Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libe d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

vendredi 30 septembre 2016

Foaire un meube

Din unne maoison neuve, avuc unne soée et unne étchère, l'est aisié ed foaire un meube din un coin del tchuisine o d'unne cambe, pèr eximpe.

Mais din unne vieille moaison, feut vraimint avoèr un nivieu. Rin n'est droét, rin n'est horizontal et rin n'est à quater-vint-dis dégrés.

Don, ch'est fin malaisié.

Avuc un beu ed bo, tu pourros avoèr un côté ed droét et l'eute, tout à tailler, pour qu'i fuche bin avuc ech mur.

Aprè, quanq tu sais ho et eq t'os du corage, in premier, feut apprinde l'patieinche à t'fanme : pèr eximpe, feut qu'ale seuche attinde sèse ins pour avoèr ech meube qu'ale vut.

Et ch'meube qu'ale vut eq tu foaiches, ch'est avuc des uis qui sont mie droétes, mais tordues. T'es obligé ed foaire avuc, vu eq ch'est ches pèrints à t'fanme qui t'les ont baillées !

Quanq eq t'os kminché, feut coèr, et toudi, del patieinche. Mettons deus ins, pèr eximpe.

Conme ej l'o écrit ach début, feut un nivieu, unne étchère. Et del technique. Ho s'apprind in faoisant , et in busant granmint. 

Mi, j'o kminché pèr prévoèr ches uis.










Pi, quèks moés aprè, ej mé su mis à foaire echl'incadremint dech meube pour l'définir un jour. Avuc martieu et cisieu à bo. Rbée !


 

 








Et un jour, t'os casi défini. Et lò, t'es ureus. Granmint ureus, et fièr ed ti. I o coèr quèkes coses à foaire pour avoèr vraimint défini, mais ech puss cros et malaisié à foaire est foait.












Et t'fanme est ureuse. O dvroait l'ête.

Corage à tous ches foufteus.

jeudi 29 septembre 2016

El berlure ed not Présidint

P't'ête eq vos avez lu, not Présidint o écrit à Rinanna, unne canteuse bèrbèdiène.

I i o écrit, vu eq l'eute i avoait dmindé quèke cose chu internénet chu un programme d'éducation din des poaiyis in djerre o ò i o des catastrophes, malureusemint.

Tertous sait qu'os pouvons écrire ach Présidint, minme chin mette ed timbe,  toudi ho ed gaingné. Achteure, os pouvons minme foaire ho pèr internénet.

In principe, ech présidint répond. Qu'i m'sanne !

Ch'est pour ho qu'ej dis qu'ech présidint o foait unne berlure. Unne ed puss, eq j'éroais invie ed préciser.

Il o foait unne berlure, vu qu'i répond à Rinanna qu'i avoait écrit i o quèks jours adon qu'il o mie répondu à min fiu qui, li, i avoait écrit i o miu ed deus ins.

Min fiu espère et attind toudi. Mais, i s'lonme mie Rinanna o Mitché Jasson.

Ej précise qu'edpi troés moés, min fiu o l'droét ed voter.

Bec à tertous.

mercredi 28 septembre 2016

Ech canteu qu'o busé

Magine !

In mile-nu-chint-soéçante-dis-nu, un canteu, Nanard Lavilliers foait unne plate qui s'lonme "Pouvoèrs".

Achl'époque-lò, i sanne qu'il o mie vindu granmint ed plates. quoé qu'est seur, ch'est eq mi, ej me ranmintuvoes mie de ch'plate lò.

Achteure, ech canteu rsort ch'plate, in disant eq ches canchons sont toudi vraies.

Chu ch'keup-lò, ej pense qu'il o surtoute truvoé kmint ouvrer aisiémint.

Quanq i éro des nikdouilles pour acater !

Minme chi j'ainme bin ech canteu, j'o ech droét ed causer et d'écrire ho.

mardi 27 septembre 2016

Fin court

Osez l'anmour,
Osez ches projets,
Osez echl'avinture,
Et vu qu'ale est toudi fin courte,
Osez l'vie !

Ech pu grind dinger din l'vie est d'enn mie ristcher.
Chti qui risque rin, n'foait rin, n'o rin, et n'est rin !  

Vu un jour chu un blog qui s'lonme "ech vie est fin courte pour ête tiote".

lundi 26 septembre 2016

Zèfe ech mawais disoait

- " Chi din tous ches gins eq j'o foait tuer o qu'is sont morts à keuse ed mi in Sibérie, i n'o chonc pèr chint qu'étoai'te coupabes, ch'est djò fin bin."

Don, i savoait qu'i foaisoait moérir eds innochints. Miu ed quater-vint-tchinze pèr chint ed ches un ò deus millons ed gins qu'il o invoéyés din ches cans pour "ouvrer" o qu'il o foait tuer !

Un conmarade à li disoait :
- "I feut mie seulemint éxétchuter ches coupabes ; Echl'éxétchution d'innochints impressionne granmint miu."

Ej vos o causé d'un onme qu'est mort i o miu ed soéçante ins, mie ed quoé qu'i o achteure, malureusemint toudi, din d'eutes poaiyis d'Urope.

dimanche 25 septembre 2016

St Djérin

Ièr, ej vos o causé dech Lac ed St Djérin.

Qui est St Djérin ?

Ch'est unne gin qui reste in Savoé et qu'est érconnu conme ech patron ed ches troupieus.

Vu qu'il est ed Savoé, l'o toudi un coutieu, opinel, din ch'poke. Ch'est conme ho qu'il o pu tailler s'tète chu un beu ed bo qu'est chu ch'côté dech Lac à chin nom et ò tu pux t'promner. Et li étou, qu'i sanne.


Ech patron ed ches troupieux, ch'est seur. Ej l'o vu. Os étoème, m'fanme, m'fille et mi din ches montaingnes quanq os avons vu un cros troupieu suive un onme.


Un onme tout seu, chin tchyin pour l'aidier. Ch'étoait, j'in su convaintchu, St Djérin.

Pour traire, vu ech nombe ed vakes, ej sais mie chi d'eutes gins vien'te l'aidier.


Ej pense eq ouais. Et ti, quoé eq tu croés ?

Boin diminche à tertous.

samedi 24 septembre 2016

Kmint bin kmincher echl'apréseu

... et kmint bin définr echl'étè ?

Mi, pour bin définir echl'étè qu'étoait merkerdi, j'o pèrti in vagances. Feut ch'qui feut. Et vu qu'i foaisoait bieu, ch'étoait ech boin momint.

Avuc m'fanme, os sonmes allés ach Lac ed St Djérin qu'os savoème mie, avant ed pèrtir, qu'il existoait.

Ch'est fin bieu. Rbée !


Lò, chi tu vux, tu pux foaire granmint ed promnades, avuc ed boinnés keuchures à tes piés.

Chu t'droéte, quanq tu rbées ech lac, t'os ech Col del Louze, et drière, ches tiots lacs del Timpête. T'i est in deus o troés eures.
A droéte, ech Col del Louze
A gauche, ch'est lò qu'os avons kminché echl'apréseu, avuc m'fanme et unne ed nos filles qu'étoait arrivé.

I o unne voée qui t'inmène ach Lac ed ches Fées et ch'Cormet d'Arêches.

Mais os avons torné avant ho chu not'gauche pour aller ach Col dech Couvèr. Deus-mille-deus-chint-quater-tchinze mètes de heut.

Quanq t'artes ete voéture, t'os étou deus eures ed mèrche. Et ach col, tu voés ech Lac ed Roselend et ch'Lac ed St djérin.
Ech lac ed Roselend, vu dech Col dech Couvèr

Etpi, quanq t'es din ch'poaiyis lò, chi t'ainmes ches vakes, t'in voés.


J'espère vos avoèr baillé l'invie d'i aller.

Bec à tertous.

mercredi 21 septembre 2016

Unne pauve gin

Ièr, timpe au matin, j'arrive din unne station et i o unne gin, eq j'avoais janmoais vu, qui m'dit bojour et qui m'dminde :

- "Disez-mi ! J'o m'mère qu'est morte et j'doés rtorner à Valenciennes. Mais j'o janmoais prins un train. Kmint qu'ej doés foaire ?"

Ed lò ò qu'os étoème, i falloait qu'i véoche à Pèris et l'traverse in métro. Mais falloait étou qu'i cange ed train avant Pèris.

Mi, pour foaire plaisi à unne gin dech Nord, j'i esplique tout.

Vlò achteure qu'i m'dit qu'i l'o mie ed carte bantchière pour acter chin billet. Qué brin !

Adon, vu qu'il avoait ed l'argint, j'i o acaté chin billet pour aller à l'eute station. I m'o rimborsé avuc ed l'argint. Et j'i o baillé un titchet ed métro et espliqué un molet kmint foaire inter l'Station ed Lyon et l'Station dech Nord à Pèris. Mais ch'est mie unne évidinche.

Echt'onme o trinte uit ins. J'espère qu'i sro bin arrivé.

Feut qu'ej vos diche étou qu'i savoait mie kmint aller chu l'voée ò chin train alloait arriver.

Pauve gin !

Adé !

mardi 20 septembre 2016

Tu rsannes

... à Roseline Bachelot.

Qu'ale dit unne fille qui ouvre avuc mi et d'eutes pour troés moés, à unne eute fanme qui ouvre edpi granmint ed tans et qu'étoait allée amon chin coéffeu.

L'fanme o étè surprinse.

Jou eq l'eute avoait dit ho pour i foaire plaisi o pour s'motcher d'ale ?

L'jonne o dit eq ch'étoait pour i foaire plaisi. Mais ej croés eq l'eute o mie comprins ho.

Feut dire qu'el tète à Roselyne .... !

lundi 19 septembre 2016

Ches jornées dech patrimoéne

Ch'étoait, conme tous ches ins, ach mitan ed septimbe. Don, sinmdi et ièr diminche.

Os avons, in Frinche, granmint ed bèlés coses à vir.

Pèr eximpe, ech musée ed Millau, echl'église ed Roubillou, din ch'Tèrn-et-Garonne, ech fort ed Portallet, ech tour carrée ed Penmar'ch din ech beu-ed-ches-tères o ech cathédrale ed Noéyon o d'Anmyin eq tout picard connoait bin.

Mais os avons étou unne pèrtitchularité : quat présidints in vie.

Ech puss viu, Giscard, o quater-vint-dis ins. Sinmdi et diminche, i foaisoait visiter chin catieu, à Estaing, din ech bieu dépèrtmint ed l'Aveyron. Estaing, ch'est ech nom dech village et étou ech nom ed Giscard. Mais ech catieu appèrtient à s'famille edpi deus-mile-chonc seulemint.

Soin ! Estaing est étou unne ville ò i o un gite, qu'étoait avant unne tiote église, pour eq ches gins qui mèrche'te chu ches Kmins ed Saint-Jacques-ed-Compostelle peuche'te dormir. Et din ch'gite lò, i o des punaises ed lit. Falloait qu'ej l'écriche, vu qu'ech merre nos o prins pour des nikdouilles quanq os sonmes passés. Et avons ieu des punaises ed lit.

Après, os avons coèr Jacques Chirac, quater-vint-troés ins. Li, pour ches jornées dech patrimoéne, l'o rintré dech Maroc pour visiter echl'ôpital del Pitié-Salpêtrière à Pèris.

Ches deus eutes présidints, ièr, reuvoai'te d'ête coèr présidint din un in et de rvir ech palais ed l'Elysée. Is reuvoai'te.

dimanche 18 septembre 2016

Ech tiot Jésus

Magine !

Unne fanme o un papar din ch'panche. I dvroait naite in déchimbe, alintour dech vint-quat.

Quanq ch'est conme ho, ches gins di'te :
- "Os allez nos foaire un tiot Jésus* !

- "Nan !" qu'ale répond l'jonne fanme. Ho sro unne Ava Gardner, unne Annie Lennox o p't'ête unne Régine.

Et ouais ! Tous ches papars qui naiche'te sont mie des garchons. Minme un vint-quat o vint-chonc déchimbe.


* Il existe deus Jésus. 
- Ech Jésus, fiu ed Mèrie et Joseph, né i o deus-mille-sèse ins, 
- Et ech Jésus qu'est unne chèrcuiterie et qui s'minge conme ech saucisson. 
Din chl'article d'innui, ej cause dech fiu, mie del chèrcuiterie.

samedi 17 septembre 2016

J'o du mau

... à min dos.

Qu'ale disoait unne jonne fille à chin séruzyin i o quèkes smangnes.

- "Kmint eq cho s'foait ?" qu'ale i dit étou.

Ech séruzyin i o répondu qu'ale alloait avir un papar.

- "Et quanq ?"

- "Béto !"

Ech lindman, ech papar, un fiu, étoait né.

Et tertout vo bin. Minme l'mère qu'o été surprinse. Deus keups, qu 'i sanne qu'ale o étè surprinse.

vendredi 16 septembre 2016

Pour vive granmint

..., i péroait qu'i feut :

"Minger conme un roé au matin,
Conme un prince à nonne,
Et conme un pauve au vèpe".

Qu'i s'dit.

Mais os êtes mie obligés.

jeudi 15 septembre 2016

Jou qu'os étoème à Pake

... ièr ?

Ej mé dminde.

J'vos esplique.

M'fanme est pèrtie diminche.

Ièr, merkerdi, don troés jours apré, un molet conme ech feusse mort dech Christ, ale o rintré. Ed Rome.

Il étoait alintour ed dis-sèt eures, et l'cloke ed l'uis d'em moaison o sonné. Ch'étoait m'fanme qu'ervenoait.

In vrai, ej sais bin qu'os étoème mie à ches Pake ; m'fanme est mie unne cloke in chucolat.

Cacouille.

mercredi 14 septembre 2016

Ches cinsiers in voéyage

Tertout o du intinde causer ed ches producteus ed lait qu'ont manifesté, ach moés d'eu, amon unne interprinze qui s'lonme Lactalis.

Fidjurez-vos eq l'eute jour, ej cause avuc unne fanme et ale m'dit qu'ale pèrt in voéyage uit jours.

- "Fin bin" eq j'i dis. "Os allez ò ?"

- "Os pèrtons avuc min onme et d'eutes cinsiers qui, conme nos, vindons no'lait à Lactalis, et unne gin d'amon Lactalis. Ch'est li qu'ordjanise ech voéyage, et esn interprinze qu'in poéye unne pèrtie."

Mi, pour rire, j'i dis :
- "Ch'est des gins bin, amon Lactalis."

L'o rin répondu.

mardi 13 septembre 2016

Rtornez vir ech fotbal

Ch'keup-chi, ch'est din l'poke : echl'étchipe ed fotbal d'Anmyin vo juer din un an avuc Pèris, Lens, ho sroait bin, et Lille pèr eximpe.

Anmyin, qu'éroait janmoais du rdéchinde in troésienme division i o quèkes innées, vo, cht'innée, gaingné ech tite in deusienme division.

Ch'est seur.

Din un in o p't'ête deus, is gaingne'te ech tite ed champion ed Frinche et don, din deus o troés ins, is ju'te avuc ches grindés étchipes d'Urope ; Ajax, Juventus ed Turin, Minchester, Barchelone...

Qu'ho sro bieu ed vir Anmyin leu explitcher kmint qu'i feut juer ach fotbal et gaingner.

In attindint, os boérons un boin keup ach moés ed moai, quanq ech tite ed deusienme division sro officiel.

Allez Anmyin ! Et eq tertout voéche au stade Moulonguet vir ches boins jueus !

lundi 12 septembre 2016

Ches kvaus et ches onmes

Ch'est ch'nom d'un film ed télévision eq j'o rbéïé l'eute smangne. Chu l'cangne picarde, vu chin nom, Arte-sèt-puss.

Un fin bieu film qui passe in Islande. Avuc des gins, islandais, qui cause'te islandais, et des kvaus.

I sanne qu'i o granmint ed kvaus din ch'tiot poaiyis-lò.

Ech film, qu'est sous-titré in frinchoés, don os comprindons un molet, est foait ed sis tiots contes qui sui'te. I o ed fins bèlés images.

Chi os avez mie vu et qu'os voulez l'vir, feut foaire avant ech quatore septimbe. Ech film foait rire, mais ej diroai eq ch'est quanq minme mie pour ches éfants.

A béto !

dimanche 11 septembre 2016

O dormir din ch'Merkintour

Tu proménes din ch'Merkintour qu'est fin bieu, et tu traches un indroét pour dormir.

T'es à ches alintours dech lac ed Castillon. T'avinches un molet din ches montaingnes. Et lò, t'intinds un leu. Adon, tu rdéchinds un boin molet in direction ed Castellane.

D'un keup, t'arrives amon un viu ed quater-vint-nu ins qu'o quat-chint ruches ed moukes à mié. Li, bin régalant, t'proposes ed dormir din un indroét ò i o ches ruches vuides. Qu'i dit.

T'es ureus ed mie dormir avuc un leu. Mais ches ruches sont mie vraimint vuides ; i o coèr des moukes à mié. P't'ête qu'ech viu les voét pu et n'les intinds pu. O i s'dit qu'i n'o mie granmint.

Tu t'joutches, et t'arrives quanq minme à dormir. Chin l'freusse dech leu.

N'in vlò d'un bieu voéyage à foaire. Et eq des filles bin ont foait.

Pour vos bailler l'invie...

samedi 10 septembre 2016

O dormir in montaingne

..., eq des keups tu t'dmindes.

Un indroét qu'est original, qui vo surprinde t'fanme ?

Ej croés qu'i n'o qu'ont achteure truvoé. Et testé.

Din des tiotés cambines, aotchées à un cabe, à troés mile mètes de heut.

Mi, ej pense qu'ho doét ête fin bieu d'ête in heut et ed vir ach solé s'joutcher pi s'déjoutcher.

Un boin conseil : prind unne boinne casake pour avir bin keud. Chi nan, i feut bin t'serrer avuc ches eutes gins del cambine.

Becs et corage à tertous.

vendredi 9 septembre 2016

Rbée bin

... et cartchule.

L'eute jour, din un compèrtimint dech train, os étoème sét onmes et unne femme.

Aprè troés stations, quat onmes dech compèrtimint sont déchindus, et mie unne gin n'o vnu. Don, os étoème alorss quat. Chi tu vux, cartchule.

Unne gin cange ed place din ch'compèrtimint. Os étoème alorss deus onmes et deus fanmes.

Bin ouais ! I o des keups, ch'est mie unne évidinche d'ête unne fanme o un onme. O de l'vir.

jeudi 8 septembre 2016

N'riez mie

Unne jonne fille ed quatore ins est morte in s'lavant din unne baignoère ; un cabe electrique o tcheu din l'ieu quanq ale s'lavoait.

Os pourroème dire qu'ale o voulu juer à rsanner ach canteu Claude Franchoés.

Mais ech canteu o voulu touché unne lampe adon qu'el jonne fille n'vouloait mie moérir. Et ale est morte. Et ale étoait fin jonne.

Don, merchi ed mie rire.

mercredi 7 septembre 2016

Ech méchant train

Ièr, alintour ed dis-sèt eures, un train pèrt. Dvoait pèrtir, mais avoait un tiot problinme ed mécanic.

Ech train pèrt tchinze minutes après echt'eure prévue.

Pi, i s'arte vint minutes din unne station, vu qu'unne gin o butché ech contrôleu. Ch'est vraimint mie bin ed foaire ho.

Ech train rpèrt pi s'arte coèr, vu qu'un eute train, din l'eute sins, o ieu un accidint avuc unne gin. Ches responsabes di'te adon qu'i o ieu un accidint ed gins.

Quanq ech train est ed nouvieu pèrti, pi enfin arrivé, il avoait troés eures de rtèrd.

Qué brin !

Et mi, j'étoais din ch'train d'aprè qu'avoait, dech keup lò, deus de rtèrd.

Qué brin !

mardi 6 septembre 2016

Bélote espression

Ièr, j'o m'fille qui m'téléphone qu'ale vo vnir nos vir, m'fanme et mi, in foaisant quoé qu'os appelons ed l'arte, avuc chin pouce in heut.

Mi, j'i dis qu'ed lò ò ale vo pèrtir, ho vo mie ête aisié.

Et lò, ale m'répond :

- "Ech père, feut savoèr nager din ch'brin."

Coèr unne bèle citation d'em fille, conme i o quèkes smangnes, chu ch'lanchron.

J'ainme bin ho ; ho foait granmint rire. Et buser.

Et vos ?

lundi 5 septembre 2016

Ech captaine Haddock

Qui n'connaoit mie ech Captaine Haddock, ech conmarade ed Tintin. Mie un, qu'ej pense.

O adon, ches bachi-bouzouks.

Eh bin, i o chonc scieintifiques qu'ont étudié tous ches maus qu'o ieu ech fanmeus marin.

Et ouais ! Minme pour un onme qu'o existé qu'in bandes dessinées, din tchinze lives chu vint-troés qu'Hergé o écrit et dessiné, i o des gins qui trache'te quoé qu'unne gin pouvoait avoèr conme mau. Mie croéyabe !

Et is ont truvoé.

Archibald, ch'est ch'tiot nom dech captaine, éroait ieu alintour ed dis-sèt maus pèr épisode ò qu'il étoait.  

Dis-sèt, ch'est granmint. I o ieu des maus vu qu'i buvoait du rhum o qu'i i rsanne, din chincante-uit- pèr chint ed ches cas, et pèr eximpe, des maus à ches piés o à chin nez. 

Ches chonc scieintifiques ont granmint ouvré.

Is ont étou constaté qu'ech'ménère n'avoait janmoais ieu ed mau à keuse ed ches transports. Et ureusemint pour li qu'étoait marin, feut mie l'oblier.

Pour mi, i o deus coses à rtenir :
- feut lire Tintin,
- i o des gins qu'arrive'te à ouvrer, don, p't'ête à ête poaiyer, pour lire Tintin. Chi is ont dzoin d'un sixiènme, pu'te m'téléphoner.

Boinne rintrée et boinne jornée à tertous.

dimanche 4 septembre 2016

Pèrtir in Inde

Chi os avez bin lu min blog, os savez eq j'o deus fius. Et troés filles. Chin oblier unne fanme.

Achteure, j'o un fiu qu'o deschidé ed pèrtir in Indee quèks moés.

A piés !

Il o invie, ej truvoe eq ch'est bin régalant, ed vir des gins, ed causer avuc eus. Seur, il ne dit mie, qu'il ainmeroait qu'ed tans in tans, ches gins i baille'te à minger et i pret'te un lit din leu moaison.

Chin quoé, il dormiro dsou unne tiote tente qu'il o et din un duvet. Mais, vu qu'os sonmes in septimbe, qu'i mèrche et monte din des voétures o des cars, et qu'i vo vers l'est, il est granmint possibe eq des keups, il o froéd. P't'ête minme qu'i voéro ches nèges !

Don, chi os allez à Tirupati, Mysore o Visakhapatnam, pèr eximpe, edpi l'Frinche, in voéture o in car, et qu'os voéyèche un jonne chu ch'bord ed ches voés avuc chin pouce elvé, acceptez de l'prinde avuc vos et foaisez-i un bec d'em pèrt.

Merchi à tertous, boin voéyage à min fiu.

Message pour m'mère qu'est à Lourdes : asis des chierges.

Chi t'os tes ages innui, cros becs à ti. Sutoute chi t'es m'mère.

vendredi 2 septembre 2016

Ho foait mie ech tiot ju

Ed puss in puss, i o des gins qu'ont des montres à leu pugnie, os s'dmindons chi is baille'te coèr l'eure.

In vrai, is baille'te l'eure, mais font étou conme des tiots ordinatures. Mie ech tiot ju, malureusemint pour mi qu'in boés granmint.

Mi qui prins ech train granmint ed keups, j'in voée des saprés.

Mais, fuchez rasseurés, il existe coèr des montres qui n'baille'te eq l'eure, et des keups, ech jour ò qu'os sonmes. Ches montres qu'os s'offroème à ches éfants i o quarante ins pour leu conmunion, pèr eximpe.

Et i n'o des fin bélottes, et des fin crosses

I n'o pour ches onmes,


I n'o pour ches fanmes.


Ej pinse qu'is veu'te granmint d'argint. Chatchun foait conme i vut. Et conme i put.

Mi, chi tu m'traches un jour, ch'est fin aisié : j'o rin à mes pugnies.

Merchi l'réforme

... ed ches écoles !

Ièr, conme chake innée, ches jornaleus ont interrogé eds élèves et leus moaites chu ch'premier jour d'école.

I o ed saprés réponses !

Pèr eximpe, un professeue ed quatrienme étoait ureus, vu qu'i vo pouvoèr invoéyer tous ches galibiés un jour à Londes, in Inglétère, visiter un musée.

Vraimint !

Un jour in Inglétère pour ho ? Et un eute jour din ches trains ?

Mi ej dis eq cho, ch'est mie un boin eximpe. Mais p't'ête qu'il étoait ureus ed mie avoèr ches galibiés deus jours ed suite ?!

Bec et corage à tertous.

Pour mes frères, m'fanme, m'bèle-soeur et mes nveus et nièces, n'obliez mie d'invoéyer innui unne carte à m'mère eq j'ainme. Ale l'éro à s'moaison quanq ale rintro ed Lourdes.

jeudi 1 septembre 2016

Un roé in Picardie

Ech roé dech Maroc est arrivé merkerdi din not bèle région, ech Picardie. Il est à Betz, din l'Oése, alintour ed Crépy-in Valoés.

I s'dit qu'un roé boét. Ch'est seur !

A Betz, edpi qu'ech roé est arrivé, ches gins dech village n'ont pu d'ieu potabe pour boère o s'laver.

Feut dire qu'ech roé est mie vnu tout seu ! Il est avuc troés-chint eutes gins ed chin poaiyis, o des kvaus qu'i boé'te et des gardins à arroser. Don, il o dzoin ed granmint d'ieu.

Ches gins ed Betz sont don obligés d'acater de l'ieu pour boère et ed moinss s'laver. Mais vu que le roé dépinche granmint d'argint din ch'village, ch'est mie un problinme.

Chi t'os eds éfants qu'i rtorne'te innui achl'école, becs et corage à eux.