Uit sgondes

Deus étchipes ed basket-bal doé'te rjuer ches uit darainnes sgondes d'un match ; I avoait eu du catch àl'fin dech premier vrai match.

Uit sgondes !

Imagine !

Deus jueus :
- " T'inlève mie tin survetmint ? "
- " Nin, éj sus rimplachant. "
- " Bin ! Pourquoè t'os évnu ?"

Deus supporteus :
- " Tu vos vir ech match ? "
- " Ej vos essayer. "
- " Fuche mie in rtard !"

Un jueu :
- " Chef ! Feut-i ch'écœuffer avint ?"

Ureusmint eq ches deus villes ed ches clubs sont mie granmint éloégnées l'unne ed l'eute !

Un boin eximpe

Qui qui donne l'eximpe ?

Un grind champion ed courses ed voétures o eu un accidint chu ches nèges. Achteure, il est mie mort, mais tout comme.

Ches gins brai'te ; Mais ech gars avoait mie respecté ches régues ed sétchurité, à part un casque chu ch'tète.
Boin eximpe pour ches fans et ches eutes.

Un boin tiot live

Il est foait ed dessins, simples, comme ch'ti in dsou

Chin nom, "La guerre".  Ch'est des tiots contes chu ches guerres ; Toutes ches guerres.
Pèr eximpe, Jules César, mais étou ech fotbal, eh ouais ! , o ches fanmes, étou.

Chin auteu, "Bastien Vivès".
A ches éditions "Shampooing".

A t'santé, Etienne

"Etienne, Etienne, Etienne", ch'est titre d'unne canchon d'i o sèse ins.

"Saint Etienne", ch'est ech nom d'unne ville in Frinche o i o ech plu grind club ed fotbal ed Frinche.

Mais Etienne, ch'est surtoute ech tiot nom d'un gars qu'éj connoais et qu'o un tcheur imminse. Mie artificiel.

I vut toudi ét foaire plaisi et rire.

T'os des gins qui sont vius o tout seu ; I les prind din s'voéture et s'améne ches leu frère, leu seur o à Lourdes, Lacanau o Forcalquier, pèr eximpe.
Ed tans in tans, il invite deus-chint gins ; Ch'est estraordinaire et granmint régalant pour tertous.

Tu l'os p't'êe djo vu : in novimbe et déchimbe, i passe ches sinmdi et diminche à foaire ches patchets pour ches cadeaux ed fin d'innée, ed manière à rétchupérer edl'argint pour unne association qui s'otchupe eds galibiés.

Innui,ch'est ech fête ; Alorss, à t'santé, Etienne. Viens m'vir quanq tu vux.

Un ange

Tu marches, tu marches. Pindin troés jours. Avuc tin cousin.

Tu grimpes, i foait keud. Tu deschinds, i foait keud. Tu grimpes coèr, i foait toudi keud.

Tu dors sous unne tente, i foait mie keud. Pi, tu deschinds, tu rgrimpes...



Au beu ed troés jours, à deus-mile-chint métes d'altitude, tu voés un lac.

I foait keud, tu t'baingnes.



Et lo, à soéçante mètes ed ti, t'os unne fille qui sort ed l'ieu, avuc unne pieu blanke comme un linchu, del tète à ches pieds . Ale n'o qu'es pieu chu ale. Ch'est unne alleminde.

T'os coèr du kmin à foaire ; Tu t'in vos. Tu croèses eds espagnoles. Foais mie ed dmi-tour, t'os un eute cousin qui t'attind. Ch'est cho, l'avinture.

Noë et ch'fin d'innée deus-mile-trèse

Ach momint edl'innée, granmint ed monde vut foaire el fête, avuc ech famille pi ches conmarades.

Minme in mile-nu-chint-quatore, des seudars alleminds, frinchais et britaniques ont arté de s'tirer dsu pour ech nuit dech vint-quate déchimbe. I avoai'te minme canter et bu insanne.

Mi étou, éj voudroais vir cho, in Syrie, à Bangui, à Gaza, ach Caire, à Kiev et pèr tout din ch'monde

Paix à tertous.
Joéyeux Noë.

Ech vint-troés déchimbe

Ech date lo, éj pux mie l'oblier.

Mie à keuse ed Noë deus jours après o ed ches nèges chu ches voèes i o troés ins, mais pour ches ages ed min père. L'o bieu avoèr brisié es pipe, j'oblierai janmoais.

Bec éspécial à m'mère et mes frères.

Laicez vnir à mi ches tiots éfants

I o un onme qui cause d'unne estrade à un mile d'eutes onmes, fanmes et éfants.

Din seul keup, i o un tiot, ed sis o sèt ins inviron, qui grimpe chu echl'estrade et vo vers echt'onme qui continue ed causer. Ches gardes du corps bouge'te mie et di'te rin. I sanne qu'ech galibié o mie ed coutieu chu li et ch'est mie in Améritche eq cho s'passoait.

Ech tiot, i jue, rbée echt onme, s'assit chu ech cado, ch'est miu confortable et bieu qu'unne caïelle, et randonne mie. I sanne qu'i fuche autiste. Ej m'dminde quanq minme quoè qui foaisoai'te ches parents.

Echt'onme qui causoait n'o rin dit ; Pouvoait mie, ch'est ech pape François. Chin patron, i o deus-mile ins, o dit : "laicez vnir à mi ches tiots éfants." I l'o obéi.

Noères o blankes

Attincion : j'o mie écrit "noèr et blanc" o "black and white".

J'o bin écrit "noères" o "blankes".
Comme ches fanmes noères o blankes ed pieu qui cant'te du blues, du jazz, du gospel o comme cho ; Avuc unne bèle voéx, chin avoèr à djeuler din un micro pour ête intindu.

Mahalia Jackson, el seur à Mickaël, éj croés, Aretha Franklin, Adèle, Nina Simone, Suzanne Boyle, Dee Dee Bridgewater, feut és acouter canter.

"Pardon mie croéyabe", "En me laice mie ête mie comprins", "Ej reuvoais un reuve", "Duche nuit, chainte nuit", "  o "Amour à vinde", pèr eximpes, sont des canchons eq ches fanmes lo cant'te bin.

Ch'est bieu d'acouter cho à Noë. Qué canche, Noë, ch'est din quéques jours. Boin Noë à tertous !

"Cause à min tchu,...

...ém tète a du mau."

Tu connoais echl'espression ?! J'o vérifié.

Em tète : 
Ej sus mie l'inspecteu Colombo, mais m'fanme m'dit souvint : "- t'os oblié cho ?", "- tu rappéles mie ed cho ? "- ch'étoait mie lo."
Ej croès mie avoèr Alzheimer, mais feut vir.

Min tchu :
A min âge, feut surveiller ech colon. Qui s'dit !
"- Ches tests sont positifs" qui dit ech sérusyin ; "- Os avez du saing din ch'brin."
Brin !
A l'ôpital, i di'te qu'i o rin à ches boéieus. Ouf !

"- Os avoète minger du boudin avant ches tests ?"
"- Jé m’souviens mie."

Chi tu causes à min tchu, i t'dit mie granmint ed keuses, mais i put t'réponde. I put. Feut mie tracher à l'comprinde.

Ech frinchais, ch'est complexe.

Tu voès unne bélotte nana et, in frinchais, tu vos i dire :"- vous êtes belle."

In principe, avuc "vous" et ch'verbe "ête", t'accorde "belle". Tu dvroais mette un "s". Mais, tu n'os qu'unne bèle fille dvant ti. Tu vourroais miu ed bèles filles avuc ti, comme un minichtre italien, mais lo, din echl'eximpe, i o n'o qu'unne.

Mie, éj dis :"- t'os ed bieus ius, tu sais". O, "t'es bèle comme un car nouvieu."
J'o mie ed doutes chu chl'ortographe. Comme quoè, ech picard est unne langue aisiée.

Coèr que "unne tète", ch'est, in principe, chu tes épeules, et ches tètes, ch'est el poétrinne ed ches fanmes. Feut mie confonde.

Quoè qui feut foaire ?

Un jour qu'éj me promnoais chu ches bords dech Lot, j'o vu unne pincarte o ch'étoait écrit "Interdiction de rin lancher din ch'te rivière".

Quanq tu voès o, tu rbées din l'ieu ; Rin ! Rin eq de l'ieu et des cailleus ! Ches gins n'obéi'te mie, ed nos jours.

 J'o foait comme eux : j'o rin lanché. Et j'o mie vu ech garde-pèke o ches cadoreus.

Deus bèles canchons

Quanq j'étoais un tiot galibié d'inviron chonc o sis ins, mes parents avoai'te un quarante-chonc tour in picard eq j'avoais granmint tchèr.

I o queques innées, jé m’souvnoais un molet dechl'air et chés paroles, mais mie dech nom d'unne ed chés deus canchons.  Chu l'air ed "In revenant de la Revue" et avuc, din ch'texte, "....din l’rue d’chés Troés Cailloux...." et "....Hotoie.....", ch'est tout ech qu'i m'restoait din m'tète.

Etpi, i o eu intarnéte ; Dech premier keup j'o trouvé, chu "http://lanchron.fr/Nattiez.htm" : "In rvenant d’chez Barnum", canté pèr André Nattiez. Tu voés ches paroles et tu pux acouter.

J'o rvu et intindu étou "Vlo Grand-mére à poussiére", del deuxienme face dech plake ed quanq j'étoais tiot.

Foais ti plaisi ; Acoute à tin tour.

Oh ! Ches bieus toèrs !

Unne foès, in vagances, éj passe din unne ville o i avoait unne foère à vakes. Avuc ém fanme et ches éfants, os i allons pour vir. In vrai, i avoait eq des toèrs à vinde ; Eq des toèrs pour foaire ches vieus à ches vakes.

Et i avoait étou ech concours dech plu bieu toèr ; Miu il est din ch'classement, miu i veut. In principe.

Quanq os sonmes arrivés, ech concours étoait fini, mais mie ches vintes. I o eu ed ches prix ! Sèt, uit, nu, dis voèr douse miles uros pour un toèr. Qu'i s'dit.

Ech jour lo, i éroait eu troés toèrs qui sroai'te vindus inviron soéçante mile uros chatchun. Mie croéyabe !

I o un gars qui sannoait connaître ches foères lo et qui disoait :
-"Chi ech père Jean acate un toèr soéçante-deus mile uros à Tiot Louis ; Tiot Louis, li in acate un pour chincante-nu mile ach'gars Gérard ; Qui in o acaté un soéçante-un mile ach ...père Jean."

Unne boucle ! Chi o t'dit mie, tu voès rin et tu croès eq ches bieus toèrs peu'te valoér inviron soéçante mile uros. Et ches eutes, qui vourroai'te unne eute foès un bieu toèr, sro baisés. Comme ech lapine à msieur l'tchuré, qu'est un marle.

Ches dorlos

J'o un boin conmarade qui ch'est crévé ches zius pour n'mie vir ech misère dech monde. I vut s'foaire keuper ches éreilles pour, étou, n'mie l'intinde.

Achl'ôpital, is ont dit ed vnir chin dorlo chu li. Rin à chin co, rin à ches doéts, rin à ches éreilles o eutes. Mie ed piercing ach boutinne dech panche.

Mi j'i'o dit, lo coèr, achteure, ches éreilles, qu'i o quanq minme des dorlos qu'i feut mie rtirer ; Ed famille.