Rdevnir jonne

Ch'est un mirake ? Puss ches jours is passe'te, puss m'fanme dvient jonne.

Kmint-jou eq ch'est possibe et qu'ej l'voéche ? Lisez :

I o quèks innées, m'fanme - et mi -, os alloème coutcher alintour ed vint-deus o vint-troés eures.

Mi, ej foais coèr cho ; mais m'fanme, ale couque achteure timpe au matin, alintour ed quat eures. I o deus o troés ins, ch'étoait alintour d'unne eure, et i o quèks moés, ch'étoait alintour ed deus eures.

Coutcher à quat eures ! Conme ches jonnes quanq is vont dincher l'sinmdi. Eux, ch'est un keup pèr smangne, mais m'fanme, cho put ête chake jour. O disons, chake nuit. Et à uit o nuf eures, ale déjouque.

Fin jonne, qu'ale dvient.

Chi ale ouvroait coèr, in deus jours, ale pourroait avir foait ches eures d'ouvrage qu'ale éroait à foaire.

Boinne jornée, et boinne nuit.

J'os boinne conscieinche

Feut qu'ej vos l'diche, chi os l'savez mie, mais edpi quèks innées, j'os un cros mau ; cho s'voét p't'ête mie, mais j'in os un.

Es soégner pi djérir ! Fin malaisié. 

Ch'est pour cho eq j'in o mie causé.

Ej sais eq des keups, des gins di'te qu'ej sanne imphibie. I n'o minme qu'ont supposé des coses.

Innui, ej vos l'dis : jé m'soégne. Avuc internénet. Et motchez-vos poin, ej vos réussir ! 

J'os boinne conscieinche.

Ale doét gaingner

Innui au vèpe, i o unne rinconte ed rugby inter l'étchipe ed Frinche et chtol-lò d'Eustralie dò ed j'os un nveu qui reste edpi quèks smangnes et pour pour quèks moés.

L'rinconte cangero rin, malureusemint, à l'djère in Ukraine et baillero mie ed gingin à ch'présidint ed ches Anmérikes qu'est ch'puss cros nikdouille eq j'o janmoais vu mais qu'existe.

Mais j'ainmeroais granmint eq l'étchipe ed Frinche gaingne. Pour rinde honmage, d'unne manière, o bin au moinss foaire plaisi à min onke Michel qu'est, in vrai, onke d'ém fanme in étant frère d'ém bèle-mère, et qu'est mort judi.

Min onke, o disons, not onke ainmoait granmint ch'rugby. Il avoait un frère, des nveus - poin mi - et minme un tiot-fiu qu'avoai'te jué ach rugby. Adon pour i foaire plaisi et un clin d'ziu, feudroait qu'echl'étchipe ed Frinche gaingne.

Allez ches bleus ! Adé min onke.

Ech chinglier est mort

Un onme roule in voéture et épeute quèk cose. Il arte s'voéture, rtchule pour vir et voét unne crosse cose noèrte au mitan del route : un chinglier.

I déchind d'es voéture pour aller miu viu ch'bétail qui sanne bin ête mort.

Mais in vrai, l'est mie vraimint mort. Din quèks minutes, il le sro, mais lò, il arrive à s'mette dbeut et à courir. Vers cht'onme qu'est étou obligé ed courir pi grimper fin rade chu s'voéture.

Ech chinglier grimpe mie, ureusemint, mais berzille bin toute chl'avant del voéture.

Pi i pèrte. Moérir din un can.

Ainmer Diu

Avuc Diu, i o deus coses din no'vie : i croère o mie i croère, et aprè, l'ainmer un tiot molet, un molet, un boin molet, granmint o minme granmint justch'à tout vive pour li ; conme ches tchurés o ches rligieuses, mais étou conme d'eutes onmes et fanmes din ch'moude qui vive'te tout seu et qui prie'te Diu chake jour, conme ches tchurés o ches rligieuses.

 

Un onme, tchuré o mie tchuré, o unne fanme, rligieuse o mie rligieuse qu'o mérié avuc Diu pastch'il o ale l'ainme granmint, doét montrer chl'eximple à ches eutes qui eux, i croè'te p't'ête mie granmint o mie du toute.

 

Echl'eximpe ! Estchèl ?

 

Ch'boin eximpe.

 

Maginez un rligieus qui sroait fin mawais, mie agréabe avuc ches gins ! Jou qu'os croéyèche quoé qui dit quanq i dit eq Diu o existé et o dit ed s'ainmer ?

Mi, ej dis nan. Seuremint qu'ej froais dmi-tour.

Edvinète dech momint

Qui o dit :

- "Deus djifes qui se rsanne'te et qu'autchune foait rire font rire insanne pastche is se rsanne'te."

?

Boinne értraite

- "Quanq eq tu sros à l'értaite, feudro eq tu t'otchupes. Tu pourroais, pèr eximpe, aler vir des gins o foaire des coses avuc des gins. Mais feut mie eq tu pèrches mèrcher tout seu ; cho rsanneroait à unne manière ed fouir.

Etpi, feut eq tu laices t'fanme foaire ches activités et ches coses qu'ale o invie ed foaire."

J'intinds, j'acoute.

Assis chu unne caïèle, ej buse.

Ch'est fin donmage ! Mèrcher, j'ainme granmint.

Sèt-chint kilomètes

In Frinche o bin eute pèrte din ch'monne, pour aler ed lò à lò, i o toudi quèks kilomètes à foaire. Et des keups, ches kilomètes, i n'o granmint à foaire. 

Adon, maginez bin qu'ed tans in tans, os avons mie invie d'aler lò.

Pèr eximpe, os avez sèt-chint kilomètes à pèrcourir. Sèt-chints pour aler, pi ches minmes pour rvenir. Cartchulez, aisiémint, cho foait mile-quat-chint kilomètes.

Quanq i o quat o chonc-chint kilomètes (mile in toute), os i arrivons, mais sèt-chint o puss, os acceptons moinss, et des keups, poin.

In vrai, cho dépind des keups ; sèt-chint (kilomètes) pour pèrtir in vagances o vir vo'mère, os direz ouais. Mais deus o troés-chints pour aler ouvrer o din un indroét qu'o rin ed bieu, os ainmeroète dire nan, et os l'direz p't'ête.

I sanne.

Os pensez quoé ? Ecrivez-mi, et surtoute, obliez-mie ches gins qui vos ainme'te.

Boinne jornée.

Kmint croère din chl'anmour ed Diu

... quanq ches tchurés is t'atcheuille'te mie ?

A pèrte din ch'bieu et tiot village ed Payns.

Ch'est misérabe ed constater cho ! I o deus-chints ins, un tchuré t'invitoais et tu rpèrtoais avuc edl'argintrie.

Busons.

Boin diminche.

Ches tiots sines

 ... eq t'ainmes vir quanq tu mèrches granmint ed tans :

 

- unne pantchèrte 

- unne église don, un village aux alintours,

- unne rivière, tiote o crosse,

- ... .

Tout cho t'aide à té rpérer chu unne tchèrte et à t'dire o t'foaire comprinde eq t'os bin avancé.

Boinne jornée, bonne mèrche.

Quanq i pleut

Seuremint qu'un jour au moinss os avez merché quanq i pluvoait.

Mais jou qu'os avez djò dormir granmint ed jours din unne tente quanq i pluvoait ?

L'eute jour, j'os causé ed cho avuc un cousin qu'i m'o dit :

- "ED, din un in, t'éros oblié l'pleuve".

P't'ête, mais avant cho, feudro s'débrouiller.

Merchi, cousin.

Boinne jornée à tertous

Ches tiots villages

Prindons deus villes ; pèr eximpe, Beaune etpi Venarey-ches-leumes, in Côte-d'or.

Achteure, maginez qu'os merchons inter ches deus villes in passant eq pèr ches tiots villages. Pèr eximpe, Bouilland, Antheuil, Agey, Drée... .

Feut quèks jours.

Et quanq i feut quèks jours, feut avir de quoé minger, boère et dormir.

A Beaune, Sombernon pi Venarey-ches-leumes, os pouvez acater du pain et/o eute cose, et bir un jus din un tiot bistrot.

Mais à pèrte-lò, mie possibe. Os avez dzoin ed prévoèr avant ed pèrtir, chin quoé, os érez faim et soé.

Ch'est fin donmage vu eq ches tiots villages sont fin bieus et trantchiles.

Os avez djò constaté cho ?

Disez-mi.

Et obliez mie ed mèrcher chake jour.

Boinne jornée à tertous.

Ches lèrmes muchées

Edpi qu'ej té connoais,

J'ainme tin rire et tin gingin.

Cho foait eds innées eq ch'est conme ho,

Et j'ainmeroais eq cho fuche conme ho coèr granmint d'innées.

Mais l'vie est mie toudi aisiée,

Et ches darains keups qu'os nos avons vu,

J'os vu des lèrmes din ets ius.

T'os foait granmint d'efforts pour mie braire,

Mais j'os vu eq t'avoais granmint invie.

T'os foait granmint d'efforts pour mucher ches lèrmes,

Mais ej les os aperchu.

Ch'est trisse d'ête conme t'es achteure,

Et ej sus fin trisse ed rin pouvoèr foaire

Pour canger cho.

Ej pux bin foaire unne tiote cacouille qui vo t'faoire rire,

Mais tes lèrmes sont jonmoais loin.

Tu les muches conme tu pux,

Mais ch'est fin malaisié.

Avant qu'ej té connoaiche,

Un canteu avoait écrit unne canchon pour ti.

P't'ête ?

Et unne eute canchon qui causoait ed lèrmes.

Des canchons, i in o des bèles,

Ches lèrmes, jonmoais.

Corage.

Ches grinds et ches tiots

 Blaise Pascal - os érez p't'ête comprins qu'ej sus in route à lire un ed ches lives - o écrit un jour :

- " Ches grinds, is ont leu tête qu'est pèr dsus el tête ed ches tiots. Mais leu piés, is sont conme ches piés ed ches tiots o minme ches piés ed ches papars : is touche'te ech sol. Ches gins sont tertous ach minme nivieu."

Coèr un keup, os pouvez buser.

Boinne jornée.

Min éfant

L'eute jour, min éfant pose unne tchestion :

- "Min père ! Pourquoé-jou qu'os avez poin ieu ed deusienme éfant avuc l'mère ?"

Surprins, j'y réponds :

- "Djò qu'os in vouloème autchun."

Ch'est li qu'o étè surprins.

Boinne jornée.