Ech grind Poaiyis Baske

 J'ainme ch'Poaiyis Baske, edpi eq j'i o allé i o chonc ins.

Sinmdi au matin, in buvant un ju, j'acoutoais l'radio (ej pux foaire deus coses in minme tan).

Un jornaleu - i in o toudi - causoait ed ches fus qu'i avoait din Poaiyis Baske achteure :

- "Din ches Pyrénées orientales, i o granmint ed dépèrts ed fu....."

Seur eq ches Pyrénées orientales et ches Pyrénées atlintikes, sont mie loin l'unne ed l'eute.

Seur étou eq soéçante-quat o soéçante-sis, ch'est casi l'minme cose. Et p't'ête qu'ech jornaleu avoait écrit soéçante-quat chu chin pense-nikdouille et qu'i s'o, aprè, berluré en pensant eq soéçante-quat, ch'est ches Pyrénées orientales. Din ch'Poaiyis Baske.

Pour ches gins qui li'te min blog et qui n'sai'te mie, ech Poaiyis Baske est fin grind, mais in allant côté Espane et Bilbao, et mie côté Perpignan.

Os n'pouvons poin dminder à tertous ches jornaleus ed connoaite tertous ches numéros ed dépèrtemint ed Frinche.

Etpi, is nos font rire.

Boinne jornée

Ches pauves riches anméritchins

Ah! Ches anméritchins ! Is ainmen'te dire et moutrer qu'is sont sont ches puss riches dech monde.

Et p't'ête qu'i in o qu'is l'sont.

Mais seur itou qu'i in o - granmint - ed ches anméritchins, qu'is sont pauves.

Ches anméricthins dech Texas, mettons qu'is sont riches.

O bin qu'ils l'étoai'te.

J'esplique.

I o quèks jours, il o foait granmint froéd din chl'état dech Texas. Du jonmoais vu. Et du keup, poin prévu d'avir tant froéd.

Adon, din casi tertoutes ches moaisons, il o gelé. Et minme ches riches pouvoai'te rin foaire pour impétcher ho.

L'ieu o gelé. Din ches moaisons.

Achteure, i gèle pu à l'cour.

Et i gèle pu itou din ches maoisons.

Don ?

L'ieu n'est pu gelé. Mais quanq ale avoit gelé, ale o berzillé ches tuyeus.

Et achteure, l'ieu coule. Din ches moaisons. Minme ed ches riches anméritchins.

Ureusemint pour eux : is ont cangé ed présidint.

Boinne jornée

Quanq-jou qu''ho sro défini

... ?

A vos qui lisez min blog.

Os vos disez qu'ej su dvenu arland, vu eq j'écris pu. O granmint moinss.

Nan !

J'attinds qu'ech fanmeus mau vnu ed chine pèrte définbitivemint et qu'os pouvonche vive casi conme avant. 

J'attinds qu'i o des cacouilles pour vos foaire rire.

J'attinds qu'i o des fêtes ed famille, des rincontes inter gins.

J'attinds.

Mais ej pense à vos.

Corage et patieinche.

J'os du brin din min ziu

 ... et ej voés rin du toute.

Qué brin !

Surtoute pour conduire ém'voéture.

Prudinche chi os m'aperchuvoez.

Ches picards sont pèrtoute

 ... o bin ont étè pèrtoute.

Ej vos écris cho, vu qu'ed tans in tans, os truvuons des mots picards quèk pèrte din ch'monde.

Per eximpe, i o quèks smangnes, ej vos o causé dech dépèrtémint ed l'Eure, eure qu'est un mot picard..

Innui - in vrai, ch'étoait ièr à nonne - in acoutant ches jornaleus, eq j'o intindu causé del rivière Maronne, in Auverne.

Maronne ! Seuremint qu'un jour, unne gin passoait et vouloait trécoper l'rivère in mèrchant chu ches cailleus, mais l'ieu l'o mouillé et il o crié : "M'maronne !" (in pensant p't'ête à quoé qu'alloait i dire s'fanme)

Eds eutes gins qu'étoai'te lò l'ont intindu et ont cru eq ch'étoait ch'tiot nom del rivière.

Seuremint eq ch'est cho, ches esplications.

Mais chi j'o écris unne berlure, disez-le mi.

Boinne jornée.

Et chi os êtes un nveu et qu'os avez vos âges innui, cros bec à vos.

 

Un onme et unne boaiyète

Ièr au matin, pour un keup eq j'alloais prinde un train pour aller àmn'interprinze, j'o vu un onme, àl'station, qu'avoait unne maronne, conme granmint d'onmes, mais pèr dsus, l'avoait unne boaiyète. 

I m'o sanné qu'echt'onme avoait quèk cose din s'tète qu'étoait un molet poin in boin état.

Et 'l'o monté din ch'train,abillé conme cho.

Aprè, ej sais mie dò qu'il o allé et quoé qu'il o dvenu.

Et j'in o mie dzoin pour vive.

Boinne jornée à tertous.

Ed mawaises jornées

I o des smangnes, os ainmeroème qu'is n'exist'te mie. Eximpe, st'smangne.

Lisez !

Merkerdi, j'apprins eq min voésin ed soéçante-sis ins d'âges cht'innée étoait mort din s'moaison edpi, p't'ête, deus jours.

Ech minme jour au vèpe, j'apprins qu'un onke étoait étou mort alintour ed lindi.

Brin ! Merkerdi j'apprins, et diminche o lindi, is mouroai'te.

L'un, min onke, laice unne fanme, eds éfants et tiots-éfants, l'eute, min voésin, laice unne moaison vide et des glinnes.

Pensons à eux.

Dò chl'espression : bec à t'fanme et tes glinnes.

Quèks ranmintuvs :

Min onke acoutoait à l'radio Gégène Saccomano qu'annonchoait ches résultats ed fotbal ches sinmdi au vèpe, min voésin avoait un grin gardin.

Min onke, min voésin, adé !

Unne ureuse fanme

Un jour, au vèpe, unne fanme dit à chin onme :

-" Min onme ! Cho foait sis moés eq j'o poin ieu d'accidint ed voéture. Ej su ureuse."

-"Ouais ! Cho foait étou sis moés eq ches cadoreus t'ont prins tin permis ed conduire." Qu'il i répond, sn'onme.

Ech ju ed crapète

Pour juer àl crapète, feut (miu) ête à deus - per eximpe, durant ches jours, smangnes o moés dò qu'os dvez restez à vo'moaison - et avir chatchun un ju ed chincante-deus cartes.

Assis face à face et dvant unne tabe, kminchez pèr bin mélanger votre ju.

Rtornez vo'ju pour n'vir qu'ech dos ed ches cartes.

Posez aprè, chu l'tabe et à man droéte, quat cartes chatchun in les rtornant, in kminchant dvant chti qu'est in face ed vos et in vnant vers vos.

Laiciez del place inter ches deus lignes pour pouvoèr poser deus eutes lines o colonnes quanq os érez kminché.

Avuc vos eutes cartes, foaisez un tos ed trèse cartes, lonmé tos ed trèse, et un eute, ed trinte-chonc, chi j'o bin cartchulé.

Achteure, os allez kmincher à juer. Pour cho, os rtornez l'première carte ed vot tos ed trèse, et chti qu'on l'puss crosse* - carte - jue in premier.

Aprè, quanq ch'est à vos ed juer, os posez une carte noèrte chu unne carte rouve, o l'inverche, del pu crosse carte à l'pu tiote carte.

Inter ches deus colonnes, os posez chez cartes dechl'un à ch'roé, avuc l'minme couleur : carrieu, tcheur, pike et trèfe. 

Os avez étou ch'droét d'in mette à chti in face ed vos, quanq ches cartes sont del minme couleur, et voésines in puss o in moinss.

Quanq os pouvez pu juer, os mettez vot carte dech tos ed "trinte-chonc" inter vos deus tos ed cartes. Quanq os in avez coère deus.

 

 

Quanq os avez pu unne seule carte à juer, os avez gaingné.

 

Et os pouvez rkmincher unne pèrtie.

 

Grin merchi à mes taïons qui m'ont apprins à juer.

 

Grin merchi étou àms éfants qui ju'te àl'crapète.

 

 

  *echl'ordre ed ches cartes vo dech roé à chl'un, in passant pèr l'dame, ech valet, pi ch'dis... et ch'deus.

Boinne innée à tertous

Pour deus-mile-vint-et-un, ej vux qu'i o del joée din vos moaisons ; joée ed vive, joée ed s'rtruvoer.

Fuchez ureus !

Dò eq tu vienches et dò eq tu voèches

... , tu passes alintour ed Breu, din l'Eure - tiot nom dech dépèrtemint qui vient d'un mot picard.

Eximpes :

- tu vos ed Tournuche, in Bourgone, à Lannion, in Bretanne, tu passes à Breu.

- tu vos ed Nintes, in Loère-Atlantike, à Nèle, din ch'bieu dépèrtemint del Sonme, tu passes coèr à Breu.

Breu, os pouvons dire eq ch'est l'chinte del Frinche. Ch'est pour cho qu'és région est l'région Chinte.

M'fanme et mi, os avons l'canche d'avir un onke à chonc kilomètes ed Breu. Adon, quanq os passons à Breu, os artons bir un ju ; j'o rmèrké qu'os arrivons toudi alintour ed quatore eures, don, pour bir un ju, poin pour matcher.

Chake keup, ch'est un cros plaisi pour cht'onke - d'èm fanme - et s'fanme, et pour nos étou. Is sont tant ureus qu'os rpèrtons avuc unne boinne boutèle ed vin.

Sont poin obligés, mais sont ureus del foaire.

Bec à tertous, surtoute à ches deus qui rest'te alintour ed Breu, et qu'os ainmons granmint.

Em nièce Julie

Ej devroais écrire "Mes nièces Julie", vu eq j'in o deus, mais innui, ej vux vos causer d'èm nièce qui vit mie in Frinche.

In vrai, ches deus nièces Julie n'vi'te mie in Frinche. Unne vit in Urope, in Allemane pour ête précis, à Kaicherslauteurne, et l'eute, chtol-lò qu'ej vux causer, vit à ches Anmérikes, alintour, o p't'ête minme, à Tchébec.

Ches deus nièces ont un père, l'un qui warde eds éfants, des papars, et l'eute, i warde chin tchyin.

I o alintour ed troés smangnes, l'nièce dech Tchébec l'o foait l'surprinse d'érvnir vir ches pèrints, casi chin rin dire avant. Unne bèle-soeur, mère del tiote jonne fille, o ieu chin tcheur qu'o butché granmint. Dinger ! Mais tout vo bin achteure.

L'nièce, l'o passé Noë avuc s'famille, o ieu des cadieus din ches keuchures, et innui, rpèrte. A ches Anmérikes, avuc ches cadieus.

Boin rtrour, tiote ! Ch'prochain keup, préviens à l'avinche, pour qu'ej voèche t'vir et t'foaire un bec.

Boin ivèr à ti et tin cadoreus.

Ureusemint eq j'o ieu chonc éfants

 ... qu'ont né i o miu ed vint ins.

Sont toudi in vie. Ureusemint !

Mais ièr au vèpe, innui, dman et aprè-dman, j'in o eq deus à m'moaison, avuc un bieu-fiu.

Magine eq j'o ieu seulemeint troés éfants !

P't'ête qu'à Noë, m'fanme et mi éroète étè eq troés.

A pèrtir ed ches troés grinds, os in éroème ieu qu'un qu'o vnu. Et un bieu-fiu.

A pèrtir ed ches troés darains, os in éroème ieu coèr qu'un. Un eute qu'echti d'avant.

Achteure, magine eq j'o ieu seulemeint deus éfants !

Os éroème p't'ête étè tout seu à Noë !

Malureusemint, conme granmint ed gins cht'innée, surtout ches vius eq leus éfants ont voulu protégé in né vnant poin.

Un molet trisse.

Pourvu qu'ho fuche miu béto.

Boin Noë à tertous.

Pour ête seur d'ête à l'eure

 Ech miu pour prinde un train à l'eure, ch'est ed rater chti d'avant.

Crosse pensée pour ches gins qu'éroai'te ieu leus âges innui.

Unne minnière ed foaire plaisi

 - "Restez à vo'moaison !" qu'is di'te ches onmes politikes.

Et ches jornaleus.

Ouais ! Ch'est miu pour qu'ech cros mau edl'innée, et pt't'ête minme dech sièke, arte ed progresser et d'tuer des millons ed gins.

Mais rester às'moaison, quanq os vivons seule et qu'os avons alintour ed quater-vint ins d'âges, ch'est fin malaisié.

Adon, l'eute smangne, j'o ieu invie ed foaire unne cacouille et foaire plaisi : j'o offert des fleurs àm'mère et àm'bèle-mère.

J'o poin allé acater amon ches fleurisses, mais j'leu o téléphoné.

- "Bojour, Mdame l'vindeuse ! Ej vourroais offrir des fleurs à unne fanme ed vot village. Jou qu'os pourroète i amner ?"

 - "Seur ! ....blablabla, blablabla. Jou qu'ej mets un tiot mot pour i dire qui os êtes ?"

- "Nan ! 

- "Ale o qu'un fiu (o bieu-fiu, slon eq ch'est pour m'mère o m'bèle-mère) ?"

- "Nan ! Mais chi os disez mie qui qui i offe ches fleurs, cho vo l'otchupper un monmint."

L'vindeuse o ri, mi étou.

Edpi, j'o apprins eq nos mères, à m'fanme et mi, avoai'te rchu ch'boutchet, étoai'te fin ureuses, et avoai'te busé un molet.

In vrai, m'bèle-mère o busé uit eures, o allé vir l'fleurisse pi l'o dintié justch'à s'que l'eute i baille un indiche : min numéro ed téléphone.

Quanq à m'mère, l'vindeuse i avoait dit qu'ho vnoait d'un fiu ; m'mère in o quat.

Mais ches deus fnames sont fin ureuses. Au moins pour quèks jours, tant eq ches fleurs n'sront mie fanées.

Boinne jornée, et busez pour foaire plaisi à unne o des gins qu'in ont dzoin.