Vinde des punmes ed tère

Min père, des frères à li et leu père, un ed mes taïons, cinsiers din no'bèle Sonme, produisoai'te et vindoai'te des punmes ed tère, mais mes frères, mes cousines et cousins, nan.

Ej voés poin souvint mes cousines et cousins, et coèr moinss leus éfants. Mais l'eute smangne, j'in o rincontré et pèrmi eux, unne ed mes tiotes-cousines qu'o malureusemint né ach moés d'eu mile-nu-chint-quater-vint-dis-uit et qu'o don mie vu Zidane et l'étchipe ed Frinche ed fotbal gaingné pour un premièr keup, l'Keupe dech monne ed fotbal.

Durant quèks sgondes o minutes, j'os causé avuc l'jonne fanme, et pour foaire miu connoaissinche, j'i dminde chin ouvrage.

- "Ej vinds des punmes ed tère, pertoute in Urope et minme din ch'monne. Pèr vint-chonc tonnes o puss*.

...

Et j'os vu l'deusienme victoère ed l'étchipe ed Frinche ed fotbal à l'Keupe dech monne ed fotbal.

... ".

Mi, ej vos mie écrire qu'ej sus fièr d'em tiote-cousine, minme chi ..., mais ej sus surtoute fin ureux ed constater eq din no grinde famille, i o coèr au moinss unne gin qui s'otchupe dech boin lédjunme.

Continue, tiote, et boinne canche à ti.

Bec à tertoutes et tertous, et boin lundi.

*Causons poin, ichi, ed combin qu'ho veut

achteure un tchilo ed punmes ed tère pour mie foaire ed mau à ches cinsiers qui produi'te ches punmes ed tère et qui li'te ems articles.

Un onme sesquisse

Innui, ech uit dech moés ed marche, ch'est l'jornée dech droét ed ches fanmes. Conme chake innée edpi eds innées.

Mi, ej vouroais, pour cho, causer sesquisme.

Ch'est quoé l'sesquisme ?

Tiot Bébert et Lareusse di'te, o écri'te, eq ch'est foaire des discriminations chu l'sesque. Cho vut dire, slon mi, croère eq ches gins d'un eute sesque qu'ech tyin sont différints, et surtoute, ont moinss ed compétinches et ed tchalités eq chtols-lò qu'ont ch'minme sesque eq ti.

I péroait eq souvint, ch'est ches onmes qui sont sesquisses. Ch'est trisse.

Mi, j'i sus mie. Ej laice m'fanme tonde din ch'gardin, keuper et ringer ch'bos, porter des sos ed quinze o vint tchilos, des sieux ed chonc à dis lites o coèr, unne étchèle ed trèse tchilos. 

M'fanme o l'droét ed foaire, mais ale foait mie. Donmage ! Ale est libe.

Un eute keup, os dviserons chu l'tchestion "Ch'est quoé ête fanminisse ?".

Boin diminche à tertout, et surtoute à ches fanmes.

Un grind plaisi

Ah ! Qué plaisi qu'ed vir, durant quèks eures, des onkes et tantes, des cousins cousines et quèks uns ed leus éfants qu'os voéyons poin souvint.

Os prindons des nouvèles ed ches uns et ches eutes, et os in baillons étou, toute in buvant un keup o in matchant un tiot morcieu, insanne.

Os pensons à ches gins qu'os connoaissoème et qui sont mie lò o bin qui sont pu lò. 

Cho foait plaisi d'ête insanne, minme quanq, malureusemint, ch'est pour un interremint d'unne gin qu'os ainmoène tertoutes et tertous.

El famille est une canche.

Adé, m'tante ! A la rvoéyure ches eutes.

Unne fanme vut edl'argint

Qu'i sanne.

J'esplique.

Ièr, j'os prins ch'train pour aler promner. D'un keup, din ch'train, unne fanme passe din ch'couloèr in tnant din s'main unne catschète à l'invers.

Quèks minutes aprè, la vlò qui rvient, toudi avuc s'castchète din s'main et coèr sins dsu in dsou.

Adon, j'i foais sine d'arter pour i causer. Ale arte ed mèrcher et j'i dit :

- "Mdame, chi os voulez qu'os mettons edl'argint din vo'tchépi, feut mèrcher moinss vite."

Ale o ri, minme in étant ch'contrôleuse dech train.

Boinne jornée, et chi os voéyagez, in train, à piés o in voéture, boin voéyage.

Etpi coèr, seuchez rire et foaire rire. Chin quoé, apprindez.

 

Avant ch'premier dech moés ed marche

Innui aprè-nonne, adon j'avoais acaté del salade et du freumage, ech vindeus m'dit qu'ej pux avir troés uros dé rmise avant ch'premier dech moés ed marche.

J'i réponds :

- "Fin bin ! Coèr troés jours pour in profiter."

Erchète ed ches rabotes picardes

Ch'est un dessert, lonmé étou "punmes in kmise". 

Pour quat gins, i feut :

    - quat punmes,

    - unne pâte à tèrte feuilletée qu'os pouvez acater, o bin unne pâte berzillée qu'os foaisez vos-minme.

    - du chuke,

    - du bure,

    - del canelle,

    - ech ganne d'un u, ed vos glinnes chi possibe.

L'érchète :

    - kmincher pèr alunmer vo'four à chint-quater-vint degrés o thermostat sis

    - éplutcher pi vider ches quat punmes chin les décoper,

    - décoper quat carrès ed dis-uit chintimètes din l'pâte à tèrte.

    - mette adon unne punme pèr carrè, bin au mitan.

    - mette du chuke, un molet ed canelle et un molet ed bure din ch'treu ed ches punmes

    - rélver chake tchuin dech carrè ed pâte à tèrte pour couvrir l'punme avuc. Laicier un tiot treu in heut : os pouvez foaire unne tiote kminée avuc del pâte à tèrte qu'i reste.

    - avuc un tiot pincieu, mette dech ganne d'u chu chake punme.

    - mette à tchuire alintour ed trinte-chonc minutes.

    - aprè, os pouvez mette du chuke-glache dsu, pour foaire bieu.

Servir keud o froéd.

Assayez, régalez-vos, et disez-mi.

Boin accion.

El tirade dech cros nikdouille

Un onme rchut s'famille. Is sont in route à manger. 

Un jonne qu'est lò à tabe et qui pourroait dvenir chin ginde i dit :

- "... quoé-jou qu'os avez coési conme Champaingne ?"

- "J'os coési un fin boin Champaingne qu'o del tchalité, et granmint ed finesse, justémint." 

- "Kmint cho, justémint ?"

- "Ech contraire ed vos, justémint. Vu qu'os êtes fièr ed vos-minme, ej comprinds qu'ho fuche unne nouvèle. Os intchiètez mie, ej m'os aperchu innui eq j'étoais p't'ête conme vos. Mais, quand minme innui, justémint, quèk cose o cangé m'vie. Cho, ch'est pour vos dire eq cho put durer. Et ej crains eq pour vos, ch'est pèrti pour...

Ichi à tabe, d'autchuns vos truve'te dynamike, combatif, interprindant, audachieus, et d'eutes, euh... et juge'te qu'os êtes suffisant, fièrtchul. Riditchule. Et bin ches uns et ches eutes s'berlure'te. Quoé qu'os êtes est granmint pu simpe. Avuc ches mots ed chake jour, conme in langage surveillé, os avons un minme nom. : os êtes un cros nikdouille. D'unne spèce rère, jé rconnoais. Catégorie suprême, chtol-lò qui tchumule ch'cros nikdouille malgré-li et ch'cros nikdouille assuffi ed l'ête. I o granmint ed tans eq j'os mie rincontré un fin boin mélinge. Toutes em félicitations. 

Ete un cros nikdouille est mie vraimint un problinme, nan, chl'innui, ch'est eq ches cros nikdouilles vu'te l'foaire savoèr. Ch'est chl'usage intinsif qu'est pénibe. Et adon vos, os êtes dech ginre chin modération.

..."

Ech jonne vo tchitter ch'rpas. Et p't'ête l'famille. P't'ête, j'os poin rbéïé toute ch'film.

Ech reuve anméritchin

Ah, ches Anmérikes ! Echl'invie d'aler i vive, gaingner granmint ed dollèrs, visiter ches grinds canions dech Colorado, juer à Las Védjas, vir el blanke moaison, prinde eds avions pour aler ed lò à lò, ...

Cho foait reuver.

Nan ! Cho foaisoait reuver, i o quèks moés mais achteure, ch'reuve anméritchin o cangé. Ches gins, is reuve'te ed tchitter ches Anmérikes.

Maginez un groélindoé perdu in batieu aux alintours dech détroét ed Béring. A main gueuche, chl'Alaska, et à main droéte, l'Sibérie. Dò-jou qu'i feut miu aler ? I vo buser granmint.

Ch'rcinsemint

Cht'innée, din ch'village dò qu'ej reste, i o ch'rcinsemint. Et j'os répondu à ches tchestions.

I n'o unne qu'étoait "combin qu'os êtes à vive din vo'moaison ?". J'os répondu "deus".

Dech keup-lò, aprè, falloait inditcher ch'lien inter mi et l'eute gin. Vlò un eximpe ed ches réponses possibes :

- conjoint o conjointe,

- pérint et éfant,

- onke et nveu o nièce,

- taïon et tiot-éfant,

- eute.

Mi et l'eute - qu'est m'fanme -, os sonmes mérié. Méri et fanme. I o poin, adon, j'os mis "eute".

Et vos ! Jou-qu'os avez à réponde ach rcinsemint cht'innée ? Chi ouais, fuchez précis. Cho permet, pèr eximpe, ed savoèr combin qu'os avons dzoin ed tchurés.

Boinne jornée.

Ch'est poin mi

... qu'o dit cho.

"Ches filles qui font des scieinches, ch'est conme ches orses qui font del bichyclète. Ch'est poin mie possibe mais ..."

Ch'est Roger Pouvoèr qu'o écrit l'phrase-lò din un live chu eds abes et qu'ej sus in route à lire.

Boinne jornée.

Min jour ed canche

Ièr au matin, ej pèrte acater du pain. 

D'un keup, ej voés unne boutike. Ej rinte ndan et dis :

 - "Bojour Mdame ! Jou qu'os pourroète m'inditcher dò-jou qu'est l'meilleure boulindjerie del région ?"

- "Ichi ! Os i êtes."

- "Nan !?"

- "Chi ! Ch'est vot jour ed canche."

Os avons ri, et j'os acaté min pain. Qu'étoait boin.

Et vos ? Jou qu'os savez foaire des tiotes cacouilles et rire ?

Boin diminche à tertous.

T'os unne bèle vie

T'es unne gin ureuse, t'os unne bèle vie.

Mais un jour, i o du brin qui djile à tes piés. Qué brin ! Ti, tu restes lò, et conme un co frinchoés qu'o ches deus piés din ch'fyin, tu pourroais minme canter :

- "Ah ! Cho iro, cho iro, cho iro ..."

Ech brin i continue ed grimper. Achteure, t'in os à ches génous. T'attinds. Jou eq tu l'os vu o sinti ?

Pi il est à t'panche et ets épeules ! Tu buses, o mie, mais t'attinds coèr.

Deus gins qui passe'te din ch'coin et qui t'ainme'te t'voé'te et vu'te t'sortir ed lò. Avuc deus eutes gins qui sont din ches alintours, is vont assayer ed té tirer. Tu dis rin, ch'brin arrive à t'bouke.

Mais tu kminches à sortir dech brin. Tu rsannes à ches gins qui vont à ches montaingnes, in ivèr o in étè qui rmonte ches pentes ; ch'est fin malaisié, mais in heut, ch'est fin bieu. 

Et adon, tu rdeviens unne gin ureuse.

Mutipier pèr troés

Ièr, à l'télévision, chl'onme d'éto d'unne interprinze disoait à un jornaleu :

- "Achteure, os sonmes sèt à ouvrer ; os avons mutipié pèr troés ches effectifs".

Ch'est bieu.

Ej pinse granmint à tertous ches galibiés qui sont à l'école et qu'apprinde'te à cartchuler. 

Ej pinse étou granmint à ches gins à qui i manque un bros, unne gambe et qui ouve'te.

Boinne jornée.

Pour avir un abe

Tchestion importante :

- "Quanq-jou eq ch'est ch'miu pour planter un abe ?"

Unne réponse - d'un chinoés - qui vo p't'ête granmint vos surprinde :

- "I o vint ins".

Mais os pouvez étou achteure. Qu'ej pinse.

Boinne jornée.

Ech viu frinchoés

In Frinche, il existe deus seurtes ed frinchoé causées : ch'frinchoés, d'achteure, et ch'viu-frinchoés.

Ech viu frinchoés, ch'est des mots qu'ont cangé o bin dispèru. Os les utilisons pu.

Quèks eximpes : 

- Chinglier : ch'est un bétail qu'existoait in chincante-deus avant eq Jésus naiche, din ch'village d'Astérik et Obélisk. Et i in o coèr achteure, pèrtoute in Frinche. Diminche au vèpe, m'fanme et mi avons mantché d'in tuer un cros.

Don, ch'mot est viu mais coèr utilisé. Conme brin, mautcheurant, pichier, massaque o coèr, abominabe.

- Assoter : cho vut dire "qui rind nikdouille". Vlò un mot qu'os utilisons pu. Minme cose pour masticatoére.

Ch'est don du viu frinchoés.

- Beurète : i sanne qu'avant l'in sis-chint et minme mile-trinte-troés, ch'mot existoait mie. Mais in mile-nu-chint-quater-vint-uit, lò, ch'mot existoait. Conme ch'mot aréoport.

Os pouvons don écrire eq ch'est mie du viu frinchoés. 

Eh bin in vrai, ch'est quanq minme du viu frinchoés : achteure, feut pu utiliser ch'mot beurète (mais os pouvons coèr utiliser aréoport quanq os causons d'aréoport). Os avons don un mot nouvieu qu'est djò viu. 

Pour un viu conme mi, cho surprind granmint*. Ch'est pour ho qu'i o quèks smangnes, pour conter un voéyage et unne bèle rinconte foaite, j'avoais utilisé ch'mot. Chin savoèr qu'i falloait poin. Des gins eq j'ainme granmint et à qui ej causoais ont mantché d'em tuer.

Innui, pour dire eq t'os causé avuc unne beurète, feut dire eq t'os causé avuc unne "fille qu'o ches pérints (o ches taïons) qu'ont né din ch'nord ed l'Afrike".

Toute i vo bin.

Boinne jornée.

*ureusemint qu'un nveu qu'o s'mère qu'o né in Algérie m'o rasseuré.