Frinche - Qatar

O Qatar - Frinche.  Ej sais mie din qué sins feut l'dire. Ch'est mie important.

Ej cause ed handbal, un ju o tu prinds ech ballon avuc tes mans et o t'os des conmarades qui ju'te avuc ti. Ej cause mie ed babyfot o rugby. T'os quanq minme rmèrtcher eq din min blog, il est souvint question ed rugby.

Fin del parinthèse.

Frinche - Qatar, o din l'eute sins, ch'est un match edman.

Tertous, minme ech picard qu'ej sus, vut qu'el Frinche gaingne.

I m'sanne.

In vrai, i m'sannoait.

Au matin, j'os intindu Laurent Blanc dire qu'i voulaoit qu'ech meilleu gaingne. Laurent Blanc, fotballeu frinchoais.. Mais din unne étchipe fininchée pèr ech Qatar.

J'os tout comprins. Et ti ?

Allez ches frinchoais !

Ureusemint qu'ech fotbal existe

Achteure, i o, in fotbal, ech keupe d'Afrike ed ches nations.

Béto, ej croés eq ch'est innuit au vèpe, i éro un match o ech Gabon vo gaingner. A tous ches keups.  Ches deus étchipes sont ech Gabon.

Gabon - Gabon

Chin ech fotbal, j'éroais oblié qu'i avoait deus poayis qui s'lonme'te Gabon. Mais i n'o qu'un qu'est unne république.

Merchi à ch'fotbal ed nos apprinde ech géographie. Mi, ho m'o toudi aidié edpi qu'ej sus jonne et q'je rbée ech fotbal. Kiev, Ajax, Santos, Manchester, Munich, Mönchenglabach, Zabreg, Lisbonne, Hambourg, Sofia, Turin, Glasgow, Liverpool, Sedan, Reims, St Etienne,  Feyenord, et granmint d'eute villes eq j'os découvert qu'is existoai'te in rbéïant ech fotbal.

Foait comme mie, foais du sport.

Quanq ch'est qu'ej minge

Avant ièr, dis-nu eures chincante-chonc, ej rinte amon mi.

Dis-nu eures chincante-sis, ech téléphone sonne. Ej réponds. Ch'étoait em mère. Ho m'o foait plaisi.

Os s'tchittons à vint eures dis.

Vint eures onze, ech téléphone sonne. J'os toudi mie tchitté em casake.

Ch'est unne bèle-soeur qui avoait fini ed minger et qu'étoait in forme, bin qu'ayant granmint ed mau edpi deus ins. Ho m'o faoit granmint plaisi ed l'intinde et d'causer trinte-chonc minutes avuc ale. J'in os profité étou pour causer avuc chin onme, min frère. Alintour ed vint eures quarante-chonc, "adé !".

Déchidémint, i o des gins qui m'ainme'te.

J'inlève em casake, prépare des lédjumes.

Dring ! Vint-et-unne  eures. Ech keup chi, ch'étoait min boin cousin avuc qui ej mèrche in montaingne l'étè. Coèr un keup, j'étoais fin ureus ed l'intinde.

Kmint vont ches éfants ? Kmint vo et fanme ? Quoé qu'os foaisez in étè ? Unne eure tchinze ed bonnur à causer avuc li. Ej mé dminde chi ch'fanme et ches galibiés étaoi'te mie à juer avuc un drone alintour ed Lanvéoc !

Vint-deus eures vint. Ej vos minger, et fin rade, coutcher.

Merchi à ches gins qui pinse'te à mi. Minme chi i m'téléphone'te mie.

Unne boinne-soeur italienne

... avoait du mau à ch'panche. Din un couvint, in Italie.

Et ale o ieu un papar, i o quèks jours.

D'apré ale, ch'est un cadieu ed Diu.

Euh !! Diu a boin dos, et toutes ches filles pu'te mie avoèr un tiot Jésus !

Quoé qu'i in fuche, bienvnue à ch'papar.

J'os vu ech Lot injlé

Ch'étoait i o trinte ins, à Espalion, in Aveyron.

Ej té cause dech fleuve, mie dech dépèrtémint.

Edpi quèks jours, ches timpératures étaoi'te alintour ed vint degrés in dsou ed zéro. Jé m'rappéle avoèr lu un matin vint-troès degrés in dous ed zéro. Quanq ch'est comme ho, tu foais atincion o tu mets tes mans, pour mie rester coller.

Os aloème ouvrer à piés, tant ches voétures avoai'te du mau à démarrer, et qu'avuc du tan comme ho, i avoait mie grind cose à foaire.

Feut dire qu'avant ed foaire ech froéd lo, ches nèges étoai'te tcheutes. Os pouvoème mie rouler, mais os pouvoème juer à cartes.

Un jour qu'ej passoait chu Viu Pont, j'os vu, in rbéïant ech Viu Palais, l'dsu dech Lot intièremint injlé, de l'rive gueuche à l'rive droète. Ch'étoait fin bieu. Mais, mie question ed mèrcher dsu ; os éroème berzillé ech glache et prins unne méchante trimpette.

Apré, ches timpératures ont cangé et l'glache a fondu. Coèr un keup, jé m'souviens eq quanq il o foait trése degrés in dsou ed zéro, j'os truvoé qu'i foaisiait keud.

I o troés ins, ej sus rpassé à Espalion et ches alintours. In été. Mais minme lo, j'éroais ainmé qu'i foaiche trinte degrés in dsou ed zéro quèks jours avant d'arriver ; pour tuer ches punaises ed lit, à Estaing.

Et vlan pour eux qui disoai'te eq ch'est mie vrai qu'i in avoait.

Feut-i ête grec

Ièr, ej té cause dech pèrti ed gauche in Grèce qui o gaingné ches élections, ech keup chi, ch'est seur, et innuit, chesjournaleus rcause'te ed grecs.

D'eutes grecs !

Un canteu grec fin connu, Demis Roussos, est mort. J'o apprins innuit qu'il avoait foait del musique avuc Vangelis, ch'est mie chin vrai nom, eute grec, i o granmint d'innées.

Demis Roussos, eq j'o souvint confondu avuc Yvan Rebroff, qui li est mie grec mais qu'ej sais mie chi il est mort, est mort.  Chi t'os mie comprins, érlit.

Mais i o étou, à nonne, un avion grec qu'o tcheu. In Espagne, poayis in crise, comme el Grèce. Coèr des morts. Déchidémint ! Pinsée pour tous ches morts.

Ech nouvieu minisse grec vo avoèr à ouvrer granmint pour rbailler unne boinne image ed chin poayis.

Is l'avoai'te dit

Pour un keup !

Edpi un moés, tous ches journaleus disoai'te qu'ech pèrti ed gauche in Grèce alloait gaingner ches élections législatives.

Et quanq j'écris ches lignes, i sanne qu'il o gaingné.

H'est mie souvint eq ches journaleus s'berlure'te mie chu ches résultats. Pour un keup !

Mi, ej constate quanq minme eq ches gins dech pèrti ed gauche, is lève'te leu bros droét quanq is gaingne'te. Is ont l'droét, mais l'gauche sroait miu.

In causant ed pronostics, i o-t-i un journaleu qu'avoait dit eq Montpellier gaingneroait au rugby ech diminche qui vint ed passer ? Qui éroait dit i o tchinze jours eq Toulouse perdroait deus matchs ed suite ? Et surtout, nn sé qualifieroait mie in keupe d'Europe ! Et Montpellier qui , li, avoait mie gaingné un match in keupe ! Tout ho, mie un, i o tchinze jours ! Pauves toulousains.

Bec à eux, chi i li'te min blog.

Ech premier ju del jornée

Boère un ju, ch'matin quanq tu dejoutches, ch'est bin. Mais l'boère din tin lit, ch'est miu.

I feut, ch'est seur, es'dejoutcher pour aller foaire keufer l'ieu et pour, aprè, foaire ech ju, prinde unne tasse, pi raler din tin lit.

Mais qu'os sonmes bin, ches piés din ch'lit, à boère tout pian pian ech ju !

Rin n't'inpêque aprè d'aller minger.

I o eds innées, ej foaisoais ho minme quanq ej pèrtoais ouvrer fin timpe au matin. Achteure, ej laice m'fanme dormir quanq ej vos ouvrer. Mais toutes ches vagances, ches sinmdi o diminche, ej prin ech ju din min lit.

Et ed lo, je rbée ech solé qui déjoutche étou, o ches nèges qui tcheu'te. Qué boins momints !

Os sonmes diminche ; à vos ed tinter ech keup.

Ete o n'mie ête din ch'train

Ièr, din ch'train :

- "Mes gins, os arrivons in gare ed Triffouilli-ches-osons. N'tentez mie ed monter o deschinde dech train avant echl'arrêt complet."

Os etoème djo ndin.

Deschinde quanq ech train i roule est dingéreux, mais possibe. Mais monter quanq os sonmes ndin, ej sais mie foaire.

Claude Moine

Sapré Claude !

I o quèks tans, ej vos os causé ed Jean-Flipe Smet. Et j'mé sus dit qu'i feudrait qu'ej vos cause étou ed Claude Moine.  Ej l'ainme achteure un molet miu eq l'eute. Miu régalant, i m'sanne din ch'vie. Pi p't'ête étou qu'i s'o arté quanq i falloait. L'eute continue ed vouloèr canter, mais i sait pu

Ches premières innées ed musicien ed Claude Moine, ch'est avuc ches Keuchettes noèrtes, un groupe ed rock, in mile-ni-chint-chincante-nu.

Pi, in mile-ni-chint-soéçante-troés, i s'met à canter tout seu.

Mi, j'ainme granmint ches canchons ed ches innées mile-nu-chint-soéçante-dis, mile-nu chint-quater-vint. Pèr eximpe, "chu ech voée ed Memphis", "tu pux préparer un ju noèrt", "couleur minthe à l'ieu", et granmint d'eutes.

Claude a foait étou du cinéma. Boin étou ! Ches mius, slon mi, sont "à mort echl'arbite" et "ech bonnur est din ch'pré".

I o des gins qui l'appele'te Schmoll ; feut l'savoèr. Cho i vo bin, qu'ej truve.

Pour définir, ej dirai étou qu'il o toudi unne boinne dgiffe. Jean Flipe Smet, li, o granmint cangé ed dgiffe. Et j'pux mie eq cho l'arringe.

Foaire du sport

Ch'est décidié, in deus-mile-tchinze, ej foais du sport. J'os minme kminché in déchimbe deus-mile-quatore.

Rbée !

Des keups, ej jue avuc des jonnes ; mie toudi aisié ed gaingner !

Mais atincion : feut mie confonde babyfot, ch'est ech nom dech sport, et Papyfot, qu'i n'o qu'is ainmeroai'te em lonmer.

Kmint qu'ech'comport'te ches lapins

- "I n'o qui croé'te eq pour ête boins catholiques, i doé'te ch'comporter comme des lapins", qu'o dit ech Pape. Quanq il o vu unne fanme qui attindoait chin uitienme éfant et qu'avoait djo ieu sét césariennes.

Respect.

Mais os sonmes keuds comme des lapins. Ed dech tan lo, ho nos foait du bin, d'ête keud.

Etpi mi, des lapins qui baille'te eq deus o troés tiots din leu vie, ej les warde mie. Minme dis o douse tiots din toute unne vie, ej warde mie ches mères lo.

Ej dminde à ch'Pape ed foaire atincion à ches eximpes qu'i prind. Il put m'appeler chi il o dzoin.

Edman os êtes libe

- "Mes gins, edman, ej vos baille unne jornée ed vagances ; os êtes libe", qui dit ech présidint.

- "Os êtes libe ed mie vnir ouvrer", qu'i dit mie.

- "Mais feut vnir manifester", qu'i dit à tertous.

Et lo, ches gins sont mie libe ed mie vnir. Feut qu’i vienche'te.  Chin quoé, is iront ouvrer din des camps.

Ech présidint attindoait chonc-chint-mile gins ; i n'avoait eq deus-chint-mile. Alorss, il o été tracher des gins din tout ech poayis.

Et ch'est li tout seu qu'o causé pour esplitcher pourquoé ches gins manisfestoai'te.

Vlo coèr un bieu eximpe ed quoé qu'i feudroait mie vir ed nos jours.

Becs à m'bèle-mère et chin fiu, chti qu'o mie granmint ed cavieus.

Ches souvnirs

Ch'est ch'tite d'un nouvieu film eq tu pourros vir à pèrtir ed merkerdi.

Ech conte :
L'taïonne ed Romain a tchitté ech moaison d'retraite. Romain, chin tiot-fiu, pèrt l'ertruvoér.

Un boin tiot-fiu qu'est ech Romain.

Bec à ti, chi tu lonmes Romain.

Feut s'arter et coésir

Quanq tu ris miu à etn'interprinse qu'à t'moaison,
Quanq t'os un fiu qui t'dit qu'il ainmeroait miu vive din unne famille d'atcheuil,
Quanq eq t'es granmint mie ureus ed vive,

Feut s'arter quèks jours, refléchir, et prinde unne décision.

Minme chi tu croés granmint in diu et eq t'es mèrié.

I éro toudi des gins pour t'aidier etqu'i t'ainme'te.

Mi, pèr eximpe.

Laver ech carrelage

Pour laver t'moaison, i t'feut un sieu, de l'ieu keude et du savlon. Et unne wassingue pour frotter.

Mais ej vux mie t'bailler unne lçon ed buée ed carrelage.

Ej vux t'causer ed quanq j'étoais tiot et qu'em mère netioait ech carrelage. J'ainmoais bin.

Falloait mette ches caïèles à l'invers chu l'tabe. Et apré, ej m'assiyoais, o, avuc mes frères, os s'assiyoème, inter ches caïèles, chu l'tabe. Em mère frottoait, et nous, os juoème inter ches caïèles et atteindoème qu'ho sétchiche. Avuc nos piés qu'i touchoai'te mie tère.

I n'o ti d'eutes qu'is foaisoai'te ho ?

Qué plaisi qu'os avoème !

Bec à tertous.

Boins défindeus

Din, ch'qui pourraoit ête, echl'étchipe ed fotbal eq tertous voudroait avoèr achteure, des gins ont mis deus jueus ed l'étchipe dech Brésil qu'o jué in deus-mile-quatore.

Deus défindeus, qui ju'te achteure in Frinche.

Rappéle té !

Brésil - Allemagne, pi Brésil - Poayis-Bos ! Ches brésiliens ont prins dis buts. Et ches deus défindeus sroai'te din chl'étchipe du monde ?!

Ej comprinds mie kmint eq ches gins i font pour coésir.

Coèr un keup edl'argint din l'sport ?

Rbée bin

Tu voés o es min fiu ?

Rbée bin !

Ch'est bieu.

Tu voés mie bin. Mets des lunettes.

Et achteure ! Ch'est miu ? T'os don dzoin ed vir un ziutiste.

Deus bros deus gambes

Apré ches jours qu'os vnons ed vive, unne boinne nouvèle. Ho foait du bin.

Tertous a deus bros et deus gambes. In principe.

Et tu pux vive avuc un bros et, o unne gambe tout seu. Minme chi, bin seur, ch'est granmint malaisié.

Mi, feut qu'ej foaiche atincion, avant octobe deus-mile-dis-sét, ed mie perde un bros o unne gambe : i o ech boin conmarade à m'fille et qu'ej't'in os djo causé, qui vut, achteure, s'mèrier avuc m'fille in étè deus-mile-sèse. Feut don eq j'os mes bros et mes gambes pour aconduire m'fille din chl'église, in tète dech cortège.

Magine comme ej sus ureus et comme ej sro fiér !

J'os djo reservé toutes ches sinmdi inter ech chonc marche et ech sis novimbe deus-mile-sèse,  in atindant d'avoèr l'boinne date.

Chi tu connaois fin bin m'fille, foais comme mi.

D'ichi lo, feut mie qu'ej perche étou m'tète.

Coèr mie dzoin ed causer

Conte chin causer

Jornée ed brin

Ièr étoait pour mi unne jornée ed brin. Cho arrive ed tans in tans, mais lo, ch'étoait mie du plaisi.

Et ej su in vie !

Mais min tcheur o granmint ed mau, rin qu'à pinser à Wolinski, Cabu, Charb, Merabet, Maris, Honoré, Renaud, Ourad, Cayat, Tignous et ches eutes, ech fanme policière dech jour.

Etpi, j'ouvre vraimint avuc des gins qui sai'te mie quoé qu'is vu'te.

Et un frère qu'o granmint ed mau din s'tête, voère du brin. Et s'fanme et ches éfants brai'te.

Tu comprinds

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                   

Cangemint ed nom dech blog

Charlie hebdo.

A la dminde ed Philippe Val.

Ej sus Charlie

Vu ches horribes événemints dech jour à l'nonne, ej cange d'article.

Crosse pinsée pour ches gins qui sont morts.

Os sonmes libes ; feut continuer ed dessiner et d'écrire quoé qu'os voulons.

Plantez des punmes ed tère

- "Msieur" qu'i dit ch'comptabe à min père, "os avez foait, l'in darain, trinte-quat hectares ed blè, douse ed punmes ed tère, onze ed bétraves et troés ed tiots poés.

Vu ches résultats, feut qu'os plantèche echt'innée vint-quat hectares ed punmes ed tère. "

- "Min gins" qu'i dit min père, "tu cartchules p't'ête bin, mais ch'est mie ti qui ouvre din ches cans. Ej vos continuer à foaire douse hectares ed punmes ed tère".

Et vlan !

Tout est mie eq din ches nombes.

Un nveu ed dis-nu ins

Je n'os qu'un ed ches ages lo. Ch'est ech fiu d'un frère à m'fanme, qu'éro vint ins in déchimbe. Ech fiu, min nveu, et mie ech frère à m'fanme.

L'eute jour, i passe à m'moaison avuc ches pèrents, ches eutes frères et ch'soeur, et d'un keup, vu que l'crèche est coèr lo,

 il alunme des bougies. Mais il avoait rin dit.

Ech première, bin.

 El'deusienme, i dit toudi rin, pi il arte.

Erconstitution ed quanq min nveu alunme l'deusienme bougie

Mais j'os comprins pourquoé.

Et ti ?

Os avons bin ri, et j'l'ainme quanq minme bin ; il est rpèrti amon li avuc un pot ed confiture ed mrises.

Quanq os avons mie vint ins, feut mie juec avuc ech fu !

Becs.

Din ch'désorde

Tous ches ins edpi quate innées, ej foais des calendriers. T'in os p't'ête djo ieu, vu eq j'in offre. Douse moés, trése photos in noèrt et blanc. I o unne couverture.

L'eute jour, quanq j'os cangé ches deus calendriers, j'os constaté qu'ech nom dech calendrier deus-mile-quatore étoait : "in mèrche pour deus-mile-tchinze", et achteure, ech nom de ch'ti ed deus-mile-tchinze est "souvnirs ed deus-mile-quatore".

Deus-mile-quatore et deus-mile-tchinze, mais din ch'désorde. Mais ho m'foait plaisi. Surtoute ed mette ed bèlés photos eq j'os foaites edsu.

Et ed foaire plaisi.

Pour deus-mile-sése, ej buse djo. Chi t'in vux un, mets un message. Chi t'os eds idées ed tite, minme cose.

Bec à tertous.

J'os du boin toubake

... din m'toubakière.

Qu'ale dit ech vieille canchon.

Tu n'os qu'is di'te étou qu'ech boin toubake, ch'est din leu poaiyis, Tchuba.

Et t'os étou des gins qui sont granmint ureus ed pouvoèr béto acater des cigares ed Tchuba. Ches anméritchins.

Mi, ej pinse eq ches tchubains sront ureus d'in vinde. O d'vinde eute cose. Et pouvoèr alorss acater.

Ech Prix Nobel ed deus-mile-nu, o ch'Pape Franchoès, éront p't'ête ech Prix Nobel deus-mile-tchinze.

A vir din quèks moés.

Siniure

I o des moés, j'os invoéïé unne carte pèr internet, à unne filleule, in siniant "ton parrain".

Ièr, ech premier janvié, j'os érchu unne réclame chu internet qui s'définissaoit pèr "boinne innée ton parrain".

J'os mie ieu à Noë ed nouvieu o nouvèle filleule. Alorrs, ej pinse qu'i n'o un qu'o foait ho pour ches étrinnes. Bin tinté, merchi pour ches voeux, mais perdu !

Boins us

Ah ! ches boins gatieus, ches bélotés landimoles qu'os pouvonche minger, pèr eximpe, avuc du chuke, del castonnade. Bins gannes qui sont ches gatieus o ches landimoles.

Foaits avuc des boins us ed nos glinnes.

Eh ouais ! Des glinnes qui ponde'te des us. Ed tans in tans, des pouillètes, vu qu'os avons un co fin bieu, qui pondront un jour étou eds us.

Innuit, ej té souhaite d'avoèr ed boins us.

Qui dit "boins us", dit "mie ed mau ed panche". Et mie d'mau ed panche vut dire unne boinne innée deus-mile-tchinze.

Bec à tertous.