Ech Roé yon

Os avez seuremint vu un jour, tout seu o bin avuc eds éfants o tiots-éfants, ech dessin animé lonmé Ech Roé yon, créé in mile-nu-chint-quater-vint-quatore.

Pour résumer, ch'est ches aüres d'un tiot yon lonmé Simba, fiu dech roé ed ches yons d'Afrike, qui nait, in Afrike, et qui doét dvenir roé quanq chin père moériro.

Eh bin, i o quèks tans, in allant in Bretanne quèks jours, j'o comprins qu'echti qu'avoait invinté ech film étoait breton. Minme chi i vit p't'ête (avuc internénet et achteure ech télé-ouvrage, toute est possibe, don, ch'est poin seur qu'il i reste) in Anmérike dò qu'il ouve.

Ej vos esplique kmint eq j'o dviné cho.

In premier, din ch'film, ech tiot Simba o un onke lonmé Scar, onke qui ainmeroait bin dvenir roé àl place ed chin nveu. Scar, cho rsanne à Scaer, ville ed Bretanne, din ch'dépèrtemint dech Beu-ed-ches-tères.

In deuze, i o ch'phacochère, grind ami dech tiot yon. Pour mi, ch'bétail o été mis din ch'film vu eq li, i rsanne à un coéchon. Et in Bretanne, des coéchons, i n'o granmint.

Aprè, i o un momint din ch'film dò qu'os voéyons des yènes, conmorades de Scar, qui sont din un indroét dò qu'i o des buissons avuc eds épines. Conme ches ajoncs qu'i o in Bretanne !

Vu tout cho, jé m'dis étou qu'un début ed film, quanq ech tiot yon est présinté à tous ches bétails d'Afrike edpi unne tiote montaingne, ch'est un clin d'ziu dech breton pour foaire penser à ches Monts d'Arrée.

Ch'est toute pour innui.

Troés coses avant ed définir chl'article :

- chi os avez mie vu ch'film, feut vos débrouiller pour l'vir,

- chi os connoaissez mie l'Bretanne, feut i aller.

- n'obliez mie qu'os avez l'droét d'ém dire quoé qu'os pensez ed min article.

Boinne jornée à tertous.

El résilieinche

El résilieinche, tertout ainme utiliser ch'mot edpi quèks moés. Ch'est àl'mode.

Lu un sinmdi din unne tiote gasète :

 

"El résilieinche, ch'est, pèr eximpe, tchair sèt keups et se rélver uit."

Busez et disez-mi : jou qu'unne gin qui tchait sèt keups dvroait mie aller vir un séruzyin avant qu'os causoème ed résilieinche ?

Un keup ed téléphone au mitan del nuit

Par nuit, un onme téléphone à un eute onme. Il i dit :

 

- "Bojour ! Ej sus Vilfried. Ej vouloais dire eq j'o ieu un papar avuc l'fanme noèrte qui vivoait à unne époke din no'village."

 

- "P't'ête ! Chi tu l'dis. Mais ch'est pour cho eq tu m'appelles achteure, au mitan del nuit !?"

 

- "Nan ! Ch'est pour t'dire qu'à coeuse ed ti (qui prind chl'ouvrage ed ches eutes quanq is sont in grève), j'o granmint ed mau à leu bailler ed quoé minger et s'vétir. Et pour cho, à coeuse ed ti, ej vos ém suichider."

L'eute acoute cht'onme s'plainde, et un monmint, il i dit :

- "Boinne canche !"

L'eute :

- "Kmint cho, boinne canche ?"

Chti qui rchoét ch'keup ed téléphone répond :

- "Bin ouais ! Boinne canche ! Quoé d'eute eq tu vux qu'ej foaiche ? Qu'ej té liche unne page ed ches évangiles ? Qu'ej té diche "amuse-ti bin !", "boin voéyage !", "foais ed bieus reuves !" o "adé !". Mettons eq j'ajoute "adé" à "boinne canche". Achteure, ej vos m'joutcher et assayer ed dormir.

Cht'onme qui téléphonoait n'sait pu quoé dire. Aprè...

Aprè, feut foaire conme mi et lire ch'live "Et quèks keups j'o conme unne grinde idée".

Ch'est ch'darain keup qu'ej prindoais un estrait dech live ".

Boinne jornée.

 

Jou qu'os pouvons tchitter unne jonne fille

 ... conme os ruons ed vieilles keuchettes ? 

Nan ! 

Surtoute quanq l'fille est fin bin édutchée. Et fin régalante.

Prions.

Un bieu proverbe

Innui, ej vos coèr vos causer dech live "Et quèks keups j'o conme unne grinde idée".

A un indroét, il est écrit :

"Un onme s'plaind ed mie avir ed keuchures justch'àch jour dò qu'il in rinconte un qu'o mie ed piés."

Busez.

Et béto, un eute article, toudi à pèrtir dech live.

Boinne jornée.

Jésus et ches apôtes

Béto Pâke !

 

- "Ej voudroais bin savoèr pourquoé eq ches douse apôtes suivoai'te Jésus pertoute !?"

- "Bin ! Unne gin qui put canger l'ieu in vin, cho ratire du monde."

D'aprè min conmarade Zèf, Zèf qui n'écrit pu achteure chu chin blog mais qu'ej salue.

 

Cangemint d'eure

Pour vos, jou qu'il étoait puss aisié de s'déjoutcher innnui unne eure avant pèr rapport à sinmdi, fin timpe au matin, que de s'joutcher unne eure in avinche, ièr au vèpe ?

Pour mi, poin ed cangemint d'eure ; i o del pleuve et mie ed solé.

Boin diminche à tertous.

Pértchinson et Alzémèr

J'écris Pértchinson et Alzémèr, mais i feudroait miu écrire ech Mau ed Pértchinson et ch'Mau d'Alzémèr.

Os disons malureusemint qu'unne gin, l'pauve, o hapé Pértchinson o Alzémer. In vrai, ale o hapé ch'Mau ed Pértchinson o ch'Mau d'Alzémèr.

Pértchinson et Alzémèr ont mie vétchu insanne et din ches minmes innées, mais ches deus onmes ont traché, durant leu vie, à comprinde ches problinmes dech cervieu qui foait perde leu tête à ches gins adon qu'ale coèr chu leus épeuilles. Et z'ont apprinds quèks coses pisq z'ont baillé leu nom à des maux.

Ches deus maus sé rsanne'te et ont rin ed régalant. 

J'esplique.

Ech premier, ch'Mau ed Pértchinson, i sanne qu'os dvenez conme un lédjume. Minme quanq os avez seulemint soéçante ins. 

Eximpe. I o béto quat ins, m'fanme et mi étoème à un rpas ed mériage assis à unne tabe dò qu'unne eute fanme étoait étou, mais ale o rin dit, et s'voésine ed tabe s'otchupoait del foaire minger. Ale avoait un molet puss ed soéçante d'âge et achteure, ale est din unne moaison éspécialisée, conme un ôpital.

Un eute eximpe, ch'est avuc min témoin ed mériage. Déchidémint, ches mériages !! Ej l'avoais mie vu edpi vint ins au moinss et un jour, jé l'croése pèr hasèrd, lé rconnoais et os causons quèks minutes. Quèks smangnes aprè, j'érchoés un message d'inviron dis lines qu'i m'o écrit chu internénet. In quèks smangnes !

I m'esplique qu'il o ch'mau ed Pértchinson, edpi dis ins, don, edpi qu'il o ieu chincante ins d'âge, et qu'achteure, il i feut granmint ed tans pour s'ramintuvoer ed quèk cose, pour écrire. Cho foait granmint ed mau au tcheur ed lire cho et comprinde qu'i vo dispèroaite.

Dispéroaite ! Ches deus gins prins in eximpe sont mie morts, mais sont conme des lédjumes ; is bouge'te casi pu o bin n'cause'te pu. Ch'est vraimint trisse. Pour ches eutes.

Avuc ch'deusienme mau, chti d'Alzémer, os dvenez un vrai cros nikdouille qui sait pu quoé qu'i foait et qui put dvenir granmint mawais, méchant, minme avuc des gins qu'il o granmint ainmé durant s'vie d'avant.

Pour avir connu unne gin qu'avoait hapé Alzémèr, ch'est granmint trisse étou ed vir quoé qu'il o dvenu in un molet d'innées.

J'espère eq vos et ches gins qu'ainmez srez protégés ed ches deus maus lò qui peu'te berziller unne famille.

Prions pour cho.

Deus gasètes

Combin ed familles in Frinche écri'te din unne gasète pour leu famille ? 

 

J'in sais rin du toute.

 

Eute tchestion, coèr puss complitchée : combin ed familles écri'te deus gasètes pour leu famille ?

 

Minme réponse, j'in sais rin. Mais ej sais eq cho existe.

Os pouvez, pèr eximpe, avir unne gasète écri'te pèr troés o quat gins del famille, mettons chake moés, et unne écri'te, mettons, un keup pèr innée, pèr tous ches gins del famille qu'in ont invie, minme ches troés o quat ed l'eute gasète. Fuchons mie racisses !

 

Mettons !

 

Os pouvons croère qu'i o mie ed problinme, vu eq ches deus gasètes sont différintes.

Din l'première gasète, crée alintour d'i o deus ins, ches gins cause'te et met'te des clitchés ed leus éfants qu'ont ieu leus âges, qu'ont gaingné ach fotbal o qu'ont allé DisneyPoaiyis o coèr, in route à matcher des chukeries.

Din l'eute gasète, créée i o miu ed vint-chonc ins, à mzure eq ches gins viusi'te, ch'est puss ed articles qui cont'te un point ed vue o qui cause'te ed quèk cose ed nouvieu, conme pèr eximpe, des papars ed l'innée, ech gingin artificiel qu'ont achteure eds ordinatures o coèr, des bieus phénomènes ed société.  I put étou i avir des dessins foaits pèr eds éfants o unne nouvèle fille qui vo s'mérier et qui s'présinte às nouvèle famille. On causons casi ed toute casi conme os voulons.

Os pouvons croère qu'i o mie ed problinme, mais pour mi, cht'innée, i in o un : ches troés o quat gins qu'écri'te din l'première gasète ont mie ieu l'tans d'écrire din l'deusienme. Z'avoai'te, conme ches eutes, un moés pour écrire quèks lignes o dessiner, et z'ont rin écrit o dessiné.

Donmage ! Ej su trisse, pour l'famille et ches gasètes, et un molet in prousse.

 

J'espère qu'in déchimbe cho éro cangé.

 

Boinne jornée.

Poéyer à rin foaire

Innui, ej sus àm'moaison, poéyer pour rin foaire.

In vrai, ej sus poéyé pèr unne gin qui vut qu'ej foaiche grève pour li, piq i put mie l'foaire li-minme.

Cho surprind, mais ej vos mi habituer.

Boin mardi.

Des moukes in ivèr

Maginez !

 

Din unne moaison, unne fanme est mer-nud et unne gin arrive. Feut qu'ale s'seuve. Et ale s'seuve. In infilant és boaiyète et in inmnant ches eutes vetemints.

 

A l'cour, in courant, ale dit à un onme qu'est avuc ale :

 

- "J'o mie ieu l'tans ed mette ém tchulotte !"

 

Et l'eute d'i réponde :

 

- "T'es mie obligée ed mette unne tchulotte, vu qu'in ivèr, i o mie ed mouke."

 

D'après ch'film "Tnue ed soérée" vu ièr au vèpe.

Ches tiots mouchoèrs

Il existe unne canchon chu ches tiots papiers, et un film chu ches tiots mouchoèrs.

Innui, mi, ej causerai d'un tiot mouchoèr qui m'pose un sapré problinme : ch'est un mouchoèr in tissus eq j'o truvoé din l'poke d'unne vieille casake qu'ej mets granmint ed keups, pèr eximpe pour foufter à l'cour o keuper du bos.

Pèrmi mes problinmes, seuchez eq ches mouchoèrs in tissus, à m'moaison, os avons pu edpi eds innées.

In puss, i sanne eq ch'est un mouchoèr ed fanme o d'fille, vu s'taille. Ureusemint eq ch'est mie unne tchulote eq j'o démuché din m'poke ! Et ureusemint qu'ém fanme o fiat.

A qui-jou qu'il appèrtient ?

Chi unne gin l'sait, qu'ale mé l'diche. Et chi ch'mouchoèr i li appèrtient, j'i rindrai, prope.

Boinne journée.

Causez conme i feut

Unne bèle-soeur, fanme d'un ed mes frères, s'otchupe ed ches vius qui res'te din l'ouest del Sonme.

 

Et vu ech nombe ed vius qu'i o, ale o des gins qu'ouve'te avuc ale, et pour l'aidier, os comprindez. Is doé'te don i obéïr.

 

Pèrmi ches gins-lò, i o unne fanme à qui ém bèle-soeur o apprins à dire, quanq ale rinte din chin burieu, "Bojour, Mdame D*."

 

El fanme, l'o bin comprins. Achteure, quanq ale arrive, ale dit à m'bèle-soeur :

 

- "Bojour Mdame D." Cho, ale o comprins.

 

Pi ale ajoute :

- "Ch'est ch'brin din ch'gardin".

 

Pour dire qu'i o granmint ed désorde din ch'burieu d'ém bèle-soeur.

 

I sanne qu'ém bèle-soeur, ale éro toudi edl'ouvrage** avuc ches vius, et avuc és collègue.

Boinne jornée à tertous.

 

*D : ch'est conme mi, don, ej muche.

** Chin causer ed ches tiots-éfants qu'arrive'te cht'innée et de chti qu'ale o djò.

Unne bèle phrase

Din ch'live "Et quèks keups j'o conme unne grinde idée"- ej vos in o causé i o quèks tans - il est écrit, à l'première page ed l'introduction:

- "El vie est foaite ed gins qui voé'te, qui cause'te et qui pinse'te ; chin quoé, ale est rin."

Busez !

Conme ej vos l'avoais écrit, j'o mie ieu dzoin ed lire granmint ed pages pour ainmer ch'live.

A suive, et à béto !

Unne saprée comète

Min pu jonne frère ainme rbéïer ches étoéles. Et ches planètes et ches éspoutnikes. Et des keups, quanq il o granmint ed canche, un cailleu d'étoéle, unne figée d'étoéle, o bin unne comète.

 

Feut l'intinde causer !

 

- "Min frère, lò, t'os chl'Etoéle dech bértcher pi Marche, des planètes, pi lò, Ches Pléïades, pi lò, Syriuche, él Nébuleuse d'Orion, l'Grinde Orse pi l'Tiote,...".

I n'in connoait granmint. 

 

Syriuche, à main gueuche, et Orion

 

Este smangne, l'o vnu in vagances avuc és fanme, des vêtemints, et unne paire ed jumelles, pour rbéïer ches tans et ches étoèles et toutes ches eutes coses présintes lò-heut.

 

Et il o ieu del canche : i avoait, in début d'és smangne, unne comète eq li et mi avons bin vu. Durant troés nuits. Ureusemint ! Car ch'prochain keup qu'ale rviendro, l'comète, ch'est din chincante-mille ins.

Mi, j'o étou apprins qu'i avoait unne étoéle qui lonmoait Aldébaran. Casi qu'on diroait eq chin tiot nom i o étè baillé pèr deus gins qui buvoai'te un keup à l'santé ed leus pérints et qu'on dit "A tes pérints".

A mzure eq ches gins o conté cho, ch'o dvenu ch'tiot nom d'achteure.

P't'ête ! Mettons.

Disez-mi chi os ainmez étou rbéïer ches étoéles, chi os avez vu l'comète l'eute jour. Quanq os savons qu'ale mzure tchinze millons ed kilomètes, os avez du l'aperchuvoèr.

Bec à tertous, et grind merchi à min frère et m'bèle-soeur d'avir évnu nos vir.