Os sonmes libe ed nos esprimer.

Sét janvié deus-mile-tchinze.
Din min poaiyis, os sonmes libes d'écrire, ed dessiner, ed pinser et d'causer ed quoé qu'os voulons, quanq os voulons. Os sonmes libe ed nos esprimer.
Ej préfère moérir dbout qué d'vive à gron.

Vint-uit septimbe deus-mile-dis-uit.
Ej minge del vianne et soutiens ches bouchers et ches abattoèrs.

dimanche 29 novembre 2015

T'es mie cap

Tertous, ej pinse, o djò intindu ho : "t'es mie cap ?". Ho vut dire, tu l'sais : "T'es mie capabe ...".

Pèr eximpe, t'es mie capabe ed nager din ch'fluve ?

In vrai, ureusemint pour ti, eq t'es mie cap ed nager din ch'fluve. L'eute jour, j'os lu din un jornal eq des pompiers ed Rhône-alpes avoai'te nagé din ch'Rhône et avoai'te ieu granmint ed mau aprè. Avoai'te t-is bu un molet d'ieu dech Rhône ? J'in sais rin !

Ej profite dechl'artike pour causer dech climat. Dech trinte novimbe ach onze déchimbe, fin bieu jour à enn'mie oblié, i o ech cop vint-et-un à Paris. Pour causer climat.

Quoé qu'ho vut dire Cop vint-et-un ? Rbée chu internénet : "Conférinche ed ches Nations Unies chu ches cangemints climatiques".

Alors, pourquoé cop et pourquoé vint-et-un ?
Cop, ch'est vu eq not présidint connoait mie bin ech picard ; l'os confondu cop avuc cap, ed capabe,

Et vint-et-un, ch'est qu'i veudroait qu'ech onze déchimbe, ches chint-quarente-sèt présidints, roés o p't'ête dictateurs, o leus minisses, qui sont ach'Cop vint-et-un vot'te vint-et unne coses pour eq not planète fuche miu bèle un jour. "Os sonmes cop ed foaire vint-unnes coses pour inde bèle not planète". Ej précise eq lò qu' is cause'te mie d'arter ches djerres. Malureusemint !

Pour mi, ech première cose à foaire pour eq not planète fuche miu régalante à vive, ch'est d'arter ed prinde des avions pour aller foaire des photos. Ch'est seur qu'in avion, ch'est des keups granmint miu et puss aisié ed foaire ed bèlés photos. Mais i m'sanne eq ch'est mie obligé.

O alorss, avuc eds avions à pédales ! Mais ho, ches présidints et ches photographes, is sont mie cap.

2 commentaires:

  1. Quante j'ai vu COP j'peisoés coér un coeup qu't alloés nous r'berdler dé ch' co !!.....LOL....Pour n-n'ein r'vénir à chol cop 21 ; jé'n sais mie si i sront tartous CAPABE ed démucher ed bouénes idées pou no planéte ! .......Mais n'y o éne cose qué j'sais mi .....ch'est qu'is sont CAP ed vous foute el bren lundi su chés routes quante chés paures ovériers is vont s'n aller ouvrer ! adé et bouén diminche ...ech Zéf

    RépondreSupprimer
  2. Dens min premier mot d'billet j'ai mérqué peisoés in plache ed peinsoés ! éstchusez me ! j'viens d'maperchuvoér étou eq quante o buque d'sur " aperçu" o n'peut pu corriger ! j'el sérais pou ch'prochain coeup !........In dvisant d'CAP ......Mi j'resse su l'cote d'opale ....pi quante o dit a quiqu'un t'os passé l' CAP ? ...cho vut dire " ça y est tu es en retraite ? " ....adé

    RépondreSupprimer