Toudi ches minmes

T'os des gins, i vu'te ed l'argint. Tu leu espliques kmint foaire, et is comprinde'te mie.

In vrai, tu leu espliques kmint rimplir ches papiers pour avoèr eds aides, et ches cros nikdouilles, seuremint un cros molet arland, voudroai'te avir echl'argint chin rimplir conme i feut ches dotchumints.

Et in puss, is met'te in prousse. Ch'est toudi ches minmes. Qui s'met'te in prousse.

Feudroait casi eq tu  rimpliches ches papiers pour eus, qu'is rechuche'te echl'argint. Etpi is diroai'te mie merchi.

I o des keups, ej mé dminde chi un cinsier qui anmeneroait un carton ed fyin avuc unne deminde ed deus-chint-mile euros, il éroait p't'ête esn argint. Qué brin !

Mi qui su fiu et tiot fiu ed cinsier, ej l'os djò écris chu min blog, j'ainmoais ches cinsier. I o trinte ins. J'ainme toudi ches cinsiers, o quèks ins.

Mais pèrmi ches cinsiers qui font des vakes pour avoèr del vianne, j'os, achteure,mie granmint ed conmarades. Deus, troés, p't'ête !

Min lecteu, chi tu connoais des cinsiers avuc des vakes à vianne et qui sont des régalants, écris-mi.

Ch'est l'eure

Nan ! In vrai, ch'est l'saison.

- "Saison ed quoé?", qu'os vos dmindez p't'ête.

- "L'saison ed ches fleurs d'acacias", qu'ej vos réponds.

I o quèkes innées, ches acacias, j'ainmoais mie, vu qu'ho pique granmint chi os foaisons mie atincion.

Mais edpi troés ins, ej m'otchupe un molet ed ches moukes à mié. Et ech miu ed ches miés, ch'est ch'mié ed fleurs d'acacias. I o eds apiculteus, is trinshume'te leus moukes à mié et leus ruches din des cars pour els inmner din des indroéts ò i o eds acacias. Quanq ches acacias sont in fleurs.

Et lò, is i sont, in fleurs.

T'intindros rin chu ches photos, mais ej pux t'dire eq din min gardin, j'intinds ches oisieus, et étou ches moukes à mié.

Chi tu savoais mie pour ches moukes à mié et leu mié, achteure, tu l'séros. Fuche régalant ed mie keuper ches acacias chi t'in os mie dzoin pour foaire ed boins pitchets.

Et n'oblie mie eq ches abes lò ont ed grindes épinnes.

Unne fanme minisse cause

Verdi, à Bzançon, din ch'Doubs, unne fanme minisse o dit :

- "Ech rôle d'unne minisse, ale est ed....".

Ech rôle, et ale !

Os disons un rôle, qu'i m'sanne.

Pauve fanme minisse ! Il (cacouilles ed mi) o mie bin apprins à causer.

Bec à tertous. Et boinne fète à toutes ches fanmes.

Lçon ed prudinche

Ej vos mie vos causer ed ches confédérs ed ches Anméritches, mais ed ches confédérés ed Frinche.

Chi os connaissez un confédéré del confédération générale ed ches ouvreus, disez-li ed mie passer dvant mie.

Ch'est pèr prudinche pour li. Un keup ed malsaveur pourroait i arriver.

Des glinnes ureuses

Ah, ches glinnes ! Qu'ales sont ureuses quanq ales pu'te picorer din ches gardins o din ches cans !

Unne glinne ureuse t'baille ed boins us.

Mais ch'est mie souvint conme ho. Din ches grindes cinses, ches glinnes sont din des cages. Et malureusemint, des keups, t'os des cinsiers qui les soégne'te mie bin.

Mie, ej dis qu'os pouvons mette ches glinnes din des cages, mais in foaisant atincion qu'ales euche'te del place pour bouger conme ales l'voudroai'te, et qu'ales fuche'te bin soégner.

Quanq à ches cinsiers qui font mie atincion, feudroait les mette quèkes smangnes à l'place ed ches glinnes.

Chi echl'article rsanne à quoé qu'i o été dit edpi deus jours, ch'est mie un hésèrd.

Avons nos del canche

Ch'est quoé qu'ej mé dminde, in apprindant ièr qu'ech nombe ed gins qui trache'te à ouvrer o diminué.

Os kminchons pèr réponde eq ch'est unne canche, ch'est seur, pour ches soéçante-dis-mile pauves gins qui ont truvoé. Et ej su fin ureus pour eux.

Mais ranmintuvons-nos quoé qu'o dit not présidint !

- "Chi ej cange ech sin dech courbe chu ches gins qui sont à joke, ej mé rprésinteroai pour ête présidint à pèrtir ed deus-mile-dis-sèt." qu'o dit Françoés.

Et lò, ej mé dminde chi os pouvons dire eq ch'est unne canche.

In busant un molet, minme chi i vut ête présidint, ej mé dis qu'i o granmint ed canche qu'il ne sro mie un deusienme keup.

Boinne jornée à tertous.

Mes tiots éfants

Un bieu-frère est un taïon edpi miu d'un in,
Un eute bieu-frère, chincante ins in juillet,
Sro taïon avant déchimbe.

Eds amis sont taïons edpi quat o chonc ins,
Edpi qu'is ont étou chincante ins.

Min cousin, min frère,
Etoai'te taïon avant d'avoèr leu chincante ins.

Et mi, miu ed chincante ins edpi quèks innées,
Avuc eds éfants qu'ont miu ed vint ins,
Et des keupsmiu ed vint-chonc ins,
Ej reuve d'avoèr des tiots éfants.
Ej reuve ed pouvoèr les prinde din mes bros,
Ej reuve ed juer avuc eus chu min dos,
Ej reuve ed leu construire unne cabane din ches abes,
Ej reuve ed leu lire des contes,
Ej reuve ed leu conter m'vie,
Ej reuve.

Et j'ainmeroais miu nn'mie reuver,
Mais les avir pour ed vrai.
J'ainmeroais les avir
Avant d'ête fin viu.

Mais i m'sanne qu'ej reuve.

O-jou eq Martine est

Martine, j'in connais, et t'in connais. Unne, deus, troés, quat et p't'ête miu.

Mi, per eximpe, j'avoais unne bèle-soeur qui s'lonmoait Martine. Malureusemint, morte i o un in. Et edpi, j'os ches troés filles conme nièces. T'os mie comprins, ch'est bin possibe. Ej pux mie t'esplitcher, ho prindroait granmint ed tans. Mais ch'est vrai.

J'os étou l'fanme d'un onke à m'fanme.

Etpi, i o l'Martine ed Lille. Mie vraimint m'conmarade.

Mais innui, ej trache unne fanme qui s'lonme Martine, qui vit o vivoait alintour d'Hin din l'Sonme, et qui un jour m'o foait rire quanq ale o foait tchair un balai din ches escaliers à l'moaison ed mes pèrints. Ale o alorss dit :
- "I o mie mort d'onme."

Et mi d'i réponde :
-  "Chi Martine, i o mort d'onme."

Min père étoait mort edpi deus jours et mie interrer. Don, à l'moaison.

- "Brin !" qu'ale dit alorss.

Et os avons ri.

L'Martine lò étoait fin régalante et os avons souvint ri insanne.

Mais diminche, m'mère m'o dit eq Martine étoait pèrtie et qu'em mère n'savoait mie ò.

Don, ej lance unne tiote annonche :
- "Chi t'es l'Martine-qu'o-foait-tchair-un-balai-et-qu'o-dit-qu'i-avoait-mie-mort-d'onme, o chi tu l'connoais, met mi un tiot message."

Bec à toutes ches fanmes, à pèrt unne, qui s'lonme'te Martine, et à min frère.

Ouvrir unne fernète

Pour ouvrir unne fernète, feut, ch'est seur, qu'i o unne fernète. Et ch'fernète, ale est dvant un treu. Chin quoé, ho sert à rin.

Magine !

T'os un mur, chin fernète. Ti, tu vux mette un eute mur, fin bieu, pour avoèr puss keud din t'moaison. Mais t'os mie ed fernète.

Alorss, t'artes ed monter ech mur, et tu mfoais un tiot treu. Pi un cros treu.

Achteure, tu pus définir ed monter tin mur. et seulemint aprè, mette unne fernète.





T'os vu, ch'est fin aisié à foaire. Qu'i t'sanne !

Rmèrque : puss ho vo, moinss i foait ed lunmière.


Chi t'os vraimint ech baccalauréat qui kminche innui, boinne canche à ti.

Chi t'os tes ages edman et eq tu connais Guemlu, cros becs à ti.

Jou eq vos connaissez

"Vu qu'os alunmons ches étoéles,
Ch'est qu'ales sont pour unne gin nécessaires ?
Ch'est qu'il est indispinsable
Eq tous ches soirs,
Ach édsu eds ches toèts
S'mette à terluire tout' seule au moinss
Unne étoéle ?"



"Ej sroais ureus ed t'offrir un juet dis keups puss cros, chi aprè tu souris."



"Minuit, rabzinant, un coutieu à ch'man,
O achaindé
Et égorgé
Ech dousienme eure,
A l'cour !

Ech dousienme eure est tcheue,
Conme dech billot ech tète dech condanné."

Tout ho, ch'est eds extraits ed poèmes ed Vladimir Maïakovski, poète russe mort à trinte-sèt ins, in mile-nu-chint-trinte. I o granmint ed tans.

Il pèroait qu'il éroait dit, avant ed moérir :
- Ech brin, fossile ed not tans".

A vos ed démucher, in lisant.

In causant ed russe, ho m'faoit pinser qu'i feut qu'ej érprinche m'carte ach pèrti communisse.

Présint ed mèriage

J'os unne fille qui mèrie ach moés d'eu. Unne première. Pour not famille, et pour ale.

Qui dit mèriage dit présint à foaire.

Ches deus cadoreus, aprè leu mèriage, is ainmeroai'te aller visiter l'Egypte quèks jours.

Dech keup, ej vos foaire eds écononmies ; Ej vos mie ruer echl'argint pèr ches fernètes. O pèr ches avions.

Etpi, i o granmint d'eutes bèlés coses à vir din ch'monde. Et in Frinche. Pèr eximpe, et pour kmincher, l'Picardie.

Ej pinse granmint à ches familles ed ches gins morts ièr.

Pour foaire plaisi à unne fanme

... tu pux i offrir des cadieus. Pour Noë, ech nouvèle innée, ches ages, ch'fète. Ale ainme.

Tu pux étou i acater des fleurs. Mie souvint, vu qu'ho i froait alorss ed moinss in moinss plaisi. Et ti, tu vux i foaire plaisi. Don, des fleurs, ed tans in tans, mie toudi.

Etpi, tu pux i tracher chin point G. Chti qu'o démuché ho in premier doét ête unne gin ed not bèle et grande région, ch'Picardie, vu qui s'lonme Grafenbergh. Ch'est un nom bin d'amon nos, conme Vandanbergh, Arenberg, Haverskerque, Coudekerque-Branke, Verpesch, Blaringhem, Steenwerck o Boëseghem, pèr eximpes.

Pour l'tracher ech point G, i feut unne fanme eq t'ainmes granmint et qui t'ainme granmint étou. I sanne eq toutes ches fanmes in o un, ed point G, mais tu pux l'démucher eq chi ale t'ainme granmint.

Pour kmincher, feut qu'ech fanme inlève ches vetemints, qu'ale fuche don mer-nude ; tu comprinds achteure pourquoé qu'i feut qu'ale t'ainme granmint.

Pour t'éviter ed perde tin tan, ech point G est mie din l'bouke ed ches fanmes. Foais lò soin !

Pour définir, vu eq t'os p't'ête invie d'aller démucher chti det fanme o de t'boinne voésine, feut savoèr qu'ech point G est fin tiot. Alintour d'un chintimète ed diamète. Don, boinne canche à ti.
 
Chi tu n'in truvoes, écris-mi.

Ej su célèbe

... et ho m'foait plaisi. Minme chi ej su coèr, et sros toudi, modeste.

Ej pinse eq ch'est avuc min blog qu'ej su édvenu célèbe.

Pourquoé ?

Os savez qu'ej reste mie in Picardie, minme chi j'i su né et eq min tcheur i est, ech cancheu.

Don, i m'arrive d'aller vir m'mère o mes frères, mes onkes et tantes, mes nveus qui i vive'te.

Eh bin quanq j'i vos, i o des gins qui poaye'te pour vnir avuc mi. Et étou pour rintrer avuc mi.  Et ches gins lò, vu qu'is sont fin impressionnés, is di'te rin in voéture.

Ch'est bieu !

Invie ed lire

I o uit jours, j'os oblié m'tète amon m'bèle-mère. Mais ej su mie mort. Ch'est unne espression.

In vrai, j'os ringé ems afoaires din m'valise, mais j'os oblié ed mette m'valise din m'voéture.

Tiot brin !

Et din ms'afoaires, i avoait un nouvieu live qu'ej venoais ed kmincher : Limonov. N'mie confonde avuc Molotov !

Don j'étoais chin live. Cros brin !

Verdi, ej vos din unne boutike et j'os truvoé granmint ed lives écrits pèr des gins ed ches Anmérikes dech sud. Ho m'o plu. J'os acaté un live qui s'lonme "echt onme qui ainmaoit ches tchyins."

Verdi au vèpe, ej kminche à l'lire et sinmdi, os pèrtoème. J'os ieu granmint ed mau à arter de l'lire. Fin boin live.

Pour vos bailler invie, ho kminche in Sibérie, et ej croés qu'os allons aller à La Havane.

Ej vos in causeroais p't'ête.

Boinne jornée à tertous.

Merlimont

Continons d'apprinde à connoaite des tiots villages ed Frinche, et surtoute dech Picardie o alintour. Innui, Merlimont.

Din ch'dépèrtemint dech Pas-ed-Calais, inter Berck et Ch'Touquet.

J'avoais sis ins. Min frère, chonc. Et os étoème in vagances à Merlimont. Un moés ed colonie. Magines !

Ej me ranmintuvoe eq tous les jours avant de s'mette au lit, falloait s'mette mer-nud ach beu dech lit, qu'os sonmes allés un keup à ches mers qu'étoai'te loin, i m'sanne, et qu'aprè, granmint ed ches éfants avoai'te ieu des maus.

Ej croés eq min frère étoait fin ureus qu'ej fuche lò, et mi, ch'est seur, j'étoais étou fin ureus de l'vir. J'in vux mie à mes pèrints ed nos avoèr mie lò, Ej leu in voudroais janmoais, mais min frère et mi avons granmint brai.

Vlò quoé qu'os avons, min frère et mi, conme souvnirs ed Merlimont.

I o étou unne cacouille qu'os avons apprins à Merlimont et qu'os avons foait à not mère quanq os sonmes rintrés à not moaison :

- "Ch'mère, tu l'os foait braire !"

- "Qui ho ?"

- "Ech vake qui rit !"

Ej su janmoais rtorné din ch'village. Ho viendro p't'ête ! L'eute keup, in allant à Etapes-chu-ches-mers, os éroème pu. Sro p't'ête pour un eute keup.