Casi l'minme forche

Merkerdi au vèpe, j'acoutoais un jornaleu causoait d'unne rinconte ed tennis inter un frinchoés et un eute jueu mie frinchoés.

Et ch'jornaleu disoait ;

- "Ech frinchoés est casi del minme forche eq l'eute."

L'avoait raison ! Cho o duré alintour ed trinte minutes, ches premières del rinconte, mais l'inconte o duré deus eures tchinze, et après ches trintes premières minutes, ch'étoait pu casi o puss, mais moinss.

Et ch'frinchoés o rintré à s'moaison. conme casi tertous ches eutes frinchoés. 

Boinne jornée, et vive'te ches jornaleus.

Put mantcher os tchairons

I o quèks jours, unne tiote famille, avuc ed jonnes tiots pérints et un jonne tiot garchon ed trinte moés, béto trinte-et-un, ont prins un avion inter Moscou et Krachnoyarchk, in Sibérie.

Quanq is ont monté din chl'avion - in russe, is di'te chamaillote, casi conme ches chukes pour ches éfants et ches grinds, ches chamallots -, l'mère dech tiot galibié o dit à chl'ôtesse dechl'avion :

- "min fiu o mie ed casake ed seuvetage !"

L'fanme i répond, in russe, mais ej traduis :

- "Mdame, os volerons mie pèr dsu ches mers. Et chi os tchaisons, os tchaisons."

I péroait qu'echl'avion o bin arrivé.

Boine jornée.

Ete in vie

... et in boinne santé, ch'est unne boinne cose.

 

Quanq ch'est conme' ho, os pouvez coésir ech jour et chl'eure quanq os allez moérir. Qué canche !

 

Maginez !

 

In premier.

Os êtes in vie et ureus, mais ércrand ed vive. Adon, os busez un molet et os vos disez eq sinmdi, os moérirez.

D'ichi lò, os préparez toute ; qui qu'éro vot moaison, vot argint, os écrivez à ches gins qu'os ainmoète, et os coésichez kmint qu'os allez moérir.

Poin ed mawaise surprinze.

In deuze.

Os êtes in vie et ureus, mais d'un keup, os avez un accidint. Et os mourez. Qué brin ! Os avez rin préparez, rin dit à vot famille, famille qui vo ête fin trisse.

 

Adon, os êtes trisse d'ête mort conme cho.

P't'ête minme qu'os avez ieu du mau avant ed moérir !?

Sapré brin !

In troés

Os avez achteure un cros mau edpi quèks tans, et ches séruzyins n'arrive'te mie à vos djérir. Puss cho vo, moinss cho vo pour vos.

 

Os allez moérir, mais os pouvez mie coésir quanq, et os avez mau pertoute.

Aprè ches troés eximpes, j'espère qu'os avez comprins eq des keups, des gins auche'te invie ed coésir kmint et qiuanq moérir.

Boinne jornée.

 

Unne sapré pèrtie

... ed no'corps.

Din unne grinde école (ed ches Anmérikes, mais os s'in motchons), un professeu ed scieinche dminde à ches élèves :

- "Eltchèle pèrtie du corps put grindir justch'à attinde chonc keups ed puss s'taille normale ?"

Pi, cht'onme dminde à unne fille. Mais ale répond mie, dvient rouve conme, pèr eximpe, un pichon rouve, et muche adon ch'djife drière ches mains.

Ech professeu dminde adon à un eute élève qui répond :

- "ches pupilles (ed ches ius)".

- "Fin bin !" dit chin moaîte. 

Pi i rbée à nouvieu l'fille qu'o mie répondu i o deus minutes et i dit :

- "J'os troés coses à vos dire, jonne fille. Premièremint, os avez mis foait vos dvoèrs. In deuze, os avez l'esprit tortieu et mie bin plaché. Troésiememint, attindez-vos à ête granmint déchue din vo'vie."

Ches lines au dsu sont un estrait d'un live qu'ej sus in route à lire mais eq j'os mie chin tite : quat-mile-troés-chint-vint-et-un, o quat, troés, deus et un, o coèr, quarante-troés vint-et-un.

A suive. Fin boin live offert pèr unne ed mes filles.

Un nouvieu papar

- "Fonse, i feut qu'ej té diche : l'famille Gina o ieu un nouvieu papar ; un fiu lonmé Laurent."

- "Laurent ! Mais feut ête scoué pour lonmé chin fiu conme cho !"

Jou qu'os avez comprins ? I o unne tiote cacouille.

Boinne jornée à tertous.

Présinter un inochint

Quanq os causons d'un inochint, ed qui qu'os causons ? L'eute jour, unne gin  m'o dmindé. 

Un inochint, cho put être un nikdouille. Mais des nikdouilles, i in o deus seurtes :

- ches gins qu'ont mie ed gingin,

- ches gins qui sont mawais avuc ches eutes, qui vu'te leu foaire du mau.

Un inochint, ch'est un nikdouille qu'o rin din chin cervieu.

Des gins di'te, in causant d'un inochint : 

- "i pourroait fouir del'ieu."

- "L'est mie ch'pingouin qui gliche ch'puss loin."

- "L'est mie ch'coutieu ch'puss radjuisé dech tirroér."

- "i sroait capabe ed matcher du foin."

Jou qu'os avez comprins quoé qu'est un inochint ?

J'espère.

Boinne jornée à tertous, minme à ches inochints (qui sai'te seuremint mie qu'ej cause d'eux).

Ches produits d'ém cinse

I o quèks moés, j'o lu, din unne gasète agritchole, qu'un cinsier qu'avoait ieu deus-chint-quatore-mile uros ed produit in deus-mile-trèse in avoait quarante-quat pèr chint qu'étoai'te eds aides agritcholes.

Os savez cartchuler ?

Boinne jornée à tertous, surtoute à ches ouvreus.

Unne taïonne diroait des minteries

Sinmdi, un tiot garchon qu'o un molet puss ed troés ins d'âge dit à s'taïonne:

- "Mémé, pourquoé eq tu dis toudi un into noèrt adon qu'il est vert ?"

Pauve tiot ! I savoait mie qu'un intonnoèr étoait un mot et pouvait ête noèrt, mais étou vert o ganne o rouve.

Intonnoèr gris

Ch'minme

Et vos ! Jou qu'os l'savoète ?

Matcher et vive

"Baille un pichon à un Onme et i pourra minger - et vive - durant un jour.

Apprins z-i à pétcher et i pourra vive toute és vie."

 

Seuchez que slon ches évangélisses, Jésus o nourri dis-mile gins avuc chonc pains et deus pichons, mais slon Fernand Raynaud, Jésus éroait nourri sét gins avuc dis-mile pains et dis-mile pichons. Qui croère ?

 

Ech moude à l'invers

Saprée époke qu'os vivons ! Ches ordinatures dminde'te à ches gins ed preuver qu'is sont mie des robots.

Busons !

Avuc un cros merchi à min tiot frère pour s'cacouille. 

Des gins in voéyage

I o quèks innées, din un tiot village ed l'Yeune qu'ej vos mie lonmer, unne voéture arrive. Ches gins qui sont ndan ont dzoin de dminder quèk cose à unne gin dech village pour continuer leu voéyage.

Aperchuvant un onme din ch'village, l'voéture s'arte et unne ed ches gins del voéture vos poser s'tchestion. 

Mais l'eute  leu dit :

- "Bazèr ! Bazèr ! Bazèr ! Baz.."

L'voéture pèrte et ches gins voét'te adon un deusienme onme, alintour ed chincante mètes aprè. Is art'te et unne gin vos assayer ed poser s'tchestion.

Mais ch'deusienme onme dit :

- "Voéture berzillée ! Voéture berzillée ! Voéture be..."

Coèr un keup, l'voéture s'in vo. Ches gins qu'étoai'te ndan vnoai'te, chin l'savoér, ed croéser deus puss cros inochints dech village, deus frères, malureusemint pour leus pérints et pour ches gins qui les rincont'te un keup o ed tans in tans.

Chint o deus chint mètes aprè, din l'minme rue, i o un troésienme onme, grind et bin habillé. Ch'est un ancien moaite d'école, mais ches gins qui voéyage'te ch'jour-lò l'sai'te mie. I sanne qu'el canche fuche infin avuc eux. L'voéture arte coèr un keup et unne gin arrive infin poser s'tchestion.

Et l'eute répond :

- "Mes gins ! Quanq os savons mie dò qu'os allons, os restons à no'moaison."

Is ont pèrti, fin rade.

I o des keups dò ches coses qu'arrive'te sont spéciales.

Boinne journée, et d'avinche, boin voéyage à vos din ches moés qui vien'te.

I o l'moaison qu'asit

Un keup, au mitan del nuit, un onme s'met à hurler :

- "Au fu ! Au fu ! I o l'moaison qu'asit !"

Il a raison : s'moaison est in route à asir.

Fin rade, i court sortir s'voéture, unne Rneult onze qu'est din chin garage.

Durant qu'és moaison continue d'asir. Et eq ches pérints dorme'te ach premier étage del moaison. 

Aprè cho, cht'onme étoait ureus : l'avoait seuvé s'voéture.

- "Unne Rneult onze, ch'est unne sapré voéture ; ch'est bin miu qu'unne Rneult nuf ; ch'coffe est puss grind." qu'i disoait.

Edpi, chin père est handicapé, et s'mère est morte. Din l'moaison. 

Et malureusemint, ch'est arrivé in vrai.

Dis ins et des millars

... pour acater des jueus ed fotbal et gaingner, mais dis ins ed perdus : l'étchipe o mie gaingné quoé qu'ale vouloait gaingner. Ale o minme perdu in juant din s'ville ; mie croéyabe !

-"Os frons miu l'in prochain." o dit mardi au vèpe ch'capitaine ed l'étchipe.

! 

Dis ins avuc des millars pour acater - casi - ches meilleurs jueus ed fotbal du moude, et is n'o qui pense'te eq cho sro miu aprè !!

Des vrais mawais.

 

Slon qu'os êtes crosse, tiot o grind

 L'eute jour, unne mère dit à chin fiu qu'o moinss ed trinte moés d'âge :

- "Achteure, min fiu, tu vos aller foaire unne crosse prangère."

- "Nan !" qu'i répond ech galibié qui sanne mie ête un nikdouille, "crosse* mère, crosse prangère, et tiot garchon, tiote prangère."

Achteure, prions pour l'fanme et ches innées à vnir.

Boinne jornée.

* o grinde

Un dis dech moés ed moai

Ch'est un jour eq ches jonnes ed moinss ed quarante ins connoaisse'te mie et eq ches moinss jonnes, conme mi, ont oblié : ech dis dech moés ed moai mile-nu-chint-quater-vint-un.

Ech jour-lò, un socialisse est élu présidint del républike frinchoése ; cho foaisoait eds innées eq ch'étoait mie arrivé, et p't'ête qu'il éroait mie fallu eq cho arrive.

Innui, i o que quèks jornaleus qui s'ranminrtuve'te cho, pour dviser durant quèks minutes.

Vu qu'i o et qu'i éro du solé innui, os sonmes mie obligé d'acouter.

Boin verdi à tertous.

Jean-Frinchoés Atchilli

J'ainme poin granmint ches jornaleus, à pèrte quanq is sont d'ém famille.

Jean-Frinchoés Atchilli est mie d'em famille, mais j'aime bin l'acouter. Adon, quanq j'os apprins qu'il avoait étè mis à joke, j'os ieu invie d'i bailler min soutien ; un boin jornaleu doét pouvoér foaire chin ouvrage libremint.

Défindons Jean-Frinchoés Atchilli et tertous ches jornaleus, quanq is sont honnêtes. 

Ale péroait puss jonne

L'eute smangne, j'o pèrti quèks jours in vagances in Espane avuc des bieus-frères, des bèlés- soeurs, em fanme etpi .... m'bèle-mère préférée.

Fin bin ! Bin ordjanisé pèr un bieu-frère.

Din quèks musées et restaurants, j'os dit à des gins :

- "L'fanme qu'est lò, ch'est m'bèle-mère (qui mèrche* fin bin) ; feut savoér eq din un in, ale éro chint ins."

- "Nan ! Ale péroait puss jonne !"

Et in vrai, ale est puss jonne. D'au moinss dis ins.

J'os ri, et des keups, ches gins étou.

Seuchez rire et foaire rire.

Boinne jornée.

* Ej croés qu'innui, minme chi ale o rin dit, m'bèle-mère o pèrti porter l'flanme olympike. Ale sro l'puss vieillle gin à foaire cho avant ch'moéz ed juillet. Corage, bèle-mère !

Cho randonne granmint

J'éroais minme pu écrire "cho randouille granmint".

Edpi ièr mardi et justch'à diminche, i o, à Lyon, ches "nuits sonores".

Ches ordjanisateus ont tout comprins et di'te vrai : ch'est sonore, mais ch'est poin dit eq ch'est del musike.

Et ej dis eq ch'est poin del musike.

I o quèks innées, ech nom dechl'évènemint étoait ches "nuits del musike". Mais des gins qui vive'te din ches alintours ont qu'is pouvaoi'te mie dormir, vu kmint eq cho randonnoait.

Adon, ches ordjanisateurs  ont cangé ch'nom dechl'espèce ed festival.

"Nuits sonores", t'intiinds "boum, boum, boum" pi "boum boum boum boum boum" pi aprè, "tam tam ta lalam tam boum", et cho, toute el nuit.

Mi, ej dis : 

"El musike est un art, randonner est pour ches cros nikdouilles et ches tiots péteus."

Nanard fro pu ed dictée

Ièr lindi, ej vos o causé d'un onme qui vouloait téléphoné à un eute onme lonmé Nanard.

Innui, feut qu'ej vos diche qu'un eute onme lonmé Nanard - il existoait au moinss deus gins lonmés Nanard din ch'moude - est mort. Ièr lindi.

Ch'Nanard-lò, os pourroème dire eq ches jonnes l'ainmoai'te poin, vu qu'il avoait foait un ju avuc ches dictées. Ches minmes dictées que font ches élèves din ches écoles. 

Nanard avoait foait cho, et ainmoait granmint lire. Surtoute in frinchoés. Ej pense qu'il o jonmoais lu ed picard, malureusemint pour li.

Achteure, il o arté ed respirer et o pèrti, pour toudi.

Adé, Nanard ! Chi tu voés ém clère, Tiote Berthe, lò dò eq tu vos, dis-i bojour d'ém pèrte, et rmerchie-lò.

Ch'est ontabe

L'eute jour, un onme, fiu et tiot-fiu ed cinsiers del Sonme qui, à leu époke, étoai'te ed cros et célèbes planteus ed punmes-ed-tère, avoait, din chin gardin, des punmes-ed-tère à buter.

Mais, et ch'est lò dò eq ch'est ontabe, i savoait mie quanq i falloait foaire cho, ni kmint foaire.

L'o ieu invie ed téléphoner à un eute onme, Nanard, frère ed chin père et li-étou producteu ed punmes-ed-tère à sn'époke, mais i l'étoait fin péteus pour foaire cho. adon, l'o rbéïé chu internénèt.

Et o buté ches punmes-ed-tère conm il o pu.

Cht'onme i dit qu'il o jonmoais vu chin père buter ches punmes-ed-tère : ch'étoait ches manicraques qui foaisoai'te toute d'un keup : smer et buter.

Mie tonnant qu'i seuche mie foaire !

Achteure, il attind l'dépouille cht'étè. Mais kmint foaire ?

Boin ernouvieu à tertous.

Edpi octobe

Début octobe, ej vos avoais causé ed l'étchipe ed bastchète ed Sin-Kintin qu'i falloait aller vir juer, surtoute quanq ale jue à Sin-Kintin.

J'espère qu'os i avez allé ; is sont din ches uit boinnés étchipes ed Frinche cht'innée, minme chi is ont perdu ièr.

Chi os i avez mie allé, os pouvez coèr les vir juer* au moinss deus keups cht'innée : sinmdi onze dech moés ed moai, grinde jornée, et p't'ête ech dis-sèt o dis-nu dech minme moés.

Profitez !

Boin diminche, et boinne smangne à vnir, avuc du solé.

*Chi os passez dvant o casi dvant l'moaison d'ém mère, pensez à l'inmner (et l'ramner). D'avinche, merchi.