T'os vu ches canjmints

Russe, allemind, ukrainien, frinchais, améritchain, cousin, polonais, malaisien et eutes qui rbé'te min blog ed tans in tans, os avez vu eq j'avoais mis des photos chu ch'coté gauche dech blog.

Ej vos propose un ju : avant ech quatore juilliet, tu pux m'écrire ech nom ed ches chonc puss bèles photos, slon ti.

Feut mie mette un numéro, keuse eq ches photos pu'te canjer ed place. Keuse, étou, qu'ej pux in mette d'eutes.

Tu pux étou juer miu d'un keup.

Chti qu'i truvoe ches chonc photos ches miu ainmées et din ch'boin orde, put erbéer min blog unne innée chin poaiyer.
Ech deuxienme gaingne ech droét d'erbéer min blog sis moés chin poaiyer.

Ches eutes pu'te rbéer quanq i vu'te.

Ej vos rmerchie pèr avanche. Juez bin !

Boinne humeur et plaisi

J'ainme mie causer dech fotbal, vu qu'achteure, i o granmint d'argint din ches jueux, qui n'sont eq des onmes.

Mais aprés ech match ed verdi avuc l'étchipe ed Frinche, ej su obligé quanq minme.

T'os vu ech plaisi qu'is ont à juer insanne, et ech boinne humeur din chl'étchipe ? Ch'est fin bieu à vir, minme chi ch'est vrai étou qu'i gaingne'te ; Cho put aidier.

Mi, ej pinse eq ch'est comme ech glinne et echl'u : ch'est-i el' boinne humeur et ch'plaisi d'ête insanne qui foaiche qu'is gaingne'te, o chl'inverse ?

A ti ed vir.

Un diminche, au vèpe

Vint eures, à l'fin marche.

- "Ech'père, feut eq tu vienches m'tracher", qu'em dit m'fille, au téléphone, à chint-dis kilomètes del moaison. In braiyant granmint.

- "Quoé qu'i o ?", eq j'i dis.

- "J’arrête ech'école. Ej vux mie continuer.", qu'ale m'dit.

- "Acoute-mie bin ! Achteure, ej pux mie et'foaire plaisi ; Lo, tu moukes tin nez, réçues tes zius et tu pux t'couquer. Edman, tu vos à ches cours et t'mére vo t'vir apré nonne et au vèpe."

Ch'est quoé qu'os avons foait. Mais em'fille est mie rintrée et o continué d'aller à chl'école.

Ièr, miu ed deus moés aprés, ale étoait fin ureuse : ale o réussi ches examens.

Ch'est mie toudi aisié d'ête parents, mais i o des saprés boins momints. Merchie à nos éfants. Ches eutes momints, malaisiés, os les oblions.

Il étaoit un keup

Il étaoit un keup, un roé qui voulaoit laicier s'place à chin fiu.

Quanq i s'décido et qu'i signo qu'i arrêtaoit, esn'étchipe ed fotbal perdu chin match et, dech keup lo, chin tite ed champion dech monde ed fotbal.

Din un poayis proche ed lo, ches gins s'dmandoai'te cho : "chi, à l'inverse, not'étchipe ale perd au vèpe, not'présidint tchitteroait-i chin poste ?"

Tu n'os qu’i vuche'te quanq minme qu'ale gaingne, mais ch'est mie unne évidinche.

Ech miracle dech papar

Ej connoais unne fanme qu'a granmint ed mau à ch'panche. Edpi deus ins. Tanq ed mau qu'ale minge mie et o dvenu sèke comme unne trique. Ch'est granmint malaisié ed vive comme cho.

I sanne eq ches conmarades ed Jésus l'euche'te abindonnée, keuse qu'ale o cangé d'onme i o miu ed vint ins alorss qu'ale étoait mèriée.
Ale, bin qu'étant mie ureuse ed cho, continue d'ainmer Jésus et chin pére, et d'prier Diu. Ej croés. Ej vux dire "i m'sanne".

Ech fanme lo, ej l'o vu à ches Pâkes. Et lo, vlo qu'ale m'dit qu'unne ed ses filles a étou du mau ach'panche. Mais ech keup chi, ch'est à keuse d'un papar qu'ale o ndin.

Pour din sèse, nin, estchuse-mi, pour din sis moés.

Et in disant cho, el'fanme a granmint souri. Ale est ureuse ; ale vo ête taïonne pour un prenmier keup.

I o quèks jours, ale m'écrit pour m'annoncher qu'ale ch'o rmise à minger. Et mie qu'un molet, qu'i pèroait.

Feut mie aller rade pour dire qu'ale est dgéri, mais mi, ej dit qu'ech papar aide bin pour cho. O Diu ?

Ces jonnes, i sai'te mie

- "I sai'te mie ?"
- "I sai'te mie."

- "I sai'te miu eq ches viux."
- "Miu eq ches viux ?"

- "Miu eq ches viux !"
- "Ches viux sai'te coèr."

- "Ches viux, i savoai'te."

- "Ches viux sai'te coèr."

- "Mie comme ches jonnes !"
- "I feudroait vir."

- "Kmint eq tu foais pour vir ?"
- "Tu mets Bats, Trésor, Battiston, Giresse, Kopa, Tigana, Bosquet, Platini, Rocheteau, Fernandez, Fontaine et Amoros achteure à ch'Brésil, i gaingne'te ech keupe dech monde ed fotbal"

- "Tu mets minme Kopa et Fontaine ?
- "Ej mets Kopa et Fontaine !"

- "Ech étchipe étoait bèle, mais achteure, ale perdroait tout !"
- "Et Lioris, Sakko, Griezman, Varanne, Benzema, Debuchy, Valbuena, Matuidi et ches eutes ?"

- "Is ont gaingné ech premier match."
- "Mais i sont jonnes et i minque'te d'espérieinche."

- " Tu dis p't'ête vrai !"
- "Os voérons verdi."

- "In buvant un keup ?"
- "In buvant un keup."

Ches monumints historiques

Mie ed doute, tu connoais ech tchatédrale ed Noyon, ech catieu ed Berzé el catieu, ech viu pont d'Espalion, ches haras ed Pompadour, ech viaduc ed Garabit qui sont des bieus monumints historiques.

Ech viu pont d'Espalion

Comme, étou, ech tour Perret, ches phares dech ierre o del jumint, ech bar del marine o qu'alloait Marcel Pagnol, et ech gare ed Cauterets.

Mais ch'que tu voés chu photos in dsou, tu connoais ?

Ches panneaux in céramique pour inditcher ches directions o ch'nombe ed kilomètes qui reste à ches voèyageus,

Ches vespasiennes avuc des saprés flérinées, qu'étoai'te mie poéyantes, et lavées pèr el pleuve,

T'in souviens-ti ?

Pour mi, ch'est étou des monumints historiques. Feut mie els oblier. I foai'te étou pèrtie ed l'histoère, ch'est bin des monumints. Feut in conserver quèks uns.

Chi tu pinses à d'eutes coses, dis-le mi.

P't'ête ches vieillés étabes ?

Min père, feut j'te cause

Cho foait miu ed deus ins eq t'es pèrti et j'pinse fin souvint à ti ; Comme ej te l'o djo dit, quanq ej récite ech Not'Père, ej pinse à ti, pi à l'eute, chti ed Jésus.

Innuit, ej vo mie et'téléphoner, tu répondroais mie. Mais, ej sais eq tu pinses étou à mi et tous ches eutes eq t'ainmes. Ej dis "t'ainmes" et mie "t'ainmoais",vu eq ch'est coèr vrai.

T'étoais un sapré boin père, qu'ainmoait ech fanme et ches éfants ; Dech keup, os t'respectoème. Tous ches éfants et, dech keup, tous ches pères, pu'te mie dire cho.

Mi, tu m'os étou apprinds quoé eq ch'étoait ed bin ouvrer ; Ej t'in ermerchie granmint.

Rbée ed tans in tans ches bèlés roses ed min gardin. I n'o eq ch'est ti, ech mére et ches fréres qui nos les avoète offertes.

Vu ech diminche qu'os sonmes, ej te foais un cros bec. Pi à min bieu-père étou. Dis-i, quanq tu l'voéros.

Rmèrquabe

Prinde quat lettes : R, S, T, qui s'sui'te din chl'alphabet, et echl'I.

Tu pux écrire Ri, Si et Ti

Prinde "béri".

Tu pux achteure foaire ches noms Ribéri, Sibéri et Tibéri.

Apré, tu pinses quoé eq tu vux.

Mais bérichon, cho m'foait mie l'minme cose. Chi t'in es un, bec à ti.

Quanq à ch'béribéri, i confirme èche qu'ej pinsoais.

Mi, ej su bin ureus d'avoèr invinté ech cacouille lo.

Un tcheur ed pierres

T'os djo intindu cho : "li, il o un tcheur ed pierres !"

Mais l'os-tu vu, ech tcheur ed pierres, o vérifié qu'i i étoait ?

Mi, j'in o vu un ; Un cros. Cho surprind granmint ed le vir comme ej l'o vu. J'o minme réussi à l'prinde in photos.

Rbée !

Tu voés rin !

Appreuche-té !

Ch'est din un arbe ; Ej t'o janmoais dit eq ch'étoait din un onme. Mais cho surprind ; Dech keup, quanq tu passes lo, tu continues d'aler.

Ju : où-èche ?

Chin tcheue

Diminche, i foaisoait bieu et keud. Et mie kieu et beud, cho vut rin dire.

Dech keup, et mie keud, feut suive et mie confonde, j'o tcheuillé des mrises, chin tcheue. Avuc mes mans, et o solé.

Des mrises ; un molet comme ches cerises, mais puss tiotes et avuc miu ed goût.

Quanq em fanme éro du tans et dech corage , ale fro ed boinnés confitures, in mettant étou....des cerises avuc.

Mi, éj tcheuille, mais n'minge mie dech confiture. O avuc un gatieu "cocote", rcette dech Nord. Ej t'el baillero p't'ête un jour, ech rcette lo.

Rcette pour la-dgife

Cadieu pour chti qu'ainme ches chukes ; cho vient d'em mère, qu'avoait cho dech mère.

Din unne castrole, mette deus-chint grammes ed crème frèche et deus-chint grammes ed suc.
Touiller.
Mette chu ch'fu et toudi touiller granmint.
Quanq eq cho kminche à roussir, verser chu unne tôle et foaire des tiots morcieus.
Apré, laicier rfroédir.

Atincion :ch'est granmint malaisié ed bin réussir.

Echl'église

Tu rintres din unne église.
Tu freumes ech porte.
Tu pries.

Eux, is ont été mis din chl'église.
Ches portes ont été freumées.
Is ont braillé. Pi i sont morts

In quarante-quat.
Ech djerre étoait mie finie.

Où qu'est tin taïon

Bin souvint, chi il est mie mort, tin taïon est amon li o, din unne maison pour viux.

Amon nos, comme in Ingueltère. In principe.

L'eute jour, i o un inglés ed quater-vint-nu ins qui vouloait vnir in Frinche pour ches commérations dech sis join dis-nu-chint-quarante-quat, jour dech débèrquémint in Normindie ; I o soéçante-dis ins .

Mais, echt'onme vit din unne moaison pour viux, et ches infirmiéres vouloai'te ie qu'il i voéche.

Li, i vut i aller. I dit rin, prind ches médalles ed djerre dsou ech casake, et i pèrte. Peuk'minquer ech que diront ches infirmiéres.

Et, ech is join, il est in Normindie à ches commémorations. Ches daraines pour li, i sanne, vu ches âges et ... ches infirmiéres dech moaison. Moaison pour viux o prison ?

-"Os allez vos foaire indjeuler ?", qu'i dit, un journaleu.
-"P't'ête bin", qu'i répond, in rigolant.

Li, i étoait fin ureus, rioait bin, et ches soégnantes, i l'trachoai'te pèrtout. Bin intchiétes.

Achteure, ches commérations sont définies et cht'onme est rintré ; Il o ed bieus souvnirs din ch'tète.

Mi, j'ainme granmint ches histoères lo et ej sus ureus pour li..

Fète à Versailles

Quanq tu lis cho, tu croés eq ch'est coèr ches commémorations dech débèrquémint ed dis-nu-chint-quarante-quat qui continue'te à Versailles.

Nin ! Ch'est mie cho, minme chi ches commémorations continue'te ; ch'est un oncle et s'fanme qu'invit'te leus éfants, leus tiots fius et tiotés filles, et leus frères et soeurs, bieus-frères, bélés-soeurs pour leus chicante ins ed mèriage ; Ch'est bieu ed vive cho, mie toudi aisié, et ch'est bin de l'fèter. Mes parents avoai'te foait cho étou. Qué plaisi !

Versailles, ch'est lo o qu'i vive'te. Mie ach catieu.

Boins ages à eux.

Bec à tertout.