L'o dzoin ed gingin artificiel

Din ch'monne, i o des gins qu'ont el canche d'avir du gingin, et d'eutes, malureusemint, qu'in ont mie.

Pèrmi chtol-lò qu'in ont poin, ed gingin, i in o qui ont des testitchules et o qui pense'te qui sont forts. Mais ch'est unne berlure. In vrai quanq is doé'te buser, is utilise'te quèk cose ed nouvieu, ech gingin artificiel. Edvant un ordinature, is écrive'te et font croère qu'is ont du gingin. Mais chin ordinature, is ont rin à dire o sai'te mie quoé qu'is doé'te dire. Et quanq is ont adon un problinme pour réponde à unne tchestion, is djeulent et sont mawais.

Malureusemint, i o, des keups, des mawais et chin gingin qui dvien'te maire. Et din un village dò qu'i o puss ed chincante pèr chint ed ches gins qui vot'te qu'ont poin ed gingin et l'freusse, cho put durer granmint d'innées.

Cho sro chin mi

Din chonc o sis moés, os alons canger ed présidint. Au début, j'ainmoais bin no'présidint d'achteure, picard. 

Etpi, ches innées ont passé, ches djères et ches crises étou. Chin oblier ches estrêmisses, à main gueuche o à main droète. Ej causero mie, ichi, dech présidint ed ches Anmérikes. L'est mie in Frinche, et feudroait des jours.

Os alons canger ed présidint, et i m'sanne qu'i in o mie un seu qui s'présinte pour tnir l'moaison Frinche qui sroait conme i feut. Conme in deux-mile-vint-sis, l'est possibe qu'achl'ernouvieu, ej pèrche mèrcher quèks smangnes, inter ch'tchinze dech moés d'avri et ch'vint dech moés ed moai. In puss, achl'époke-lò, i foait moinss keud qu'in étè.

Voter est un dvoèr, mais voter pour des nikdouilles, ej pux mie.

Sectimbe et ches papars

Cho foait granmint ed tans eq j'os mis écrit quèk cose ; j'avoais rin ed bieu à mette.

Mais ièr, j'os truvoé un sujet : ches papars qui naiche'te in sectimbe ; aprè ch'tchinze dech moés, et avant ech minme tchinze dech moés d'aprè, octobe.

Chi os ainmez cartchuler, cartchulez. Nu moés avant, os sommes alintour ed Noé o del nouvèle innée ; ches jours is ratinchtte mais ches gins, in principe, sont ureux. Et ont fiat in l'avnir. Cho s'voét, nu moé aprè. Mi, jé l'voés chu min calindrié.

Feut mie confonde avuc l'canchon d'un canteu suiche qu'avoait s'fanme qui i disoait, in buvant chin ju, "m'fros-tu un papar pour Noé ?". Rin à vir ! Ch'est point l'minme période. M'fanme et mie, quanq minme, in acoutant l'canchon, os avons foait un papar. 

Sectimbe, ch'est étou après ch'moés d'eu. Din granmint ed cas, ches vagances sont définies ; ches ouvreus doé'te aler ouvrer, minme chin in avir invie. Adon leu moral est mie chti qu'is ont à ches fêtes. Ches rtraités, eux, font pus ed galibiés. Jou qu'os connoaissez granmint ed gins qu'ont né ach moés ed join ?

Vlò ! Ch'est toute pour innui. 

A l'èrvoéyure.

Ech boin arbite afritchain

El Keupe du monne ed fotbal deus-mile-vint-sis o mie kminché mais i o djò des problinmes : un boin arbite afritchain d'achteure - in Afrike - o été rfusé d'intrer à ches Anmérikes vu qu'il est somalien. Et p't"ête étou, qu'il o l'pieu noèrte. Et qu'el Keupe du monne est din ches Anmérikes dò qu'un viu onme nikdouille, racisse, blanc avuc des cavieus gannes est présidint.

Ech fotbal, je rbée ed moinss in moinss vu qu'i o granmint d'érgint in ju et pu granmint ed surprinze pour savoèr qui vo gaingner. Mais avuc du racisme, ej vo arter de rbéyer. I péroait eq ches deus o troés étchipes ed fotbal d'Afrike qui vont pérticiper ont ieu étou des problinmes. Mais sont acceptées. 

Innui, ej dis qu'i feut mie aler vir ches rincontes, et chi possibe, mie rziuter à l'télé.

Boin étè à,tertous.

J'os voulu vir Verdun

... etpi j'os vu Verdun. 

Ch'étoait l'eute merkerdi, au vèpe.  J'os alé bir un ju avuc unne nièce qui restoait din l'ville durant quèks smangnes. Fin régalant.

Os in avons profité pour aler vir ches ramintuves del grinde djère ed quatore - dis-uit. 

Min Diu, quel horrur ! Pèr eximpe, toute un village o été berzillé, rasé. Reste rin, à pèrte des treus, et achteure, eds abes.

Chi os connaissez mie, feut i aler. In ivér, o bin quanq os pourrez.

Boinne jornée, et cros bec à m'nièce.

Ches boinnes minteries

"Os mintons jonmoais puss qu'avant ches votages, durant ches djères et aprè l'cache."

Qu'éroait dit Georges Clémincheau.

Din ch'monne d'achteure, busons.

Durant unne eure

Verdi au matin, une fanme voéyage in train.  Ale lit, rbée chez poaiyisages et dort un molet.

Ale o l'droét.

Quat eures aprè, l'fanme doét rintrer à s'moaison. In train. Mais ale o mie acaté chin titchet, minme poin chu internénet.

Poin ieu l'tans ! 

Adon, ale rate ch'premier train qu'arrive et qu'ale voét, pi attind une eure ch'deusienme. Qu'est in rtèrd.

Qué brin !

Vinde des punmes ed tère

Min père, des frères à li et leu père, un ed mes taïons, cinsiers din no'bèle Sonme, produisoai'te et vindoai'te des punmes ed tère, mais mes frères, mes cousines et cousins, nan.

Ej voés poin souvint mes cousines et cousins, et coèr moinss leus éfants. Mais l'eute smangne, j'in o rincontré et pèrmi eux, unne ed mes tiotes-cousines qu'o malureusemint né ach moés d'eu mile-nu-chint-quater-vint-dis-uit et qu'o don mie vu Zidane et l'étchipe ed Frinche ed fotbal gaingné pour un premièr keup, l'Keupe dech monne ed fotbal.

Durant quèks sgondes o minutes, j'os causé avuc l'jonne fanme, et pour foaire miu connoaissinche, j'i dminde chin ouvrage.

- "Ej vinds des punmes ed tère, pertoute in Urope et minme din ch'monne. Pèr vint-chonc tonnes o puss*.

...

Et j'os vu l'deusienme victoère ed l'étchipe ed Frinche ed fotbal à l'Keupe dech monne ed fotbal.

... ".

Mi, ej vos mie écrire qu'ej sus fièr d'em tiote-cousine, minme chi ..., mais ej sus surtoute fin ureux ed constater eq din no grinde famille, i o coèr au moinss unne gin qui s'otchupe dech boin lédjunme.

Continue, tiote, et boinne canche à ti.

Bec à tertoutes et tertous, et boin lundi.

*Causons poin, ichi, ed combin qu'ho veut

achteure un tchilo ed punmes ed tère pour mie foaire ed mau à ches cinsiers qui produi'te ches punmes ed tère et qui li'te ems articles.

Un onme sesquisse

Innui, ech uit dech moés ed marche, ch'est l'jornée dech droét ed ches fanmes. Conme chake innée edpi eds innées.

Mi, ej vouroais, pour cho, causer sesquisme.

Ch'est quoé l'sesquisme ?

Tiot Bébert et Lareusse di'te, o écri'te, eq ch'est foaire des discriminations chu l'sesque. Cho vut dire, slon mi, croère eq ches gins d'un eute sesque qu'ech tyin sont différints, et surtoute, ont moinss ed compétinches et ed tchalités eq chtols-lò qu'ont ch'minme sesque eq ti.

I péroait eq souvint, ch'est ches onmes qui sont sesquisses. Ch'est trisse.

Mi, j'i sus mie. Ej laice m'fanme tonde din ch'gardin, keuper et ringer ch'bos, porter des sos ed quinze o vint tchilos, des sieux ed chonc à dis lites o coèr, unne étchèle ed trèse tchilos. 

M'fanme o l'droét ed foaire, mais ale foait mie. Donmage ! Ale est libe.

Un eute keup, os dviserons chu l'tchestion "Ch'est quoé ête fanminisse ?".

Boin diminche à tertout, et surtoute à ches fanmes.

Un grind plaisi

Ah ! Qué plaisi qu'ed vir, durant quèks eures, des onkes et tantes, des cousins cousines et quèks uns ed leus éfants qu'os voéyons poin souvint.

Os prindons des nouvèles ed ches uns et ches eutes, et os in baillons étou, toute in buvant un keup o in matchant un tiot morcieu, insanne.

Os pensons à ches gins qu'os connoaissoème et qui sont mie lò o bin qui sont pu lò. 

Cho foait plaisi d'ête insanne, minme quanq, malureusemint, ch'est pour un interremint d'unne gin qu'os ainmoène tertoutes et tertous.

El famille est une canche.

Adé, m'tante ! A la rvoéyure ches eutes.

Unne fanme vut edl'argint

Qu'i sanne.

J'esplique.

Ièr, j'os prins ch'train pour aler promner. D'un keup, din ch'train, unne fanme passe din ch'couloèr in tnant din s'main unne catschète à l'invers.

Quèks minutes aprè, la vlò qui rvient, toudi avuc s'castchète din s'main et coèr sins dsu in dsou.

Adon, j'i foais sine d'arter pour i causer. Ale arte ed mèrcher et j'i dit :

- "Mdame, chi os voulez qu'os mettons edl'argint din vo'tchépi, feut mèrcher moinss vite."

Ale o ri, minme in étant ch'contrôleuse dech train.

Boinne jornée, et chi os voéyagez, in train, à piés o in voéture, boin voéyage.

Etpi coèr, seuchez rire et foaire rire. Chin quoé, apprindez.

 

Avant ch'premier dech moés ed marche

Innui aprè-nonne, adon j'avoais acaté del salade et du freumage, ech vindeus m'dit qu'ej pux avir troés uros dé rmise avant ch'premier dech moés ed marche.

J'i réponds :

- "Fin bin ! Coèr troés jours pour in profiter."

Erchète ed ches rabotes picardes

Ch'est un dessert, lonmé étou "punmes in kmise". 

Pour quat gins, i feut :

    - quat punmes,

    - unne pâte à tèrte feuilletée qu'os pouvez acater, o bin unne pâte berzillée qu'os foaisez vos-minme.

    - du chuke,

    - du bure,

    - del canelle,

    - ech ganne d'un u, ed vos glinnes chi possibe.

L'érchète :

    - kmincher pèr alunmer vo'four à chint-quater-vint degrés o thermostat sis

    - éplutcher pi vider ches quat punmes chin les décoper,

    - décoper quat carrès ed dis-uit chintimètes din l'pâte à tèrte.

    - mette adon unne punme pèr carrè, bin au mitan.

    - mette du chuke, un molet ed canelle et un molet ed bure din ch'treu ed ches punmes

    - rélver chake tchuin dech carrè ed pâte à tèrte pour couvrir l'punme avuc. Laicier un tiot treu in heut : os pouvez foaire unne tiote kminée avuc del pâte à tèrte qu'i reste.

    - avuc un tiot pincieu, mette dech ganne d'u chu chake punme.

    - mette à tchuire alintour ed trinte-chonc minutes.

    - aprè, os pouvez mette du chuke-glache dsu, pour foaire bieu.

Servir keud o froéd.

Assayez, régalez-vos, et disez-mi.

Boin accion.

El tirade dech cros nikdouille

Un onme rchut s'famille. Is sont in route à manger. 

Un jonne qu'est lò à tabe et qui pourroait dvenir chin ginde i dit :

- "... quoé-jou qu'os avez coési conme Champaingne ?"

- "J'os coési un fin boin Champaingne qu'o del tchalité, et granmint ed finesse, justémint." 

- "Kmint cho, justémint ?"

- "Ech contraire ed vos, justémint. Vu qu'os êtes fièr ed vos-minme, ej comprinds qu'ho fuche unne nouvèle. Os intchiètez mie, ej m'os aperchu innui eq j'étoais p't'ête conme vos. Mais, quand minme innui, justémint, quèk cose o cangé m'vie. Cho, ch'est pour vos dire eq cho put durer. Et ej crains eq pour vos, ch'est pèrti pour...

Ichi à tabe, d'autchuns vos truve'te dynamike, combatif, interprindant, audachieus, et d'eutes, euh... et juge'te qu'os êtes suffisant, fièrtchul. Riditchule. Et bin ches uns et ches eutes s'berlure'te. Quoé qu'os êtes est granmint pu simpe. Avuc ches mots ed chake jour, conme in langage surveillé, os avons un minme nom. : os êtes un cros nikdouille. D'unne spèce rère, jé rconnoais. Catégorie suprême, chtol-lò qui tchumule ch'cros nikdouille malgré-li et ch'cros nikdouille assuffi ed l'ête. I o granmint ed tans eq j'os mie rincontré un fin boin mélinge. Toutes em félicitations. 

Ete un cros nikdouille est mie vraimint un problinme, nan, chl'innui, ch'est eq ches cros nikdouilles vu'te l'foaire savoèr. Ch'est chl'usage intinsif qu'est pénibe. Et adon vos, os êtes dech ginre chin modération.

..."

Ech jonne vo tchitter ch'rpas. Et p't'ête l'famille. P't'ête, j'os poin rbéïé toute ch'film.

Ech reuve anméritchin

Ah, ches Anmérikes ! Echl'invie d'aler i vive, gaingner granmint ed dollèrs, visiter ches grinds canions dech Colorado, juer à Las Védjas, vir el blanke moaison, prinde eds avions pour aler ed lò à lò, ...

Cho foait reuver.

Nan ! Cho foaisoait reuver, i o quèks moés mais achteure, ch'reuve anméritchin o cangé. Ches gins, is reuve'te ed tchitter ches Anmérikes.

Maginez un groélindoé perdu in batieu aux alintours dech détroét ed Béring. A main gueuche, chl'Alaska, et à main droéte, l'Sibérie. Dò-jou qu'i feut miu aler ? I vo buser granmint.