Rimplir un pot

Un scieintifike prind un cros pot in verre ed quat lites qu'est vide.

Echt'onme est avuc eds élèves et i leu dit :

- "Ej vos prinde douse cros cailleux et les mette ndan."

I foait cho et aprè, i leu pose unne tchestion :

- "Jou qu'ech pot est rimpli ?"

Ches galibiés i di'te "ouais".

- "Bin nan" qu'i leu répond.

I prind adon des tiots cailleux et les met din ch'pot, inter ches cros cailleux.

I leu pose coèr un keup l'tchestion chu ch'pot et ches jonnes i di'te achteure :

- "P't'ête bin eq nan !"

- "Os avez raison."

Echt'onme prinde achteure du sabe et l'met étou din ch'pot.

I pose ed nouvieu l'tchestion ; ches jonnes réponde'te ; ech professeu met infin del'ieu.

Ch'keup-chi, ch'pot est rimpli.

Echl'espérieinche et ch'conte sont définis. Os en pensez quoé ?

Maginez achteure qu'ech scieintifike o kminché pèr mette del'ieu o ch'sabe din ch'pot vide ?

Boinne lecture, et boinne jornée.

Pour vive ureux

... vivons ureux.

Et pour cho, des keups  os pouvons sé dminder chi os sroèmes p't'ête miu à vive seu.

I n'o qui dites :

- "Pour vive ureux, vivons mucher."

Et sus mie seur.

Boin diminche.

Ech jonne et ch'Blaise

Pline-ech-jonne disoait, alintour ed ches innées chint :

- "I veut miu exceller en une cose eq d'ête mawais in granmint (ed coses)."

Ech Blaise Pascal pensoait, li, alintour ed ches innées mile-sis-chint-quarante et des bérouètes :

- "Il est bin puss bieu ed savoér quèk cose ed toute qu'ed savoér toute d'unne cose."

Cho rsanne ?

Disez-mi.

Boin verdi pi boins sinmdi et diminche.

Oronde

 ... conme unne tcheue ed pelle.

Ch'est unne espression.

Quanq cho arrive, ch'est fin dommage.

Boin diminche.

Cho put servir

I veut miu pomper eq qu'i s'passe rin, qu'ed ristcher qu'i s'passe quèk cose ed grave in pompant mie.

Ches minteries ed min fiu

Ièr merkerdi, ej téléphone à min fiu qui vient d'ête père pour chin premier keup l'eute smangne.

D'un keup, i dit :

- "Feut qu'ej té laice, min fiu m'appèle."

Min ziu ! Eq chin fiu l'appèle ! Chin fiu, il avoait chonc jours d'âge. Et quand os avons chonc jours d'âge, os avons mie ed téléphone portabe.

Et minme chi os avons djò un téléphone portable, à chonc jours, os savons mie causer.

Don, min fiu, chin fiu appeloait mie. Au miu, i braiyoait pour esprimer quèk cose.

Min fiu dvro apprinde à min tiot-fiu à mie mintir.

Ureuseumint, min tiot-fiu, conme ches deus eutes avant li et conme em tiote-fille, est fin bieu.

Et j'ainme min fiu. Et s'fanme et leu fiu. 

Qu'os allons vir din quèks minutes. 

J'ainme intinde un papar ed sis jours (innui) braire.

Cros becs à tertous. 

 

Jonne o viu niacoés

Unne jonne fille dminde à s'mère :

- "Dis-mi, m'man, ch'est quoé l'différinche inter un jonne niacoés et un viu niacoés ?"

Es mère i répond :

- "Ch'est surtoute l'capacité ed nuisinche din ches tans liée à chl'espérinche ed vie."

Cho dépind

Au miu, os rconnoaitrons vos mérites.  

Au pire, vu vot boinne volonté, os érez quanq minme quèks rproches.

Trop ed gingin

J'os tant ed gingin eq granmint ed keups, ej comprinds mie s'eq j'os dit.

Un bieu-tchul

Fuchons correct et sérieux ! Un bieu-tchul, ch'est poin l'minme cose qu'un bieu tchul*.

Un bieu-tchul, ch'est un atrintchillage eq tu mets chu tes toélettes et qui sert à nettier tin tchul quanq eq t'os tchié. O qui sert étou à nettier ech sesque ed ches fanmes quanq is ont picié.

Un bieu-tchul, cho invoée del'ieu. Prope, qu'ale est, l'ieu. Et cho l'invoée chu tin tchul o chu tin sesque (chi t'es unne fanme et eq t'os invie). Pour cho, feut ête assis chu ches toélettes. Chin quoé, tu netties t'maronne o p't'ête minme tes dints.

Chi os pouvez, un jour, feut assayer un bieu-tchu. Pensez à lire l'notice, prévoèr unne serviette pour aprè, et du savlon pour nettier vos mains**, chi os avez ieu dzoin ed vos mains pour bin nettier vo'tchul.

Vive l'propreté ! Vive ch'progrès !

* din ch'monne d'achteure qu'est fin zinzin slon mi, os pouvons pu dire d'unne gin qu'ale o un bieu tchul : ch'est considéré conme sesquiste o discriminant (minme chi ch'est vrai qu'él gin o un bieu tchul slon ti), et tu vos in prison. T'es puss ureus à vinde del drogue.

** feut granmint d'ieu ! Ch'est poin écologike.

In boinne santé

"J'os déchidé d'ête ureus pastche ch'est boin pour l'santé".

Qu'o été écrit chu unne carte postale pèr unne gin qu'avoait rincontré Voltaire. O chin tiot-fiu. O p't'ête minme ch'tiot-fiu ed chin tiot-fiu.

Boinne jornée à tertous.

Veut miu prévnir

Maginez unne interprinze in Frinche, mais eute pèrte eq din l'Picardie o ch'Nord, qui rchuvroait unne lette toute in picard pour unne fille dech nord qui ouve din chl'interprinze !

Cho put surprinde granmint.

Mais chi ale sait qu'unne lette in molet éspéciale vo arriver, i éro moinss ed problinme.

In vrai, rin dit qu'unne lette vo arriver. Surtoute quanq ale o mie pèrti.

Ches gins ureux

 ... is lise'te et boè'te un ju. 

Adon, ej sus unne gin ureuse.

Surtout qu'in puss, j'os unne fin bèle tiote-fille edpi un molet puss ed tchinze jours.

Bec à tertout.

Ches testitchules ed min tchuré

Os l'savez, chin quoé ej vos vos l'apprinde, pour ête tchuré, feut ête un onme. Et don avir des - deus - testitchules.

Minme cose pour ches evêkes, et minme cose étou, et surtoute, pour ch'pape*.

Un tchuré put mie utiliser ches testitchules, à pèrte pour ête evëke pi pape : il o mie ed fanme.

Mais in vrai, des keups, i in o qui 'ls'utilise quanq minme ; is ont conme un dzoin :

- avuc unne fanme, et dech keup-lò, i doét tchiter chin ouvrage. I put poin rester tchuré.

- in abusant eds éfants et des galibiés, et dech keup-lò, ... euh !, feut mie in causer. Ech tchuré pèrte o est invoéyé din un eute indroét dò ... qu'i reste tchuré.

Min tchuré o bin seur des testitchules. Et li, l'o truvoé un troésienme moéyin ed s'in servir : pour avir du corage.

Il o écrit à chin evêke, ches eutes tchurés et p't'ête minme ch'pape qu'i supporte pu ches mawais tchurés malavisés qui font granmint ed mau à ches galibiés et qui continue'te d'ête tchuré ; "i o deus situations, et i o deus mzures granmint différintes", qu'il écrit. Il arte d'ête tchuré, etcheuré, et fin malureus.

*pour ch'pape, ch'est vérifié qu'il o deus testitchules ; i s'assit mer-nu chu unne caïelle treuée, et unne gin rbée in dsou pi dit, in principe : 

- "il in o deus, et is pinde'te bin."

Cho évite achteure d'avir unne deusienme papesse.

Feut mette puss ed sétchurité

Seuremint qu'os avez intindu conme mi qu'une fanme est morte i o quèks jours, tuée dvant unne école dò qu'ale ouvroait pèr un galibié ed quatore ins d'âge.

Qu'avoait un cros coutieu.

I o malureusemint quèks smangnes, un eute élève o étou tué unne fille din unne école, avuc, coèr un keup, un coutieu.

Casi chake jour in Frinche, un o des galibiés tue'te d'eutes gins, jonnes o moinss jonnes, pour quèks berluques o pour edl'argint.

Ches onmes et fanmes politikes vu'te éviter cho. 

Fin bin !

Pèr eximpe, is vont béto construire eds écoles qui rsanneront à des prisons, mais ndan, et in sétchurité qu'is pense'te, i éro ches élèves.

Jou qu'i o poin un cros problinme o unne berlure ? Seur qu'i o rin d'eute à foaire ?

Ch'est unne boinne fanme

Os dmindons à une boinne mère d'élver es éfants conme chi ale avoait mie d'ouvrage, d'ouvrer conme chi ale avoait mie d'éfants, et d'avir chl'appérinche d'unne fanme qu'o poin d'éfants et poin d'ouvrage.

Busons.

Ch'est ristché

I avoait un keup, un onme, qu'éro béto trinte-troés ins d'age, conme ech Christ, et qu'éro étou béto, mais aprè, un fiu   -  conme chin père in o ieu un   -,   qui vouloait canger d'ouvrage. 

Achteure, ech jonme onme o un fin boin ouvrage din unne crosse interprinze, et seuremint un boin gaingnage.

Mais il o invie ed canger.

In vrai, il o invie d'arter sn'ouvrage pour s'mette à écrire ; i dit qu'il o invie ed démucher o connoaite ech syndrome del feuille blanke.

Feuille blanke

Mi, ej truvoe cho corageux. O fin ristché.

Boinne canche à li, s'fanme et leu fiu.

Bec à tertous.

A ms'âges

Ale o né l'eute merkerdi. 

Infin !

Magine ! 

Cho foaisoait nuf moés eq mes pérints disoai'te eq j'alloais avir un tiot frère o unne tiote-soeur. 

Pour mi qu'in o achteure trinte-et-un, ed ches moés, nuf moés, cho rprésinte un millar ed jours. In vrai, cho foait casi trinte-pèr-chint d'ém vie. Ch'est granmint.

Mais m'tiote-soeur est fin bèle, et ej sus fin ureus. 

Minme chi ale brait.

Ch'étoait diminche

J'os traché din ches poèmes

Kmint t'dire ej t'ainme,

J'os truvoé des mots savants

Granmint trop long pour mes troés ins.

Adon j'os traché eute pèrte

Et j'os truvoé din min tcheur

Ches mots eq tu m'os apprins

Quanq j'étoais coèr tiot*.

Em mère ej t'ainme grind conme ho !

Ej té l'dis avuc mes bros.

* o tiote, slon

Tu pux arriver

Quèk pèrte in Frinche, i o unne jonne fanme qu'est inceinte et qui dvroait accoutcher din quèks jours.*

El fanme et chin onme ont djò un fiu qu'o moinss ed troés ins d'âge, qu'est in fin boinne santé et à qui is ont esplitché edpi quèks moés qu'il alloait avir un tiot frère o unne tiote soeur.

Et leu fiu o bin vu qu'el panche d'es mère grochit granmint. Granmint, granmint.

Ièr au matin, adon qu'ech galibié alloait minger, i met s'tête chu l'panche d'es mère et dit à ch'papar qu'est ndan :

- "Lò, ej vos minger. Et aprè, tu sors. D'accord !?"

Ch'est bieu, et ej comprinds eq pour un tiot decht'âge-lò, ch'est fin long d'attinde.

Boinne jornée.

*A l'heure eq j'écris, ch'papar est mie né. O bin j'os mie étè prévnu.

Ch'est vrai mais

... feut mie dire.

Et feut apprinde à mie dire.

Mardi, in ville, unne fanme vo deschinde d'un car.

Un tiot garchon ed moinss ed quat ins d'âge qu'est étou din ch'car i dit :

- "Adé ! Vieille M'dame."

Es mère, qu'est avec chin fiu et qu'o granmint ed misère avuc li qui cause granmint et qu'o du gingin, i dit :

- "Min fiu, feut dire "Adé ! M'dame", et ch'est toute."

- "Ouais ! Mais quanq minme, ale est vieille."

Et seuremint qu'il o raison. P't'ête qu'ech prochain keup, i diro rin du toute.

Et s'mère i diro p't'ête :

- "Min fiu, feut dire "Adé !" (o bojour) à ches gins".

A suive.

Boinne jornée.

Pauve contrôleu

Ièr, timpe au matin, alintour ed sis eures quarante-et-unne, ej monte din ch'train pour aler ouvrer, m'assis, et ch'train i pèrte.

Fin bin !

Moinss d'une minute aprè arrive un contrôleu.

- "Mes gins" qu'i dit, "contrôle ed vos titchets ".

- "Ed djò !" eq j'i réponds, "jou qu'os pourroète rpasser din unne eure, chin vos kminder ?"

- "Autchun problinme pour mi" qu'i dit, et i pèrte contrôler ches eutes voéyageus. Chin contrôler min titchet o chti ed mes voisins.

Et l'o poin revenu.

Boinne jornée, et p't'ête boin voéyage.

Inter un et chonc

Un, pis zéro .

Ièr au matin, j'o causé din ch'téléphone à un robot ; ch'est ch'nouvieu monne d'achteure, ches robots qui vos réponde'te.

A un momint, ch'robot mé dminde ed mette unne note inter un et chonc, chonc étant chi ej sus fin satisfait ed no'distchussion.

Ej l'sus mie, j'i répond un. 

Et il arte ed causer. Chin mé dminder pourquoé eq j'os mie un et mie quat o chonc !

Adon jé rtéléphone.

Os causons, avuc ch'minme robot, et quanq os avons défini, o qu'il i sanne qu'os avons défini, coèr un keup, i mé dminde del noter inter un et chonc.

Et lò, j'i mets zéro. I dit rin, et i raccroche.

Ch'est bieu ches nouvèles technologies.

Boin sinmdi, bec à tertous.

Ech Leu pindu

Un jour, un onme qui s'promnoait truve un leu pindu pèr ches piés in heut d'un chêne.

- "Onme" dit ch'Leu, "tire-mi d'ichi, chin t'ekmander. J'avoais monté lò pour haper un nid d'agache, et in deschindant, j'o coinché min pié inter deus brankes. Foais quèk cose pour mi !"

- "Ej vux bin avuc plaisi, Leu", répond cht'onme, "mais ej crains qu'aprè, tu m'minges, quanq tu sros dépindu."

- "Onme, ej té promets de rin t'foaire, à ti, à t'famille et à tes bétails."

Cht'onme dépind don ch'Leu. Mais sitôt qu'echti-chi est à tère, i kminche à rbéîer ed travers.

- "Onme, j'o granmint faim, et grinde invie d'ét matcher."

- "Leu, tu sais eq tu m'os promis."

- "Ouais, mais achteure qu'ej sus dépindu, ej vux mie moérir ed faim."

- "Os avons bin raison ed dire, Leu : "Ed bin foaire, ch'mau arrive". Chi tu vux, allons dminder à ch'tchyin qui vient vers nos."

- "Ej vux bin, Onme."

- "Tchyin" dit chl'onme, "ch'Leu étoait pindu pèr ches piés din un abe, et i sroait mort chi j'l'avoais mie dépindu. Achteure, i vut m'matcher. Jou eq ch'est jusse ?" 

- "Onme" répond ch'tchyin, "ej pux mie vos juger. J'avoais un boin moaîte justch'à présint, mais achteure qu'ej sus viu, i m'o mis à l'cour pour pu avir à m'bailler à minger. Os avons bin raison ed dire "Ed bin foaire, ch'mau arrive." "

- "Adon, Leu", dit cht'onme, "allons dminder à ch'viu kvau qu'est lò."

- "Ej vux bin, Onme."

- "Ech kvau" dit chl'onme, "ch'Leu étoait pindu pèr ches piés din un abe, et i sroait mort chi j'l'avoais mie dépindu. Achteure, i vut m'matcher. Jou eq ch'est jusse ?" 

- "Onme" répond ch'viu Kvau, "ej pux mie vos juger. J'avoais un boin moaîte justch'à présint, mais achteure qu'ej sus viu, i m'o mis à l'cour pour pu avir à m'bailler à minger. Os avons bin raison ed dire "Ed bin foaire, ch'mau arrive." "

- "Adon, Leu", dit cht'onme, "allons dminder à Rnèrd."

- "Ej vux bin, Onme."

- "Rnèrd" dit chl'onme, "ch'Leu étoait pindu pèr ches piés din un abe, et i sroait mort chi j'l'avoais mie dépindu. Achteure, i vut m'matcher. Jou eq ch'est jusse ?" 

- "Onme" répond Rnèrd, "ej pux mie vos juger chin avir vu chl'indroét."

Is pèrt'te à troés et arrive'te àch chêne.

- "Kmint-jou eq t'étoais pindu, Leu ?" dminde Rnèrd.

Ech Leu monte et s'remet conme il étoait avant d'ête dépindu pèr cht'onme.

- "J'étoais pindu conme cho, Rnèrd."

- "Eh bin, Leu, reste conme cho."

Che Rnèrd et cht'onme s'in vont. Avant d'és tchitter, chl'onme rmerchie che Rnèrd et i promet d'i porter, ech lindmain au matin, deus bèlés glinnes.

Et ch'lindmain au matin, chl'onme arrive in portant un so.

- "Vlò ches glinnes, Rnèrd."

Sitôt, il ouvre ech so dò eq sort'te deus cros tchyins qui tue'te che Rnèrd. Os avons bin raison ed dire "Ed bin foaire, ch'mau arrive."

I sanne qu'ho fuche un viu conte ed ches poéyisans gascons rtcheuilli pèr Jean-Frinçoés Bladé. J'o bin ainmé.

Is in perde'te granmint

... des lettes  o des invoés, ches facteus.

Qu'i sanne , mais ch'est p't'ête unne crosse berlure !

Prindons un eximpe :

Os invoéyez chonc cartes postales edpi Lannion*, in Bretanne** ech judi vint-chonc dech moés d'avri, pour chonc gins qui rest'te in Frinche. Mie ach Kenya, pour un keup.

Ech mardi o merkerdi d'aprè, unne carte o arrivé dò qu'ale dvoait arriver.

Adon, os vos disez eq ches quat eutes étou ont, o vont arriver. Mais uit jours aprè, autchune nouvèle ed ches gins*** qu'éroai'te du in rchuvoèr unne mais qui sai'te mie qu'is éroai'te du in rchuvoèr. A pèrte unne tiote fille qui pense p't'ête achteure qu'ej i o dit des minteries.

Deus coses possibes :

     - ches cartes sont perdues

     - ches cartes ont coèr poin arrivé

Et pourtant, ches facteus is in ont ed moinss moinss à distribuer. Qu'i péroait !

Jou eq ch'est unne coeuse o unne conséquinche ed ches pèrtes ? 

A suive.

Bec à tertous.

* o eute pèrte

** o d'unne eute région chi ch'est mie in Bretanne qu'os mettez vo'courrier.  

*** Ej magine eq ches gins qui rchuche'te un courrier qui leu foait plaisi t'invoé'te un tiot message. Quanq is peu'te.        

                                                          

In boinne santé

I o quèks smangnes, j'os vu, conme chake innée, min métecin.

- "Kmint-jou qu'os allez, ED ?"

- "Acoutez-mi, Msieu ch'docteu ! Edpi no'darain rindez-vos, j'os arté ed minger du freumage, du bure, du chuke et j'os arté ed bir ed l'alcol."

- "Fin bin ! Et kmint qu'os vos sintez ?"

- "Freustré".

- "Ah ! Brin."

Un boin intraineu et un méchant père

Unne étchipe ed jonnes jueus ed fotbal perd unne rinconte seise à deus

Pi, ale in perd unne eute quatore à zéro, et unne troisienme tchinze à quat.

Adon, i o ch'père d'un galibié qui vo vir chl'intraineu et qu'i i dit qu'i feut arter cho.

Chl'intraineu i répond :

- "Mi, ej vus eq ches jueus s'amuse'te et que chatchun jue."

- "Ouais !" répond ch'père "mais p't'ête qu'i feut canger quèk cose pour eq l'étchipe gaingne !?"

- "Kmint qu'i s'lonme vot fiu ?"

- "Bébert".

- "Bin ! Pour gaingner, i feudraoit qu'ej foaiche mie juer vot fiu.

Busons.

Boinne jornée, et boinnes fêtes ed Pâke.

Tiote cacouille din ch'train

Edpi béto tchinze ins, ej prinds ch'train deus à chonc jours pèr smangnes pour aler ouvrer. Coèr troés moés pi j'arte.

Ches trains sont des trains ed région, vius o nus, et mie ches trains qui roule'te fin rade pour foaire quat o chonc-chints kilomètes in deus eures. Ches-myins, is font chint kilomètes in unne eure et s'art'te troés o quat keups pour prinde d'eutes gins.

Et edpi quèk moés, j'o déchidé ed foaire des cacaouilles à ches contrôleuses et contrôleus.

Fin aisié : ches contrôleuses et contrôleus, des keups, is annonche'te qu'is sont à no'service et qu'is répondront à nos tchestions.

Adon, j'os unne tchestion :

- "Jou qu'i o un indroét pour acater et bir un tiot ju ?"

Os connoaissez l'réponse !

- "Bin nan ! Os sonmes din un train régional."

Boinne jornée, et hésitez mie à foaire étou des cacouilles.

El boske inglèse

El boske inglèse, lonmée boske, existe edpi granmint ed sièkes. Avant d'ête inglèse, ale étoait antike.

Pour vous dire conme i o des gins qu'ainme'te cho. Edpi granmint ed sièkes.

El boske (inglèse), ch'est mette deus gins dech minme sesque din un espace frunmé pèr des combes et leus bailler troés o quat minutes pour qu'is buque'te l'eute avuc leus poings. Et uniquemint leus poings. Jonmoais eute cose, conme pèr eximpe, leus piés o leu tête.

Is buque'te l'eute din s'panche, din s'tête o chu ches bros, mais poin eute pèrte.

Aprè troés o quat minutes, ches deus gins art'te unne minute pi rkminche'te, chi autchun n'est djò allongé pèr l'eute et ches keups ed poings avant cho.

Pèrmi ches gins qui ainme'te el boske, i in o qui sont des canteus. Qui cant'te, conme font ches canteus.

Et pèrmi ches canteus qui ainme'te el boske, i in o qu'ont foait des canchons chu l'boske. Cho dvoait arriver.

Mi, ej connoais deus canteus qu'ont chatchun foait unne canchon chu l'boske. 

Ch'premier, mort achteure, o conté surtoute un tiot garchon qui a rbéïé unne rinconte ed boske dò qu'echti qu'il adoroait o perdu. Et ch'galibié qu'est fin déchu et trisse vo  i dire, à ch'boskeur.

El deusienme canteu, eq j'o démuché i o quèks jours, o conté, li, unne rinconte inter deus fanmes - ch'est possibe - dò qu'i in o unne qu'est anmoureuse (ch'est possibe étou) ; ale prind des keups din djife, ale in évite, ale tchait des keups, ale baille des keups, mais ale est - o sanne - ureuse. Pastch'ale est anmoureuse.

I o unne cose vraimint bzarre inter ches deus canteus, ch'est qu'i n'o un qu'est ch'père ed l'eute et don, l'eute est chin fiu.

Ch'est bieu.

Conme l'boske.

Boinne jornée.

Min père s'lonmoait Nanard

Ches gins qui m'connoaisse'te bin l'sai'te, min père s'lonmoait poin Nanard.

A pèrte quanq i l'o né, durant quèks sgondes, minutes o eures. Et cho, granmint ed gins l'sai'te mie. Minme mi, j'l'o apprins lindi.

Ej vos esplique ches aüres dech tiot nom ed min père.

Min taïon et s'fanme, em taïonne, père et mère ed min père et nan d'em mère, avoai'te déchidé, coési ed lonmer min père Nanard chi ch'étoait un fiu. A l'époke, mile-nu-chint-trinte-sét, mie ed chographie, mais l'djère.

A l'naissinche, ch'étoait un fiu, don, i s'lonmero Nanard. Quèks minutes, o p't'ête quèks eures. Avant eq min taïon voéche à l'merrie pour déclarer chin nouvieu fiu, chonquienme dech nom.

I pèrte à l'merrie aprè avir foait batisé min père et dò qu'il o apprins qu'ech fiu dech pérrain ed min père vient ed moérir. Adon, i déchide, seu, ed bailler ch'tiot nom dech galibié mort à min père. Qui s'lonmero mie Nanard, dech keup-lò, et pour foaire plaisi à ch'pérrain.

Aprè cho, ch'est seur, i rvient vir s'fanme et i dit.

Adon ale i répond :

- "Cho sro pour ch'prochain".

Et ch'est conme cho qu'ech fiu d'aprè, min pérrain, s'lonme Nanard.

Inter min père et li, i o ieu unne fille, Geneviève, et aprè Nanard, sis eutes éfants, quat fius et deus filles.

Boinne jornée, et becs à l'Famille. Qu'est unne canche.

J'os toute écrit in obliant qu'innui, os sonmes ech dis dech moés d'avri et eq ch'est un jour fin important pour em mère, ches éfants et tiots-éfants. Et pour min père, malureusemint. 

Deus beudets s'rincont'te

 Un beudet dminde à un eute beudet qu'i vient ed rincontrer :

- "Ch'est quoé tin tiot nom ?"

- "Bob" dit ch'beudet.

I péroait eq cho foait rire.

Boinne jornée.

Cacouille afritchaine

"Chti qu'invale unne noés ed coco intière doét avir fiat in chin treu du tchul."

Ch'est seur.

Boinne jornée.

Ech monne est bieu

Durant ch'moés d'eu, ches frinchoés ont ieu granmint ed bèlés médalles à ches jus olympikes ed Péris. In Ukraine, ches ukrainiens ont rprins un molet le dsus chu ches russes. Ech premier dech moés ed sectimbe, unne nièce et un nveu ont ieu unne troésiènme fille, quèks jours aprè, min premier tiot-fiu alloait à chl'école, et in octobe, unne bèle-soeur et chin fiu front unne crosse fête pour leus âges.

Ch'étoait bieu !

Mais aprè, j'o ieu un cros problinme à m'tête ; ches séruzyins ont dit eq j'avoais mis un testitchucle* à l'cour, que granmint ed gins, minmes ches fanmes !!, mettoai'te achteure un testitchule à l'cour, et qu'i falloait qu'ej reste tout seu infreumé durant uit moés din unne seurte d'ôpital.

Et j'l'os foait. Chin radio, chin télévision et chin visite.

J'os dormi, mingé et jué, et à pèrte cho, j'os rin intindu, rin vu, et, dech keup-lò, rin dit, o casi. 

Ièr, j'os apprins pèr une pitchoère dechl'ôpital qu'ej sorte mardi, et j'os étou apprins qu'ej vos avir deus nouvieux tiots-éfants béto ; ej sus fin ureux.

Aprè avir sorti, j'acate une gasète pour prinde des nouvèles dech monde. Qu'alloait fin bin.

Boinne jornée.

I sanneroait eq ches testitchules sont reliés à l'tête. P't'ête pèr ch'nerf optike qui rliee étou no'tchul à nos zius.

Pour dvenir un grind frère

Din quèks smangnes, ech puss jonne ed mes tiots-fius qu'o achteure vint-nu moés d'âge vo dvenir grind frère. D'un frère o d'unne soeur, os savons mie, mais i sro grind frère.

Et pour cho, i o eds étapes à frinchir. Pèr eximpe, dormir unne nuit, pour ch'premier keup, chin avir ches pérints à t'moaison. Mais avir quanq minme des gins eq tu connoais ; pèr eximpe, tes taïon et taïonne.

Ch'étoait sinmdi et diminche.

Qué vie !

Ech tiot, minme chi i vo dvenir un grind frère, o brai. Il o brai quanq ches pérints ont pèrti à nonne, quanq il o défini es sieste, pi au mitan del nuit, pi coèr timpe au matin.

Mais ej pux quanq minme dire qu'il o vraimint étè régalant. Il o ri quanq i brayoait poin, os avons granmint jué, et il o bin mingé (minme quèks chukes).

Diminche au matin, alintour ed sèt eures, ch'galibié avoait faim.

- "Tu vux minger quoé ?"

- "Un u".

- "Un u !"

- "Ouais !"

- "D'accord ! Os allons l'foaire tchuire. Et pour qu'i fuche bin tchuit, os allons mette un chronomète ; quanq i sonnero, tin u sro tchuit".

Deus sgondes aprè, m'fanme et mi intindons "bip, bip, bip".

Ch'étoait no'tiot-fiu qui foaisoait l'sonnerie pour minger chin u. Mais il du attinde quéks minutes. Conme un grind.

Innui, ej sus fièr ed li et fin ureus ed ches deus jours qu'os avons passé insanne.

Boinne jornée.

Sèt-chint-mile uros

D'unne interprinse à unne eute interprinse.

- "Mes gins,

Os nos dvez sèt-chint-mile uros. Mais achteure, os avons un contrôle ed nos comptes adon, os ainmeroème qu'os invoéyez chl'argint chu un eute compte qu'os avons créé pour un moés.

..."

Et l'eute interprinse, anméritchaine pour vot information, o invoéyé chl'argint conme dmindé.

Ureusemint, i o un bantchier qu'o vu l'argint tchitter chl'interprinse avant qu'ale arrive chu ch'compte ed l'eute et qu'o appelé ches anméritchains :

- "Os êtes seur qu'i o poin un problinme ?!"

Et is étoai'te mie seur don, chl'argint n'o poin été invoéyé chu ch'nouvieu compte.

Sèt-chint-mile uros !

Boinne jornée à tertout, et tiot bec à m'tiote nièce qu'o chonc ins d'âge innui.

Cots, madjètes et soéris

Proverbe frinchoés :

Chi ches cots warde'te ches madjètes, qui-jou qu'hapero ches soéris ?

Boinne jornée.

Pour ête in sétchurité

"Fuche proche d'éts amis, et coèr puss d'éts ennemis."

 

Os pourroème croère eq ch'est un philosophe chinoés qu'o dit cho i o deus o troés-mile ins, mais nan ! Ch'est din un film lonmé "Ech parrain deus".

Busez.

 

Chin quoé j'éro pèrti

L'eute jour, ej croése unne fanme et un onme in ville.

L'fanme dit à sn'onme :

- "Ej t'ainme granmint, chin quoé j'éro pèrti."

Echt'onme i répond :

- "Mi étou, ej t'ainme granmint ; t'os unne bèle voéture."

Foaisez un papar

 ... innui, et i naîtro ch'premier déchimbe.

Ech jour-lò, cho sro Sin-Eloi, et mi, ej pèrtiro à  l'rtraite.

Coèr nu moés.

In intindint, boinne jornée.

Ches villes cange'te

Diminche, adon eq j'étoais in voéture, je passe din unne tiote ville dò qu'i o alintour ed troés-mile-uit-chint-deus gins qui rest'te, tiote ville étou qu'i o granmint d'innées eq j'avoais poin trécopé.

Et j'o constaté qu'à l'place dechl'abattoèr, i avoait achteure unne moaison d'értraite ; cho cange toute. O casi.

Ch'est vrai qu'à not époke, ches gins étou ont cangé : is maque'te moinss ed vianne et viusi'te puss.

Mais quanq minme ! Mette unne moaison d'értraite à l'place dech l'abattoèr !

Boinne jornée.

Os avons ieu del canche

Em fanme et mi avons chonc éfants.

Os avons ieu granmint ed canche : i péroait eq quanq i nait chonc éfants, i o un chinoés.

A pèrte din no'famille. 

Echl'optimisse et ch'pessimisse

I sanne, à mi qui vit et qu'écrit pour foaire plaisi à ches eutes, et à mi, ch'est seur, qu'i dvient ed puss in puss malaisié ed foaire cho.

I sanne, mais j'dis p't'ête unne crosse berlure, eq ches gins sai'te ed moinss in moinss rire.

Qué brin !

In causant ed brin, feut qu'ej vos conte unne dviserie inter deus onmes qui rest'te din un grind poaiyis pauve et in djère.

Ech premier, qu'est un optimisse, dit :

- "os mingeons ed puss in puss ed brin."

- "Ouais ! " qu'i répond l'eute qui, li, est un pessimisse "ech problinme, ch'est qu'os in érons p't'ête poin pour tertout."

Seuchez rire, o bin apprindez.

Boinne jornée, et crosse pensée pour ches cadoreux.

Avir vint-troés ins d'âge

Quanq eq t'os vint-troés ins d'âge, os pouvons dire eq t'es fin jonne. Moinss eq chi t'os quat ins d'âge, mais t'es coèr fin jonne.

Chi t'es unne fille, tu pux avir foait ch'tour dech monne in batieu toute seule conme unne grinde, in quater-vint dis jours.

Malureusemint, chi t'es un garchon, tu pux djò avir tué unne fin jonne fille d'onze ins d'âge. Fille qu'éroait seuremint ieu un jour vint-troés ins d'âge chin quoé, et qu'éroait p't'ête foait ch'tour dech monne in batieu.

Fin trisse !

Crosse pensée, pour définir, pour em nièce. Ed vint-troés ins d'âge béto.

Unne saprée landimolle

Os l'savez seuremint, edpi quèks jours os sonmes ach moés ed févrié. Et ch'moés ed févrié, ch'est moés ed ches landimolles.

Qu'os pouvons minger* avuc un molet ed chuke, du chucolat o bin coèr avuc ed boinnés confitures. Ed vos taïonnes o bin ed min frère (bec à ti) o coèr d'em fanme.

Sinmdi, ech premier jour ed févrié, in Savoée, os avons mantché ed vir ed saprées landimolles : des fin cros cailleus ed vint-chonc tonnes ont tcheu chu ches voées dò qu'i passe granmint ed voétures.

Magine !

Tu pèrtes in vagances minger del fondue o del tartiflète, et tu rchoés vint-chonc tonnes chu t'voéture. T'os poin l'tans ed dire ouf o de t'plainde, et tu dviens unne landimolle.

Boin accion, e boinne jornée.

*avuc ches landimolles, os pouvoète bir du chide.

Ech tchuré et l'jornaleu

Ch'est mie ch'tite d'unne fabe. Ch'est unne vraie histoère qu'os m'avons conté i o moinss ed deus moés.

I o alintour ed vint ins, un - célèbe - tchuré rind visite à unne achuchon conme i in o pèrtoute in Frinche et qu'il o créé pour aidier des gins.

D'un keup, unne fanme jornaleu veut causer à ch'tchuré pour écrire din s'gasète. Is pèrt'te din unne eute pièche pour ête trantchilles.

Quèks sgondes aprè, unne eute gin qu'est lò et qu'est in route à dviser avuc unne eute gin qu'est lò étou dit :

- "Feut qu'ej vos laice et qu'ej voéche avuc ch'tchuré et ch'jornaleu chin quoé..."

Chin quoé ... !!!

Ch'étoait i o alintour ed vint ins.

Busons, et prions.

Rapurer un toèr

Qu'ej vos esplique unne cose pour miu comprinde ch'reste ed l'article : quanq unne vake o un tiot vieu ed sesque mastchulin, cho dviendro un toèr. 

Et un toèr, in viusissant, cho put ête mawais. Et cho foait mie del boinne vianne.

Pour éviter cho, ches cinsiers, qu'ont dzoin d'un inséminateu o bin d'un o deus toèrs pour leus vakes, mais mie tchinze, peu'te les transformer in bu, in leu pinçant ches testchicules durant quèks jours. In vrai, mie dzoin ed prinde ed cros riskes à pincer ches dorlos del vie ed ches bétails, suffit ed mette un lastike conme i feut o prinde unne pinche.

Un ed ches avantages, ch'est don d'avir del boinne vianne. Ed bu.

L'eute canche, ch'est ed rapurer ches bétails. Et des keups, ej mé dminde chi os pourroème mie foaire cho pour d'eute fin mawais.

Busez.

Boinne jornée.

Unne tiote-fille

... qui existe p't'ête pas.

El majorité ed ches gins dvien'te taïon o taïonne quanq is ont alintour ed soéçante ins d'âge. 

Quèks uns, mie granmint, ont moinss ed quarante ins, et quèks uns, mie granmint étou, ont puss ed soéçante-dis. J'o connu unne fanme qu'avoait ieu chin premier tiot-éfant à soéçante-douse ins d'âge. Ale rgrettoait d'in avir moinss profiter. Trop vieille ! qu'ale disoait.

Innui, ej causero del - première - tiote-fille d'un fin boin cousin qu'o né, i péroait, i o alintour ed quatore o tchinze moés.

I péroait.

Edpi qu'ale o né, j'o jonmoais pu avir un clitché del tiote ; j'o dmindé à min cousin, rin. Autchune réponse. J'o adon dmindé à l'nouvèle mère, fille ed min cousin, rin, coèr un keup.

Sinmdi, j'o vu ch'frère ed min cousin. Qu'est don étou min cousin, et grind-onke del tiote qu'éroait quatore o tchinze moés.

- "Attinds !" qu'i m'dit, ej vos t'in montrer un ed clitché. 

I trache, os buvons un ju, et unne eure aprè, i pèrte.

Et j'o poin vu ed clitché .

Ej mé dminde : jou qu'el tiote-fille existe o jou eq ch'est unne minterie pour eq min cousin puche dire qu'il est taïon ? Cho m'surprindroait granmint.

A moinss qu'el tiote fuche mie bélote ! Ch'est mie possibe din no'famille.

Ej sus casi seur qu'aprè cho, j'éro infin un clitché.

Bec à tertous.

Pour des tiots treus

I o quèks moés, adon qu'ej vouloais acater pain, din unne boulindjerie, él boulindjère étoait in route à causer avec un onme, ed tateuéges.

Mi, ej les laisse causer un momint pi dminde un pain. Etpi, éj leu pose unne tchestion chu leus tateuéges.

Eh bin ! Ches deus jonnes, is foaisoai'te puss ed chint kilomètes pour s'foaire tateuer. Puss ed chint kilomètes pour avir des millars ed fin tiots treus chu tin bros, ét panche o coèr tes gambes ! I sanne qu'i o des gins qui poéye'te mie chl'essinche !

Mi, pour deus treus, ej froais bin chint kilomètes, mais din l'eute sens, pour m'seuver.

Boinne jornée.

Ej sus toudi Charlie

I sanne

- "Bojour Tatave. Feut qu'ej té diche : ej connoais un onme, i boét pu d'alcol, i boaise pu, i minge pu ed freumage, i ridjole pu et i minge étou pu ed bure."

- "Dis-mi, Zèf ! Jou qu'il est mort ?"

 

Ech galibié et chin tiot batieu

Maginez un tiot garchon qu'o un molet puss ed troés ins d'âge et qui jue chu ech bord del mer avuc un tiot batieu in plastike !

Ech tiot i pose chin batieu chu ech sabe, et i rbée.

Es mère étou rbée.

D'un keup arrive unne tiote vague qui ramiole douchemint ech ju ; ech galibié et s'mère sont ureus.

Mais arrive aprè unne eute vague, un molet pu forte que l'première qui ramiole étou ch'batieu et l'inméne. Loin.

Mais l'raméne poin.

!

L'o fallu qu'el jonne mère voéche din l'ieu tcheur ech batieu.

In janvié, l'ieu est granmint moinss keude qu'in été. Minme à Mérseille.

Vlò unne innéé qui kminche bin. A pèrte pour l'fanme qu'o ieu froéd mais qu'o foait plaisi à chin fiu in rvenant avuc chin ju.

Boinne innée à tertous.