Photos ed gardin

Ièr, apré nonne, ej vouloais foaire des photos ed gardin. O dech gardin ed min voésin.

I avoait des courges in fleur, qu'i m'sanne eq ch'étoait.

Pi des mrises.

Pour les prinde in photo, j'o grimpé din chl'abe.

D'un keup, ej me su dit eq cho sroait miu aisié ed les avoèr din des sieus. Alorss, j'in o tcheullé chonc sieus, pi j'o foait d'eutes photos. Miu aisé.

Apré, ej les o ruées. Quoé eq j'éroais pu in foaire d'eute ? Les bailler à minger à des coéchons ? J'in o mie. Les rmette din chl'abe ? Mie possibe !

Et ti, quoé eq t'in éroais foait ?

Foaire ech catéchisme

Sinmdi, i o uit jours, unne fanme vient m'vir et m'dminde chi ej vourroais mie foaire ech catéchisme l'in prochain à des galibiés ed dis o onze ins. Eq des garchons, i m'sanne qu'ale m'o étou dit.

Pi ch'est tout. Rin d'eute. Apré, os avons bu, mingé et canté. Rin d'eute.

Kmint vux-tu q'ej buse avuc cho ?

Ej sais mie ech nombe d'eures, ches jours, ches eutes coses à foaire et quoé qu'ej pux, o mie, foaire o dire !

Tiote, chi, tu lis cho, répond-mi.

Rtourne ouvrer

Cho i est ; Echl'étchipe ed Frinche, qu'est jonne, vo rintrer. Ches alminds étoai'te mie puss fort eq nos, mais is ont gaingné. Rin à rdire.

Dech keup, l'parade dech quatore juillet sro ech quatore juillet.

Etpi, ches gins vont pouvoèr miu ouvrer. Edpi quèks tans , i n'o qui passoai'te miu ed tans à causer fotbal in buvant un ju qu'à ouvrer.

Miu ouvrer, mais mie innuit ; I n'o granmint qu'ouvre'te mie ech sinmdi.

Eute cose : chi ch'est tes âges innuit, j'espére coèr eq t'ouvres mie. Et j't'foais un bec. Et comme cadieu, ej te rcauseroais mie ed fotbal.

Ches canjmints

Achteure, os êtes mie granmint à avoér inditcher ches chonc photos ed min blog, chu ech gauche de chti lo, eq vos ainmez ech miu.

Coèr dis jours pour juer.

Bec à vos

Ech ju d'ballon

Ej vux mie coèr t'causer ed fotbal, mais d'un ju bin d'amon nos : ech ballon jué avuc ches poings.

Pour juer, t'es chu un terrain ed soéçante-chonc métes chu douse ed large.

Feut un ballon, in tchuir, d'inviron quat-chint-soéçante grammes. I rind ches avant-bros rouves.

T'os sis jueux pèr étchipe, ch'Foncier , chés deus Basses-volées , ch'Mitan d'corde et chés deus Cordiers. Pour kmincer, ch'foncier doét livrer ech ballon in tirant edpi unne line ed tir ; Ech ballon doét dépasser el line del corde qui indique unne distinche à foaire ed miu ed dis-uit métes.

Pi l'eute étchipe rinvoé directemint aprés mie puss d'un rbond.

Pi toudi feut rinvoéyer pour qu'ech ballon passe à un momint el line ed fond d'unne des deus étchipes.

I n'o qu'avinche'te, i n'o qui ertchule'te. Un keup d'un côté, un keup ed l'eute.

Ch'est fin bieu à vir.

Et ches noms ed ches étchipes qui ju'te pour ête campion ed Frinche ! Villers-Bocage, Talmas, Beauquesne, Nesle, Louvencourt. Eq du bieu monde.

Ch'est achteure, in étè, eq cho s'jue. Profite-s-in pour démucher. Pèr eximpe, tous ches tchinze dech moés d'eu, à la Hotoé, à Anmyin.

Vraimint mie d'canche

Un gars est amon li, din ch'cinse.

I vo din ch'cour, et comme souvint, mèrche chu des plankes posées au mitan dech cour. Mais lo, ches plankes s'berzille'te. Ech gars tcheut din ch'treu dsou ches plankes, avuc ches plankes. Quat mètes ; Il o du mau.

Quèks tans aprés, i o des gins qui s'dminde'te o qu'il est. I s'met'te à l'tracher.

Ej sais mie qué eure ch'étoait, mais i in o un qu'o mie vu ch'treu. Et qu'est étou tcheut n'din. Chu l'eute, qu'étoait toudi lo.

Cho t'foait rire, mais is ont du mau.

Achteure, chi ej te conte cho, ch'est eq ches deus ont été értruvés. Tant miu.

Ej pux étou écrire qu'os avons des présidints qui sont tcheus din un treu. Mais ch'est mie l'minme treu.

Nicolaïef Popovitch Nichtérovitch

- "Ch'est qui chti lo ?" Eq tu t'dis. "Ech nouvieu agint scret zéro zéro sét ed Ruchie ?"

Nin ! Rin à vir.

Ch'est un gars qu'ej voéyoais ed tans in tans quanq j'étoais jonne. Ej su coèr jonne et je l'voés coèr, mais bin moinss.

Ech Nicolaïef Popovitch Nichtérovitch est un gars bin, eq j'ainme granmint, comme chi ch'étoait min frére, et qui vut toudi eq cho fuche juste pour tertous.

Dech keup lo, ch'est mie toudi aisié ed vive o d'ouvrer avuc li. Mais ch'est possibe. Pour cho, i feut qu'i vuche bin t'acouter. Et i n'in mie toudi invie.

Mi, j'o ed saprés souvnirs avuc li. Quanq os voéyoème, os avons souvint jué et ri insanne.

Vivmint ech prochain keup o j'le voérai o qu'i m'téléphonero.

Bec à tertous et à li, chi i m'lit.

Eute cose : il avoait un frère, moinns jonne eq li, mais j'o oblié chin nom. Chi i n'o un qui chin souvient, qu'i me l'diche o m'l'écriche. Merchie d'avinche.

Quatore o tchinze...

...juillet.

Not présidint o ieu unne saprée idée : chi echl'étchipe ed Frinche gaingne ech keupe dech monde ed fotbal, ech parade dech quatore juillet chu ches Cans Elysés sro ech tchinze juillet.

Fotbal avant mémoére historique !

Vu nos fininches, i froait miu ed supprimer ech parade. O ed les mette chu ches Cans Elysés dech trése apré nonne à ch'quatore au matin  ; Prévoér, ch'est dgérir.

In vrai, echl'étchipe ed fotbal a gaingné mais est coèr mie in finale.

Sapré présidint !

Ech ducasse dech paroisse

Sinmdi, ch'étoait ech ducasse dech paroisse.

Rindez-vos à nu eures trinte pour prépèrer.

- "Vo-t-i pluvoér, o mie ?"

- "Achteure, i foait bieu !"

- "Ouais, mais i vo pluvoér."

- "Acoutons ch'trinsistor !".

I vo pluvoér.

- "Os frons ech ducasse din unne salle."

A nonne, i foait granmint bieu ; Avuc m'fanme et m'fille, os mingeons din ch'gardin. Pour dire !

A tchinze eures, début dech ducasse avuc chinc kilomètes ed mèrche à piés. Foait toudi bieu. Tcheu quanq minme quèks gouttes, mais os avons casi fini.

A dis-uit eures, os prépèrons pour ech messe.

A dis-uit eures trinte, ech tans est clèr et i foait granmint bieu.

- "Os pourroème foaire ech messe à l'cour", qu'ej dis, in riant din mes guernons. Eq j'in o mie.

A dis-nu eures, din l'salle, ech messe kminche. In minme tans, à l'cour, un sapré hernu.

Apré, os avons mingé, bu et canté insanne. Mie à l'cour ; I pluvoait à dague.

Min fiu est érnu

Ech fiu lo, ej t'in o djo causé ; Ch'est chti qu'alloait in prison. Feut suive !

Ièr, il est rintré à l'moaison. Ch'o foaisoait deus moés qu'os l'avoème mie vu.

Comme din unne parabole ed Jésus, ej vo tuer ech vieu cros, qu'ej m'dis.

Mie l'tans d'haper ech vieu, min fiu étoait rpèrti. Un bec à s'mère, ess seurs et chin futur, p'tête, bieu-frère et i rpèrtoais. Vir ches conmarades, qu'il o mie vu edpi quat moés, ch'est vrai.

Ch'est vrai étou eq j'o mie d'vieu.

Mais quanq minme ! Magine qu’un jour i pèrche sis moés o un in in Chine, quanq i rinte, j'i foais des nouilles.

Pelé

Unne punme. Nin ! J'éroais écrit "peler" unne punme. Pi in vrai, i feut dire "plunmer" unne punme.

Pelé, ch'est ch'roé du fotbal.

Chin vrai nom, Edson Arantes Do Nascimento. Chin étchipe, Santos fotbal club. Et chin nombe din chin dos, dis.

Ej cause ed li, vu qu'il est brésilien, qu'achteure i o ech keupe dech monde ed fotbal din chin poaiyis, et qu'au vèpe, chin poaiyis jue.

Pour mi, i o mie ieu miu q'li comme jueu ; Troés keupes dech monde ed fotbal gaingnées inter dis-nu-chint-chincante-uit et dis-nu-chint-soéçante-dis, miu ed mile buts inscrits din ch'vie, et mie ed triche. Et eds invintions in fotbal : ech bale pèr dsu l'eute jueu, o à gauche ed l'eute jueu pi i court à ch'droéte. Feut rbéer chu internenet. Ch'est fin bieu.

Os pouvons pt'ête récomparer ech tiot Messi à li, minme chi li o mie coèr gaingné unne keupe dech monde ed fotbal. Mais mie d'eute jueu, minme argintin.

Ej vux mie causer granmint ed fotbal, mais dech roé Pelé, i falloait.

Ech nid ed cigognes

Quanq tu prins ch'train, inter Boulogne chu ches mèrs et Anmyin, din ches invirons ed Rang-dech-Fliers et ch'Marquintère, tu pouvoais vir unne cigogne et aperchuvir chin nid.

Ech cigogne vouloait un bieu et grand nid ; Chin conmarade, cigogne li étou, vouloait granmint ed tiotes cigognes.

Is ont foait ches deus.

Et ch'qui dvoait arriver, quanq unne branke d'abe est casuèle, est arrivé : comme ech goutte d'ieu qui foait déborder ech vase, un beu d'bo ed miu chu ch'nid, o ches tiots qui grochi'te, ont foait cratcher ech branke. Ech nid est tcheu.

Pauvés cigognes ! Pauves voéyageux !

Mais os i pouvons rin.

I rsanne mie à un poéyisan

Ch'est l'histoère d'un onme qu'étoait poéyisan. J'écris "étoiat", mais il est p't'ête coèr.

Quanq il étoait jonne, l'o minme ieu des responsabilités pour définde ches poéyisans.

Pi, un jour, il o voulu foaire del politique.

Mes taïons, étou, étaoi'te poéyisans et avoai'te foait del politique : is avoai'te été mairre ed leu commune.

Mais ech gars dont j'te cause, li, i vut granmint miu.  Et i foait granmint ed politique. Ch'est pour cho qu'ej me dminde chi i foait coèr poéyisan.

Chi tu l'voés, tu truvaros qu'il est un boinne forme, vu ch'panche et boinne djiffe.

Mi, ej me dis qu'un gars comme cho, j'i fro mie granmint confianche. I m'sanne que ch'qui li plait, ch'est d'avoèr granmint d'argint. Et cho, ch'est mie souvint bin pour ches eutes.

A moinss d'ête un boin conmarade et d'ête, comme li, in politique.

Ertchule ed quater-vint places

Rappéle-ti echl'article ed sinmdi, chu m'fille qu'étoait érchue à ches examens.

Qué bonnur ! Os avons bu un boin keup pour ches résultats.

Mais, toudi sinmdi, ech doéyin dech fatchulté, qui, comme l'disoait Coluche, sanne n'mie les avoèr toutes, ches fatchultés, écrivoait à tertous qu'i avoait un problinme.

Fini ech bonnur. Mais ech keup était bu.

Innuit, i leu o fallu quat jours, os avons ed nouvieus résultats :
- "Rtchulez ed quater-vint places ; Nn'passez mie pèr ech case départ".
Nin ! Ej vux dire :
- "Vos nn'passez mie un deuxienme innée."

Os pourroème mie ratcher ech keup bu. Et avons mie soé.

M'fille brait mie. Mi, ej su in prousse ; J’irai bin tcheure Flipe Noéret et chin viu fusil. Mais ej pux mie.

I o un in ed miu à atinde. Ureusemint qu'em fille est corageuse et eq des gins l'ainme'te.

Ches deus nikdouilles

Deus ; Deus fanmes qui prinde'te ech minme train eq mi. Unne tiote, crosse d'inviron quarante-chonc ins et unne, miu vielle, bèle à t'effouailler.

Mais, i mont'te bin aprés mi. Dech keup, ej su toudi assis quanq is sont souvint dbout.

I m'ainme'te mie.

Ej croés eq ch'est edpi ech jour, chin pinser i foaire ech mau, qu'ej su passé dvant ches deus pour deschinde dech train.

Ièr, au matin, i n'o unne qu'o minme choulé unne eute fanme qu'alloait gintimint em laicier passer.

- "Li, il est assis. Mie nos ! I passe aprés.", qu'ale i dit. L'eute o été granmint surprins.

Mi, ej dis rin. Ej ridjole din mes guernons. Minme chi j'in o mie, et eq trinte sgondes aprés ej su djo dvant, din ch'gare.