Réponde à unne invitation ed mériage

Pour bin comprinde quoé qu'i o d'écrit aprè, feut qu'ej vos esplique un tiot molet avant : i o quèks smangnes, ém fanme et mi avons rchu unne invitation pour ch'mériage d'un nveu. Et i feut réponde pour dire chi os irons o poin. Mais feut réponde pèr intèrtnénet ; ej sais mie foaire, mais os voulons aller à ch'mériage.

Adon, j'os écrit à ches pérints ed min nveu, un ed mes bieus-frères et unne ed mes bèlés-soeurs, et à ches pérints d'és future fanme, in prindant unne bèle carte postale foaite pèr mi.

Pour els uns :

"Mdame ém bèle-soeur, Msieu min bieu-frère,

Os m'avez annonché i o quèks tans ch'mériage ed vo'fiu Natole* avuc unne fille lonmée Fifine* ach moés d'eu prochain ; ej sus fin ureus d'apprinde es fin boinne nouvèle et sus également fort honoré d'ête convié à l'fête. Mais, i m'o dmindé et dire chi ej viendro o nan chu un site intèrnénet ed ches futurs mériés ; jou eq ch'est min âge avinché qu'est proche de chti del rtraite o qu'ej sus un nikdouille, ej pux mie réponde conme dmindé.

Dech keup-lò, ej mé permets ed vos réponde, avuc ch'viu moéyin mais qu'est toudi opérationnel qu'est ch'courrier postal, eq chi Diu vut bin laicier vive, ej sro présint.

Din l'attinte ed vos rvir,

Rchuvoez, Mdame ém bèle-soeur, et Msieu min bieu-fiu, echl'espression ed mes fraternèles salutations.

                                                               ED

                                                               Cht'onme ed Pépète*

                                                                        Fille ed vos père et mère o ed vos bieu-père et bèle-mère,

                                                                        Vot'soeur o bèle-soeur,

                                                                        Tante ed vos éfants, dont ch'mérié

                                                                Onke pèr alliance ed vos fius"

Pour els eutes :

"Mdame, Msieu,

Os m'avez annonché i o quèks tans ch'mériage ed vot fille Fifine* avuc ch'garchon Natole* ach moés d'eu prochain ; ej sus fin ureus d'apprinde es fin boinne nouvèle et sus également fort honoré d'ête convié à l'fête. Mais, i m'o dmindé et dire chi ej viendro o nan chu un site intèrnénet ed ches futurs mériés ; jou eq ch'est min âge avinché qu'est proche de chti del rtraite o qu'ej sus un nikdouille, ej pux mie réponde conme dmindé.

Dech keup-lò, ej mé permets ed vos réponde, avuc ch'viu moéyin mais qu'est toudi opérationnel qu'est ch'courrier postal, eq chi Diu vut bin laicier vive, ej sro présint.

Din l'attinte ed vos vir,

Rchuvoez, Mdame, Msieu, echl'espression ed mes sincères et cordiales salutations.

                                                               ED

                                                               Cht'onme ed Pépète*

                                                                        Fille d'un taïon et d'unne taïonne dech mérié,

                                                                        Soeur dech père dech mérié et bèle-soeur del mère

                                                                        dech mérié,

                                                                        Tante ed leus éfants dont ch'mérié

                                                                Onke pèr alliance ed vo'futur bieu-fiu"

Boinne jornée, et à béto, p't'ête.

* ches tiots noms sont mie leus vrais tiots noms, pèr respect pour eux.