Ej su arland

Ej su arland : Moins j'ouvre, miu ej su. Mais ej su mi Crésus : i feut eq j'ouvre.

Mi, arland, deus conséquinches :
- Pour n' mie porter min cartable trop ed timps, quind j'étoé jonne, ej mèrchoais vite. Achteure incor, ej mèrche vite ; plu ed cartable su ch'dos.
- Ej foai bin min ouvrage pour mie avoèr à rkmincher.

N'o mie el frousse pour mi ! Min patron i sait qu'ej su arland : j'y o dit avin qu'i m'imbauche.

I y o cepindin granmint d 'arland qu'ej o mie tchèr. Ej sero pour leu botter ech tchu.

Un SMS utile et régalant

J'o érchu un SMS utile, ch'est mie toujours cho, et qui m' foait grin plaisi ( ch'est incor miu) :

"- Binjour, j'o passé in scanner verdi et ches tumeurs ont diminué ed tchinze à vint per chint. Bec à vos et j'espère eq tertous va bin."

Mi étou, ej te foai un bec. J'attinds ech message qui diro eq ches cochoncetés ont dispèru.

Achteure, corage.

Unne messe ed brin

Diminche, ej su allé al messe. Cho m'arrive. Unne messe ed brin !


Normalmint, ale étoét adréchée pour ches familles et étou, pour ches éfants qui vont àch catéchisme ; Intér uit et onze ins, qui ont.

Ech l'évingile, su ech séjour ed ches morts et su ech grind abîme, i pèroait eq ch'est malasiè del chinger. P't'ète bin.

Mais mi, ej croés eq ch'étoét possibe, ed timps in timps, pindin el messe, d'esplitcher à ches jonnes ches gestes et ches mots dech curé. Rin ed tout cho.

Ch'est mie avec des messes com'o qu'os allons foaire rvenir ches gins din ches églises.



L'eute jour, j'o vu un gars qu'avoait foait quarante quate kilomètes pour unne bèle messe. Mi, éj pux étou. Ed timps in timps.

Pan ! Din ches dints.

"-Traiter ches jonnes ed con, cha preuve qu'os sommes viu."

Cha n'vut mie dire eq ch'est feux. (MER : mort ed rire)

Ech corned beef.

Ech corned beef s'acate in boéte qu'o unne forme ed trapèze et unne tiote clé per d'sous. Atincion : chin ech clé, tu mingeros mie.

Avec el viande, tu ristcheros rin ; Ale est keupée et hachée tout fin, pi bolie.  Poin ed micrope. Chi t'os mie ed dint, tu pux étou in minger.

Unne rchette : avec del salade, deus patates et unne vinaigrette ; Tu t’rapapineros

Unne parole dech Pape François

"- Ch'est mie utile ed dminder à un affolé chi l'o dech cholestérol ou si chin taux ed chuke est trop heut ! No dvons soégner ches afolures. Inchuite, no pourrons soégner  ech resse."
T'os comprind ? Quo t'in pinses ?

Ech keu ed téléphon.ne dech vint-sèt sectimbre

Barack Obama, ech présidint ed ches améritchains, et Hassan Rohani, chti ed ches iraniens, es sont téléphon.nèt ech vint-sèt sectimbre, in pacifisses. Mi, cho m'foait keud din ech tcheur. Por tertous.

Ches cartés-postales

Ed no jors, tu rchus, por tin age, tin diplonme o por t'foaire plaisi, un chint ed SMS qu'i foai'te un beco o qu'i di'te eq ch'est bin et qu'i pinche'te à ti. Pi, tu supprimes un jor ches messages.
Mi, ej su viu et j’invoée incor des cartés-postales.



In plu, ej les foais à partir ed photos qu'ej prinds mi-minme. Ej pinse eq ches gins qui n'in rchut unne en el meto mie din unne poubelle.




Des foès, i m'rmercie'te. Ches cartés-postales foai'te deus foès plaisi.






Ch'est ech but.

Avec quo tu minges ?

Unne boènne preuf ed maths, qu’éj saluche, dmandoait à ches élèves ed trèse ins :
-" baillez-mi ech nom d'un animal eq' minge avec es tcheue ?"

Ech recette dech picon-citron-curaçao

Trouvoè din "Marius" ed Marcel Pagnol (J'in o djà causé).

Acte I, scène 2.
César (Raimu), ech père ed Marius, et Marius (Pierre Fresnay)

César,  :
.....bin, por el dizième caup, ej vo et l'esplitcher, ech picon-citron-curaçao. Vin vir ! Tu mets d'abord un tiers ed curaçao. Foais atincion : un tout tiot tiers. Bin. Achteure, un tiers ed citron. Un molet plus cros. Bin. Insuite, un BOIN tiers ed Picon. Rbée el couleur. Rbée com ch'est biau. Et al fin, un GRIN tiers d'ieu. V'lo.

Marius
Et cha foait quate tiers.

César
Exactémint. J'espère qu'ech caup, t'os comprin.

Marius

Din un jatte, i n'o eq troés tiers.

César

Mais, nikdouille, cho dépin dech crosseu ed ches tiers !

Marius

Bin non, cho n'dépind mie. Même din un arrosoère, o n'peux mie mette plu eq troès tiers.

César

Alorss, esplique-mi commin j'in o mi quate din ech jatte.

....

El diseuse dech merkerdi

Y o bin eds innées qui n'o pu ed véprèe o ches taïons - ches pères et mères ed nos pères o mères -  contoai'te, ach coin del kminée, ches biaux contes qui foaisoai'te plaisi à leu tiots fius et tiotes filles.

In-nhui, din in tiot patlin ed France, i o unne diseuse qui lit tous ches merkerdi, à des éfants, ches contes ed chorchèles, ed leu et ch'quo trouve eq ches jonnes, intér chonc et douse ins ; i ainme'te. Ch'est mie ches live qui minque'te. Et ches tiots ainme'te et rvien'te. I ouve'te grind leu ziux, leu éreilles et n' di'te mie rin.

Mi, ej pinse eq ch'est bin ed ch'otchuper ed ches jonnes qui, com o, en passe'te mi leu timp a rbeïer el télé o internète.

Ches trottinettes

Qind t'es din ech train, tu voés des gins qu'avo unne trottinette. Des reues ed douse, tchinze o vint-chonc cintimetes. Is vien'te avec ed chez eux o vont à leu boulot avec.

Ej pinse eq dins ches deus cas, is foai'te mie granmint ed bornes por tertout el brin cho foait :
- El trottinette, quind t'es mie edsu, ch'est elle qu'est su ti. Y o mie ed rayon à ches reues ; Tu pux mie l'attacher à un pieux din l' jornée.
- Quint y pleut, l'ieu coule su et casake et tin patalon . Même i pleut pu, din ch'train o tin burieu.

El vrai avantage, ch'est pour attraper unne boène scoliose. A ti ed coésir ech pié qui foait avancher el trottinette et chl'épeule qui s'ro plus heute eq l'eute.

Ech rédeus ed vius tracteus

Ch'est un jonne - din ches vint-chinc ins - qui resse din unne grinde cinse al campagne. L'o biau ete un jonne, ech gamin o des vius tracteus (Allgaier Porsche, Société Française ed Vierzon, Someca), des carètes et unne vieille batteuse.











I l'o étou unne vieille Citroën traction avin.

Mie dzoin dech garagisse ; I fornatche din ches moteurs et ches li qui foait ches réparations . Ch'est sin plaisi.





Des foèts, tu l'vi su el voée ou din ches cans avec ces viézries.  Per eximple, au moés d'eu, i keupe ches blés avin ches battages.

Ech gamin etio corageu ; I l'o rfoait li même ches murs, ech carpinte et ech toét del moaison et ches eutes batimints del cinse.
Erbéïe el poutre qui l'o foait por es carpinte !



Eto mie arland ; Ch'est un matineux qui sac ed sin lit à sis eures et s'ercoutche à vint-deus, vint-troés ; Ch'est por o qu'ch filles s'inseuve.

El complexité dech Note Père

Ech Note Père est unne prière qu'ej di et qui m'poso problèm edpis dis-uit moès.

Note Père,
Qu'éto aux tans,
Eq tin nom soait sinctifié,
Eq tin règne v'no,

(Pindin ech timp lo, din m'tète)
Ech père, tu m' minques granmint.
J'espère eq lo où t'étio, t'es bin.
Nos aut, o s'occupo del mère du miu qu'o pouvo.

J'in éto où ?

Eq ta volonté soait fète, 
Su ch' terre come au tans.
Baille nos in-nhui not pain dech jor,

Pinse  à m' bèle- soeur qu'avio grin malur,
Et à m'fille qui passo sin code.

Pardonne nos nos offinses,

Ej cro l'avo mi di,

Come nos pardonno auchi
A cheux qui nos avo offinsé,
Et no soumet mie al tintation,
Mais délive nos dech mau,

Amen

Boin ! J'rkminche sin m'arter.

Note Père,
Qu'éto aux tans,
Eq tin nom soait sinctifié,
Eq tin règne v'no,
Eq ta volonté soait fète, 
Su ch' terre come au ciel.

T'es avec des gins qu' t'aimo bin !
Avo-tu vu min biau-père ? Etio bin régalant et j'l'aimo granmint.

Baille nos in-nhui not pain dech jor,
Pardonne nos nos offinses,
Come nos pardonno étou
A cheux qui nos avo offinsé,
Et no soumet mie al tintation,
Mais délive nos dech mau,

Amen

Brin ! incoère foèré ! J'rkminche sin m'arter.

Des foès, j'in diso quate por n'avoèr un boin. Que malur ! Ej o mie dviser su ches messes qui m'foaitte toudi braire, per eximple, qu'in ches canchions sont bèles.

Ches inochints

Ches inochints, ch'est des gins qu'avo mie foèt unne cose por elquelle étio atchusés.

In dis-nu chint et des porètes, si t'étio atchusé d'avir agriper un chuck, o povio et keuper l'tète. Si ch'étio mie ti, povio mie aringer el cose, pardi. Ej so mie combin ed tètes d'inochints sont tcheues din l'sieu. P't ête bin moins qu'ches gins qui,  edpi trint ins, sont moèr pindin qu'o leu prind leu dorlo .

Eute cose :
Achteure, y o un ménère qui butches chint mile gins avec un martieu, o disio rin. I n'in butche mile avec des cleus su un beu ed bo, o vo y invoéïer unne bafouille por y edminder d'arter.... ed mete des cleus. Ech gars  est p't ète un rédeu ed timbres. Et pi, t'os quo croère, tu n'os toudi qui y vindo ches martieus.