches bos ed Morisel, ale pèrtit din ech Bo ed Sénécot.

Troés jours qu'ale s'pronmnoait. Troés jours eq msieur Sedjin truchoait din ches bos ed Morisel et alintour.

Et ch'troésienme jour, un diminche, un leu arrivo dvant Noérode. I s'arte et rbée l'madgète. Ale le rbée étou et s'dit eq ch'est ech leu. Adon, ale déchide d'i moutrer qu'ale o mie l'freusse et fonce ndan pour i bailler des keups ed corne. L'eute l'mord un o deus keups, pi tchait. Il est mort.

Noérode est fin ureuse, mais o invie d'ertorner amon msieur Sedjin. Et ale i rtorne.

Quanq echt onme l'voét, il est, li-étou, fin ureus et n'indjeule mie l'madgète.

Deus jours aprè, din ch'Courrier Picard, os pouvoème lire in premiere page dech gasète :
"Ches cacheus ed Castel ont rtruvoé un ed leus tchyins tué pèr unne bète mystérieuse qu'éroait deus grindés dints fin pointues. Soin à vos et vos galibiés !"

Coèr innui, os disons à ches éfants ed Castel et alintour ed mie aller juer din ch'Bo ed Sénécot. Mais os leu disons eq ch'est vu qu'i o p't'ête coèr eds obus ed ches deus djerres, et mie vu qu'i o toudi unne bète qu'os avons janmoais ertruvoé.

vendredi 21 octobre 2016

Pour vive ureus

... vivons mucher.

Qu'i n'o qui di'te.

Ej su mie seur qu'ho fuche vrai ! Mi, pèr eximpe, toudi muché, ej pourroais mie foaire ed photos. Et j'sro mie ureus.

I n'o qui di'te qu'i feut vive tout seu. Pour ête ureus.

Coèr un keup, busons.

Diu o cré l'fanme pour qu'Adam fuche ureus. Don, mi, ej comprinds d'ho qu'i feut qu'un onme et unne fanme vi'te à deus pour ête ureus.

Ch'est seur qu'i feut, dech keup lò, qu'is s'ainme'te. Chin quoé, h'est mie possibe. D'ête ureus.

Boin ! Admettons qu'is vi'te insanne. Feut alorss admette étou qu'i des keups, h'est mie tout rose.

O bin, i n'o qu'ont granmint ed canche.

jeudi 20 octobre 2016

Min bros à keuper

Un séruzyin contoait lindi :

- "Ech gin eq j'o imputée n'pouvoait mie poaiyer chin taxi."

Eroait fallu i penser avant. Qu'ej dis.

mercredi 19 octobre 2016

Un onme est mort

Malureusemint, tous ches jours, eds onmes, des fanmes et eds éfants meur'te. Din ch'monde, in Urope, in frinche.

Din ch'Nord, pèr eximpe.

Mais i n'o qu'ont moinss ed canche ! Minme chi tertous sont morts.

L'eute jour, un onme est mort, vu qu'il avoait avalé chin dintié ; Chti-chi est resté coinché sis jours din chin gasio, avant qu'echt onme meurche.

Feut mie rire, vu qu'echt onme est mort, mais ho m'baille invie.

mardi 18 octobre 2016

Quoé foaire ed ches vius canteus

Ch'est quoé qu'ej mé dminde innui.

I o quèks jours, ches canteus inglés et anméritchins ed ches innées mile-nu-chint soéçante ont canté insanne in Californie. Ches Pierres qui roule'te, ches qui, Neil ech jonne et d'eutes s'sont rtruvoé.
Ho foait granmint plaisi à ches gins qu'ont pu i aller, vu eq ch'est des boins canteus et qu'o les rvoéront mie granmint, fuchons honnete.

Judi, ech Bob Dylan, qu'étoait étou in Californie avuc ches conmarades quèks jours avant, o erchu ch'prix Nobel ed littérature.
Ej précise, pour ches gins qui n'connaisse'te mie, eq chin ouvrage à li, ch'est canteu.  I sanne qu'il o ieu ch'prix, vu qu'il écrit li-minme ches canchons.

Etpi, i o des jornaleus frinchoés qu'ont foait unne sapré cacouille à ches gins qui les rbé'te à l'télévision : is ont causé d'unne interprinze frinchoése ed voéture qu'alloait imbeucher mille gins, in montrant eds images d'un boin canteu qui s'lonme conme echl'interprinze, mais qui s'écrit mie conme echl'interprinze et qui, li, n'imbeuche mie ed gins..

Ej croés, malureusemint, qu'achteure, i o un jornaleu qui trache à ouvrer. I vo p't'ête ête ureus d'aller vir echl'interprinze ed voétures pour obtenir un ouvrage. Ho sro p't'ête malaisié, vu qu'ièr unne eute interprinze ed voéture o annoncé qu'ale alloait mette deus-mile gins à joke.

lundi 17 octobre 2016

Des mineus pèrt'te

... in Inglétère.

Is vont tchitter ech région dech Nord-Pas-ed-Calais.

Qu'i pèroait !

Ches jornaleus di'te qu'is sroai'te unne vintainne.

Qué brin !

Ej croéyoais qu'i i avoait pu ed mines et ed mineus din no région. J'apprinds qu'in vrai, i n'avoait coèr quèks uns, et vlò qu'is pèrt'te in Inglétère. Ej su granmint déchu.

O j'o rin comprins !

dimanche 16 octobre 2016

Ches vakes rbé'te

... ches trains qui passe'te.

Mais ches gins ainmeroai'te, des keups, eq ches trains s'art'te din leu ville pour pouvoèr monter ndan.

Ches pour ho eq sinmdi, aprè-nonne, quater-vint gins, et unne vake qu'is avoai'te inmnée avuc eux, ont manifesté din unne tiote ville ed ches alintours ed Toulouse ; ches trains i passe'te mais n'art'te mie.

Is pouvoai'te foaire ho, vu eq leu étchipe ed fotbal avoait jué et gaingné, pour un keup, ech verdi au vèpe, et eq leu étchipe ed rugby juoait achteure lò in Irlande et mie à Toulouse. Don, sinmdi après-nonne, adon qu'i foaisoait bieu, is étoai'te libes. Minme chi is éroai'te p'ête ainmés rbéïer ech rinconte chu unne télévision.

Mi, ej truvoe eq ch'est unne fin boinne idée eq d'avoèr pronmer unne vake. Surtoute unne vake qui sanne ête vnue ed Montbéliard, et qui o p't'ête invie d'érpèrtir din chin bieu poaiyis !

samedi 15 octobre 2016

Et m'mère

... , quoé qu'ale dvient ?

Qu'ej mé dminde.

Qu'ej vos conte.

L'eute jour, ches cadoreus ont arté onze gins inter Him et Péronne, vu eq ches gins trafitchoai'te ches drogues interdites. Et pèrmi ches gins, i avoait chonc fanmes.

Vu eq j'o mie téléphoné à m'mère, et qu'ale nan pu, n'm'o mie appelé, edpi quèks jours, ej mé dminde chi des keups ale sroait mie pèrmi eux.

Vo falloèr qu'ej voèche l'vir.

vendredi 14 octobre 2016

Béto démuchés

Quanq i avoait ech djerre froéde, din ches innées soéçante, ches anmeritchins avoai'te construit unne tiot ville scrète, i avoait eds appèrtemints et minme unne église, dsou ches tères, ach Groenland.

Vu eq ch'étoait l'djerre droéde et vu qu'i avoait granmint ed glace dsu ches tères, ach monmint lò.

Mais l'djerre froéde s'o arté, ches realations inter l'Est s'sont rekeuffées.

Et ches glaces étou ont rékeuffé. Don, granmint disparues !

Dech keup, l'ville dsou ches glaces n'est pu vraimint dsou ches glaces.

Quoé foaire ?

Mi, ej leu propose ed foaire eds ôtels.

Et ti, min boin lecteu, quoé eq tu dis ?

jeudi 13 octobre 2016

J'i o dit troés mots

Lindi au vèpe, aprè l'rinconte ed fotbal inter ches frinchoés et ches gins ed ches Poaiyis-bos, echl intraineu dechl'étchipe ed Frinche o espliqué quoé qu'il avoait dit, avant l'rinconte, ach jueu qu'o foait gaingné esn étchipe :

- "J'i o dit troés mots ; ej té foais fiate".

Et l'eute l'o cru, qu'i sanne.

Tertout o vu qu'i avoait dit quat mots, et nan troés.

Mais tertout n'est mie intraineu o jueu ed fotbal.

mercredi 12 octobre 2016

Ech cangemint ed calendrier

J'o apprins ièr, timpe au matin, qu'in Arabie Séoudite, is alloai'te canger ed calendrier. Ech calendrier ed l'Hégire vo ête rimplacé pèr not calendrier.

Pourquoé ?

Achteure, din leu calendrier, is ont douse moés, conme nos. Mais ches moés sont un molet moinss long. Et chu unne innée, ho foait onze jours ed moinss.

Vu ch'crise qu'est arrivée din leu poaiyis quanq ches prix dech gasole ont raboaicié, et  p't'ête quanq no présidint i o allé, leu roé o déchidé ed foaire canger ch'calendrier, pour foaire ouvrer ches gins onze jours ed puss. Mais chin les poéyer miu.

Mi, ej propose à ch'roé, d'achinde ches innées perdues in foaisant ouvrer ches gins un moés ed puss pèr in chin ête poéyé. Os sonmes in deus-mile-sèse, et eux, in mile-quat-chint-trinte-uit. Ho foait chonc-chint-soèçante-dis-uit ins à achinde. Et don, sis-mile-nu-chint-trinte-sis moés.

Ho vo p't'ête mie ête possibe ed les foaire ouvrer tout ho chin les poéyer. O fin malaisié.

Mais vu eq ch'est l'crise !

Corage !

mardi 11 octobre 2016

Premier dépèrt

Un onme est pèrti diminche avuc un batieu foaire ech Vendée Globe.

I m'sanne eq ch'est ech premier à pèrtir, vu qu'in vrai, ech course lò kminche alintour dech tchinze novimbe.

Mais li, i reste à Toulon.

Feut don bin qu'il voéche à ches Sabes d'Olonne avuc chin batieu. Pèr ches voées, o pèr ches mers. Et li, il i vo pèr ches mers. Il o un moés pour arriver ach vrai dépèrt, in passant pèr Gibraltèr.

Boinne canche à li. D'unne, pour djò arriver in Vendée, et ed deus, pour aprè définir chin tour dech monde.

lundi 10 octobre 2016

Des nouvèles d'em fille

... qu'est arrivé à Kraznoyartskch , in Sibérie.

Ale vo bin.

In vrai, ale vo miu.

Qu'ej vos conte.

I o uit jours, ale est pèrtie ed Roéssy avuc chint euros in poke. Ches billets d'avion et ech cambe d'ôtel à Mosco étoai'te djò poéyés. Ureusemint, vu qu'ej vos avoais écrit qu'es carte bantchère n'fonctionnoait mie.

Ale arrive à Mosco, et m'fanme et mi contactons s'banke pour résoude ches problinmes ed carte bantchère.

- "Feut eq vo fille nos appelle" qui dise'te ches gins del banke.

- "Ale est in Russie", qu'os leu disons. "Ho veut granmint qu'ed vos appeler ed Russie."

- "Feut eq vo fille nos appelle" qui dise'te coèr ches gins del banke.

Adon, no fille o appelé ed Russie.

Deus jours aprè :
- "Ch'est résolu" qu'is i ont dit.

In vrai, rin. Brin !

No fille est arrivé judi à Kraznoyartskch.

Ej vos mie vos conté kmint qu'ale o brai, vu eq ches chint euros kminchoai'te à fonde, et djeulé din chl'aéroport ed Mosco, vu qu'ale étoait in prousse.

A Krachnoïartskch, ech judi, ale o kminché pèr bailler des cours à des jonnes, pi o allé din esn appèrtemint. Qu'est fin bin keufé. Ureusemint ! Vu qu'il injle djò alintour ed moinss quat, moinss sèt degrés.

Et m'fille o rkminché à sourire, vu qu'ale dit qu'ale put mie coésir eute cose.

Ièr, ale o quanq minme ri ganne : ale o ieu s'facture ed téléphone. Troés-chint-dis-uit euros et des bérouettes avant ech chonc octobe, pour unne eure trinte quat, qu'ho o duré. Et djò chint-quarante-sis pour l'prochainne facture. Tout ho foait troés moés ed gainniage in Russie !

Ch'est seur qu'el banke vo coèr intinde causer ed nos granmint.

Pour ches gins qui connaisse'te et ainme'te m'fille, seuchez qu'ale o internénet. Toudi l'minme adresse pour i invoéyer un message. Ho i fro granmint plaisi.

Merchi d'avinche.

Et coèr un grind merchi à min cousin ed ches alintours ed Roéssy.

Becs à tertous.

Soin ! J'os surtoute mie écrit echl'article lò pour erchuvoèr ed l'argint pour m'fille. 

dimanche 9 octobre 2016

Pauves jueus

Verdi, ches jornaleus n'ont ont apprins eq troés jueus ed rugby avaoit ieu du mau.

Eq j'o comprins, vu qu'is avoai'te prins des drogues pour pouvoèr juer l'finale dech championnat ed Frinche.

Ch'est bin malureus, vu eq ch'est des boins jueus qu'avaoi'te gaingné, nouvieus-zélindoés, o fin bin jué, argintin, ach daraine keupe dech monde ed rugby, in deus-mile-tchinze.

J'o busé et comprins pourquoé qu'is avoai'te ieu ches maus. Ej vos esplique.

Ches tros gins, chi os avez bin lu quoé eq j'o écris, vien'te dechl'émisphère sud, ò i foait bieu et keud. Et is ju'te din chl'émiphère nord, lò ò i foait froéd. Minme achl'ernouvieu, des keups, conme à ches moés ed moai o juin deus-mile-sèse.

Mi étou, j'o du mau, achteure : j'o failli incorser unne couleuve.

Becs à tertous, et boinne rinconte ed rugby.

Chi t'os tes ages innui et eq t'es min bieu-frère, ej t'offre uit jours ed vagances, dech chonc à nu déchimbe, pour ti tout seu amon m'bèle-mère préférée.

Cadieu pour ti, et ches spécialisses : gannes o rouves et noèrts ?



samedi 8 octobre 2016

Is vu'te rin

L'eute jour, j'o faoit un grind voéyage pour aller vir des vakes, et des berbis, alintour ed Clermont-Ferrand. A ch'Sommet ed l'élevage, qu'ho s'lonme.

J'in o vu granmint, et des fins bèlés, ed vakes et tors. Surtoute ches vakes Aubrac, avuc un molet ed noèrt alintour ed leus zius.

Quanq i o eds animaux, i o leus cinsiers qui vien'te avuc.

Et i o d'eutes cinsiers qui vien'te rbéïer.
Ej précise eq mi, ej su mie cinsier, minme chi j'ainme granmint rbéïer ches vakes et ches berbis.

Mais j'o vu étou des gins qu'avoai'te collé unne affiche chu unne eute pantchèrte.


Feut qu'ej vos traduiche in picard : "Baillez-nos ed l'argint, n'dmindez mie quoé qu'os in front !"

Surprindant ed vir ho ! Mais des cros nikdouilles, o eds arlands, i n'éro toudi.

vendredi 7 octobre 2016

Vnez in Bretanne

Os vos ranmintuvoéte min article ed déchimbe deus-mile-tchinze chu ech Beu-dech-tère !

Os vos ranmintuvoéte étou qu'ej vos o djò écrit eq j'avoais, pèrmi vos, des russes qui rbéïoai'te min blog.

J'in o l'preuve.

Ech vint-deus septimbe, deus avions russes ont étè vu pèr-dsu el Bretanne. Seuremint des lecteus !

Mais i o des gins qu'ont du mie ainmer, vu qu'il leu o étè dmindé ed pèrtir. P't'ête qu'is foaisoai'te granmint ed bruit.

Jou qu'is ont ieu ech tans ed foaire ed bèlés photos ?  Dech l'Ile longue  ?

J'espère quanq minme eq mes boins conmarades reusses liront coèr min blog.

Chi t'es din ch'paoiyis-lò, bec à ti.    

jeudi 6 octobre 2016

J'ainme tes génoux

Lò-aprè, os pourrez lire cjes paroles d'unne canchon d'Hinri Salvador. Ho fro un molet ed tchulture et ho cangera ed ches eutes articles.


Ah, oh élève tin cotron..
Nan, nan, nan, puss heut, puss heut..
Ah nan ! nan, moinss heut,
Ah vlò ch'est cho !
Achteure, enn bouge mie,
Enn bouge mie, hein ?
Reste conme ho

J'in o connu eds bélottés filles
dis keups puss bélottés eq ti, j'in o connu
Avuc des corps perzurès
Qui n'm'ont janmoais foait echl'effet
Eq tu m'foais, m'foais, m'foais, em aïe
dès eq tu t'assis, ej su foait.

Oh j'ainme, j'ainme, j'ainme
Oh j'ainme tes génoux
Cho, j'adore tes génoux
Ah ouais, j'ainme, j'ainme, j'ainme, j'ainme, j'ainme, j'ainme
J'ainme tes génoux,
Ech reste, ej m'in moque.

I o des photos, i o des tableaux,
Ed tes bieux génoux, pèrtoute chu ches murs,
I in o ach plafond,
I o des génox plein l'moaison.
J'in o minme coller chu not bieu plantcher,
Aïe, pour ête chu tes génoux

Et j'ainme, j'ainme, j'ainme
Aïe j'ainme tes génoux
Et pèr dsus toute
Oh, j'ainme, j'ainme, j'ainme, j'ainme, j'ainme, j'ainme
J'ainme tes génoux,
Is m'rinde'te nikdouille.

Tes tiotés tètes s'tienne'te bin,
ech bos ed tin dos est juste conme i feut,
Mais tout cho m'laice froéd,
M'interesse mie,
Ech reste étou, vu qu'ej l'o djò vu,
Ho foait qu'ed me gêner,
Ho m'impêque d'em conchintrer
Ej te dis.

J'ainme, j'ainme, j'ainme, ah aïe
J'ainme tes génoux
Et rin eq tes génoux
Oh, j'ainme, j'ainme, j'ainme, j'ainme, j'ainme, j'ainme
J'ainme tes génoux,
Ech reste, ej m'in moque.

Ah, moutre-mi tes génoux,
Oh ! cho ! Cho ch'est du génou,
Du bieu, du vrai génou !
A génoux dvant tes génoux,
Je rbée tes génoux, pi ah
Aaaah aaaah

J'ainme, j'ainme, j'ainme, aaah
J'ainme tes génoux
A chatchun ches goûts
Ah, j'ainme, j'ainme, j'ainme, j'ainme, j'ainme, j'ainme
J'ainme tes génoux,
Et j'in su jalous.

Quanq os allons s'promner chu ches Cans Elysés
Mi ej mèrche à quat pattes pour miu les vir
Et quanq un cadoreus m'dminde pourquoé, kmint,
J'i dis "os intchietez mie,
Ej sais pourquoé ej mèrche conme ho".

Oh j'ainme, j'ainme, j'ainme
J'ainme ches génoux
Ej les suis pèrtoute
Ah, j'ainme, j'ainme, j'ainme, j'ainme, j'ainme, j'ainme
J'ainme ches génoux,
Mais ej su mie nikdouille.

J'ainme, j'ainme, j'ainme ches génoux
Tnez, raboaiciez-vos
J'ainme, j'ainme, j'ainme ches génoux
Rbéïez-mi ches génoux
J'ainme, j'ainme....



mercredi 5 octobre 2016

Prinde un keup ed jonne

Quanq j'étoais tiot et jonne, j'ainmoais juer avuc ches trains electriques, din m'moaison. Construire unne station in tiotes briques ed Lego, mette ech train in route à torner. Des keups, le rprinde, vu qu'il tchaisoait ed tans in tans.

Ej croés eq not présidint, o chin minisse, is ont mie ieu ed tiots trains pour juer, o is ont mis ieu ech tans ed juer avuc, vu qu'is vouloai'te djò édvenir présidint, o minisse.

J'écris ho, vu qu'is vienne'te d'acater des trains qui vont fin rade, pour seuver unne interprinze del faillite.

Dech keup, echl'interprinze éroait ed quoé ouvrer dis-uit moés. Et aprè ? Feudro acater d'eutes trains. Et attinde coèr dis-uit moés !


Quoé qu'est seur, ch'est eq din dis-uit moés, os érons canger ed présidint et ed minisses, et qu'os érons des bieus trains qui pu'te rouler fin rade mais qui rouleront mie fin rade, et qui veu'te granmint d'argint.

Et ch'est nos qui poairons.

mardi 4 octobre 2016

Pauves papars

J'o apprins i o quèks jours qu'un papar chu vint avoait unne mère ed miu ed quarante ins.

Magines !

- "Jou eq ch'est ete taïonne qu'est vnue ièr t'prinde à l'école ?"

- "Nan ! Ch'est m'mère."

Ah ! Ch'traumatisme pour echl'éfant ! Ej pux vos in causer, vu eq j'o ieu un conmarade à qui ch'étoait arrivé.

Un papar chu vint ! I o vint ins, ch'étoait un papar chu quarante. Don, ho s'améliore mie.

Ches fanmes ont eds éfants à quarante ins, vu qu'avant is vu'te ouvrer et édvenir responsabe din leu interprinze. I feut coésir, mais chi mie conme ho eq j'éroais foait.

Mi, ej truvoe ho trisse pour ches tiots. Et ches pèrints sront p't'ête janmoais taïon. Et ho ch'est trisse pour ches pèrints. Mi qui o chincante ins et qui attind granmint d'ête taïon, ej pux vos l'dire.

lundi 3 octobre 2016

Ech méchante jornée

Sinmdi, diminche, lindi, mardi, merkerdi, judi, verdi del smangne qu'est définie, il o foait bieu. Solé.

Diminche, lindi, mardi, merkerdi, judi, verdi del smangne qui vient, il dvroait foaire bieu. Solé.

I o qu'ièr, sinmdi, ò il o plu.

I o qu'ièr, sinmdi, ò m'fille et ches conmarades ed fatchulté organisoai'te unne jornée d'intégration.

I o qu'ièr, sinmdi, ò m'fille, unne eute, chtole-lò qui ch'o mérrié in juillet, et chin onme, pouvoai'te em rchuvoèr pour qu'ej les aide din leu gardin.

Sinmdi est passé.

Ej croés qu'el jornée d'intégration o étè foaite et eq ches jonnes ont dormi din des tentes et dsou l'pleuve.

L'jornée din ch'gardin attindro quèkes smangnes. Mais j'iro.

Mi, j'o ouvré din m'moaison toute l'jornée.

Et vos ! quoé qu'os avez foait qu'os pouvèche m'écrire ?

J'o unne fille qui dvoait ête ureuse ièr au vèpe, après avoèr ieu ed misère à nonne, ch'est m'première fille ; Ale pèrtoait à Krachnoyarktchs. Achteure, ale doét ête à Mosco.

Boin lindi à tertous, et becs à mes filles. Et mes fius. Et m'fanme.

Kmint qu'ale doét ête bin fré, achteure, ech tente eq j'o prêté à m'fille !