Interdit à piés

... qu'i pèroait.

Interdit ed passer à piés inter ech Russie et ch'Norvège, eq dit ech loé del Norvège.

Alorss, des gins, syriens, vnus lò os n'savons mie kmint mais mie nikdouilles, prinde'te unne bicyclète pour passer. Ch'est possibe, vu eq ch'est mie interdit. Alintour ed Kirkenes. Rbée chu unne carte.

I o qu'un dinger, ch'est qu'i put foaire fin froéd, vu eq ch'est in Arctike.

Soin ! Quanq t'es in Norvège, t'es in  Urope. Mais mie din chl'Union Uropéenne.P't'ête qu'apré, ch'est puss aisié.

Ch'est din dis ins

Ch'est din dis ins,
Qu'ej pèrtiro.
J'intinds mes fius, mes bèlés-filles, mes tiots éfants,
Ej les intinds in causer.

Is m'di'te qu'ho sro puss din vint ins
Qu'os avons coèr ed boins momints
A vive insanne.

Ch'est din sèt ins,
Qu'ej pèrtiro.
J'intinds mes fius, mes bèlés-filles, mes tiots éfants,
Ej les intinds in causer.

Is m'di'te qu'ej su coèr granmint jonne,
Qu'avuc un fu dsou min lit,
Ej cours fin rade.

Ch'est din troés ins,
Qu'ej pèrtiro.
J'intinds mes fius, mes bèlés-filles, mes tiots éfants,
Ej les intinds in causer.

Is m'di'te qu'is m'ainme'te,
Qu'ej foais unne fin boinne tchuisine
Et qu'is vont rvénir.

Ch'est din un in,
Qu'ej pèrtiro.
J'intinds mes fius, mes bèlés-filles, mes tiots éfants,
Ej les intinds in causer.

Is m'di'te eq ch'est mie possibe,
Eq mes tiots-éfants vont s'mèrier
Et foaire ed bieus éfants.

Ch'est innui
Eq j'os mes ages,
J'intinds mes fius, mes bèlés-filles, mes tiots éfants,
Ej les intinds in causer.

Is m'di'te boins ages ech mère,
Is m'di'te boins ages l'bèle-mère,
Is m'di'te boins ages Grand-mère.

D'unne mère, aconduite dech leu, dech rnèrd et dech bélète ed ches troés gins ed Nantes.

Mi, ej dis qu'unne mère doét mie pèrtir. Et din nos tcheur, ale pèrte janmoais.

Quanq i foait sé

... feut bir, diroait ches gins bin. Un bieu-frère l'dit, li, et ch'est un gins bin.

H'est vrai qu'i feut bir ! Mais i o mie qu'ho comme conchéquinces.

Chi t'os ches canitchules qu'os avons ieues cht'étè, ches vakes minge'te del tère.

Ho t'foait rire, mais ch'est vrai, vu qu'i o mie d'herbe.

Alorss, tu t'dis qu'is front miu ed poèds à l'vente ! T'os raison, mais ed puss in puss, ches vakes sont vindues, qu'i pèroait, in tchilo ed carcasse, chin leus boéyeus. Don, chin l'tère qu'i éroait ndan.

Donmage pour ches poéysins ! Boinne promnade à eux innui à l'capiltale. Minme chi i pleut, ch'qui sroait un combe.

In ville

... i feut miu vir unne fanme voèlée eq deus jonnés filles violées dvant tous ches gins et laiciées mer-nud.

Minme pour punir. Surtoute leu frère !

Nuit blanke

Tu l'sais, ech solé s'coutche au vèpe et s'déjoutche au matin.

Din des poaiyis, in étè, tu voées mie qui s'est coutché, vu qu'i s'coutche mie. Ches nuits sont blankes. Malaisié alorss ed dormir. Mais tu pux.

Il existe étou des nuits blankes din not poaiyis. Tu les foais ti-minme.

Et tu ranmintuvoées toudi dech premier keup o t'os foais unne nuit blanke.

Cht'étè, j'os vu deus jonnes qui vnoai'te ed foaire leu première nuit blanke :
- ech fiu ed min cousin, trèse ins, nuit blanke avuc ches boins conmarades d'école,
- Mile, min nveu, un molet miu d'onze ins, nuit blanke avuc min futur gendre, à juer chu un ordinature.

Et is sont ureus. Feut dire qu'is avoai'te coèr tchinze à vint jours ed vagances avant ed raller à chl'école. Achteure, is sont, à chl'école. Alors coutchés ed boinne eure. Et corage à eux.

Becs à tertous.

Min onke préféré

... qu'alo m'o écrit l'eute jour, m'nièce, fille d'unne bèle-soeur et d'un bieu-frère. In kminchant ech lette pèr dire bojour. Bin édutchée, l'tiote.

Ho m'o foait granmint plaisi. D'érchuvoèr ech lette.

Qu'ale diche qu'ej su chin onke préféré étou m'o faoit plaisi. Ej su fièr, mais ho m'o granmint gêné étou ; ej su mie tout seu comme onke pour ech fille lò. Chi ej cartchule bin, ale in o sèt, d'onkes.

Boin ! Ale est jonne, m'nièce ! Et p't'ête qu'ale érchut mie ed lette ed ches eutes onkes. Qu'ale fuche ureuse qu'ej li écriche, ej vux bin. Minme chi j'érconnais eq j'écris comme un coéchon, Mais qu'ale o écrit eq j'étoais chin onke préféré ?!

Jé dminde à ches pèrints d'i esplitcher qu'il feut torner sèt keups ech langue din ch'bouke, o chin crayon din ch'man, avant ed causer o d'écrire. Pour enn mie vexer ches gins.

Minme chi ej su p't'ête, pour ed vrai, chin onke préféré.

Bec à tertous, à m'nièce, et min conmarade Guemlu qu'i m'o rin écrit edpi granmint ed tans.

Crosse pinsée pour tous ches jonnes qu'i rvont à chl'école dman.

Din qué sins tu vos

Dis-sèt eures trinte, l'eute jour, din ch'train, vu eq j'o rkminché à ouvrer, l'fanme annonce :

- "Mes gins, os arrivons in station d'Anmyin. Correspondance pour St Kintin, voée unne à dis-sèt eure trinte-quat, pour Advile, voée deus à dis-sèt eures quarante-et-unne, et pour Pèris, voée unne à dis-sèt eures chincante."

Advile, voée deus à dis-sèt eures quarante-et-unne ! Os in vnoème, d'Advile. Alorss, pourquoé inditcher ches trains qui rpèrte'te à Advile ?

Minme chi ho put aidier un o deus cacouilles qu'étoai'te p'tête din ch'train. Mais seulemint ches cacouilles !

Morts pour nos

I o soéçante-et-onze ins et puss, eds anméritchins, eds inglès, des canadiens et eutes gins sont morts in Frinche pour nos seuver d'un cros nikdouille et ed ches conmarades nikdouilles étou.

Michel Sardou, ech canteu, cantoait :
- "Chi ches ritchins étoai'te mie lò, os sroème tertous in Allemane...."

Coèr achteure, des ritchins et eds inglès nos seuve'te.

Respect.

Moutrons echl'eximpe

... qu'i feut dire à not Présidint, et surtout à ches conmarades socialistes.

Ièr, ej té causoais ed not minisse picard qu'iro mie à La Rochelle causer avuc ches socialistes.

Et bin, innui, ej dis à ches minmes socialistes, qui nos gouverne'te, qui feut moutrer l'eximpe.

Comme pèr eximpe, in foaisant ouvrer des frinchoais qu'ont dsoin d'ouvrer pour vive, et mie des eutes, pèr eximpe des roumains, vnus ed leu poayis, et poaiyer moinss eq ches frinchoais.

Dsoin d'ête socialiste

... pour ête minisse .

Nan !

T'os qu'ò vir not minisse picard, Emmanuel Macron ! L'est minisse edpi miu d'un in, mais mie adhérent ach pèrti socialiste. Mie croéyabe, mais vrai.

Et ch'est pour ho qu'il iro mie dman à La Rochelle causer avuc ches eutes minisses et ches socialistes. Ej pinse qu'il o bin raison.

Ch'est mie, étou, vu qu'echl'étchipe ed rugby ed La Rochelle o perdu diminche ach rugby conte Clermond ferrand, in juant à La Rochelle. Ho, not minisse picard ch'in otchupe mie et n'chi intéresse mie. Qu'i m'sanne.

Jésus et Mèrie

J'os vu Jésus et Mèrie. Mie in film o in images, mais in vrai. Des gins bin régalants, et avuc qui j'os bin causé.

Jésus, ménuisier. Comme l'étoait Zèfe.

Tu m'croés mie !

Ureus fuche'te ches gins qui m'croé'te chin avoèr vu ed photos ed quoé qu'ej cause.

Fabritcher des montaingnes

Ej vos os souvint écrit eq j'ainme mèrcher in montaingne. Mais des montaingnes, i n'o mie pèrtoute. O des fins tiotes.

Eximpes : din ch'Nord-Pas ed-Calais, t'os ech sommet à Anor, in Avesnoés, à deus-chint-soéçante-et-onze mètes de heut, pi à Baives, toudi in Avesnoés, avuc ech Mont ed Baives, à deus-chint-trinte-nu mètes de heut, et apré, inter St Omer et Steenvoorde, avuc ech Mont Cassel à chint-soéçante-sèse mètes de heut.

T'os comprins qu'ech région lò est comme unne planke.

Alorss, ches gins dech Nord-Pas-ed-Calais ont inventé des montaingnes ; avuc ches vius terrils ed carbon, abindonnés. Miu aisié d'in foaire unne montaingne eq d'inlever ech carbon ed lò.

Is ont foait des pistes pour skier, in étè comme in ivèr, et d'eutes pour mèrcher. Des montaignes ed chint-quarante mètes de heut !

Pour ech Tour ed Frinche ed ches bicycleus, ej pinse qu'i feudroait foaire unne voée fin droéte, d'in bos à in heut, pour complitcher un tiot molet l'course. Chin quoé, ches coureus verront mie qu'i avoait unne côte.

Crosse pinsée pour ches anciens ouvreus ed ches mines ed carbon.

Crosse pinsée étou pour min frère qu'o ches ages innui.

I éro-t-i de l'ieu

Un mardi, in rintrant avuc ech train, j'os vu, chu un eute train, unne réclame pour unne course à piés à Rennes. In Bretanne, pour ches gins qui sai'te mi ò est Rennes.

Ch'étoait unne course mie ordinaire :
"Pour chatcun ed ches kilomètes foaits, i éro un arbe ed planter in Ethiopie.

Ethiopie, in Afrike.

I éro-t-i del'ieu pour eq ches arbes i pousse'te ?

Bin ouais ! In Ethiopie, contrairemint à ch'que tu pourroais croère, i pleut granmint din des indroéts.

Mais pourquoé vouloèr planter des arbes lò-bò ? I sanne qu'i in o djò granmint ! Ch'est p't'ête ches arbes ed ches courses d'avant ?!  Magine ! Quarante kilomètes pèr coureu, avuc mile o deus mile coureu pèr in, et t'os inter quarante-mile et quater-vint-mile arbes pèr in ed plantés. Mettons inter vint-chonc-mile et soéçante-sis-mile qui rprinde'te.

P't'ête étou qu'ech gins qu'organise ech course o un cousin in Ethiopie ?

Min bieu-frère, qui participe à des courses comme ho, m'o janmoais causé dech course lò. Quanq i lira min blog, p't'ête qu'il éro invie d'i aller. Pour découvrir Rennes, et offrir unne quarantaine d'arbes à ches éthiopiens.

Rsanner à Onke Zèfe

Onke Zèfe étoait un frère à min père, qu'est mort, jonne slon mie.

Ch'est li qui m'o apprins, o bailler l'invie ed foaire des "becs à Onke Zèfe", des becs comme Onke Zèfe, avuc unne bèrbe ed deus o troés jours et in frottant in molet conte l'eute joue. Comme font ches vius jueus ed rugby in mélée à ches jonnes.

Tous mes éfants connaisse'te ches "becs à Onke Zèfe".

Mais diminche, in mèrchant, j'os pinsé étou à ches cacouilles que foaisoait echl'onke Zèfe.

Pèr eximpe, un jour, apré un interremint ò il avoait fin bin canté ech "seigneur , prinds pitié", in latin, i m'avoait inmné bir un keup. Et lò, il avoait kminché à foaire des cacouilles à troés o quat jonnes alintour ed vint ins. Des jonnes qu'i connaissaoit mie. Mi, j'étoais mie à mn'aise.

Alorss, in mèrchant et in pinsant à ho, ej mé su dit eq j'i rsannoais, chin m'in ête rindu compte.

Ej pinsoais à l'cacouille foaite au matin ; unne fanme, avuc un papar ed dis moés din ches bros, avaoit acaté un lite ed vin rouve.
- "Ch'est pour vot éfant ?", eq j'i dminde.

- "Nan !",qu'ale m'répond, "ale, ch'étoait don unne fille, ainmeroait mie ho".

Becs à Onke Zèfe, lò ò il est, à s'fanme, m'cousine et mes cousins, leus éfants, becs à min père, min bieu-père, qui sont avuc Onke Zèfe et qu'étoai'te mie ches darains à foaire étou des cacouilles.

Grimper des mèrches

... fin rade.

Il existe, in Bretanne, ech championnat dech monde dech grimper ed ches mèrches dech phare, fin bieu et à vir, d'Eckmühl.

Ej précise qu'ech mot Eckmühl qui sanne alsacien et est in vrai, d'origine allemande. Mais ech phare est bin in Bretanne.

Grimper ches mèrches dech phare fin rade ! I n'o deus-chint-quater-vint-dis.

Achteure, ech record est ed quarante-sèt sgondes. Et ch'est mie mi qui l'o, mais un tiot jonne ed dis-uit ins, in deus-mile-quatore. L'prochain championnat est ech vint-deus dech moés d'eu. Et quanq os avons visité, avuc m'fanme, os avons croésé des jonnes qui ch'intrainoai'te ; un jonme onme qui intrainoait unne jonne fille. I couraoit drière l'bèle fille. O apré ?!.

Mais j'éroais achteure ech rcord dech grimper avuc un so ed dis tchilos chu ch'dos ; in uit minutes. I péroait qu'ej su tout seu à avoèr mouter avuc un cros so chu ch'dos ! Mais ch'étoait mie pindin ech championnat dech monde.

I o quèk cose qui m'foait rire : causer d'un championnat dech monde, avuc unne seule course. Alorss qu'i o granmint d'eutes bieus phares alintour, comme ech Vieille, Penfret. ches Poulains, ches Cailleus Noèrts, Saint Mathieu, ech Cailleu, Tète, chu ch'île dech minme nom, Bénodet o dech Créac'h, pèr eximpes.

A ti, lecteu, qui o mie invie ed courir, ej té conseille quanq minme d'aller vir ches bieus monumints eq sont ches phares. Din unne bèle région.