S'voèr viusir

Malaisié à foaire, qu'ed es vir viusir !

Pour cho, tu prinds unne photo ed ti achteure, et unne eute, per eximpe, din vint-sis ins. Et tu t'récompares.

Feut granmint ed tans.

Adon, i o unne gin, russe qu'i sanne, qu'o invinté unne application chu internénèt pour s'vir viusir, in deus sgondes.

Coèr un keup, tu t'prinds in photo, mais aprè, t'appuies chu unne touche, et sitôt, tu t'voés quanq tu sros viu.

Mi, j'o un conmorade, l'o brai eds eures in foaisant cho : chl'application i o dit eq ch'est mie possibe de s'vir viu, vu qu'i sro béto mort.

Boinne jornée, quanq minme.

El mémoère ed nos rataïons

Kmint foaire pour nos ranmintuvoer nos taïons et rataïons ?

Edpi eq Nichéphore Nièpse l'o démuché alintour ed ches innées dis-uit-chint-vint-et-quèks, i o ches photos.

Mais, os avons un eute moéyin : ches chimintières.

Minme chi ed puss in puss ed gins préfère'te définir din une tiote boéte après avir étè inchinéré.

Ches chimintières !

Avuc des pierres !

Des chimintières, i in o des grinds, in ville, et des tiots, din ches campaingnes, fin bieus.

Din unne région

Ches chimintières, feut les néttier, mais feut étou els intertnir.

Eh bin ! Din l'gasète dechl'achuchon del famile qu'ej vos in causer i o quèks smangnes, j'o lu eq des cousins, ch'est conme cho qu'os s'lonmons inter nos, minme chi des keups os sonmes del minme famille pèr un rataïon mort in dis-nu-chin-trinte-deus, des cousins, qu'ej disoais, intertien'te des vius chimintières del famille.

Surtoute din ch'nord del Frinche, bin seur, vu eq ch'est lò eq toute o kminché in dis-uit-quarante-quat avuc l'naissinche del première fille ed not rataïon conmun à tertous.

Coèr un keup, quanq j'o lu cho, cho m'o foait granmint plaisi, et j'vux les remerchier granmint.

D'intertnir, d'unne manière, l'mémoère ed nos rataïons.

Pissiez dbeut

... ch'est achteure possibe pour ches filles et ches fanmes.

Lò, ej cause ed pissier ed dbeut din ches toélètes,  chin in mette pertoute, vu eq ches fanmes ont, edpi toudi, ieu ch'droét ed pissier dbeut dò qu'is vu'te.

I péroait eq pissier dbeut leu évitero d'attinde ; is leu feudro moinss ed tans quanq is sront din ches toélètes.

Qu'i péroait !

Ch'est bieu, ch'progrès,  mais j'o poin comprins.

Et surtoute, ej su mie seur.

Chincante chintinmes

Merkerdi, ej vos l'avoais écrit, poin ed ju.

A pèrt chi unne gin n'in vut un.

Et i in o unne, ed gin, qui voulait boère un ju aprè-nonne.

Adon, j'i o offert, et j'in o bu un étou.

Quanq jé rviens à min burieu et m'caïèle pour ouvrer, i avoait chincante chintinmes dsu min burieu.

Ej sais poin kmint qu'il o foait, cht'onme, mais i m'avoait rimborsé ch'ju.

J'in o causé à unne jonne fanme dech nord avuc qui j'ouve, et ale o étè étou fin surprins.

J'in o profité pour i dire qu'ale, ale me dvoait coèr chincante chintinmes, et lò, ale o ri.

Ganne !

Os avez comprins ?

Boin étè à tertous.

Ej boirai point ed ju

Innui et dman, vu ches caleurs du diabe qu'os devroème avir, j'o déchidé qu'ej boérai poin ed ju.

Boin ! Mettons p't'ête un o deus in arrivant à min burieu alintour ed uit eures ! Qu'ej prendro.

Mettons coèr, p't'ête, un troésienme chi unne gin arrive et qu'ale o invie ed causer et d'un ju !

Mais aprè, zéro.

O bin un quatiènme pour m'bailler du corage !

A nonne, del'ieu pour minger.

Et pour définir, puss pour avir du corage eq pastche j'in vux, un tiot ju.

Mais chin bistouille.

Feut del volonté din la vie.

Boinne jornée, et buvez del'ieu.

Et un tiot ju, chi cho vos foait plaisi.

Chint-dis-nu tchilos à perde

... in chint-dis-nu jours, et avuc chint-dis-nu gins vnus ed chint-dis-nu communes alintour ed Conty, din l'Sonme, l'bèle Sonme.

Ch'est un ju, o un défi, qu'o lancié unne bèle-soeur qui ouve din ches invirons ed Conty.

In vrai, pour kmincher, is sont chint-vint-nu gins à pèrticiper.

Et ed toutes ages : des jonnes, des moinss jonnes et des vius (Atincion : l'mort malureuse d'unne gin n'rinte mie din ches tchilos perdus).

I péroait qu'ech premier jour, tertous pesoai'te quat-mile tchilos. Pesés dsu unne bastchule à cars.

Cho m'foait rire.

L'précision del bastchule, ale est alintour de puss o moinns deus-chint tchilos.

Adon ?!

P't'ête eq uit jours aprè, o minme unne eure aprè, is avoi'te djò perdu ches tchilos.

A moinss qu'is l'o prins ?!

Ureusemint, vu ches tans qu'os avons achteure, qu'i o mie eq des vius à juer.

A suive.

Boin corage à eux, et buvez del'ieu.

Eds onmes et unne fanme

Os connoaissez seuremint ech film ed Claude Echlouche, sorti in mile-nu-chint-soéçante-sis.

Innui, ej vux vos causer ed jornaleus.

Quanq ej cause mie ed ches trains, os l'savez, ej truve eds'idées din ches jornaleus.

Sinmdi, j'o rbéïé ech Tour ed Frinche del bicyclète din ches Pyrénées.

Pour vir ches bèlés Pyrénées. Per eximpe, ech Pic dech Nonne d'Ossau et ches lacs, dò eq j'o djò dormi avuc un cousin.

A l'télé, pour ech Tour ed Frinche del bicylète, j'o constaté qu'i avoait deus o troés onmes jornaleus, et unne fanme qui ouve'te pour ches deus tchainnes ed télé.

Ches onmes, is sont tertous chu des motocyclètes, et l'fanme, din un burieu à chl'arrivée.

Pourquoé ?

Ch'est unne fanme ?!

Ale vouloait mie, o is vouloai'te mie qu'ale i fuche, o is vouloai'te i ête ?

Rcausons in din un in.

Ech miu, quanq tu rbées ech Tour ed Frinche, ch'est ed keuper ech son.

Boinne jornée.

Coésis mais coésis bin

Din chl'évingile d'innui, i deus soeurs qui  rest'te insanne et qu'ont coési deus voées différintes :

L'unne acoute ch'Christ causé,

L'eute ouve din s'moaison.

L'deusienme, qui ouve, est in prousse, vu qu'es soeur n'foait rin.  Rin eq d'acouter ch'Christ, mais mie d'ouvrer à néttier o tchuisiner.

Ech Christ i dit :

- "Ale o coési ; feut qu'ho continue."

Seuremint qu'ale o mie apprécié.

Et vos, à s'place ? Jou qu'os éroète apprécié ed vive avuc unne soeur, o bin un frère, qui n'foaiche rin ?

Busez !

Boin diminche.

Ches obliés del moédeu

Merkerdi, au vèpe, drière m'moaison, j'intinds unne moéssoneuse.

Ej vos vir, et arrivé, ej m'aperchus qu'ech cinsié o oblié quèks épis.

Rbéïez !

 

Ches pauves !

Is vont rester lò durant l'ivèr.

Adon, pour les seuver - un molet - ej les os prinds in photos.

Chi, conme mi, os ainmez l'moédeu, prindez des photos. Ch'est achteure.

O din un in.

Jé rvinds des kmises

... eq j'o acaté i o uit jours.

Ch'étoait ech uit dech moés ed juillet ; in solde, j'acate deus kmises. Pour chincante-quat uros.

Deus jours aprè, ech merkerdi, quanq jé rpasse dvant l'boutike,et i o écrit :

Acatez deus kmises pour trinte-nu uros.

Brin ! Ej mé sro foait avir ?

Ièr, ej vo à l'boutike pour acater unne maronne.

Et je distchute avuc ech vindeu ed ches deus kmises eq j'o acaté i o unne smangne. J'i dminde d'em rimborser ches tchinze uros ed différinche inter quoé eq j'o poéyé et quoé eq cho veut achteure.

Os causons, os causons, j'i monte min titchet, et d'un keup, i m'dit :

- "Ej pux mie vos rinde l'argint chi os m'rinmnez poin ches deus kmises."

Mi, j'i réponds :

- "Ej vos poin vos rinde ches deus kmises, vu qu'ej vux les warder !"

Li :

- "Os rinmnez ches kmises, ej vos rinds vot argint et vos racatez ches deus kmises. A trinte-nu uros."

Mi :

 - "Os êtes fin complitché et malaisié à comprinde. J'o ch'titchet ! Os pourroète m'bailler ches tchinze uros !"

Li :

- "Nan ! I m'feut vos kmises."

- "Bin !" eq j'i dis "Dman, ej viens avuc."

Et pour définir, i m'dit, un molet in riant :

- "Ureusemint eq tertous ches gins sont mie conme vos !"

Et innui, j'inmène ches deus kmises pour gaingner tchinze uros. Cho vo m'prinde vint minutes.

A suive.

Efanches

Un éfant, unne éfanche. Don, eds éfants, eds éfanches.

Innui, tchulture.

M'fanme o ramné à no'moaison un fin bieu live.

Qu'ej truve.

Efanches, qu'i s'lonme o qu'il o étè lonmé pèr ches auteus eq sont Marie Edplechin et Claude Ponti.

Din ch'live, unne page écrite, unne page déssinée.

Unne page écrite chu unne gin célèbe, unne page illustrée chu l'minme gin.

Ach début dech live, il est écrit pèr ches auteus :

" Des gins ont oblié qu'is ont étè éfants. Is s'ranmintuve'te pu ed leus aüres d'avant, ed leus bonnurs, et leus malurs, tiots et grinds.

..."

Fin bieu live qu'ej vos consille ed lire.

Et pour ches gins qu'is connoai'te mie Claude Ponti, is vont démucher un fin boin illustrateu qu'o foait granmint ed bieus lives pour ches éfants, ed sèt à chint-deus ins.

A béto !

Cros bec à min fiu qu'o ches âges innui et qu'ainme ches lives ed Claude Ponti.

Ech keup ed malsaveur

Ech dis dech moés ed juillet, j'avoais ieu del canche à mn'interprinze.

Ed tans in tans, cho foait du bin !

Adon, j'o déchidé d'acater un billet ed loterie.

Ej coésis ches nombes :

Ech quarante-sèt, vu eq j'ainme granmint ches pronnes d'Agen, et eq j'o étou un onke et unne tante qui rest'te din ch'Lot-et-Djaronne,

Ech sèt ; vu qu'em fanme et mi avons chonc éfants, os étoème sèt avant eq nos galibiės
euche'te des cadoreus (qu'os ainmons),

Ech trinte-chonc ; j'ainme bin Rennes,

Ech vint-et-un, vu m'naissance, et ches âges ed min darain fiu cht'innée.

Ech vint-nu ; départemint dech Beu-dech-tère eq j'ainme et qu'ej vos in o djò granmint causé.

Aprè ches chonc premiers nombes, feut in mette un sisienme ; inter sèt, à no'moaison, et chonc, nos éfants, ej prinds l'mitan, sis.

Ej présinte min titchet à unne gin qui les vind, poéye, et j'm'in vo.

Ech onze au matin, je rbée ches résultats dech tirage, et lò, min tcheur o battu et j'o manqué ed moérir : j'avoais tertous ches boins nombes, mais din ch'trimac, poin din ch'boin orde.

Ech boin tirage, din l'orde, ch'étaoit ech sèt, ech vint-et-un, ch'vint-nu, pi ch'trinte-chonc et infin, ech quarante-sèt.

Fin donmage ! Chin quoé, j'éroais gaingné des millons !

Adon eq ĺò, rin. Ches nombes sont din ch'désorde !

Ch'étoait don mie min jour ed canche !

In prousse et fin déchu, j'o toute dépnaillé in mille tiots morcieus, et els o rués din unne poubèle.

Et vos ! Quoé qu'os éroète foait ?

Ej vos o djò vu

Ièr au matin,  din ch'train,  ech contrôleur - qu'étoait unne jonne fanme - contrôle chi ches voéyageus avons bin acaté no'billet pour ch'train din chtòlò dò qu'os sonmes.

Ale arrive à mi et m'dit :

- "Vos, ej vos o djò vu don, ch'o djò étè foait, qu'i m'sanne ! "

- "Ouais !" eq j'i réponds, "ièr au vèpe qu'os m'avez contrôlé."

Ches eutes contrôleus qu'étoai'te lò ont ri, et mi, j'o presinté min ticket pour ch'train.

Et ri.

Ureux d'em cacouille.

Chi in vagances os prindez ch'train, arlusez-vos un molet.

Boin étè à tertous.

Ech contrôleu o rkminché

Ch'contrôleu dech train, bin seur !

Cho foaisoait granmint ed tans qu'ej l'avoais poin intindu, mais l'eute smangne, 'l'o érvnu.

Adon qu'ech train roule :

- "Mes gins, avant ed monter o deschinde dech train, attindez qu'il euche arté ed rouler."

Seur eq pour dechinde, os allons attinde.

Mais pour monter ndan, ches gins n'ont poin intindu ech contrôleu causer, vu qu'ech train roule.

Qu'i m'sanne !

Qu'ej su casi seur !

Boinne jornée et boin étè à tertous.

Un boin article ed min conmorade Zèf

Ech Zèf écrit chu un blog lonmé "Chti jornal in picard" qu'os pouvez vir in lien à main droéte ed min blog.

Ed moinss in moinss, p't'ête, qu'i prind chin ordinature pour mette eds artciles, mais ech premier dech moés ed juillet, il o conté un ramintu ed quanq il étoait jonne : "Ej vo dò qu'ej vux".

Foaisez conme os voulez, mais chi os allez lire chl'article, os rirez bin.

Etpi, profitez-in pour lire l'citation à main gueuche ed chin blog.

Merchi min Zèf ! Continue !

Ches aréoports anméritchins

Is sont saprémint forts ches anméritchins !

Chint ins, au moinss, avant qu'i o un avion din ch'monde, eux ont construits eds  aréoports.

Durant ches djères d'indépindinche, alintour ed dis-sèt-chint-quater-vint, pour eds avions qui n'existoai'te poin.

Chi os allez à ches Anmérikes,  os les verrez pu, ches vius aréoports, vu qu'edpi, is ls'ont seuremint débâtis pi rconstruits.

Pensez don !

Jé rmerchie ch'présidint ed ches Anmérikes ed m'avoèr, pour un keup, foait rire.

Mais chi il arte d'ête présidint, i m'fro granmint plaisi.

N'touchez mie à min fiu

Ches - boins - pérints vos l'diront : "feut mie toucher à nos éfants !"

Chin quoé, os pouvons nos mette in prousse.

Adon ! Chi os touchez à ch'vieu d'unne vake, et qu'ale vos voét l'foaire, ales est conme unne fanme et put s'mette in prosse.

Ch'problinme, ch'est qu'unne vake pèse alintour ed sèt-chint tchillos.

Et o des cornes.

Minme ches cinsiers peu'te ête in dinger.

L'pruve in Isère sinmdi.

L'canche à ch'cinsier et s'fanme : ch'étoait mie ch'toèr, père dech vieu, qu'étoait lò.

Rtenez quanq minme qu'in principe, i o mie ed dinger avuc ches vakes.
Boin diminche à tertous.

Et boinne promnade.

Diu o ed l'interligince

Ièr, j'o vu à l'télé unne fanme dire à chin onme :

- "L'nature est bin foaite ! Magine ch'nez ! Din l'eute sins, l'ieu rintrero din ches treus ed nez quanq i pleut o bin quanq tu t'laves.

Magine étou tes zius quanq t'éternues !

L'nature est vraimint bin foaite !"

N'oblions mie eq ch'est Diu qu'os foait l'Onme.

Et la fanme.

Boin diminche.

Boin quatore juillet.

Boinnés vagances.

Pour t'rinde à Névake

... achteure, feut eq tu voéches à Valmeinier, et aprè, feut eq t'euches du corage.

Vu eq tu pux pu aller à Névake in voéture edpi ches cros hernus ed mardi, feut mèrcher pèr ches montaingnes.

Ech Col ed ches Mèrches,  ech Col ed ches Bataillières, et infin, ch'Col dech Vallon.

Ech Col dech Vallon

 Pi, os déchindez l'montaingne pour arriver à  Névake.

Chi os mérchez fin bin, i vos feut deus jours chin s'arter edpi Valmeinier.

Eute cose : pour aller in Italie in train edpi Lyon, foaire ch'minme kmin, vu l'beue qu'i o chu ches voées, mais aprè ch'Col dech Vallon, torner à main gueuche.

Boin corage à tertous. Vos in feudro.

Tertous à chl'ôpital

Ièr judi, ej vos causoais ed mes troés galibiės qui rintroai'te d'eutes poaiyis qu'el Frinche et qu'étoai'te à m'moaison diminche.

Innui, ej causero coèr ed troés ed mes galibiės, mie ches troés minmes, ch'est possibe, qu'étoai'te mardi à chl'ôpital.

Unne i étoait pour ête soégnée, vu qu'ale o mis s'main dò qu'il falloait mie à sn'interprinze, l'eute pour apprinde à ête séruzyin, et ch'darain, conme pompié, pour inmner unne gin qui s'avoait foait du mau à unne main.

Seuchez eq chatchun étoait à miu ed chint kilomètes ed l'eute.

I n'o un ed ches troés qu'éroait du éviter.

Bec à tertous, et boin corage à m'fille.

Bec étou à min frère qu'o ches âges innui.

Ches Urotchéïènes ed Belfort

Ch'est chake innée achteure, à ch'début dech moés ed juillet.

Pour deus-mile-dis-nu, cho vient ed kmincher au vèpe, et pour quat jours.

Qué del boinne musike !

Pour ches jonnes, conme vos et mi.

Et^pi, chi os avez ieu un molet froéd in Bretanne, allez à Belfort ; cho vo keuffer.

Et os verrez p't'ête min jonne fiu.

Erlusez-vos bin !

Voéyager forme ches jonnes

Os l'avez djò intindu : "ches voyages forme'te ches jonnes".

Eh bin ! Fidjurez-vos eq sinmdi et diminche, m'fanme et mi avoème à no'moaison quat ed nos éfants.

Un vnoait d'esn'école, in Frinche, et ches troés eutes arrivoai'te ed Russie, Italie o Ecosse.

Bin ! Os nos sonmes quanq minme comprin.

Et tertout étoait ureus d'es érvir.

Boin étè, et, p't'ête, chi os in prindez, boinnés vagances.

J'o croésé unne rmorke

L'eute jour, in rintrant in voéture, quèks minutes aprè avoèr ieu un keup ed tchul, j'o croésé un cros tracteu avuc unne crosse rmorke drière.

Vu qu'el moédeu o kminché, pour ches orges o escourgeons, ej m'o dit eq j'alloais p't'ête avir un boin sintimint.

J'o croésé ech tracteu et ch'rmorke, pi j'o dviné quoé qu'i avoait ndan : du fyin !

Rin à vir pour ches sintimints.

J'o ri.

Boinne jornée.

Fin cros keup ed tchul

L'photo qu'os allez vir aprè o étè réalisée chin tricher.

Os pouvez penser eq j'o roulé in voéture à un indroét lò dò eq j'étoais trantchille, à surveiller ch'cartchuleu d'em voéture, et que quanq j'o ieu ech bieu nombe, j'o adon intindu d'avir l'boinne eure pour prinde l'photo.

Nan !

Merkerdi, au vèpe, ej rintroais à m'moaison, et quanq j'o ieu ches deus nombes, ej m'o arté à un indroét mie loin pour foaire l'photo fin rade, vu eq ches minutes continuoai'te d'avincher.

Os comprindez eq j'avoais moinss d'unne minute pour foaire cho.

Pi, j'o défini ed rintrer pour rtruvoer min blanc-bonnet.

Chi vos-minme avez des photos conme cho, invoéyez-les mi, o causez m'in.

Boinnés photos (d'étè) à tertous.