Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 31 mars 2019

Avoèr deus fius

..., ch'est un problinme !

Quanq os lisons echl'évingile d'innui, nan !

Un cinsier o deus fius ; i n'o un qui dminde ed l'argint à chin père et pèrte queks tans, et minme quèks innées. L'eute, i reste à l'cinse avuc chin père, ouve et minge avuc ches ouvreus.

Ed chin père.

Un jour, chti qu'étoait pèrti rvient, vu qu'il o pu d'argint et qu'il o faim.

Quanq il arrive, chin père i foait unne grinde fète.

Adon, ech deusienme est fin trisse, vu eq li ouvroait quanq chin frère s'promnoait, et chin père n'o, jonmoais foait d'fète pour li.

Arrivé lò, ech christ nos dit :

- "Fuchez ureus qu'ech fiu fuche rvnu.

Et ach deusienme fiu, i dit :

- "Fuche ureus eq tin frère fuche rintré à t'moaison."

A buser.

Conme à chake keup qu'ech christ dit quèk cose.

Boin diminche, et pensez à canger d'eure.


samedi 30 mars 2019

Lò dò djile min sanke

... ch'est conme chi ch'étoait mi.

Mes fius, mes filles veu'te granmint à mes zius.

Adon, feut mie i toucher.

Et j'su toudi ureus ed les vir, o d'les intinde din ch'téléphone.

Soin à chti qui froait du mau à ems éfants.

Comprins ?!


vendredi 29 mars 2019

Ches optimisses

Ches optimisses sont toudi in rtèrd, vu qu'is pense'te qu'is sront in avinche.

Intindu à l'télé, chu l'sis.

mercredi 27 mars 2019

Avir del patieinche

Ièr au vèpe, alintour ed dis-uit eures trinte-quat, ej rinte din unne boulindjerie qu'ej connoais.

El boulindjère :
- " Os vnez acater du pan ?"

Mi :
- "Nan ! ej voudroais un vistchy."

Ale :
- "Os éroète pu vouloèr un watieu ?!"

Mi :
- "Bin ouais ! ej vourroais du pan."

Ale :
- "Os n'in avons pu."

Mi :
- "Ej vo attinde."

L'fanme :
- "Euh !"

Mi :
- "Os allez in rfoaire du pan ! Ej vo attinde."

Ale :
- "Justch'à dman sis eures?"

Ale o rit, et j'su pèrti.

mardi 26 mars 2019

Ech djide Echpère

Combin qu'os avez ed pères ?

N'cartchulons mie avuc ches bieus-pères. Causons qu'ed ches pères.

Mi, j'in o troés :
- min père,
- ech Not Père qu'est Diu,
- ch'djide Echpère., in Espane.

Ech djide Echpère, ch'est un ed ches deus lives qui peu'te vos aidier pour mèrcher chu ches kmins ed St-jacques-ed-Compostelle.

M'fanme et mi avons coési chti d'Echpère.

Et j'truvoe qu'il est fin bin.

Ch'est pour cho qu'ej vos in cause innui.

Chi t'os un problinme chu ch'kmin, ch'est eq ches espanols, des keups, is compliquent. O bin eq t'os mie bin rbéïé ches écailles.

Echl'ernouvieu o arrivé, os allez p't'ête pèrtir mèrcher. Adon, boinne mèrche.

Avuc ch'djide Echpère.


lundi 25 mars 2019

Moérir à Sète

Ah ! Qui foait boin vive à Sète, ville ed l'Héreult dò qu'est né pi dò qu'il est étou intéré Georges Brassens, fin boin canteu frinchoés qu'o étou étè agripeu étant jonne.

Ech canteu o voulu ête intéré chu ches bords ed mers, mais l'eute jour, à l'télévision, un jornaleu o causé dech chinmintière ed Sète.

- "L'est bin, ech chinmintière, ale o vu chu ches mers" qu'i disoait ech jornaleu.

Mais disez-mi ! Quanq os sonmes morts, jou qu'os pouvons vir ches mers ?

Boinne jornée, et coèr un keup, merchi à ches jornaleus.


samedi 23 mars 2019

El roé ed l'andouille est mort

... o vo moérir.

Ej su trisse.

Edpi eds innées, quanq j'alloais in vagances din l'ouest del Frinche, j'alloais acater edl'andouille à Préfoailles, in Loère Atlantique.

Chèrcutier Vilaine, roé edl'andouille, ed père in fiu.

Et ch'est vrai qu'ale est (étoait) fin boinne, esn andouille.

Et ch'est vrai qu'il ainme (ainmoait) l'fabritcher.

Ch'est pour cho eq judi j'i o allé.

Tchinze eures douse ; frunmé !

Chu chl'uis del boutike, i o écrit "frunmé pour coeuse ed".

Pour coeuse ... i nos laice dviner.

Un voésin, qu'est à l'cour et qui m'voét, m'dit qu'ech chèrcutier o un mau qui l'o obligé à arter chin ouvrage et vinde s'boutike.

J'éro pu jonmoais ed boinne andouille ed Préfoailles.

Fin donmage !

Achteure, os allez p't'ête rire, mais ech chèrcutier, l'o vindu s'boutike à un apotichère.

Trop tard pour li, malureusemint.

Mi, achteure, vo falloèr qu'ej coésiche inter Guémné et Vire.

O bin eq j'arte ed minger edl'andouille.

Malaisié.


jeudi 21 mars 2019

Em bèle-soeur et mi

Dvinez quoé !

Mardi au matin, in vagances amon m'bèle-mère, os prindoème un ju quanq m'bèle-mère m'o dit :

- "Tu voés, achteure, m'voésine... bla bla bla ... . Etpi, tu sais eq j'o... bla bla bla ... ."

Tu !

Béto trinte-et-unne innée qu'os nos connoaissons, et pour ch'premier keup, ale m'o dit tu.

Conme ale l'foait à unne eute bèle-soeur edpi miu ed trinte ins.

Achteure os sonmes deus bieus-éfants, et seulemint deus !, à qui qu'ale dit tu, o qu'ale o dit, vu eq pour mi, cho o duré unne dmi-eure.

Ch'est un boin début.

Boinne jornée à ti.

mercredi 20 mars 2019

lundi 18 mars 2019

Ech dis-uit dech moés d'join

Quanq os causons dech dis-uit dech moés ed join, tertout pinse ach Général Ed Djaule qu'o causé à ches frinchoés edpi Londes, in Inglétère, in mile-nu-chint-quarante.

Mais innui, ej voudroais dviser chu ches gins qui font des papars ech dis-uit join, rin à vir, ej croés, avuc ech discourd.

Et ches papars qui naisse'te ech dis-uit dech moés ed marche.

Don, z'ont leus ages innui.

I m'sanne qu'i in o granmint qui font des papars ech dis-uit dech moés ed join, vu qu'ej connoais troés gins qu'ont leus ages innui - cros bec à eux - et un ièr, min premier nveu (p't'ête qu'il est prématuré !), cros bec à li étou.

A moinss eq ches gins foaiche'te ches papars ech vint-et-un dech moés ed join, premier jour ed l'étè, et qu'i foaiche un molet moinss ed nu moés pour eq ches papars naiche'te.

J'ainmeroais eq ches scieintifikes m'esplique'te.

Boinne jornée.


samedi 16 mars 2019

Ech boin monmint pour un batinme

Din miu d'un moés, i éro Pâke.

Et à Pâke, i o des gins gins qui s'font batiser.

Chi os avez foait batiser vos éfants, seuremint eq ch'étoait quanq is étoaite fin jonnes.

P't'ête qu'is avoai'te moinss ed deus ins.

Conme mi. Quanq j'o erchu ch'batinme.

Mais jou qu'un jour unne gin vos o dit qu'i croéyoait mie in Diu, vu eq ches pérints l'avoait foait batiser fin tiot et qu'il éroait préféré coésir quanq il avaoit alintour ed dis o douse ins ?

Busez !

Mi, j'in o rincontré unne, ed gin conme cho, à dis-uit ins.

In premier, cho surprind granmint.

Mais, réponde o étè aisié ;

- "Jou eq tes pérints éroai'te du attinde eq tu voaiches aller à l'école pour t'i invoéyer ?"

Boin carême, et d'avinche, boinne Pâke.


vendredi 15 mars 2019

Jou eq ches inglés vont nos tchitter

Vlò quoé qu'os pouvez vos dminder !

Cho foait casi deus ins eq ches nikdouilles d'inglés z'ont voté pour sortir ed l'Union Uropéïènne.

Mais i sanne qu'edpi, is ont cangé d'avis.

O bin, is vu'te sortir, mais in wardant toutes ches avintages qu'is avoai'te edpi miu ed quarante-chonc ins.

Vive ech Général Ed Djaule

Seuremint qu'achteure, i n'o, eds inglés, qui pèrie'te, vu qu'is ainme'te pèrier.

Et vos ! Os vos dmindez ?

Mi, ej souhaite qu'is tchit'te echl'Union Uropéïène, mais mie l'Keupe d'Urope dech fotbal.

Surtoute quanq os voéyons ches uit vaintcheus del grainde keupe d'Urope cht'innée : i o quat étchipes d'Inglétère.

Feut dire qu'ech fotbal o étè invinté in Inglétère.

Et mie in Frinche.

Minme chi os avons gaingné l'keupe du monde ed ches poaiyis i o nu moés.

Pour eute cose qu'ech fotbal, i peu'te pèrtir, ches inglés.

Boinne jornée.


jeudi 14 mars 2019

Feudro béto les sortir

 ... ed l'étabe.

Echl'ernouvieu vo infin arrivé. Din quèks jours.

I fro seuremint bieu, i éro du solé.

Adon, chi os avez unne moaison et un gardin, os allez les sortir : ainnieu, berbis o vake.

Pour un tiot gardin, sortir un ainnieu à mans o électrike, à pousser.

Pour un gardin qu'est normal, coésir unne berbis. Electrike, o à gasole.

Slon l'taille dech gardin.

Etpi, chi os avez un grind gardin alintour ed vot maoison, o d'vot catieu, sortez l'vake. A gasole, obligatoéremint.

Et profitez dechl'ernouvieu.



mardi 12 mars 2019

Acatez unne voéture frinchoése

Edpi, sis jours, ej voés unne réclame pour des voétures frinchoéses, et j'o invie ed rire.

Mais, ch'est p't'ête ervleus.

Des voétures frinchoéses, achteure, i n'o pu granmint ; deus o troés.

El réclame pour ches voétures frinchoéses, ale utilise des fotbaleus.

Fotbaleus célébes qui ju'te din unne étchipe d'unne ville frinchoése.

Mais edpi merkerdi, ches gins ri'te quanq is cause'te dechl'étchipe, vu qu'ale o perdu in juant din ch'ville adon qu'ale avoait gaingné à l'étringer.

Magine !

Et ches télévisions met'te des réclames avuc ches fotbaleus qu'ont perdu, pinsant seuremint, avant, qu'is alloai'te gaingner.

Et mi qui rit !

Ch'est ervleus.

Et vos ?

Boinne jornée.

lundi 11 mars 2019

D'ièr à dman

J'étoais, ej foaisoais, ej disoais, ch'est du passé d'i o unne eure, un jour, un moés, un sièke o p't'ête minme des rassièkes.

Achteure, ej su, ej dis et ej foais. O ej su, ej dis o ej foais.

Ch'est achteure et ch'est toute.

Mais dman o din unne smangne o coèr din des rassièkes ?

Jou qu'ej fro, eq j iro o qu'ej sro coèr ?

Pux mie savoèr.

Mais toute est possibe.

Conme per eximpe, ête nunne-pèrt.

Boinne jornée à tertous.


vendredi 8 mars 2019

Unne jornée pour ches fanmes

I in o unne per in, ed jornée pour ches fanmes, ch'est innui.

Adon, feut ête régalant avuc ches fanmes.

Innui.

Ches eutes jours, ch'est miu d'i ête étou régalant, mais moinss obligé.

Chi os truvoez unne jornée din l'innée pours ches onmes, disez-le mi.

Boin uit marche à tertoutes.

Et à tertous.

Chi t'es unne fanme et eq t'os ets ages innui, cros bec à ti.

jeudi 7 mars 2019

Din ch'ziu

J'o rmértché unne espression bzarre : avir ch'compas din ch'ziu.

Quanq os disons eq t'os un compas din ch'ziu, cho vut dire eq t'es fin précis pour évaluer unne distinche, avuc tes zius.

- "Ed lò à lò, i o alintour ed dis mètes. A chonc mètes près. Qu'i m'sanne", dit unne gin qu'o mie ed compas din chin ziu.

- "Ed lò à lò, i o douse mètes et soéçante troés chintimètes". eq diroait unne gin qu'o un compas din chin ziu.

Et don, ej croés qu'i o un cros problinme : quanq t'os un compas din tin ziu, d'unne, cho foait du mau, ed deus, tu l'rtires, et ed troés, tu voés mie bin, aprè.

Don, pour mi, chl'espression n'est mie boinne.

Cho n'vut mie dire quoé qu'os i foaisons dire.

Chi os avez un compas din un ziu, o qu'os voulez conminter min article, allez-i.

Boinne jornée.

Chi t'es min bieu-fiu o bin l'jonne fille avuc qui j'ouve sis moés et qu'avez vos ages innui,bec à ti.


mercredi 6 mars 2019

Mes troés frères et mi

... sonmes din l'vint.

O bin, étoème din l'vint.

Lindi, mardi.

Em mère, Michèle*, disoait ed nos, in nos voéyant :

- "Eh jonnes ! Laiciez foaire ! Ièr, ej vouloais tnir vo'mans ; toute quoé eq j'o dzoin, ch'est edl'anmour. Achteure, vlò ch'solé."

Ch'est bieu, quoé qu'ale dit, em mère.

Cho m'o baillé l'invie ed canter.

Avuc mes frères.

Mais os éroème du nos déracher nos cavieus. Nos bieus cavieus.

Et ch'vint s'o arté.

Mais chi os êtes des rédeus, os avez p't'ête, à vo'moaison, des plates ed quat garchons din l'vint.

Ch'est fin bieu ; acoutez-les coèr, ed tans in tans.

* tiot nom prins pour n'mie utiliser chti d'em mère eq j'ainme.


vendredi 1 mars 2019

Ches coéchons sont in dinger

I o, edpi quèks innées, un nouvieu mau qui put foait perde granmint d'argint à ches cinsiers qu'ont des coéchons : l'peste porcine afritchaine.

Et dvinez !

Deus coses, o p't'ête minme troés :

- ech mau arrive in Urope per ch'nord. I vient d'Afrike, mais in passant per l'Polone, l'Allemane pi amon nos voésins Berges.

- ches coéchons qui vive'te à l'cour, sont mie granmint ed nos jours, sroai'te, eq di'te des cinsiers ed coéchons qui vive'te à l'cour, moinss in dinger.

!!

- l'Frinche est bin protègée ; ches nuées avuc ches microbes n'rintront mie. Ch'étoait djò cho à ches moés d'avri et moai ed mile-nu-chint-quater-vint-sis.

Don, ej su rassuré.

Ouf !

Pour vir ed bieus et vrais coéchons, aller avant diminche à Pèris.

Boinne visite, et boinne jornée.